رواية جيتك امانة انقذيني -24
هنادي..ضحكت:والله،هنادي هنادي لوعتي كبدي،يـلاmove u'r assركبت السيارة..ومطول الصوت على "مايخـالف" لـ فايز السعيد..
:سـلام ياحلوين ايش الأزعاج هادا كلو!!،صحيتوا النايمين وازعجتوا المريضين واقلقتوا الدارسين
هنادي..ضحكت:اهم شي!،انتي ليش شايلة هم العالم!!،حبينا نغير جو،ضاق خلقي وانا مقابلة المدام حسيتها تحتاج الى اكبر قدر من التغيير والوناسة،كسرت خاطري واشفقت عليها قلت مدام ماحد تقدم انا بتطوع واغير لها كآبتها
:الحمـدلله في احـد بيحس من الخلق في دا الزمن
هنادي..ضحكت:رزون سمعي المواعظ!!،دودي حياتي مالك ومال الزمن والخلق!!
غـادة:هيـا انثبري يامزعجة،فين حنروح؟؟
الرزان:اسأليها يمكن تقولج،صار لي ساعة احاول ماطلعت بشي!!
هنادي..دعست عالبنزين ومشت:صبركم عليّ صبركم..طولت على اغنية "ينسـى" لـ فايز بعد..اسمعوا وعـوا اسمعوا
وقفوا هم الـسبعة قدام صـالة السينما..
هنادي:سـربرايـز،هـا رزون كيف المفاجأة؟!
..التفت على طلال:مين العبيطة هاذي اللي جايبتنا على فيلم للمراهقين!!
خالد:جـراح!
هنادي..طالعت من فوق لتحت:مين العبيطة هاذي!!،اقول استريح بس ياعبقري زمانك!..التفتت على الرزان..رزون تحب هـاري بوتر وقارية كل قصصه،ففكرت اجيبها تشوف الفيلم
الرزان..ابتسمت:ثـانكـس..لما شافت وجه هنادي تغير مسكت يدها..لا من جد ثـانكس،يـلا اللي مايبي يدخل ينقشع
غـادة..ضحكت:انا بروح اجيب بوب كورن،احد يبي شي؟؟
الرزان:عصير لو سمحتي،وجلاكسي
هنادي:Salt pop-corn and juice
جراح:I will go and bring something for my self tala??
حمـد:ارتاح انت انا بروح،وش تبي؟؟
جراح..ابتسم:والله احسن تريحني،ابي أي شيبس قدام وجهك وببسي وجلاكسي
طلال..ضحك:ماصـدق؟!،انا ماي و باونتي وخالد زيي
خالد..ضحك:ليش ان شاء الله!!
طلال..ابتسم:صاحبي لازم اسحبك وراي بكل شي،الصاحب ساحب
خالد..ضحك:اللهم لك الحمد
حمد:خـلاص؟؟
جراح..ابتسم:خـلاص مانبي نثقل عليك اكثر
خالد..ضحك:لا يالـذوق!!
راحوا حمـد وغـادة..
هنادي..حطت ايد الرزان بأيدها:Let's go sister in low
طلال..ضحك:كشـخـة!!
الـرزان المسكينة جا حظها تقعد بين هنادي وجراح..اللي حطوا راسهم براس بعض وقعدوا يتناقرون على كل شي..ولما شافتهم من بداية الفيلم بيخربون عليها..غيرت مع خـالد وصارت بين طلال وحمـد..بعيد كل البعد عن هنادي وجراح..اللي فصلهم خالد وسكتهم..وانتهى الفيلم وهي مرتاحة منهم..بس ماعجبها الفيلم مرة..
غـادة:صح كلامك اللي قبل كانوا احلى!
الرزان:مو هنا المشكلة دائماً بالأفلام تغير بعض الأحداث و لا ماتلتزم بكل الموجود بالقصة!!
خالد:بالنهاية هذا فيلم كتابته تختلف عن كتابة القصة له سيناريو مختلف وحوار وسالفة
هنادي..حست بكآبة:يعني انا الحين دخلتكم فيلم خايس!!
الرزان:لا مش كذا،الفيلم حلو،بس مستواه ماهو ذاك الزود
طلال..ابتسم:اهم شي غيرنا جو
خالد:صح مع ازعاج ناقـر ونقـير
ضحكـوا..
خالد:يااطفـال،ماراح ناخذكم مرة ثانية مع بعض
جراح:هي اللي بدت تتحرش
هنادي:انا يالنصاب يـالـ...
الرزان..علت صوتها:بس عاد!،وش ذا!!حسيت كأننا رجعنا سنين ورا للأبتدائي وانا اقول لأبوي طلال هو اللي بدا وطلال يقول هي اللي بدت ونظل طول اليوم على هالحالة!!!،وش هالمصاخة!!
سكـــووووت!..
جراح:أ...
طلال..ماعطاه فرصة:أأأ،ولا كلمـة
ضحكـوا..
حمـد..ابتسم:خلونا نروح نتعشى الحين قبل لايتأخر الوقت اكثر،عندي لكم مطعم ايطالي خطير
هنادي:ايوا ايوا وانا اللي ابتلش بالحساب
حمـد..ضحك:لا افـا عليج الحساب عليّ،انا اللي عازمكم
هنادي..ضحكت:لا امـزح،انا اللي رزيت بوجهي وعزمت،ماعليه يوم بالأسبوع نتحمل تكاليف المعيشة المرتفعة
غـادة:والله عيـب!!،خلي الكلام هادا للفقراء المساكين،انتي ماشاء الله حولك وحواليكي
هنادي..ضحكت:يمـا منج!!
الساعة11:55..
الرزان:الصراحة أحلى الأفلام اللي شفتها الفترة الماضية"Slumdog millionaire"
حمـد:مـرة روعة،والحلو انه راح لعمق الهند للسكان الحقيقيين مو اللي يقصون علينا فيهم بالأفلام الهندية
غـادة:هي الهند كده يافقراء مرة وماعندهم حتى شي يلبسوه،يا اغنياء مرة،مافي ناس وسط الا من رحم الله
هنادي:القصة هي اللي خطيرة،يعني شلون قدر يتذكر كل هالأشياء مادري
الرزان:الواحد لما يعاني في حياته،مايقدر ينسى الم الماضي والمعاناة ابداً،لاحظي ان الأشياء اللي تذكرها كانت كلها اشياء تعذب فيها
حمـد..ابتسم:الا ذكرى "اميتاب باتشـان"
هنادي+الرزان+غـادة:وعععععععع،لا تقول
غـادة:نسيت هاذي الزكرى المريعة بصعوبة،لاتزكروني رجاءً
هنادي:يـالله،خلاص انسدت نفسي،اوخ معدتي قامت تقلب
طلال:رجاءً يالرقيقات لاتفشلونا
الرزان:كأنك ماشفت الفيلم ولا ماتذكر!!
طلال:الا طبعاً اذكر بس مو لهالدرجة مقرف!!
غـادة+هنادي+الرزان:مو مقرف!!!
حمـد..ضحك:الحين بيشككون في قواك العقلية
هنادي:اصـلاً انا من زمان مشككة في قواه العقلية،بس اليوم تأكدت
طلال..ضحك:اسـم الله يالعاقلـة!!
الرزان:الحين بيصجونا هالأثنين!!،هنادي لازم تعلنين السـلام صايرة كأنج امريكا ماتصدقين تروحين تنشبين في أي دولة!!
هنادي:انـا امريكـا!!
ضحكـوا..
خالد:لاتصيرين علة مثل امريكا!،ترا ملوعة كبدنا امريكا بسخافتها
الرزان:ومع الرئيس الجديد مايندرى يمكن تسوء الحالة،تداركي عمرج هنادي
هنادي:مالت عليـكم
ضحكـوا..وعشان تصرف الموضوع..
هنادي:سمعتوا اغاني الفيلم؟؟
طلال..ضحك:تصريفـة!!،عادي متعودينها من امريكا اذا ماعندها رد مقنع تقوم تقلب الموضوع وتصرف عــادي
حمد..ضحك:أي والله،بس صج أغاني الفيلم حلوة خصوصاً "Dream's on fire"
الرزان:اوه حتى انا عجبتني هالأغنية مرة
غادة:انا أعجبتني هادي و "Jai ho"
هنادي:الخطيرة اللي اعجبتني "Paper planes"
حمـد..ابتسم:اللي فيها صوت اطلاق النار
هنادي..ابتسمت:ربطتها بطريقة ما بحركة نايف هزازي ،عرفتوها
طلال:اوه الحركة السخيفة!،مين مايعرفها..وقلده وهو يحط اصبعه زي المسدس ويعنني اطلق وطاح..اول ماشفتها قلت الغبي ناوي يموت مقتول!!
هنادي..رفعت حاجب:الغبي..وبلعت اللي بتقوله..هي حركة،زي ما ياسر حركته السخيفة حقت السهم روبن هود زمانه
الرزان..ضحكت:بدينا بدينا الحش!!،يـلا مالكم علاقة بأحد كل(ن) يسوي اللي يبيه،ان شاء الله ينتحر
هنادي:ولا يشرب خمرة،ولا ...
الرزان..قاطعتها:هنادي!
هنادي:خليني اقول الكلام اللي ابيه هاذي حرية شخصية!،ولا بس هم اللي يحق لهم يلعبون
غـادة:هنـادي!!
هنادي:اللي يلعبون من ورانا وبالأخير يطلعون لنا بـ...
الرزان:هنـادي!،stop now..شالت المنديل من على حضنها ورمته على الطاولة..الحمدلله،يـلا هنادي بنتأخر بالرجعة كذا
طلال..ابتسم:شرايج اجي انام عندج اليوم،وخلي هنادي تروح تنام بغرفتها
الرزان:ماينفع اليوم،تعال يوم الجمعة واقعد الويكند كله،يـلا هنود!!
قامت هنادي وهي تشيل الشنطة ببرود وتقط المنديل بعصبية عالطاولة!..كان واضح في شرارة شعللت بين الرزان وهنادي!!..
حاسبت عن الكل قبل لاتطلع وطلعت كانها تركض مو تمشي..غادة قامت بسرعة ورا هنادي
..الرزان على اقل من مهلها شالت الشنطة..وتحركت..
الرزان..ابتسمت لهم:اسمحوا لنا على الأزعاج،حمـد اكيد مصدوم بس عادي تحصل في احسن الشلل هالحركات!!
حمـد..ابتسم:لاعـادي متعود
الرزان..ضحكت:فـارس كان يقول نفس الشي عن طلال وهنادي،الظاهر الخلق عندكم بالسفارة يتقاتلون!!
حمـد..ضحك:نوعـاً مـا
الرزان..ابتسمت:يـلا تصبحون على خيـر
جراح +حمد+طلال+خالد:وانتي من اهله
وصلوا غـادة..ورجعوا البيت..كل وحدة ماتكلم الثانية..وسكرت هنادي باب الغرفة وراها بقوة.. فطنشتها الرزان...
الساعة2:30..حست انها بحاجة لكوب هوت شوكلت عشان تنام..نزلت المطبخ وشافتها تحوس..
التفتت عليها ورجعت تسوي الشاي حقها بدون ماتهتم..سوت لها هي كوب الهوت شوكلت..
وجلست بالصالة وشغلت موسيقى لعـازف الكمان اللبناني "سـامي الشوا" وتممدت على كرسي فـارس المفضل..
واللي كان محرم على احد غيره يجلس عليه..
:ممكن تطفين هالأزعاج انا ابي انام
:ممكن انتي تبطلين سخافتج!!
:الرزان،لو سمحتي طفيه
الرزان:انتي اللي لو سمحتي ياآنسة هنادي لاتتصرفين مرة ثانية بهالطريقة قدام الناس!!
هنادي:أي ناس هذول ربعنا،يمونون
الرزان:لا مايمونون بالنسبة لي،انا مابي احد يعرف بالموضوع،كونج عرفتي بسبب لقافتج الزايدة فهاذي مشكلتج،انا خليت اصحاب الشأن يوعدوني مايفتحون الموضوع
هنادي:تدرين وشو انا ماعدت قادرة اتحمل،انتي قاعدة تدفنين نفسج عشان واحد مايستحق...
الرزان:هنادي!،شاللي قلبج!!كنتي ما احلاج!!
هنادي:انتي وحالج،شوفي عمرج قاعدة تموتين بس ببطء!!،حاولت اليوم اخليج تطلعين من جو الكآبة،لكن للأسف بعز الضحك والوناسة اشوف عيونج تلمع بالدموع وانتي تتمنينه يكون معانا بهاللحظات،انا ماعاد ابي العالم يقولون اني اخته حتى وانتي مازلتي متمسكة فيه ومصرة على انج تدارينه وتراعين اموره!!
الرزان:انتي خبلة!!،هذا بس عشانه كان متزوج عرفي؟!،غلطة وارتكبها ربي يغفر وانتي ماتغفرين؟!!
هنادي:انتي اللي خبلة والبنت،بنتـه؟!اللي قطها ولاسأل عنها!!
الرزان:يالعبيطة بنته ماقطها،بنته ماتت قبل شهور في ميتم الأطفال اللي قطتها امها فيه،وهو ماكان يدري عنها أصلاً
هنادي:وش يضمن لج؟!
الرزان:الكل عارف بهالشي،انتي اللي قلتي انه يعشق الأطفال تتصورين انه بيقط بينته اللي من لحمه ودمه؟!!
هنادي:بعد اللي سمعت عنه اقدر اتصور انه يسوي أي شي
الرزان..قامت:هذا لأنج عبيطة،انتي حرة على فكرة،بس انتي اللي بتندمين بالنهاية،ولو هالحقيرة صادقة في ان البنت موجودة ومازالت حية تجيبها،حجتها بأن البنت اختفت فجأة بعد ماتبنوها ناس مش مقنعة ولاتدخل بالعقل،نـواف وحمـد اكدوا انهم قلبوا الدنيا عليها ومالقوها،صار لنا شهر واكثر ندور على اثر لها!!،السفارة طلعت وثيقة وفاة من الميتم اللي كانت فيه،وهي مازلت مصرة ان البنت حية وان الأوراق مزورة،انتي ماتلاحظين!!،الحقيرة طمعانة وتفكر انها ممكن تورث!!
هنادي:انا دارية عن افكارها،بس اللي سمعته وعرفته عن فـارس ماله علاقة...
الرزان..قاطعتها:شلون ماله علاقة!!،الحقيرة قاعد تطلع عليه اشاعات،وانا ماراح اسمح لها،لو تعدت حدودها اكثر،بنرفع عليها قضية تشهير وقذف،لانها اتهمته بعلاقات مع كثيرغيرها
سـكـتـــت..اما هي حطت كوبها بالمغسلة وصعدت غرفتها..وذيك جالسة عطاولة البار تشرب الشاي..وبراسها تدور ملايين الأفكار،
معقولة تكون كذابة!!..اكيد معقولة انا مو غبية لهالدرجة ..بس احتمال كبير يكون كلامها صح..
انا اعرف ان لـ فـارس علاقات كثير..انا ماعرف طبيعة علاقاته السابقة..بس انا اعرف اخوي..لكن!!...
،استمرت الأفكـار تتقلب..يمين شمال..شمال يمين...انسدحت عالسرير وهي تطرد كل الأفكار اللي تدور ببالها..حطت راسها عالمخدة..قرت المعوذات وآية الكرسي،
اللهم اسلمت نفسي اليك..ووجهت وجهي اليك..وفوضت امري اليك..والجأت ظهر ياليك..
رغبة ورهبة اليك..لامنجا وملجأ منك الا اليك..آمنت بكتابك الذي انزلت.. وبنبيك الذي ارسلت
،..غمضت عيونها ونــامت...
[..الجـزء الثـالث والثلاثـونــ ..]
:اصبحنا واصبح الملك للـه،نعم يامـامـا نعم؟!..حطت ايدها على بطنها..خير وش هالبوكسات من الصبح!!،اركـد حبيبي اركـد،بنروح للعيـادة بعد شوي
السبت..
7/11/2009..19/11/1430هـ..
الساعة 10:45 صباحاً..
مرحبا حبيب المـامـا..عمرك حالياً 30اسبوع..يعني ثمان شهور الا اسبوع..تونا داخلين الأسبوع الثاني من هالشهر..
كيف الأحوال داخل؟؟..مستانس!!..هو الأكيد ان حضرتك مبسوط من الترفيس اللي يجيني..
الجو عندنا برا خريفي وفي برودة محترمة..طبعاً جايينا برد ديسمبر ويناير والثلوج..نرجع لموضوعنا..
الغريب ان الأطفال بعمرك مايرفسون كثير لأنهم بدوا يكبرون!!..لكن الشكوى لله..حبيبي انا تعبانة..
عشان كذا راعيني وبالهداوة عليّ..بابا من جهة..و ولادتك من جهة..و...
لا بلاش كلام فاضي مابي اقلقك..انت خليك براحتك من الهموم..الهم انا اللي اشيله عنك ان شاءالله لآخر يوم في عمري..
حبيبي لازم نتعاون مع بعض اكثر..لازم تساعدني..الدكتورة تقول ان في خطر كبير عليّ وعليك لأنه اول حمل..
وماكان مستقر من أول!!..هو حقيقة انا جاني نزيف بالشهر الثاني وفكرتها الدورة وفسرت كثافة الدم وكميته الكبيرة بأن الدورة مانزلت الشهر اللي قبله!!..
يـالله الله يسهل..والله يحفظك...امووواه "بوسة من مامـا اللي تموت عليك" يانور دنيتي..لاتخاف ماراح اسميك نور..
ههههههه..حقيقة انا مافكرت بسالفة الأسامي.. نناقشها مع بـابـا بعد شوي..هـا وصلنا..مع السـلامة حبيبي
،سكرت الدفتر..حطته بالشنطة وشالتها ونزلت...من اسبوعين ماعاد يتبعها الا جيم والسواق هو هو ماتغير..
لأنهم قبضوا على مجموعة محترمة من المجموعة او الجماعة الأرهابية...
دخلت الغرفة وسكرت الباب..كالعادة قطت الشنطة الجلد الزرقا من "هيرميس" وفوقها الجاكت الأحمر>> عديمة الأحساس..شنطة"هيرميس" بالآلاف تقطها بهالطريقة!!<<..
عدلت قميصها الكحلي المخطط.. وجلست..
الرزان..ابتسمت:لاحظت حبيبي،صايرة ضخمة!!،شد حيلك وقوم لاتتلكك زيادة قربت الولادة اكثر فأكثر..مسكت بيده..واخيراً ياقلبي طلعت الحقيقة،اللي ادعت سلاف انها بنتك ماكانت بنتك اساساً!،وسـلاف ماتعتبر زوجتك في أي شرع وفي أي قانون لأن الورقة اللي هي ورقةالزواج العرفي ماعليها شهود،ومن شروط أي زواج صحيح الشهود.والحمدلله افتكينا منها واصدرنا أمر يمنعها من الاقتراب من المستشفى او منك ومني..مسكت ايده وحضنتها بايدينها..انا مستانسة حبيبي..وتراجعت لورا..بس بنفس الوقت مو حاسة بهالوناسة فعلاً!،نوفي تقول جدتي تعبانة وبالمستشفى،انا ودي اروح اشوفها،بس بنفس الوقت مابي اتركك،لكن الدكتورة منعتني اساساً لما سألتها اليوم اذا اقدر اسافر بالطيارة،منعتني وقالت انتي تتحملين النتايج بعدين،بس انا خايفة على جدتي،وامي وش بيصير فيها!!،خالد قاعد يخبي عليّ ويبين من صوته مايقول الصج!!، مادري شسوي!!،قالوا لي بيسوون لشرايين القلب عملية يوم الأثنين الجاي،جدتي قلبها تعبان من سبع سنوات بتتحمل عمليات اكثر؟!!،ان شاء الله تتحمل،طلال بيسافر لهم،والكل وعد يطمني ،بس انا مو مصدقتهم انا واثقة بيسكتوني بأي كلام..شدت على ايده..خليك جنبي لاتتركني حبيبي
غمضت عيونها ورجعت لورا...فتحت عيونها وهي تستوعب..انها غفت بدون ماتحس..
وقامت بثقل وتعب..باست يده..لبست جاكيتها وشالت شنطتها..باست جبهته..وطلعت...
طالعت بالتاريخ بالجوال..مرة..مرتين ..ثلاث،
اوووه..لا لا لا!..اليوم عيد ميلاد هنادي..وش اجيب لها!!
،وعلى طول على اقرب محل مجوهرات وساعات..اشترت لها خاتم الماس وبوسطه احجار كريمة من نوع جديد وحلق يشبه له "ولد عمه!"..
ودتهم لمحل هدايا حطهم بعلبة وغلفهم ومع دبدوب وبالونات...طالعت ساعتها،
الساعة 12:00 مااظنها صحت للحين..اليوم اجازة..خاطري اروح السبـا عشان تدليك الأقدام..
رجولي حالتها حالة بسبب هالحمل...هـا!!والله فكرة
،..مرت على نادي صحي او صالون "سموه اللي تبون"..حجزت لخمس اشخاص..ومرت مخبز..
وشرت بالونات وكل ماتحتاج من السوبر ماركت...دقت الباب عليه بقوة..
الرزان:قـوم طلال قوم،حشى نومة جدي!!،قوم ابيك في شي خطير
طلال..فتح الباب بشويش وهو يطل براسه وشعره المنكوش وبجامته المبهدلة:نـعـم!!
الرزان..ضحكت:شكلك عجيييييب!!،من أي المخلوقات انت؟؟،عفواً انت من أي كوكب؟..حك شعره..بدون أي شك كوكب هنادي..ضحكت..صحصح ياطلول،ورانا اشغال شاقة اليوم،عندك نص ساعة اوكي..عفست شعره زيادة..عجـل
راحت وتركته يطالع فيها مستغرب،
وش سـر نشاط اختنا الكريمة!!..توها امس طاقها اكتئاب والبوز شبرين!!..
حشى الى هالدرجة الحمل يقلب المزاج!!!..الله يعينا عليها..مـامـا غودزيلا بتصير
،سكر الباب وهو يضحك..بعد شاور منعش..واللبس والترتيب..جلس يفطر" فطور متأخر جداَ"...جلست بحماس..
طـلال:اشعندج!!،وش هالأكياس وهالعفسة؟؟
الرزان..بحماس:اليوم عيد ميلاد هنادي
طلال:ألف مبروك عقبال عيالها إن شاءالله،so what?!
الرزان:بسوي لها حفلة!
طلال:مبروك عليكم منها المال ومنج العيال،والمطلوب؟!!
الرزان:ياملقك!!،يعني وش بيكون المطلوب!!،تشد همتك انت والربع وترتب المكان،يعني من الواضح اني مااقدر ارتب المكان
طلال..ضحك:اتخيلج بس انتي ودبتج
الرزان..ابتسمت:مالت عليك،هالدبة فيها حياة ثانية
طلال..ضحك:Yeah yeah,where ever
الرزان:عدل اسلوبك،اشفيك اليوم!!
طلال..استغرب:انـا!!
الرزان..قامت:لا انا!؟،اكيد انت
طلال..ابتسم وقام:انتي اللي اشفيج؟!!
الرزان:اش اش،الحين تخرب مزاجي
طلال..(الحمدلله والشكر!!..ابداً مو صاحية..ماما غودزيلا)ابتسم:طيب طيب،قولي الحين وش اوامرج بالضبط!!
جلست وحطت له قائمة..انصدم فيها!!>>مسكين..بيتحمل "ماما غودزيلا"..ماله امل يقول لا<<...شالت شنطتها وهي مستغربة!!..
:طيب فهميني بس وين بنروح؟!!
:اصلاً الساعة 2 الظهر!!،احد يطلع بهالوقت!!
:اجـازة يالغبية،العالم كلهم الحين طالعين
:يعني ماتعرفين تعبرين عن وجهة نظرج بأدب!!
:مـو...
:تركنا الأدب لج
:انتي الحين وش دخلج بيني وبين صديقتي!!
:ونعم الصديقة والله انتي
:رجاءً عن الغلط
:ايش مشكلتك انتي وهيا!!،خلاص اقرفتونا من الصبح
:ههههههههه عجيب،الصبح صارت الصُبح!!،عطيهم يادودي عطيهم،بس خلاص يلا مشينا ،الرزان الحين ندمت انها اقترحت نطلع!!
الرزان:ههههههههه،أي والله،امشوا يلا،سديم هنادي،ما اسمع منكم ولا كلمة،رجاءً لاتفشلونا
الساعة 6:30 مساءً...
..ضمتها بقوة:رزون،Thanks a lot..تركتها وتمددت..اللـه احس اني مسترخية مستانسة كأن هموم الدنيا كانت على حمل قيل على كتوفي وانزاحت
:الله الله ايش الكلام الكبير هادا ياهنوده
هنادي..ابتسمت:من جـد مادري وشفيني!! كثرانة حكمي!!
:هههههههههههههه،كبرتي سنة وزادت حكمتج عشر سنين،هههههههههههه
هنادي..ضربتها على كتفها:اصول يالدبـة تتطنزين هـا!
اصيل..تضحك:مو بالضبـط،هههههههههههههههههههههههههه
وضحكوا معاها وعليها بعد!!...
:باليمين باليمين
..ضحكت:شنـو داخلة بيتي الجديد!!
:فتـحـي ياوردة
..ضحكت:اسمي هنادي ومابي اغير اسمي ابداً..فتحت عيونها..وأ،و،واااااو،ياويلي مسوين حفلة!،ليش ماخليتوني اكشخ عالأقل؟!
الرزان..ضحكت:والله فـضـاوة
وشغلوا الميوزك..وبدت الحفلة...
..مبتسمة:اقول رزون انتي عازمة بنات الكلاس ليش؟؟
الرزان..ابتسمت:مايصير حفلة من خمس اشخاص بس،ومانبي الشباب عشان ناخذ راحتنا، وبعدين انا بس قلت لهم عيد ميلاد هنوده كلهم قالوا بيجون وبيجيبون صديقاتهم
هنادي..ضحكت:مسكينة رزون ماكنتي تتوقعين راح تتحول الحفلة كذا!!
الرزان..ضحكت:هم قالوا بنجيب صديقاتنا انا توقعت كيف بيكون الوضع
وضحكوا ثنتينهم..
:بدال ماانتوا قاعدين تحشون في الخلق وتتساسرون قوموا رقصوا
الرزان..ضحكت:بـالله فجـر انتي شايفة ان في احتمال ارقص،والله رفعتي معنوياتي
فجـر..ضحكت:أي والله استوعبت،طيب هنوده يـلا قومي،مايصير صاحبة عيد الميلاد تجلس متفرجة بس!!
هنادي..ابتسمت:انا حامل بعد بالنيابة،بجلس مع الرئيس احسن لي
فجـر..ضحكت:خطيرة هاذي حامل بالنيابة،اقول بلا تصريف قومي..ومسكتها..يـلا مالك حجة قومـي تكفين لاترديني
الرزان..ابتسمت:قومي يـلا البنت ترجتج!!
هنادي..ضحكت وقامت:يـلا امري للـه
واخيراً جاءت اللحظة..طفوا الأنوار..شغلوا الشموع..3.2.1..تمنت امنيـة و نفخت..الكـل صفق بحماس..
وتبادلوا هم الثنتين نظرة..ابـتسمـوا بحـزن...
[..الجـزء الرابـع والثـلاثـونــ ..]
:دخلت ولا مادخلت؟؟
:توها داخلة،ان شاء الله خير
:طلال الله يخليك طمني،حلفتك بالله هـا،طمنـي
طلال:الرزان خلاص اشفيج!،ان شاء الله بطمنج،وانا اللي حلفتج تهدين ولاتتوترين بزيادة،ترا امي مو ناقصة انتي بعد يصير لج شي
الرزان:ان شـاء اللـه،شخبارهم؟؟
طلال:الحمدلله بخير،يسلمون عليج
الرزان:الله يسلمهم،انتبه على امي اوكي؟!
طلال:ولـو الرزان هاذي امي بعد،يـلا اشوف ضفي وجهج
الرزان:يـلا فمان الله
طلال:في حفظه
حطت الجوال جنبها..والتفتت تطالعه ومو قادرة تطالع في شي ثاني
:هـا رزون وش قالج؟؟
الرزان:دخلوها غرفة العمليات
..حطت يدها على كتفها:لا تخافين ان شاء الله خير
هزت راسها بدون ماتتكلم..مسكت يده،
ليش تسوي فيني كذا يافـارس..ليش!!..قوم الله يخليك قوم..افتح عيونك..تحرك..
انا احتاجك..ابيك جنبي
،..غمضت عيونها وهي تتماسك..وتحبس الدموع قبل لاتنزل...
الأثـنيـن..
السـاعة 4:30 العصر..
16/11/2009..28/11/1430هـ..
مستشفى المـلك فهد التخصصي-الدمـام..
كل واحد منهم يطل..كل دقيقة..على ساعته..واللي رايح جاي بالممر..واللي قاعد يستغفر..واللي قاعد يقرا قرآن..
واللي يدعي..واللي راح يصلي..هو كـان بهدوءه..حاط راسه بين ايدينه ويستغفر..
مرت ساعات وهو ماتحرك..اخيراً تحرك وقام..لما انفتح البـاب...كل الانظار توجهت للبـاب..
الدكتور حس بالنظرات توجهت له..وعلامات الاستفهام تتقافز في وجهه..
..تحمحم وتماسك:احنا سوينا اللي علينا..وسكت والكل يترقب الكلمة اللي بتلحق هالكلام..لكن ماتحمل قلبها العملية..نزل راسه..عظـم اللـه اجـركـم
نزلت الدمعة اللي كانت واقفة..متعلقة بعيونه..وبللت خده...لأول مرة يصيح..أول مـرة..حتى لما توفى ابوه ماصاح...
تهآوى عالكرسي اللي قام منه..واستسلم قدام الدموع اللي تتابعت..وحدة ورا الثانية..غطى وجهه المبلل بايدينه..وعلا صوته وهو يصيح...
حط ايده حول كتوفه..وهو محتار.. يروح لأمه..و لا..يجلس معاه...شد يده حول كتوفه..
:خالـد!،خالد لاتسوي كذا،اذكر الله وادعي لها
خالد..قـام وهو يمسح دموعه ويوخر يده عنه:طـلال رجاءً
طلال..وقف بسرعة ومسكه:وين بتروح؟؟
خالد..سحب يده بقوة:مالك شغل وخر عني
طلال..رجع مسكه بقوة:خـالد لاتصير خبل،هالحركات خلها لغيرك،انت اعقل من كذا
خالد:ابـي اكون لحالي،ابي اجلس لحالي،حـرام؟!
طلال:لا مو حرام،بس بهالنفسية ماتقدر تطلع لحالك
خالد..وخر عنه:ماني طالع،بس بروح اجلس لحالي يا طلال اتركني
طلال..خفف من مسكته:بتركك،بس اوعدني ماتطلع من المستشفى
خالد:بزر انا..لما شاف نظرة طلال..خلاص خلاص اوعدك،بس اتركني الله يخليك
تـركه..وبمجرد تركه..لف بسرعة..وراح يتخبى عن عيونهم...التفت حوله الكل هـادي!!..
امه تصيح بس بهدوء ومعاها اخته..التفت وطالع خاله الكبير..اللي استمر يدعي ويستغفر،
القوة اللي فيك ياخالي..تزيدني قوة
،..والتفت للي كانت منهارة فعلاً..الأصغر خالته ايمان..ومعاها ريما واماني يحاولون يهدونها..
..قرب منها:ايمان،يـلا قومي نروح البيت
مسك ايدها وقامت اشر لأخوه يقوم مع البقية...
كان جالس عالكرسي ويصيح..شكله شاذ وغريب..كل ماحاول يلملم قوته ويقوم..يرجع ينهار..
وأخيراً مسح دموعه..واستجمع كل قوته وقام..ومجرد ماقام انهار كلياً...
كانت تتلفت وتنادي الممرضة..وهي تتحلطم وحاقدة عالممرضة اللي اختفت فجأة..وأخيراً جاتها وحدة من الممرضات..
وهي تكلمها كانت تطالع وراها باستغراب..وفجأة تحركت بسرعة وهي تنادي عالممرضات او أي احد..
..مسكت يده تدور النبض:لو سمحت،لو سمحت..التفتت وهي تصرخ..I need help here
حطت سماعتها وهي تسمع دقات قلبه الضعيفة..وأخيراً حسوا العالم..وشالوه عالسرير بسرعة...
فتح عيونه بشويش..والدنيا تدور من حوله..سمع صوت يناديه..صوت غريب..صوت بنت!!..
:سيـد خالـد،سيـد خالـد
فتح عيونه كلها هالمرة..ومجرد شاف النور..حس بألم فظيع..وحط يده على راسه..وحس بشي غلط على يده..طالع بيده باستغراب،
ابـرة مغذي!!
،..وحاول يلتفت بس ألم راسه كان فظيع..
:لاتحاول تتحرك،راح يزيد الألم،بنادي الممرضة تعطيك مسكن وبيخف الألم ان شاء الله
خالد..حرك عيونه باتجاه الصوت و تفاجأ بالشكل المألوف!!:انتي مين؟؟،وانا وين؟؟
..ابتسمت:اولاً انت بالطوارئ،ثانياً انا طبيبة هنا
خالد:انت شايفتني غبي لهالدرجة!!،انا اتألم وشبه مريض،لكن لسه مافقدت قواي العقلية،انا مستوعب اني بالطوارئ وانج طبيبة لأني مانعميت لسه،انا شسوي هنا؟؟وانتي وش تسوين هنا؟؟، رجاءً وفري الردود الغبية وردي زي الناس
..كبرت ابتسامتها:هدي اعصابك طيب،انت هنا لأن ضغط دمك انخفض واغمى عليك من التعب والارهاق،وشي طبيعي اني هنا عشان افحص عليك..التفتت للمرضة اللي دخلت.. give him 100mg of Voltaren..التفتت عليه وهي مبتسمة..ارتاح وحاول تنام،اهلك راحوا لكن في واحد اسمه طلال على ماظن
كان عقله متشوش..كان وجهها مألوف..مع انه متأكد انه ماشافها من قبل..الا ان وجهها مألوف..
انتبه للبطاقة اللي كانت حاطتها..وركز وهو يقرا،
دلال صالح الـ... !!..وانا اقول وين شايف هالوجه من قبل..سبحان الله كانها هنادي
،..وابتسم وغمض عيونه...استغربت انه فجاة ابتسم!!..وطنشت وراحت تنادي هاللي قاعد برا..
دلال:تفضل اخوي،صحـى السيد خالد
..قام وهو يطالعها باستغراب:تشبهين..وفكر وهو يحلل وقرا البطاقة اللي حاطتها..اوه!،سبحان الله وشهالصدف،انتي اخت فـارس
دلال..رفعت حاجب:نعـم اخوي!!
طلال..ابتسم:انا طلال اخو الرزان،وانا متأكد انج تعرفين مين الرزان
دلال..تفاجأت:اهـاااا،انا اقول اشفيه الأستاذ خالد يطالعني بهالطريقة..ترددت..ممكن سؤال!
طلال:تفضلي
دلال:صاير معاكم شي؟؟
طلال..اخذ نفس عميق:جـدتي توفت
دلال..تغير وجهها:آسفة،عظم الله اجركم
طلال:لا ولايهمج،اجرنا واجرج
دلال:عن اذنك،انا بطلع بس بيجي الدكتور المناوب يشوفه،بس مافيه شي تطمن ان شاء الله بس يخلص المغذي يقدر يطلع
طلال:يعطيج العافية
دلال:الله يعافيك،هذا واجبي،مع السلامة
طلال:مع السلامة
دخل ولقاه نايم..ارتاح انه اخيراً نام..وفكر شلون الحين يقول للرزان اللي صار لها ساعة تدق عليه ،
اكيد معصبة ومتوترة..وحالتها حالة..الله يعين
،..طلع جواله..وبعد ثواني من التردد دق عليها...
كانت على اعصابها..وهنادي تحاول تهديها..
الرزان:اذا للحين مادق يعني صاير شي
هنادي:لاتقولين كذا،ان شاء الله خير،اذكري الله بس وادعي لها..انتبهت ان الرزان تغير وجهها فجأة!!..الرزان اشفيج؟؟
الرزان..كانت تتألم بس تظاهرت بالعكس:لا ولاشي
هنادي..تخرعت:شلون ولا شي!!،وجهج مصفر كأنج شايفة ميت؟!
الرزان..مسكت آهة الم كانت بتطلع منها:بس الم خفيف..(والله خايفة تكون هاذي آلام الطلق..والله مصيبة لو تكون كذا)..وبيروح
هنادي..شكت:ان شاء الله
الرزان..صرفت:هذا وينه للحين مادق!!
هنادي:صبـري شوي و..رن جوال الرزان..شفتي دق
الرزان..على طول ردت:طلول مالت عليك اقولك طمني تخليني ساعة وانا احاتي
طلال..(الله يعين..شقولها هاذي!!):الرزان من البداية بصراحة،خليج عاقلة وناضجة ولا تبالغين في ردة فعلج
الرزان..حبست انفاسها(شاللي صار ياربي!!):طلال بدون مقدمات،وش صار؟؟،جدتي بخير؟؟
يتبع ,,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك