رواية برد وجفا ونسمة هوى -35



رواية برد وجفا ونسمة هوى - غرام


رواية برد وجفا ونسمة هوى -35

اللي يعرف باحاسيس الوليد يقول هو يعرف مكان اخوه يوسف..وواثق كل الثقه انه بيحلصه يوم من ألايام..!!
لكن اللي محد يعرفه انه كل هذا مجرد امنيات واحاسيس ممكن أنها تكون حقيقه وممكن تكون تخيلات..!!
عشان كذا محد يعرف السبب الخفي اللي يكنه الوليد داخله الا أخته ابتسام وثامرصديقه ..


مسك يوسف مكان قلبه بقوه..واستنكر هالتغلبات اللي يتخيلهاهالأيام.يحس بقلبه بيطير..أو بينتزع من روحه..وهالأحاسيس صار متعود عليها..لكن شعوره كان غريب ..يحس بفرحه وبنفس الوقت بحزن فظيع..مش عارف كيف يفسر شعوره..!!
حتى مزاجه صار غريب هالفتره..!!ساعات يحس كانه طير على وشك التحليق لسما عاليه عليه..وساعات يحس كأنه العصفور اللي بعشه ومحروم من النور..وفي كلا الحالتين هو عايش وراضي بحكم ربه..!!
رفع عينه لــ لؤي اللي كان توه داخل الشقه وحامل معاه أكياس وعلى طول ابتسم له وشال أيده من صدره..\ياهلا والله..
بادله لؤي الأبتسامه وعلى طول أرخى كل قواه بالكرسي اللي قدامه والأكياس طاحت بالأرض\أووووف تعب والله..احنا لازم ناخذ لنا سياره على قدنا..!!
رفع يوسف شعره الطويل اللي يتخلله الخصلات البيضا اللي بدت تحتل قسم كبير من شعره الخفيف\لاوالله..ومن وين لنا الفلوس..طايحين على بنك وأنا ماأدري..!!
ابتسم لؤي على سخرية يوسف الواضحه\لا طايح على عبير,,!!
تذكر يوسف صديقة لؤي الجديده اللي تعرف عليها من أيام وكانت أردنية الأصل تدرس في فرنسا عشان تكتسب لغه فرنسيه..وأنعجبت في لؤي يوم دخلت مع صديقاتها المطعم اللي يشتغلون فيه..وأول ماشافته وهي متعطشه للحب وخصوصا لأنه عربي وجميل بنظرها..
لؤي\تدري وش احسن شي بالموضوع..!!
يوسف\شنوا..!!
لؤي\انها ماشافتك..لأني أعرف اذا بس طاحت عينها عليك بتنساني وبتنسى أني موجود أصلا ..
ظحك يوسف على حال لؤي وتذكر سيلينا..وحمد ربه انها ماأقتحمت حياته بعد أخر موقف بينها وبينه\أقول قوم وحط لنا العشاء تراني حدي جوعان وانتظرك من زمان..!!
قام لؤي للمطبخ وحط ألأغراض بصينيه وجابها لــ يوسف\الله والأغراض عاد..أنت كثير عليك جبنه فرنسيه وخبز محمص..!!
ظحك يوسف براحه غريبه\وانا راضي كل الرضا..!!...أهم شي تكون وياي..
وبدى يوسف ياكل ولؤي يشاركه في الأكل وبنفس الوقت يختلس نظراته له وكملته الأخيره ترن في أذنه..
يكفي أنك وياي
يكفي أنك وياي
وبدون شعور تكلم وهو يهمس له\..وانا ويــاك..
ظحك يوسف على لهجة لؤي الهاديه وتوه يحس بمدى تأثير الكلمه عليه..



كان الوضع بين مبارك وتركي متوتر والرسميه صارت ماخذه حيز كبير في تعاملهم..وكأنه هالسنين الصداقه اللي مضت أنمحت في يوم وليله..وكل هذا بسبب رد تركي الجاف على مبارك..وأخذ موضوع دراسة راوين عذر لأقناعه في تأجيل سالفةالخطبه..وبكذا تسكر الموضوع لأجل غير مسمى للطرفين..
واليوم موعد رحلة تركي لدبي ومبارك موجود معاه بمطار الملك خالد..
تركي\اذا دق عليك عميل المنتجات وطلب فلوسه قول له أني مسافر وبرجع خلال هاليومين..
مبارك\واذا طلب رقمك..!!أعطيه اياه..!!
تنرفز تركي..من متى احد يعرف رقمه الشخصي..صج غبي\شفيك مبارك..!!ياأخي تصرف مو كل مره بقولك لاتعطي أحد رقمي..!
عض مبارك على شفايفه بقهر..ومايدري متى ينكسر غرور وجبروت تركي \أوكي نسينا..أي أوامر ثانيه أستاذ..!!
تنهد تركي ومسح على وجهه كالعاده اذا تنرفز..
مايدري ليش ماهو طايق مبارك هالفتره..وكل مايتذكر أنه طلب أيد أخته..يتجمع الدم كله براسه..!!
مايدري ليش هالأحاسيس الغريبه,,!!
وين الصداقه...معقوله تنتهي بموقف واحد..!!
شالتناقض اللي يعيشه تركي..!!
وليش..!!
وليش جاء بهالوقت..!!
اسئله كثيره مش عارف لها جواب..!!وتصرفاته صارت غريبه..!!
تناقض..
تركي يعيش بحالة تناقض...


طيب ممكن تهدين اللحين..!

مسحت ابتسام دموعها بالمنديل اللي تبلل دموع\ماأقدر..انتوا مو حاسين..!!
ابتسمت فجر لها..اذا هي مو حاسه فيها..أجل منوا اللي بيحس ياابتسام..؟
فجر\يعني هذا رأيك فينا..!!
تأففت ابتسام بضجر..وكرهت لسانها اللي يدوم يزل\لا ..هذا موقصدي..لكن انا متضايقه يافجر..من زمان وأنا اعرف والتفكير أتعبني..ومو لاقيه احد أشكي له..كنت اشوف ابوي حزين وساكت كالعاده..وبنفس الوقت أشوف الوليد يرتب أموره ومتوتر..وأنا اللي طايحه بينهم..مش عارفه كيف اتصرف..والا مين أكمله عشان يريحني...كنت ضايعه يافجر..كنت أتمنى ذيك اللحظه تكون امي بجنبي تسمعني واسمعها..وكل واحد فينا تهون على الثانيه..
لكن لا امي موجوده..ولا احد موجود يسد مكان امي عندي..!
واليوم يأست وماقدرت استحمل وبدون شعور بكيت يوم حسيت بنبرة الدفا اللي بصوت جدتي...وكانت كل قواي انهارت وكأني زي اللي منتظره أي كلمه أو نظره عشان أفرغ اللي بداخلي..
صعب.صعب يافجر تحسين باللي كنت احس فيه..
حسيت بالغربه طول هالأسبوع اللي فات..وكنت أشفق على حالي..
ومالقيت..مالقيت غير جدارن تحاوطني من كل جهه..وتشهد لحظات صمتي وعذابي..
أكره هالأحساس يافجر..أكرهه..
أكرهه الغربه اللي مصاحبتني وكأني مأسور لها..
وهالغربه اليوم بتبعد عني الوليد..اللي طالع الله ثم اطالعه..!!
تدرين فجر..صرت وحيده..خلاص مافي أحد بعد اليوم بيكون معي..
مافي أحد بتخانق معاه..وبحاتيه في اكله وشربه..!!
مافي أحد بنتظره اذا رجع متأخر بالليل..مافي أحد بيسأل عن حالي..!!
محد بيعرف اذا كنت مريضه ومحتاجه دواء يريحني..
محد بيعرف اذا انا متضايقه والا لا..!!
أنا ضعت يافجر..
ضعت بعد الوليد..مثل ماضعت..بعد يوسف وامي ..
مابقى أحد..خلاص مأبقى أحد..!!
..
تاثرت فجر بكلام ابتسام وابدا ماتوقعت أنه ابتسام حزينه ومكسورة الخاطر..وماقدرت تسوي شي لها..لأنها ضربت على الوتر الحساس..لكنها تعرف اذا سكتت بتذبح ابتسام أكثر..
و قاومت وتكلمت والكلمات تطلع بدون شعور\واحنا..وين رحنا..!!وابوك..وعزيز..وجدتي ..والا نسيتهم بعد الوليد..!!
قامت ابتسام من مكانها وهي مجروحه أكثر من أول ودموعها بللت وجهها كله\أنتـــوا....تصدقين احس سؤال صعب...ماأعرف اذا بيبقى أحد بعيني بعد الوليد والا لا..!!
وطلعت من المكان وهي ضايعه..وعيون فجر تتبعها و مليانه دمــوع على حال ابتسام المؤلم..


أنتهى الويك أند بهدوء..وبدى اسبوع ثاني ثقيل للكل..
ومتعب لــ سماح اللي بدت ترهق بسبب حملها..لكن وجود أحمد بجنبها عامل اساسي و كبير في تنشيط يومها اللي تصحى فيه بأدويه..وتنام على أدويه معينه.. هذا غير أكلها المنتظم ونومها المبكر اللي تتضجر بسببه ..وكل هالأمور تفعلها بسبب أنجاب طفل سليم معافى..

أحمد\ممكن تاكلين بدون تذمر,,!!
اخفت سماح ابتسامتها وتصنعت العصبيه ورمت الشوكه على الطاوله\لا
هدى أحمد أعصابه وخذ نفس طويل\سمـــاح
ظحكت سماح\أحمد
خزها بعينه وهو ناوي عليها اليوم\سماح
مطت اسمه بدلع\أحمــــد عطته نظره ساحره وهي متونسه من عصبيته و
احمد\وبعــدين..!!
سماح\ههههههه ولاقبلين..!!..احمد عاد..والله خلاص..بموت..شبعت والله..شوفني كيف صرت دبه..!!
احمد\أوكي خلصي صحنك..وصدقيني بعدها مراح افتح فمي بكلمه..!!
سماح\لاااا
أحمد\أيه
سماح\أوووف..
أحمد\بسرعه..لك 15 ثواني...
سماح\شنوا أحمد أحنا جالسين بالبيت مو بالشغل
احمد\10 ثواني
سماح\أحمــــــد..
أحمد ويناظر ساعته\5 ثواني..
سماح\ياربــــــي
مسكت سماح الشوكه بضيق وبدت تاكل..وتاكل.وأحمد يناظرها وحابس الظحكه..
احمد\صج اللي المثل اللي يقول..
سماح وهي تاكل\أي مثل..!!
أحمد\حريم مايجون الا بالعين الحمراء..



توني طالع من الجامعه..
هذا أول يوم دام لي..والله ياخذ هالدوام..!!
أنا شلي يخليني أخذ هالتخصص اساسا..والله لوعه وبطة كبد..
أمحق جراح ياطلال...
صدقوني زهقت..مليت من الدراسه..ولو علي أطلع منها وافتك..
ومسوي نفسي بو زعم دكتور..وين الدكتور..ووين انا..!!
الطريق طويل ..وانا لسه..توني ماطلعت من البيضا...
الله يعدي هالسنين على خير..وأتخرج وافتك..بعدها أتزوج...
وعلى طاري الزواج..
آآآآخ بس..ووين اللي ابيها..!!
طول هالأسبوع اللي مر وانا أترقب رجعتي للرياض زي المجنون..
أعد الأيام عد..وأنتظر يوم الجمعه يجي ..
ويوم جاء حسيت بكآبه ..
مدري شنوا كنت متوقع يصير..
اللي يشوفني يقول اني بشوفها..او حتى بسمع صوتها من بعيد..
لاكان لاهذا صار..ولاذاك..
وهذاني موجود احترق شوق و قهر..
ياناس..هي جنبي ومش قادر أوصل لها..
شعور صعب..
لكن الله كريم..
ومن كثر تفكيري وصلت البيت ونزلت على طول وأنا عيني رافعه فوق واشوف نافذة غرفتها..هذا حالتي..شوف وحرقة جوف..
معقوله وصلت البيت اللحين...
مااظن..شكلها ماخلصت دوام..وهذا اللي خمنته..
دخلت البيت لأنه كان عندي مفتاح سبير له...وشفت ياسر يلعب كوره..
اشتقت له هالولد. لي مده.ماشفته امس جيت مـتأخر..وعلى طول نمت....
جاني من بعيد يركض وهو يلهث..ووجهه محمر من صقعة الشمس..لمن صارقدامي ,ومد ايده يصافحني..\هلا والله
ياسر\هلا بولد عمي..وينك أمس ماشفتك..!!
طلال\جيت متـاخر وماحبيت أزعجكم..دخلت الغرفه سكرت على روحي الباب ونمت..شخبار أول يوم دراسي..!!
مرر ايده بجبينه اللي معرق \حليو..لكن اليوم كان فاشل جدا..وماله داعي..ماخذنا غير الكتب..وطول الحصص هذره وسوالف..
طلال\هههه ذكرتني باللي مضى,,أيام المدرسه وخبالها..ياحلوها من ايام ليتها تعود والله...
ياسر\من صجك أنت وش تبي فيها..أحمد ربك اللحين أنت طالب طب..مليون غيرك يتمنى دراستك..!!
أعتفس وجهي على طول يوم ذكر اني طالب طب..مسكته من ايده ودخلنا داخل\تكفى..لاتذركيني بشي عن الطب..تراني كاره عيشتي والله,,
الا تعال..وين تركي ماأشوفه..!!
ياسر\هو من متى أحنا نشوفه.!
حسيته يتكلم بسخريه..لكن صاج بكلامه..من متى أحنا نشوف تركي..!!نادر جدا..
ياسر\له يومين مسافر دبي..ورجع امس الصبح..وعلى طول طلع للدوام...
ظليت فتره أفكر بتركي..خبيث هالولد..مايفوت يوم الا ويشتغل فيه..يموت اذا جلس بدون شغل..
طلال\وش عنده بدبي..!!
ياسر\على قولته..وثقل صوته..بيزنــــس..!
ظحكت على لهجة ياسر...وكملنا سوالف عن كل شي..ماشاء الله على هالولد..ارتاح له كثير..واللي يشوفه يعطيه اكبر من عمره..
الله يحفظه,,



أول مارجعت الجامعه مريت على أمي أشوف أخبارها..!!
ويوم دخلت غرفتها..شفتها متمدده على السرير وعلامات التعب والأرهاق مبينه في وجهها..جلست جنبها..وانا خايفه عليها..\يمه أنتي تعبانه..!!
ردت علي بصعوبه\لا جمانه مافيني شي..بس أحس أنه ولادتي قربت..
فتحت عيوني على الأخير وانا مستغربه\شلون..أنتي توك..!!
وبنفس اللهجه\أدري..لكن مدري شفيني أحس بخمول فظيع..والالام قويه...الله يستر..
كلام أمي خوفني أكثر..ومش عارفه وش أقول. هذا مصيبتي ..ماأقدر أعبر..واظل ساكته..وبعدين استوعب,,,.وأمي حست فيني..وانا اللي مفكره أمي صعب أنها تحس فيني.هي من اسبوع ومهتمه فيني حيل..من أول مارجعنا البيت وهي ملاحظه التغيرات اللي طرت علي..وكثير تسألني..وانااسكت ماعندي رد مقنع عشان اريحها فيه..
هند\جمانه.روحي ارتاحي..أنت اكيد تعبانه من الطريق..
جمانه\لايمه عادي..بجلسك معك شوي..
هند\لا قلت لك لا..اللحين روحي أرتاحي لك ساعتين..,انا مافيني شي..واذا أحتجت لك بنادي الخدامه تصيحيك..
ماعجبني ردها..وظليت ساكته..لكنها ماخلتني واعترضت للمره الثانيه لمن أرغمتني اروح غرفتي وارتاح..وفعلا أنا محتاجه راحه..وابي أريح جسمي..ممرات الجامعه ماخلت فين حيل..وغصب طيب بتضعفني..
دخلت غرفتي وغيرت ملابسي ونمت وأنا مستهتره بصحتي..ووجبتي وحده باليوم غدء وعشاء في وقت واحد..وقبل ماأنام أكل سنيكرس وببسي..عشقي ألأبدي..وأنام على طول..
هذا حالتي كل يومي..كرهت هالروتين اليومي..لنا اسبوعين مارحنا الظهران..وتبون الصراحه أشتقت لها..ل.يتنا بس نروح..لكن ماأظن هالفتره..أمي على وشك ولاده..والروحه غير وارده أبدا....

لمن جاء يوم الأربعاء زي البرق..و الصبح قبل ماأروح الدوام سمعت أمي تكلم جدتي وتقول لها انه كل خوالي بيجون راس تنوره ويبظلون لحد نهاية الأسبوع..
ماتتخيلون قد ايش فرحت..
نقزت من الوناسه..كلهم وحشوني..أحس أني دهر ماشفتهم....الا غلا ماوحشتني..كل يوم أشوفها بالجامعه...لوعت كبدي بدلعها..!!
وعلى طاري الجامعه خليني أروح أتأخرت عليها..
والله يعني برجع العصر..ليتني أرجع بدري..عشان أتجهز..
ياحظي..من قدي اليوم..!!


كلمتي أخوك..!!
راوين\أيه كلمته..لكن مااظن انه يجي ..!!
ابتسمت نور بحزن\الله يهديه.. وعلى طول غيرت الموضوع...المهم متى بتجين..!!
أمتلى قلب راوبن حزن ويأس..كل ماتتذكر أنه أمها ماتقدر تكلم تركي تموت قهر..
للأسف تركي مش معترف أنه عنده أم..واذا كلمته يطنشها..او يتنساى وجودها..
ماتتوقع أنه في أحد قلبه حجر كثر تركي..!!
ياما دعت له بالهدايه..لكن العاصي..عاصي..لو طلع للعالي أو دنى للأرض مذلول..
راوين\ماعندي الا محاظره وحده..الساعه وحده واصله البيت..!!
نور\طيب يابنتي لاتتأخرين...ورانا مشوار للشرقيه..!!
راوين\ان شاء الله يمه..مع السلامه..
نور\مع السلامه..!!
سكرت من أمي ومشيت للكفتريا لأنه بقى على المحاظره ربع ساعه....وظحكت على نفسي..لأني تذكرت الأحلام اللي بنيتها هالأسبوع..وبطلها الأول وألأخير طلال..
وهذا الأسبوع كله مر عادي..وبدون نتايج ملحوظه..
حتى ظله..ماأنسمح لي أشوفه..
على أن ساكنين في بيت واحد..وندرس بجامعه وحده..!!
لكن امنياتنا مستحيله...
سبحان الله..كل شي أشوفه قريب..وبنفس الوقت بعيد..!!
لكن ليتني أعرف..ليتني أعرف أكثر عن اللي قاله لي سلطان..!!
بس ماعندي الجرأه أني أتكلم معه عن هذا الموضوع...
وش بيقول عني أصلا..البنت ميته على الحب...وماصدقت على الله أحد يحبها..!!
والله أني متندمه..ياليتني خليته يكمل اللي يعرفه...ولا أظل بهالحيره..
ويمكن أنا فهمت غلط..
بس ماأظن..كلماته كانت واضحه ومالها الا معنى واحد..!!
طلال يعتبرني غير..يعني يحبني..!!
صح..والا أنا غلطانه..!!


يمــــه لكم 5 دقايق اذا ماطلعتوا..بحلف أني مااروح..وشوفوا عاد مين يوديكم..!!

نزلت فجر ووراها غلا تلبس نقابها..\ زين لاتعصب علينا..!!..ولفت على فجر...السخيفه جمانوا..حتى ماقالت لي أنه بنروح لهم اليوم..!!
لبست فجر عباتها وردت على أختها\يمكن نست..!!
ظحكت غلا بسخريه\كل الناس تنسى الا العجوز..ماتنسى..!!
كل هذا وهيثم يسمعهم يتكلمون وهو مبردين على الأخير..وهو معصب..ليش.!!بس كذا هو عرق في العايله كلها العصبيه الزايده..
..واللي يشوف هيثم يقول أنه في زلزال بيصير اذا مامشوا هالوقت..!!
كتف هيثم أيدينه بعصبيه..وزفر بقوه\قولوا والله..وين امي..!!
فجر\شفيك معصب..أمي بتنزل اللحين..!!
هيثم\تدرون كم الساعه اللحين..!!
غلا\يعني كم..!!
هيثم\أربــــع..اربع العصر..!!
أم أحمد\وخير ياطير..!!هذا أحنا جاهزين..!!
رفع هيثم عينه على أمه وكانت تنزل من الدرج ويوم شافها لابسه عباتها هدى شوي..وطلع يشغل السياره,,!!
وغلا تتبعه بعيونها..ويوم شافته طلع كليا..تكلمت..
غلا\كبريت..ولدكم هيثم كبريت...!!تعالي كم خذتي لبس..!!
تضايقت فجر من غلا..هذا اللي هامها لبسها وبس..\أوووف غلا..يعني كم خذت عشر..!!..ثنين بس..!
رمشت غلا بعيونها ووقفت جنب باب الصاله\ويه انا خذت خمس..!!
حط فجر أيدها على خصرها\وليش ان اشاء الله..ثنين يكفي.!!وين رايحني أحنا..كلها الجمعه وراجعين..!!
ظحكت غلا بغرور\صحيح هولبسين..لكن ثلاثه احتياط..!!
توها بترد فجر على أختها الا سمعوا هيثم يهرن..طنشتها وطلعت بره تلحق على حلف هيثم....وغلا تتمخطر وراها....


اجتمع البعض في بيت جاسم ..زوج هند..
ماعدا عبد الرحمن اللي مايقدر يترك الشركه..
واحمد اللي أمتنع عشان راحة سماح..
أما بيت بو يوسف..
لطيفه مارضت تروح عشان ماتنبط مرارتها كثرماهي منقهره بحمل هند..وحطت عذر أنها بتجلس مع زوجها محمد اللي أعتذر عن الروحه..
والوليد منشغل بسفرته اللي بقى لها يومين..واللي طايح فيهم أثنين..عزيز وابتسام..
لكن الجده خذت ابتسام معاها وماقدرت تاخذ عزيز لأنه أمه مارضت..
والوليد بعد تفكير واقناع من جدته قرر يجيهم بالليل اذا خلص أموره وبالمره يسلم على عمته قبل مايسافر..


جمانه بغرفتها..ماجات من الجامعه الا متأخر وعلى طول دخلت غرفتها تتروش وتغير ملابسها..
احتارات وش تلبس..!!
طلعت لبسين..الأول بلوزه صفراء بوسطها كلمات بالأنجليزي بيجيه..وكانت نص كم من الجهه اليمني..وكم طويل من الجهه الثانيه..وتنوره ميدي بيجيه..!!
والبدله الثانيه..كانت ورديه صوف هاينك.. نص كم ويتخللها على طرف اليسار وروود بنفس اللون..والتنوره جينز عاديه..!!
وبعد حيره طويله أختارت البدله الأولى..وجعدت شعرها عشان يكثر ..
وحطت بلاشر بني وملمع بني على شفايفها.. وشدو بيج على عيونها وكحل خفيف....
ناظرت نفسها بالمرايه..
وصرخــــت...
وااااااااااااااااااو..تهبلين ياجمون..منوا ناويه تطيحين اليوم..!!
وظحكت بخبث...
غلا الخبله..ناويه اسرق الأضواء منها...

جمانه جسمها ضعيف شوي وطويله....وملامحه ناعمه كثير..واللي يميزها يمكن عيونها اللي تدل على شطانتها..كانت حاد كثير..لكنها مو وسيعه.. وشفايفها شوي بارزه..وبشرتها قمحيه..
يعني البنت ناعمه..واللي يشوفها مايصدق انه كل هالبراء ه تخفيها جنون بنت..!؟

بعد ماناظرت نفسها أخر نظره..صفرت بخبال..وطلعت للصاله تستقبل اللي جايين..
وشافتهم كلهم..وكانت جدتها بالوسط..والبنات على يمينها والحريم على اليسار..صفطتهم كلهم وجات تركض تسلم على جدتها\فديت اللي وحشني والله..نورتي راس تنوره كلها..!!
مسكتها جدتها وحضنتها باقوى ماعندها..اشتاقت لهالبنت الشيطانه...واشتاقت لحركاتها اللي تعصبها
الجده\يعلي ماانحرم من شوفة عيالك قولي آمييين..!!

يتبع ,,,,
👇👇👇
أحدث أقدم