رواية دنيتي مني إكتفت -6

رواية دنيتي مني إكتفت -6

شوق : منوووو جت العله جت العله يالله الثباااات

منار : لا تقولين وئااام

شوق : وفي اعل منها بالوجود

منار : يالله ثبات العقل والدين

هلا : ههههههههههههههههههه حلوووه خلوها علي اليوم بس خلوها تبدا بحركاته اللي تسويها دايم وربي لا اكرها انها جت الملكه

وانا و ريما مو فامهمين شي وسئلت شوق : شوااق من هي وئام

شوق : بنت خالتي عمري ما شفت بنت بواقحتها وثقالة دمها يا ربي كله كوم واذا سوت نفسها دلوعه كوم ثاني مو لاااايق ابد يا رب مرر الليله على خير حتى امي قايله لنا اتجنبوها لانها مو ناقصه مشاكل مع خالتي

جود : ان شاء الله ما يصير شي اليوم ملكة منوو اكيد بتفرح لها مهما كانت هاذي بنت خالتها

غلا : يا قلبي عليك يا جود تحسبين كل الناس مثلك لا تستعجلين بتشوفينها وتعرفين ان كلامنا جزء من اللي فيها

انا ما حطيت في بالي وطول ما كنا عند منار كنت اسولف مع ريما اللي سوالفها ما تنمل

وقبل ما تطلع منار بنص ساعه دخلت بغرور

وئام : هااااااااي

هلا : وعليكم السلام والرحمه تراك داخله على مسلمين

وئام تجاهلت هلا وراحت لمنار : مبروك منار وهاذي اللي تقول مو متزوجه والا غيرت رايك على فكره شفت زوجك كان واقف برى مع شباب عايلتكم بعذرك يوم وافقتي على هالمزيووون

كلنا جلسنا نطالع فيها انا وريما لانا اول مررره نشوفها قعدنا نطالع فيها بصراحه ما ادري وش اقوووول عنها

هنا شوق تكلمت: والله نصيب يا بنت خالتي والا عندك اعتراض

ومنار وكانت واضح انها ما تبغى مشاكل وكانت مبتسمه ابتسامه بالغصب : الله يبارك بعمرك يا وئام وعقبالك ان شاء الله

وئام : لا انا توي على الغثا اللي انت مقبله عليه الا ما عرفيتنا على البناااااااات وكانت تطالعني انا وريما

هنا نوف تكلمت : هاذي جود بنت عمي حمد وهاذي ريما اخت صديق علي

انا ابتسمت لوئام وهي ناظرتي باحتقار وقالت : انت اللي متطلقه وقاعده عله على قلب عمك

بصراحه كلامها فاااااجئني بحياتي ما اتوقعت اني في ناس بالاسلوب هذا

وئام : شفيك ما رديتي والا مالك وجه عارفه انا لو مكانك كان ما اطلع من البيت

ما ادري كيف جتني الجرأه وكلمتها بالطريقه هاذي : شوفي يا وئام لو لك عند الف انا اعطيك مليون واظن طلاقي شي راجع لي واذا اشتكيت لك تعالي كلميني غير كذا ما عندي لاني بصراحه ما احب اتكلم مع ناس بمستوى تفكيرك

وهنا دخلت طيف وشافت ان الوضع متوتر وانتبهت لوئام

طيف : اهلين وئام اخبارك

وئام وهي مكشره : وين اشوف الخير وانا اشوف هالاشكال ..وكانت تأشر علي

هلا : والله هالاشكال اللي مو عاجبتك تسوااك وتسوا عشره من امثااالك ولو سمحتي اذا بتظلين تتكلمين بهالاسلوب روحي اقعدي عند امك يكون افضل

وئام : عاجبك كلامهم يا منار اللي يشوفهم يقول حاضره لهم مو لك يرضيك

شوق : اقطعي الشر يا وئااام و خلي اليوم يمر على خيييير

وطلعت من عندنا بعد ما رمت علي كم كلمه من كلامها اللي زي السم

ولما طلعت كان اكل يطالعني يشوفون كيف ردة فعلي بعد اللي صار وانا ما حبيت اخرب الجو فابتسمت لهم وقلت باسلوب مرح : ها منوو متى ناويه تنزلين

نوف وحست اني الطف الجو : جد منوو انزلي خلاص المعازيم تقريبا اغلبهم جو

دخلت ام منار ومعها ابو منار وهنا تغطت ريما

ابو منار : يالله ان تحي هالوجيييه الطيبه شخباركم يا بناتي

ردينا عليه وباركنا له وكان معه سجل العقد وقال لمنار

: وقعي هنا يا الغاليه

وقعدت منار شوي مو قادره تكتب وفيها الصيحه وحنا قاعدين نسولف عليها ونرفع معنوياتها وحاولنا بقدر الامكان ان نضحكها ولما وقعت باسمها عمي ع راسها

وطلع وجا وقت الزفه وانزفت على ميوزك هااادي والكل انبهر بشكلها اللي كان رووعه وبدا الكل يجي يبارك لها

وشوي ويدخل نواف ويلبسها الشبكه ودخلو عماني وسلمووو على منار

وكنت اناظر عمان مبسوووطيييييين مررررره

وكنت قاعده جنب عمتي الجوهره اللي كانت تسووولف معي وفجأه سكتت وكانت نظراتها ع الباب ولما التفت شفت شخص ما اتوقعت اني اشوووفه باللحظه هاااذي

وحسيت اني بصييح وبدا يتقدم ويرووح للكوشه وسلم على عماني وعلى منار اللي ما عرفها وانا دمعتي خانتني من الفرحه ومسكت عمتي مع يدها

اللي التفتت لي وقالت : قومي نروح نسلم عليه

كنت اناظره وانا مشتاقه له حيييييل : عمتي مو مصدقه ان ابووي هنا وشوفي شكله واضح انه مبسووط ومو ناوي على شي

عمتي الجوهره : يالله قومي خلينا نسلم عليه

وقمت انا وكنت خايفه من استقباله لي ولما وصلت عند الكوشه وشافني ابتسم لي هنا انا مو قادره كان خاطري ارتمي بحضنه

وسلمت عليه وحبيت راسه : شلونك يا الغالي وحشتني

ابو جود : بخير بشوفتك يالله انا بطلع الحين عشان الحريم ياخذو ن راحتهم وبدخل بعد العشااااء

وهنا التفتت لعمي فهد اللي ناظرته وهو فهمني وقال : عمك عادل راح واقنعه عشااان يجي هذا كل شي

ابتسمت له : مبسووطه يا عمي

عمي فهد بحنان : عساها دوووووم يا الغاليه

وخلصت الملكه وكان الكل مبسووط والكل كان مستغرب من اسلووب ابووي معهم حتى انه كان يضحك ويسولف ولا كأنه طووول عمره بعيييييد عنهم وبالاخير

وكنت قاعده مع نوف اللي قالت لي : جوود شفيك هذا ابوووك وشرررف بصراحه بحياتي ما اتوقعت ابوك اللي هو عمي بهالشكل

جود : ابوي طيب بس ما ادري ليش موقفه معاكم ولا ادري كيف ساعات احسه يرخصني لناس انا ما استاهلها الفلوس لاعبه براسه

ومر الوقت وراح ابوي وانا اللي كنت متوقعه اني برجع معاه بس هو للحين على موقفه

وكنا انا والبنات رقص ومنار معنا وعماتي رقصو شوي بس كان الجو بصفه عاااااامه حلو وخبه ووناسه وهنا شوق نادتني : جووووووووود

رحت لها : سمي

وعطتني جوالي اللي كان يدق وكان علي ورديت : هلا علي

علي : هلا بك زوود وقرت عينك

جود: بشوفة نبيك ان شاء الله ها علي بغيت شي

علي : شف اللي تصرررف خلااااااص زعلت لا تحاااااااولين زعلت

هنا ضحكت : ههههههههههههه اسف يا الشيخ حقك علي بس شبغيت علي البنات يبغووني

علي : ابد بس بغيتك تطلعيييين ابغاك شوي انتظرك عند الباب

جود : خلاص دقايق وبجيك مع السلامه

ولما جيت اطلع نادتني خالتي : جود يا يمه كلمك علي

رديت عليها : ايه خالتي الحين انا طالعه له

ولما طلعت اتفاااجئ باللي كان واقف عند الباب وكان معطيني ظهره وبصراحه حسبته في البدايه علي ولما قلت له :علي شبغيت ...والتفت لي وشافني انا هنا تجمدت يا ربي وش هالمواقف الا بجية ريما اللي شافتني وانا ادخل ووجهي كان مررره متغيير

"عند الباب كان فيصل عيونه على الباب وريما تضحك على شكله

ريما : ههههههههههههه فيصل شكلك لوؤوؤوؤوطه

فيصل : ريما من هالقمر اللي طلعت من هالباب

ريما : ما رااااح اقوووول لك وخذ الجوال عطه اسامه

وكانت جود مع البنات وقالت لهم الساااااالفه وهااااات يا تعليقات عليها

وخلص اليوووم والكل رجع لبيته

ومرت الايام وابو جوود بعد ملكة منار ما انشاف وشكله رجع لحاله مره ثانيه

وفتحت المدارس ومنار قدمت اعتذاااار وجود صارت تداوم لحالها بالجامعه و كانت تشوف نوف وريما في البريك اذا توافقو ثلاثتهم وتعرفت على بنوته حبوبه اسمها الهنوف وكانت طيوووبه ودخلت قلب جود على طول

وجا اليوم اللي فهد نادى جود بعد العشاء لعنده ولما دخلت جود

على عمها وخالتها واول ما دخلت

جود : سلام عليكم

::وعليكم السلام

جود : ها عمي بغيتني

واشوف عمي كان مبسووط نوعا ما وخالتي ناظرتي وبدت تتكلم

خالتي : جود يا يمه انا ما راح اطول لك بالسالفه انت تعرفين احمد ولد عمتك الجوهره رجال والنعم فيه وما ينعاب وهو تقدم لك من عمك انت شرايك

هنا انا سكتت من الاحراج وحسيت بفرحه يخالطها خووف : والله ما ادري وش اقولكم

وهنا عمي فهد بحنان : يا بنتي انا ما راح اضغط عليك بس حطي براسك ان احمد رجال خساره يتفوت والكل يتمناه وهو شاريك

وهنا انا تذكرت ابوي : ابوي يا عمي والا نسيته

فهد : لا ما نسيته بس رحت انا واخواني واقنعناه

جود : خلاص يا عمي اذا ابوي ما عنده مانع وانت تحس انه يناسبني انا اللي تشوفه انا موافقه عليه

وضمتني خالتي لصدرها وقعدت تصيح من الفرحه وبارك لي عمي

البارت السادس

في البارت هذا بيكون اغلب الاحداث لجود بس..

رقيت لغرفتي وانا ما ادري كيف وافقت يا رب اخاف اني تسررعت وبالنهااايه اندم وارجع مطلقه مرره ثانيه من جد ابوووي ما راح يرحمني وشوي الا اسمع جواالي يرن واخذته وجلست ع السرير ورديت

نوف : ما بغييييييتي تردين

جود : بسم الله علي طيب على بال ما اجلس رديت

نوف : ويعني لازم تجلسين اعووووذ بالله من ابليييييس الا اقوووول اشبلاااه صوووتك متغير

جود : نوف ابصيييييح احس اني تسرررعت

نوف : يا كااافي وش اللي مزعلك وش اللي تسرعت فيه جوود يا قلبي شفيك وترتيني ترا

جود : نوف احمد خطبني وانا وافقت واحس اني تسرعت

نوف مستاااااااااانسه وتزغرت : كووووولللووووويييش يا الدووبا مو قلت لك انه بيخطبك وثااااانيا ليش خايفه ترى احمد مو وحش ومو كنت تقوليييين انك تميلين له يا دوووبا في احد يحصل له احمد ويرفض

جود وهي متوتره : نوف يعني ما تحسين اني تسرعت يا ربي

نوف : جود ريحي بالك واحمدي ربك وادعي انه يتمم الموضوع على خير واتركي عنك الوساوس

جود : الله يكتب اللي فيه الخير

نوف : الحين رووحي خوذي لك شور ورووقي

جود : يالله نوف فمان الله

في الصاااله ابو علي يكلم علي

ابو علي : يا ولد الحلال وليه تبي تضيق صدره بشره مو تقوله رفضتك البنت

علي : يا بوي خلني استانس شوووي يالله استأذن منك برووح لاحمد ينتظرني بالمقهى

وطلع علي ولما وصل المقهى كان احمد قاعده يطالعه ومبتسم "يا قلبي عليك يا احمد والله لا العب بأعصااابك شووي

علي : السلام عليكم

احمد : وعليكم السلام اخبارك يا بو فهد

علي : الحمد لله وانت

احمد : بخيير يا الغاالي ها بشر يا علي

علي : بصراااحه ما ادري وش اقوولك انت عارف ان جود توها مطلقه و .......

احمد وجهه متغير وحس ان علي بيقوله ان جود رافضه : خلاص يا علي فهمت عليك ربي يسعدها بحياتها ويوفقها باللي احسن مني والزواج قسمه ونصيب

علي بخاطره يا قلبي علييييييك يا احمد قلبك كبيير : امين يا رب العالمين ويسعدك ويوفقك مع جود ويرزقكم بالذريه الصالحه

احمد وكان منزل راسه ولما سمع كلام علي ما كان مستوعب : علي شكنت تقووول تو تراني مو مستوعب يعني جوود مو رافضتني يعني جود وافقت

علي يضحك : اسكت يا احمد شف الناس يطالعوونك ايه وافقت وليش ما توافق ما دام احمد خاطبها

احمد وهو الفرحه مو شايلته : جود وافقت يا ناس محد قدي علي اطلب اللي تبي امرني بس

علي : يا بختي والله اجل ابفلسك بما اني دكتور بلا وظيييفه

احمد : والله يا علي محد ماسكك رح قدم بأي مستشفى وبتحصل على العمووم هذا مو موضوعنا اهم شي شف متى نقدر نملك

علي : اقووول احمد توك حتي ما خطبتها رسمي وين تبي تملك عليها والحين لا تنسى الكل منشغل بزواج منار ونواف

احمد : ربي يوفقهم بس انا ابي املك واتزوج بسرعه

علي : يا احمد هالموضوع راجع لجود اولا واخيرا

احمد : خلاص انت حاول معها ان الموضوع ما يطوول يعني لو تبي نملك الاسبوع الجاي ترى ما عندي مانع

علي : اقوووول احمد تراني عطيتك وجه اكثر من الازم ترى بقولها املكو بعد سنه

احمد : الله يا النذاله بدال ما تقوول ابقنع جود

علي : اقوول احمد لا تغلط ها ترى موضوعك بين ايديني

احمد : امر يا عمي بس انت خلص لي هالخطبه

علي : ايه ناس ما تجي الا بالعين الحمرا

ومر اليوم والعاايله كلها عرفت عن خطبة احمد و جود وفرحو بهالخبر

واجتمعو ابو علي واخوانه عشان يتفقون على موضوع جود واحمد

ابو علي : اهم شي يا احمد انك تصونها تراها الغاليه

احمد : افا عليك يا عمي بس انت اهم شي ارحمني وعجل لي بالملكه

ابو زياد : احمد يا ولدي ليش مستعجل اصبر لين البنت تستعد للملكه وانت عارف ان شغلات الحريم ما تخلص

ابو علي : انا الحين بروح لجود وام علي واشوف متى يناسبهم وبرد لك

احمد : ربي يحفظك يا عمي بس زي ما قلت لك يا عمي ما ابي نتأخر

علي : اقوول يبه قل لجود تغير رايها وترفض احمد خلنا نفتك منه

احمد : اقووول علي قل خير والا اسكت

ابو نواف : ههههههههههههه الله يهديك يا علي حنا ما صدقنا جود توافق

احمد : قووله يا عمي

زياد : ههههههههههههههه لازم الحركات والا ما يصيرون احمد وعلي

ام علي : ها يا يمه متى تبغين الملكه وزي ما يقول عمك ان احمد مستعجل

جود وهي متخووفه ومتردده : يا خالتي ما ابي تكون الملكه قريبه

ام علي : وليه يا يمه الحين والا بعدين اذا ربي كتب لك بتملكين على احمد

وكان ابو علي يطالع جود يبغاها ترد

جود : خلاص يا عمي اللي تشوفونه انا موافقه عليه

ابو علي : اللي اشووفه شرايكم تكون بعد اسبوعين

ام علي : هذا الشور الزين وربي يسعدهم

**واتفقو ان المكله تكون بعد اسبوعين

وباقي على ملكة جود يومين

يوم الثلاثاء

وفي بيت ابو علي كانت جود قاعده مع علي

جود : علي طلبتك قل تم

علي : امري يا عسل اطلبي اللي تبغينه

جود : يا حووبي لك يا علي بغيت اروح لبوي

علي استغرب وانا حسيت انه مو متوقع اني اقوله مثل هالكلام

علي : انا ما عندي مانع بس انت مستعده تروحين هناك

فهمت قصد علي : فاهمه عليك يا علي بس انت شفته يوم ملكة منار كيف كان

علي : اجل على امرك يالله البسي عبايتك انا انتظرك بالسياره

جود : خلاص شوي وانا جايه

ولبست عبايتي وركبت السياره وكان علي مشغل الـ fm وكنا ساكتين وبصراحه سكوت علي خوفني

ولما وصلنا البيت و فتحت لنا الشغاله ودخلت وقالت لنا ان ابوي في المكتب

واول ما طقيت الباب سمعت صوته اللي كنت مشتاقه له حيييل وفتحت الباب وكان علي واقف بالصاله وفهمت منه انه اذا بغيته هو في الصاله ولما شافني ابوي كانت ملامحه جاااامده وهنا انا خفت لان ملامحه ما كانت زي اللي شفتها بيوم ملكة منار

وابتسمت له : السلام عليكم

رد بصوت قوي وجامد : وعليكم السلام

جود : شخبارك يا بوي اشتقت لك يا الغالي

كان يطالعني بنظرات ما فهمتها ونبرة صوته كانت اعلى : بدون أي مقدمات تتوقعين بجيتك هاذي اني ذاك اليوم كنت راضي عنكم اصلا ما جابني لملكة بنت عمك الا شي واحد هو اني ابغى اقابل واحد انا محتاجه بشغلي واللي ابغاه حصلته ولا تظنيني راضي عنك اصلا البنت اللي تطلع عن شور ابوها مو كفو وهذا انت بتتزوجين احمد ولد الجوهره وحطي في بالك شي واحد هو انك مالك ابو مو تخليتي عنه ورحتي لعمك خلاص روحي لعمك وهذا الكلام قلته لك من قبل مو جديد عليك وعلى فكره كلها كم يوم وزوجتي بتشرف هالبيت فعشان كذا اقطعي الجيه هنا والحين انا كلامي خلصته اذا عندك شي قوليه واطلعي لاني ما ابي اضيع وقتي معاك

وكان كل كلامه زي السكاكين اللي تطعن فيني وانا اللي كنت متأمله انه بيرجع زي اول بس كلامه قتل كل الامال اللي كنت حاطتها في بالي وكنت احاول ان دمعتي ما تنزل لان ماراح تغير شي بالموضوع بس كنت بسأله سؤال واحد

: بغيت اسألك يا يبه بتحضر ملكتي

ابو جود : لا ما راح احضر ومن الحين اقولك ما راح تشوفيني والله يهنيك بحياتك مع اني ما اظن ما دامك رفضتي خالد الرجال الطيب وما كان مالي عينك فلا هو ولا غيره بتستمرين معه

وهنا انا ما قدرت اتكلم حسيت نفسي مخنوووقه اخذت شنطتي وطلعت واول ما شافني علي وقف وحس اني بصيح بأي لحظه ولما ركبت السياره انفجرت من الصيااااح الى درجة ان علي وقف ما كان قادر يسوق ولا هو قادر يهديني وانا حسيت نفسي ما استاهل اني اعيش ليش اعيش وانا ابوي ما يبغاني

علي : جود يا الغاليه لا تصيحين وكل هذا مكتوب و وكلي امرك لرب العالمين

وشوفي حياتك وان شاء الله كل الامور بتتعدل

وانا رديت عليه وكان صوتي مبحوح من الصياح : علي من وين بيجيني التوفيق وابوي مو راضي ابوي كان صادق انا اللي رفضت خالد انا اللي ما كنت استاهله علي انا .....وهنا انهارت جود ما كانت قادره تنطق بحرف

علي : جود يا الغلا ما يستاهل كل هالصياح انا وحتى انت كنا متوقعين انه بيقول اللي قاله فليش تضيقين صدرك وعلى فكرة انت يا جود بنيه طيبه و ما كان الغلط منك يوم اتطلقتي من خالد لان أي وحده مكانك كانت بتطلب اللي طلبتيه وانت تستاهلين اللي احسن منه وهذا ربي عوضك بأحمد وانا هنا اضمن لك انك ما بتحصلين احد يحبك ويعزك ويغليك كثر احمد فعشان كذا انسي كلام ابوك وعيشي حياتك حلوها ومرها ومسحي دموعك وحطي في بالك كل شي مكتوب ونمشي عليه

وبعد ما هديت شوي كان علي يناظرني ومبتسم

علي : يالله بسرررررعه اضحكي والا برميك بالشارع وبتركك وبقولهم ان جود انتحرت

وطالعت علي وانا حاسه براحه من كلامه وضحكت عليه : هههههههههه الله يهديك يا علي شقالو لك انتحر بسم الله علي ليش راح الايمان

علي : هههههههههههه احد قال شي بسم الله علييييييييك انت داريه

انا طالعته : داريه بإيش

علي : لو درى احمد انك صحتي هالصيااااح اللي تو يمكن اقل شي يسويه فيني يذبحني كل ما يكلمني يوصيني عليه حشا يا جود شمسويه بالرجال

هنا انحرجت منه : علي خلاااص

علي : مسويه مستحيه اهجدي بس

شوي الا يرن جوال علي وضحك :ههههههههههههههههههههه ابن الحلال عند طاريه هذا احمد دق

وانا ابتسمت لما قال احمد

علي : ههههههههههههههههههه هلااا بولد عمتي هلا

احمد : هلااااابك يا الدوووب الحين ممكن اعرف انت وييين يعني لازم تواعدني وتخليني ارتز في بيتكم لين حضرتك تجي

علي وتذكر انه كان مواعد احمد : يوووووو نسييت وربي نسيت وثانيا لا تهاوش انا ما طلعت لشي لي انا وانما وركز على انما هههههههه انا طالع اودي حرمك المصون او خطيبتك المصونه توها ما صارت حرمك

وفتح علي السبيكر يبي جود تسمع احمد شراح يقول

احمد والابتسااامه شاقه الحلق : يا بعدي والله أي هذا السنع متى ما بغت شي لا تقصر عليها وه يا قلبي عليها فديييييييتها يا ناس اسمعني مو تقول خطيبتي كذا احس ان احد بيخطبها ثانيا كلها يومين وهي حرم احمد بن ........

علي : لا بالله احلف انت بس اشتغل سوااق عندكم

احمد : غصب عنك تكوون لجود سواق بعد تبيها تركب مع السواق وانت موجود هذا النااقص

علي : يووو الله يعين جود عليك بس انت وتفكيرك واذا ركبت مع سواق شفيها يعني

احمد : اقوول انت من رجعت من كندا وانت مغسول مخك

علي : اقوول احمد تراني اكررررهك اذا صرت كذا

احمد : اقووول لا تكرهني ولا يحزنون علي خلني اكلم جود بس بسلم عليها

..وانا كنت مستحيييه مررره من كلامه اللي من شوي

علي : لا احللف انت بس مو تو مسوي لي تقاليد وعادات الحين انا عناد فيك ما بخليك تكلمها

احمد : افاااا يا ابو فهد هذا وانا صديقك اهوون عليك

علي : أي تهووون ونص بعد عندك شي ثاااني وراح ابيعك بمحل ابو ريالين هذا اذا ما بعتك بأبو ريال

احمد يضحك : ههههههههههههههههههههههههه الله يرجك ابو ريال المهم كلها كم يووم وبتكون زوجتي وبتشوووف

علي : انت اللي بتشوف يا انا ناوي لك نيه ههههههههههههههههه لاكرهك باليوم اللي عرفتني فيه

احمد : هههههههههههههه لا تكفااااا

علي : اقووول ترى مليت منك بسكر

احمد : مقبووووله التصرييييفه ههههههههه ويالله فمان الله وانتبه ع جود

علي : اقول ترااااك قلقت حياتي هههههههه وفمان الكريم

التفت علي لي وضحك : ههههههههههههه شرااااايك فيه ان شااء الله اخذت فكره عنه

انا ابتسمت وقلت له : مررره هبلت فيه

هنا علي يطالعني بطرف عينه : والله وبدينا ندااااااافع اقوول انزلي يرحم امك بتجيبون لي البلا انت ورجلك قبل ما اموت

انا ضحكت عليه : هههههههههههههه ربي يطول بعمرك يا الغالي

وناظرني وابتسم ودخلنا البيت

ملكة جود

وجااااء اليوم اللي كان احمد ينتظره بفارغ الصبر وجود متخووفه منه

كان احمد مو سايعته الفررررحه وكل شوي رايح لامه واخته طيف اللي كانت عندهم

طيف : احمد خلااااااص وربي فهمت بعد ما يسلمون عليها ويباركون بتدخل حفظتها صم

احمد : انا اعرف سلامكم يا الحريم ما يخلص الا بعد 10 ساعات

الجوهره : احمد يا يمه خلاص ان شااء الله ما ببنتاخر عليك

احمد : يمه تتوقعين تعجبها الشبكه

طيف : ان شااء الله تعجبها

احمد :ياااااا رب

العصر منارونوف كانو مع جود بالغرفه وكانت الكوافيره بدت تحط لها المكياج

منار : والله اكشناااااات انا املك من هنا وجود بعدي من هنا

نوف : أي اكشنااات بفلم حنا بس وناسه يالله عقبال الباااقين كووولهم

منار : اللي يسمعك يقووول متزوجه قوولي عقبالنا هههههههههههه نوف بالله شوفي شكل جود شلون تنتفض جود يا ماما ترى ملكه مو زواج

وهنا نوف طالعتها بنص عين : الله اعلم من اللي كان شوي ويغمى عليه من الرووعه يوم الملكه

هنا انا ضحكت على كلام نوف : خليها تطنز علي لانها ما كانت شايفه شكلها كيف كان يوم الملكه وثانيا انا ما انتفض بس متوتره حبتين

منار : بسم الله علي اجتمعو علي {..هنا كانت تتكلم بحالميه بزياده ..}على العموم جووودي ترى الزواج حلووو

هنا ضحكنا عليها

نوف : ههههههههههههههههههههههه شكلك ذاااايبه بغرااامه البنت مره راحت فيها

جود : هههههههههههههههه الله يرجكم اقول ترى مكياجي بيروح من كثر الضحك اسكتو ربي يعافيكم

و بعد المغرب كان الكل جاهز وكانت الملكه في بيت ابو علي لان جود رفضت انه يكون باستراحة العايله

وعند الرجال كان الكل مستانس وفرحان والعيال مسوين جووو واحمد مرره كان مبسوط

وكانت جود لابسه فستان بنفسجي بعشبي وكان موديله غريب وكانت رافعه شعرها بشكل حلو ونازل منه كرستالات صغنوونه

وكانت هي والبنات جالسين بالغرفه وكانت ام مشعل معهم وكانو البنات كل وحده تقول الزين عندي

طيف : اليووم لا احد يقرب لجود ترى احمد متووعد فينا قال خل احد ينرفز مشاعر حرمي المصون وشوفي شراح اسوي

انا انحرجت من كلامها والوجه لا تعليييق انقلب محمر

ام مشعل : هههههههههههههههه يا حووبي لـ احمد ايه وهو الصادق من قده بياخذ جود زينة البنات

غلا : لا لا لا ما اقدر انا والله وهو توه ما شافك يا جود وهو مشتغل محامي ومسوي فيها كيف اذا شااافك

هلا : اسكتي بتضيييع علومه اذا شاف هالجمال وهالنعوومه صراحه شكلك اليوم مسككككت يا جود

رديت وانا مستحيه : ربي يسلمكم واللي يسمعك يقوول ملكة جمال وانا ما ادري

شوق : يالله ربي يهنييييييك ويسعدك هذا اللي نقوووله

ودخلت خالتي : جود يا يمه يالله الحين بيجيك علي وهو معه السجل وقعي وانزلي بعدها المعازيم حضروو

ووقعت وانا خلاص شوي واصييح لاني تمنيت ابوي هو اللي يمده لي وباسني علي وقالي : الله يوفقك ويسعدك يا الغاليه وها هالله هالله فيني

دوري لي وحده من هالمزاااين ابي اعرس تراني غرت منك مو بس انت اللي تتزوجين هههههه

ضحكت له : ههههههههه العروس وموجوده بس انت اجزم

علي : افا عليك جازم ومخلص اجل بروح اتزوجها بكرا على الملاك وعلى طول تذكرتين وبساافر فيها

ضحكت عليه : ههههههههه مره ما عندك وقت

علي : ايه انا شغلي حامي حامي ما عندي اللف والدوران حقكم

ولما جت جود تنزل سألت نوف

: نوف ما جت ريما

نوف : الا توهم داخلين تقول ان السياره بنص الطريق خربت وعلى بال ما جابو سيارتهم الثانيه عاد انت ما تخفاك زحمة الريااض

جود : خفت ما تجي لانهم تاخرو اه بس نوف لازم انزل

نوف : لا مو لازم بلا هبال يالله الكل ينتظرك تحت

جود : احس بديت اتوتر مررره ومو قادره امشي

نوف : انت تحسسين نفسك بكذا

ونزلت وكانت الزفه ميوزك هادي وصلت الكوشه وانا من الخوف ما كنت قادره اشووف لولا ان ريما كانت تنتظرني قريب من الكرسي اللي بجلس عليه والا كان طحت مسكتني مع يدي ولما وصلنا سلمت علي

ريما : يووو ريلااااااكس مررره شاده ريلاااكس يا عسل

جود : اسكتي ما صدقت اوصل للكرسي شوي وبدووخ لولا الله ثم انت كان انا طايحه الحين

ريما : اوكي بس بقولهم يجيبون لك مويه

والكل بدا يبارك لجود ويسلم عليها والجو كان حلوو وكله ضحك ورقص ووناسه

وجت طيف لجود قالت لها ان احمد بيدخل

جود : طيف لازم

طيف : ههههههههههههههه لو تشوفينه احرق الجوال من كثر ما يتصل

انا خلااااااص التوتر عندي وصل حده مرررره

يتبع ,,,,

👇👇👇

تعديل المقال