رواية شرع ربي ولا اعتراض -99

رواية شرع ربي ولا اعتراض -99

فهد/قلت لها هي تبدي تفتح الموضوع معك وتبداْ بتحسين العلاقة اذا تبي وانتي اكيد بتتفهمينها بس لازم الخطوة تجي من ناحيتها هي,,,
نجود/تفتكر امها لها شغل بالسالفة؟
فهد/مااظن لانها كلمتني من بيت عمها يعني ماتبي امها تسمعها ولو بالغلط؟
نجود/اصعب شي تصرفات المراهقين ساعات تحس مو فاهمها....
فهد/هاذي قضيتك انتي وانتي اللي بتتكفلين فيها المهم لاتشغلين بالنا فيها اللحين..
نجود/تقول نمت لك شويات..
فهد/أي والله..

نجود/معناته سهرتك صباحي؟

فهد/وليش لا...تكملة شهر العسل؟

نجود بدلع/أي بس انا نعسانة وتعبانة؟

فهد بتذمر/لو هو عرسها الليلة ماكنتي شرفتي للحين ومانمتي الا اذا دقيتي لها وتطمنتي انها نامت ويمكن بعد ماتنامين تسوين لها فطور بيدك وتروحين تودينه؟؟بس السالفة لي تتغير؟

جرته من خده وقالت له/انت تغار يابو فيصل؟؟والله ماتخيلت!!!!

طبعا مصعب ماقدر يقاوم اكثر ودق على خاله يساله عن العرس وكيف مشت اموره,,,

وفهدسال نجود قبل لايرد لانه عارف مصعب وش يبي ها الحزة اكيد يسال عنها وقالت له قوله انه تركها لاتخبي عليه,,

فهد/نعم..

مصعب باحراج/هلا خالي..

فهد/كم الساعة؟

مصعب بنفس الاحراج/بس لاتكون نايم؟

فهد/والله كنت بس اتصالك صحاني!

مصعب/ليش خلص العرس بدري؟

فهد/وانت وش يخصك بالسالفة؟

مصعب بترجي/خالي تكفى....

فهد/مصعب بندر ترك جواهر والعرس تكنسل واكيد انت عارف السالفة اكثر مني!!

مصعب بدون تصديق/تركها؟؟شنو يعني تركها؟

فهد/يعني طلع متزوج غيرها وماعادت تلزمه...

مصعب بانفعال/هذا ..هذا شلون يسوي كذا!!شلون يفرط فيها؟؟هذا اكيد مو بصاحي...ماعنده جوهرة وحدة عنده كل الجواهر..كيف ممكن يطيعها قلبه ويجرحها وهي اللي تحبه وتغليه وماتشوف بالدنيا غيره كيف!!!

معقولة وصلت فيه النذالة انه يسوي فيها كذا!!علشان كذا جاها انهيار عصبي..علشان كذا قالت لي بندر خاين وغشاش وحقير,,,علشان كذا تركت ثوب عرسها عندي ومااهتمت تسال فيه وينه؟؟؟

ليش سوا فيها كذا ليش؟

طيب هي شلونها بعدها زعلانة منه ومن جرحه؟خالي انا اذا شفته بذبحه..مايهمني انسجن ولاانعدم علشانه...هو زعلها وضيق خلقها وماله حق يعيش بدنيا هي فيها..علشان لايجرحها مرة ثانية....

فهد بصرامة/مصعب..

مصعب بدموع/خالي حرام عليه ..والله حرام عليه...هاذي ارق شي بالدنيا كيف جاه قلب يجرحها ويمشي ومايحس انه ذبحها...خالي ابي اجي اشوفها..لو من بعيد بس ابي اتطمن عليها....

طول الطريق من بعد ماوصل نجود شقتها وهو يفكر ببندر وجواهر وكيف صارت علاقتهم....

ليش ياترى يابندر سويت ها الشي وفرطت في الانسانة اللي حبتك..ياليت عندي وحدة تحبني ربع الحب اللي تشيله لك جواهر بقلبها كان حطيتها تاج على راسي..

بس ليش كذا الزمن ليش....

غريبة ها الدنيا نحب ناس ونعيش العمر قربهم وبلحظة من اللحظات نتخلى عنهم بسهولة...وبعد مانتركهم نحس بالحسرة والحسافة...

وش ها القهر بس...الله لايبلانا بها الشي ....

وقف سيارته جنب البيت ونزل...باقي نص ساعة على الاذان ان شاءالله يكون احد قاعد ويسولف معه لاينام لانه حاس بتعب كبير وها اليومين سوالفهم زايدة ومطيرة النوم من عينه,,

وقف عند الباب وتفاجاْ بان شخص واقف قبال بيتهم..

بالبداية خاف ..مين ياترى بيكون واقف بها الطريقة وبها الوقت وليش؟؟؟؟

جاه شك غريب..مو معقولة وحدة من خواتي تكون؟؟؟استغفر الله لاياناصر لا..خواتك مربين احسن تربية ولاتخلي الشيطان يلعب براسك...

كانت كل علامات الارتباك والاستفهام والخوف على وجه ناصر وهو يدعي ربه يعديها على خير وبدون مايمر احد من الجيران وتصير فضيحتهم ؟؟؟؟؟؟؟

اهى اهى اهى,,

ياربي مو قادرة اتصور ان باقي اقل من اسبوع وتتركوني بدون تعليقاتكم وان خلاص السالفة بتصير بح بعد ماننتهي..وفكرت اسوي حركة نذالة واقفل الرواية واقول انتظروني بالجزء الثاني هههههههه

لا بجد تراني بفتقدكم مرة مرة مرة....

اهلين فيكم يالغلا...

منورين ياعساهم دوم ها الطلة,,

 البارت الثامن والسبعين

كان يقدم خطوة ويرجع بخطوة ثانية وهو يتعوذ من ابليس لين تقرب منه ومسك كتفه بتردد,,

ناصرخير ان شاءالله في شي..ممكن يوقفك عند باب البيت بها الوقت ياالاخو؟

اول ماجت عيونهم بعيون بعض صرخ ناصر/مو معقولة؟؟؟؟

كان علي واقف وهو يمسح دموعه لايشوفها ناصر...

ناصرعلي..شلونك ياخوي...مضيع مفتاح البيت ولا شلون تعال ندخل..

علي بضعف/لا ماابي ادخل....

ناصر ظل يناظره...علي تغير كثير عن قبل ثلاثة شهور كاملة عاشنها بعيد عنهم وعن سعادتهم وحزنهم..ثلاثة شهور تغير فيها علي كثير ضعف حييل عن اول وفي هم واضح بوحهه ...

ناصرعلي...ادخل...

علي ظل يناظر بالباب لاماابي ادخل بس...

ناصر بتشجيع/لو ماكنت تبي تدخل ماكنت جيت بنفسك...

علي بنفس الضعف وعيونه كل ماجاها تنهمر دموع اكثر واكثر/لا شكرا..تصبح على خير...

مشى علي قدام ناصر ومسكه من كتفه...

ناصر بتاْثر/علي ..وش فيك ياخوي....

علي حس بالانفجار لحظتها من سؤال ناصر....

علي بضعف شديد/انا تعبان ياناصر تعبان....انا ضيعت كل شي بيدي.....

انا خسرت امي وابوي واهلي والبيت اللي كان محسسني بالامان واللمة ...خسرت الزوجة اللي يتمناها الف رجال بها العالم....تفهم شنو يعني انا خسرت ياناصر؟؟؟

يعني مابقى لي شي حتى اللي خسرت علشانهم ها الشي راحوا مني ولاانا ابيهم ولاهم يبوني.....انا حاس نفسي ضايع وتعبان ومدري وش اسوي....

ناصر/حل عنك كثر الحكي ياعلي هذا مو وقته....شوف نفسك شلون صاير...قوم روح توضاْ وصلي لك ركعتين بالمسجد قابل ربك وبعدها بنتكلم...يالله امشي معي ياخوك امشي...ترى ماعندك الا رب العالمين...روحه وتقرب منه وخلي الدنيا كلها ورى ضهرك اللحين وبعدين كل شي بيرجع مثل ماتبي ياخوي صدقني...

نجود/فهد..اذا كانت وحدة متزوجة مدمن مخدرات يصير تتطلق منه..يعني ترفع عليه دعوى بالمحكمة؟

فهد/ليش من الاساس تزوجته؟ماهي دارية انه مدمن ؟

نجود بجدية/يمكن انها مودارية ..او انها انغصبت عليه..

فهد/مافي شي اسمه انغصبت عليه..بيدها تقول لا للشيخ وقت الملكة مدامها ماتبيه..

نجود/لا موصحيح يافهد في ناس ظروفهم اللي عايشينها تحدهم ينجبرون وهم ساكتين..انت ماتري بشنو هي انجبرت ..يمكن انها لو ماوافقت لحق خواتها ولاامها ضرر فاضطرت توافق...

فهد/ناس متخلفة بجد؟

نجود/المصيبة مو فيها في اللي زوجها اياه اذا كان عارف...

فهد/معك حق..بنت لاناقصها جمال ولاعلم وعايشين ومستورين الحمد الله وضعهم ممتاز..بس التخلف اللي بها العقول مدري شفيه...

فهد/وانتي تتوقعين ليش بيجبرها ولي امرها عليه اذا كان عارف انه مدمن وحالتهم ميسورة مثل ماقلتي؟

نجود/لانها تحب واحد ثاني وضعه اقل من وضعهم بكثير....

فهد/بذمتك نجود هذا سبب؟؟

نجود/أي والله..

فهد بتعجب/انتي تتكلمين من جدك؟

نجود/أي ..

فهد/تعرفينها..

نجود/أي...

فهد/هو طبعا تقدر تكلم المحكمة ويسوون استدعاء للزوج وينقلونه لمستشفى الامل ويتاْكدون بس قب ..مايمكن تاْمنين ضرر ها النوعية يمكن انه غصبها على الادمان مثله؟

نجود فتحت عيونها على وسعها/انت تتكلم من جدك يافهد؟؟ممكن ها الشي يصير؟

راحت افكارها بعيد..بعيد حييل للمكان زالوضع اللي لبنى اللحين فيهم !!!

ام بندر/هنوف علامك قاعدة هنا نزلي مع بنات خالك قعدي عيب..

هنوف بزعل/يمه...متى بنرجع هناك...

ام بندر بتنهيدة/وش تبين تسوين هناك؟

هنوف/بس هناك بيتنا..

ام بنر بتقطع/مابقيتي الا انتي ماابيك تروحين مني وتضيع حياتك ياهنوف..

هنوف/يمه..اذا رجعنا بنقعد عند امي مو رايحن البيت لاابوي..

ام بندربحسرة/ولبنى وين كانت بالله!!ماكانت في بيت عمك؟بس اذاابوك ناوي على الشر بيجيك في بيت عمك ماراح يعوق ابوك شي؟

هنوف/كلمت مضاوي وسالتني عنك؟

ام بندر/عسى ماقلتيلها بس ان احنا هنا...

هنوف/لاماقلت لها...وعبير بعد اتصلت فيك تسال عنك...

ام بندر بحسرة/اربع بنات ماحولي منهم غيرك..

هنوف/يمه....خلاص لاتضايقين نفسك..كل شي بينحل ان شاءالله..

ام بندر/الله كريم...بندر مااتصل؟

هنوف بتردد/لا...

ام بندر بحسرة/ولاراح يتصل بعد!!!!الله يسامحك يابندر كانك طلعت شبه ابوك ولااحد يعوف جواهر....شقول بس ..شرعك اللهم ولااعتراض!!!

هنوف باست راس امها/انتي جاية هنا تغيرين جو وترتاحين من تفكيرك فيهم شوي..لاتتعبين نفسك حتى وانتي هنا......يالله نزلي وهذا انا لاحقتك...

ام بندر وهي قايمة/مو تبطين....

بعد ماطلعت امها لفت للنافذة وصورة اهل الدمام في بالها ماهي مفارقتها وحاسة بنار الاشواق بتفيض فيها علشان تشوفهم,,,

دموع الشوق بعيوني واحزاني تخاويني

ثواني ليلتي غربه واعيش بعالم الحرمان

ادور بدنيتي تايه ولافيه من يسليني

سوى ذكرى قديمه في خواطر فكري السهران

انا جرح الفراق احرق بقايا لهفة سنيني

واماني عشتها كانت تجول بقلبي الولهان

غريبه..لحظتي صارت هموم ماتخليني

تبين لزمن حالي وترسم له شقى انسان

حبيبي..لهفتي زادت وشوقي لك سكن فيني

متى تجمع ليالينا اماني عمرنا الخسران

ترى طيفك معي دايم بليل الهم يضويني

ينورلي مسافاتي ويروي لهفة الضميان

غلاك بخافقي زايدوطيفك دايم بعيني

وصوتك بسمة ايامي وحبك يسكن الوجدان

اناجي دمعتي مره ومره هي تناجيني

واذا ضاقت بي الدنيا احاول اكتم الاحزان

ماصدقت يجي النهار علشان تنزل تشوف الطباخ اللي بتشوفه لااول مرة بحياتها ودعت ربها انه يكون سعوي ..عربي بس مو اجنبي وان الشغالة ماتكون موجودة لانها مابتساعدها ولابتسمح له يساعدها بعد....

تنفست الصعداء يوم كانت الشغالة راكبة فوق ترتب الغرف...

دخلت بشويش علشان لاتنتبه لها الشغالة....

وراحت له علطول لعند الطاولة اللي كان واقف يقطع فيها الفاكهة,,

لبنى بتردد/مرحبا..

رفع الطباخ راسه/اهلين وسهلين مدام ...بدك شي...

لبنى بارتباك/ها...اي...

الطباخ/شو مابدك بعمل لك...انتي بس تدللي..شو حابة تاكلي على الغذى اليوم؟

مسفر من وراها/وش عندك جاية هنا؟

وقف قلبها مرة وحدة ولفت لقته قاعد على الطاولة الثانية وهي ماانتبهت له دخلتها بس وش مصحيه المفروض يكون نايم هادج بس هذا حظها الاعثر..

قالت بترد وارتباك/كان جاي على بالي اكل شغلة وقلت بقوله يسويها لي..

مسفر/ووراك متعبة حالك وجاية بنفسك كان قلتي لميلين تبلغه بطلبك...روحي ارتاحي بس...تعالي معي بس تعالي..

مسكها من يدها وطلعها معه للصالة وقعد وخلاها بحضنه وسط قرفها منه,,,,

مسفر/وش جاي على بالك تاكلين؟

لبنى/ها....لامو شي معين,,,

مسفر/كيف مو شي معين..وانتي من ساعة جاية تكلمينه..يبى أي شي بخاطرك قولي لاتستحين..

لبنى وهي ماسكة نفسها/ابي امشي شوي برى...

مسفر/من زين الجو عاد تمشين..

لبنى بضيق/أي بس انا حاسة نفسي مخنوقة وطول وقتي محبوسة بين اربع جدران,,,,

مسفر/ومين قايل لك احبسي نفسك تعالي تونسي معي بالليل مع الشباب...

لبنى بزهق/انت من جدك تبيني اقعد بوسط الشباب؟؟؟عادي عندك؟

مسفر/الحياة مشاركة وهذولا ربعي مافيها شي ماهم غرب....

قامت من حضنه وهي تنتظرها من الله..

مسكها من يده وهو خلاص وصل يخلص غازه.....

مسفر/هي انتي..وين رايحة لسه بدري الوقت...

لبنى بعصبية/بدري من عمرك....

لفت بتمشي وتعثرت رجلها بالطاولة ورجعت طاحت بحضنه من جديد....

مسفر وهو منتهي/وين رايحة؟

بقمة عصبيتها/لجهنم الحمراء....

مسفر/ياسلاااام حمرة بعد وليش ماقلتيلي؟

لبنى/؟؟؟؟؟؟؟؟؟؟؟؟؟؟؟؟

مسفر/بس تعالي لسه بدري خلك معي ليش مستعجلة ولا هناك الجو احلى من هنا....

لبنى ببكي/ياربي ليش سويت فيني كذا ليش؟؟؟

مسفر/وش سوى فيك.....

لبنى باشمئزاز/انت صاحي!!!واعي لنفسك!!مدرك وش قاعد تقول؟

مسفر/اقول انتي صافة لي هذرة طويلة عريضة ياشسمك؟؟؟الا الصدق انتي وش اسمك؟

لبنى ببكي/وينك يايمه وينك تعالي شوفي وش صاير فيني؟

علي/ناصر....

من بعد ماصلوا بالمسجد صلاة الفجر طلعوا وقعدوا قبال البحر وماحسوا بالوقت اللي مضى ولابالشمس اللي طلعت وحرقتهم..

كل واحد كان تفكيره رايح لشي معين...

لف له ناصر وكانه ينتظره يكلمه من بعد ماطلعوا من المسجد/هلا....

علي/,,,,,,,,,,,,,,,,,,,

ناصر/وش رايك نقوم نتريق وناكل لنا لقمة تعرفني اذا مااكلت شي اموت بعدين يجيني فقر دممااتحمل؟

ابتسم له علي لااول مرة من قعدوا بس بسمته ما كانت صافية كانت بعيون دموع حاول يخفيها...

ناصر بحنان/علي مهما صار ...تاْكد ان اهم شي لازم تسويه انك تبوس راس ابوي وتتسامح منه...لانه بعد رضا ابوي عنك بتنحل كل مشاكلك....ماابيك تعتبره تدخل بحياتك ياعلي لا...صدقني انت مو متعبك غير البعد عن اهلك وعيشتك بغربة وانت قريب منهم.....

علي/..................

ناصر/مااعتقد انه يبيلها تفكير كثير...ياعلي صارت ظروف بالعيلة لو تعرفها تبكي منها...وتتندم انكتركت البيت وزعلت ابوي...ترى ابوي انسانا روعة وعظيم قليل اللي بينه بها البشر؟

علي بتردد/وش صار؟

ناصر وقف وسحب علي من يده وقال/مو قايل لك الا بالمطعم انا كذا صدق اتعب...

راحت له السرير وهي حاملة فطورهم بصينية...

حطتها على جنب....

وتقربت منه وقامت تلعب بشعره وتهمس باسمه لين فتح عيونه...

نجود/حبيبي صباح الخير...

صباحك ورد وقل ولوز..

ياعمري صباح النور..

يالله اصحى غنت نجود..

فتح عينه وهو يبتسم لها...

نجود/صباح الورد والحب والشوق والمسك والكادي.على احلى شي بدنيتي..

فهد ضمها لصدره/صباح الخير نجودي...

نجود/وراك صاير اليوم كسلان ومالك نية تقوم...

فهد/نقوم ليش بالله!!لاورانا هنا مكتب ولاعيال ولاشي..خلنا مرتاحين...

نجود بتاْثر/ونجود السبيعي ماهي وراك ولاماهي مهمة عندك؟

فهد/لا هاذي غير...هاذي علومها علوم...

نجود/أي قول كذا علشان تغير الموضوع وتسكتني...

فهد/تصدقين بالله يانجود اني من اخذتك رديت عشرين سنة قدام!!!

نجود بعدت عنه وقربت صينية الفطور ومدت له بكاس عصير البرتقال وقالت بثقة/وانت من كبرك علشان ترد عشرين سنة قدام!!!مشاءالله حولك وحواليك شباب عسى ربي يحفظك لي!!!

ناظرها للحظات وبعدين سالها/نجود انتي سعيدة معي!!

نجود/أي...

فهد ابتسم لها/طيب وش برنامجنا اليوم ياالسعيدة؟

نجود/ابد والله سلامتك...بنصلي وبنروح نتغذى عند اهلي لانهم عازمينا وبعدها بمر جواهر وبقعد معها لليل ومافي اعتراض على ها الشي لانك عارف الليلة بنمشي الرياض ولازم اتطمن عليها..

فهد/واقدر اعلق ولالا...

نجود رفعت عصيرها/لا...

فهد/خلاص بعد امري لله...

محمد/جواهر ممكن اسالك سؤال ياجواهر؟

جواهر ارفعت راسها له..

محمد بتاْثر/انتي تركتي بندر لانه بيتزوج ياجواهر؟

تنهدت وماردت عليه..

محمد بدفاع/بس هو ماتزوج ياجواهر ماتزوج يااختي...صدقيني ماتزوج...

جواهر بحسرة/خلاص يامحمد خلاص..قرار واتخذته ..

محمد بانكسار/أي بس بندر يحبك ياجواهر وانتي تحبينه..لاتطالعين فيني كذا ولاتقولين اني صغير وماافهم بها السوالف انا عارف وش يعني لك بندر وشنو انتي تعنين له؟

دمعت عيونها وماقدرت تتكلم..

محمد بانفعال/روحي شوفيه ياجواهر شلون قاعد على باب البيت يترجى ابوي بالدخلة والطلعة..شوفي شلون ينادي باسمك مثل المجنون وهو يصارخ...معقولة انتي اللي تحبينه ماصعب حاله عليك....انتي مو قاسية ياجواهر..يمكن هو فكر بالزواج ويمكن تكون فكرة ابوه بس بالنهاية ماتزوج ويبيك ليش ماتبين تردين له؟

جواهر بحرقة/في اشياء يامحمد انت ماتعرفها ومالازم تعرفها بعد...انا وبندر انتهينا خلاص...

محمد بانفعال/يعني تبينه يجن؟؟؟اذا صار مجنون ذيك الساعة بترضين عنه؟قومي شوفيه وشلون قاعد يناديك يبيك تحنين عليه وتكلمينه...جواهر انا بدخله لازم تتكلمون وتراجعون بعض؟

جواهر بزعل/محمد انا مااعرف بندر من يوم وليلة...انا اعرفه من زمان....كان المفروض يكون اصدق معي....كان المفروض اني فعلا اعرفه زين وافهمه....بس انا ماعرفته....

قامت من عنده وطلعت الحوش ووقفت قبال الباب اللي وراه بندر...

ركعت عند الباب وفي خاطرها الف شي يدور ويدور...ودموعها تنزل بغزارة...

على كثر السنين اللي عرفتك ماعرفتك زين...

تمنيت اني ماشفتك ولالحظة ولاشوية

حسبت وانت نبقى حبايب نبقى احلى اثنين..

حسبتك تبقى لي طول العمر مخلص وفي نية..

واثاري حبنا كذبة نسيت العشرة في يومين..

زرعت الشوك انا بنفسي..غرست الهم بيديا..

انا ماكنت اظن اللي يحبني يحب له شخصين..

على بالي انا لحالي حبيبي يموت بس فيا..

على اللي مشيت وماعرفت امشي معاه لوين

اللين الوقت بين لي نوايا غدر مخفية..

تعال وشوف وش كثرالدموع اللي تخون العين..

كثر ماخانني حظي وعرفتك وانت موليا..

انا شلي يصبرني على همي معك للحين..

خلاص ابعد وانا ببعد ولاتسال ابد فيا..

واذا قصدك تبيع وتشتريقلبي انا حبي بحرفين ..

ابمحي الحب من قلبي واعيش بذكرى منسية,,

انا لي مثل مانت ولا يفرق معك البين..

وانا ماعاد تعنيليلي وخسارة فيك ماضيا..

في المحل الجديد..

عبد العزيز.../شلون يعني؟

حامد/يعني انا ابيك تكون بدالي بالليل وانا اكون بدالك بالنهار؟

عبدالعزيز بتعجب/وليش بالله؟

حامد/ياخوك متعرف على جماعة جديدة وبيودوني معهم بيت مسفر نسهر هناك والسهرة يبيلها تفرغ..

عبدالعزيز/طيب واذا صاحب المحل سال عني النهار ولا سال عنك الليل وش بيصير؟

حامد/صاحب المحل مايعرف المحل الا بداية كل شهر ونهايته بس...

عبدالعزيز/وانت كل ليلة محتاج تسهر؟

حامد بهمس/هذا مسفر عزوامته وسهراته عجيبة غريبة كل شي فيها..

عبدالعزيز/شلون يعني؟

حامد/وش مابغيت موجود..وبعدين ها الشهر السهرة مفتوحة كلها على حساب زواجه...والله وتزوج مسفر ...

عبدالعزيز/مين مسفر هذا اللي نافخين ريشه؟

حامد/هذا ولد ال.....وقبل اسبوعين تزوج بنت السبيعي وسوى للشباب حفلة شي ماصارت ولااستوت,,,,بس ان شاءالله الحق على سهراتهم قبل لاتخربه لبنى السبيعي علينا؟

هني بس دق قلب عبد العزيز..لبنى السبيعي؟؟؟؟معقول...هذا قدرك يالبنى..اخذتي واحد مثل كذا...

عبدالعزيز/انت مو تخربط باسماء بنات الناس حرام مايجوز؟؟؟

حامد/الا لبنى بنت فايز السبيعي انا كنت حاضر عرسه ومتاْكد من اسمها وهو بنفسه قال لنا....

مايدري ليش حس بالضيقة والخنقة...لبنى تزوجت؟؟؟

أي وليش مستغرب هذا مصيرها...

بس مو معقولة تزوجت الشخص هذا اللي يتكلم عنه حامد...معقولة لبنى تعيش مع شخص مثله وهي عارفته...

مستحيل لبنى لي ولوحدي ومالازم تعيش مع ها الشخص الوسخ ابدا ومهما صار؟؟

بس الذنب ذنبي انا..قطعتها وماسالت وماعطيتها مجال تسال وتعرف اخباري...

لا ياعبد العزيز لا...هذا اللي لازم يصير علاقتكم ماكان لازم تدوم...

ادري مقصر معاك وفي محبتنا

وادري ما تدرين ليه اسباب تقصيري

لو دام حبك ولو دامت علاقتنا

انا لغيرك وانتي ياقلبي لغيري

لازم نقوي على الفرقا عزيمتنا

لو كان بعدك سبب همي وتدميري

عجزت لا ادبر ظروف تحدتنا

ما قام حظي ولا فادت تدابيري

المجتمع والعوايل غصب حدتنا

ولا انتي اصلن زيادة خير في خيري

ولو ان قربك خطاء يابيض رايتنا

يزيد قدرك غلا من زود تقديري

مادنسك كذب حاسدنا وشامتنا

تبقين ورد العفاف ان زان تفسيري

لكن عزانا على الذكرى و ضيقتنا

هذي حقيقه ولا داعي لتبريري

يا غايتي يوم تنهينا نهايتنا

تعالي اخذي من اوجاعي تعبيري

انا وشعري وصلنا فوق طاقتنا

احزن وحزني يحبونه جماهيري

وفيت وانتي وفيتي مير خانتنا

كل التفاكير واولها تفاكيري

واليوم لدفن بقايا حي ميتنا

ما عاد تحيي معاذيرك معاذيري

بعيش في سكت الذكرى بدايتنا

واسير لاحلامنا وانتي بعد سيري

تذكريني بياض ساد نيتنا

تذكريني ولا يألمك تأثيري

تذكريني وعيشي في محبتنا

تذكريني ولا تطرين ابد غيري

مع السلامه خلص واقع حكايتنا

انا لغيرك وانتي ياقلبي لغيري

وصلت لاخر محطه في سيرتنا

تطول مشاويرك او تقصر مشاويري

كانت افكاره متلخبطة داخله من عرف انها تزوجت..ساعات يقول الذنب مني انا..وساعات يقول مو معقولة فراقنا خلاها تختار ذا الطريق..وساعات يقول كان المفروض اوقف بوجه ابوها واقنعه بحبي لها واني بحافظ عليها...

وظلت مشاعره متلخبطة وماهو عارف وش يقول....

يتبع ,,,,

👇👇👇

تعديل المقال