رواية اعترافات رجل -4


رواية اعترافات رجل - غرام

رواية اعترافات رجل -4

بالنسبه لي له داعي ,,

رغد ــ والطلاق اول مانرجع ..

ضحكت ,,

رغد ــ شاللي قلته بالضبط يضحك ؟؟

ــ كل شي تقولينه يضحك ..

رغد ــ مافهمت ...

ــ آنسة رغد..في مثل مصري يقول ..دخول الحمام مش زي خروجه ...

سرحت رغد شوي وطالعتني ــ شقصدك؟؟ مابتطلقني ؟؟

ــ ليش ..الطلاق بهالرخص ؟ تتزوجين بهالفخامه ومتوقعه تتطلقين بهالسرعه ؟؟؟

رغد ـــ انا ما طلبت منك هالفخامه ...

ـــ الفخامه ..بالنسبه لي ما تنطلب ..الفخامه تجي بالمجان ..وقلت لج ...مب لج ..بل لي ..

رغد ــ ما فهمت ..يعني ما بتطلقني ؟؟؟

ــ سأليني بعد سنه ...يمكن اوافق ويمكن لاء ...

رغد ــ سنه ؟؟ شمعنى سنه ؟؟

ــ |أنا أحب أوزن الاشياء بتمهل ..كم تاريخ اليوم ؟؟

رغد ــ اعتقد سبعطعش يناير 2003....

ــ تعالي اسأليني يوم 17-1-2004 اذا بطلقج ولا لاء ..

رغد ــ صار فيلم هندي ..احنا اتفقنا انك تطلقني بعد ما اجهض ..

ــ لاء ..حاسبي انتي قلتي انج تبين الطلاق بعد الاجهاض ..وانا ماقلت لج لا اييه ولا لاء ..أنا مب خدام عندج تجبرينه يتزوجج ويطلقج في الوقت نفسه .

رغد ــ يعني تنتقم مني ؟

ـــ اذا صح التعبير ..أرد لج طعنتج ...

قمت من عندها وطلعت من الفندق .. وانا ناوي امتع نفسي بهالسفرة ..حجزت لنفسي مع قروب سياحي ..وما خليت مكان الا وزرته ..أما رغد ..فما طلعت من الغرفه اللي هي فيها من ايام ...

مر الاسبوع الثالث ونزلت فيه لبنان ..وتجولت . ورغد ما طلعت من الفندق ..الا للمحلات تشتري هدايا للأهل ..

كان الجو رائع ..الشتا والثلوج ..رغد استسلمت للأمر ..وصارت تسرح وايد ..

دخلت الغرفه ..وكانت تحط ميكياج ..

ــ وين ناويه تروحين ؟؟

ـــ شلون تدخل من دون لاتطق الباب ..

ـــ انا زوجج واسوي اللي ابيه من دون اذنج ..

رغد ـــ كنت بنزل اتعشى في المطعم ..

ــ بروحج؟؟

رغد ـــ يعني مع مين؟؟ انت كل هالوقت تطلع وتغيب وما اسال وينك ؟؟..

ـــ وليش هالكشخه كلها ؟؟

رغد ــ يعني تبيني اروح مبهدله؟؟؟؟؟

ـــ وشرايج انج اليوم مابتروحين ...

رغد ــكيفك ..

وحطت علبه المكياج من يدها واخلعت الشيله ..ما مسكت نفسي من اني الاعب شعرها الكستناي الحرير ..باصابعي ..

رغد ـــ شتسوي ..

وقامت من مكانها مخترعه ..

ـــ نسيتي انج زوجتي ولي حقوق عليج؟؟

رغد ــ لاء ..احنا ما تفقنا على هالشي ..

قربت منها ـــ تدرين ما اذكر اتفاقنا اللي ذابحتني فيه كل اللي اذكره اجبارج لي على الزواج منج ..وهالشي من متطلبات الزواج !!!


اول ما فتحت عيوني كانت نايمه بقربي ... قمت من مكاني ورحت غرفتي الخاصه ..خذت دوش سريع ولبست ملابسي وطلعت ..كنت اجول طول اليوم ..وانا افكر باللي سويته امس ؟؟ لو حملت؟؟؟ هذا مب من خططي ..ما ابي اطفال منها ..رحت لاماكن وايد ..تغديت وتعشيت وصارت الساعه حدعش فيالليل لما رجعت الفندق..دخلت غرفتي على طول .. متجاهلها ...وظليت لين اخر الاسبوع متجاهلها ..

وقررت السفر اخيرا ...

رغد ــ ما ....

صديت عنها ..ودخلت الغرفه وطلعت الشنطه ..

ـــ ويهج مب ويهه عروس ..حطي شويه بودرة وهالخرابيط ..بتستقبلنا اختي وزوجها في المطار ..

رغد ــ زين ما ..

لفيت بغضب ــ ما ايش ؟؟

رغد ــ ما بتتصل في اخوي صالح ؟؟

ــ ليش ..

رغد ــ علشان بعد ما تطلقني ..

ــ نعم ؟؟؟؟؟؟؟؟؟؟ ما ادري اذا فهمتي كلامي اللي قلته لج آخر مره ..طلاق مافي ..حتى اشعار آخر .

رغد ــ بروح المحكمة ..

ضحكت ...وكانت نظراتها مرتبكه ...

ــ وشو بتقولين ؟؟ أجبرته على الزواج مني وابي اجبره يطلق ؟؟؟ ليش ؟؟ هي سايبه ولا سايبه ...

رغد ــ يوسف ..مافي حياه بيننا ..أنت تبي تعذبني ؟؟

ـــ ها ..أعذبج ؟؟ لا تخافين بيكون قليل عليج العذاب ...

رغد ــ شقصدك ؟؟

ـــ قومي البسي عباتج ..ومع الايام بتفهمين ..أو بالاحرى ..تشوفين ...

وتمت سرحانه طول الوقت ..والحيره على ملامحها تصرخ تبي الحل ...



دخل البيت وكانت منال جهزته ونظفته من مجاميعه ..

ــ هذا البيت ..الغرفه اللي على اليمين اول ما تطلعين الدري .

ما تكلمت ..وكانت ساكته ..

منال ــ البيت كان وسخ يوسف وين الصبي ليش ما نظفه ؟؟ تعبت الخدامات وهم ينظفونه ..

ــ الصبي وديته بلاده ..

منال ــ زين ليش ما وصيتني اييب لك خدامه ؟؟

ـــ لا ..أنا ورغد بس في هالبيت وأنا ما حب الخدم فماله داعي.

منال ــ لا ..حرام البيت كبير على رغد ..بطرش لكم نور خدامتي ..وترى يبت لكم كم غرض من الجمعيه ..

ــ ماله داعي منال ..رغد ست بيت ممتازه ...وما في الا انا وهي ..

منال ـ والدريول ..

ــ ماله داعي هالثاني ..أنا تقريبا اكون فاضي من عينت هالمتدربه عندي ..

منال ــ حبيبي يوسف انت تزوجت مانك عزوبي علشان تلغي هالاشياء من حياتك ..صح رغد ..

طالعت رغد بنظره ..فهمت معناها ..

رغد ــ لا ..أنا ويوسف متفقين على هالشي ..وانا احب شغل البيت خصوصا بعد ما تركت الجامعه ..

منال ــ انت تركتي الجامعه ؟؟

رغد ــ هييه ..ما حضرت محاضراتي هالكورس ..

منال ــ ليش ..أمانه يوسف توسط لها ترجع ..

ــ بشوف ..قومي رغد يبي لنا الجاي والماي ..

منال ــ وييه .حرام هذي عرووس بقوم انا .

ـــ اقعدي منال ..وقومي رغد ..المطبخ على يدج اليسار

رغد ــ زيين ..

قامت رغد وهي اللي في حياتها كلها ما دخلت المطبخ ..

منال ـ قوم دلها وين مكان الجاي ...قوم خلك رومنسي معاها ..

ــ في الجاي والماي يا منال الله يهداج ؟؟

منال ــ تقوم ولا اقوم انا ؟؟؟

ـ قايم ...

وقمت ولقيتها تصيح بهدوء في المطبخ ..

ـــ ليش تبجين ؟؟

رغد ــما ابجي ..

وحسيت انها حايره ماتعرف تسوي شي ..

أشرت لها على غلايه الماي ..

غسليها وحطي فيها ماي ..وشغليها ..وبعدين جهزي دله الجاي وحطي فيها خمس ميداليات ليبتون ..تلاقينه فوق ..وفي نعناع اعتقد و هيل ..حطي هيل ولا نعناع انتي حره ..بيالات الجي هذول ..غسليهم عدل وهذول قلاسات حطي فيها ماي من البراد ..والصينيه في الدرج والسكر في الكبت احذى اللبتون ..حطيه مثل ماهو على الصينيه لان جاسم مايشرب حلو ..تبين شي ثاني ؟؟

رغد ــ الملاعق الصغيره ؟؟

ــــ في الدرج اللي فوق درج الصواني ..

طلعت من عندها ...ورجعت لمنال ..

ــ زوجج ابطى علينا وين راح ؟؟

منال ــ ييب عشا ..لان محمد وزوجته وعياله على وصوول ..ووصيته يتصل في منصور ..وأخوك فالح ..

ــ فالح ؟؟

منال ــ تدري انه زعل بالحيل لما عرف انك عرست وهو مسافر ؟؟

ــ بس هله حضروا ..

منال ــ لو كان يدري كان حضر هو بعد ..هذا اخوك ..

ــ منال الله يخليج ..بروح أغير ملابسي ..وأنام ..

منال ـ يوسف ..لي متى هالجفا بينك وبين فالح؟؟

مارديت عليها ..وكالعادة عصبت من تجاهلي لها ..

بعد ربع ساعه ..نزلت ..وشفت العايله كلها تحت ..

منصور ــ حمدالله على السلامه أخوي ..

زوجته نوره ــ حمدالله على السلامه ..

ـــ الله يسلمكم ..

وسلمت على محمد ومريم

محمد ــ فالح ياي في الطريق هو وهله ..

ــ حياهم الله .. هاغ جاسم ..قالت لي منالل انك رحت تيب العشا ..

جاسم ــ بيوصل بعد شوي الساعه تسعه ...بس جبت معاي المقبلات وأشياء تصبر ..

ــ يعطيك العافيه ..

مريم ــ ها ابن عمي ..شلون الزواج؟؟

طالعت رغد اللي كانت لابسه شيلتها ..ومنزله راسها ..وفيها كدر الدنيا ..

ــ زيين ..مب سيئ ...مثل ماكنت معتقد ..

محمد ــ قومي مريم ..قومي ..بتزعجينه بأسئلتح لين الصبح ..

مريم ــ لا تحرجني محمد ...منصور ونورة هنيه ..

منصور ــ لا تستحين منا ..مريوم ..يلا نوره ..روحي انتي ومنال ورغد ومريم داخل ..في صاله ثانيه يلا ...

منال ــ استح من المرة توها عرووس ..تطردها في بيتها ؟؟

منصور ــ هذي اول مرة تدخل بيتها .وأنا كنت ساكن هني وأعرف البيت ...وبعدين خلاص صارت زوجة أخوي ..مقامها من مقامج انتي ومريم ..ويلا .. للصالة الفوقانية ..


طبعا أثر هالكلمات علي كان قاسي جدا ..وينها وين مريم ومنال ؟؟ شلون تصيير معاهم في نفس المقام ..


مريم ــ قومي رغد حبيبتي ..قومي..يلا منال وانتي نوره .. خلينا نطلع بكرامتنا ..

طالعتني رغد بعيونها ..وكأنها تقول لي ارحمني ..لكني تجاهلت ..قلت لها ــ اطلعي يلا...

طول ما أخواني يتكلمون .وأنا تفكيري شي يصير فوق ..شلون بتتكلم رغد ؟؟ شيقولون لها ...

محمد ــ أهلا وسهلا ..

التفت للباب ..كان فالح داخل مع زوجته جواهر وثلاثه من عيالهم الكبار ..

ماشفت هله من حوالي الثمان سنوات ...

فالح ــ مبروك ...يوسف ..مبروك .

وسلمنا على بعض سلام بارد ...

جواهر ــ مبروك يوسف ..

ــ الله يبارك فيكم تفضلوا ..

فالح ــ مها هذا عمج يوسف ..

مها ــ مبروك عمي ..

ــ الله يبارك فيج متى كبرتي بهالسرعه ...؟؟

مها ــ اووه عمي السنه ثانويه ..والسنه اليايه بدخل الجامعه ..

ــ ما شاء الله ...

فالح ــ طلال ...

طلال ــ مبروك عمي ..

ــ الله يبارك لك ..وأنت جامعه ؟؟

مها ــ لا عمي ..عاد السنه ..السنه ثانويه مثلي ..

ــ شد حيلك لا تطلع قبلك مها ..

فالح ــ شيخه ..أصغر من مها بسنه ..

ــ مبروك عمي ..

ــ الله يبارك فيج ..ماشاء الله يا فالح عيالك كبروا بسرعه ..

فالح ــ الوقت مر بسرعه ...وين مدامتك ؟؟

ــ فوق مع منال و مريم ونوره ..

فالح ــ يلا جواهر ..خذي بناتج وتفضلي ..

وأول ما طلعت جواهر ,,,

فالح ــ ها منصور متى تصير ابو؟؟

منصور ــ أنا في الزواج أخذت أربع سنوات افكر تبيني اييب عيال ؟؟ لا .مني لخمس سنوات يصير خير ..

محمد ــ اييه والله هذا الكلام الزيين ..شلك في في دوخة العيال ...اسأل مجرب ..

جاسم ــ انا بالنسبه لي روان ..بنتي .عسل على قلبي ..

محمد ــ لا نها وحده بس لحين ماصار لها اخوان ..وبعدين اذا كبرت ...بتشوف المرض من ورا طلباتهم ..

فالح ــ لا .. مب لهالدرجه ... العيال حلوين .وانت يوسف ..متى ..؟؟؟

ــ مأجل الفكره شوي ...سنه ...

محمد ــ هذا هو الكلام السليم ..ليش مستعجل العمر قدامك انشاءالله ..

منصور ــ صج منال حامل ؟؟

جاسم ــ اييه والله . صار لها شهرين ..

فالح ــ تبي بنت ؟؟

جاسم ــ اييه ..ياخي مليت من العيال ..

منصور ــ أرجوك عندك الحين عشر ..

جاسم ــ صج ماعندي عيال بس طول عمري عايش بين اخواني .. الي اصغر مني وأكبر مني ..أبي أشوف بنات أبي أترس البيت بنات ..

منصور ــ انا عشت مع بنت وهي منال ولاعت جبدي منها ..اذا بييب اطفال ياريت يكونون كلهم عيال ..

فالح ــ ماتصدقون اذا قلت لكم ان بدر ياني خاطب لبنتي مهوي ...

جاسم ــ بدر مين اخوي .؟؟

فالح ــ ايه ...

جاسم ـ ـتوه صغير ..

فالح ــ عمره ثلاث وعشرين وصغير ؟؟ أصلا كان مفروض ازوجه منال اختي ..بس صارت من نصيبك ..

جاسم ــ مسكين يبي يلحق على بنت قبل لاتطيير ..

(جاسم من عمري ..وتزووج من ثلاث سنوات باختي منال كان يبي يتزوج من زمان ..لكن ماكان عندي اخوات غير منال ..وكانت صغيره فاجلنا الموضوع لين اكبرت شوي )

محمد ــ وش قلت له؟؟

فالح ــ بعد الثانويه بسأل البنت ..وأشوف ..

جاسم ــ الخايس يخطب ولا يشور أحد من أخوانه ..

فالح ــ يا بروحه ..مثل ماتقول جس نبض ..حتى عبدالرحمن مايا معاه ..


بعد العشا انصرفوا كل واحد لبيته ....

ــ رتبي البيت ...

رغد ـ زيين ..أهلك طيبين ...

مارديت عليها ..ودخلت غرفتي ..وقفلت الباب ..وقلبت الرموت ,,من قناة لقناة ...

وأنا أسمع ضجة رغد وهي ترتب البيت ..

صحيت من النوم وكانت الساعه سبع ونص ...

قمت لين باب غرفتها وكانت نايمه ..

ـــرغد ..رغد ..

ــ هه..نعم ..

ـــ قومي سوي لي ريوق بروح المكتب ...

ــ زيين ..


سمير ــ حمدالله على السلامه يا بيه ...

ليال ــ حمدالله على السلامه ...

ــ الله يسلمكم ..

دخلت لمكتبي ...وبديت شغلي ....

ومر أسبوع على هالحاله .......


ليال ــ استاذ هذي القضية ايش يمكن نسوي فيها ؟؟

ــ الشاب هنا مدان لا محالة ..الشهود شافوةه مع الشلة ..يأكدون أنه كسر السياره ..فلازم نلجأ لانقاذه من هالمشكله .

ليال ــ نقدر نقنع القاضي انه برئ ..

ــ ليال ...( وكنت اول مره اكلمها بدون لقب انسه ) اسمعيني ..هذي مب محكمة وهيئة محلفين علشان تقنعين .. القاضي يمشي بالادله ..والشهود ..لازم ..نلقى حل نقنع فيه المدعي بالتنازل ...بس للأسف المدعي بينه وبينهم عداوة ..حاول من هالطرف وأقنعه بالتعويض المادي ..وبتصل في محامي باقي الشله ندبر لنا طريق يطلع فيها لانه اصغر واحد فيهم وماتعدى السن القانوني وامكانية كبيره انهم يرسلونه الاصلاحيه ..

ليال ــ ليش استاذ هو عمره كم ؟؟

ــ ليش انتي مادرست القضيه ؟؟

ليال ـ استاذ ما انتبهت ..

طبعا ..مسكينه ..الحين بانهال عليها بالنصايح والعتاب ..

ــ آنسه ليال ..كمحامية لازم تنتبهين لكل شارده ووارده ..لازم تكونين دقيقة الملاحظة .. المدعى عليه عمره 14 سنه ...والباقي اعمارهم في التسع طعش والعشرين.. انا ارفض منج هالاهمال ..وعدم التركيز ..واعتقد هذا شي بديهي ما يبي له توضيح ..تفضلي لمكتبج وادرسي القضية عدل وابي منج موجز على اوراق يكون كامل مافيه ثغره ..

ليال (اختفى صوتها ) ـحاضر ..

رن التلفون في هاللحظة ..

ـ ألو ..

منال ــ قوة أخوي ..

ــ أهلين ..

منال ــ يوسف باخذ رغد ونطلع ...شرايك ؟؟ أنا قلت لها بس قالت لي اقولك ..

ـــ لاء ..

منال ـ ليش ..نبي نروح السوق ...

ـــ لاء ...أنا باخذها السوق ..طلعة من البيت مافي ..

منال ــ بس ..

صرخت ـ قلت لاء ..منال انت ماتفهمين ..

منال ــ لاتصارخ ..زيين ..

ــ هي معاج ؟؟

منال ــ لا ..أنا في بيتي ..بس اتصلت فيها لاني كنت رايحه السوق ..

ــ خلاص ..يلا ..مع السلامه..

صكرت السماعه وأنا معصب .. من اسبوع ومنال ما طلعت الا لبيت اهلها ..وكل شغل البيت عليها ..بس الغدا كله من المطعم ..

دخلت ليال ــ استاذ اتصل فيني استاذ عيسى ويقول انه يبي يقابلك اليوم ..

ــ وين سمير ؟؟؟

ليال ــ راح في مشوار ...من الصبح وانا تعبان .. فيني غثيان ..

ــ خلي الفراش يسوي لي نعناع ..

ليال ــ حاضر استاذ ..

رحت الحمام ورجعت اللي في جوفي ....وأنا أحس بوجع في جنبي ..

خلال ساعه اشتدت علي الآلام ...

بصوت تعبان ومهزوز ــ سمير...سمير ...

دخلت آنسه ليال ــ سمير ما رجع استاذ ..بغيت شي..استاذ انت بخير ؟؟ استاذ ..

ــ نادي لي راجو ..

ليال ــ الفراش؟؟

ــ اييه ..

وبسرعه اختفت ورجعت مع الفراش ..

ـــ راجو ..اسندني لين السياره ...

وسندني وتبعتني ليال ..وأول ما فتحت الباب ..

ليال ــ استاذ بتسوق وانت في هالحالة ؟؟

ــ ما فيني شي ..

ليال ــ وين رايح استاذ ؟؟

ــ للمستشفى ..

ليال ــ انا بسوق ..

اركب في السيت اللي ورى ..بآخذك الطواري ..

ماكنت في حال يسمح لي بالكلام ...

تمددت ..وساقت ليال ...سواقتها بطيئه ومهزوزه ..

خلال دقايق ..دخلت الطواري ..وكشف علي الدكتور ..وأخييرا ...بعد التحاليل ..الزايده .

الدكتور ــ مدام ...لازم العمليه . انفجرت وبتسبب له تسمم في الدم اذا مالحقنا عليها ....أنت زوجته ..

ليال ــ لا ..

الدكتور ــ اخته؟؟

ابلعت ريقها ــ لا ..

اعطاها الطبيب نظره شك ـــ أنا متدربه عنده ..هو محامي .

الدكتور ــ اتصلي في حد من هله ..علشان نتخذ الاجراءات ..

تكلمت رغم ان المخدر ريحني شوي ــ أنا صاحي دكتور ..سوي العمليه .وليال .. محفظتي فيها رقم جاسم اتصلي فيه ..

ليال ــ حاضر ..


فتحت عيوني وأنا أحس بآلام فظيعه في جسمي ..

الدكتورــ بتعطيك الممرضه الحين مسكنات الام ومضاد التهاب ...اكيد مفعول المخدر راح..

هزيت راسي ...

باين ان العملية خلصت ...

الدكتور ـ اهلك بره يبون يتطمنون عليك ..بدخلهم الحين ..

دخل جاسم ومنال ورغد ..ومحمد ..

جاسم ــ ماتشوف شر ...

ـــ الشر ما ييك ..

منال ــ اخوي شلونك الحين ..عساك طيب ..


يتبع ,,,,
👇👇👇
أحدث أقدم