بداية الرواية

رواية بيتنا الطين -12


رواية بيتنا الطين - غرام

رواية بيتنا الطين -12


نوره :منور ما تملين شوي مع عزوز شوي مع رشود

منيره :وش اسوي انوع يمكن انتقل لبوي مليت من اخواني

نوره وعزوز : هههههههههه

نوره :مالت عليك ابوك احترميه

منيره :ههههههه امزح ما تعرفون المزح

[+][+][+][+][+]

كنت متحمسه ومستانسه لطلعتنا ومجهزه اغراضنا صح مراح نرقد بالبر بس على الأقل نطلع من الصباح لليل الجو حلو احس بفرحه مكبوته والله بصدري احساس من زمان عنه يمكن عشان ما رحنا للبر وهذا سر الأحساس بس احس بحساس غريب ابتسم كل شوي الي يشوفني بيقول فيها شي ولا مجنونه تبتسم بلحالها اخذت عزبتنا ومثل عادتي فرشتها اول وطلعت كل أغراضها عشان انظفها أول شي جبت عزبة الشاهي والقهوه كانت عباره عن شنطه متوسطه الحجم فيها علبه كبيره سكر وكرتون لبتون وقهوه ومسمار الي هو عود عويدي وزعفران وهيل وزنجبيل اخضر وزنجبيل مطحون وحليب سايل كثرت شوي عشان نسوي في الليل حليب هذي عزبة الشاهي نجي للشنطة الكبيره حقت لأكل علب بهارات وعلب ملح وليمون اسود ودارسين وفلفل اسود وجبت اكياس وحطيت بصل وقفلت عليها مره وكيسه طماط أي صح معجون طماط وكيسه من الخضار الي عندنا وطبعا سكاكين وملاعق صغار وكبار وصحون صغيره وكبيرة وقدور قدر نقطع فيه وقدر نقع الرز فيه وقدر للحم وكبريت كثرت تقريبا العزبه خالصه باقي بس يعبون لنا ياربي وش اسمه هذا الي يحطون فيه المويه أي صح الظاهر اسمه الجركل يعبون ثنين

راشد : هاه ضبطتوا العزبه

نوره : كل شي تمام

راشد : انا والله خليتها مختصره ابوي مراح يجي راح مع عمي ابو عامر وام عامر للقصيم فيه عرس لولد اخت ام عامر ويبون يسلمون على ربعهم هناك

نوره : يعني مراح تقول لخوالي

راشد : كنت بقولهم بس خوالي تعرفينهم في البرد ما يحبون يتعدون مكانهم قلت لخالي ابو سعد هو الي راح يخاوينا

نوره : أي زين هههههههههه او قول عشان الخطيبة

ابتسم راشد لحد ما بينت غمازتة اول مره اشوفه مبتسم: خليها توافق بالأول

نوره : وليش ما توافق ان شاءلله باذن الله راح توافق وين تلقى احسن منك

راشد وهو يتنهد : الله يسمع منكيوه صح نسيتيني مرسل عزوز يصلخ لنا الذبيحه ويقطعها ويجيبها

نوره : يعني ما راح نطبخها بنشويها

راشد : كذا وكذا شوي طبخوه وشوي نشويه

نوره : اجل بروح ادور اصياخ الشوي واكثر الليمون

راشد : زين وانا بنادي راجو يحمل معي الأغراض

كلنا التمينا وشلنا اغراضنا كانت سيارة عزوز فيها منيره وانا بس و جدتي وامي مع راشد وحترينا سعد عند المحطه وشفناهم مقبلين سيارتين خالي ابو سعد وسعد ومشينا وقطعنا تقريبا يمكن ساعه عشان نلقى مكانا الي راح نقعد فيه وعلى طول اول ما وصلنا سوينا مقلقل للفطور كبده وشوي لحم وحنا يالبنات بعضنا اكل والبعض اكتفى بصامولي وجبن سايل وحليب نعمه ولله الحمد نزلوا العيال الأغراض وزينوا لنا ذرى بتعجبون وش الذرى " هذا سلمكم الله تقريبا يعني شلون اشرحه شوفوا الخيمه مو لها من فوق شكل مثلث طيب ومن تحت مثل الجدران اربعه بس مو جدران هذي من قماش ثقيل مره وكثير مصانع تصنعها الحين ويمكن تلقونها كثير ببها يعني الي راح لأبها راح يشوفها حنا ناخذ جهة وحده منها ونسوي غرفه صغيره ونحط فرشه داخلها وقزنا واغراضنا فيها حنا طبعا نطبخ على قز مو على حطب لان الحطب يسود اغراضنا ولا جدتي تحب اكل الي يطبخ على حطب تقول الذ مدري كيف المهم بدينا بفرش الفرشات فرشه للحريم وبينهم وبين الرجاجيل عشان ياخذون راحتهم سياره وفرشة للرجاجيل وحطينا ترامس القهوه والشاهي وجلسنا نتقهوى

منيره : بنات خلونا نقوم نتمشى

نوره : يلا

امي : لا تبعدون

ساره : ابشري

نوره : نجود مراح تجين معنا

نجود وهي تبتسم : بلحقكم بزين شاهي لليعال وبجيكم

رحنا نمشي ويوم بعدنا شوي من العيال قعدنا نركض ونتذكر أيامنا الأولهيوم كنا صغار

ساره : بنات تذكرون يوم جانا جدي الله يرحمه يوم كنا نلعب بالطين يا زين الذكريات

نوره : أي والله تصدقون يابنات مانسيت هذاك اليوم

منيره : اكيد مراح تنسينه تذكرين وش سوى فيك حمد

نوره : مالت عليك وانتي ما تذكرين إلا الشي الشين ولا عشان حمد داخل بالسالفة

ساره :هههههه تخيلي نوره حمد زوج منور

نوره : إلا قولي وش مصير اعيالهم وحده مرجوجه واحد قالب ثلج وش بيكونون

منيره : نعنبو داركم لا تسمعكم نجود زوجتوني من اخوها لا وبعد فكرتو بالعيال يعني شايلين همي عشان ما أعنس

نوره وساره : ههههههه

نوره : ابي اشوف عيالك خاطري اشوف اعيالك اكيد بيصيرون نعومين مثل امهم

منيره : الله يجييني حياتن طيبة بس ما ندري وش الله كاتب لنا

ساره : غيرو السالفه هذي نجود اقبلت علينا

نوره : خلونا نغني فيها

منيره : اقول انتي حافظة شي

نوره : لا والله من زمان عن الزواجات

ساره : اجل خلونا نقول وش ذكروني

منيره : مالت عليكم خلاص جت

نجود : السلام عليكم وش فيكم شكلكم تتطاقون

نوره : كنا نبي نغني فيك وكتشفنا ان حنا نسينا أغاني الطقاقات

نجود : هههههههههههههههه ازين وش تبون في الأغاني مفتاح لكل شر

منيره : أي والله وش رايكم نلعب

نجود : انا شلوني من القائمة

ساره : أي صح توك حامل في بداية الحمل ومانبي نخسره ولا نخسرك

نوره ومنيره : مبروووووووووك

نجود ببتسامة : الله يبارك فيكم

نوره : أي زين تجبين احد يلعب مع رغد شوفيها تلعب مع عزوز والرجال حاط عينه عليها

نجود : هههههههههههههههههه وين نلقى احسن من عزوز البنات منهبلين معه

نوره : اسكتي توه بالثانوي وبنات الجامعه رايحين وطي معه بسم الله عليه

ساره : نعنبو دارهم بزر وهم اكبر

منيره : بزر مو بزر اهم شي انه مزيون

الكل : هههههه

كانت طلعتنا حلوه سوينا الغدا الشباب يشوون وحنا سوينا شوي رز وسلطات ويوم خلص الغدا قعدنا نلعب وسقنا السيارات و تمينا لليل وجلسنا حول النار وزينا حليب بالزنجبيل وقرص على الجمر مثل ما حنا متعودين ومردناه بالسمن والي يبي يرش عليه شوي سكر على كيفه كان الجو خيال لدرجه خفنا يمطر علينا كان يبي القمر ثم يختفي السحب باينه عشان القمر 15 والسما ملبده بالغيوم وبرد شوي كنا اذا تكلمنا يطلع دخان ونضحك نسينا همومنا جلسنا نضحك ومتسمرين على الضو بس خالي ابو سعد طلب نرجع خاف يمطر وحنا بعيد عن بيوتنا ومشينا وحنا مقررين ان شاءلله نرجع وجلس من الأربعاء للجمعة دخلنا بيتنا وسمعت رش خفيف عند دريشتي اقبلت عليها وطفيت الأنوار وفتحت الدريشه وهبت علي نسمة هوا حسيت برودة ورجعت قفلتها ورحت بعد ما طلعت منور الله يكرمكم من الحمام دخلت وتروشت وخلصت وجيت يمها

منور : الله حلو بيمطر ان شاءلله يوه برد

نوره : ان شاءلله

وجلست امشط شعري وجففه ولبست قميص قطني اورنج طالع شكل شعري الكستنائي معه خيال صح نسيت اعلمكم اني صبغت شعري لزمت على امي ان اصبغه صح سواده حلو بعد انا ابي لون بني فاتح ابي اغير احس اني غير المهم ستشورت شعري ولففته عشان ما يتعقد بكره جمعه ويمكن نعزم احد او يجينا احد خل شعري يكون ملفف وخذيت الحاف وندسيت بفراشي ابي الدفا وكنت تعبانه وابي ارقد

منيره : بتنامين

نوره : وش اسوي برد وراسي مصدع

منيره : حرام عليك تو الساعه عشر خلينا نسهر

نوره : اسمحيلي يا منيره فيني نوم مقدر

راحت مني منيرة وانا خلاص نمت ولا حسيت بروحي إلا على اذان الفجر قمت وصليت وقومت منيره ورجعت انوم لكن النوم جفى عيوني سمعت رش خفيف فتحت الدريشه وطليت بحيث محد يقدر يشوفني وقعدت اتفرج يوووه امطر بقوة البارح وانا ما دريت المهم خذيت شباصه ورفعت شعري على فوق كله ونزلت خصل على رقبتي وخذيت وشاح اورنج غامق ولفيت على اكتافي ونزلت تحت لقيت هدوء تام اكيد الكل نايم البارح في البر وتعبانين مشيت للمطبخ وسويت لي حليب وصامولي فيها بيض مقلي وشطه مثل ما احب وطلعت لقيت السور بارد ومنقع المويه بكل مكان واصوات العصافير تفتح النفس يالله اصواتها تجنن خاصه بالصباح صح فيه نسمة هوا بارده بس مشيت وانا شايلة صنيتي ورحت لخيمة الي فيها تلفزيون لقيت رشود نايم فيها ومتغطي حيل شكله بردان مره الحمدلله وشوله يجي هنا كله عشان التلفزيون خذيت الريموت وشغلت التلفزيون وطيت الصوت حطيته على ام بي سي توا وكملت اكلي خلصت دفيت الصنيه يالله برد تحمست مع الفلم وقربت من رشود

نوره : رشود قوم

قعد يتحرك شوي

المهم جريت الحاف وندسيت معه بالحاف وتلحفت جنبه وكملت الفلم لكن الرجال قام يتحرك ويسحب الحاف مني

نوره : لاحول انا بردانه قوم انت يا شعل النار يا روح ارقد داخل ليش تنوم هنا وحبيت اقهره وسحبت الحاف ولفيته علي بس انصدمت ان شعره طويل وهذا معطيني ظهره وجلس ناظرته صنمت مكاني اكيد فتحت عيوني على وسعهن و هو مثلي اشوفه كيف كانت عيونه مقفلة وكيف فتحهم مره يوم شافني قعد يطالعني وانا اطالعه تغير مره كابر احسه مره رجل ناضج حلو بشكل وله قوة غريبة حسيت برجفه وقفت حسيت بنفسي كنت قريبة منه مره كانت عيوني بعيونه لا وجالسه لاصقه فيه واسحب لحافه مدري شلون تكلمت ومدري كيف طلعت الكلمات مني لدرجه اشوف ابتسامة خفيفة على فمه انقهرت مدري ليش مابيه يبتسم

نوره : ليش نايم هنا وين بيتكم بالله عليكم هذا سؤال

عامر : البيت مقفل وبعدين هذا بيت زوجتي

نوره : ضحكتني

عامر : ليش نكته

نوره : زواجي منك اكبر نكته بحياتي

عامر : سمعت انك تبين تتطلقين

نوره : ياليت اكيد خالتي وصلت لك الخبر وياليت بدون شوشرة

عامر : اسمحيلي طلاق مراح اطلق استعدي اليوم تروحين معي اهلي بيجون اليوم

نوره : لو تموت لو على قطع رقبتي ما رحت معك

عامر : ههههههه نشوف

قربت منه وانا ارتجف ورفعت اصبعي وهزيتها قدام عيونه : مو انت الي تتشرط لو تموت يا عامر لو اذبح عمري ما رحت معك وطلاق راح تطلق وبنشوف من الي بيمشي كلامه

زادت ابتسامته وضحك ضحكه خفيفه حسيت برجفه يوم سمعتها

عامر : اسمعي امي تحبك وتبيك ومستحيل اطلقك عشانها

لالا يانوره لا تصحين يعني يبيك عشان امه خلك قويه ركضت لغرفتي لا مابي ادخل غرفتي رقيت لسطح بالجو البارد وجلست اصيح اصيح الله ياخذك يا عامر قهرتني قهرتني يعني انا انسانه بلا مشاعر شايف مشاعري لعبه يعني فكرت في مشاعر امك وانا ما اهتميت لي تشوف يا انا يا أنت انت تحديت وبعلمك من نوره

الجزء الثالث عشر


منور : نوره ترى ازعجتيني اليوم الجمعه وانتي رايحه راده لا ومشغله النور وفاتحه الستاير

نوره : يا خبله الجو روعه وعندي لك خبر قومي

شالت الحاف منور من على راسها : وش المفاجأة

نوره : عامر رجع

منيره : بربك

نوره : قسم بالله

منيره : شفتيه

نوره : شفته ههههههههههههههههههههه شفته شوفه الله لا يوريك

منيره : قوليلي من الألف للباء

نوره : اوف وش اقولك موقف محرج وبنفس الوقت يقهر

علمت منيره الموقف كله لدرجة ما قدرت اكمل من كثر ضحكها يحقلك يامنور تضحكين مافي صدرك نار مثل الي تطبخ بصدري احسها احرقتني وبدى دخانها يظهر كيف كيف اقدر اوقف في وجهه خاصه وفي وجه الكل وش بقولهم وش ببرر اكيد اليوم بتصير حرب لكن يا ترى بخسر فيها او بكسب لكن قسم بالله ما اخليك تتهنى يا عامر كلمة خذها مني ورب البيت الي خلقني فقت من التفكير على صوت منيرة

منيرة : نوره اهلي مراح يرضون يخلونك تجلسين عندنا وش بيقولون الناس بيقولون اكيد فيها شي تزوجها وسافر ويوم رجع رفضت ترجع له هو رجال يشيل عيبة لكن انتي بنت والناس ما ترحم

حسيت اني مثل الجبل الشامخ الي جاه صاروخ وفجرة وانتثر اشلاء كل قطعه بمكان جلست على ركبي لا لا يا منيرة لا مراح ارضى انزل راس ابوي راس اخواني لكن عامر ما يستاهل اضحي بحياتي عشانه حتى اعتذار ما اعتذر لي شلون ما فكرت بهالتفكير شلون ما طرى علي انهم راح يفكرون الناس نفس تفكيرك يا منيرة بكيت ولأول مره بصوت مسموع قبل شوي تحديته قبل شوي تحديت حتى نفسي وكلام الناس هو الي عرقلني خلاني مثل السجين المقيد بأغلال ما يقدر يمشي بس يصرخ وهو بمكانه لااااااااااااااااااااااا الله لا يسامحك يا عامر مثل ما قيدتني مثل ما قهرتني مثل ما حرمتني الله ينتقم منك ما احب ادعي لكن اجبرتني ادعي عليك يآآآآآآآآآآآرب ارحمني يآآآآآآرب فرج لي مابيه هاني هان كرامتي وش أبي فيه

منيره : نوره بسم الله عليك هدي هدي لا تسوين بعمرك كذا راح تدمرين نفسك واجهيه خليك قوية مثل ما عرفتك لا تنهزمين وقفي بوجه الكل واعلني قرارك قدام ابوي قدام امي قدام عامر نفسه

مسحت دموعي إلي كأنها قطرات مطر مسحتها ابي اميز منيرة ابي اشوفها زين ابيها تنقذني ابي القى عندها حل خلاص تعبت احس حيلي تعب مالي خلق اكمل

منيره : اسمعي الحين انتي جهزي اغراضك وروحي معه بدون جدال لحد ما تاخذين اقل شي شهر تسكتين الناس ثم ارجعي علينا وبلغيه بقرارك خليك احسن منه قدام الكل

ناظرتها وانا امسح دموعي واشهق بعبرة مكتومة شقت حلقي شق : شلون شلون اناظره واعيش معه

منيرة : تحملي نكدي عليه نغصي عليه حياته طلعي قهر خمس سنوات بشهر

ابتسمت من بين دموعي : والله لوريه

منيرة : هو الحين تحت

نوره : أي موجود

منيرة :يالله وش تحترين تلبسي وتزيني وانزلي وانا بجهز اغراضك

رحت بسرعة وخذيت فوطتي ودخلت الله يعزكم الحمام تروشت وجلست يمكن ربع ساعة المويه الدافيه ريحتني وخلتني اركز بالي راح أسويه بعد ما خلصت طلعت والمنشفة على شعري وجففت جسمي وحطيت كريم مرطب على كامل جسمي ورميت الفوطه وجفتت شعري عشان ما امرض لبست الروب وجلست اشوف وش راح البس ناظرت دولابي وفي الأخير اعجبني تيور مهديته لي نجلا يوم راحت مع زوجها لجدة لون التنوره بيج شنل وعليها حزام عريض جلد نازل شوي لونه فوشي غامق وهاي نك فوشي بعد غامق وبعدين يجي جكيت مخصر بيج طلعتهم وخليتهم على السرير وطلعت البوت الفوشي حقه ودورت على كسسوار يناسب لقيت انسب شي عقد طويل شوي لولو فضي وابيض وحلق صغير مرة فضي وخاتم بارز شوي رتبت اغراضي وجلست استشور شعري والففه بالمكر الكهربائية طلع خيال ورحت وخذيت كريم اساس خفيف مره ومررته على وجهي وبودرة وحطيت شدو فوشي خفيف بعد ما احب اكثر المكياج وبلاشر وكحل اسود مره وخليت الروج اخر شي عشان ما اوسخ لبسي اذا لبسته طقيت ايدي براسي بيخرب شعري اذا لبست يالله ما عليه لبست بسرعة ونفضت شعري شوي لان لبسي هبطه شوي ولبست بسرعه الاكسسوار وكل شي يوه باقي الروج اخترت روج فوشي وغمقته عشان يبرز شفايفي بحكم انها مو كبيرة مرة حسيت بنشوة وانا اشوف شكلي رضيت عن نفسي وخذيت وردة صغيرة عندي لونها فوشي عباره عن كرستالة على شكل وردة وحطيتها بجهة الي فوق الاذن باقي العطر رشيت علي عطر الفواكه وكان بنكهة الفراولى عندي عطورات فرنسية كثيرة بس مدري ليش حبيت ارش علي من هذا يمكن لأني احب ريحة الفراولى وابيها تهدي اعصابي سمعت تصفير وراي

منور : ورب البيت راح يغمى عليه

نوره : يريحني ارتاح على الأقل من شيفته

منيره : هههههههههههههههه حرام عليك امه تبيه

نوره : هذاني ما دعيت عليه بس يغمى عليه ويفوق والله عشان امه وابوه ولا انا امنيتي اخلص عليه

منيرة : ههههههههههههههه يالله انزلي وروحي لهم اسمع صوت راشد وانا بجهز اغراضك

نوره : اوكي ادعيلي

منيره : ههههههههههههههههههههه توك من شوي مهزئته

نوره : حتى ولو يوه بسم الله لو تشوفين شكله طويل رزة مره هيبة

منيره : اقول شكلك اعجبتي فية

نوره : هه تعرفيني صريحة وما الف وادور واقولك عن تقريبا الي شفته يلا بروح

نزلت ومشيت حسيت ان دربي طويل شفت امي بالمطبخ ارتحت شوي عشان يقل العدد المتواجد بالخيمة مشيت ولقيت جدتي جالسة بالحوش بجهة فيها الشمس مثل ما قلت لكم قبل الشرقه مشيت لم الخيمة وانا اكلم نفسي ياربي شلون متزينة كذا وحنا بالصباح المفروض ما اسوي كذا يالله يا نورة مو معذبك إلا تأنيب الضمير دخلت وكل الأنظار علي ومن غبائي ما انتبهت للجزم الي عند باب الخيمة الله يعزكم كان فية الي ميزتهم عبد العزيز راشد عامر عرفته من طريقة صدمتة يوم شافني وعصبيته وسعد وسالم أي سالم بينهم ما حسيت بنفسي الا احد ما سكني بقوة ودافني على برى شفتوا الأنسان اذا انصدم وما عرف يتحرك لقيت نفسي مره مرصوصة على الجدار بالجهة الثانية من الحوش بالجهة الي احب اروح لها حسيت بنفس حار قوي يلفح وجهي وانا مغمضة احراج فشيلة كلهم ناظروني

..: انتي ما تشوفين

فتحت عيوني منصدمة لا مو معقولة فتحتها بقوة لدرجة اني حسيت بربكته من يده الي رصها بقوة

نوره : أي فك يدي

رجع يرصها بقوة : فكها الله ياخذك

اول مرة ادعي ما رحمني لو تموت مراح اخليك تشوف دمعتي رفعت عيوني وصبرت على الالم.... كانت نظراته لي لوووووم و عصبيه

..: جايه تشوفينه

ناظرته بستغراب : من اشوف

..: حبيب القلب

نوره : دفيته مدري شلون جتني القوة انتي وش تخربط

..: شفت نظراتك كلها مركزة عليه بلمتي

نوره : انا ما دريت ان فيه احد وبعدين

عامر قاطعني معصب: بس ولا كلمه يعني تبين تقنعيني ان كل الكشخة هذي عشاني

نوره : ههه ضحكتني وليش عشانك ومنو انت عشان تهمني

رجع يمسك يدي ويرص عليها : انا سجانك باخذك الحين ومال احد كلمة علي مراح احد يقول شي

نوره : انا بروح معك برضاي

حسيت بنظرته لي كأنه مستغرب

نوره : بروح معك مو عشان سواد عيونك بروح معك عشان نفسي محد يقدر يتكلم على اهلي بكلمة على ابوي واخواني لشهر بس

عامر : ههههههههههههههههههههههههههههههههه

قهرني وصرت مثل عادتي اعض على شفتي التحتية بقوة لدرجة حسيت برودة يده على شفايفي ارحميها دفيت يدة وقعدت اتفل الله يعزكم مابية كارهته وكاره يدة ولمسته

نوره : ابعد عني

عامر : يعني لو سالم هو الي ماسكك اتوقع ما مانعتي

ما قدرت امسك نفسي ضربته كف على وجهة لدرجة انه بعد هو تفاجأة : انا اشرف منك

قعد يطالعني وانا ارجف مو خوف ارجف من العصبية

عامر : اسف

ماني مصدقة يعتذر هذا من وش مخلوق : مو مقبول وهذا بيزيد من رصيد الكره عندي الي كل يوم في زيادة

سكت وجلس يناظرني شوي

عامر : جهزي نفسك ابي امي وابوي اذا جو يشوفونا قدامهم

مشيت وخليته وراي وما حسيت الا به ما سكني من خصري صرخت : هيه وش تسوي

عامر : تبين تعيدين الحركه وتخلينهم يشوفونك اصبري امشي قدامك و أدخلك لمدخل البيت وانا انتظرك تحت لا تتأخرين

انقهرت : امش يا سي السيد قلتها بستهزاء

رحت فوق لقيت منور ما قصرت جمعت اغراضي بشنطتين كبار

نوره : الله يسعدك يارب

منيره : هاه ما قلتي لي وش صار

نوره : ينتظرني هو تحت متى ما فضيت جيت وقلت لك كل شي

لبست برقعي وعبايتي وطرحتي ونزلت تحت وانا اسحب شنطه ومنيرة تسحب شنطه اجعتني ايدي ثقيلة مره شكل منور خذت اغراضي كلها لقيت ضلاله عند الباب طليت عليه

نوره : تعال مقدر اشيل بروحي

منيره : اصبري نوره خليني اتخبا بغرف التلفزيون

جا عامر وشال الشنط الثنتين بيدينه حسدته على قوته انا ومنور تعبنا وهو مشاءلله عليه

جتني منور ركض : نوره تغيييييييييييير صاير شخصية

ناظرتها واشرت باصبعي على صدرها المهم هذا وطلعت لقيته داخل سيارة راشد مع ان المسافة مو بعيدة بس يمكن عشان الشنط معنا جلست معه

نوره : ما بلغت امي اني رحت معك

عامر وهو يلتفت على ورى ويرجع بالسيارة : عندهم خبر

كان الصمت عنوانا على طول وصلنا البيت نزل ونزل الشنط وانا دخلت قبلة لان معي مفاتيح البيت دخلت وقعدت استطلع على البيت مع اني حافظته بس مو حلو وخالتي ام عامر مو فيه مشيت بخطوات سريعه وطليت على جناح عامر الأول لقيته مفتوح ومبين انه مرتب مرة التفت عليه يوم سمعت صوته

عامر : آآه يا زين البيت

الحين يا نورة ابدي وشني حربك الحين نغصي عليه حياته رميت عبايتي واغراضي والتفت عليه واشرت بصبعي

نوره : لو سمحت هذي غرفتي بروحي وجناحي انا دورلك مكان ثاني تقعد فيه

عامر : ههههههههههههههههههههههههههههههههههههه

انقهرت من ضحكه وضليت اناظره وانا محترقة من داخل

عامر : وهو يضحك تامرين امر ما طلبتي

ياربي هو ناوي يقهرني انا ابي اقهره قهرت نفسي دخلت الغرفة وقفلتها علي وخليته برى وقعدت ارتب اغراضي وكنت مندمجة بترتيبها وما حسيت الا بأذن الظهر

آآه ظهري انكسر فتحت الباب ورحت الله يعزكم لدورة المياه وتوضيت وخذيت شرشفي وصليت وجلست اسبح وستغفر وادعي ربي يفرج همي كان البيت هدوء طلعت ما لقيت احد على طول رحت للمطبخ وركبت قهوة وشاهي عشان اذا جا عمي وخالتي يلقونها قدامهم وجلست اسوي حلى الشيبان لا تضحكون فيه حلى خاص للشيبان ::::::

احب دايم اشتغل بالمطبخ يمكن لاني تعودت من يوم كنت صغيرة وجلست ادندن بصوت هادي وحزين

الروح في شوفك عليك اليوم ولهانه

والقلب يفرح فيك لا من شافتك عيني


يتبع ,,,,

👇👇👇
تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -