بداية

رواية جيتك امانة انقذيني -12

رواية جيتك امانة انقذيني - غرام

رواية جيتك امانة انقذيني -12

الرزان..ضحكت:انثبري بعد في وجهها!!،ليش متعبة عمرج!!،فشلة والله تتعبين عمرج واللي جاي اخوج يعني مفروض احنا اللي نضيفه!!
هنادي..جلست عالسرير جنبها:مين اخوي!!،لا حياتي انا جاية لصديقتي اليوم واختي وحبيبتي عشان اساعدها لان الرجال اللي خطبها جاي يشوفها،فعن أي اخو تتكلمين؟؟
الرزان..ابتسمت لها:تسلمين،الله لايحرمني منج
هنادي..ضمتها:آآآمين ياربي،ولا يفكج من خشتي ابد ابد
الرزان..ضحكت:بعد!!،كــدينا خير والله
هنادي..قامت وسحبتها معاها:يـلا بس تحركي،وش تنتظرين فسخي عباتج وخلينا نشوف وش بتلبسين..طالعت ساعتها..الساعةاربع الا ثلث ضيعنا الوقت عالفاضي
الرزان..فصخت عبايتها وعلقتها:اهم شي وش بلبس!!..وطالعت هنادي..لاني مادري وش البس صج!!
هنادي..ضحكت:ياحظي!،ولايهمج هنوده موجوده فارتاحي وليهدأ بالك يافتاة..فتحت الدولاب..لازم تلبسين شي غير عن اللي شافج فيه قبل،شي يعطيج لوك جديد ومختلف ستايل ثاني مرة
الرزان..ضحكت وهي تشوفها تحوس بالدولاب:خذي راحتج وانتي تحوسين
شوي وانطق الباب..فتحت الباب الرزان..
ايمان:مساء الخير..وطلت بالغرفة شافت هنادي اشرت لها بس ذيك مو منتبهة..مساء الخير!!..سألت الرزان..شتسوي صديقتج الخبلة؟؟
الرزان..ضحكت:تدور شي عشان البسه!
ايمان..ضحكت:أي قلتيلي!!،انا كنت جاية اناديج تشوفين شي من عندي
الرزان..ضحكت:مشكورة..التفتت على هنادي اللي تتحلطم..هنوده جاج الفرج
هنادي..التفتت وتوها تنتبه بايمان:هـلا والله،وشو؟طلع عندج دولاب ثاني غير هذا؟؟
الرزان..ضحكت:لا،في دولاب ايمان
هنادي..سكرت الدولاب وراحت لهم:والله!،تمام يـلا مشينا
ايمان..ضحكت:يـلا حياكم،بس هـا هنادي لاتتحمسين!!
هنادي..سوت نفسها مؤدبة:ان شــاء الله
وبس دخلوا ركضت للدولاب..وقعدوا نص ساعة يحوسون..واخيراً لقوا لها شي مناسب مع انه شوي واسع..بس كان مناسب..وبعد حوسة وسالفة..
ايمان..القت عليها نظرة اخيرة:تمام كذا،تعالي شوفي كذا هنادي؟
هنادي..وقفت جنبها:مرة خطيرة،so جنان
الرزان..ضحكت:so جنان!!،والله انكم انتوا اللي جنان وخبال بعد
ايمان..ضحكت:مالت عليج!،يـلا بس ننزل تحت وننتظر لين مايناديج خالد
الرزان:ليش كم الساعة؟؟
هنادي..طالعت ساعتها:4:45
الرزان:اللـه!!،اكيد شوي ويناديني
ايمان:لا ماعليج ماخذتهم السوالف يمكن
الرزان:مين اللي موجود؟؟
ايمان:وين تحت؟؟،في خواتج جايين من نص ساعة،وامي توها رجعت من زيارتها اللي مابغت تخلص!!
الرزان:اوكي،انا كنت اقصد بالمجلس؟!
ايمان:خالد وابراهيم وسامي و مبارك وعبدالرحمن واخوانج كلهم!!
الرزان:الله!وليش كلهم؟؟
ايمان..ابتسمت:بالله ليش يعني!،بس لاتخافين ماراح يقعدون كلهم معاكم بس خالد بيقعد
الرزان:اخاف! ولا فرقت عندي ياليتهم كلهم يقعدون
هنادي..ضحكت:ياخطير!!،بلا فلسفة،يلا ننزل
ايمان:يلا
ونزلوا..
علياء:هلا بالعروس هلا،وش هالزين وش هالكشخة!
الرزان..ابتسمت غصب:تسلمين
الجدة:تعالي يمـا جلسي جنبي تعالي
سلمت الرزان وراحت جلست جنب جدتها..اللي قعدت تحكي لهم عن زمانها والزواج على ايامها!!،
لا اله الا الله..ماتمل جدتي من الكلام عن زمانهم!!..بس والله احسن من هالزمن.. الصراحة والحقيقة هو اللي دائماً يتردد على السُن الناس..نعيب زماننا والعيب فينا!!.. الناس هي اللي تغيرت وطبايعهم تغيرت..وافكارهم واسلوب حياتهم ككل تغير..عشان كذا يرددون الوقت تغير والزمن تغير..وهم مايستوعبون ان هم اللي تغيروا!..رزون!!..يعني انتي مالقيتي شي يلهيج عن التفكير باللي بيصير بعد شوي الا الناس والزمن!!..لا اله الا الله..بس والله الزمن... رزون!!جب اشوف
،فجأة قعدت تضحك..الكل التفت عليها!!..
نوف..ضحكت:حليلها اختي من زود الفرحة انها بتتزوج اخيراً بعد العنوسة اللي دامت طويلاً، استخفت وصارت تضحك مع نفسها!!
الرزان زاد ضحكها،
مساكين وياحليلهم هم..مايدرون اني بدون شي مستخفة..ومو بس اضحك مع عمري الا اكلم عمري بعد!..يـلا حالات وتعدي..ههههههه
،هنادي صارت تضحك وياها!!..
ايمان..ضحكت:شف!جاتج الخبلة الثانية،يقولون اذا بغيتي تعرفين عن احد شوفي من يماشي،بس في حالة هالثنتين مادري مين ماشية مع مين!!ومادري مين مجنن مين!!
الكل ضحكوا..وسمعوا صوت..
:احم احم،يالمستانسين جعلكم دوم مستانسين،ارسلوا الآنسة الرزان
هنادي..راحت وسحبت الرزان:يـا آنسة طلبوج
الرزان:اكل انا عشان طلبوج وارسلوها!!،ترا انا اكل غالي مافي توصيل للمنازل
هنادي..ضحكت وهمست لها:تصريف!،مو عليّ يـلا قدامي،ولما تطلعين على فوق على طول...
قاطعهم صوت ثاني..
:مرحبــا ملايين،مرحبا الساع،مرااااحب
التفتوا ثنتينهم..
هنادي+الرزان:ريمـــا!!
ريما:مرحبــا؟،اشحالكم؟؟ربكم الا بخير!!
هنادي..ضحكت:كشخات الاماراتية،الحمدلله متحمسين،الرزان بتدخل الحين
ريما..حطت ايدها على قلبها:وشو؟؟،حمدلله اني لحقت عليكم قبل لاتروح عليّ..قربت منهم وسووا دائرة وهمست..جمدي قلبج يابنية،خزيه ولا تعطينه مجال
هنادي..ضربته:وشو!!،يالخبلة وش تخزه!!صج ماعندج سالفة،خليج على طبيعتج يارزون ماعليج منها
ريما..تفرك يدها مكان الضربة:مالت عليج يالدفشة،من عاشر القوم،امزح انا
هنادي:مزح ثقيل مانبي،رزون...
:يـلا عاد الرزان خلصينا!!
ريما:روحي روحي لاياكلنا خلود
الرزان..ضربتها ومشت:لاتغلطين على خالي..طلعت لخالد..ادخل انت قبل
خالد..ضحك:ماراح تهربين صح!
الرزان..ابتسمت:وين قاعدين!!
خالد..ابتسم وحط يده على خدها:يسلم لي قلبي طالع يهبل،قمر خالد صرتي مو قلبه بس
الرزان..ضحكت:روح مناك،والله اللي يسمعك بيقول ذي حبيبته مو بنت اخته!!،ترا الحين يهون فارس بلا جواد
خالد..ضحك:فارس بلا جواد!!،حرام عليج،بعدين شسوي احبج..قرص خدودها..اموووت عليج،يـلا انا قدامج
مشت وراه..شافت خوالها واخوانها قاعدين بالغرفة..قام طلال لما وقفت تنتظر خالها يدخل..
طلال..ابتسم وبصوت واطي:شالأخبار؟!
الرزان..ابتسمت:وش اخباره؟؟
طلال..غمز:النفسية؟
الرزان:أي تمام الحمدلله،تعال شكلي اوكي؟؟
طلال..طالعها من فوق لتحت وعدل خصلة من شعرها:مو بس اوكي الا قمر 19
الرزان..ابتسمت:مافي قمر 19 يالخراط!!
طلال..ضحك:قمر خاص فيج،يـلا مابتدخلين!
الرزان..اخذت نفس:الا
طلال..مسكها ووقفها عند الباب:يـلا طيب
الرزان..تركها فعدلت نفسها:طيب
طلال..قعد يطالعها وهي تضيع الوقت!:يـلا!!
الرزان:لحظة
طلال:تحركي!!
الرزان:دقيقة!
سكت وانتظرها..
طلال:يـلا اشوف
الرزان..طالعته:اففف مابي انزين
طلال:لا والله!
الرزان:اذيتني!!
طلال:لان شكلج مابتدخلين
الرزان:عطني فرصة آخذ نفسي
طلال:دخلي بس دخلي،كل شوي زفير وشهيق!!بتخلص انفاسج!!
الرزان ظلت ساكتة وتطالع بالباب..فقام طلال وفتح الباب ودفها شوي..
الرزان انصدمت وشهقت لما شافت الباب انفتح وهي صارت على عتبة الباب..خالد وفارس التفتوا وكان فيهم الضحكة،
حسبي الله عليك ياطلال ياولد امي وابوي..الله يسامحك..الله يسامحك
،وجاتها دفة ثانية من ورا وصارت داخل المجلس فسكر الباب وراها..هي مادرت وش تسوي..تطلع ولا تسلم وتجلس!!،
مو الله يسامحك..لا الله ياخذك..لا استغفر الله..الله ياخذ ابليسك..والله ياخذ عدوينك..الله يلعن الشيطان.. الله يلعن الشيطان..الله يحرقه بنار جهنم..رزون استخفيتي!..مالقيتي تسبين الحين الا بالشيطان!..مافي الا اسلم واعدل وضعي..والقط وجهي اللي انتثر عالأرض اللي ملمعتها!..فلسفة رزون فلسفة وفضاوة!!
،عدلت نفسها بسرعة..واخذت نفس..
الرزان:السلام عليكم
وراحت جلست على الكنبة اللي جنب الباب..بينما هم اقصى الجهة الثانية!!..
خالد:الرزان!
الرزان..التفتت عليه..
خالد..اشر لها على كنبة فردية جنبهم:قربي،مافي آكلين لحوم بشرية هنا
الرزان..فهمت محاولة تلطيف الجو..بس ماابدت أي ردة فعل..وراحت جلست عالكنبة اللي اشر عليها..
وانصدمت لما قربت شوي ان الكنبة جنب الكنبة الفردية الثانية اللي جالس عليها فارس ومابينهم الا طاولة!!،
خوش والله..انا ابي ابعد وخالي يقربني!!..نتحاسب بعدين ياخالد
،كانت بتلف وترجع مكانها..بس غيرت رايها،
بس عشان يعرف انه ماهمني بشي..ولا اختقيت عشانك يافارس بلا جواد
،..بينما كان فارس يشملها بنظرته وهي تمشي..من فوق لتحت..من شعرها اللي بس مستشورته بـ فير السيراميك ومسوية فيه بف من ورا بس وتاركته مفتوح..
و وجهها اللي ماكانت حاطة فيه ذاك المكياج غير كريم اساس خفيف وكحل دخل العين وكحل سائل برا وبلاشر خوخي يبرز خدودها وروج احمر يبرز بياضها..
و بعدين فستانها التايجر" قماش النمر المشجر" مسكرحول رقبتها اللي يلف حولها وينزل سلاسل ذهبية طويلة "حقت هنادي"ومن فوق الى تحت الصدر بشوي كشاكش وكسرات من نفس القماش وبعدها الحزام الجلد الأحمر العريض اللي ابرز نحافة وسطها..
بس نرجع لفوق..للجاكت القصير الأحمر اللي اكمامه بف وثلاث ارباع اليد بس وابرز الأحمر بقوة بياضها وخصوصا المناكير الحمرا ويدها الأنيقة عليها ساعة الماس جلدها اسود وميناها من داخل تايجر و ولاشي على يدها اليمين غير خاتم كبير ذهب اصفر وياقوت احمر"حق هنادي"..
ونرجع للفستان..يوصل الى تحت الركبة بشبر ..الى البوت الشامواه الأسود بالكعب العالي النحيف وطويل الى تحت الركبة بالضبط..
رجع رفع عينه الى وجهها لما وصلت..الرزان جلست بدون ماتعبره او تطالع فيه..حطت رجل على رجل وهي ماتسمع عن ايش يتكلمون اصلاً..
كانت تلعب بالخاتم اللي بيدها وتلعب باصابعها وايدينها من العصبية..الا أن..
فارس..عدل جلسته وهي يلتفت عليها:وش أخبارج؟؟
الرزان..رفعت حاجب(يكلمني هذا!..بـالله ماقالوله ان عندي اسم!!) و قامت تطالع يمين ويسار تستهبل واشرت على نفسها:انـا!،تكلمني انـا!..طالعت فيه وعينها بعينه ولا همها..اسمي الرزان،الرزان
فارس..ابتسم وهو فاهم(بتبدين من الحين!!..انا ماني فاهم شلون تتغيرين من حال لحال!!..يوم دخلتي وجهج طايح من الفشيلة!!..وبعدين مشيتي بكل ثقة وجلستي وانتي حاطة رجل على رجل!!..والحين وقدام خالج تسوين هالحركات!..شقول قوية!..واثقة!.بس صراحة وحقيقة.. انتي مو مثل باقي البنات..ولو وش يصير بتظلين غير):ماسألت عن اسمج!،سألت شاخبارج؟؟..واضاف وهو يتكلم بطريقة ثانية..يـا،الرزان
الرزان..(تردها يعني!!) ابتسمت "ابتسامة صفرا":الحمدللـه
فارس:وانا بعد الحمدلله بخير
الرزان..طالعته وهي رافعة حواجبها(ماحد سألك اصلاً يالمسكين!):لا!،زين زين
خالد..(من صجهم هذول!!..شوي ويقومون يكفخون بعض!!..يعني لهالدرجة ماهمهم!!..كله من الرزان ماتعرف تمسك اعصابها وتفلت!!):الرزان قومي صبي لنا قهوة
لا ياخالد!..طيب طيب..ياليت احرقه عشان يتأدب
،قامت لعند دلال القهوة والشاي،
فكرة ليش ما اقول ان مافي قهوة..وطبعاً لازم اروح اقولهم يسوون غيرها..وبعدين خرج ولم يعد!..فكرة عبقرية،..
الرزان..فتحت الدلة وطلت فيها:مافي قهوة!!
خالد..استغرب:مافي!!
الرزان..التفتت:أي خلصت،بروح اقولهم يسوون دلة ثانية
خالد..استغرب،
يالكذابة!!متى خلصت!!..الرزان صج ماعندج سالفة
،وتبادل هو وفارس نظرات.. لانهم يعرفون انها مش ممكن تكون خلصت وهم ماشربوا الا فنجان لكل واحد!!..
فارس..ابتسم:لا ماله داعي،انا اصلاً مااشرب كثير قهوة
ما اشوف غيرك في لندن رايح جاي عالكافيهات!!..وما نشوفك غير بكوب قهوة!!،..
خالد..كتم ضحكته وابتسم:خلاص يالرزان جلسي ماله داعي
الرزان..فهمتهم(يعنني بجلس لكم!..احلامك يافارس بلا جواد):لا عن اذنكم،اخليكم تاخذون راحتكم
حطت الدلة..ومشت بثقة..
خالد:وين تو الناس؟؟
الرزان طنشت..فتحت الباب وسكرته بقوة..اخذت نفس وسمعت صوت ضحك وراها!..انقهرت،
حتى انت ياخالد صرت وياه!!..كله ولا انت..كله الا انت
،وراحت ركض لغرفتها..وصعدت الدرج بسرعة ومانتبهت ان السجاد كان متحرك من مكانه..علق كعب البوت..
الرزان..وقفت:افففف،وقتك انت يعني!!
رفست برجلها السجاد وهي تحرك رجلها عشان يفك الكعب..بغباءها رفست السجاد بالكعب نفسه فسحبه اكثر وعلق..
ولما قعدت تحرك رجلها تحرك السجاد وانسحب وزلقت هي وطاحت على الدرج..بس مو الدرج كله..
بس نص الدرج لانه في وقفة بعد كم درجة..طاحت اخيراً على هالمساحةوهي تحس ان رجلها اليسار اللي عالقة بالسجاد انكسرت من كثر ماتألمها..
أول مازلقت صرخت وبعدين كتمت صرختها..والحين كاتمة انينها من رجلها وماسكتها ومو قادرة تقوم..،
ياربي احس انها انكسرت..بس احس!انا متاكدة انكسرت..آآآآآآآآآآآآآآآخ..آآآآآآآآآآآآآيييييي.. ياربي ياربي انا وش سويت اليوم!!..آآآآآآآآآآآآآآآآآآآآآخ
،كان طلال نازل الدرج وتفاجأ..
طلال..نزل بسرعة لها:اشفيج!!،الرزان قومي اشفيج؟؟
الرزان:ماقدر،رجلي رجلي مادري وش فيها!!!
طلال..شاف رجلها اللي ماسكتها:زلقتي!!،بسبب الكعب!!صج ذكاء..مسك رجلها..فصخي البوت
الرزان:ماقدر،آآآآخ ماقدر
طلال..فصخها البوت وانفجع برجلها اللي تحولت الى حمرا ومنتفخة شوي:انتي من متى طايحة يالخبلة وساكتة؟!!
الرزان:وش تبيني اسوي!،اصارخ والم الخلق يعني!!
طلال:يالعبيطة رجلج ممكن تروح فيها وانتي!!،صج ماعندج سالفة،مسكيني بس بشيلج
وشالها لغرفتها..
الرزان:طق الباب اول،ريما وهنادي داخل
طلال..طق الباب:ياللي داخل ممكن عباية للآنسة الرزان
هنادي..فتحت الباب:هـلا!..شافت الرزان..وي وش صار فيج؟!!
الرزان..وجهها متغير بسبب الألم:رجلي،آآآخ آآآآآخ هنادي بسرعة ابي عبايتي
هنادي..بسرعة شالت شنطتها وجابت عباية الرزان:انا رايحة وياكم
طلال:ياربي منكم
هنادي..مسكت يد الرزان:مانت رايح بدوني
طلال:بسرعة طيب لبسيها عبايتها
لبسوها عبايتها بسرعة..وعلى طول طلال شغل السيارة وعلى الطوارئ..دخلوا الطوارئ وحطوها على كرسي وهي ماقدرت تمسك نفسها اكثر وقعدت تصرخ من الألم..
هنادي..ماسكة يدها:يا حياتي بس بتصمخينا!!،ويدي بتنكسر ورا رجلج!!
وبعد المعاينة والأشعة ماطلع عندها كسر..بس التواء شديد بالرجل اليسرى..
ورضوض اثرت على مفصل اليد اليسرى..عطوها مسكن للألم ولفوا رجلها ويدها..
هنادي..ضحكت:طالعي حالتج شلون مأساوية!!،كنتي كاشخة وحالتج حالة والحين،حدث ولا حرج
وضحك طلال..بينما..
الرزان:افففف كله من القهر والعصبية
طلال..ضحك:عشان تتعلمين شلون تسيطرين على اعصابج،خالد دق عليّ عشر مرات وهو يسأل وينك وينك!!،يوم قلت له فجأة سكت وبعدين انهالت الأسئلة،شلون!متى!كيف!ليش ماقلتوا!، بعدها بدأ تهزيء!!كأني انا اللي ماانتبهت وطحت وسكت!!
الرزان:مابغيت اسوي حق عمري فضيحة
هنادي..ضحكت:تخيلي لما يدري!!،هههههههههههههههههههههههههههههه
الرزان:انتي يبيلج تكسير راس
هنادي..ضحكت:وانتي بعد كان يبيلج تكسير،والحمدلله تحقق حلمي واملي في هاذي الدنيا
الرزان:دبة!!
هنادي..ضحكت:امزح،اكيد هاذي عيون اخوي،ماقال ماشاء الله يوم دخلتي اكيد
الرزان طالعت طلال بحقد و ماردت..
طلال..ضحك وقام:انا بروح اشوف اجراءات الخروج
وراح..
هنادي..ضحكت:وش سوى الخبل!!
الرزان:هنـادي!!
هنادي:اوهووو آسفين عالغلط،طيب وش صار قوليلي!!
الرزان:تعالي وين راحت ريما؟؟
هنادي:كانت جاية بس تلقي عليج نظرة قبل لاتدخلين وراحت،عندهم عزيمة
الرزان:اوكـــي،الحين اقولج وش صار
هنادي:قولي عيوني قولي
الرزان:الله يسلمج...
وقعدت تحكي لها..وهنادي ميتة ضحك على عمايل الرزان..
هنادي:تدري شلون تستاهلين اللي جاج،اجل وش هالبداية القشرا مع الرجال!!عيب عليج،حتى لو تعرفينه ويمون حبتين بس مو لهالدرجة ترا جاي يخطبج يعني هدي اللعب!
الرزان..زاد ضيقها:هنادي ماتتصورين شلون كان ودي اهرب بعيد عنه،بعيد بعيد
هنادي..فهمت فجأة سبب تصرفات الرزان وعصبيتها:شلون كانت نظراته يعني؟؟
الرزان:مادري بس يكفي انها كانت مخيفة بالنسبة لي،حسيت جسمي انكمش...
ماقدرت تكمل وخنقتها العبرة..ضمتها هنادي فقعدت تصيح..طلال رجع وتفاجأ!!..
طلال:الرزان!!،اشفيها؟يعورها شي؟؟
هنادي..هزت راسها "لا" وهمست:اتركها شوي
الرزان قعدت تصيح وتصيح وصارت ترتجف وترتجف..خالد كان جاي بعد تفاجأ..
خالد..مسك طلال:اشفيها؟؟صاير شي؟؟،اشفيها انطق؟؟
طلال:مادري،مادري!!
خالد..قرب من السرير:الرزان!!،الرزان حبيبتي اشفيج؟؟
الرزان..وخرت عن هنادي والتفتت عليه:مابيه مابي،مابي اتزوج مابي،مابيه
خالد..مسكها:طيب اهدي اهدي،تعوذي من ابليس
الرزان..صارت ترتجف بشكل فظيع:مابي مابي مابي
خالد..جلس عالسرير وضمها:خلاص طيب،زي ماتبين بيصير،اهدي
الرزان ارتجفت وتمسكت فيه..هو اشر لهنادي وطلال يروحون ويسكرون الستارة لان الممرضات جاوا يشوفونها..وخرهم طلال وسكر الستارة..
خالد..مسح على راسها وقرا عليها المعوذات:بسم الله بسم الله،اشفيج الرزان!!وش صار؟؟فهميني!
الرزان:نظراته،نظراته تخوف،حسيت بجسمي ينكمش من الخوف،انا سويت نفسي معصبة عشان يعرف اني قوية مو ضعيفة،كنت احمي نفسي بس...
خالد..(يالله يالرزان..مستحيل تقدرين تعيشين على هالحالة):قومي طيب،يـلا عشان نروح..طالع ساعته..الحين 5 ونص،بعد نص ساعة موعدج،خلينا نتكلم بكل شي هناك طيب؟؟
الرزان..هزت راسها"طيب"..ساعدها تنزل من السرير وتقوم..ركبت السيارة معاه وراحوا العيادة،
وكأن نافذة عالم الماضي انفتحت..ويمكن ماتتسكر الا بصعوبة هالمرة..هالمرة بنقطع العرق ونسيح الدم..ماراح نداري ونغطي الجرح بلصقة خربانة!!..اللــه يصبــرني


،نزلت واتكت على عكازها.. وابتــسمــت بــألـم...


[..الجـزء الرابـع عشـر..]



مر اسبوع ثالث..وبقى اسبوع عالرجعة لـ لندن..الدكتور.سعد بدا بمعالجة المشكلة الرئيسية اللي عقدت حياة الرزان..
واللي كانت متكتمة عليها..لكن لما ابتدا الموضوع فتحت كل الجروح وبصراحة..
الأغتــصاب والتحرش الجنـســي..دمر حياتها..تسبب بحرقة قلب ابوها عليها وموته..
وخلى امها تنظر لها باحتقار!!مع انها ماتسببت بهالشي لنفسها!!..دمرها ذاتياً فكرهت نفسها واللي حولها..
ببساطة دمـرها وقضــى عليها كليــاً..
...
الأربعاء..10/1/1430..7/1/2009
...
السـاعة9:20 مساءً،
...
كانوا قاعدين بينهم وساكتين..والسوالف ماخذتهم عن هذا وذاك..وهاذي وذيك..فلانة وفلان..علانة وعلان..
وهي حاطة ايدها على خدها ومستندة عالكنب و في دنيا ثانية..والود ودها تقوم لغرفتها مع هالغبية بلا هالغباء!!..
و دخل هو..بنات خالاتها بس قطوا الشيلة على شعرهم وماتحركوا!!..
التفتت على اللي جنبها واللي فقعت مرارتها..انتظرتها تعلق بشي!!..لكن هي بعد بدنيا ثانية!!..
:احم احم،يمـا!
:هـلا فـارس هلاحبيبي،حياك حياك مافي احد غريب خالاتك وبنات خالاتك
فـارس..انقهر(لا فعلاً مافي احد غريب!!) ولا دخل بالعكس رجع على ورا:يمـا بغيتج شوي
منيرة:مافي احد غريب،حتى مرتك هنا
رفعت راسها لما انتبهت شالسالفة!!،
أي مرته!!..واي خراط!!..الله يقطعني يوم فكرت اطب بيتكم..الله يسامحج ياهنادي على بالج بتفرحني هالعزيمة!!،..
فـارس..تفاجأ(أي مرة ذي!!..صج خبل يافارس كم وحدة تزوجت انت!!..بعدين ماتعودنا بسم الله تونا مملكين امس!!..وش جابها!اكيد هنادي..يلا انا مالي دخل):يمـا ابيج ضروري
قامت امه وراحت له..
هنادي..مسكت الرزان:قومي سلمي
الرزان..طالعتها:شالمناسبة!!
هنادي:زوجج مالها داعي المناسبات!
الرزان..التفتت الجهة الثانية:تونا امس،وهنادي!..رجعت التفتت عليه..رجاءً من الحين اقولج، لا تحاولين تصلحين الاوضاع او تقربين بينا،لا انا ابي ولا هو يبي كذا الكل يظل مرتاح
هنادي:مرتاح هـا!،انتوا بتجيبون لي المرارة وبتبطون كبدي!!ومرة وحدة بتفجرون قولوني!!
الرزان..ابتسمت:بسم الله عليج
هنادي:مشكورة،طيب عشان المجاملات الاجتماعية قومي سلمي
الرزان:عيوني بكرا الحفلة وبنسلم على بعض لين ماتشبعين
هنادي:والزواج الخميس الجاي
الرزان..ابتسمت:وهكذا بنسلم على بعض اكثر من اللازم!
هنادي..شدت ملابسها:بتذبحيني
الرزان:قلتلج لاتحاولين وتتعبين نفسج!!
هنادي..وقفت:وهو كذلك..ومسكتها..قومي الحين معاي
الرزان:وين!!
هنادي:الغرفة
الرزان..وقفت:اوكـي..ومشت وياها بس شافت طريقها غير..انتي وين بتروحين هناك الدرج ولا انا عميا!!
هنادي..مسكتها بقوة:انا بسوي اللي ابيه بدون مااحاول استشيرج،لاني بتعب!
الرزان..استوعبت:هنادي!،الله يخليج لا
هنادي:تبين اسويلج فضيحة واجرج قدام الخلق ماعندي مانع!!
الرزان:هنادي لاتصيرين نذلة؟!
هنادي:وانتي لاتصيرين قليلة ذوق!!،اشدعوى عليج كله سلام
الرزان..ماقدرت تتركها وتروح بعيد بسرعة اولا هي بين ناس وعالم وثانيا عكازها مايساعد!:هنـادي!
انفتح باب المدخل..ودخلت امها..
منيرة:انتوا هنا!،جاية تسلمين الرزان
الرزان..تفشلت فهزت راسها"أي"..
منيرة..طالعتها بنظرة غريبة:ترا بيروح
هنادي..فتحت الباب:انا بناديه..والتفتت شافته واقف عند المراجيح..فــارس..انتبه لها..تعال ابيك
امها تركتهم وراحت وهي تخز الرزان ومو بالعتها!!..
الرزان اضطرت تتحرك بصعوبة وتوقف جنب هنادي..فارس تفاجأ فيها،
لاوالله تطورات طالعة تسلمين!!..يمكن يكون عندج ذوق في النهاية،..
الرزان..ماهمها فعلاً(احلى المشاعر..هي البرودة..لا حرارة الكره ولا حرارة الحب..البرودة حلوة تجمد القلب..وتمنح شعور الرضا دائماً..لازعل يحرق الاعصاب..ولا بعد يعذب القلب...)قاطعت افكارها:السـلام عليكم
فارس..(ارتحت لسياسة البرود..مريحة جداً..مافيها نفاق مشاعر ومجاملات..مافيها كذب فعلاً..و هذا اكثر شي ينفع لنا احنا الاثنين):وعليكم السلام
الرزان:شالأخبار؟؟
فارس:الحمدلله بخير،وانتي شخبارج؟؟
الرزان..(الله يفشلني..امس فشلت نفسي لما قعدت اصرخ!!):الحمدلله،كنت احسن
فارس..(ههههههه..اشك والله..قال كنت احسن!..متى بالله!كنتي احسن!!..وانتي طول الوقت غرقانة بالهم!)طالع ساعته:ان شاء الله تتحسنين،عن اذنكم تأخرت على موعد مهم
الرزان:See u
فارس..ابتسم وفيه الضحكة:بكرا ان شاء الله،تصبحون على خير
هنادي+الرزان:تلاقي الخير
وراح ورتكهم بعدين ركض لسيارته الـ"الموستنج" السودا..
الرزان..طالعت المراجيح:هنادي تدفيني في المراجيح!!
هنادي..ضحكت:عشانج شطورة وتسمعين الكلام بدفج،واكسرج عادي عندي
الرزان..ضحكت:دبـة،ناقصة تكسر!!
هنادي..ضحكت:ماني قادرة اتصور شلون بتطلعين وتمشين بكرا!!
الرزان:مو صعبة لهالدرجة!وبعدين رجلي الحمدلله خفت كثير،الحمدلله انه التواء مو كسر ولا كنت رحت فيها،بس بكرا اللي بيوصلني للكوشة بيسندني،وانحلت
هنادي..ضحكت:الحــالة صعبة،ههههههههههههه
الرزان..ضحكت:مالت عليج انزين
هنادي:يـلا بس نروح غرفتي بـلا جلستهم اللي تجيب الهم
الرزان:احس مالنا داعي،يعني اروح وياج واتركهم عيب عليّ
هنادي:ياشيخة،انا اللي عزمتج مالهم خص،خليهم ينقهرون
الرزان..ابتسمت:ماعندج سالفة،طيب والمراجيح؟؟
هنادي..ابتسمت:انتي اللي ماعندج سالفة يــلا بس،المراجيح خليها بعدين لما يفضى لنا الجو
الرزان:براحتج
وراحوا جلسوا بغرفة هنادي..الى مانادوهم للعشا ونزلوا تعشوا ورجعوا صعدوا للغرفة..
الرزان..طالعت ساعتها:وي الساعة12 الا ثلث!!
هنادي:واذا؟؟
الرزان:امي عطتني للساعة 11 بس،ياربي انا مو ناقصة تهزيء كافي النفسية زفت
هنادي:استريحي بس تو الناس!
الرزان:أي تو الناس يالهبلة!،المشكلة خالد عنده مشاوير مهمة وقال لي اذا خلص بيكلمني
هنادي:مشاوير وماخلصت للحين!!،طيب انتظري ساعة بعد بعدين دقي عليه
الرزان:لا لا
هنادي:يـلا بس،وامشي ننزل مو كنتي تبين المراجيح!،الحين كلهم راحوا خلينا ننزل
الرزان..فكرت:مادري اخاف اتورط ويا امي!!
هنادي:لا تشيلين هم،يـلا قومي
الرزان..شالت اغراضها كلها:بنزل اغراضي معاي مرة وحدة
هنادي..اخذتهم:هاتيهم انتي شيلي عمرج بس
الرزان..ضحكت:دبــة
هنادي..ضحكت:فكينـا زين،ترا عقدتيني وبديت اشك اني دبة فعلاً!!
الرزان..ضحكت:امزح معاج،دبــة
ونزلوا وقعدت هنادي تدف الرزان بالمرجيحة..
هنادي..جلست عالمرجيحة الثانية:وشو ذا! انا ابي بعد اركب!!
الرزان..ضحكت:مو ذنبي والله اني متكسرة!!
هنادي..ضحكت:مسكينة،طيب مو لازم تدفيني غني لي
الرزان:تامرين امر،وش اغني لج؟؟
هنادي:"ويـلاه" اكيد
الرزان:ياربي منج!،يـلا ويلاه ويلاه كيفج
{ويـلاه ضاق الصدر وماذكرني يسأل عليّ ويـلاه
نسّاه طول الهجر ولا الصبر من قسوته قسّـاه
* * *
ماصار مني خطا غير العطا والتضحية ماصـار
جبار يهالزمن ماتنضمن فيك البشر جبـار
* * *
حنيت لاحساسنا و وصلنا من كثر ماحنيـت
حسيـت ان الوصل يمكن حصل لكني ماحسيـت
....}
:هـاي انتوا،وش تسوون برا بهالوقت؟؟
التفتوا وتفاجأو بفـارس..
هنادي:ابد نلعب،الحمدلله جا احد يدفني،تعال دفني بليز
الرزان..عطتها نظرة..
فـارس:حلفي!،في هالبرد،ادخلوا بس لاتمرضون،مو ناقصين مكسرين ومرضى
الرزان..فهمت التلميح(سخافة!..مو قاعدة على قلبك انا!!):هنادي بس خلاص،انا بدق على خالد الحين يجي،شوفي الساعة كم صارت!!
هنادي..طالعت ساعتها:12 وعشر!،يوه ياربي راح الوقت بسرعة،تعال انت دفني بس مالك شغل نمرض نتكسر احنا حرين بانفسنا،بعدين هذا مايسمونه برد هذا ربيع بالنسبة لبرد لندن
فـارس:ياكشخة ياللي تستحمل البرد!،طيب بدفج بس شوي
هنادي:انت اخلص وتعال بس
فـارس جا ووقف بالنص بين المرجيحتين..كان بيدف الرزان بعد..
الرزان..بدون ماتلتفت عليه:لاتدفني انا بقوم
هنادي:وين رايحة!،اهبطي مكانج
الرزان:بروح اكلم خالد
هنادي:بتقولين له سر يعني! كلمي هنا!
الرزان..قامت بصعوبة:لا بروح اكلمه بعيد
وراحت..
فـارس:حالات نفسية صديقتج هاذي!!
هنادي..ضحكت:بس هي!،تعال وش صار امس عند الدكتور عجزت وانا احاول اجر منها الكلام!!
فـارس..ضحك:اذا هي ماقالت لج مايحق لي اقولج
هنادي:ياشيخ توك تقول انها حالات نفسية؟،يعني يمكن انتظر شهر لين ماتقول
فـارس..ضحك:اللقافة اللي فيج بتذبحج في يوم!،مالي دخل صبري
هنادي:مالت عليـك..كانت تراقب الرزان..وش سويت على الحفلة بكرا؟رتبت كل شي؟؟
فـارس:أي الحمدلله،كل شي تمام وزي ماتبين
هنادي..ضحكت:الحمدلله،امي وش قالت لك؟!
فـارس..ضحك:بغت تاكلني،شلون تخلي اختك البزرة هي اللي تختار يعني في انا وفي خواتك

يتبع ,,,,

👇👇👇
تعليقات
    حجم الخط
    +
    16
    -
    تباعد السطور
    +
    2
    -