بداية الرواية

رواية جيتك امانة انقذيني -16

رواية جيتك امانة انقذيني - غرام

رواية جيتك امانة انقذيني -16

هنادي..بالهمس:الله يسلمج مناهل اقرب وحدة لفـارس،رسمياً هي كاتمة اسراره،فاحذري منها هي تتحاول تتقرب عشان تعرفج اكثر،وبتسحب منج كلام قد ماتقدر عشان تستنتج شخصيتج، الأخت تهوى التحليل النفسي كثير،تقرب لج يعني ههههههههههه
الرزان..ابتسمت وبالهمس:تظنين يعني قالها عنا!!
هنادي..بالهمس:اكيد مايبيلها كلام،والأكيد انها...
مناهل..قاطعتهم:هاي ترا عيب تحطون روسكم على بعض وتحشون من ورانا،عندكم شي قولوه عالمكشوف ترا حلوة الصراحة،ولا فـارس؟
فـارس مارد..
هنادي..ضحكت:انتي شوفي السرحان اول!!،اقول بو الشباب رجاءً ركز في الطريق وخلك من التسريح لانطيح من فوق الجسر
مناهل:اللي سرحان،واللي لقى احبابه ونسى اصحابه!!،والله حالة هالعايلة
هنادي والرزان قعدوا يضحكون..وبعد وقت "ليس بالقصير اكيد" دخلوا البحرين واتجه فـارس لمجمع السيـف..الرزان كانت تتفرج على كل شي حولها..وهنادي تقرقر فوق راسها..وصلوا المجمع ونزلوا..و راحوا يتغدون بتشيليز اللي قدامه..
فـارس:انا بعدين بروح اتسوق شوي،انتوا وش بتسوون؟
مناهل:انا بتسوق اكيد
هنادي:انا مالي خلق دوارة،اول شي ادخل فيلم،بعدين اكون مروقة للدوارة والتشري،الرزان انتي وياي اكيد
الرزان..ارتبكت(وش هالوهقة!!..اكيد افضل اني اكون معاها..لكن انا وياها لحالنا بمكان غريب!!..بالحلفان سويتها بالسعودية..لكن هنا يستحيل..افضل الأمان مع فـارس):أ،أ،مادري!!
هنادي..قربت منها وهمست:اشفيج؟!!
الرزان..همست:ماقدر اروح وياج
هنادي..رجعت مكانها:ليش ماتبين تروحين وياي؟؟
الرزان انحرجت وماقدرت ترد..
مناهل:بتغصبينها يعني تروح وياج!!،خليها على راحتها
هنادي..طنشت كلام اختها:يعني خايفة!!،عادي انتي بلندن كنتي تطلعين لحالج!!...
فـارس:هنـادي!،ماتبي تروح وياج وخلاص،احرجتيها!
الرزان..قامت:عن اذنكم بروح للحمام
وراحت ،الله يسامحج ياهنادي..ليش هالأسلوب!!،وهنادي قامت وراها..
فـارس:استريحي مكانج،بتحلقينها بعد شنو!!،احرجتيها ونشبتي لها بس عشان ماتقدر تروح وياج!!،ماتوقعت منج هالحركة!!
هنادي:انا استغربت بس!،ماسويت شي لاتكبرونها!!
فـارس:لا بسم الله عليج ماسويتي شي ـبداً
هنادي قامت وطنشته..
مناهل:انا استغربت بعد،شلون تخاف وهي بلندن تروح وتجي لحالها عادي؟!!
فـارس:لندن غير،هناك ماحد يلتفت لأحد،وبعدين هي حدها البارك اللي مقابل سكنهم والمقاهي اللي جنب الجامعة وجنب السكن ومحيط الجامعة ماتتعداه،على بالكم تسرح وتمرح بلندن كلها!! ،وهنا بعد غير،انتي تشوفين الخلق كيف مايخلون احد بحاله!
مناهل..ابتسمت:فهمت وجهة نظرها بسرعة!!
فـارس:خمنت،وبعدين هذا وجه التفكير المنطقي
مناهل..ابتسمت:من اللي يتفلسف الحين
ابتسم لها...اما في الحمام "الله يكرمكم"..
هنادي:وربي طلعت مني لاارادياً sorry
الرزان :شلون هنت عليج تحرجيني بهالطريقة!!
هنادي..ابتسمت:السموحة عمتي السموحة،ماعاد اعيدها
الرزان:خلاص طيب وخري..كانت هنادي ضامتها من ورا..تدرين ماحب هالحركات
هنادي..ابتسمت:مو بيدي احبج وماقدر اقاوم
الرزان:هنـادي!
هنادي..كبرت ابتسامتها:عيـونها وقلبـها
الرزان..وخرتها:افـــ منج
هنادي:بتروحين مع فـارس!
الرزان:أي
هنادي..ابتسمت:ممكن اضحي عشانج واظل معاكم،بس لان راسج كبير وعنيدة بتركج تولين
الرزان..شهقت:ليش النذالة
هنادي..ابتسمت:احسن،خلي فـارس بلا جواد ينفعج
الرزان ابتسمت لها..وطلعوا..وافترقوا بالمجمع مناهل راحت تتسوق لحالها وهنادي راحت السينما وفـارس والرزان راحوا يتسوقون...طالعت فيه من فوق لتحت،
الصراحة ذوقه في الملابس عادي جداً..اممممم..ويلبس أشياء ماتناسبه
،ورجعت تقيم اللي لابسه..كان لابس جينز عادي لونه كحلي غامق..و بلوزة صوف خفيف لونها رمادي وعليها معينات بالكحلي والأحمر والأبيض كان رافعها لكوعه،
الوان تقليدية..وحتى قصة الجينز مو حلوة!!..للأسف ملابس ماركات وبالثمن الفلاني..لكن مو بالمستوى!!
،وانتبهت للساعة البيضا وفيها الماسات خلتها تلمع ،
يعني هاذي اكيد بالمستوى.. عالأقل عنده ذوق خطير بالساعات..اممممم والشوز بعد لابأس فيه
،جزمته كانت بيضا ماركة "غوتشي" وفيها خطوط احمر واخضر...سمعت صوت ضحكة مكتومة رفعت راسها..
فـارس..مبتسم:وشالأخبار عندج؟..طنشته وطالعت بعيد..لاتقولين لي ماعجبج شي!!
الرزان..طالعته بطرف عينها:هـه،اكيد لا
فـارس طالعها من فوق لتحت..يقيمها زي كانت تسوي معاه..كانت لابسة عباية زي باقي عباياتها قصة واسعة وسيدة لكن الأكمام غير..الأكمام شيفون مبطن بقماش حرير لونه بيج على ذهبي ومنقوش بالعنابي والأصفر والوان كثير و واسعة وبالنهاية مزمومة زي البف وفيها شريط كريستال ذهبي..والعباية مبطنة من داخل بنفس قماش الحرير وفي اطراف الشيلة بعد في نفس القماش و شريط الكريستال الذهبي..وكانت لابسة في اليد اليمين الدبلة وفي اليسار الساعة الصفرا والاسوارة اللي معاها..وشنطتها "بربري" الذهبية..والشوز فلات اصفر من قماش الستان وموديله زي حقين الباليه فيه شرايط نحيفة..الهدف منها بالأساس انها تخفي اللفة اللي على رجلها..
فـارس:شخبار رجلج الحين؟
الرزان:الحمدلله
فـارس:ليش ماتستخدمين عكاز؟
الرزان:ليش استخدمه؟،رجلي تحسنت ما احتاج عكاز
فـارس:بس باين انج تعرجين شوي
الرزان:ماقلت ان رجلي تشافت!،بس تحتاج وقت وبصير مثل الحصان
فـارس..ابتسم:تقصدين الغزال
الرزان..ابتسمت:لا قصدت حصان فعلاً
وبعد وقت من اللف والتسوق..راحوا لمجمع العالي وجلسوا بكوفي شوب..كانت سرحانة تطالع بدبلتها وساكتة..
الرزان:تحب الألماس الأصفر؟؟
فـارس..استغرب:وشـو؟!
الرزان:تحب الألماس الأصفر؟؟
فـارس..ضحك:فجأة تسكت وتنطق!!،وش هالكائن الغريب ياربي!!،أي احبه اشوف انه احلى من الألماس العادي بعد،بس وش مناسبة السؤال؟!
الرزان..(يعني احتمال كبير..يكون هو؟!!..بس!!..ياربي شالسالفة!!):أبـداً ولاشي،بعدين انت قلت بتاخذ رايي في الملابس وقصيت عليّ!،صار لي ساعة وانا كل مااختار شي تقوم تاخذ غيره!!
فـارس..ابتسم:خلاص،عندج فرصة بعد شوي بنقوم نسوي جولة ثانية
الرزان:ترا اذا سويت حركات الاستهبال حقتك مرة ثانية بتركك واروح
فـارس..ابتسم:حلفي،على وين ان شاء الله؟
الرزان:مالك دخل
فـارس..ضحك:ان شـاء اللـه
وبعد ساعة اخيراً انتهت جولة التسوق..لكن بعد ايش!!،بعد مااترفع ضغطي..اففف منه صج يطفش..طلعت روحي..انا اقول يمين يقول يسار!!..مالت على ذوقه بس..يشتري نفس الالوان!! ..يغير الموديل بس مايغير اللون!!،التفتت..شافته ماد يده لها!!..
الرزان:خـير؟
فـارس..بابتسامة"مكر":احنا مملكين الحين،لازم العالم يشوفون اننا نحب بعض
الرزان..خزته ورغم انها متنقبة الا انه خمن انها رفعت حاجبها:العالم اللي تتكلم عنهم مادروا عن هوا دارك،اقول امسك اكياسك احسن
لكنه طنشها..ومسك يدها..
الرزان..حاولت تسحب يدها:فـارس بلا سخافة!!
فـارس..بابتسامة كبيرة:لاتسوين فضيحة قدام الناس عيب،تكيفي مع واقعج الجديد
الرزان..رصت اسنانها بقهر:واقعي الجيد بعينك،الله ياخذ...
فـارس:مالها داعي هالدعاوي،استغفري ربج
طالعت فيه بطرف عينها..ورجعت التفتت،
مو انا اللي افاجأك زي ماتقول..انت اللي تفاجأني!! ..انا كنت مقتنعة بأن فـارس اللي يضحك وينكت مو هو فـارس الحقيقي!!..بس ياترا مين هو فـارس الحقيقي!!..انا ماظنه قاسي لكن!!...
،سكتت افكارها ومشت وايدها بايده..وايده الثانية شايلة 10 اكياس او يمكن اكثر!!...بعد ماحط الأكياس في السيارة..راحوا للسينما...
الساعة 11:40..وصلوا عند بيتها..
هنادي:مرة ثانية بتروحين معاي مفهوم؟
الرزان..ابتسمت:ان شاء الله على امرج..ونزلت من السيارة..يـلا مع السلامة،وثانكس على هاليوم الحلو
هنادي..ابتسمت:حياج الله كل يوم،على حساب فـارس طبعاً
فـارس..نزل:ما اسخفج ياشيخة
هنادي..ضحكت:مو اسخف منك اكيد
فـارس..فتح شنطة السيارة:تمـونيـن
وجات بتفتح الباب..و ناداها فـارس..
الرزان..التفتت شافت اكياس بيده:وشـو؟
فـارس..مد لها الأكياس:هاذي اشياء لج
الرزان..استغربت:لـي انـا!!
فـارس..ابتسم:أي لج انتي،يـلا خذيهم يدي بتنكسر لو ظليت مادها للأبد!!
الرزان..مدت يدها وهي مازالت مستغربة واخذتهم:شـ،شـكراً
فـارس:تصبحين على خير
الرزان:وانت من اهلـه
وسكرت الباب وراها..ولما رمت نفسها عالسرير من التعب..
ضحـكـت..وابتـسمـت...

[..الجـزء السـابع عشـر..]


يوم رجعت من حفلة الملكة..ملكتي انا طبعاً..تعبانة ومتكسرة..رجلي المسكينة كانت تصرخ طول الليل وانا ارقص تترجاني اجلس..
لكن..ماسمعت لها واستجبت لقلبي اللي كان يبي يرقص ويستانس..طبعاً مااقولكم كيف كانت النظرات عليّ من كل حدب وصوب..
اللي مقهور..و اللي معصب..واللي مو عاجبه ويستنكر ويشجب!!..كل هذا عشان رقصت!!..
مايسوى عليكم والله! ..ماعلينا..لما رجعت قالوا لي في هدية لج موجودة من العصر في الصالة!!..
طبعاً انفجعت لما شفت باقة ورد كبيرة كبيرة..جوري اصفر وابيض مع اوراق خضرا شي يجنن ياخذ العقل..
وعلى الطاولة صينـية حلاوة كبيرة وفخمة من باتشي..الحلاوة ذهبي وبني..
عليها بطاقة مكتوب فيها {الـف مبـروك} بنفس الخط المألوف وبدون توقيع كالعادة!!..
وشفت كيس مجوهرات الحرمين..فتحته وكان فيه علبة..العلبة كان فيها طقم ولا اروع من الذهب الأبيض والألماس الأصفر..وعليه بطاقة
{طلـي بالأبيـض طلـي..يـازهـرة نيسـان
طلـي ياحلـوة وهلـي..بهالوجـه الريـان
"هـذا ليـوم زواجـك"}
طبعاً انا مو بس تفاجأت الا انصدمت!!..الى اليوم وانا اتحرقص..ابي اعرف مين هالشخص المجهول!!..
اللي يرسل اغلى الهدايا واحسنها!!..مين يطلع؟؟وش يبي؟؟..فكرت مثل ماتفكرون..ممكن يكون عبدالعزيز..هي الفكرة منطقية..
لكن!!!.في نفس الوقت ممكن يكون فـارس..لكن ليش يسوي كذا؟!!..مادري والله مادري..
مخي بينفجر من التفكير!!..احسن ما افكر بالمرة..
رزون يـلا قومي وخلي هالأفكار اللي زي وجهج
،وقامت وهي تتمدد..


الأثنين..
15/1/1430..12/1/2009..
الساعة 3:30 العصـر..
كانت في الحوش..مبهدلة وحالتها حالة!!،
ميـن ده اللي نسيـك..تعرف لو قلبي بيتكلم كان رد عليـك..مين ده اللي نسيـك..قبل مانتعاتب طب سلم الله يخليـك...اممممممم..انا طبعي كده..وبحب كده..وبحب اعيش وماعنديش الا كده..دي حياتي انـا..دي ملكـي انـا..وانا مهما يكون برضو حكون زي ماانـا
،و لفت حول نفسها وهي ترقص..ورجعت للوحتها..الآنسة الرزان من محبات الفن..مو الرقص والغنا بس..
الرسم بعد>>هي مو رسامة مبدعة لذيك الدرجة..لكن تمشي حالها<<..
:أيـوا رقصني ياجدع
الرزان..التفتت وضحكت:خـير استاذ طلال؟!
طلال..ضحك:انا مستعد اغامر واتوسخ مع اني توني متسبح وكاشخ،بس ترقصين معاي،ها؟
الرزان..ضحكت:من صجك؟!
طلال..بابتسامة كبيرة:هو بالجزء الأول لا طبعاً،بس الثاني اكيد
الرزان..ضحكت اكثر:تصدق عاد مافهمت!!
طلال..ضحك:اقصد اني مو توني سابح ومتكشخ،بس صج ابيج ترقصين معاي
الرزان..ضحكت:شلـون؟؟
طلال..مد يده:هاتي هالآيبود..وعطته الآيبود وحط اغنية "كلـمة" لرامي صبريوعلى الصوت وحط الآيبود ومد لها يده..انا أبدء وانتي تتبعين خطواتي
ضحكت ومسكت يده..وبعد ثلاث دقايق سمعوا صوت تصفيق..والتفتوا شافوهم..
هنادي..تنطط:حماس والله،فـارس لازم تتعلم ترقص زي كذا
الرزان كانت مصدومة من ظهورهم المفاجئ..و تـك..انكسرت البكلة اللي ترفع شعرها!!..فلما تركها طلال انفك شعرها..
هنادي..كتمت ضحكة:الا من متى انتي رسامة ياآنسـة،عفواً يامـدام؟!،ههههههههههههههه، فجأة تذكرت مسلسل ليلى،ياويلج تسوين فيها ليلى المثالية عليّ ترا تنبط جبدي من الأشخاص المثاليين اللي عايشين احلام وردية
طلال..ابتسم:لان ماعندج اللي عندهم،تنقهرين منهم
هنادي..رفعت حاجب:هذا تخمين ولا اقرار بواقع،ولا سؤال؟!!
طلال..ابتسم:انتـي اختـاري..التفت على فـارس..شالأخبار عندك بو الشباب؟..وغمز له..الجو عندك تمام؟
فـارس..كان بدنيا ثانية وبعد ثواني انتبه والتفت عليه:هـلا،الحمدلله تمام
طلال..ضحك:من قلب تمام،عن اذنكم..طالع في نفسه ومسك ملابسه..بروح ابدل ملابسـي
هنادي:انا بروح اشرب ماي مو حلقي نشف من بعض الناس،وبالمرة بسلم
الرزان..كانت تحاول تلم شعرها:تعالي عندج ربطة؟؟
هنادي..التفتت عليها:لا،بعدين خليه مفتوح احلى
الرزان:يالفاضية،بيتوصخ من الألوان
هنادي:عادي بعدين غسليه
الرزان:هنـادي،مري الغرفة بطريقج وجيب لي بكلة..وبعد مادخلت هنادي التفتت على فـارس.. حضرتك بتظل متجمد كذا كثير!!
فـارس:مضايقج بشي!!
الرزان:أبداً بس مانع الرؤية،وانا ابي اكمل رسمتي..ولما تحرك..تحرك بشويش يمكن تصحى
فارس..استغرب:تصحى!!
الرزان:القطـوة،مع اني اشك ان في شي ممكن يصحيها من غيبوبتها
فـارس..ضحك وهو يبعد بهدوء:انا اتذكر وماراح تخوني ذاكرتي أبداً في هالشي انج تخافين من القطط!!،شلون قاعدة بهدوء ترسمين قطوة!!
الرزان:لو لاحظت بيني وبينها امتار وهي نايمة،لو صحت وتحركت بوصة من مكانها بطير داخل
فـارس..ابتسم بمكر:تصدقين فجأة تذكرت،من زمان كان ودي بقطوة عندي بالشقة،يمكن لما نرجع اجيب وحدة
الرزان:يكون احسن عشان مااضطر اعيش معاك بمكان واحد
فـارس..ضحك:بعد التفكير،اعتقد ان قطوة وحدة تكفي
الرزان..استغربت:ليش عندك قطوة بالأساس؟!!
فـارس..ابتسم:لا
الرزان:أجـل؟!
مارد وقرب يشوف اللوحة من وراها..فطنشته ورجعت تشتغل باللوحة..وظلت تتأفف وهي تبعد شعرها..ابتسم،
اللي مايعرفج بيقول تتعمد تتدلع بشعرها قدامه..بس في حالتج الملام هي البكلة اللي انكسرت..مالها حق تفارق هالشعر!
،مد يده وجمع شعرها ومسكه..
الرزان..التفتت:شتسوي بالضبط؟؟
فـارس:امسك شعرج،بدال ماتقعدين كل شوي تبعدينه،انا بمسكه واريحج
الرزان..ابتسمت وهي تحاول تمسك ضحكتها:وشلون يفترض اتحرك!!
فـارس:انا مو ماسكج انتي!!
الرزان..ضحكت ضحكة مكتومة:انت ماعندك شغلة؟؟
فـارس:يفترض اني في اجازة!
الرزان..ابتسمت:ماقصدت كذا
فـارس:ادري وش قصدتي،لا ماعندي شي،أساساً انا جاي عشان اوديج لموعدج
الرزان..استغربت:ليش؟!
فارس:خالد دق عليّ وقال وديها بدالي،so here I'am
الرزان:غريبـة!!
فـارس:ان خالد دق عليّ او اني هنا!!
الرزان..ابتسمت:مادري كل وحدة اغرب من الثانية
ورجعت لرسمتها..والتفتت بعد دقايق على صوت ضحكة..
هنادي..تضحك:اما حلوة البكلة البشرية اللي وراج يالرزان
الرزان..ضحكت:سخيفـة
هنادي..مدت يدها ببكلة:انا اعفيك من مهامك يا استاذ فـارس رسمياً وبمرسوم ملكي..وضحكت هي والرزان..خذي البكلة يامـدام..والتفتت على فـارس اللي رجع على ورا وترك شعر الرزان..انت اشفيك اليوم ماد البوز؟! مين مات وانا مادري؟؟
فـارس:استغـفر اللـه وش هالكلام!!
هنادي:مادري عنك قالب لي خشتك البهية وعافسها من الصبح!!،افرد هالخشة الوسيمة رجاءً وارحم معجباتك..غمزت للرزان اللي كشت بوجهها..ههههههههه،ماعلينا انا كلمت السواق وبيجيني الحين،وبروح اسوي اشغالي،عشان عرس حضراتكم،انا اتعب لكم ترا،لكن من يقدر
:انتي لو بتظلين تهذرين على راسهم بهالطريقة ماراح يقدرون ابد!!
هنادي..التفت:ارحمنا بس يالصامت انت،رجاءً طلول بلا تفلسف
طلال..شهق وحط ايده على قلبه:طلـول مين ياروح امج!!،اشوف طالت وشمخت،يـلا برا يـلا الباب يوسع جمل يا...ماقدر حتى اقولها
هنادي..ابتسمت:وش فيك ياخي هدي اعصابك،ترا والله امزح،عزيز وغالي والله يـا استـاذ طـلال
طلال..ابتسم:أي كـذا تأدبـي..وطالع بساعته..يـلا نراكم على خير جميعاً
هنادي..دق جوالها:اقول ضف وجهك بس يـاطلول
وركضت برا البيت..وهم قعدوا يضحكون..
طلال..يضحك:والله مااهبل من الأخت الا اخوها..التفت على الرزان وفـارس..مع السـلامة
وطلـع..الرزان حطت فرشاتها..
الرزان:ماتبي تدخل؟
فـارس:انتي بتدخلين؟
الرزان..طالعت ساعتها:الساعة4:5!،أي خلصت خلاص
فـارس..طالع باللوحة:بس لسه ماخلصتي اللوحة؟؟
الرزان..قعدت تلم اغراضها:خلصت الجزء اللي احتاج فيه القطوة،الباقي اقدر اكمله بدونها،بعدين شوي وتقوم هالمتوحشة وانا مابي اكون موجودة
فـارس:خلي اللوحة انا بشيلها
شالت بقية الأغراض..وهو شال اللوحة..وصعدت وصعد وراها..
فـارس:امـج وين؟
الرزان:امـي بالمطبخ تطلع مهاراتها على الخدامة الجديدة..واشرت له على ركن بالصالة..حطها هنا،تقدر تنزل عند جدتي،المسكينة قاعدة لحالها بالجلسة اللي قدام المجلس،انا بآخذ شاور وبنزل
فـارس:وخالتج مو موجودة؟!
الرزان:خالتي!!،ايمان نايمة وماراح تصحى الا المغرب ولا العشا
فـارس:اوكـي انا بكون مع جدتج
هو نزل وهي دخلت الغرفة...جففت شعرها..و التفتت على الأكياس اللي اخذتهم من فـارس ومافتحتهم،
ليش ما اشوف وش فيهم؟؟..انا مازلت شاكة في انه ممكن يكون الشخص المجهول!!
،شالت الأكياس وفتحتهم..كانوا اربع اكياس..الأول من "ارماني" وفيه فستان حرير شيفون لونه
Jimy Choo اخضر ومشجر بالأصفر والفوشي قصير للركبة وموديله بسيط..الكيس الثاني من
واكيد بيكون فيه شوز او بالأحرى صندل بكعب عالي >>زي صنادل سندريلا<< لونه فوشي ونفس الموديل اللي تحبه من قدام مرتفع ومسكر لكن فيه فتحة صغيرة ومن ورا بس فيه شريطتين شوي عراض ينلفون وينربطون،
هذا اللي اصر عليّ اجربه!!..بس انا رفضت فشلون عرف مقاسي!! ..38 بالضبط!!
،..والكيس الثالث من"ارماني جينز" فيه بنطلون احمر سكيني و من البنطلونات اللي يكون لها من فوق زي الحزام العريض او المشد!!>>مااعرف شلون اوصفه!!<< ومعاه قميص نص كم اسود و بدي كت لونه رمادي وفوقه جاكيت قصير صوف رمادي واكمامه مخططة بالأحمر،
يبدو انه فكر بكل الأحتمالات!!..وكيف ممكن البسه!!..للأسف ذوقه حلو لما يختار للناس لكن لما يختار لنفسه لا!!
،والتفتت على الكيس الرابع اللي من "لاكـوست"..فيه تي شيرت لاكوست العادي نص كم ولونه اصفر،
الغريب انه مارفض اقتراحي انه يشتري التي شيرت الأصفر اللي نفسه!!..هل يحب الأصفر فعلاً!!!..وبعدين شاريه عشان نطقم يعني!!..هههههه


،التفتت تطلع بقية الأغراض..كان في الكيس بنطلون ابيض قصته واسعة شوي لكنه بمقاسها وشوز رياضي لونه ابيض وفيه خطوط نحيفة بالأصفر والوردي والأخضر وعليه تمساح لاكوست،
حلو فجأة تحس بالعز والدلال..هدايا وماركات..يـلا يارزون اتهـنـي
،وطلعت آخر قطعة بالكيس كنزة مفتوحة بأزارير وخفيفة لونها وردي على فوشي عادية وعليها تمساح لاكوست،
ياهالتمساح خلاص انا كرهتك..قطيعة احد يختار شعار لماركته..تمسـاح!!..قلوا يعني!!
،لمت الأغراض ورتبتهم في شنطتها..واخذت الكنزة الوردية والبنطلون الأبيض..
ولبستهم مع قميص اصفر فاتح وشوز converse السبورتي اللي لونه قريب من لون الكنزة وطويل شوي من فوق ويغطي الكعب..
اما شعرها تركته مفتوح ولفت خصلتين من اليسار واليمين لورا..طالعها فـارس من تحت لفوق لما دخلت الغرفة..وابتسم..
الرزان..حطت عبايتها تضايقت من نظراته بس اجبرت نفسها تبتسم:شاللي عجبك بالضبط،اكيد الشوز صح!،لانه احلى شي في لبسي
فـارس..ابتسم:معـاج حق،بس بعد الكنزة الفوشية حلوة
الرزان..ابتسمت:اوه عجبتك!،ممكن نقول للي جابها شاكرين له،يجيب لك وحده زيها
جلست جنب جدتها..وقعدت تسولف معاها،
يمكن شخصيتج معقدة كثير فمحد فاهمها..اوانها بسيطة كثير فمن بساطتها محد قادر يستوعبها!!..والخيار الثاني على مااعتقد هو الصحيح برايي...
،انقطعت افكاره و امها تناديه..
فـارس..ابتسم ولف عليها:آسف،وش كنتي تقولين خالتي؟
نهلة..ابتسمت له:كنت اقول تبي شاي ولا قهوة
فـارس:قهوة الله يعافيج
الرزان..قامت:اجل اقوم اجيب لكم من الحلاوة اللي بالمجلس
راحت وخلال ثواني رجعت...
الرزان..وزعت الحلاوة عليهم:كان ودي اجيب لك الصينية تختار منها بس خلني اشيل عمري عشان اقدر اشيلها،بس اكيد راح يعجبك ذوقي
فـارس..ابتسم و ورا ابتسامته شي ثاني:اكيــد مايبيلها كلام
وبعد نص ساعة كانوا في سيارته الـ موستنج السودا...
الرزان:لاحظت انك تعشق السيارات!
فارس:?so is that a problem،بعدين كيف لاحظتي يانبيهة?
الرزان:عندك اكثر من سيارة،و تهتم بمظهر السيارة زيادة عاللزوم،و...مادري بس استنتجت
فـارس:نبيهة اسم الله،وانا فعلاً اعشق السيارات،وهاذي صفة معتادة على فكرة في الذكور
الرزان:مـو شـرط الذكـور بـس!،انـا احب السيارات،واكـره التسوق
لاحظت انجshoppingفـارس..ابتسم:حقيقةً انتي قاعدة شاذة،بس مو معقول تكرهين الـ
تحبينه
الرزان:اوكي يمكن ما اكرهه لكن اكيد ما احبه زي باقي البنات،يعني يعتبر متعة من وقت للثاني
فـارس:وبالنسبة للسيارات مااظنج تحبينها بالطريقة اللي الذكور يحبونها
الرزان:انت قاعد تعمم مرة ثانية،خالد مايحب السيارات يعتبرها ضروريات وبس مثل الجوالات، انت بأي طريقة تحب السيارات؟!any way يعني انت هنا تتكلم عن نفسك،
فـارس:اهتم بالمحركات بالسيارة ككل،انتي - وانا متأكد من هالشي- تحبين اشكالها والوانها وانواعها خصوصاً السريعة والغالية،انا اهتم بهالأشياء بس اهتمامي ماينحصر فيها زيج،صح ولا لا؟
الرزان:تقريباً صح
سكتوا..والتفتت تطالع بالشارع..هو طلع سيجارة وشغلها..شمت الريحة واختنقت...
الرزان..وهي تكح:انت اذا تبي تذبحني استمر بالتدخين،رجاءً ماتدخن وانا وياك مرة ثانية..رمى السيجارة من النافذة المفتوحة وشهقت..ياسلام بدال ماتطفيها ترميها بالشارع!!،اكيد انت مو صاحي!!..ابتسـم ببرود..بعدين من متى تدخن؟
فـارس:من يوم عرفتج
وابتسم..
الرزان..كشرت:هـا هـا هـا ماتضحك،انا ماشفتك ولا مرة تدخن!،متى بديت تدخن؟؟
فـارس:لانج ماتعرفيني اساساً،انا ادخن من..وفكر شوي..اربع سنوات او ثلاث سنوات ونص
الرزان..فكرت بنظريتها(اكيد كان في شي صاير وقتها..خلاه يبدا يدخن..كوسيلة غبية لتفريغ همومه وآلامه..عاشت المحللة النفسية رزون)ابتسمت لنفسها:كان في سبب خلاك تبدا تدخن صح!؟
فـارس..ركز عالطريق:مادري بديت تلقائياً ادخن
يصيـر خيـر..قـال تلقائياً قـال!!..مازال الغموض يكتنفه..تحسونه شوي كأنه من ابطال قصص عبير..غامض وجامد..
يظهر بشخصية مغايرة لشخصيته الحقيقية..طبعاً هذولك عكسه ظاهرهم الجمود والقسوة وداخلهم الطيبة والحب والحنان..
بس هو لا اكيـد..ظاهره الدفا وخفة الدم والحنان واحياناً تشوفونه سوبر مان..
بس داخله وهو الجزء الغامض حقيقةً واللي يظهر احياناً..برود زي الثلج وقسوة زي الصخر وعناد بلا حدود..
اي وايش بعد من صفات ابطال قصص عبير!!..اي النجاح المهني اكيد..واكثر مايعجبني فيه هو طموحه الدائم للأفضل..
واكيـد يشابههم في الثراء.. مادري وش بلاهم كاتبات العالم كلهم لازم يخلون الابطال اغنياء!!طيب لمرة خلوا البطل بسيط عادي طبيعي..
لاغني ولا فقير!!..بس يمكن ينظرون لمستقبل الأولاد اللي بيجون في الطريق!!..هههههههههه..
ماعلينا وفي ايش بعد يشابههم؟؟..اممممم يفترض الوسامة!!..حقيقةً توني انتبه اني مادققت في ملامحه..
يعني انتي تعرفين ان هالشخص اللي معاج وسيم ومزيون وحليو..بس مادققتي في خشمه..
عيونه..شعره..جسمه وطوله اللي اكتشفته مؤخراً..واللي يشابه فيه ابطال قصص عبير..لازم يجون طوال جداً!!
،التفتت تتأمل ملامحه..وتدقق فيها..من عيونه العادية لكن رمادية،
هذا شي اول مرة اكتشفه!!..متى صارت عيونه رمادية!!..بس من وين جاب العيون الرمادية؟!!..
اي صح امه وخواته عيونهم ملونة..وسعد الكتكوت ولد اخوه عيونه رمادية!..وهنادي عيونها عسلية!..
شي وراثي فهمت..احنا عندنا علياء ونوف عيونهم عسلية بس غامقة مو فاتحة..ماعلينا
،رجعت تطالع فيه..خشمه كان دقيق وطويل،
وكأن خشمه مرفوع خلقةً..ياسبحان الله..مايحتاج يرفع خشمه عالناس..هههههههه..
بس معطيه هيبة..توافق صفة اخرى مع ابطال قصص عبير..تلفهم هالة من الوقار والهيبة..
وعندهم كاريزما قوية..و الخ من الكلام الفاضي.. هههههههه
،عظام وجناته بارزة شوي.. وشفايفه مليانة شوي،
اوكي يفترض مافي رجال شفايفه مليانة!!..يمكن نافخهم..ههههههههه..بلا عبط رزون!!..
ماعلينا..خدوده شوي بارزين زي هنادي..و..وجهه طويل ونحيف..واهم شي السكسوكة الكلاسيكية الخطيرة..
امممممم..شاب وسيم بكلاسيكية سعودية..طيب يتشابه مع ابطال عبير بالوسامة
،وفجأة طلعت منها شهقة..
فـارس..التفت مستغرب:اشفيـج؟؟
الرزان..(اكتشتفت شي..خطير..و..غريب بنفس الوقت!):لا ولاشـي،كنت افكر بشـي
بالضبط..من جد!!..ما اكذب عليكم بس جد جد..يشبه حبيب ريمـا هريتك روشان!!..غير ان فـارس خشمه اطول شوي و على استقامة..وهريتك خشمه اقصر و نازل على تحت!!..وفـارس شفايفه مليانة واكبر من شفايف هريتك..والفرق الأكبر..فـارس شعره قصير وهريتك شعره دائماً طويل
،وطالعت بفـارس مرة رابعة،
مادري ليش مايغير هالقصة الغبية..شعره ناعم وشوي كثير.. ويمكن لو طول يغطي على روشان!..بس دائماً يحلقه على طول واحد ويمشطه بترتيب بزيادة!!.. بس مع هذا باين ان شعره كثير وناعم..طيب نشوف كجسم
،وطالعت من فوق لتحت..
فـارس:ترا مليت من نظراتج،بديت احس اني فأر مختبر
الرزان تفشلت والتفت تطالع برا على طول،
يعني لازم الأحراج!!..بس حصلت عالنتيجة..طويل وماشاء الله عريض..مو عرض متن يعني..
لا عرض بعضلات..بس بعد مو ذيك العضلات حقت كمال الاجسام..عادي..بس باين انه يتمرن كثير..
زي اخوي عادل قبل لايتزوج..كان يتمرن كثير ويروح الجيم كثير..كان طويل وعريض وجسمه عضلات..
اما الحين مازال طويل بس صار..وعشان مااظلمه ..شبه مكرش..
اما خالد المسكين هذا من يوم عرفته وهو طويل ونحيف مع انه بيكمل 34 الا انه مايبين عليه..لانه مازال زي ماكان قبل عشر سنوات..
بس انه تغير شوي لما صار يشيل حديد ويتمرن..خخخخخخخ..كسر خاطري خالو مهما يسوي بيظل عصقول..
ونفس الحالة طلول.. حقيقةً طلال نسخة كربون من خالد ونفس الحالة فيصل طـول ونحـافة..بس طلال تغير كثير مع الغربة..
صار عنده عضلات وأخيراً..واسمّر شوي بعد..الأخ فـارس هنا..ماهواسمر ولا ابيض..
بشرته مايلة للسمار اكثر من البياض..بس حلوة..احلى من البياض واحلى من السمار..
لايروح فكركم لبعيد..انا ما افكر ابداً باللي تفكرون فيه..مين اللي يفكر يارزون بأيش!!..ماعلينا،..
فـارس:ترا وصلنا اذا خلصت افكارج،اذا ماخلصت ممكن نستنى شوي بعد
التفتت حولها واستوعبت انهم وصلوا فنزلت..تلملم اطراف عبايتها الواسعة..لأول مرة عبايتها عادية جداً..موديل البشت وبأكمامها شريط كريستال وردي غامق وفيه فيونكة بشريط الساتان الأخضر..وشالت شنطتها الخضرا..
فـارس..ناداها:انتظـرج ولا اروح وارجع؟
الرزان..تنتظر المصعد:على كيفك
فـارس:طيب متى تخلصين؟
الرزان:6 ونص
فـارس..رجع يركب السيارة:بكون هنا 6 ونص بالضبط
6:30..طلعت من مكتب الدكتور سعد..ورن جوالها "فـارس بلا جواد يتصل بك"..
11:15..دخلت البيت..وصعدت لغرفتها..
:كيـف كـان اليـوم مع فـارس؟،باين انج استانستي؟
تخرعت وطاحت منها الأكياس اللي كانت بالعافية قادرة تمسكها كلها..
الرزان..التفتت و فيها غصة:خـالد!!،انتوا تبون تذبحوني بالغصب!!،قـاعدة على قلبكم انا ولا شالسالفة!!
خالد..ضحك:عسـل على قلبي لو قاعدة عليه،وبعدين واذا قاعدة عليه مايتأثر قلبي بالعصاقل ترا..لما شاف انها مابلعت المزح..ياقلبي والله مو قصدي اخرعج،ترا امزح بس..راح وشال الأكياس اللي تناثرت وسحبها للكنبة..استريحي وخذي نفس..وصب لها ماي..وخذي شربة مي
شربت الماي وابتسمت بعدين بدت تضحك..
خالد..ابتسم:هـلا هـلا جننج ولد الناس؟؟،لهالدرجة الطلعة معاه حلوة؟!،انا بديت اغـار..وجلس في كنبته وهو يسوي نفسه زعلان..ترا لو مانطقتي الحين وقلتي وش صار،انا بزعل فعلاً
الرزان..ضحكت اكثر:والله انك بزر!!،بالله انت خالي ولا انا خالتك؟ بديت اشك،عيب واحد

يتبع ,,,,

👇👇👇
تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -