رواية برد وجفا ونسمة هوى -70

رواية برد وجفا ونسمة هوى -70

شافته بتشتريه..وماتبي تتعب نفسها وهي تدور بدون فايده..ابتسام فجور حرام عليك..والله انا خلقه متضايقه..شوفي لحد اللحين ماشريت شي..!!
تجاهلت فجر كلام ابتسام..وخذت من البترينا بلوزه عجبتها..!!
فجر شرايك بهذه..!!
فرحت ابتسام بالبلوزه..واكثر شي شدها هو الوانها..البني والذهبي والأحمر..لكن يوم دققت فيها لقتها طويله حيل..
ابتسام فجور..طويــله..!!
ظحكت فجر وهي طفشانه ومتملله.ماتحب شي اسمه سوق..لكنها جات علشان عيون بنات عمها اللي ارغموها على الطلعه..
ابتسام وشوي وبتبكي ليش تظحكين..!!

فجر وهي تطوي البلوزه وتتذكر امور حلوه تذكرت غلا..كانت دوم تجنني اذا اختارت شي..تعفس المحل كله..وبعدين تطلع ولاكأنها سوت شي..وتنهدت بصوت مسموع..والله وحشتني اختي..!!.. ورجعت تناظر ابتسام..المهم ماعلينا..بتاخذينها والا..!!

ابتسام حايره وظلت ماسكه البلوزه وتلفها من كل صوب مدري..

فجر طيب تعالي نسأل البنات.

ابتسام اوكي..

قربت ابتسام وفجر..من راوين و جمانه اللي توها دافعه ومخلصه..

ابتاسم شرايكم بهــذه..!!

جمانه فظيعــه..من وين جبتيها..ماشفتها...!!

ابتسام فجر طلعتها لي..ها راوين..شرايك..

راوين الصراحه ماتتفوت البلوزه..وبعدين انا شفت بالمحل اللي قبل هذا تنوره تناسبها..طقميها معها...

ابتسام متأكده..

راوين وابتسمت ايه متأكده..

ابتسام اممم..

فجر شوفي بسوم..اذا ماتبينها مو مشكله..نكمل المحلات يمكن نلقى..!!

ابتسام واتخذت قرار لا خلاص..بشتريها..وعلى قولتهم الموضه طويل.

جمانه بس لحظه مو كأنها ضيقه شوي...

ابتسام حرام عليك..شنوا ضيقه..!!

جمانه شفيك انتي اذا عدله عليك...خلاص اشتريها..

ابتسام كانت متضايقه على متنها الزايد والملحوظ وقالت عشان تقهر جمانه اكيد بتشريها..ماراح انتظرك..

جمانه وعقدت حواجبها ماصخــه...!!

سفهتها ابتسام وراحت تحاسب..,ظحكت عليهم راوين...!!

فجر لجمانه احنا ماصدقنا على الله تلقى شي يناسبها.وانتي تقولين ضيقه..!!

جمانه ظحكت بقهر اسفه عمتــي..غلطنــا..

راوين ياعيني على الأدب..

جمانه بدلع من زمان انا مؤدبه..بس انتوا توكم تعرفون..

راوين رافعت حاجب وودها لو تصيد جمانه بأي زله مو كأنك تكررين هالجمله دوم..!!

جمانه شسوي فيكم..محد مصدق اني مؤدبــه..!!

المطعم كان هــادي جدا..وصوت الموسيقى الرومانسيه هي السيمفونيه الوحيده اللي محايطه الجو..

والشموع اللي في كل طاوله زادت شاعريه على الجو..والأناره كانت خافته وصفــراء..واللون اللي طاغي على المكان هو اللون الأبيض وممزوج بلون الذهب الفاتر ..حتى المنيو على قولة غلا كان بنفس اللون..

كانت تناظر الزباين اللي داخلين بكل حــب وهو تشوفهم كيف ماسكين ايد بعض بكل حميمه وماهمم الناس اللي حولهم..

وعيونهم تحكـتي معاني الحـب والألفــه..!

كانت تتمنى تشوف هالنظره بعيون تركـي..كانت تدري انها عاجبته..لكن متى يقول الكلمه اللي تحلم فيها من زمــان..!!

متى يقولها لها..وهي ترد عليه باأجمــل منها..متى..!!

ناظرته بكل حـب يمكن يحس باللي يجول بداخلــها..لكنه كان منشغل بالمنيوا اللي قدامــه

كان هالليله لبسه رسمـي..وانيــق يزيـاده بجاكيته ألأبيض اللي فصخه وحطه على الكرسي وظل بالبلوزه البنيـه..والجل اللي رجع شعره على ورى..وبنظارته اللي تتمنى لويبفصخها لو دقيقه عشان تتأمل عيونه بوضوح..

مسك تركي ايدهـا وهي سرحـانه فيه..وهي ارتجفت من لمسة ايده..

ظغطت تركي باايده اكثر وقربها منه

تركي ليه هالرجفـه..!!

ابتسمت غلا بخجل مدري..بس..وسكتت..

تركي ابتسم لأبتسامتها وقرب نفسه اكثر لمن باس ايدها ..

تركي بهمس واللحيــن..

ماردت عليه وحاولت تجر ايدها لكنه كان متمسك فيها ويبتسم.. ناظرت حوالينها بتوتر..خافت انه احد شافهــم...

لكن حصلت انه الكل منشغل باللي جنبه..

تركي شتناظرين..!!

غلا كانت منزله راسها تركي..بليــز

تركي مأاسمــع..

رفعت راسها غلا بقهر لاوالله..

تركي تدرين..حلوه وانتي معصبه..وحلوه وانتي هاديه..وسكت شوي..وكمل..كل شي فيك حلو..

غلا بعفويه ادري.. وسكتت وهي مصدومه من نفسها كيف قدرت تقول هالكلمه له.."ياربي وش بيقول عني اللحين..ماعندي حيــا"

توها بيرد عليها..الا جاء الأكل لهم.. ترك تركي ايدها وهي على طول حطتها بحظنهــا..

.وحط النادل الصحون بالطاوله ومشى..

خذ تركي الشوكه والسكين..وهو عارف انه غلا ماراح تتكلم..

اخذ قطعة ستيك وقربها لغلا..

غلا كثرة صدماتها..وزاد حياءها..وحمر وجهها..

ولمن شاف عدم تجاوب منها..قربه لفمها وبنظراته كان يطلبهــا..

فتحت غلا فمها وهي تتمنى تنتهي هاللحظه ويريحها تركي..

ماكان يعرف انه يسبب ربكه بقلبها الصغيــر...ويشعل روحها بحرارة تصرافاته

..لكن بألأخير حست بفرحه تغمر روحهــا..

تحب الأهتمام اللي بعيونه..وتحـب والله غروره..

تركي شبعتــي..!!

غلا ايه

تركي ويعقد حواجبـه طيب انا ماشبعـت..

ابتسمت غلا بخجل..ومدت لها بشوكه مثله وكل مافيها يرتجـف..

قرب لها تركي اكثر..وهي وصلت له..ويوم دخل الأكل بفمه غمضت عيونها وهي تضحك من الخجل..

طلعوا من الفندق..واجر تاكسي

كان حاس بالسعاده لأسباب كثيره..

..طول هاليومين قدر بصعوبه يمسك نفسه عن الشرب وياخذ البندول بكميات كبيره عشان تخفف صداعه ويمكن طلعاته اللي من الصبح مع غلا لحد الليل هي اللي مخليته ينشغل عن الشرب..لكنه متأكد انه بيجي يوم وبيرجع للشرب..وهاليوم اكيد قريب..لأنه مقاومته اصبحت ضعيفه..

طلب من راعي التاكسي انه يوقفهم هنا يوم قربوا من الفندق لأنهم بيكملون مشي.

مشى تركي وهو رافع جاكيته على كتفه..وغلا تمشي جنبه..مسك ايدها بدون يناظرها..

غلا كانت بقمة سعادتها اللي صار لها اليوم اكثر من اللي تتمناه..وهي بالمقابل تمسكت فيه اكثر واكثر..

حس تركي فيها..وبدى يدندن بصوت واطي..ولأنها من عشاق عبداللحليم غنى

حاجه غريبه..حاجـه غريبه

الدنيا لها طعم جديــد..

غلا ناظرته بعدم تصديـق.."صوته المخملي اثر على مسامعها"

حاجه غريبه..حاجه غريبه

انا حاسس اني ده يوم عيد

حاجه غريبه..حاجـه غريبه

الدنيا لها طعم جديــد..

حاجه غريبه..حاجه غريبه

انا حاسس اني ده يوم عيد..!!

سكت تركي عند هالمقطع وهو مستغرب من نفسه..طلعت منه الكلمات بكل عفويه. وكأنه تدل على حالة نفسيته المرتاحه..!.واللي يحسه بداخله كان كبير..وصعب ينوصف..

غلا فاجأته وهي تكمل الأغنيه بصوتها العذب

بدت بااول كلمه.. وانا حاسه..وانا حاســه..ونست الخجل وكملت

وانا حاسه الدنيا هربانه

ويانا بالليل كل سعاده

حاجه غريبه

اندهس منها تركي..وكمل بسعاده

حاجه غريبه..حاجه غريبه

انا حاسس اني ده يوم عيد

حاجه غريبه..حاجـه غريبه

الدنيا لها طعم جديــد..

حاجه غريبه..حاجه غريبه

انا حاسس اني ده يوم عيد..!!

ظحك تركي عليها..ماكانت تتقن اللهجه المصريه لكن صوتها الناعم اثر على نفسه بكل قوه..حس انه صوتها هزه وضرب دقاته قلبه بشكل سريع.. و احساسها العذب وصل له..

وظحكت معاه غلا وظحكهم ملى الشارع ..وحس انه كأنه رجع لأيام السبعينات..ايام شاديه وعبدالحليم..وخصوصا وهم راجعين من سهره جميله بظلمة هالليل وماسكين ايد بعض بكل حميمه..وكملوها بهألأغنيه اللي جات بوقتها..

مشوا للفندق وهم يكررون الأغنيه بدون خجل وبراحه غريبــه...وهم عايشين احلى لحظات عمرهم..وكل اللي يقابلهم ينعجب من هالثنائي ويتمنى ربع هالسعاده الي تهل بوجهم....

روعــه..روعــه يايوسف..شي مثير..امزجت الواقع بالخيال..!!

اشرقت الأبتسامه بوجه يوسف وهو يسمع المديح من الدكتور سمير..

يوسف شكرا يادكتور..اسعدتني بكلماتك..

الدكتور صدقني لو في عبارات اجمل بقاموس ذاكرتي كان مابخلت عليك فيها..وسكت لحظات...وكمل..كم بقى لك لوحه وتنهي شغلك..!!

يوسف كان يفكر بموضوع اللوح..هو صحيح رسم كميه لابأس فيها..لكن الحفوز اللي بقلبه حمسه اكثر ..وريشته ماكانت تجف طول اليوم..وحتى وهو نايم..يصحى ويكمل بقية رسوماته..ولو عليه يرسم بدون نهايه ..وبدون تعب.!.وكيف يتعب وهو يشوف الحلم منور قدامه وبانت اخيرا ملامحه..!!

يوسف مو كثير..لكن ماأقدر احدد لك حاليا..

الدكتور اوكي..بس اللي ابيك تعرفه انه عندي دره لمده لاتقل عن 3اسابيع..وبعدها اتمنى اشوف انك جاهز من جميع النواحي..

يوسف ان شاء الله خير.

الدكتور نسيت اخبرك بشي..بعد ماأرجع عندي لك مفاجأه بتعجبـك..

يوسف بتخليني اهوجس يادكتور..

الدكتور لاتهوجس..مفاجأه راح تعجبك صدقني..!!

ابتسم بحب للدكتور سمير..مو عارف كيف يشكره..حروفه صارت تخونه امامه عطفه وفضله عليه..

مافي كملة شكر توفي حقـه..وحتى لو الشكر من اليوم لبكره ..ماراح يكفي..!!

ترك العنان لعيونه..كانت تعبر عن الف معنى ومعنى يحمله بقلبه لهالشخص الغالي عليه..

الدكتور مد يده يالله يايوسف..مع السلامه..اشوف على خير باذن الله..

مد يوسف يده له..وهو حاط امله كله بالله ثم لـ هالأنسان الطيب..

وصحيح اذاقالوا..

ضاقت فلما استحكمت حلقاتها..فرجـت وكنت اظنها لاتفرج

لـيلي مـثل لـيلك ؛؛. او همومنا غير

قـلبي صـباحك مـشرقه مـع صاحبي

يااللي السما عندك؛؛. رياض ونواوير

ومـن الـفرج عجعج سناها وفاحي

وانـا نـجومي ؛؛. في الغداري مسامير

عـلى الـسما ؛؛. دقـت فـكل النواحي

عـلمي بـنور الشمس ؛؛. وقت المعاذير

قـلت الـفراق ؛؛. وصـار هذاطاحي

كـان الالـم ؛؛؛؛ غـيث فـدمعي تناثير

وكـان الـندم سـيل فخدى بطاحي

لي فتره ماكتبت..والسبب غير معروف..وهذه الخاطره لها فتره غير معروفه نهايته..واليوم انهيتها بدون نفس

احس بفتور بالكتــابه..قلمي ماصار يساعدني..

حسيته بلحظه ..انهغريب عني..وحتى الورق..الورق اشوفه باهت وهو ساطع بلونه ألأبيض

احاسيس غريبه تجتازني..وانا جاهلتها..احس بملل من كل شي..واللي مستغربه حتى الورق ملاذي الوحيد ياأستمنه..وبلحظه غريبه.. ضعف ايمانـي..والمصيبه انه كل ماأقول اني بقرأ قراءن عشان ارتاح واتقرب من ربي ..انسى..او ألأصح اتناسـى.!!صرت كسوله بكل شي..!!

ياربــي ساعدنــي..انا بحيـره من امــري..!!

احس بظلمــه..ظلمــه بعيوني..واعصابي تالفه..

افتقدت غلا..وافتقدت احمد..البيت صار هادي بدونهم..!!

حتى هيثم افتقدته..ماصارت اشوفه دوم..

وياسمين علمي فيها بنهاية الدوام..

واليوم ليلة العيد..فشله ادق عليها اللحين..!!

ياربي مالي غيـرك ساعدنـي.اناجيــك ياعالم ماتخفيه نفسي..

اناجيك وكلي امل انك تساعدني..وتبرد على قليبـي..!

من وين لك هالصـوره..!!

ابتسمت ابتسام بين دموعهـا اللي تنهمر بدون شعور اذا شافت صورة يوسف

ابتسام شرايك فيهــا..!!مو يشبه عزيز..!!

الوليد اول شي قولي لي..من وين لك..!!

ابتسام يعني من وين بالله عليك..من الألبوم..شفتها بالصدفــه..واحنا غافلين عنها..!!

الوليد اشوف..

مسكت ابتسام الصوره بقوه..وهي معترضه

ابتسام لا..

الولليد احتار من امرها ليش..!!

ابتسام بس..اخاف تاخذها…وانا ماصدقت اني لقيتها..

الوليد طيب بشوفهــا..حرام اشوفهــا..

حست ابتسام انها زودتها…اعطته بهدوء..وهي تناظر ملامح وجهه المخطوفه من الفرحه

دقق في الصوره اثكر..وحس انه غاص بملامحه..اشتــاق له....اشتاق له كثر المطـر اللي ينهمر وماينعد..اشتاق له كثر السحب وكثر البحـر..اشتـاق له..ومحد يلومـه..والله يلوم اللي يلومـه..!!

ابتسام حست بسرحان اخوها..وهو يضغط على الصوره بدون شعور..لكنها تركته ومسحت دموعها وهي تشوف اللهفه اللي بعيونه..وماحبت تخرب عليه هاللحظه..

الوليد حس فيها ليش تصيحين..وانتي كل ليلة عيد تصيحين..!!

ابتسام وتحس بالعبره تخنقها بس..ارجوك خلني اصيح وارتاح..

سكت الوليد وماعرف وش يقول..ابتسام كانت تصيح عليه قبل ماتصيح على نفسها..!!..ماقدرت تشوف هالنظره بعيونه..نظرة المحروم والملهوف..

الوليد بهدوء ابتسام

ابتسام وكان صوتها مبحوح نعم

الوليد باخذ الصوره اليوم.. وترجاها بعيونه..بسوي لها كوبي وبرجعها لك..

انصعقت ابتسام..وحطت ايدها تحبس العبره والصرخه..ماتبي تشوف هالنظره منه..نظرة ألنكسار اللي بعيونه عذبتها وذبحتهــا..!!..ماقدرت تتكلم..وتركت العنان لدموعهــا..

الوليد شعر بضعفه قبل ضعفها..

وعرف انه كلهم ضعاف ومابأيدهم غير هالصوره اللي صارت تروي شوقهم وحرمانهم..

استشورت شعرها..وقررت تلفه بالبخار عشان اذا صحت الصبح ماتحاتيه..اسدلته ورى ظهرها..ودخلت تاخذ الرولات..ويوم طلعت شافت تركي شكله معتفس و مايل على الباب ومغمض عيونه..وشكله توه جاي..

قربت منه بسرعه وهي ميته من الخوف..وقطت كل اللي بأيدها..

وصلت له وهي تصرخ باسمه "تركـــي"

مسكته من خصره تحاول تسنده وتصحيه بضرباتها الخفيفه على خده

تركي كان سكــران لحد الثمالــه..مااستحمل الوضع..وبلحظة ضعف..شــرب وعوض كل ألأيام اللي انحرم منها..

حس بضربات على خده..وفتح عيونه الحمراء بصعوبه..وهو يحس انه كل شي بعيونه تدور..

لمن ارتكزت عينه على غلا..

جرّ ايدها بقوه لمن طاحت وهويصرخ

تركي وخــري زييين..

مشى وهو يتمايل..وبين كل خطوه كان يميل جسمه وهومتعرض للطيحه..

غلا لازالت متجمده وجاهله الموضوع..ويوم شافت منظر تركي ..قربت منه وهي خايفه انه يطيح..!!

كانت خايفه عليه..وتناست كلمته القويه..وضربته ألأقوى..

جلسته على الكنب..واثناء ماتقرب منه..حست بريحه غريبه منه..واعتفست ملامحها..

هالريحه هذه وقظتها..وصحتها من نومها..وكل ألأعراض اللي بتركي اكدت لها شكوكهــا..

قربت منه اكثر وهي تتمنى انه اللي في بالها يكون مو صحيح..هي تحبه..تحبــه ليش مايفهم..!!..

ولمن وصلت لفمه ..

حست بألأشمئزاز والحسره والكـره..وابتعدت لأخر الصاله وهي تصرخ وتصيح من كل قلبها وتقول"حرام عليك..والله حــرام.."

الجزء الرابع والثلاثون

أرواح ترفـرف

ماتدري..هل تدعي عليه وبهالدعـوى تبرد قلبها المقهور..!!او تحسب اجرها عند اللي اكبر منه وفوقـه..

ماتعرف هل هويتقصد تعذيبها..!!او انه يتللذذ بـ المهـا..!!

يمـه بس انا مو عبده له..ولا لمرته..حرام عليه..!!

طبطبت ام بندر على بنتها بحنان وهي تترجاها بعيونها اللي غلب عليها الدهر سفهيه يايمه..لاتخلينه يستقل عنادك..وبعدين على اجر ياحبيبتي..احتسب اجرك عند ربك

ياسمين مسحت دموعها بكف ايدها..واحتد صوتها بقهر لاتحاولين..مستحيل اطبخ له الذبيحه..اذا هو يبي..خلي مرته تطبخ له.اليوم عيد يايمه عيد..وانا اقضي هالعيد بالمطبـخ..!!ياكثر المطابخ اللي بالخبر..خل يدفع شوي من فلوسه اللي حاطهم على قلبه..!!

دخل مراون هاللحظه وهومتكشخ بثوب العيد..سلم على جدته وحب راسهاوبالمثل سوى لعمته

مروان شالزين..شالحلاه..! على وين العزم ان شاء الله..بس وش فيه الحلو زعلان..!!

يتبع ,,,,

👇👇👇

تعديل المقال