بداية الرواية

رواية جيتك امانة انقذيني -9

رواية جيتك امانة انقذيني - غرام

رواية جيتك امانة انقذيني -9

الرزان..رفعت راسها طالعت فيه بعدين نطقت:الرزان
سعد:الرزان!،اسم غريب وحلو عاشت الأسامي
الرزان رفعت حاجب،
وكاني طلبت رايه!!..وبعدين وش دخل اسمي تمدح فيه!!،..
سعد:طيب آنسة الرزان...
الرزان..قاطعته وهي متنرفزة:ماله داعي آنسة تخلي اسمي ثقيل
خالد كتم ضحكة..
سعد..ابتسم:براحتج،الرزان عندنا ساعة يومياً ماعدا الجمعة لمدة ثلاث اسابيع راح تظلين فيها ساكتة كذا!!،ترا كذا ماراح نقدر نحل شي!!
الرزان..(وش تبيني اقول يعني!!..صج...) وقالت بحدة:وش يفترض اقول!
خالد..ضحك ضحكة مكتومة ودرى انها تنرفزت فقام:انا عطشان بروح اشرب ماي
سعد:وين!،استريح الحين اطلب لك ماي
خالد..ابتسم:لا مشكور،بعدين بروح اشوف الثانية اللي برا لاتكون فجرت في شي
سعد..ابتسم:براحتك
الرزان كانت تخز في خالها وهو "صفطيشن" ،
طيب ياخالد طيب انا اوريك بالبيت انا اوريك

،..طلع خالد وظلت هي مقابلة سعد اللي جالس بكنبة صغيرة قدامها..كان ينتظرها تتكلم!!..
سعد:احم احم،يعني انتي راح تظلين ساكتة فعلاً!
الرزان..(شكله هو اللي يعاني من مشاكل نفسية!..وش يبيني اقول!!):وش يفترض اقول!
سعد..عدل جلسته ونظارته:قولي أي شي،وابدي من وين ماتبين..سكتت وماردت..طيب اسألك انا ،وين تدرسين؟؟
الرزان..(وش هالسؤال البايخ!..تكلم بزرة انت!!): في لندن
سعد:اهـا بعثة يعني؟!
الرزان:مع ارمكوا
سعد:ماشاء الله،وش تخصصك؟؟
الرزان:هندسة كيميائية
سعد:حلو،صعب ولا سهل؟؟
الرزان:لا كذا ولا كذا يمشي الحال
سعد:الحمدلله،شاللي خلاك تدرسين برا؟؟
الرزان:اهر ب او اتهرب
سعد..(أخيراً وصلنا للموضوع):تهربين من ايش؟؟او تتهربين من ايش؟؟
الرزان: اهرب،اهرب من الحياة الجحيم اللي كنت ولا زلت اعيشها هنا،واتهرب من امي والزواج
سعد:اشفيها الحياة هنا؟؟
الرزان:جــحيـم
سعد:شاللي خلاها كذا؟؟
الرزان:امي اول شي،وبعض الناس...
استمروا ساعة سؤال وحكاية..سؤال وحكاية..الين ماخلصت وهي واقفة عند الباب..
سعد:هاذي الحبوب راح تسهل عليج النوم،بس لمدة اسبوع،مانبي تتعودين عليها..فتح لها الباب.. لاتنسين تجيبين اللي قلت لج بكرا ضروري
الرزان:ان شاء الله،مع السلامة
سعد:مع السلامة
كانت تنتظره يسكر الباب عشان تتغطى وتمشي..لكن ماسكره..فمشت و بعد خطوات قطت الشيلة على وجهها..
وطلعت من الممر اللي فيه المكتب..كانوا خالد وريما ينتظرونها بالسيارة..
استغلوا الوقت وراحوا "جو فريز" اللي على الكورنيش لانه قريب تقهووا وحلو ورجعوا..
بعد مارجعت البيت ظلت بالغرفة هي وريما يسولفون..وجاتهم هنادي..
ريما:امانة امانة،شلون شكله!!
الرزان:بـلا فضاوة
ريما:يـلا عاد،مزيون ولا شين؟؟ولا عادي؟؟
الرزان:مادقـقـت!!
هنادي:انا من سنين شفته ومازلت اذكر،كان طويل وعريض مرة وعادي لامملوح ولا شين احلى مافيه عيونه الخضر!
الرزان:من صج !ترا مادققت،بس اللي انتبهت له فعلاً انه طويل وعريض
ريما..وهي تسوي نفسها مسكينة:وعاد احنا اقزام ومساكين فنشوفهم عماير
هنادي..ضحكت:لا عاد احنا مو اقزام،يمكن انتي قزمة عشان اقصر منا شوي
ريما:لا والله،استريحوا بس يالطوال
هنادي..ضحكت:غصباً عنك،الا اقول رزون بتروحين كل يوم!!
الرزان:كل يوم الا الجمعة
ريما:ياحظك بتطلعين كل يوم
الرزان:وين رايحة انا اتمشى!!
ريما:عالأقل بتطلعين،وانا محبوسة
هنادي..ضحكت:كلن على همه سرى
ريما:بـالله!،وانتي ياآنسة وش همـج؟!
هنادي..ابتسمت:الحمدلله لحد الحين،قلبي خالي الهم
ريما..ضحكت:اما عني،قليل الهم،بس الرزان اكسترا هم،مليان للأخير
هنادي..ضحكت:يعني كثير الهم!
الرزان..ضحكت:حليب!!ولا لبن!!
ريما: بـلا هم بـلا كلام فاضي،خلونا نرقص بس..راحت عند الاستريو..رزون وين سي-دي تركي الجديد؟؟
الرزان:مع السي-دي"ز،في الألبوم الأخضر
فتحت ريما البوم السي-دي"ز الأخضر وحطت سي-دي تركي "رسـايل" في الاستريو..
{اسمـع اقولك على فكرة..الحين فرقاي مو بكرة
منك تعلمت كيف اكره..
وان جيت بترجع وصالك..بقول ذا بدري على اشكالك
كذاب ايوا ومية كذاب..يـلا توكل وصك الباب
منك ترا خاطري قد طاب..
وان جيت بترجع وصالك..بقول ذا بدري على اشكالك... }
الرزان:حطي رسايل
ريما:لا وع وش رسايله
الرزان:اقول استريحي وهاتي الريموت
ريما..مسكت الريموت وخبته وراها:فيج خير خذيه مني
الرزان:قال فيج خير قال!!،هاتي بس احسن لج
ريما..ضحكت:فيج خير!،تعالي خذيه
الرزان راحت ومسكت يدها وحاولت تاخذ منها..وقعدت ريما تدور بالغرفة وتنطط فوق السرير..
وصاروا هنادي من جهة تحاول تمسكها والرزان من جهة..بعدين طلعت ريما من الغرفة..
وقعدوا يركضون بالصالة ويدورون..ونزلوا تحت وهم يركضون ويصرخون على بعض ويضحكون..
الا يد قوية تسحب رزان وجاها كف قوي على وجهها..
الرزان..رفعت عينها:مـامـا!
نهلة:خيـر ان شاء الله وين احنا قاعدين!!،بدال ماتقعين تصارخين وتراكضين كنج عنز كنتي جيتي ساعدتيني بالمطبخ..الرزان حاولت تتكلم..ولا كلمة مابي اسمع منج شي،ذلفي على غرفتج
الرزان ركضت فوق لغرفتها..اما هنادي وريما مصدومين شلون قدرت امها تسوي كذا وقدامهم!!..
ريما لأول مرة بحياتها طالعت عمتها باحتقار وركضت لفوق و وراها هنادي..دخلوا الغرفة ماشافوها!!..
سمعوا صوت بالحمام "الله يكرمكم"..
ريما..دقت الباب:الرزان!،رزون حياتي مو زين تصيحين بالحمام طلعي..بدون رد..رزون الله يخليج مو زين تصيحين بالحمام!!،يـلا عاد ماعليج منها،طنش تعش تنتعش
هنادي..قربت:رزون ولايهمج مصيرها بيوم من الأيام تتغير،يـلا عاد غسلي وجهج وطلعي مايصير تتركين ضيوفج لحالهم وبدون ضيافة،عيب عليج
ريما:مرة ثانية ماني جاية عندج ماضيفتينا وين كرم الضيافة عند الحساوية!!
الرزان ابتسمت..وقامت غسلت وجهها..وعدلت نفسها وطلعت..
هنادي:اخيراً رحمتنا البرنسيسة
ريما:امشوا نطلع نتعشى برا!!
الرزان:نعم!،خبلة انتي بعد اللي جاني قبل شوي،لاسوري مابي آخذ لي كف ثاني
ريما:انا باكلم ابوي واخليه يكلمها مابتقول شي،ادق على اماني وادق على غالية الحين ونروح لسلوم وامول، هم رايحين الراشد نروح نتعشى في فدركرز
الرزان:يـلا دقي عشان اذا رضى ادق على غادة بعد تجي
هنادي:أي والله من زمان عن البنات!،حسافة لو سديم واصيل موجودين
ريما:وينهم!!
الرزان: امس سديم راحت القصيم،واصيل راحت الكويت
ريما:ياحظهم
الرزان:لا حول ياهاذي!،يـلا دقي على خالي
ريما:ان شاء الله،لا تدفين بقوة
ضحكوا..وافق خالها وكلم امها واقنعها تطلع الرزان مع البنات..ورضت بعد حنت امها فوق راسها ..
طلعوا البنات مع سواق هنادي ومروا على اماني وبعدين غالية وبعد وعد ورغد اللي امهم بالعافية رضت تخليهم يطلعون ..
خصوصاً انه وسط الأسبوع وهم ثالث ثانوي >>مادري ثالث ثانوي يعني مايعيشون!!<<..
قابلوا سلمى وامل عند البوابة وراحوا تعشوا في فدركرز بعد جولة قصيرة على بعض المحلات..
وقابلتهم غادة هي واختها خولة في المجمع..واللي طلعوا من زمان في المجمع جايين يتسوقون..
رجعت البيت وهي شايلة اربع اكياس بكل يد..طالعت ساعتها.."الساعة 10:30 ليلاً"،
ادخل من المطبخ واروح ركض للغرفة احسن لي..واسلم لي
،دخلت من الباب الخلفي حق المطبخ وبشويش..راحت للدرج وصعدت بشويش..ولما وصلت ركضت للغرفة وسكرت الباب وراها..
وقطت الأكياس والشنطة وقفلته..واخذت نفس وابتسمت لنفسها..فصخت نقابها وعبايتها وعلقتهم..
بدلت ملابسها ببجامة قطنية خفيفة بس كم طويل وشغلت الدفاية..غسلت وجهها واسنانها..وطلعت اللي شرتهم من الأكياس ورتبتهم..طالعت الساعة " 11:25ليلاً"..
طلعت لها حبة من الحبوب اللي وصفهم لها الدكتور..شربت ماي وبلعت وحدة..

انسدحت عالسرير تقرا قصة قعدت تضحك على سخافتها..ونامت وهي تـبـتسـم..

[..الجـزء الحـادي عشـر..]



مر اسبوع والرزان كل يوم تروح للدكتور..خالد حس بأنها تحاول قد ماتقدر تحسن نفسها..
وكان واضح تغير اسلوبها تلقائياً..في التصرفات..في الكلام..حتى في اللبس..
صارت تتحمل وتصبر على امها اكثر..وامها فاجأتها بأنها رخت الحبل شوي..ماعادت توقف لها في الرايحة والجاية..
وتسمح لها تطلع مع صديقاتها بس مع وحدة من خواتها..بس الرزان اصلاً ماتطلع مع صديقاتها كثير الا اذا وصلها خالها ولا اخوها ورجع ياخذها..
لانها تكره تطلع مع السواق وترجع معاه حتى لو في وحدة معاها..وماعادت امها تقط كلام يسم البدن زي قبل كثير..
وبطلت الضرب والكفوف مرة وحدة..وبكذا تحسنت نفسية الرزان كثير..صحيح مازال لأمها بعض الحركات بس هالحال احسن ...


اليوم الثلاثاء..30/12/2008..2/1/1430


...


الساعة 6:30 مساءً


...




تسمع اغنية "رنـة" الجديدة لـ سلمان حميد..وهي تنتظر خالها بعد ماطلعت من عند الدكتور..
حاطة رجل على رجل وتهز رجلها اليسار اللي حاطتها فوق اليمين..
وتحرك اصابعها الطويلة عالآيبود الوردي>>اللي صلحه خالها..بعد ماطاح عليه الكوب<<..
لابسة شوز "burberry"الذهبي وجنبها الشنطة اللي معاه..حولت الى اغنية"اللي لقا احبابه" جديد راشد الماجد..


{يـادنيا يـاغرابـة..يـادنيا يـاغرابـة
اللي لقى احبابه نسى صحابه
يـادنيا يـاغرابـة..يـادنيا يـاغرابـة
كان العشم يبقى لي ويموت فيني لحالي
لا ماطرى في بالي كذا الغالي ينسى ويطول غيابـه
اللي لقى احبابه نسى صحابه
يـادنيا يـاغرابـة..يـادنيا يـاغرابـة...}
ولأن صالة الانتظار فاضية خذت راحتها..وهي تطق بأصابعها >>مو بالطريقة السوقية!!..لا.. تطق الابهام بالسبابة..مصدرةً صوتاً..خخخخخ..من صج البنت اخذت راحتها!<<..
وودها لو تقوم ترقص لانها تحب هالأغنية>>من صجها!!..بس الصراحة الأغنية ترقص..خخخخخخ<<..
كانت متغطية بالنقاب..لانها صارت تجي بالنقاب وتشيله اذا دخلت داخل!!..
اما هو كان داخل..وصديقه طالع يلاقيه..تلاقوا بنص الطريق عند الاستقبال..وبعد سلامات..
:وش الأخبار بوتركي يقولون قررت تتزوج خلاص؟!
:هالدب عبدالملك متى بيعرف يسكت!!،أي والله ماني قادر استحمل ضغط ابوي عليّ زيادة،وقلت تجي مني واختار اللي ابيها،احسن ماتجي منهم ويختارون على كيفهم
:فارس،قول الصج وش ناوي عليه؟؟
فارس..طالع بعيد عن سعد وهو يفكر:كل خير ان شاء الله وبـ..سكت فجأة لما شافها بس مااهتم..بتعرف بوقتها..ورجع طالع فيها وعرفها..الرزان!!..طالع في سعد..مريضة عندك؟؟
سعد..طالع بنفس الجهة وابتسم:الرزان أي،تعرفها؟؟
فارس..سرح بعيد:أي،صديقة هنادي،واكيد قالت لك انها تدرس بلندن فشي طبيعي نلتقي احياناً..والتفت بيروح..انا بروح اسلم
سعد:استريح،بس تبي تفشل البنت!
فارس..ابتسم:احسن خلي تحس على عمرها،بس ناقصها تقوم ترقص!
سعد..ضحك:وانت وش دخلك!،تعال بس نقعد بالمكتب
فارس:لا والله مااروح قبل مااسلم،عيب بينا عشرة شهور واقل شي اروح اسلم
سعد..ضحك:كشخة ياللي تعرف الواجب والذوق!
فارس..ابتسم ورفع حاجب:غصباً عنك
سبحان الله وشهالصدف اللي خلتنا نلتقي اليوم!
،وراح عندها..هي ماانتبهت انه وقف قريب كانت مندمجة مع الأغنية..فتقدم وطق اصابعه قدام عيونها..تفاجأت..
الرزان..رفعت راسها:فـارس!
فارس..رجع ورا وهي وقفت:هـلا والله،شـخبارج؟
الرزان..ارتبكت:بخير الحمدلله
فارس..تجرأ وسأل اللي بخاطره:وش جابج هنا؟،عسى ماشر!
الرزان..طالعته بحدة وخزته:ابداً..وتكلمت بحـدة..عقد نفسية واحاول اعالجها
فارس..ابتسم:الحمدلله وأخيراً استوعبتي ان عندج عقد نفسية
الرزان..انقهرت من سخافته:نعم!..شالت شنطتها بتروح مع انها دارية ان خالها ماجا..عن اذنك خالي ينتظرني
فارس..التفت وراه لـسعد وغمز له:خالد!،توني امس شايفه بس وحشني،سلمي لي عليه
الرزان..طالعته من فوق لتحت:يـوصـل
كان بيتكلم..بس مشت وطنشته..
الرزان..مرت من جنب سعد:مع السلامة دكتور
سعد..ابتسم:مع السلامة،موعدنا بكرا الساعة 4
الرزان:ان شاء الله
وطلعت من العيادة وركبت المصعد على طول..ومن حسن حظها خالها اتصل فيها وهي نازلة من المصعد..اما فارس قعد يضحك..
سعد..ضحك وياه:وش تستفيد يعني اذا نرفزتها!!
فارس..وهو يضحك:مادري بس كذا احب انرفز الناس
سعد..ضحك عليه:فيك حالة نفسية ويبيلك تتعالج
فارس:يـلا على يدك
سعد..ضحك:بس مشكلتك ماتحب تنرفز الناس كلها،بس تنرفز البنات!!
فارس..ابتسم:اشكالهم حلوة اذا عصبوا وقاموا يعطونك ذيك النظرات،يقالك يخزون!
ضحكوا..
سعد:تعال بس،بدال هالوقفة نروح نقعد بالمكتب
فارس:يـلا
وراحوا للمكتب وقعدوا..
سعد:قولي الحين مين سعيدة الحظ،او عفواً تعيسة الحظ اللي تبي تخطبها!!
فارس..ضحك:والله مو هي التعيسة انا اللي تعيس الحظ،ماراح اقولك اخاف منك تسوي لي فضيحة
سعد..استغرب وابتسم:اسويلك فضيحة ليش!!،مسوي شي؟
فارس:ابد بس اللي بخطبها...
سعد:وشفيها!،مين تكون يعني؟
..الرزان بالسيارة شغلت سي-دي راشد الجديد..شرت سي-دي"ز جدد لخالها لانها ملت من الغبار اللي عنده..وحطت "الريش"..
{والله وطلع لك ريش يالزين وصرت اتطير
الملح ويا العيش ماله معك تأثير
ربينا دلعنا وقلنا النهاية خير
وآخرها بايعنا ورايح لحضن الغير


* * * *
مقيولة وانت ادرى وتعرفها يالمزيون
احذر عدوك مرة وحبيبك مليون
ماجات في بالي العب على المضمون
سلمت لك حالي مااحسبك يوم اتخون...}
خالد..ضحك:بـالله هاذي اغنية الحين!!،اجل احذر عدوك مرة وحبيبك مليون!!،صار الحبيب هو العدو!!
الرزان..بجدية:معاه حق
خالد..طالعها بطرف عينه:وش اللي معاه حق فيه؟!
الرزان:انك تحذر حبيبك اكثر مما تحذر عدوك
خالد:وش هالمنطق الغبي!!،اجل ليش يحب!!يرتاح ولا يحب احسن
الرزان:هو بعد احسن واريح
خالد..طالع فيها:مافاد فيج العلاج عدل
الرزان ضحكت...بينما...في الجهة الأخرى مصدوم!!..
سعد:من صجك تتكلم!!
فارس:أي من صج،لاتفضحنا سعود واللي يعافيك،ياليتني مافتحت فمي
سعد..ضحك:لا مو كذا،بس من صجك يعني،صدقني ماراح توافق
فارس:ادري هي رافضة الفكرة اساساً،بس مو بكيفها
سعد:لا والله!هي اللي بتتزوج شلون مو بكيفها!!
فارس:مو هي بتضطر توافق عشان اللي بالي بالك،هي تبي احد يساعدها وانا ابي احد يساعدني خلاص كذا اثنينا نحل مشكلتنا
سعد:والله انك مو صاحي،وهي مالقت الا انت تساعدها!،بس خلني اقولك،ترا مو من صالحك ابد تاخذها غصباً عنها
فارس:شوف بعد مايصير كل شي رسمي احنا بنتفق،وكل واحد بيكون في حاله وماله دخل بالثاني ،انا مو غاصبها على شي
سعد:تـمزح!!،بـالله اذا كان لكل واحد حياته بعيد عن الثاني ليش سموه زواج!
فارس:هالزواج غير،هذا زواج لاسباب هادفة اكثر من الاسباب العادية التافهة اللي تخلي العالم تتزوج
سعد:الحمدلله والشكر،ماظن ان الواحد لما يفكر يكف نفسه عن الحرام يكون سبب زواجه سخيف! ،ولا لما يبي يجيب عيال ويكون اسرة يكون سببه تافه!،بس انا اشك في قدراتك العقلية هالأيام! ،ماانت فارس اللي اعرفه
فارس..تنهد:انت مو مستوعب الضغط النفسي اللي انا فيه،امي من جهة تحن تزوج وتزوج ابي اشوف عيالك...
سعد..قاطعه:طبعاً مسكينة خالتي بهالزواج ماراح تشوفهم ابداً
فارس..ضحك ضحكة مو من القلب:يمكن بعد عمر طويل ماتدري!،ماعلينا،ابوي بعد من جهة واحس العايلة كلها فجأة صارت تبيني اتزوج بعد سالفة سديم!!،خواتي كل مايشوفوني يكلموني عن فلانة وعلانة وهاذي حلوة وهاذي بنت ناس!!،خلاص انا ملـيت وفهمت الهدف من ورا هالألحاح وهو تـزوج حالاً بالاً!!
سعد..ضحك عليه:لهالدرجة!!
فارس:واكثر،ماتتصور شلون صايرين،ماصرت اقعد بالبيت وقررت انتقل لبيتي احسن لي
سعد:انتقلت واخيراً؟!
فارس:أي الحمدلله قبل امس نقلت اغراضي وامس اول يوم كامل لي بالبيت،فاتك ابوي شلون عصب وامي طنشت ولا عطتني وجه مـرة
سعد:الله يعينك..وابتسم..بس شكلك نويت عالزواج لانك خفت تجلس بالبيت لحالك
فارس..ابتسم:يعني يقالك هي اللي بتوخر الخوف!!،انا اخاف اقعد معاها بمكان لحالي تستفرد فيني وتذبحني!
سعد..ضحك:يـلا بس،صج ماتستحي
ضحـكوا...وقف السيارة قدام البيت..
خالد..طالعها:يـلا نزلي وش تنتظرين!!
الرزان..حطت ايدنها على خصرها:بـالله وين كنت سرحان!!،صار لي ساعة وانا اقولك ابي اروح الراشد!!
خالد..ضحك وحك راسه:يوه والله كنت افكر بشي مهم،وش تبين من الراشد؟؟
الرزان:ملكة صديقتي بكرا وابي اشتري شوز للفستان حقي،وابي اشتري هدية لها بعد
خالد:حلـو،يعني مطولة؟
الرزان..ابتسمت:تقدر تقول
خالد..ضحك:تقدر تقول!،اجل مطولة بقوة،يـلا امرنا لله نوديج مو انتي القلب ماينرد لج طلب
الرزان..ضحكت:مـرسو خلودي
خالد..ضحك:خـلودي ومرسو!للمصالح بس،بنات آخر زمن
الرزان قعدت تضحك..وطفت السي –دي لانه اذن..وصلوا المجمع وراح كل واحد منهم يصلي.. ورجعوا التقوا..داروا المجمع الى الساعة 9:15 وبعدها طلعوا وراحو يتعشون في فرايديز اللي بالكورنيش على حساب خالد >>انا ابي مثل هالخال..خخخخ..مصالح بس<<..
ودخلوا البيت الساعة 11 بالضبط..
خالد..وهم يصعدون الدرج:احـس رجولي متكسرة،وركبي ماتشيلني
الرزان..ضحكت:هذا الكرش ومايسوي
خالد..طق بيده على معدته المشدودة من كثر مايتمرن:الحين هالرشاقة كلها وتقولين كرش!!
الرزان..ضحكت:من زود رشاقتي اشوف الكل بكرش
وحركت كتوفها بدلع..
خالد..رفع حاجب:رشاقتج!،تقصدين عصاقيلج..وباستهزاء..ثقة عمياء بعد!،قال رشاقة قال، روحي مناك يالهيكل العظمي
الرزان..ابتسمت:حرام عليك،والله زايدة كيلو هالأسبوع
خالد:والله!،زين زين في امل يعني
الرزان:لا وشو مابي ازيد اكثر،تخيل ارجع زي قبل،كان انتحر
خالد..ضحك:خبلة وتسوينها،اصلاً هالكيلو اللي زاد ماسوى شي!
الرزان:عشان طولي زاد،تخيل آخر مرة قسته امس بالعيادة طلع 160!!
خالد..ضحك:تلاحقي عمرج اجل وزيدي كم كيلو،وانا اقول اشفيج ممدودة ومفعوصة!!
الرزان..ضحكت:أي والله،بفكر ازيد كيلو كيلوين واصير 49 عالأقل
خالد:وش 49!!صيري 50 ويـالله يفيد فيج
الرزان:لا لا،it's to over
خالد:بالعكس بيصير في فرق بين طولج ووزنج 10 يعني زين وحلو
الرزان:49 احلى
خالد..حط الأكياس لها عند الباب لما فتحت غرفتها:براحتج،يـلا تصبحين على خير
الرزان:تلاقي الخير
راح غرفته..وهي شالت الاكياس وحطتهم عالسرير..فصخت عبايتها وقطتها عالسرير،
اففف يالحر!..مصدقين عمرهم ويقولون برد!..ماشافوا صعيق لندن والثلوج..افففف شكلي اليوم مصيفة مصيفة بهالحرارة،كانت لابسة بلوزة كمها قصير وخفيفة مع جينز،بس احلى شي الجينز ما يخلي الواحد يحتر..ولا كنت الحين مطبوخة من الحرارة
،ابتسمت وطلعت لها بيجاما قطن صيفية.. برمودا اسود ومخطط بأزرق والبلوزة كم "شبه كت"زرقاء ومرسوم عليها ورود بالأسود..ودخلت تتسبح..وطلعت واحد يدق عالباب!!..عدلت روب الحمام حولها وفتحت الباب..
خالد..انفجع:انتي خبلة تتسبحين بهالبرد!!
الرزان..تحركت لعند المراية وهي تنشف شعرها:أي برد انتوا قاصين على عمركم،انا انطبخت من الحرارة!
خالد..راح يشغل لها الدفاية:صج صج خبلة..وطالع البيجاما اللي حاطتها فوق المكتب..لا وبتلبسين هالبيجاما!!،اشك بقوة انج بكامل قواج العقلية!!
الرزان..ضحكت:والله حر،انت ماعشت صعيق لندن وثلوجها هالجو هناك يتعبر ربيع وحر بعد!! ،ماعلينا وش عندك؟؟
خالد..ضحك:نسيت اقولج شي مهم،بس بروح وبرجع لين ماتلبسين..وهو طالع..تبين اجيب لج شي من المطبخ!!
الرزان:شـاي اذا سمحت
خالد..ضحك:صرتي من الانجليز فعلاً،مايمر يوم ماتشربين فيه اكثر من ثلاث اكواب شاي!!
الرزان..ضحكت:من عاشر القوم
خالد ضحك وطلع..سكرت الباب ولبست بجامتها ومشطت شعرها..ودق الباب..
الرزان:تفضل،مفتوح
خالد..دخل وبايده كوب وكاس ماي:كنت ابشرب شاي بس غيرت رايي لان وراي دوام
الرزان..ضحكت:يعني الحين الشاي بيسهرك!!
خالد:انا اتأثر بسرعة من الكافيين،مو زيج تشربين كوفي وشاي من هنا وتنامين من هنا!!
عطاه الكوب وجلس على كرسي المكتب..شالت هي الأكياس من على السرير ومدت له مشطها..
الرزان:اجلس عالسرير ومشط شعري
خالد..ضحك:حنيتي لتسريحاتي الخطيرة
الرزان..ضحكت:بقـوة
خالد..جلس عالسرير وجلست هي عالأرض قدامه وقعط يمشط شعرها:وش تبين اسوي فيه؟؟
الرزان:أي شي،يـلا طيب قول وش عندك؟
خالد..مشط شعرها وبدا يجدله "جديلة-ظفيرة فرنسية":الموضوع ومافيه بدون أي لف ودوران انج انخطبتي
الرزان..مااهتمت لانها انخطبت مرتين قبل ورفضت:طيب ويعني!!
خالد:هالـمرة مو زي المرتين الماضية
الرزان:شاللي غير فيها؟؟
خالد:امج ماراح ترضى بالرفض أبداً
الرزان:لـيش؟؟
خالد:لان اللي متقدم لج ماينرفض بسهولة
الرزان:ليش ،مين يطلع أمير مثلاً؟؟
خالد:بالنسبة لأمج هذا أمير
الرزان:مين يكون اللي سحر امي وسلب لبها؟؟
خالد..ابتسم:فـارس
الرزان..مااستوعبت:فـارس بلا جواد!،فارس ايش يعني؟
خالد:فـارس صـالح الـ....
الرزان تحركت من مكانها من الصدمة..
خالد:ثبتي مكانج الحين تخترب الجديلة!
الرزان..رجعت تعدلت وضمت ركبها لصدرها:فارس ماغيره!
خالد:ايـوا
الرزان:وش يبي فيني،يعني وكأنه مايعرف اني هربانة من الزواج ومابي اتزوج!،وبعدين كيف يتجرأ يخطبني وهو كان يحب صديقتي!!
خالد..فكر:ماظن انه كان يحبها،وبعدين شكله يعرف ان بينج وبين امج مشاكل وانه لو تقدم هي ماراح ترفضه وبتقنعج توافقين
الرزان..سكتت فترة من القهر:سخيف وماعنده سالفة،وماعنده احساس..تذكرت شي.. وعلى مااظن طلال كان يعرف من قبل؟!
خالد:أي هو كلمني وكلم طلال من قبل ماترجعون،وانا كلمت عادل وقلتله
الرزان:ماشاء الله!،بقى احد في العايلة مادرى!!
خالد:لاتزعلين مني بس انا ماكان لي داعي اجي اقولج انه كلمني ويبي يخطبج قبل لايكلم اخوانج وخوالج رسمي
الرزان ظلت ساكتة،
يعني شالهدف!!تخطط وتكلم وانا آخر من درى..وش تبي فيني!! اشمعنى انا بالذات..يدري ان أي وحدة بمستواه ممكن توافق عليه بسهولة..يجي يخطبني انا وهو داري برفضي لفكرة الزواج وغير كذا كيف وافقوا اهله وانا مو من مستواهم!!..هو من الـ... الهاي وانا من الـ.... العاديين!!..وراك شي يافارس وانا حاسة
،خلص خالد شعرها..
خالد..قطع افكارها:خلصت شعرج،وش بتسوين؟،ترا هو طالب يشوفج قبل
الرزان..قامت وتخصرت:نعم!، وش يشوفني بعد!!ماشافني يعني في لندن وشبع من شوفتي!! يستهبل حضرته
خالد..ابتسم:في فرق لما يشوفج بالحجاب وبدون زينة؟،واكيد بدون كشخة كعادتج،ولما يشوفج كاشخة ومتعدلة،يمكن يغير رايه بعدين
الرزان:لا والله!،انا بسويها بس عشان يغير رايه انزين
خالد..ضحك:لاتتهورين،اسمعيني انتي فكري،وهو طلب الشوفة يوم الخميس،بعدها فكري اكثر على راحتج وخذي قرارج
الرزان:انت داري ان القرار مو لي،شوفة وبشوفه غصباً عني بمباركة امي العزيزة و الموافقة بتصدر وغصباً عني،وش فايدة التفكير يعني بس اصدع راسي عالفاضي!!
خالد:خليه يشوفك انتي طيب،بعدين فكري عدل واستخيري،يمكن ترتاحين له ماتدرين،اذا ماحصل ماراح نخليك تتزوجينه غصب انا بكلم امك كلنا بنقنعها برأينا،بس انتي عطي نفسك فرصة وفكري،واتطمني زواج بالغصب ماراح يصير،يـلا تعطليني وراي شغل بكرا
الرزان..ابتسمت له"بس مو من قلبها":تصبح على خير
خالد..وهو طالع:وانتي من اهله
الرزان ماتحركت من مكانها،
وش صاير!!..ماني فاهمة شي!!..كان يحب صديقتي اللي بتملك بكرا..وجاي يخطبني!!..اثبتوا هالاثنين نظريتي في الحب..انه كلام فاضي وماله أي اساس في الواقع!!..مجرد اغاني نترم فيها..وكلام نردده..وترهات نتحلم فيها!!..خلي كل شي لبعدين هذا مو وقته..وراي اشياء كثيرة اسويها بكرا
،شالت الاكياس وطلعت هدية سديم..شرت لها حلق كبير الماس واحجار كريمة ملونة..
حطته بعلبة كشخة وكيسة رزة وخلته فوق المكتب..وفتحت اكياسها وطلعت شوزها و جهزته مع الاكسسوارات اللي بتلبسها وطلعت الفستان..
بكرا جدولها مزحوم جداً..يبيلها تستشور شعرها ..وتروح للدكتور!!..
ومع كذا لازم تكون عند سديم بدري!!..قعدت ترتب جدولها وتحسب الوقت..


وفركت عيونها بتعب وهي..تبــتسم!


[.. الجـزء الثـاني عشـر..]



31/12/2008..3/1/1430


آخـر يوم في السنـة الميـلادية!..احس في اشياء كثير تغيرت فيني بهالسنة..شخصياً احسها للأحسن والحمدلله..بس مازالت في خيوط معقودة في حياتي ولازم تنفك..ضروري تنفك هالعقد..
اففففففف الى متى يعني بظل انتظر!!
،بس رفعت راسها الا نادتها الكوافير جا دورها..وهنادي تبتسم لها وتأشر عالساعة...


ســابقــاً>>


صحت الرزان من النوم الساعة 9 الصباح..اخذت شاور عدل وتفركت الين ماصارت تلمع"هههههه" ..
الساعة 12 راحت للمشغل وحفت وجهها وسوت بدكير ومنكير..وبالمرة نصحتها ريما اللي كانت رايحة وياها تقص شعرها..
طالعت شعرها بالمرايا..شافته طول اكثر وشوي وبيوصل لنص ظهرها..
الرزان:يوه طول مرة،يبيله حش بقوة
ريما:لا لا انا ماقصدت تحشينه،انا قصدت انه يبيله قصة تحدد شكله بدال ماهو كذا بدون قصة

يتبع ,,,,

👇👇👇
تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -