رواية راحت روحي من محجر عيوني -9

رواية راحت روحي من محجر عيوني -9

كانت عهود اتفكر شو اتقوله الحينه..طلعت امها من الميلس و اطالع عهود بنظره فهمتها "لا اتخورينها مع الريال"
سند"يشرب العصير" ها ما قلتي..
عهود: مدري وايد اسباب..
سند:- ليش ما اتكوني صريحه..معاي انا الحينه ريلج..
غمضت عهود عيونها ها الفكره للحين مب متقبلتنها"ريلج" تبا مايد بس..
سند: لو قلتلج عشان خاطري ردي الجامعه..بترجعين..
جافتها عهود فرصه..انها تتحرر من كل شي..ترجع حياتها شرات قبل..
عهود"تبتسم" اكيـــــــــد بس ناصـ..

سند:- ما عليج من ناصر انتي الحينه المفروض اتفكرين برايي مب برايي ناصر صح ولا انا غلطان..

عهود:- كلامك صحيح..

يلسوا يسولفون..و حست عهود باالراحه و دشوا بمواضيع مختلفه.. و بعد العشاااا..كملوا سوالفهم..

اخرتها قررت عهود تتقبل الواقع و ترضى بـ سنـد كزوج لهاااااا

وعدها يزورها الاسبوع الياي .. وتم بينهم بس اتصالات..

مرت اسابيع و هم ع ها الحال..و عرفت عهود من عليا ان سلطان سافر الخارج يدرس مدة ست شهـووور...ضحكت يوم تذكرت كيف كان يتصل بها..اياااااام و مرات..

قدرت عهود تتخلص من الرغبه في انها اطرش ايميلات لـ مايد..صارت الحينه شويه شويه..تتقبل فكرة ان مايد خلاص مستحيل يكون من نصيبها..

و قدر سنـد يشغلها بكثرة اتصالاته و زياراته.. و حتى طلعاتهم..بس كان شي داخل عهود..

كيف تقدر توصل لـ علياا ان ناصر للحين يخونها مع سعـاد.. اتاكدت انهم للحيـن ويا بعض..

و في يوم..طلب سند من عهود انها تتزهب ..عازمنها ع مسرحية في مسرح راس الخيمه الوطني..فـ البدايه عارضت بس بعدين..غيرت رايهاا..

دشوا المسرح..عرفت عهود بعدين انهم مب يايين مسرحيه..يايين امسيه شعريه..

سند: شفيج تعبتي تونا باول شاعر..

عهود:"تبتسم" لا بالعكـس انا كنت وايد احضر امسيات ..

سند:- اتحبين الشعر..

عهود"تذكر مايد" هي وايد احب الشعـر..

سند:منو يعيبج من الشعراااا

عهود الحينه اتاكدت ان سند يبا يوصل لشي..فهمت قصده و شو يبا يعرف فردت عليه..

_ماشي محددين وايد شعرااااااااا

شويه..اعلن مقدم الحفل..دور الشاعر مايــــد الشحي..رفعت عهود راسها من على الارض..يوم سمعت اسم ميووووود..

طالعت سند جافته يصفق...حرجت عهود من تصرفات سند..متعمد ايبها هني و يلسها بالصف الاولاني عشان يعذبها..

حست بدقات قلبها ادق ابسرعه..يوم سمعت صوت مايد الشحي يمسي ع الجمهور..و حست بغيض كبير في قلبها ..يوم تسمع البنات يصارخون و يعلقون ..عليه..

الحين ما صار لها الحق اتسوي شراتهم..لانها مرتبطه بانسان غيره..

مب رايمه ترفع راسه و اطالعه كانت خايفه من ردت فعلها..رفعت راسهاا..يوم سمعته ..يقول القصيده الي دوم يقصدها فيها..

حست بـ سند يمسك ايدها..ابتسم لها يوم جافته..كانت عهود خاطرها تصفعه..بس مسكت عمرها.. و يلست تسمع ميوووووود..

ردت الذكريات لوراااا ..ايااااااام كانت تجابل معاه و اطرشله ايميلات..

طالعته جافته يطالعهااا فنزلت راسهااا..

سند: عهود طالعي هناك..؟؟

عهود: ويـن...؟؟

سند: اجوفين الحرمه الي يالسه حذالها حرمه عوده و بنوته صغنونه..

عهود: هي شبلاهااا

سند: ترا هاي حرمة الشاعر مايد الشحـي..

بطلت عهود عيونها مب مصدقه كلام سند..لاااااا ها وايد عليها ما اتروم تستحمل اكثر عن جي..يعني مايد قص عليها..

و لعب بمشاعرهاا..كل من حوليها يلعب عليها..اولهم سعاد و الحينه مايييييد..

سند:- اشفيــــــج..

عهود"واقفه" تعبـــــــاااااااانه..."وطلعت من المسرح..

لحقها سند..مثل ما توقع للحين عهود اتحب مايد.. و موقفها ياكد له هالشيء..

ركبت السياره..و يلست اتصيح..

سند"ميود اعصابه" شو يااااااج توج كنتي ابخير..بعدج اتحبينه هــــــــااا

عهود"هي تصيح" لو سمحت سند انا في حاله تعبانه ما اقدر ارمس الحينه اترجاك تسكت عني..

سند"يشغل السياره" كنت احسب عمري قدرت انسيج مايد بس للاســــف فشلت..

عهود"تصرخ عليه" انت مب فااااااهم شي..

سند" يرمس ابرود"ممكن اتفهميني..

عهود: انا مضايجه ..مب وقته ..

سند:- شو انتي يالسه تتامرين علي

"ومسك ايدها بقوه..انا بجدم موعد الزواج.. و ترا مايد تزوج و انتهى يعني حتى لو كل شي بينا انتهى عمرج ما راح ترجعين لمايد..

عهود"اتهد ايدها و اتصرخ" ها الانســــــــاان ما عاد يهمني و يوم انك تدري علاقتي فيه ليش خطبتني..

سند: لاني اعرف انه مستحيل يكون لج.."يضحك يتطنز على عمره" و ع بالي بقدر اخليج اتحبيني..

عهود"تهمس" صدقني مايد انتهى من حياتي مجرد فنان و مشهور..كله كان طيش شباب..

سند" عهود متاكده..

عهود"تمسح دموعها و اتهز راسها

سند"يبتسم لها" عيل امسحي دموعج..ترا محد يستاهل تنزل هالدموع عشانه..

عهود"تبتسم" صدقت...

بس في داخلها كانت متالمه ان مايد خدعها..اغلى و اعز انسان اختاره قلبها خدعها و ما سوا الف حساب للعشره الي كانت بينهم.

اممممممم

ها المره ما بحط لكم اسئله بحط كذا حوار خاصه بالجزء اليايي..

**

صرخت عهود و حضنتها :- اخيرا ما بغيتي بصير عمــــــــه..

**

سند:- لا و الله و حليلي منو معارفي غير جم واحد و مايد..و كلنا صحتنا تووووووووب و كلنا عرسنا..

**

ناصر"متندم": مب فايج لج اسكتي عني

**

وقفت عهود ابمكانها يوم سمعت صوت مايد من وراها ..

مايد"ابرود" كنت متوقع بترجعين لي حتى و لو طافت مده..

بس ما بحرق الجزء

الجزء العاشر

كانت عهود محتاره الا اتعرف ليش مايد سوا جي ..اكيد في سبب..و اشمعنى اختار و فضل وحده غيرها .. مع انه يعرف اشكثر كانت اتحبه..

دش علياا عليها الحجره..

عليا:- عهود طلبتج...

عهود:- امرينـــــــــي ..

عليا:- حليله سلطان كان نافعني بس سافر ..اباج اتيين معاي العياده..ظهري يعورني وايد..

عهود: ريلج الي ما يسمى وينه..؟؟

عليا"تضحك" ريلي مشغول

عهود: لي متى بتتحملينه ما كان جي قبل..

عليا:- مب وقته بتيين معاي ولا لاء..

عهود: امري لله بيي..بس بتصل لـ سند بخبره..

عليا: اوكى بسير اتجهز ..

عهود يالسه في غرفه الانتظار..تتريا علياا..كانت عند الدكتوره.. عهود للحين افكار تاخذها و اتيببها..ليش مايد سوا جي..اخرتها قررت اتواجهه...

طلعت عليا من عند الدكتور.. و مسكت ايد عهود..

عهود: شو فيج..

عليا"مستانسه" تعالي تعالي بخبرج فـ السياره..

ركبوا السياره...

عليا"بوسيني هني...

عهود :- ها مووووووووح..

عليا: و هني بعد..

عهود اوووووه بسج لااه..مووووووح يلااا شو."تتطنز".لا يكون حامل..

عليا"تمسك ايد عهود" هي انا حامل عهود بمووت من الفرحه..

صرخت عهود و حضنتها :- اخيرا ما بغيتي بصير عمــــــــه..

كانت عهود مستانسه يمكن ها الحمل يغير ناصر و يخليه يرجع لـ عليا و ينسى سعــــــــاااد..

عليا: الدكتوره قالت لي لازم ارتاح..الجنين توه صغيرون..يا دوب كمل شهر ونص..

عهود: ليش تتحملين من شو..؟؟

عليا: ترا من مده ما حملت و قالت لا سمح الله اذا طاح صعب اني احمل مره ثانيه..

عهود: فال الله ولا فالهاا الحماره بسم الله عليج..يلااا روحي بشريه ..

عليا:- متى بترمسينه..

عهود: يوم بيبيض الديج..

عليا"تضحك" حرام عليج ها اخوج..

عهود: هو اصلا مب مفكر يراضيني جان ياه رمسني..

وصلــــــــوا البيت..عهود اتصل لهاا سنـد فراحت حجرتها ..اترمســـــه.. و اتحاول تساله اسئله عن مايد ..عشان اتعرف فـ شو قص عليها مايد..

سند: شخبارها حرمة اخوج..

عهود:- طيبه الحمدلله طلعت حامل..

سند:- مبروووك يستاهل ناصر...

عهود: الله يبارك فيك"مستحيه" عقبالك..

سند"يضحك"هههههههاااا :- يا ويل حالي..ع الي يستحون..

عهود: يمكن يطلع فيني مرض و ما ايييب عيال..

سند: بسم الله شو هالرمسه ..اعوذبالله جي تتفاولين ع عمرج..

عهود"متعمده تقصد مايد": اعرف واحد عنده القلب و ما ايروم يعرس لانه مستحيل اييب عيال..

سند: انتي اشعليج من الناس..

عهود: انت ما اتعرف يعني حد من معارفك عندهم هالمرض..

سند:- لا و الله و حليلي منو معارفي غير جم واحد و مايد..و كلنا صحتنا تووووووووب و كلنا عرسنا..

عهود"غمضت عيونها فكرت قص عليها مايد خدعها سوا عمره مريض عشان تتعلق فيه اكثر..

سند: الـووووو وين سرتي..؟؟

عهود"بصوت واطي" موجوده..زين شخبارك بعد..؟؟

**

دشت عليا حجرتها شويه شويه امفكره اتغطي عيون ناصر و اتفاجاه باحلى هديه شلتنها معاها..

دشت جافته يرمس بالتلفون..و بصوت واطي..استغربت من اسلوبه.. وقفت بمكانها مجمده..و كأنه حد ضربها ع اذنها..يوم اترددت كلمات ناصر "انزين خلينا نملج و بعدين سافري"

تمت ها الكلمات ادور ووووووووو ادور فـ راسها لي ما طاحت غشيانه..

كانت تسمع اصوات من بعيييييد فتحت عيونها بصعوبه..جافت ناصر مجابلنها.. و عهود و امها و عمتها واقفين حذالهااا..

طالعتهم ..جافت عهود اتصيح حتى امها و ام ناصر.. و ناصر باين عليه منحرج و مب عارف شو يسوي..اتذكرت الي في بطنها..

حطت ايدها ع بطنها.. و اطالع عهود و امها..

عليا"بصوت واطي" ولــــــــدي..

طلعت امها برع تزقر الدكتوره..و لحقتها ام ناصر.. مسكت ايد عهود..

عليا" تصيح" عهوووود ولــــــــدي ابخير..

عهود:"تمسح ع راسها" هي ابخير بس انتي ارتاحـي..

يت الدكتوره.. و طلبت منهن يطلعوا برع الا ناصر..عهود اصرت اتم بس الدكتوره منعتها..فطلعت من الغرفه..

عليا"امطنشه ناصر" شو متى بطلع من هنـي..؟؟

الدكتوره: ان شا الله بتطلعين بس اباج قبل ترتاحــــــين و انتي تدرين كل شي في الحياة قسمه و نصيب..

عليا"اتحطت ايدها ع بطنها" شو قصدج..

اجرب منها ناصر.. ومسك ايدها..عليا اطالعه.. و رجعت اطالع الدكتوره..

الدكتوره: الله يعوضج غيره ..

غمضت عهود عيونها و يلست اتصيح يوم سمعت عليا اتصارخ بصوت عالي..اكيد عرفت انها اجهضت ..كل من ناصر دمر حياتها و الحين يدمر حياة علياااااا...

حاول ناصر يحضنها و يهديهـا ...بس عليا اتصيح ابصوت عالي.. و يلست تضرب ناصر بايدها و اتقول "انت جتلت ولدي"..

دشت عهود الغرفه و مب متحمله الي صار و لحقتها امها و ام عليا.. يلست ام عليا تحضن بنتها..

بس فجاه علياا سكتت فعرفوا انها طاحت مره ثانيه غشيانه..

طلع ناصر من الغرفه.. و لحقته عهود..يلست اتضاربه..

:- انت تدري اشكثر كانت مستانسه بحملهااا

ناصر"متندم": مب فايج لج اسكتي عني..

عهود"معصبه" لا ما بسكت..انت جتلت ولدك.. انا كنت عارفه من زمان علاقتك بـ سعاد بس الحينه حسيت بالندم لاني ما خبرت علياا..حرام عليك كانت مستانسه ما كملت ساعه الا طيحته..

ناصر"متسند ع اليدار" ما ادري كل ها بيصير..

عهود: و بعد ما تدري انها صعب تحمل غيره..حسبي الله عليك..

ودشت غرفة عليااااا...جافت ام عليا و امها يالسين ع الكرسي ووقفت عهود.. تتامل عليا جافتها راقده...توها عرفت الي يجوف مصيبة غيره تهون عليه مصيبته..

مرت ايام و حالة علياا شرات قبل.. ما كانت تدري شو صاير في الدنـيا كانت كله راقده ..عهود كانت اتعرف ان امها و ام عليا ما يعرفون شو السبب الي خلا عليا جي حالتها..

ناصر كان مضايج و عزاه الوحيد..سعاد الي كانت اتخفف عنه..

و عهود..مب مقصر معاها سنـد..وقف معاها بكل الاوقات..بس كان يشغلهم و يخافون من الي صار لـ علياا..خاصه يوم صارحوهم الاطباء..ان لازم ينقلونها..دبي مستشفى الامراض النفسيه..

في البدايه الكـل عارض... و اولهم ناصـر.. بس يوم جافوا عليا ما تدري بحالها بس يالسه اطالع ما يدرون اذا تسمعهم او لا ..

كانت كله ساكته.. بس اطالع الي حوليها..بس يوم اجوف ناصر كانت اتحاول اتصارخ.. و تحط ايدها ع رقبتها.. اتحاول اطلع صوت بس مب رايمه...

الكل كان مستغرب ليش يوم ناصر يدش غرفه عليا جي ينجلب حالها..عهود فضلت انها تسكت..و ترمس بكل شي بعد ما الله يشفى علياااااا..

مر اسبوع وتم تحويل عليا مستشفى الامراض النفسيه فـ دبي..تمت معاها امها في المستشفى.. و عهود و امها كانوا يزورونها كل بعد يومين..

عرفت عهود ان دكتور فهد صار مشرف ع علاج عليااااا..فحكت له كل الي صار..و كان سند موجود معاهم.. و مستغرب من الي اتقوله عهووووووود...

المهم اخيرا ً منعوا زياره ناصر..لـ عليااااا عشان ما تنهـار...

**

عهود و سند رادين من المستشفى.. ورايحين راس الخيمه..

سند:- الله يعينها مدري كيف صبرت..؟؟

عهود: الله يشفيها..

سند: ما توقعت انج كتومه لها الدرجه..

عهود: بس كان لازم اخبر الدكتور كل شي و كيف صارت بها الحاله..

سند: افهم من كلامج انتي ضد اخوج..

عهود:- لا بالعكس انا مع الحق.. وصج ناصر وايد قاسي..

سند: اجبرج علي صح...؟؟

عهود"مجذبه" لاااااا انا ما قلت جي..

انشغلت عهود عن سالفه مايد..بالي صار لـ علياااااا..

بس قررت انها لازم تنهي الموضوع و اتعرف مايد ليش سوا فيها جي..!

سعاد: ناصر مستوي وايـــــــد عصبي..

ناصر: احس هدمت كل الي بيني و بين عليا انا وصلتها لهاي الحاله..

سعاد"تخفف عنه" يا عمري ها كله مكتوووووب و الله مب رايد يتم ها الولد عشان ما يربطكم في بعض..

ناصر:- حتى و لو علياا وايد حساسه..

سعاد: خلاص عمري انا ببعد عن طريجك .. و انت حاول اترجع علاقتك بـ عليااااا يمكن جي ترتاح..

ناصر"يمسك ايدها" لا مستحيل اهدج انتي حبي الوحيد..

سعاد"تستهبل" ما عرفنا لك و عليا شو اتكون..

ناصر:- عليا مجرد زوجه و ما اظن تباني بعد الي صار..

سعاد: متى بنعرس و ترتاح من ها كله..

ناصر"يطالعها" جريب بس انتي حددي..

سعاد:- بعد ما ارجع من السفر..

ناصر: بعد شهررررررر وايد..

سعاد:- بالعكس ..ورا باجر بسافر و بها الشهر فرصه لي ما تشفى حرمتك.. و بهاي الطريجه ما بتشل و لا بتحس بالذنب من صوبها..

ناصر:- صدقتي يا اذكى مخلوقه ع ويه الكره الارضيه..

**

دش د فهد غرفه عليااااااا..طلب من امها انها تطلع برع الحجره..

ام عليا: لا ما بطلع شو بخلي بنتي عند ريال غريب..ها لا من مذهبنا ولا عادتنا..مسويه لك برزه في الحجره و ماني طالعه منها..

د فهد"يضحك" ههههههههااي.. يا الغاليه امايه انا شرات ولدج و عليا شرات اختي ما تبينها اطيب..

ام عليا: ويه ترمس شراتنا عربي..

د فهد"ميت ضحك" اكييييييد ارمس عربي و اماراتي بعد.. تراني منكم و فيكم..

ام عليا: عيل دختور والا يسلمك خلني عند بنتي ما ابا افرقها" وتصيح" هاي وحيدتي..

طالع الدكتور علياا جافها اطالع السقف..لا حول لها ولا قوه..

فهد"يهزز راسه" ما عليج يا الغاليه انتي تامرين بخليج معنا بس كذا جلسات ما اباج تحضرينها..شو قلتي..

ام عليا: موافقه ربي يخليك لاهلك و ناسك..

د فهد:- الله يسمع منج..

سار صوب علياا..الدكتور يحاول يرمسها.. بس عليا ولا كانه حد يكلمها..فاتحه عيونها اطالع السقف..

و الدكتور يزقرها باسمها.. و اسم امها و كذا اسم مقربين لها بس بعد ماشي فايده.. هزز راسه.. وطلب من الممرضه اتحط لها مغدي..و طلع من الحجره..

**

عهود متردده تتصل بمايد ولا ..اخرتها قررت ..اتروح له المطار و اتواجهه... طلبت من الدريول يوصلهاا... ركبت الطابق الثاني عند المطاعم.. و طلبت من الموظف يزقر مايد الشحي..

يتبع ,,,

👇👇👇

تعديل المقال