بداية

رواية خنجر بين الاضلاع -2

رواية خبيني - غرام

رواية خنجر بين الاضلاع -2

غلبت القوة ضعفي..لا أستطيع جر حروفي أكثر..
-سلطان..
كان سرحان وأول ماسمع صوتي التفت لي..
-عيونها..
-انت بتملك اليوم صح..؟!!
أدري ان سؤالي غبي لكن كنت متعلقة بخيط أمل واهن..كنت أتمنى لو أسمعه يقول ..
لا..أنا ماراح أتزوج..مين قالك..أنا لك طول العمر..
مسك ايدي وشد عليها..
اااااااه ماابالغ اذا قلت اني اتكهرب اذا لمسني ما ابيه يلمسني كرهت قربه الي يعذبني..
كل ما أحاول أتقوى وأعيد حساباتي في حضنه ..ألاقيني بعدت أكثر واكثر..
ايده الي كانت الربان الي يقود سفينتي في بحر الحياة..الحين اعتبرها الخنجر الي يقتلني..
طيف مجنون يحول أقل لذة أحسها معاه إلى عذاااااااب لما افكر ان هالشي بيصير مع غيري..
يومين وانا مااقدر انام ..من قالي عن خبر الخطوبه وأنا أجفاني ماالتقت..
افكر بكل شي..وأي شي..
ابتعدت عنه ..ماصرت احضنه وننام ..اااااه اشتقت لحضنه الطاهر..لحضنه الي يحويني أنا وبس من دون أحد ثاني غيرنا..
حتى هو حسيت انه مايقدر ينام..أنا عارفه انه النوم يستحيل عليه اذا ماكان بقربي..
اعرف بهالشي..بس مو تقصير مني أو انتقام الي جالسه اسويه..
أنا تعباااااااااانه لازم أخذ نفس بعيد عنه علشان أعرف أفكر بستقبلي..
ويمكن علشان أعود نفسي على بعده عني يوم كامل..أنام وحدي بهالبيت..
اااااه وحدي..أعيش ..ووحدي اموت..
يارب ساعدني..
.
-سلطان ..لازم كل شي يكون واضح من البداية..أنا صح طلبت منك تتزوج لكن مايعني اني تنازلت عن حقوقي..
أنا تنازلت لأن هالشي من حقك وما أبي احرمك منه..فأرجوك لاتحرمني من حقي فيك..
اعتدل في جلسته وهو يضغط على ايدي..
-هديل..أنا والله العظيم أموت على ترابك ومو مقياس اني اتزوج يعني مااحبك..وعلشان ماأجرحك دورت على وحده أقل منك بكل شي..
أكبر منك بأربع سنوات..ومطلقه ..غير كذا غريبه عني..مهما حبيتها مستحيل حبها يوازي حبك..
خنقتني العبره وأنا أقول
-بس أنا خايفه تنساني..
-جعل ربي ينساني ان نسيتك لحظه..هديل افهميني..والله حبك في كل خليه فيني ..يجري مع دمي..
-ايه بس لازم نتفق على اشياء قبل ما تملك..
- حبيبتي ..امري..والله لألبي لك كل طلباتك لو على موتي..أنت عارفه ان هالشي مو بإرادتي..والله لو ما أمي الي مابقالي في الدنيا غيرها لأعيش أنا وأنت لوحدنا طول العمر..
اااااااااااه ((لوحدنا طول العمر..؟!!))
ياليـــــــــــــــــــــــــــت..الله يسامحك ياخالتي..بس كمان من حقها تشوف عيال ولدها ..
-سلطان ..أنا مجروحة ..والله قلبي ينزف..صعب علي اني اتنازل عن نور عيوني..لكن كل هذا علشانك..لوما أحبك والله لأطلب الطلاق ..
حط ايده بسرعه على فمي..
-هديل..أرجوك الا الطلاق..والله مااقدر اعيش من دونك..واذا وصل الموضوع لطلاق..أنا مستعد اني أوقف في وجه أمي وما ألبي رغبتها ولا أتزوج طول العمر..بس أرجوك ما أبي أفقدك..
أفهميني..
-لا سلطان ..مو أنا الي افرق بينك وبين أمك..وكمان أنت من حقك أنك تتزوج دام العيب فيني..
سكتنا شوي..بعدين قلت..
- وأنا كمان مشتاقه أشوف أولادك..
- ياحبيبتي..هديل ..والله أنت نعمة عمري مايكفي أشكر ربي عليها..
- المهم سلطان..أنا بقلك كم شرط وأتمنى أنك ماتزعل مني..
- من حقك ..قولي الي تبينه ..عيوني لك..
- أول شي..أنا الحين ياسلطان مجروحه..وأنزف..ماأقدر أكابر أكثر..ولا أتحمل شي فوق طاقتي..أنا أبيك تبتعد عني هالفترة..ماابيك تلمسني..
مو أنانية مني ..أو انتقام بالعكس ياسلطان..بس انا مااقدر الحين..خل جروحي تبرا..
غمض عيونه بألم ..كأنه كان يتوقع هالشي..واكتفى انه هز راسه موافق..
-ثاني شي..اذا تزوجت ...زوجتك ماابي اشوفها..ولا يصير بيننا أي مقابله أو احتكاك..أنا مااتحمل ..كفايه علي الي يحصل بعيد عنها..انا ما اقدر اشوفها..
-حاضر..الي تامرين فيه..
-اخر شي انا أبي اسافر لأمي..محتاجتها ياسلطان..أبي أتنفس..أبي أريح شوي وأعيد حساباتي.. مهما كان أنا بشر..أغير جو عندها وأرجع..
-ان شاء الله ..متى تبين تروحين..
-بأقرب فرصه لو بكره..
-اااااه ياهديل..والله ماادري انا اواسيك والا اواسي نفسي..والله فراقك صعب ..كيف وانت مجروحه ..هالشي بيقتلني..
.
.
بعد العصر..كان الموعد الي تمنيت ان ربي اخذني ولا أشوفه وهو يلبس ويكشخ علشان يروح يخطب..يارب..أنا بشر..والله قلبي لحم ودم مو حجر..
ااااااه يارب اربط على قلبي.. توضيت وصليت ركعتين..وأنا ادعي ربي الي مابقالي غيره..
يارب..أنا ماتحمل..يارب..انت تعلم اني مافعلته الا لرضاك علي..ياربي..ساعدني..ساعدني..اربط على قلبي..ارزقني درجة الصابرين..
.
كنت أدور أي شي اشغل نفسي فيه ولا اشوفه وهو رايح يخطب..فتحت الاب توب وجلست اكمل تصميم هجرته من اسابيع..
الخطوط اشوفها متشابكه..الشاشه ضبابيه ..مااشوف..ياااارب رحمتك..
وصلني ريحة عطرة قبل مايدخل..
-هديل ..خلاص حجزت لنا بكره بعد الظهر الرحله..
رفعت راسي..ااااه ياربي ثبتني..كاشخ على الاخر..
ايش قال..؟!
-أي رحله..؟!!
-هديل حياتي..نسيتي..بنروح لأمك..
-اه تذكرت..حلو ان شاء الله اجهز اغراضي..بس..في اشياء ابيها من السوق..
-اوكي بخلي هند اختي تروح معاك انا بمرهم الحين باخليها تجيك..
-لا
-ليه..؟!
وتسال..انا ماابي ابين ضعفي لأحد..مو ناقصني احد يتفرج علي بيوم ملكة زوجي..
-أجل بطلت ماني رايحه مكان..
-لا حياتي ليه ماتروحين..خلاص اذا ماتبينها روحي انت..برسلك سواق اهلي..
-ليه انت وينك..؟!!
رجعت لأسألتي الغبيه..يعني وين بيكون بالله ..أكيد عند العروسه وأهلها يحددون معاهم كل شي..
-امم لا انا خايف أتأخر عليك..لا تنتظريني..
طلع من جيبه فلوس تركها على الطاوله..
-حبيبتي ..لو نقصك شي كلميني وانا احول لك..
ماناظرته..بس هزيت راسي موافقه..
اااااه ريحة عطره تدخل لقلبي وتقطعه..ريحة عطره..تذكرني لما جا يخطبني انا....ياااااه كيف الفرحة تموت فينا..!!
قرب مني..وباس راسي..
-استودعك الي خلقك..
غمضت عيوني..حسيته يودعني للأبد..هذي اخر مره يطلع فيها من البيت وهو ملكي انا وبس..بيرجع وهو ملك لغيري كمان..ااااااه ياربي..ماابي افكر..
.مرت علي الساعة الأولى بعد ماطلع أسوأ مماتوقعت..حاولت أشغل نفسي بأي شي..
أفتح التيلفزون..مااني قادره اركز بشي ..كل شوي اناظر الساعه..دخل الحين يشوفها والا باقي..؟!!
.
.
ملك والا باقي..يارب ساعدني..فكرت اروح السوق..اتسلى شوي واشتري هدايا لأمي واخواني.. بس انا خايفه ..ومتوتره..أنا دايخه وانا هنا بالبيت واخاف اطلع وادوخ برا..
رن جوالي..فزيت..ركضت اجيبه..أول شي جا في بالي هو..يمكن يقولي صار ظرف وخلاص مابملك..(متفائلة)..
رفعت الجوال لقيتها امي..
-هلا يمه ..هلا بتاج راسي..
-هديل ويــــــــــنك يمه ماصرتي تدقين..صار لك 3 ايام ولا حس ولا خبر..
أنا وقتها تذكرت اني ماكلمت امي الا صباح الثلاثاء الي خبرني سلطان بخطبته بعدها
وانشغلت عن امي..
-فديتك يمه ..سامحيني..
-شلونك..ايش في صوتك مخنوق...
اااااااه يمه لو تدرين فيني..اااااااه يمه..
- يمه انا بجيكم بكره ان شاء الله
-خير يمه ..صار بينك وبين سلطان شي..
-لا يمه ..بس وحشتوني..
حاولت ادافع عبرتي واقولها ..لكن ماقدرت..يمكن كان عندي امل ان سلطان يرجع بدون مايملك..
-صدق ياهديل..ماادري ايش فيني ماني مصدقتك..
-شدعوه يمه..اخبار اخواني كلهم..
-كلهم زينين..يمه فيك شي..
-وراك يمه..قلتلك مافيني شي..
-زين هديل بغيت اخذ علومك...أجل متى رحلتكم..
-بعد الظهر..
-يالله يمه انا بروح اشوف أبوك واخوانك..
-سلمي عليهم كثير
-ان شاء الله ..في امان الله..
- في حفظ الكريم..
.
.
على الساعة 12 تقريبا..كنت جالسه على السرير وحاطه المصحف في حضني واراجع حفظي..سمعت صوت الباب..تجمدت الايات على لساني..اااااااه وصل..يكفيني عذاب ياسلطان..رجعت ..شلون بناظر عيونك الي شافتها..شلون بمسك ايدك الي صافحتها..؟!!
قووووول..؟!!
-السلام عليكم..
اه ياربي صوته يعذبني..
رفعت راسي..كان في عيونه كلام كثيييييير..كانت مدمعه..وقف وهو يناظرني..
-هـ ــ ـلا
تقدم ورمى غترته ..وجلس جنبي على طرف السرير..
-ااه ياهديل والله فوق طاقتي الي يصير..
-ايش فيك..
-هديل انت مسامحتني..؟!!
-اي حبيبي..من حقك..
كنت خايفه اسئله ..ملك او لا..
-هديل لا تذبحيني..والله الي اشوفه بعيونك عذاااااب..
- سلطان ايش تبي مني اكثر من كذا..انا مابينت لك شي..حتي الي داخلي تبيني اذبحه..
-لا ..بس..اااه ياهديل..ايش يصير فينا..
استجمعت قواي وطلعت حروفي..
-خلاص ملكت..؟!!
سكت ..ااااه ياربي..ملك..بهالحظه أنا واياك ياسلطان معانا شخص ثالث..
-مبـ ـ ـ ـ ـروك
ابارك لك حبيبي وانا افقدك..أباركلك..وانا احس شرايني تتقطع..ابارك لك املك الي بتحققه من غيري..
-الله يبارك فيك حبيبتي..امم اتفقنا على الزواج بعد شهر..
يارب انا مو وين اجيب الصبر..من وين وانا اسمعك تقتلني بحروفك..
سكتنا فتره طويله ..ضميت ركبتي لصدري وانا حاضنه المصحف ..ابي احس بالامان..
-اتصل علي السواق يقول انك رفضتي تروحين..ليه..؟!!
-لا خلاص ..بطلت..كنت بأشتري لأهلي هدايا بس خلاص..دام اني بروح روحه مستعجله..
- ولا يهمك حياتي اذا وصلنا هناك نشتري قبل نروح لهم..
-لا ..انا ابي اروح لهم على طول..
-قصدك تبين ترتاحين مني بسرعه..
رفعت راسي بسرعه..فاجئتني كلمته..لقيت عيونه تدمع..
-اقوى مني الالم ياسلطان..والله اقوى مني..انا ماابي اعذبك بتصرفاتي معاك..
خليها (هدنة مشاعر)..نرتاح من الضغط..أنا اغير جو واجدد علشان ارجع بنفسيه احسن..
وانت تجهز نفسك للزواج..
-هديل..شلون بصبر عنك




.. أعدكم أن أعود
.

ماراح اطول عليكم ,,وبكمل معاكم القصة ،،أدري متشوقين تعرفوا باقي الاحداث..
وشكرا لتفاعلكم وردوكم ...


كنا في الطريق لبيت اهلي بعد ماستقبلنا ابوي..في السيارة كنت انا وابوي نسولف
وسلطان ساكت..واذا سأله ابوي يجاوب ويسكت..الي مايعرفه سلطان ان اهلي للحين مايعرفون..ويمكن كان متخوف علشان كذا مايتكلم..هدنة المشاعر بدأت من امس..كلامنا صار قليل مع بعض..لكن كلنا نتعذب..حاسه فيه انا..مو قادر ينام..كله يتقلب على الفراش..الي عذبني انه مشتااااق لي بس مو قادر يقرب مني بناء على طلبي..امس حط ايده على شعري وبعد لحظات شالها..انا ماابي احرمه..ولا ابي انحرم منه..لكن مو الحين ياسلطان ..أنا تعبانه..
حاولت اتحاشى نظراته الي تذبحني..احسه يتابعني بعيونه وانا ارتب اغراضي اليوم الصباح..وكل مالتفت له ناظر شي ثاني..
.
.
بعد ساعتين من وصلنا بيت اهلي كنت انا عند امي واخواتي وسلطان مع ابوي واخواني في المجلس..
دخل علينا ابوي واخواني ..
-هديل يبه ..زوجك يبي يودعك ..بيمشي الحين..
ماس كهربائي سرا في جسمي..ااه ياسلطان والله فراقك ما اقواه..بس احسن لك ولي..
-ان شاء الله يبه..
قمت وانا في الطريق تسحبني اختي وتهمس
-عاد لا اوصيك ودعيه زين هاه..ههههههه
من جد في هالدنيا ناس ماتدري عن شي..اودعه زين..والله مناي ماافارقه لحظه..
دخلت عليه وكان مبين انه تعبان..حاط راسه بين ايديه..اول ماسمعني ..رفع راسه
وابتسم لي..
-هلا ..هلا بروحي..
حسيت ان كل حرف يطلع من قلبه..ااااااه ياسلطان والله ماابي اعذبك..اسفه حبيبي والله ماتهون علي..
قربت منه وجلست جنبه..
سكتنا شوي..
-هديل رحلتي بعد ساعة تقريبا..تامريني شي..؟!!
ناظرته ..كانت عيونه الي تتكلم..كان يقولي حرام عليك ..حتى انا مو ذنبي..
كان يقولي..ماابي ارجع لوحدي..محتاجك..
بعدت عيوني عنه ..مااقدر اناظرها اكثر..كلنا نتعذب بدون ذنب اقترفناه..يارب انت ادرى فينا..ساعد قلوبنا يارب..
-انا اسفه سلطان..
مسك ايدي..
-حبيبتي من حقك الي تسوينه لا تعتذرين..انا الي اسف..اسف اني عذبتك معاي..انا مااستاهلك ياهديل..
-سلطان ..أرجوك ..الله يخليك ...لا تقول هالكلام الي يصير مقدر ومكتوب لنا..
-ااااااه ياهديل ..ماطاوعك قلبك حتى تقولين لأهلك..خايفه علي وأنا أأذيك..
-خلاص حبيبي..أرجوك..خلاص..أنا بقولهم بعد ماتسافر..وأنت لا تشغل نفسك فيني..أنا معاي ربي..
-اوكي قلبي..انا بحولك مصروفك اول مااطلع..وراح اتركك هنا حتى تتصلين فيني واجيك..أبيك ترتاحين..بس أرجوك لا تطولين علي..أنا محتاجك..
-ان شاء الله ..
وقف..ووقفت معاه..مشى خطوتين ووقف..
-هديل..
-عيونها..
-أرجوك..والله محتاج..مافيني حياة..
عرفت ايش يقصد..رغم الهدنه الي حددناها ..لكن رحمته..حنيت عليه..حسيت انه طفلي الي ماولدته محتاج حضني..
هزيت راسي اني موافقه..
رجع لي على طول وحضني بقوووه..اااااااه يااااربي..بيذبحني هالانسان..نبضاتنا زادت..من زماان حبيبي عن حضنك الصادق..بدأ يبكي..دموعه زلزلتني..دموعه قطعت اخر قناع كبرياء لبسته..بكيت معاه..ااه مااصعب فراقك..وما أصعب قربك..قلي حبيبي..أي واحد فيهم اختار..؟!!
ابعد عنك...والا اجيك وانت مع غيري..
-هديـ ـ ـل..بشتـ ـ ـاق لـ ـك..
حضنته اكثر..كان امنيتي وقتها اني ادخله بين ضلوعي..هناك بيكون في امان..مافي احد معانا..
بكيت في حضنه ..بكاء المسجون بذنب غيره..بكاء الزوجة الي تهدي زوجها لغيرها ومابيدها شي تحافظ عليه..
ااااااه ياربي ..وين الاقي الصبر ويــــــــــــن؟!!
حبيبي صدره يشهق..ومع كل شهقه يقطع شرايني..روحي تتقطع مع انفاسه..
ابي اموت بهالحضن..!!
محتاجته يضمني طول العمر..ماابيه يروح لغيري ..ماابيـــــــــــــــه يروح لغيـــــــري
.
.
كانت تقرأ مجله..بعد دقايق تركتها وسألتني..
-هديل..
-هلا..
-ايش فيك..؟!!
-انا ..مافيني شي..؟!!
-تضحكين على مين..هديل الكل حاس ان بينك انت وسلطان شي..
-روان الله يرضى عليك انت طفله وماتدرين عن شي..
-طفله في عينك..دخلت الــ19 وانت تقولين طفله
-هههههههههههه حتى لو كبرت تضلين ماتفهمين شي..
-لا من جد ياهديل انا دخلت اليوم على امي وابوي وهم يتكلمون فيك..والله ياهديل الكل قلقان عليك..انا طفله مايخالف..بس ايش تفسرين زيارتك المفاجأه ..وسرحانك..
والا دموعك بعد ماراح سي العمده..
ذهلتني روان بكلامها..يعني الكل حاس ان في شي..
.
.
بكيت في حضن امي ساعه او اكثر..بعد ماشكيت لها همي..
شاركتني امي وخواتي الدموع..ابوي كان يسترجع..ويصبرني بكلماته الثابته الي تربيت عليها من انا طفله..اخواني في البدايه ثاروا..والي يتوعد ..والي يحلف اني ماارجع له..لكن كلمات ابوي بعد مااخذني في حضنه هدت الكل..وانا اولهم..
.بعد ماحطيت راسي على المخدة..انهدم سد الذكريات علي..تذكرت وانا

يتبع ,,,,
👇👇👇
تعليقات
    حجم الخط
    +
    16
    -
    تباعد السطور
    +
    2
    -