بداية الرواية

رواية جيتك امانة انقذيني -15

رواية جيتك امانة انقذيني - غرام

رواية جيتك امانة انقذيني -15

نورة..همست:لا تخافين قوي قلبج،فترة وتعدي صدقيني،بعدها بيصير مايفرق معاج،لاتنسين انتي الرزان،ومادام راسج يشم الهوا ماحد يزرع الخوف بقلبج ولو للحظة،وماحد يخليج تصيحين بسببه ولو دمعه
الرزان..كتمت انفاسها وهمست:ضايعة يانورة،احس اني واقفة عالأرض ومو واقفة عليها!!،ضايعة ومو لاقية مكان يأويني
نورة..ضمتها بقوة وهمست:انا مأوآج والأحضان اللي راح تستقبلج دوم،يـلا قوي قلبج،انتي على الأرض واليوم راح تطلعين قدام الناس مع فـارس بلا جواد على قولتج،لاتختقين ولا تهتز فيج ذرة لانج الرزان
الرزان..ابتسمت وهمست:بالضبط
نورة..ابتسمت وياها:أي كذا ابي اشوف هالأبتسامة قدام الناس بعد،عشان اذا لج عذال ينقهرون واذا لج عشاق ومعجبين يفرحون...
نوف..قاطعتهم:بس عاد عيب عليكم،حاطين راسكم براس بعض و ود ود،يلا بلا قرقر واجد،مايصير كذا اسرار بين الناس!!
نورة..ابتسمت:يـلا مناك انتي بلا قرقر،كله لق لق لق خلاص صدعتينا
نوف..ضحكت:خبلة وماينأخذ بكلامج
نورة..ضحكت:صج ماتستحين!!..التفتت على الرزان باست جبهتها وهمست..كوني الـرزان القوية اللي اعرفها
الرزان..ابتسمت لها:ان شاءالله
نورة..ابتسمت:تسلم لي ابتسامة القمر ياناس..التفتت على نوف..تعالي يا لق لق سلمي وفكينا من لقلقتك
الرزان..ضحكت:ماعليج منها نوف هالبنت مستخفة
نورة..ابتسمت:انتي طول عمرج لئيمة،هاذي تأثير العصاقل فيج
الرزان..ضحكت:وشدخل!!
نوف..سلمت عليها وضمتها:مبروك..همست..شدي حيلج وخليج قوية..وبعدت وابتسمت لها..هاذي من يوم زاد وزنها وهي تقط كل شي عالوزن
نورة..مدت بوزها:اكره كذا يعع مو حلو زايدة كيلوين تصوري يالرزان!!
هنادي..ضحكت:واذا يعني ليش متأزمة كذا!!
الرزان..ابتسمت:لاتتفلسفين لها عن الوزن،في احتمال تكسر على راسج كاس ترا،لضمان سلامتج سكتي
هنادي..ضحكت:لهالدرجة!!،والله حالتها صعبة يبيلهـ..وسكتت..يبيلها رجيم سريع على كذا
ريما..دخلت عليهم:مين هاذي؟؟
الرزان..ابتسمت:نورة زاد وزنها كيلوين وكارهة عمرها!!
ريما..ضحكت:الله يعينها على ماابتلاها
نورة:أي والله،الله يساعدني
ضحكوا عليها..


:عاشوا قاعدين ضحك وسوالف واحنا مسوين لنا صفطيشن!!
الرزان..ابتسمت لها:ماعاش مين يسويلج صفطيشن،حياكم امون حياكم
اماني..ضحكت:الحين العروس هي اللي ترحب وتهلي!،والبقية وش محلهم من الاعراب
الرزان..ابتسمت:مبنيين على السكون لامحل لهم من الاعراب
اماني..ضحكت:وهو كذلك فعلاً
وعد:اهم شي اللي بتقرفنا الحين بالنحو،ربي يخليج لامج وابوج والمقرود اللي بياخذج لاتفتحين علينا باب
اماني..ضحكت:مقرود هـا يالحمارة!
وعد..ضحكت:أي بالله مقرود يوم خذج،بتطلع روحه من اول يوم الرجال وبيودع بسبتج
رغد..ضحكت:ومن ثاني يوم انتي ارملة
ريما..ضحكت:حسبي الله على ابليس،حرام عليكم لاتفاولون عالمقرود يكفيه انه بياخذها
اماني:مالت عليج يالدبة،على بالي بتدافع عني الخايسة!،زين اللي يساعدج بالرسم حق الجامعة
ريما..ضحكت:بروح حق معلمة فنية،الله الغني عنج
وعد..ضحكت:من اول سويتيها ولا منتها الدبة
اماني:خايسة!
وعد:معفنة
اماني:حمارة
وعد: بقرة
نورة:وقت مستقطع ياجماعة،وشو ذا!،يـلا بلاحركات بزارين،اهم شي امون وش كبرج جالسة تتناقرين مع هالبزر!!
اماني..عدلت نفسها:احم احم،انا بترفع عن مستواها احسن لي
ريما..ضحكت عليهم:الحمدلله والشكر صج ماعندكم سالفة،الا هنادي مين اللي سوى ديكور القاعة مرة يجنن
هنادي..ابتسمت:احم احم انا اللي مسويته
ريما..تفاجأت:من صج!!
الرزان..ابتسمت:ترا هنادي احسن منج فيما يتعلق بالديكورات،مسكينة تعبت عالديكور طول الاسبوع تحوس عشان تضبطه
ريما..ابتسمت:يعطيج العافية مرة مرة يجنن،عطينا من افكارج بعدين حق مشروع التخرج
اماني..ضحكت:مشروع التخرج وانتي بسنة ثانية!!،مستعجلة بقوة!!
ريما..ضحكت:مابقى شي ثلاث سنين الحمدلله
هنادي..ضحكت:تبين الفكة!!،اجل الله يعينا احنا وش نقول!
ريما..ضحكت:انتوا اللي جبته لعمركم
الرزان:بس اونس هناك،قاعدين مرتاحين
اماني..ابتسمت لها:مرتاحين ها؟!،القصد مرتاحين منا يعني!
الرزان..ابتسمت:لا طبعاً
اماني..ضحكت:اختبصت البنت،ياهوو امزح معاج،هدي اعصابج
انطق الباب..
ريما:تفضلي!!
نوف..فتحت الباب وهي تبتسم:ماانتظر اذنج اصلاً
ريما..ضحكت:ياشيخة!،اجل ليش تطقين الباب؟!غباء هو!!
نوف..ابتسمت:غباء بعينج!،انا اعطي العروس الجميلة فرصة تستعد نفسياً لانها لازم تطلع الحين
هنادي..طالعت ساعتها:الساعة 10 تو الناس؟؟
نوف..ابتسمت:اوامر عليا ياعزيزتي
هنادي..ضحكت:قولي كذا!
الرزان..قامت ومسكتها ريما:الحين بيدخل؟؟
نوف:أيـه،بسرعة روحو انتو لبسوا عبايتكم
هنادي..ابتسمت للرزان/COLOR]:تدري احسن شي انه اخوي واقدر اساعدج بدون مااتغطى
الرزان..ابتسمت لها:تسلمين
نورة..مسكت يدها:احنا في اول طاولة على يمين الستيج،شوفينا
الرزان..هزت راسها"اوكي"..ثواني والغرفة كانت فاضية..بس بقى هي وهنادي وريما..
ريما:قوي قلبج حياتي ان شاء الله كل شي بيصير اوكي
الرزان بدنيا ثانية،
انا غبية..حمارة..شلون وافقت شلون!!..مافكرت من اول زي الناس!!.. استخرت وارتحت أي نعم..بس مافكرت زي الناس باللي بيصير بعد سنة سنتين!!..يا رزون ياغبية..فكرتي برضا امج و لافكرتي بنفسج..وياترى امي بترضا عليّ فعلاً ولا!!...
،قطعوا عليها..
ريما:لاتفكرين واجد،بيعور قلبج التفكير وبيسبب لج صداع لاغير!!
هنادي..اللي اختفت رجعت طلعت:يـلا يامدام،جاهزين لج
الرزان استجمعت شتاتها ورسمت ابتسامة..والالم والحزن واضح بهالأبتسامة،
صار واقع يارزون.. انتي زوجته وخلصنا..انتي متزوجة..هاذي حقيقة وواقع..بسنا نكران وتخبط..كوني قوية وماتهدج عاصفة ولا عاصفتين!!..مايهم الا انج تبتسمين وتدخلين وسط العاصفة وانتي رافعة راسج..لا تهربين منها..ولا تنهزمين وتضعفين قدامها
،وتجاهلت كل شي..وغيرت ابتسامتها لأخرى..من القلب..وانطفت انوار القاعة..وتركزت انوار ثانية على البابين..
وانفتح باب وطلعت منه الرزان..وباب ثاني طلع منه فـارس..
ودخلوا على موسيقى هندية..
تألقت بفستانها الأزرق "ازرق فعلاً">>الفستان كوكتيل عادي من فوق..ومن تحت الصدر على طول الى فوق الخصر بشبرالفستان مخصر و عليه قطعة شيفون احمر مطرز بزخارف غريبة ومشكوك بالشوارفسكي الأحمر شي صغير وشي كبير..واطرف القطعة من فوق وتحت اقواس مشكوكة بالشوارفسكي الصغير..ومن تحت هالقطعة القماش الازرق فيه كسرات واسعة وكبيرة.. من ورا فتحة الفستان مو كبيرة الى القماش الأحمر وصاير زي المشد بشرايط حمرا..من تحت هالقطعة تنتهي الشرايط ويبد الذيل..القماش كسراته صغيرة من فوق وتدريجياً تصير واسعة الى نهاية الذيل..اطراف الذيل والفستان من نفس الشيفون الاحمر اللي فوق بس مو عريض زي اللي فوق<<تألقت ببساطة تسريحتها ومكياجها>>شعرها مسوى ستريت بفير السيراميك "كالعادة" بس بعض الخصل مسوية ويفي بالفير نفسه..التسريحة صايرة بف من ورا وعلى الجنبين بس اليمين واليسار الشعر مشدود لورا كأنه رافع البف اللي صاير فوق بس "مادري اذا فهمتوا!".. والخصل الويفي من ورا بس..وغرتها زي ماهي بس منزلين لها خصل زيادة من الجنبين..المكياج.. حاطين لها ظل ازرق وازرق لامع والكحل مغمقينه مرة وشوي ازرق بخط رفيع تحت العين..اما البشر وردي مايل للأحمر..والروج احمر "اكيد" وعليه جلوس شفاف اعطاه لمعة<<ما لبست ولا شي من الاكسسورات بس تألقت بالمناكير الأحمر "حبته مرة شكلها!"..اللــه يحفظــها من العيــن تجنــن..كانت هنادي بتدخل معاها بس هي رفضت..وطلعت لحالها وهم بس شايلين ذيل الفستان لانه ثقيل شوي بالحركة..
التقت بفـارس بالطريق للستيج..
فـارس كان هيبة ورزة بدقلة عجيبة>>من فوق الكول الصيني..وقصتها جانبية مو سيدة"زي المعتاد"..زي الموديل الصيني على جنب بالأزارير الصينية ومفتوح بقصة مايلة"بحيث يبين الثوب تحت"..الدقلة سودا وقماشها ثقيل ومطرز عليها بالأحمر..مع شماغ ابيض وفيه خط عريض بالأحمر من الغترة<<..
مد لها يده ومسكتها بدون ماتطالع فيه..لكن كل واحد منهم محافظ على ابتسامته وتألقه "الفردي"..تغيرت الأغنية لما قربوا من الستيج..اللي يرتفع عن الارض باربع درجات بس.. لـ أغنية "عذبة الأطباع"
> كانت هنادي مسوية حركة..مقطع الشعر اللي بأول الأغنية بصوت فـارس..
{لو سألني الورد عنك علميني ويش اقول
وان وصفت اول جمالك كيف بوصل آخره
كيف وانتي روضة من حلاها كحلت عين الفصول
رقتك وردة وروحك كالطبيعة الساحره
عـذبة الأطبـاع واكثر انتي يالعف الخجول
من لفيت الدنيا وأنتي مثل غيمة ماطره
عالية اصل ومطرها كلما جاد بنزول
مثلها انتي كريمة وهي مثلك طاهره...}
الرزان تجاهلت كل اللي حولها..وتأملت بابتسامة ديكور القاعة..
كان سقف هالصالة"والأفضل نسميها قاعة لانها كبيرة مرة" زجاجـي فبانت السما والنجوم "روعـة" والقمر اللي على وشك الاكتمال..السقف زين بشيفونات حمرا وزرقا من الوسط..عند الثريا الكريستال الكبيرة الى اطراف القاعة ونازل من اطراف الشيفونات كريستالات ملونة..اما الجدران كان مرسوم عليها زخاف وخطوط بالأحمر والأزرق ومعاهم ذهبي..اما الطاولات كانت مفارشها قماش هندي ازرق وفيه نقش بالذهبي وفوقه مفرش اصغر احمر سادة وبعض الطاولات العكس تحت احمر وفوق ازرق..اما الكراسي كلها ملبسة قماش ذهبي وبظهره في فيونكة من القماش الهندي حق كل طاولة..على طاولة في باقة صغيرة روز احمر وخزامى"توليب" ازرق..
وعموماً كان الديكور مايل للهندي..
والتفتت للكوشة..كانت خلفيتها ستاند رسمة فيها فيل واشياء ثانية وكلها مرصعة بالنحاس وورق الذهب ومزينة بمرايات ومن فوق فيه زي الفوانيس فيها شموع مشغلة..عمـل فني حقيقي روعة..وفيه كرسي واحد مخمل احمر ومن ورا كله مخدات ستايل هندي..والكوشة كلها محاطة باربعة اعمدة ملفوف عليها شيفون ازرق و ورد "الورد البرتقالي الصغير..اللي يستخدمونه الهنود للزينة!!" ومن فوق الكوشة مغطية بـ خيوط مصفوف فيها هالورد..
ابتسمت الرزان،
من صجها هنادي بذلت جهد على هالديكور..ماشاء الله فكرة حلوة..وتنفيذ روعـة..الله يحفظها ياربي هالبنت بكبرها روعة
،وتغيرت الأغنية لما وقفوا عند الكرسي..لـ أغنية "صايغين الذهب" كاظـم السـاهر
{ ياصايغين الذهب..حبيت ادلعها..حبيت..حبيت والله حبيت ادلعها
شوفوا لي خاتم حلو يستاهل اصبعها..ولك شوفوا لي خاتم حلو يستاهل اصبعها
مو بس خواتم ذهب تستاهل عيوني..خلوني ياهل الهوا على كيفي خلوني
خلوني ياهل الهوا وبـكيفي خلوني..للبسها واشيكها وادلعها
البسها واشيكها وادلعها..وخلي حتى البنات لك من تمشي تتبعها ..والله...
كانت منيرة (بنت اخته مناهل..8 سنوات) جاية بمخدة سودا مخملية عليها الدبل..
فـارس باس بنت اخته وهمس باذنها شي خلاها تضحك وتضحك..فخزتها جدتها وسكتت..
فابتسم لها فـارس وغمز..عطته امه الدبلة..
خاتمين الماس واحد فيه الماسة "الماس اصفر" معينة بالوسط ومن الجنبين صفين الماس عادي على شكل معينات صغار والخاتم الثاني صف واحد من المعينات الصغار من الالماس "الماس عادي واصفر..وحدة كذا وحدة كذا"..
مسك يدها اليمين ولبسها الدبلة في خنصرها الأيمن،
ياويلي لاتكون تكسرت رجل البنت الحين..ماراح تقدر توقف عليها بالمرة هالهبلة بعد كذا!!..خلصوا ولبسوها
،راحت لعند فارس..
هنادي..همست بأذنه:استعجل رجل البنت بتنكسر!!
فـارس..طالعها بطرف عينه وابتسم:ان شاءالله عمتي
هنادي ابتسمت له ورجعت مكانها..الرزان اخذت الدبلة من امه ولبسته اياها..
راحت منيرة الصغيرة..وجات بشرى (بنت اخوه زياد..7 سنوات) بمخدة سودا مخملية عليها الشبكة..
>>الطقم عبارة عن الماس وياقوت احمر "بما انها شغفوفة بالاحمر"كان الياقوت والالماس باجيت "مستطيلات"وسط مو كبير كبير ولا صغير صغير..العقد فيه الياقوت بالعرض والالماس بالطول وبالوسط خمس مستطيلات بالطول الثنتين عالطرفين الماس والثلاث اللي بالوسط ياقوت..اما الحلق مستطيلاته شوي اصغر و اول شي الماس بالطول بعده الياقوت بالعرض وبعدين الماس بالطول والياقوت بالعرض وبعدين الماس بالطول..اماالاسوارة فهم حلقتين كاملتين كل وحدة لحالها طبعاً "مسكرة زي حقت الاكسسوار!"الياقوت فيها بالطول والالماس بالعرض كل ياقوته جنبها الماستين بالعرض فوق بعض وجنبهم ياقوته وهكذا..اما الخاتم مستطيلاته بالطول "نحيفات وطويلات" خمس مستطيلات عالأطراف ياقوت بعدين الماس واللي بالوسط الكبيرة ياقوت<<..
لبسها العقد اول شي..حست بانفاسه على رقبتها..حست بقشعريرة فظيعة..
كان ودها لو تهرب بعيد..حست بالاشمئزاز من لمساته!!..وارتجفت!!..فانتبه وبعد بسرعة!!،
هذول وش يسوون!!..والله بيفضحونا!!..كأن كل واحد مو طايق الثاني!!
،قربت منهم..
هنادي..ابتسمت لفـارس:اساعدك اخوي؟..وهمست..بطلوا هالحركات بتفضحونا!!
وتبادلوا فـارس والرزان نظرة سريعة..
فـارس:مشكورة،انا مدبر حالي..طالع الرزان..ولا شلون؟
الرزان انقهرت وماردت وبس ابتسمت،
اللـه ياخذ العدو..صبري يارزون صبري..بس ابتسمي بس ابتسمي
،و كبرت ابتسامتها..ولبسها وخلص..
هنادي:يـلا تفضلوا عشان تصورون..همست للرزان..لاتطولين،وانتبهي اخوي يمكن يمصخها عشان ينرفزج
الرزان..ابتسمت وغمزت وقربت منها:لاتخافين عليّ،انا عن مية رجال
هنادي..ضحكت:يـلا تفضلوا
فـارس نزل من الكوشة ومد لها يده وهو يبتسم "ابتسامة صفراء"،
بنشوف وش بتسوين ياللي عن مية رجال!!..ههههههههههه..ضحكتوني
،الرزان استغربت،
انا كنت مستعدة لحركات النذالة حقتك..وماهو شي خطير انه يحرجني بأنه يمسك يدي!!..بس وش سر هالأبتسامة!!..لاحول ولا قوة الابالله
،ابتسمت ومدت يدها ورفعت فستانها ونزلت وراه..وطالعت طاولة صديقاتها.. كلهم قعدوا يأشرون لها ويرسلون لها بوسات ويسوون لها باي..
ضحكت وسوت لهم باي..واختفت ابتسامتها تدريجياً وهي تشوف سديم..كان باين انها تصيح!!،
صدقتها يعني انا بالتمثيلية اللي سوتها داخل..والله كنت دارية..هاذي تبي تذبح عمرها!!..مفروض ماتسوي كذا..يفترض كل اللي بينهم انتهى..بس كله بسببه..وبسبب انانيته
،دخلوا من الباب اللي طلعت هي منه..وتسكر الباب.. وسحبت يدها بقوة من يده..ومشت للغرفة اللي بيصورون فيها بدون ماتعطيه وجه،
حلو والله..هذا من اولها!!..نفس عميق يافـارس نفس عميق..وتذكر انها حالة استثنائية
،اخذ نفس وابتسم..وتقدمها بخطوات واسعة..وهي ولا التفتت عليه..ضحكت..
فـارس..التفت عليها مستغرب:خيــر!!،استخفيتي؟!
الرزان..ضحكت اكثر: ياليت تقولي بس...،انت...انت،انت مسرع رايح وين؟؟
انصدم بس مابان عليه،
أي والله انا رايح على وين!!..اوكي اعرف المكان كله..بس بكل ثقة ماشي ..على وين؟؟..انا مادري بأي غرفة هالمصورة!!..استغفــر اللــه..زين كذا خليت عمري مطنزة.. بس عشان بزارتها!!..حلـو..كبر عقلك يافـارس وانتبه..نفس عميق بعد
،اخذ نفس و،
بالضبط ..هنادي كانت موريتني قبل..ههههههه..نايس احساس الثقة بالنفس..الحين بنشوف مين بيضحك عالثانية يا مدموزيل الرزان....نرجع نقول كبر عقلك يافـارس..استغفــر اللـه تحولت لبزر مثلها..يارب يارب ارحمنــي
،كمل طريقه وهو مطنشها..الى الغرفة..هنا هي انصدمت..و رفعت فستانها على الله تجاري مشيه السريع،
مالت..طلع يعرف وين الغرفة!!..بس شلون!!.. اففففف..هههههههههه..بس كان احساس حلو لما انصدم..كالعادة وجهه حجر مايبان عليه.. بس مو على رزون يافارس بلا جواد..هههههههههه
،وأخيراً لحقت عليه وصارت جنبه..قدام باب الغرفة..فتح الباب و وخر عشان تدخل..
الرزان..اخذت نفس وهي متضايقة:رجاءً لاتعيد هالحركة،انا ماحب حركات الجنتل مان،وفرها لغيري و للي يتأثرون فيها
فـارس..طنش:تفضلي..دخلت قدامه وهمس لنفسه..مادري متى بتبطلين فلسفة!!
الرزان..خزته بمعنى "سمعتك" والتفتت على المصورة وابتسمت لها:مرحبا..(وي يالفشلة نسيت وش اسمها!)..عفواً بس نسيت اسمج،اليوم الذاكرة مخبوصة شوي
انا اظن ذاكرتج مليانة بالأشياء التعيسة والسيئة..عشان كذا مافيها مكان لشي ثاني
،التفت عليها فـارس وهو مبتسم..
المصورة..ضحكت:ولا يهمك،انا فاهمة شلون الوضع عندك،اسمي سارة
الرزان..ضحكت:تذكرت الحين سارة
سارة..ابتسمت لها:الحمدلله،تفضلوا طيب،تصورون مع بعض قبل ولا تصورين لحالك؟
فارس..ابتسم اكثر:Lady's first
الرزان:Yeah sure انا اول
سارة:تفضلي
فـارس راح جلس على اقرب كرسي..وحط ايده على خده ويتفرج..ومع كل دقيقة ينصدم ويتفاجأ اكثر..كانت الرزان تضحك وتستهبل..
و"عـادي طبيعيـي مـول ما احـاتي"!!،
تغيرت كثير.. ماعادت المنعزلة الغريبة!!..يـاللـه شلون تحولت!!.بس ماظن تغيرت الى ذيك الدرجة من داخل....بس وشو ذا؟ قانون جديد!!..طبيعية مع الناس كلهم الا انت!!..لاتكون مخططة على كذا بس!..انا مابي اعيش مع جدار مرة وحدة!!
، وابتسـم ،
بس جدار حلو ماشاء الله
،من جهة الرزان كانت تستهبل..تتدلع..وغير!!..وبعد ساعة..
الرزان..رمت نفسها على كنبة وهي تضحك:بس الله يخليج،الصورة الأخيرة احذفيها
سارة..ابتسمت:ليـش؟،ترا احلاهم صدقيني
الرزان..ابتسمت:مو عشانها احلاهم،احذفيها
سارة..ضحكت:انا بخليها واذا ماتبينها بعدين ارميها،يـلا استاذ تفضل
الرزان..ابتسمت تتمصخر:شرف يـلا،يــا استــاذ فـارس
فـارس..قام وقرب منها وهمس:مو قدام الناس اوكي،سوي اللي تبين بينا،بس مو قدام الناس
وقفت وعدلت فستانها،
ولا يهمج يارزون..خلي الليلة تعدي على خير..وبس
،وبادلته نظرات ساخطة..المصورة استغربت من نظراتهم لبعض..
بدأو يصورون..لكن ماطولوا..و نرفزوا المصورة لانهم مايسمعون الكلام..و أول ماخلصوا طلع..
وجاوا هنادي والبنات كلهم يصورون وياها..و صوروا صورة جماعية وهم يستهبلون..و طالعتهم..
وابتسمـت بغصـة الـم..

[..الجـزء السـادس عشـر..]



:يـاخي عيب الصراحة!!،وبعدين امي بدت تشك،فـارس تلاحق على عمرك لاتنكشف و تصير بلاوي على راسك
فـارس..التفت عليها وهو رافع حاجب:شلون يعني بدت تشك؟؟
:لما حضرتك ماتروح تشوف زوجتك اكيد بتشك يالغبي!،روح مجاملة بس،وعشان امها بعد ،لا يسوون سوالف عالفاضي
فـارس:مناهل علاقتنا أصلاً ماهي طبيعية،فهي راح تستغرب اني جاي ازورها
مناهل:وتستغرب مافيها مشاكل،اهم شي اللي حولكم مايستغربون من حالكم..جلست عالكنبة جنبه..وبعدين قولي،انت ابداً ابداً ماعندك مشاعر اتجاهها؟؟
فـارس طالع فيها بنظرة غريبة ومارد..
مناهل:مو معقول!،البنت حلوة،الا تجنن مو بس حلوة،ومرة حبوبة
فـارس..رجع طالعها:انتي ماتعرفينها زي مااعرفها،هاذي مو حقيقتها أساساً
مناهل:تقصد عشان المشاكل اللي عندها!!،عادي كل انسان في هالحياة عنده مشاكل،وبعدين بما انك تعرفها على حقيقتها ومع كذا قررت تتزوجها يعني عندك مشاعر اتجاهها
فـارس..ابتسم:ياليت تخلين فلسفتج وتحليلج النفسي لغيري،انا مافكرت ولا راح افكر بهالأشياء، انا لما قررت اتزوجها كان لاني شفت انها الانسب من كل النواحي،لان ابوي وامي ماراح يقدرون يرفضونها،و لاني فاهمها _مع اني صرت اشك في هالشي الحين_ وماراح تسبب لي مشاكل
مناهل..استغربت:تسبب لك مشاكل؟!!،شلون يعني؟
فـارس:اقصد بما يتعلق بمتطلباتها كزوجة
مناهل..استغربت اكثر:انت من صجك!!،بديت اشك انك صاحي!!،فـارس انت من جدك كنت تفكر بهالطريقة!!،يعني من قبل لاتعرف عن مشكلتها كنت ناوي...
فـارس..قاطعها ووقف:أي بالضبط،اقول بس بما ان زوجج مسافر وش رايج نروح البحرين؟
مناهل..فهمت انه مو مستعد للمناقشة في هالموضوع حالياً وطالعت ساعتها:ليش لا،وبالمرة ناخذ حرمك المصون
فـارس:وشو؟،لا طبعاً
مناهل:ليـش!
فـارس:مزاجي مابي آخذها
مناهل..طنشته وقامت:انا بقول لهنادي،وبتصل على الرزان بنفسي واقولها،مع ان الافضل انك انت تكلمها،و عجل اذا عندك شي بتسويه،هو صحيح اليوم سبت ومافي زحمة لكن حلو نروح بدري لان اليوم ويكند عندهم
الرزان فتحت عيونها..وطالعت الساعة،
9:15!!..انا وش مصحيني بهالوقت!!..اليوم السبت!!ولا الأحد!!..كم التاريخ؟؟
،وقامت وهي تتمدد،
انا صحيت وخلاص..مافي امل ارجع انام
،راحت تشوف التقويم،
10/1/2009..13/1/1430..هههههههه..اليوم السبت..ههههههههه
،وظلت تضحك على عمرها..غسلت وجهها..فرشت اسنانها..الا جوالها يدق!!..طلعت من الحمام "الله يكرمكم"..
شافت الجوال وطالعت بالشاشة 4مكالمات لم يرد عليها!!..3 من هنادي و1 مناهل،
مناهل!!..وش تبي فيني بهالوقت!!..وهنادي وش مصحيها بهالوقت؟؟
،طالعت ساعة الجوال تتأكد،
9ونص!!..وش فيهم ترا الناس ممكن تكون نايمة بهالوقت..الا انا طبعاً..هههههههه
،وضحكت على عمرها..واختفت ضحكتها لما رن الجوال مرة ثانية..فركت عيونها تتاكد،
فـارس!!..العايلة كلها بيوم واحد؟!!..شالسالفة!!..اللهم اجعلوا خير
،وضغطت السماعة..
فـارس:السـلام عليكم
الرزان..(ادب ماشاء الله من الصبح)ومسكت ضحكة:وعليكم السلام
فـارس..استغرب من صوتها:انتي على وشو تضحكين؟،شكلج صاحية من بدري!!،اجل ليش مارديتي على المكالمات؟؟
الرزان..وخرت الجوال وضحكت ضحكت بعدين رجعته:مو من بدري مرة،صحيت من ربع ساعة، انت اللي كنت تدق من جوالات العالم!!
فـارس:أي جوالات العالم!!،أبداً مو لهالدرجة ميت عليج،مناهل وهنادي اللي دقوا
الرزان:هنادي وش يصحيها!!،ومناهل وش تبي فيني؟؟
فـارس..(اللهم صبرك ياروح)اخذ نفس:أبداً بنروح البحرين،فأصروا انج تجين معانا
الرزان..استغربت:انـا!!،البحريـن..(أي صح..ناوين امي تذبحني هالمخابيل!!..وبعدين انا وين والبحرين وين)..امممم،ماظن
فـارس:وشو اللي ماتظنين؟؟،انا بكلم امج،ونص ساعة وتكونين جاهزة مانبي نتأخر،مفهوم؟
الرزان كانت مستغربة،
وشو!!..يكلم امي!!..ياويلي رحت فيها،..
فـارس..كرر:مفهـوم؟
الرزان:لا طبعاً مو مفهوم،لاتكلم امي ولا تتعب نفسك،انا مابي اروح..(يصير خير)..وماله داعي
فارس:باللـه انتي غاوية نكد!!،احنا عازمينج مايصير ترفضين العزيمة،بدون أي كلمة زيادة تجهزي،انا بكلم امج
سكـر،
ياربي..والله ودي اشوف هالبحرين اللي الخلق ميتين عليها!!..بس مو معاهم..وماقدر اقول حق خالد لان عنده دوام..يـالله..يـلا اذا وافقت بروح وامري لله..بتكون فرصة للتحرر فعلياً من هالسجن
،..طبعاً ماهو غريب ان ام الرزان ماكنت تسمح لها بالطلعات والروحات والجيات..كان حدها بيوت اخوالها وخالاتها..واذا طلعت يكون بـ حراسة مشددة..
فكانت هاذي الايام متعة بأنها تطلع وتروح وتجي لأماكن كانت تتمنى تروحها..بس هي بنفس الوقت تكره تطلع بدون رجال..
ودايماً مع خالد او طلال..لكن طبعاً كل القواعد تغيرت في لندن..وعلى كثر ماكانت خالتها ايمان تروح مع خالد وطلال للبحرين..
الا ان امها ولا مرة رضت لها تروح معاهم..فكانت ايمان تجيب لها الافلام معاها...
رن جوالها وهي تمشط شعرها..قطت المشط من ايدها..وردت..
هنادي:مـرحبا،جهزتي ياحلوة؟
الرزان..ابتسمت:هاذي انتي،مرحبتين،أي نعم بس بقى البس العباية
هنادي:حلو،فكرتج مابتاخذين كلام اخونا الكريم بجدية،بس ماسألتي امج؟؟
الرزان..ارتبكت:فـارس قال بيكلمها،ماكلمها؟!
هنادي..ضحكت:اشفيج تخصبقتي!!،استهبل عليج كلمها،وحزري فزري
الرزان..توترت:والله مالي خلقج هنوده،قولي بدون لف ولا دوران
هنادي..ضحكت:ياحياتي هدي اعصابج،وافقـت على طول
الرزان..انصدمت:معقولة!!،اكيد تمزحين!!
هنادي..ابتسمت:حياتي انتي حرم فـارس بن صالـح الـ... مو أي احد،طبعاً ماقدرت ترفض هو زوجج،واللي ماعطاها مجال للرفض اننا انا ومناهل بنروح معاكم
الرزان..ابتسمت وهي مستانسة:يـاربي،لو تدرين وش كثر مستانسة
هنادي..(ياحياتي..وربي ماتصورت فرحتج بتكون هالكثر!!)وحست بغصة وابتسمت:الله يديـم عليج الوناسة والفرح ياحياتي،يـلا دقيقتين ونكون عند الباب،عجلي ولبسي العباية
الرزان..ابتسمت:ان شاءاللـه
هنادي:يـلا سـلاموز
الرزان:سـلاميز
وركضت وهي تنطط من الفرحة تربط شعرها وتلبس العباية..رجعت لها فرحة الطفولة فجأة..
بس عشان بتروح البحرين!..يمكن سبب سخيف لنا..لكن عظيم لها..وكأنها حست بالتحرر من قيود امها!...
مناهل..التفتت على هنادي:اشفيج فجأة سكتي؟!!
هنادي..انتبهت:هـلا!!
مناهل:الــو!!،كنتي مسرحة وين!!
هنادي..(مادري وش اقول!..المفاجأة صدمتني!..وبساطتها حطمتني يمكن!!):أبداً بس كنت أغني لنفسي
مناهل..ابتسمت:ترا هذا تلميح مبطن لك يافـارس
فـارس..ابتسم:سيارتي وانا حر فيها مابيكم تشغلون فيها اغاني
هنادي:اللي يسمعك يقول ملتزم!!،ومادرى عن كـارمينا وشهرزاد وانطوانيت
فـارس..ابتسم:اذا كان كرهي للأغاني يسمى التزام،فسميه زي ماتبين
مناهل:طيب شغل الراديو عالأقل
هنادي:أي والله،عالأقل راديو،بدال مااحنا جالسين ذا صم بكم
فـارس:احسن واريح،لما تجي حبيبة قلبج سولفي معاها
هنادي..ابتسمت:تغـار
فـارس..ابتسم:بشـدة،هههههههههههه،لاتضحكيني اكثر،ههههههههههه
هنادي..ضحكت:الحمدلله والشكر،اقول بس شغل الراديو
فـارس..ضحك:ماتدرين ان الحنة تقصر العمر وتنقص الفلوس
هنادي:اللي قال هالكلام مايقصد الحنان يقصد اللي يحنون عليه،لانه هو اللي بتنقص فلوسه وبالتالي بيقصر عمره،والحين شغل الراديو
فـارس..ضحك:انتي ورثتي الفلسفة عن اختج!!
هنادي:تدري ان المماطلة تقصر العمر اكثر!،لاتغير الموضوع وشغل الراديو
فـارس..شغل الراديو:يمـا منج حنانة درجة اولى
هنادي:ان شاء الله ان شاء الله
وضحكوا عليها..ووصلوا لبيت الرزان..وبعد ثواني طلعت..فنزلت مناهل من الباب الأمامي للفانتوم البنفسجية>>خطير لونها على فكرة<<
..وبعد ماسلمت عليها..
مناهل:ركبي انتي هنا انا بركب ورا
الرزان:لا لا،خليج مكانج انا بركب ورا
مناهل..ابتسمت:لا ماعليج مافيها شي انا بركب ورا
الرزان..ضحكت:الا احلف عليج يعني!،لاتخلينا رسميين كذا وارتاحي مكانج،انا ابي اقرقر مع هنوده حبيبتي
هنادي..فاتحة النافذة ومتسندة عليها:فديتج ياحياتي..فتحت لها الباب..تعالي عندي تعالي
الرزان..ضحكت:يـلا جاية جاية،يـلا رجعي مكانج مدام مناهل
رجعت مناهل ركبت قدام وهي محبطة والرزان ركبت ورا جنب هنادي وضمتها هنادي..
هنادي..ابتسمت لها:تدريني احبج صح!،اذا تدرين هذا للتذكير،واذا ماتدرين هذا للمعلومية
ضحكوا..
الرزان..ابتسمت:اول شي السـلام عليكم..وردوا السلام..ثاني شي مشكوره على التذكير،ثالثاً حطوا جايبين اغنية اشوف فيك يوم حقت راشدmbc fm
هنادي:صـج!! اخيراً بسمعها،فـارس حط حط 105
فـارس:حلو كملت
{اشـوف فيـك يـوم عاللـي انـت عملتـوا فيـا.. لمـا انـت غدرت بيـا..
واللي بترضاه عليـا بكرا نا حرضاه عليـا
كلامك تاني مش حيفيدك..محدش ضربك على ايدك عشان تنسى حب زمان..
حتمشي بس مش قلقان..حتيجي وابقى فيك شمتان حتتعب ولسه كمان}
مناهل:اوف وشهالحقد!!،انتوا حاقدين على مين؟
هنادي..ضحكت:الكل تقريباً
مناهل:الله يكفينا شر حقدج انتي بالذات
الرزان..ضحكت:مسكينة،هنوده ترا وديعة بس احياناً يطلع الجزء المتوحش بدفاشة
هنادي..تخصرت:نعم عيوني!!،هذا بدال ماتدافعين عني!!،ودفاشة مين يالرقيقة!!
الرزان..تستهبل:ياي ياربي انتي ليش كذا متوحشة،هدي اعصابج
هنادي:ضفي وجهج انزين،صدقت عمرها حليمة بولند
الرزان:وعععع انا الرزان تقارنيني بهالأشكال،وش جاب الثرى للثريا
ضحكوا..
مناهل..وهي تضحك:معاها حق الرزان،وش هالمقارنة وش جاب لجاب،القمر الرزان والنجمة حليمة اكيد
فـارس..وهو ماسك ضحكة:طبعاً وش جاب الثرى للثريا،اجل الله يسامحج ياهنادي تقارنين العسل الرقيقة الدلوعة حليمة بهالـ،مادري حتى وش اسمي هالمخلوق البشع الكريه
مناهل خزته..
الرزان..(انا مخلوق بشع وكريه..يـاحشرة..يـاتمساح..يـاحمار وتكرم الحمير بعد) ابتسمت ببرود وحطت رجل على رجل:اللي مايطـول العنـب..وسبلت برموشها وهي تطالعه..حـامض عنـه يقـول
مناهل وهنادي اكتموا ضحكاتهم..،
اللي مايطول العنب!!..اول مرة تتعدين الحدود لهالدرجة!!.. وهالاغبياء يضحكون..مو فاهمين القصد الحقيقي ورا هالكلام!!..ولا فاهمين!!..اشك والله..لنا كلام ثاني بعدين يامدام
،واكتفى فارس بابتسامة..
هنادي..همست لها وهي تضحك:افحمتيه،ويستاهلها
الرزان..ابتسمت لها وهمست:اقولج وش سالفة مناهل؟؟
هنادي..بالهمس:أي سالفة!!
الرزان..بالهمس:يعني غريب انها تتصل وتعزم وهالحركات؟؟
هنادي..بالهمس:الله يسلمج مناهل اقرب وحدة لفـارس،رسمياً هي كاتمة اسراره،فاحذري منها هي تتحاول تتقرب عشان تعرفج اكثر،وبتسحب منج كلام قد ماتقدر عشان تستنتج شخصيتج، الأخت تهوى التحليل النفسي كثير،تقرب لج يعني ههههههههههه

يتبع 

👇👇👇
تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -