بارت مقترح

رواية شرع ربي ولا اعتراض -104


رواية شرع ربي ولا اعتراض - غرام


رواية شرع ربي ولا اعتراض -104

مشاري/هذا اللي صار..
لمياء/طيب وعمتي شقالت وعمي شقال مارد على اخته؟
مشاري/امي حكيمة ماحبت تكبرها بين ابوي وعمتي وقفلت السالفة وقالت كلا ياخذ نصيبه بالدنيا وقمنا طلعنا بدون أي كلمة زيادة..
لمياء/طيب وابو مصعب ماقال شي..
مشاري/يوم استلمت عمتي الكلام الكل سكت ...
لمياء/عمتك غريبة..فعلا غريبة..هاذي منو يعجبها بالله..بس تدري بيجيها يوم وبتعرف ان الله حق....
مشاري/قومي بس حطيلي لقمة اكلها بقوم اطلع ادور محمد اشوفه وين؟
مريم/بابا عمي محمد بالتلفون..
قام مشاري ومسك السماعة بسرعة من يد مريم/هلا محمد وينك انت؟
فتحت عينها ببطء شديد تستعرض الدنيا حولها..
ماكانت غير امها جنبها وتقرا لها قران ويوم اتبهت انها فتحت عيونها تلفتت لها..
ام رائد/ملاك...
ملاك:.................
ام رائد/يمه احط لك شي تاكلينه؟
ملاك بضعف/ماابي..
ام رائد/مايصير يمه...انتي ماكلتي شي من امس...
ملاك وهي تناظر بالورد اللي زاد/من منو؟أي واحد من اخواني تذكر يزورني...
ام رائد/هذا مو من اخوانك....
ملاك/منو...
ام رائد/من انسانة تغليك وتعتبرك اختها الصغيرة....
قامت ملاك من سريرها بتردد ومدت يدها لسلة الورد اللي كانت تناظر فيها امها وسحبتها عندها وهي تشيل الكرت علشان تتاكد ..
كانت تقرا كلمات نجود وهي تتمنى لها السلامة وتحس انها واقفة على راسها تكلمها...غمضت عيونها بقوة وقامت تبكي...كان بكيها بهدوء وشيئا فشيئا زاد ..
تقربت منها امها وحظنتها وقامت تهديها...
ام رائد/خلاص يمه خلاص..
ملاك/يمه...يمه نجود....
ام رائد/خلاص حبيبتي خلاص لاتتعبين نفسك...
ام مشاري/فتحي الباب يا تينا..
ابو مشاري/معقول محمد..
ام مشاري/لا مشاري توه مكلم ويقول انه بيروح له....
وقفت نظراتهم على الشخص اللي جاي لهم وهم يناظرون فيه بدون مايكونوا توقعوه زيارته لهم....
فوزية بخجل/السلام عليكم...
ابو مشاري/وعليكم السلام.....هلا يبى تعالي..
كانت واقفة ومستحية من نفسها انها تجي برجلها لبيت خالها بس حقران محمد لها اليوم بطوله اجبره تجي وتشوف وتسمع أي خبر عنه....
ام مشاري/تعالي يمه قعدي ليش واقفة..
تقدمت بخطوات ثقيلة وهي حاسة بنظراتهم لها ومع هذا ماقدرت ترفع راسها وتناظرهم ظلت قاعدة وهي منزلة راسها....
ابو مشاري/فوزية....وش فيك يابنتي؟
فوزية بتردد/خالي....
ام مشاري/علامك يمه في شي....
فوزية/اللي صار اليوم؟
ام مشاري/اللي صار اليوم انتهى وعدى وتصافينا خلاص؟
فوزية باصرار يشبه اصرار امها بس يشوبه انكسار/بس انا ماادري عنه ولاسمعت الا قبل شوي....يعني كله صار بدون علمي..
ابو مشاري/وش تبين تقولين يافوزية؟
فوزية تنهدت/خالي يمكن من الغباء اني اجي هنا..ويمكن تحسبها قلة ادب وقلة تربية...بس انا فعلا كنت ابيه وهو يبيني ومتفقين على ها الشي وتفاجات اليوم بللي صار..
ام مشاري/خلاص يمه اللي صار صار..ومافي شي يصير الا قسمة ونصيب للبني ادم...
فوزية/شنو يعني ياخالتي؟
ام مشاري/خلاص امك قالت كلمة الفصل؟
حست بان الباب تسكر بوجهها..وتنهدت وقامت...بس قبل لاتروح جهة الباب سالت عنه..
فوزية بتردد/طيب وينه محمد اللحين ليش قافل جواله؟
ابو مشاري/مع اخوه مشاري...
فوزية/سلموا عليه...
طلعت وهي تجر اذيال الخيبة وراها....
فهد/ها سارونة فيك شي...
سارة/جايبة لكم عشى لاتقول تعشيتوا...
فهد/لالسه ماتعشينا...تفضلي...
سارة/خالتي نجود هنا..
فهد/أي هنا....
سارة/مابيكون عندها مانع اني اتعشى معكم..
فهد/لاطبعا..دخلي بابا دخلي....
دخلت وكانت نجود قاعدة تتفرج على التلفزيون.....ولفت يوم سمعت صوت سارة يسلم عليها....\
نجود/وعليكم السلام..
فهد/هاذي سارة جايبة لنا عشى من المطعم اللي راحوه ..
نجود/ماتقصرين.....
فهد/اخوانك تعشوا؟
سارة/أي......
فهد/خلاص يالله مدام انك انتي اللي جبتيه قومي جهزيه لنا بالمطبخ..
سارة/أي بس...
فهد/شنو؟
سارة/عادي....
فهد/طبعا عادي.....
دخلت سارة المطبخ تحوس بعمرها...
فهد/اقول حياتي مو الثوب شوي قصير..
نجود بلا مبالاة/وان شاءالله تبيني ابدل علشانها؟لاحبيبي احنا بنات وفاهمين لبس بعض؟
فهد/عليك عناد صدق يشيب....
نجود/وش فيها الشيب وقار.....وهيبة ووسامة؟شفت شلون اني بالنهاية احقق لك كل شي تطلبه....
سارة/بابا يالله جهزته......خالتي نجود تفضلي...
ام مصعب/انتي وين كنتي؟
لفت لهم فوزية ولقتهم ينتظرونها بالصالة وكانهم مستغربين غيابها....
ماقالت شي بس وقفت تناظرهم....
ابو مصعب/فوز يبى وين كنتي؟
فوزية بلا اهتمام/كنت في بيت خالي...
ام مصعب/أي خال فيهم....
فوزية/كنت رايحة لخالي فهد بس غيرت راي ورحت بيت خالي بو مشاري؟
ام مصعب/وليش رايحة بيت خالك بو مشاري والله؟
مصعب/يعني سؤال غريب يمه بيت خالها بعد ليش بتكون رايحة له؟
ام مصعب بعصبية/لو سمحت لاتتدخل يامصعب...
وقفي مكانك....
فوزية/نعم...
ام مصعب/وش موديك بيت خالك؟
فوزية/يعني هي اول مرة اروح بيت خالي فيها؟؟؟انا طول حياتي اروح بيت خالي وين المشكلة؟
ام مصعب/المشكلة بالتوقيت احظي؟
ابو مصعب/فوزية تعالي يابنتي ابيك...
راحت وقعدت جنب ابوها وهي حاسة بان في شي بيخنقها وتبي تبكي....
ابو مصعب/علامك يايبى..
فوزية بنرفزة/يبى شلون كذا...
ام مصعب/وش اللي شلون؟
فوزية/يبى...محمد تقدم لي انا مو المفروض يكون رايي هو الماشي بالنهاية؟
ام مصعب/وش كنتي تبين تقولين ان شاءالله..
فوزية بحدة ماتناسبها وهي الهادية باغلب الاحيان/ابيه...
ام مصعب/ياسلاااام!!!ونعم التربية والله؟؟ماتستحين تقولين ابيه؟
فوزية/يمه هذا ولد خالي....ورابي معي من الصغر وعارفني وعارفته...
ابو مصعب/أي بس امك تقول عنه طايش وماهو متحمل للمسؤلية يايمه وكانت عنده علاقات سابقة..كيف ترضين تاخذينه وانتي العاقلة الفاهمة....انا ماارضى ارميك على واحد مثله بعد ماشرحت لي امك وضعه..
مصعب/يبى محمد,,
ابو مصعب قاطعه/مصعب....
فوزية/بس القرار بالنهاية لي...وانا ابيه وهذا هو المهم...
ام مصعب/وانا قلت لا.....
فوزية قامت وهي مي قادرة تخش دموعها اكثر واول ماركبت الدرج فضحتها صوت شهقاتها والتفتوا لها بس كملت لين وصلت لغرفتها وراحت تبكي هناك.....
مصعب وقف وهو معصب../مدري أي منظار هذا اللي تفكرون فيه..
ام مصعب/انت تراك بتجنني....علامك صاير عدو ماكانك ولد؟
مصعب/يمه...لاتتسرعين ترى محمد ماينعاب وماهو مثل ماانتي قاعدة تقولين...واذا اختي تبيه انا ماراح اسكت وبعطيها ايه حتى لو كان الثمن اعرضها عليه بنفسي؟سامعتني يمه....
اليوم كان عند عبد العزيز غير...
كان لازم يلحق حامد مهما كلفه ها الشي لازم مايسكت اكثر ويروح يشوف وضعها...
خايف عليها من كل قلبه لايكون جرى لها شي...
اتفق هو وناصر انهم يروحون بسيارة ناصر علشان لايتعرف عليها حامد...
وكان الاتفاق مثل مارسموه.....والليلة بتكون الحكم,,

فهد/ها وين؟
نجود/بدخل انام....
فهد/ونومة الظهر ان شاءالله؟
نجود/شفيها؟
فهد/تنومينا الظهر علشان تسهرينا الليل بس الليلة ماشكلها سهرة؟
نجود/انا مانومت احد...انت نمت بارادتك؟
فهد/ياسلاااام اذا انتي نايمة انا شبسوي بالله اكيد بنام وراك....
نجود/ياسلاااام..
فهد/يعني اجاملك....
نجود/اول مرة اشوف ناس تنام مجاملة لغيرها....!!!!
فهد/قومي بس كملي اللي بديتيه اليوم قبل لايقاطعونا..
نجود/وش تبي يعني؟
فهد بحالمية/غني لي....
نجود/أي بس انا اغني بفلوس....
فهد/حاضرين لو تبين العمر كله يفداك..
نجود/كلام بس...
فهد/افا..جربتي تطلبين ورديناك....
نجود/مو بعد..
فهد/وراك تقولين ها الحكي اجل...
نجود/فهد سارة ماقالت شي.....مالاحظت انها كانت بمعظم الوقت ساكتة...احسها قاعدة ترتب كلام تقوله وماهي قادرة..
فهد/طيب..
نجود/خليها على راحتها هي لين وصلت لقرار ولكلام تبي تقوله بتقوله وبتسويه بدون تردد....
فهد/نجود..
نجود/لبيه حبيبي...
فهد بهمس/نجود...انا سعيد اني معك....
مشوا وراه لين وصل لفيلا كبيرة باخر الضهران ونزلوا منها هو وولد عمه وظلوا عند باب البيت فترة قصيرة وبعدها ركبوا سيارتهم ومشوا...
ناصر/ليش مشوا؟
عبدالعزيز/مدري...
ناصر/معقولة كل ها المشوار واخر شي ماتكون هي....
عبدالعزيز بخيبة امل/تتوقع!!
ناصر/شنو يعني..بيكون غيرها..
عبدالعزيز/مدري...بس يمكن يكون شاك فينا....لانه اليوم ماعطاني وجه ابدا....ومسفر مايبي يستقبله لاهو ولاغيره علشان لايجيب له الشبهة؟
ناصر/رايك كذا..
عبدالعزيز/انا اقول يمكن....
ناصر/طيب وش رايك نسال هذا الرجال اللي يمشي هنا....
نزل النافذة وناداه..
ناصر/السلام عليكم..
الرجال/وعليكم السلام....
ناصر/لو سمحت يالاخو..ها الفلا معروضة للبيع...
الرجال/والله ياخيو ماصار لها شهرين من شراها صاحبها مدري...جرب اساله يمكن يكون ببيعها..
ناصر/طيب هي لمنو؟
الرجال/والله مدري..بس الظاهر الرجال توه متزوج وجاي وهو ومرته مابعد شفناهم...
ناصر/اممم طيب مشكور يالاخو ماقصرت....
ظل يناظر بعبد العزيز وعبد العزيز يناظر فيه....
بندر/عبير...
عبير/نعم...
بنر/زرتيها؟
عبير وهي حاملة محمد اللي كان نايم/أي..
بندر بلهفة/شلونها؟
عبير/ان شاءالله تتجاوز محنتها بسرعة جواهر قوية وكلنا عارفين انها بترجع مثل قبل..
ماعجبه ردها ابدا...تمنى انها توقف بصفه مو بصفها وهي اخته ومابقى غيرها ممكن ياخذ اخبار جواهر منها....
بندر/شلون نفسيتها؟
عبير/والله بتروح ها اليويمن لنجود بتغير جو عندها اول ماتلقى فرصة وتلقى احد تروح معه....نجود عازمتها تقعد عندها شوي ..تعرفهم يرتاحون مع بعض واكيد اذا راحت الرياض بتتغير شوي....
بندر بنرفزة/أي بس نجود تكرهني وبتكرهها فيني زود؟ياليتها لو ماتروح...
عبير/نجود حقانية وماتكره احد..بس لانها حقانية صارت عندك ماتكرهك..
بندر بعصبية/انتي وش عرفك فيها..هاذي انا اعرفها زين محد خرب جواهر وشيل قلبها غيرها؟
عبير بحدة/انا مااسمح لك تتكلم عنها بها الطريقة؟هاذي بنت عمك اولا...ثانيا ماتقولي ليش تبيها تنصفك وتزينك بعيونها وانت الغلطان اصلا!!!كانت عندك جواهر والكل حاسدكم على ها الحب بس انت اللي رفست النعمة برجلك حالك حال غيرك ويوم راحت منك جيت تزحف تبيها ترد....!!رجال انانين ...وقت حاجتكم تدلون الناس اللي تخليتوا عنها بعد مابعتوها بوقت وناستكم وراحتكم!!!
كانت تتكلم وهي تقصهم ثنينهم هو وعلي.....وكان هو بوجهها علشان يسمع ها الكلام وكان لازم يسمعه,,,,
بفيلا مسفر...
مسفربعصبية/وينها الحقيرة وين راحت..
الشغالة/انا مايدري يوم يجي يدورها ماشفتها لاهي ولاالطباخ؟
مسفر/شلون يعني؟
الشغالة/هي كله يقول يمبى يروح بيت عمها ويمبى تلفون يكلم يمكن هي يعطي فلوس كتير ويخليه يكلم ويروح معه علشان في خوف من انت..
مسفر/شوف النذلة السالفلة الحقيرة.....وانتي ياحظي وينك غايبة عنهم..
الشغالة بتاءنيب/مسفر انا مع انتين...
مسفر كان يغلي طلعت لبنى من البيت شي ماحسب له حساب...يعني راح فيها.....
جاه اتصال من ولد عم حامد اللي كان يسهر عنده كل ليلة وقال له انه شاك ان المباحث لاحقتهم وانهم واقفين جنب الفيلا ومعهم واحد من الجيران..
ذيك اللحظة جن جنونه صحيح وماعرف شيسوي اذا المباحث برى ماراح يمديه يتحرك وينقل ها الممنوعات برى الفيلا....
ماله غير انه يحرق الفيلا بللي فيها بدون مايفكر حتى يدور فيها...
ولو كان سواها كان شاف لبنى متخبية برى بالحديقة مع الطباخ اليل ساعدها بالوقت اللي كان غاطس فيه مع شغالته جعله البلى هو وياها بيوم واحد ان شاءالله..
كانت خطتهم انهم يخلون الابواب مفتوحة ويوهوهم انهم طلعوا وهم عارفين ان مسفر بيسوي مسح كامل للمنطقة لين يلاقيهم علشان كذا قرروا اول ماتبدي السهرة ويلهون بسمومهم يهربون..بس القدر كان بوجههم ماحسوا الا بالنيران بكل مكان بالفيلا...
مسفر من الخبال اللي فيه حرق الفيلا وحرق نفسه وحرق الشغالة اللي ماقدرت تطلع بس السايق طبعا اول الهاربين....
عبدالعزيز بفزع/نار..نار ياناصر نار..الفيلا تحترق؟
ناصر وهو يناظر مو مصدق/شلونظ
طلعوا اثنينهم من السايرة يركضون للفيلا اللي طلع منها الطباخ وهو بحالة افضل من حالة لبنى اليل كانت نص عبايتها محترقة ومبين انه مغمى عليها,,,
عبدالعزيز بفزع/لبنى..........لبنى....لبنى وش فيك ياعمري.....
اليوم الثاني...
في المدرسة..
سارة/ابلة نجود....
لفت لها نجود اللي كانت بتدخل غرفة المعلمات وتقربت منها..
نجود/خير ياسارة وش فيك؟
سارة بارتباك/انا نسيت مصروفي بالبيت وابي اروح افطر.....
نجود/طيب انتظريني هنا....
سارة لانست مصروفها ولاشي..بس كانت تبي تتكلم مع نجود باي شي وتفتح معها أي موضوع علشان ترجع تتكلم معها وتتناقش بس ماهي عارفة كيف..حتى الحجج اللي صايرة تتحجج فيهم مثل وجهها..
يوم طلعت لها نجود وجابت لها الفلوس كانت الفسحة انتهت ودق الجرس وسوت سارة انها خايب املها رغم انها متعمدة تجي بالوقت الضايع..
سارة/خلاص شكرا برجع فصلي..
نجود بصرامة/تعالي المقصف افطري بعدين انا اردك فصلك...منو عليكم اللحين؟
سارة/ابلة هيلة..
نجود وهي تمشي معها/وليش توك جاية يوم انك ناسية مصروفك كان جيتي من بداية الفسحة؟
سارة/كنت ادور الجازي ولامروة وماشفتهم ومي اليوم غايبة....واستحيت اني اجيك بس لاني مافطرت بالبيت وحسيت اني جوعانة....
نجود/وليش ماتفطرين الفطور اهم شي غلط نبتدي يومنا بدون وجبة الفطور....وبعدين انا هنا مثل البيت لو بغيتي شي تعالي انا ماراح اقصر معك...
سارة بامتنان/شكرا....
كانت قاعدة بغرفتها وماراحت الدوام اليوم ..محمد من الامس مقفل جواله..
كانت مشغلة المسجل على اغنية ماجد المهندس ورافعة الصوت حده...
حبك قتلني محمد ياعيوني ياحمودي
لا اكل ولا اشرب ودموعي فوق خدودي
استاحشك كل لحظه ياقليبي انت ونبضه
ماجوز انا من حبك والناس كلها شهودي
ياناس اريد محمد من عنده لا تحرموني
خلوني اشوفه قبالي واخذو بعدها عيوني
استاحشك كل لحظه يابعد قلبي ونبضه
مااتوب انا من حبك والناس كلها شهودي
قلبي جرح يوجعني مايطيب الا بحضنك
سوتها بيا الدنيا يوم ابعدتني عنك
استاحشك كل لحظه ياقلبيبي انت ونبضه
ما اجوز انا من حبك والناس كلها شهودي ودخلت عليها امها....
ام مصعب/خير ان شااءالله وين قاعدين احنا؟
ماردت عليها فوزية اللي كانت سرحانة مع الاغنية
ام مصعب طفت المسجل وقعدت قبالها..
ام مصعب/فوزية...
فوزية رفعت راسها....
ام مصعب/يايمه بكرة بيجيك سيد سيده وبتقولين كان امي معها حق يوم رفضته ومارمتني عليه....
فوزية/يمه....لاتخلقين لنفسك أي عذر...انا ماابي غيره لو شيكون..انا قلبي ماتعلق الا بمحمد وماابي غيره سواء رفضتي ولارضيتي وغير ها الكلام ماعندي....
قالت اللي عندها وقامت من الغرفة طلعت وتركت امها بروحها...
ام مصعب بحرقة /يا انكم بتجننوني انتي واخوك؟مدري وش تبون ولا شنو ناويين عليه؟؟؟عسى قلبي يصبر عليكم وعلى بلاكم!!!
نجود/تصدق عاد...اليوم سارة جتني وقت الفسحة؟
فهد وهو ياكل معها/أي..وش كانت تبي...
نجود/سلامتك تقول ناسية مصروفها وتبي تفطر لانها مافطرت.....يعني تحس انها تبي تتحرش من بعيد لبعيد..
فهد كان بيقول شي بس دق جوالها اللي على الطاولة وسكت وهو يناظر فيها..
نجود/منو...
لان الجوال كان جنبه..
فهد/ملاك....
نجود شالت الجوال بسرعة وردت عليها..
نجود/حمد الله على سلامتك...
ملاك بضعف/شكرا...
نجود/شلونك اللحين....
ملاك/....ابلة نجود.....انا اسفة....
نجود/بعدك بالمستشفى؟
ملاك/أي..
نجود/طيب فيني ازورك....
ملاك/حياك...
نجود/معناته العصر بكون عندك...تبين شي ...
ملاك/شكرا....
فتحت عينها ببطء شديد وهي تناظر بالمكان اللي هي قاعدة فيه ومن ريحته وريحة المقمات القوية تاْكدت انها بمستشفى....
ابو علي وهو يبكي/حمد الله على سلامتك يابنتي تو مانورت العيلة؟
لبنى وهي تحس بالم في يدينها/عمي.....عمي وش اللي صار؟وينه مسفر؟وكيف انا هنا؟
ابو علي/ماعليه يابنتي ماعليه..قولي الحمد الله انك هنا.....وبعدين بتعرفين كل شي بس انتي قولي لي..انتي بخير..
لبنى بتعب/حس بالم فظيع بيديني....
كان يناظر يدينها الملفوفين واللي احترقوا امس وهو يمسح دموعه...
ابو علي/الحمد الله يابنتي الحمد الله انا الدنيا مو واسعتني يوم اني شفتك قدامي بخير...

برى غرفتها كانوا اثنينهم يناظرون في بعض..وهم ينتظرون نتيجة التحاليل اللي بتبين اذا ماكانت ادمنت ولالا...ووصل ابو بندر بها اللحظة,,
ابو بندر بلهفة/ناصر وينها غرفة لبنى؟شلونها بنت عمك عساها بخير؟وانتبه على عبد العزيز اللي نزل راسه من شافه..
ناصر/الحمد الله بخير ياعمي..كاهي بها الغرفة مع ابوي تعال اوصلك....

فوزية/مصعب ابي ا روح لخالي فهد...
مصعب/ليه..
فوزية/يهمني اعرف رايه بالموضوع....
مصعب/حتى لو كان من راي امي..
فوزية/خالي فهد مستحيل يقول ها الكلام؟؟وبعدين انا ابي اشوفه وابيه يسمعني قبل لااسمعه....صدق محتاجة اشوفه يامصعب..
مصعب/طيب المغرب نمره..
فوزية/وانا وش ينطرني ابي اشوفه اللحين؟
مصعب/أي بس ماباقي غير ربع ساعة ويروح المكتب مابيقعد معك كثير....
فوزية/تعرف وش معنى انا مخنوقة بها البيت وماني قادرة افكر بشي ابدا...
مصعب/ماكلمتي محمد؟
فوزية تنهدت/كل ماادق عليه من امس وهو قافل جواله ..
مصعب/حتى انا بعد دقيت عليه لقيته قافل جواله ..مو معقولة على سالفة مثل كذا تتغير علاقتنا احنا وبيت خالي..
فوزية/الله يسامحك يايمه....حرقتي قلبي عليه وحرقتي قلبه.....
كان يمشي لسيارته بعد ماتطمن عليها انها سليمة ومافيها شي وحمد ربه انها ماتورطت وحملت منه...
ركب سيارته وهو يغالب دموعه...
كان وده يشوفها ويتطمن عليها بس ماقدر...ويمكن انها خيرة انه ماقدر....
اهم شي انها بخير....مع السلامة يالبنى مع السلامة ان شاءالله ربي مايكتب لنا شوفة ثانية بها الدنيا الا وفيها خير لنا ...
لو تدرين شكثر كنت مشتاق اسمع صوتك يالبنى بالامس كان حسيتي فيني....
احبك والله احبك يمكن ماكانت فرصة مناسبة اشوفك بها الموقف بس صدقيني ان قلبي تقطع عليك....
ياربي احفظها واحميها..تراها انسانة غالية على قلبي...
فوزية/عارفة ان ماعندك وقت بس مضطرة اتكلم معك..
فهد/خير..
فوزية/ماشفت خالي بو مشاري امس ولاامي..
فهد/بلى شفت امك امس....
فوزية/وماقالت لك شي....
فهد/شي مثل شنو؟
فوزية/مدري...
فهد/كانت متضايقة من مصعب اخوك حيل وبس...
فوزية/لانه مارضى بللي صار..
فهد/ليش شنو اللي صار؟
فوزية تنهدت/خالي محمد ولد خالي بو مشاري تقدم لي بالامس وامي رفضته وغلطت عليه وجرحته قدامهم كلهم....بدون ماتشاورني ولاتاخذ رايي..
فهد/امممم وطبعا انتي موافقة عليه؟
فوزية/تبي الصراحة ياخالي أي....
فهد/كلمتيه من بعد ماطلع من بيتكم...
فوزية/انا ماعرفت بالسالفة غير يوم جيت من دوامي وكل ماادق عليه مايرد علي وبعدين قفله والى اليوم وهو مقفله وماني عارفة شسوي....
انا ابيه....اي ابيه..ومايهمني كلام أي احد عنه كل اللي يهمني اني مقتنعة فيه....
فهد/يعني مادريتي انه سافر اليوم؟
فوزية بصدمة/سافر؟؟؟؟وين راح؟
فهد/راح امريكا لمنال بيقعد هنا كم يوم وبعدين بيرد هو مرني وقال لي بس ماقال لي عن ها السالفة....
بانت الخيبة على وجهها يوم عرفت انه سافر...
فهد/على العموم انا بمر على امك وابوك الليلة وبشوف وش السالفة....
نجود/حمد الله على سلامتك...
ملاك كانت هادية ومبين عليها التعب وكل روح الفرفشة والغرور راحت منها وكانها انسانة ثانية...
نجود/وين امك ماهي معك..
ملاك بهدوء/انا قلت لها انك بتجين واني ابي اشوفك بروحي؟
نجود|/اممممم...
ملاك/اسفة.....
نجود/............
ملاك/ماكنت مدركة للشي اللي اقوله ذيك اللحظة...ماكنت مسيطرة على اعصابي...
نجود/ملاك..انا ماابي اسفك ابيك تراجعين نفسك..
ملاك/انا راجعت نفسي....
نجود/حلو..ولوين وصلتي...


يتبع ,,,,

👇👇👇
تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -