رواية بين ثنايا الايام -63
** نجود **
جا ولد عمتي بندر وسحب فيصل من كتفه .. وقال له مستغرب : وش فيك انت تصارخ على نجود انخبلت
قال فيصل : مالك شغل
قال بندر : لا لي شغل ونص .. اجل جالس تصارخ على بنت خالي كذا .. استحي على وجهك
قال فيصل وهو رافع يده : اسكت عني بندروه اللي فيني كافيني
قال بندر : اللي فيك مالنا شغل فيه .. بس بنت خالي ماارضى تصارخ عليها
قال فيصل : ومن انت عشان ماترضى عليها .. اقول ....
ماسمعت باقي الكلام لاني مشيت عنهم .. ورحت بسرعه غرفتي عشان لا يشوفني احد وانا ابكي
اخر ماكنت اتوقعه .. ان فيصل يناظرني بنظرات الاستحقار اللي ناظرني فيها .. وانا كنت مثل الغبيه ما دافعت عن نفسي بولا شي .. هو ماعطاني فرصه .. وحتى لو عطاني فرصه .. وش كنت بقول .. ماعندي تبرير مقنع .. ااخ يا القهر .. كله منك يا يوسف .. الله لا يوفقك .. ماجبت لي الا المشاكل .. وكله مني انا لاني عطيتك وجه من البدايه .. والله اني اتمنى الموت .. ولا اللي صارلي اليوم .. فيصل ؟؟ ليه هو بالذات اللي يسمعني ياربي ليــــه .. معقوله حبه لي اللي بقلبه يختفي في دقايق .. ويغطي عليه الكره والحقد .. لالا اللي يحب مايكره .. هه يما قالوها ناس وقالوها .. بس فيصل قلبه طيب .. ماابي افقدك يافيصل والله العظيم ما ابي
بعد ساعتين تقريباً من قعدتي في الغرفه افكر .. سمعت طق على الباب
قلت : نــعــم .. ادخل
دخلت رهف وقالت : وش فيك جودي جالسه لحالك
قلت وانا منزله راسي : ابد مافيني شي
قالت : طيب تعالي حبيبتي اطلعي معنا برا .. جالسين نشوي وحركات
قلت : من اللي يشوي
قالت : الشباب كلهم .. الا فيصل
قلت بسرعه : ليــــه ؟
قالت : وش اللي ليه ؟
قلت : ليه فيصل مايشوي مع باقي الشباب
قالت : يقول عنده شغله ضروريه بيخلصها في غرفته .. بعدين بيجي
اشوا انها قالت لي .. لاني كنت بتعذر لها وبجلس في غرفتي .. ولو جلست انا وهو في غرفنا وما طلعنا مع الباقي .. بيشكون في الموضوع
قمت وقلت : يللا
قالت رهف بتردد : أأ جودي وين جوالي .. لاني ابي اكلم ريوم واخوي
وقفت وقلت بخوف : أي اخو ؟
ابتسمت وقالت : اخوي محمد بعد من
الحين كيف اجيب الجوال لها .. وفيصل قال لو اموت ما بيعطيني اياه
جاتني فكره .. قلت : رهوفه جوالك عند فيصل
عقدت حواجبها وقالت : وش يسوي عند فيصل
سويت نفسي مستحيه وقلت : لان جواله ضايع .. وانا نسيت حسبت اللي عندي جوالي .. فقلت له دق على جوالك من جوالي .. اخذه من عندي .. ونسيت ما اخذه من عنده بعدين
قالت : لا عادي جودي .. انا بعدين اذا شفت فيصل بقول له يجيب الجوال
يووه نسيت شي مهم .. اخاف رهف ماتشوف رقم فيصل في جوالها .. وتكفشني .. لالا رهف ماتدقق
طلعنا برا .. وجلسنا مع الباقي .. وكان الكل متجمع برا مافيه احد داخل .. والجو كان يجنن .. والجلسه حلوه .. الكل مبسوط ويضحك الا انا .. مستحيل اضحك بعد المصيبه اللي صارت لي اليوم .. حسبي الله عليك يا يوسف
بعدين سالتني رهف : تعالي وش هذا اللي معلق على الجدار
قلت : وشهو ؟
قالت : الاوراق هذي
قلت : علمي علمك .. خلينا نشوف
قالت : يللا
اول ماقمنا قالت حنان : وين بتروحون .. نجودوه عاد يا الدبه .. من اول ما جينا المزرعه ما جلستي معي ولا دقيقه
قلت بأبتسامه : بنروح نشوف الاوراق هذي اللي لا صقينها على الجدار وشهي
قالت : اهاا .. هذي مسابقة الشعر
انا ورهف مع بعض : مـــســـابـــقـــة الـــشــــعـــر !!!!!!!!!!!
قالت : ايه .. اللي يبي يشارك يحط اسمه في الصندوق .. انا والهنوف حطينا اسامينا
قالت رهف : خلينا نروح نشوف بسرعه .. اكيد اللي مسوي المسابقه نايف .. لانه يموت في الشعر
قالت حنان : وش عرفك ان نايف يموت في الشعر ؟؟
قلت انا : لانها عايشه معنا في البيت .. ونايف ورهف اخوان يعني مافيه وحده ماتدري وش يحب اخوها
قالت رهف : صح
مسكت يد رهف ومشيت معها
شافنا نايف وحنا ماشيين .. غمز لنا وقال : سجل اسمك ياحلو
ضحكنا .. ورحنا لعند وحده من الورق وقرينا اللي فيها
كــــان
السلام عليكم ورحمة الله وبركاته
اعلان هـــام .. لكل من يملك موهبة الشعر وكتابة الخواطر
سوف تتم مسابقه عن افضل قصيده وافضل خاطره
والفائز سوف ينال
- الاستحسان والثناء
جائزه واحده ( فقط ) من كل متسابق - واللي ماعنده فلوس يشتري هديه للفائز لا يشارك - )
والمسابقه غداً في تمام الساعه الـ 10 ليللاً
-- بعد العشا تعالوا لحد ينام --
مع تحياتنا ادارة المزرعه -- الزعيم ( نايف ) المساعد ( مشـعل – فيصل)
ضحكنا انا ورهف مع بعض وقلنا : حـــركـــات
قالت رهف : لا يفوتك مع تحياتنا ادارة المزرعه هههههههههههه .. قريتيه ؟
قلت : ايه الله يرجهم .. مسوين فيها فعاليات
قالت : بتشاركين في المسابقه ؟
قلت : مدري وانتي
قالت بحماس : انا بشارك
قلت : اجل حتى انا .. وينه الصندوق
قالت : هذاهو هنا
مسكته وحركته وقالت : شوفي نقدر نفتحه
قلت : اجل خلينا نفتحه ونشوف من اللي بيشارك ههههههههههههه
قالت : لا غش يمكن مايبونا نعرف
مسكته وقلت : ياشيخه خلي عنك بس
فتحناه من تحت .. وشفنا اسماء – فيصل – نايف – حنان – الهنوف – مشعل – رغد
قلت : شوفي حتى رغد هههههههههههههههههه
قالت : ايه فديتها يللا نكتب اسامينا
** نايف **
ضربت يد سلطان وقلت له : خلصت اللحم من كثر ماتذوق .. ماصارت عاد
سمعتني شجن وقالت : وش عليك خله يذوق .. انت اصلاً تغار منه لان نفسه مفتوحه للاكل على طول
رفعت يديني بأستسلام وقلت : يمه يمه اكلتني .. ماترضى على زوجها
قال سلطان : ايه حاسب لا تقول لي كلمه هنا ولا هناك
سويت له مالت وقلت : كلك على بعضك كوره .. سوي رياضه يا اخوي
سلطان صحيح كان دب شوي .. بس مو لدرجة كوره هههههههههههههه
اخذ ولده ماجد وقال له : مجودي شوف هالقرد اللي قدامي يقول عني كوره .. ترضا على بابا
بس ماجد ماكان يفهم .. كان فاتح عيونه ويناظرنا بس
قلت انا : لالا كذا ما اقدر صرتوا ثلاثه علي .. اهرب احسن لي
وقفت بمشي .. قال مشعل وهو مشغول بالشوي : من جدك بتهرب .. لا تخاف عندك مدافعين
قلت : لا بروح بجيب الدجاج من المطبخ عشان نشويه
قال مشعل : اجلس خلي الشغاله تروح
قال سلطان : ايه والله
قلت : حرام عليكم من اول مابدينا نشوي راحت وجات مليون مره .. شوفوها كيف جالسه تسولف مع شغالة بيت عمتي وداخله جو .. ما ابي اقطعه عليهم
بندر وهو جاي مع وليد سمع كلامي وقال : يااي ما اقدر .. نايف اعترف .. تحب الشغاله ؟
لفيت على سلطان ومشعل وقلت : اصفقه ؟
ضحكت ومشيت عنهم رحت المطبخ بجيب الدجاج .. اول ماشفته شميته .. الله ريحته حلوه من اللي تبله .. اكيد فيصل .. لان كل مره نروح فيها البحر او البر ونشوي هو اللي يتبله لنا .. سمعت صوت وراي لفيت .. ولقيت حنان واقفه
قالت لي : نايف ممكن اكلمك
هزيت راسي وتنهدت
قالت : لهذي الدرجه ماتبي تكلمني ؟
قلت : ليه ؟ انا قلت شي الحين
قالت : بس تنهيدتك هذي تدل على انك متملل مني
لحوول .. قلت : لا افا يابنت عمتي مو القصد كذا .. امري وش تبين
جلست تلعب بصبوعها وهي متردده
وش تبي هذي ؟ .. اهااااااا الحين فهمت .. تبي نتكلم عن اللي صار اليوم .. الظاهر تبيني اعتذر لها .. وهذا شي لازم اسويه
قلت : ايه حنان بخصوص اللي صار اليوم انا اعتذر وماكان قصدي
قالت : لا لا نايف .. لا تعتذر .. هو لو كان احد غيرك ماكنت بسامحه .. بس انت غير
عقدت حواجبي مستغرب وقلت : انا غيـــر ؟
عطتني ظهرها وقالت : اكيد
وش تقصد !!
لفت علي ونزلت راسها مستحيه وقالت بصعوبه : يعني للحين ماتدري
قلت : ادري بوشو .. حنان انا ما احب هالاسلوب يا تتكلمين ياخلاص
قالت : انت ليه ماتحس فيني
سكت انتظرها تكمل .. فاجأتني يوم قالت : نـــايف انا احبك
وش تحبيني يابنت الناس هذا اللي كان ناقصني .. حاسبت كلامي قبل ما اقوله .. لاني ما ابي اجرحها .. مهما كان هذي بنت عمتي .. قلت : حنان بقول لك شي وافهميني زين
قالت بسرعه : كل الكلام اللي تقوله يانايف افهمه على طول بدون ماتقول لي .. لان كل حرف تنطقه .. يسوا عندي الدنيا كلها
قلت : حنان انا رجال مااحب هالسوالف .. فلازم تشيليني من بالك .. لان مابتوصلين لشي معاي .. وانتي في سن زواج ..فأن شاء الله تتزوجين وتحبين زوجك وهو يحبك .. وانتي بنت حلوه وطيبه تستاهلين كل خير
دمعت عيونها وقالت : لا نايف انا مستحيل احب واتزوج غيرك .. انا ما احبك من سنه ولا سنتين .. انا من اول مافتحت عيوني على الدنيا احبك
معقوله حنان تحبني من زمان .. وانااقول وش سالفة هالتلصق
قلت بجديه : حنان الله يخليك .. لا عاد تجيبين لي طاري هالموضوع .. ومثل ماقلت لك شيليني من بالك .. وهذا اخر كلام عندي
حطت يدينها على وجهها وجلست تبكي وتقول : نايف ماتوقعتك عديم احساس كذا .. انا اقولك احبك من زمان .. وانت تقول لي شيليني من بالك
ياليتك ماقلتيلي .. قلت لها بحنان : ما احب اشوف احد يبكي .. لا تبكين
قالت وهي تبكي بمراره : ايه ماتبيني ابكي لانك ماتحب تشوف احد يبكي مو لان دموعي غاليه
قلت : الا دموعك غاليه
رفعت وجهها وقالت بابتسامه كبيره : صدق
قلت : لانك بنت عمتي .. ومثل اختي
قالت بأنفعال وبصراخ : لا تـــــــــــقـــــــــــوووول اخـــــتــــــي لا تـــــــقــــولـــــهــــا
انا مستعجل بودي الدجاج .. يللا عن اذنك بمشي كملت كلامي ببرود :
ومشيت بسرعه لا توقفني .. هذا اللي باقي .. ما ابي بنات يحبوني انا احب بنت ايه بس بنت تحبني لا .. وجع راس ومتاعب
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك