بداية الرواية

رواية جيتك امانة انقذيني -10

رواية جيتك امانة انقذيني - غرام

رواية جيتك امانة انقذيني -10

صحت الرزان من النوم الساعة 9 الصباح..اخذت شاور عدل وتفركت الين ماصارت تلمع"هههههه" ..
الساعة 12 راحت للمشغل وحفت وجهها وسوت بدكير ومنكير..وبالمرة نصحتها ريما اللي كانت رايحة وياها تقص شعرها..
طالعت شعرها بالمرايا..شافته طول اكثر وشوي وبيوصل لنص ظهرها..
الرزان:يوه طول مرة،يبيله حش بقوة
ريما:لا لا انا ماقصدت تحشينه،انا قصدت انه يبيله قصة تحدد شكله بدال ماهو كذا بدون قصة واضحة!!
الرزان:انا خاطري احشه مرة وحدة
ريما:لا عيوني!تبدين تصدمين الرجال اللي بيجي يشوفج بكرا
الرزان..ابتسمت:الله يمكن ينصدم ويغير رايه
ريما..ضربتها بخفيف:يالخبلة،وبعدين كانه ميت عليج يعني!!
الرزان:معاج حق،بعدين هذا الانسان احسه لو وشو اذا حط بباله شي ماحد يقدر يغير له رايه ابدا
ريما..ابتسمت:علاقتكم قوية ماشاء الله
الرزان..ضربتها:انثبري مكانج،عادي كل مابينا مثل أي شخصين يعرفون بعض سلام وسؤال عن الحال وسوالف عادية،يعني ماحنا قراب من بعض
ريما:انا ماني فاهمة مدام يعرفج،اكيد يعرف دفاشتج واسلوبج اللي يجيب الهم..ضربتها الرزان مرة ثانية..آآآي وهذا اكبر دليل على دفاشتج،انا متاكدة انه راح يندم بدال المرة مليون لانه خطبج وفكر فيج اصلاً
الرزان..ضحكت:اللي يسمعج يقول سهران الليالي يفكر فيني!!،يـلا بس
ريما..ضحكت:تعالي بس عشان تقصين شعرك،وماراح تحشينه مفهوم، بس تضبيط
الرزان..ابتسمت لها:ان شاء الله عمتي،طيب وش تبيني اقص؟؟
ريما:صج يصير انا اختار لج القصة بكيفي!!
الرزان..جلست على كرسي واشرت للكوافير تجي:اكيد براحتج العبي بشعري
ريما..نقزت من الفرحة:واااي وناسة،اول مرة احد يعطيني وجه
الرزان..ضحكت:يدرون ماتنعطين وجه
ريما..ضحكت:لاتخليني اخليها تخرب لج شعرج
جات الكوافيرا وقالت لها ريما عن القصة اللي تبيها للرزان..نفس قصة تولاي بمسلسل"لحظة وداع"..
ستريت بس مدرج من قدام من الجهتين والغرة ستريت تحت الحواجب بالضبط..
ريما..طالعتها بعد ماانتهت الكوافير:كذا تمام،طالعة تجنن عليج القصة،والغرة غطت جبهتج العريضة،من حظج ان شعرج صار ناعم ومايحتاج تستشورينها
الكوافير:أي ماشاء الله شعراتك بدون تضبيط بيجننوا
ريما..قربت من الرزان وهمست لها:قل اعوذ برب الفلق
الرزان..ضحكت والتفت على الكوافير:يعطيج العافية
الكوافير:الله يعافيكي،نعيماً،ماشاء الله شو طالعة بتجنني
الرزان:الله ينعم عليج،تسلمين من ذوقج
ريما..سحبت الرزان ونزلوا تحت عند الاستقبال يدفعون:هاذي بتعطيج عين وش قصتها؟!
الرزان..ضحكت:يالشكاكة!،ماقالت شي المرة حرام عليج!
بعد مادفعوا الحساب لكل وحدة..جلسوا..
ريما:مين اللي بيجي ياخذنا؟
الرزان:خالد يعني مين
ريما:دقي عليه طيب وش تنتظرين؟؟
الرزان دقت على خالد..وقالها انه مشغول ومايقدر يجي ياخذهم..
الرزان:يقول مشغول،بتصل في طلال
ريما:خـوش خـوش
الرزان:وشـو؟؟
ريما:لاسلامتج،دقي دقي على اخوج خلصيني
الرزان دقت على طلال..و الأخير كان نايم..
طلال:من وين اجيبكم؟؟
الرزان:من مشغل لاميزون بالعقربية ماتعرفه!!
طلال:الا عرفته،انتوا مين وداكم؟؟
الرزان:خالي عبدالرحمن وصلنا
طلال:اهـا،اوكـي انتوا مخلصين يعني؟
الرزان:أي
طلال:خـلاص نص ساعة واكون عندكم
الرزان:اوكي،يـلا مع السلامة
طلال:مع السلامة
سكرت الرزان..
ريما:بيجي؟؟
الرزان:أي
ريما:قهر ناس عايشه بنعيم ونايمه؟،وناس تراكض باشغالها ومدارسها وجامعتها
الرزان..ضحكت:وانتي وش حارج!،اخذتوا اجازات اكثر منا ومستكثرين هالشهر علينا!!
ريما:احنا اجازتنا مقطعة اما انتوا مرة وحدة شهر!!
الرزان..ضحكت:قولي ماشاء الله
ريما:قومي بس نطلب شي وناكل لين مايجي اخوج،انا رحت الجامعة بدون ما آكل شي
الرزان:الله الحين الساعة 2 وانتي من الساعة 7 مو مآكلة شي!!
ريما:شسوي انا مو مثل بعض الناس...
الرزان..سكتتها:بس بس،امشي بغديج على حسابي
وراحوا قعدوا عند الكوفي وطلبوا لهم غدا..بعد ربع ساعة دق الجوال..
الرزان..طالعت جوالها:يوه هذا طلال داق!
ريما:لااله الا الله ماامداه يوصل في ربع ساعة!!
الرزان..ردت:هـلا طلال
طلال:جالسة تاكلين؟
الرزان:أي من صحينا ما اكلنا شي فاستغلينا الفرصة
طلال:كم بقى لكم وتخلصون؟؟
الرزان:يمكن نص ساعة!
طلال:اجل انا بروح مجمع الظهران اتغدى،واذا خلصتوا عطيني مس كول اوكي؟
الرزان:اوكي
طلال:يـلا مع السلامة
الرزان:مع السلامة
وسكرت..
ريما:هـا وصل؟؟
الرزان:ايه،بس بيروح يتغدى في الظهران،واذا خلصنا بيجي
ريما..ضحكت:ايوا ايوا حق القز الظهران
الرزان..ضحكت:مااسمح لج تقولين عن اخوي كذا،مسكين بيروح يتغدى،وبعدين يقز مين!!مين يروح الظهران هالوقت!!
ريما:ياسلام،اليوم اربعاء ونص العالم يروحون يتغدون هناك
الرزان:عليه بالعافية خل يقز بكيفه انزين
ريما:لا والله!!
خلصوا غداهم بعد مااذن العصر..وجاهم طلال بعد الصلاة..وصلوا ريما بيتهم..وراحوا البيت..
الساعة3:30..جهزت اغراضها عشان بتلبس بالمشغل وبتحط مكياجها هناك بعد..
هنادي هي اللي بتمر عليها مع اختها دلال وبيروحون مع بعض المشغل..وهناك بتنتظرهم ريما ويطلعون من المشغل مع بعض..
حطت اغراضها في كيسة كبيرة..ولبست عبايتها ونقابها..وشالت شنطتها الحمراء وشالت كيسها وبسرعة لسيارة خالد اللي ينتظرها..
خالد:لامابغيتي!!
الرزان..ابتسمت:والله محتاسة بهالأغراض
خالد..طالع بالكيس مفجوع:بـالله هذا وين بتحطينه بالعيادة؟؟
الرزان:مادري بخليه عند نورهان اللي بالاستقبال
خالد:خـوش!،اهم شي مانسيتي أي شي؟؟
الرزان:لا الحمدلله شيكت مرتين على الأغراض
خالد:مشينـا اجل
الرزان:مشينا
وشغلت آخر سي-دي لـ طلال سلامة..وحطت اغنية "انت لي"..
خالد:غيريه،وع ماحب اسمع لهالأنسان مرة
الرزان:اسمع هاذي حلوة
خالد:وع،غيريه غيريه
واضطرت تغيره..شغلت سي-دي لـ سلمان حميد فيه اغنيته المشهورة "لحن المفارق"..
{يمكن تمر الضلوع وبيتها بيتها**ماغيرتها السنين وماتغيرت انا
يوم كشفت عن مفاتنها وضميتها**قالت لي الحب وشهو قلت بيت الهنا...}
خالد:صج ماعنده سالفة اللي كتب كلماتها
الرزان:لا عاد حدك،هاذي من كلمات فزاع
خالد:يوووه وانا اقول ليش مقطعة الأغنية من كثر ماتسمعينها!
الرزان:اجـل شلـون
خالد:بس كلماتها منافية للآداب
الرزان..ضحكت:كشخات يامنافية للآداب!!،بـالله من وين تجيب هالكلام؟!
خالد..ضحك:يطلع تلقائياً
الرزان..ضحكت اكثر:لا لا مااقدر عليك،يطلع تلقائياً هـا!!
وظلت تضحك وهو قعد يضحك وياها..
خالد:يـلا غيري،ابي عبدالله الرويشد
الرزان:"قبل نبعد"!،لا لا مافي
خالد:وخري بس، بحطها بعني بحطها
الرزان:لا لا مابي
خالد:مو بكيفج!،يـلا بسرعة حطي السي-دي
الرزان:لا
وظلوا يتاهوشون..ونفذ راي خالد بالأخير..بس بعد ايش!!وصلوا للعيادة..نزلت لحالها وصعدت مع كيسها..دخلت العيادة..
نورهان:يامساء الخير على الحلوين
الرزان..ابتسمت لها:مساء النور،شخبارج؟
نورهان:الحمدلله،وانتي ؟
الرزان:تمام الحمدلله،ممكن طلب؟
نورهان:آمري؟
الرزان..رفعت كيسها وحطته على طاولة الاستقبال قدام نورهان:ممكن تحطين عندج هالكيس؟
نورهان..ضحكت:اللـه وش كبره!،خلاص ولايهمج بالحفظ والصون
الرزان:تسلمين..التفت لما سمعت احد يكلمها..هـلا
مريم..موظفة الاستقبال مع نورهان:كيفك ياحلوة؟؟
الرزان..ابتسمت لها:تمام الحمدلله،كيفك انتي؟؟
مريم:بخير،جاية اليوم بدري؟!
الرزان:غيرنا الموعد اليوم للساعة 4
مريم:اهـا،غريبة ما قال حمد!!
الرزان:وين راح؟؟
نورهان:داخل عند الدكتور،الحين يطلع ويدخلج
مريم:شنو هالكيس؟عندج حفلة؟؟
الرزان:أي والله،ملكة صديقتي اليوم
مريم+نورهان:مبـروك
الرزان:الله يبارك فيكم
نورهان:يـلا عقبالك انتي بعد
مريم..ضحكت:وعقبالي انا بعد
نورهان..ضحكت:استريحي انتي يالخبلة،اصلاً بس يشوفك عريس الغفلة بيهرب
مريم:ليـه عيوني!!
نورهان..ضحكت:من خبالج
مريم:روحي بس
الرزان قعدت تضحك عليهم..وشافت حمد..موظف الاستقبال والمسؤول عن المواعيد..
حمد:مساء الخير
الرزان:مساء النور
حمد:تفضلي الدكتور ينتظرك
الرزان:شكراً..التفتت على نورهان..انتبهي على كيستي
نورهان..ضحكت:بعيوني ولو
الرزان..ضحكت:تسلمين
دخلت المكتب وقعدت على الكنبة المعتادة تنتظر..طلع سعد من المكتب الثاني..
سعد:السلام عليكم
الرزان:وعليكم السلام
سعد..جلس عالكنبة قدامها:مساء الخير،شالأخبار اليوم؟؟
الرزان:مساء النور،الأخبار زفت
سعد:ليش؟؟وش صاير؟؟
الرزان:الأستاذ فارس خطبني،لا وحضرته يبي يشوفني بعد،يعني مادري كيف يفكر هالأنسان!!،بـالله ماكان يشوفني في لندن وكم مرة قعدنا مع بعض يعني هالشوفة بتغير شي!!، بس اكثر شي يقهر انه كان يحب صديقتي بعدين يجي يخطبني!!،هالناس ماعاد فيها عقل ولا ايش!!،والله قهر وكأنه مايدري اني رحت ادرس بلندن عشان اتهرب من الزواج اللي امي تبي تفرضه عليّ بالغضب!!
سعد:هـدي هـدي طيب وخذي نفس،وحدة وحدة عشان افهم شاللي مضايقج بالضبط؟!
الرزان:امس ماقدرت اقول شي قدام خالي ادري بيحاول يقنعني برايه،وبعد مادري كيف مسكت نفسي وماانفجرت قدام ريما بعد،كلهم مو فاهمين ان انا مو معترضة عليه كشخص،انا مو ببالي فكرة الزواج وبس،انا ودي لو يحطون عندي لوحة ممنوع الاقتراب او التفكير بالزواج من هالانسانة،كذا السالفة وبس انا مابي بكل قواي العقلية وبكل مشاعري واحاسيسي وكلي على بعضي مابي اتزوج
سعد..ابتسم:انتي مو قاعدة تتكلمين منطقياً حالياً!
الرزان:عشان رافضة الزواج!،ادري فكرتكم عن كل بنت على وجه الارض انها تبي تتزوج وتعيش بسعادة ماهي موجودة اساساً،وتجيب عيال وتقضي عمرها وهي تربي فيهم وفي ابوهم وبـس
سعد:ابداً هاذي مو فكرة أي احد عن البنات،هاذي فكرتج انتي
الرزان:بس مو تقولون كل بنت ونهايتها تتزوج وتروح لبيت زوجها!
سعد:هذا واقع،وهاذي سنة الحياة
الرزان:شفت شلون،انا مابي انتهي بالزواج مابي،لان الزواج نهاية فعلية لحياة أي بنت بس هم اغبياء ومايستوعبون هالشي
سعد:لهالدرجة!،طيب غير انج رافضة فكرة الزواج اساساً،ايش اللي مضايقكج؟؟
الرزان:انه فكر يخطبني اساساً،كأنه مايعرفني!كأنه مايعرف طريقة تفكيري!،انا وياه ببساطة مانصلح لبعض،هو في وادي وانا في وادي ثاني
سعد:ليـش؟؟
الرزان:هو كذا،مادري ليش!بس احنا مانجي مع بعض كذا،هو انسان غامض ودبلوماسي وانا مكشوفة وصريحة على طول
سعد:الأشخاص المختلفين يناسبون بعض اكثر من الأشخاص المتشابهين،وهذا واقع علمي
الرزان:!Whatever،بس خليني اكون صادقة معاك،وراه شي انا متاكدة ان وراه شي،يعني انا عرفت من اول ان هالخطبة وراها شي،هو عنده شي عشان كذا خطبني
سعد..استغرب:مثل ايش؟!!
الرزان:مادري!،بس الأكيد ان في شي،هو مايبي يتزوجني حباً فيني
سعد:غريب،طيب وايش بعد مضايقج؟؟
الرزان:صديقتي،هو وصديقتي سديم واللي ملكتها اليوم كانوا مع بعض،وكان واضح انهم يحبون بعض،لكن اكدوا نظريتي ان الحب كلام فاضي،وكل واحد منهم راح بطريق!!بدون أي اهتمام!!
سعد:الحب مو كلام فاضي زي ماتعتقدين وهذا شي ثاني بنخليه لبعدين،بس اكيد ماافترقوا الا في ظروف منعت ارتباطهم
الرزان:كانوا يعرفون من البداية بهاذي الظروف!!،كان يعرف ان اهله مستحيل يوافقوان عليها ويرضون فيها،ونفس الحالة ماراح يوافقون عليّ او يرضون فيني،هو صحيح جدتي وامي يقربون لامه وخالاته من بعيد لكن،امه بكل صراحة شايفة نفسها،وابوه زي مافهمت من كلام هنادي يهتم للمناصب والمراكز كثير
سعد:ماظن يهم لو ولدهم اتخذ قراره،وطلعنا عن موضوعنا،انتي يهمج مرة اذا كان يحب صديقتج؟؟
الرزان:الوضع راح يكون غريب!!،مع انه مايهمني يحب اللي يحبها براحته،بس انا وضعي غريب مع صديقتي
سعد:بس هي مو بتتزوج،ماظن راح يهمها!!
الرزان:سديم مكشوفة اكثر منه،انا فهمتها وفهمت انها تقبلت بطيبة خاطر انهم مايقدرون يرتبطون واضطرت ترضى بصديق اخوها لان مافيه عيب واهلها معجبين فيه وشارينه فماكان لها حجة ترفضه،بس مازالت تحب فارس وقلبها محترق بسببه،بس هو الله اعلم اذا همته اصلاً!!
سعد:كأنج ماخذه فكرة غلط زيادة عن اللزوم عنه!!
الرزان:انا افهم اللي اشوفه واحسه وبس،وهو غامض مايوضح شي!!،هنادي وهي اخته مو فاهمته!!،ماعلينا انا اللي مأزمني موضوع الشوفة
سعد:ليـش؟؟
الرزان:مادري ليش يبي يشوفني!!،وانا لو دخلت فعلاً ممكن اخربها
سعد:كيف يعني؟؟
الرزان:يعني ممكن اقط كلام،وبعدها كلنا نندم عاللي بيصير
سعد:انتي مكبرة الموضوع،خذي السالفة بالهداوة ولا تتهورين،اما عن سالفة ليش يبي يشوفج ،فهذا حقه،صحيح شافج كثير بلندن بس في فرق كبير لما يشوفج مو متحجبة وكاشخة، يمكن يغير رايه،انتي لاتحطين ببالج كثير سبب طلبه هذا،اهم شي انتي تذكري تاخذين كل شي بالهداوة، وخطوة خطوة،بالاول خليه يشوفج زي مايبي،وبعدها خذي وقتج بالتفكير واستخيري، لاتستعجلين،مو تبين الخيوط المعقدة تنفك!!هذا اول واحد لازم ينفك...
انتهت الجلسة الساعة 5:15..طلعت الرزان لهنادي واختها..
الرزان..ركبت السيارة البي ام دبليو "الحوت" العنابية:الـسلام عليكم
هنادي+دلال:وعليكم السـلام
هنادي:اخبار؟؟
الرزان:ماشي الحال،وانتي؟
هنادي:اسكتي حاقدة بس بعدين اقولك،هاذي اختي دلال
الرزان..مدت يدها لدلال:هـلا والله
دلال..بغرور طالعتها ومدت يدها ببرود:هـلا فيك
الرزان:شخبارج؟؟
دلال:بخير ونعمة
الرزان..حست بغرور دلال واستوعبت انها مو بالعتها!..همست لهنادي:يالدبة يعني كان لازم نروح مع سواقكم!!
هنادي:ياحياتي انا واختي موجودين،لاتخافين انتي بس
الرزان..وطت صوتها اكثر:بتروح؟؟
هنادي..طالعت اختها بطرف عينها:لا طبعاً
الرزان:انا كلمتني نوفي وقالت انها بتجي مع ريما
هنادي:كم بطاقة عطتك سديم؟؟
الرزان:ثلاث،غير اللي لي
هنادي:اها يعني زيي
الرزان:يالزطية مع كذا ماعزمتي احد؟؟
هنادي..همست:امي بتجي ومادري مين غير مناهل بتجيب معاها!!
الرزان:امج واختج بيجون!!
هنادي:غريبة مو!،بس مادري عنها امي امس سألتني اذا عندي بطاقة وقلتلها أي،اخذتهم كلهم وقالت انها بتروح!!،طبعاً ماقدرت انطق بحرف ولا اسأل شالسالفة!!،بس على ماظن بسبب اللي في بالي
الرزان:وشو؟؟
هنادي:بعدين اقولج
وصولوا مشغل "بروفايل"..نزلوا ودلال راحت..هنادي بدت قبلها وهي قعدت تنتظر..وجاوا نوف وريما وبدت ريما ونوف وهي لسه!!..

>>الآن

خلصت استشوار واخيراً..الساعة 6 الا عشر..هنادي كانت لابسة قبل وكلهم بعد لابسين بس دخلوا يحطون مكياج بغرفة الملابس..راحت لهم..
هنادي..انصدمت:واااو قصيتي شعرج !!
نوف:مرة خطير،حلوة الغرة مغطية جبهتج
الرزان..ابتسمت:لهالدرجة جبهتي عريضة!!
ريما:مو مرة
الرزان:جبي انتي
ريما..ضحكت:بس حلوة حركة البـف
هنادي:مرررة تجنن مع القصة
ريما:يـلا دخلي لبسي ولا تعطلينا
الرزان:والله حالة،طيب مين بيجي ياخذنا!!
ريما:احم احم سواقنا
الرزان:اللـه يعيني عليكم اليوم
ودخلت تبدل ملابسها..وحطت لها هنادي المكياج..
الرزان..طالعت حولها:يـلا قوليلي وش اللي في بالج؟
هنادي:امي تبي تشوف اللي كان يبيها ولدها وتشوف اللي خطبها..لما تغير وجه الرزان..توني دريت اليوم بالصدفة،ولا كان ماحد تعب نفسه وقال لي
الرزان:شلون دريتي؟؟
هنادي:ماكنتي بتقولين لي!!
الرزان:الا طبعاً بس مو اليوم،بكرا عشان تجين تؤازريني قبل لايجي
هنادي:مين اللي يجي؟؟
الرزان:ماتدرين!،اخوج المحترم بيجي بكرا يشوفني
هنادي:من صجه!!،السخيف ماعنده سالفة،قاهرني وحاقدة عليه
الرزان:ليـش؟
هنادي:يستغل مشاكلج مع امج عشان مصلحته السخيف،مافيه خير وهو يدري ان امي وابوي بيوافقون على اختياره هالمرة بس عشانج حساوية مثلنا وامي ماتقدر تقول لا عشان جدتج وامج يقربون لها
الرزان:يعني عنده سبب ورا هالزواج صح؟
هنادي:مادري عن اهدافه واسبابه،بس الأكيد ان مو صح اللي سواه!،شوفي اذا استخرتي وماارتحتي لاتخلين امج تغصبج لو وشيصير
الرزان..تنهدت:اخوج حطني في وضع حرج،امي بتكون بصفها جدتي هالمرة وحتى خوالي صحيح خالد معاي بس البقية كلهم مع امي
هنادي:ولا يهمج غيمة وتزول،يـلا شوفي وجهج
الرزان..شافت مكياجها بالمرايا وابتسمت:تسلم الايادي الفنانة
هنادي..ابتسمت:الله يسلمج،انتي حلوة بدون شي
الرزان..بمصخرة:مـرة
خلصوا كلهم واتجهوا لفندق "موفنبيك" اللي مسوين فيه الحفلة..وصلوا وافصخوا عبايتهم وكل وحدة عدلت عمرها..والتقوا بـ...
هنادي..التفتت عن المرايا:منـاهل!!خالتي!!
مناهل:الناس تسلم بالأول
هنادي..سلمت وهي تبتسم غصباً عنها:هـلا والله..وسلمت على خالتها..هـلا خالتي،شخبارج؟؟
:الحمدلله،شخبارج انتي؟وينج مانشوفج؟؟
هنادي:موجودة انتوا اللي ماتنشافون،ايه اعرفكم الرزان صديقتي اللي تدرس معاي بلندن،واختها نوف،بنت خالتهم ريما
مناهل..خزت في كل وحدة من فوق لتحت وابتسمت:هـلا
نوف+ريما+الرزان:هـلا فيج
هنادي:هاذي اختي الكبيرة مناهل،وخالتي سميرة
سلموا على بعض..وبعد انتهاء المجاملات الدبلوماسية رجعوا البنات للمرايا..و خلصوا وراحوا يدخلون القاعة..
اللي كانت كبيرة ومليانة..وبدخول الساعة 9 امتلت اكثر..دخلوا اول شي الرزان وهنادي وريما وبعدهم مناهل وخالتها ونوف..
العالم التفت على الثلاث الداخلين واللي جذبوا الانظار لهم..
هنادي بطولها تجذب النظر>> طويلة ونحيفة بس مو مرة..بيضا بس مو ذاك البياض..لكنها مملوحة..خشمها سلة سيف..وعيونها عسلية واسعة..وعظام وجنتها بارزة بشكل جذاب..<<لابسة فستان فوشي كوكتيل من فوق و مخصر الى الخصر في شك بالكريستال الأسود خطين على شكل x من قدام ومن ورا وتحت الخصر واسع وفيه كسرات "بلاسيه" صغيرة ويوصل الى الركبة وفوق الفستان جاكيت فرو اسود قصير ربع كم..وتحت الفستان لابسة هلا هوب اسود خفيف وبوت مخمل اسود الى نص الساق..وحاطة مكياج سموكي اسود وروج فوشي فاقع شوي بس يجنن عليها وبلاشر وردي..اما شعرها البني القصير مستشور وصاير شويه بف ومنفوخ..
اما ريما اللي تلفت النظر بنعومتها>> قصيرة ونحيفة زي الرزان بس هي مو عريضة ونعومة..بيضا بيضا زي الرزان بس الرزان ابيض شوي..لكن ملامحها عادية..عيونها صغيرة صغيرة بس رموشها كثيرة..وخشمها عادي..وماعندها خدود..<<لابسة فستان قصيرابيض مشكوك بالاسود ومرسوم عليه بالاخضر..من فوق كوكتيل ومزموم وتحت الصدر مشد اسود مشكوك بكرستال اسود وتحت المشد واسع ومنفوش شوي مرسوم عليه بالاخضر وشك خفيف بالكرستال الاسود وتحت اطراف الفستان تل اسود ويغطي الفستان الركبة..ومعاه لابسة صندل عالي دانتيل اسود ومن الموديلات اللي "فيه فتحه صغيرة من قدام" وفيونكة صغيرة سودا..اما مكياج عيونها ظل اخضر ومعاه اسود شوي وابيض تحت الحواجب وماسكارا اسود بس الكحل ابيض عشان يوسع عيونها شوي والبلاشر وردي غامق عشان يعطي وجهها لون لانه شاحب والروج وردي غامق بعد مرة تجنن..
اما الرزان فغطت عليهم بفستانها الاسود..زي فستان "نيكول كيدمان" اللي بدعاية عطر شانيل بس انه كت و قصير بدون ذيل ومخصر عالجسم الى الركبة..من قدام نفس فستان نيكول بس فوق فيه شك بعرض الأصبع بالكرستال الملون بجميع الألوان ويمشي لورا حول فتحة الظهر ..نفس فتحة فستان نيكول بس مسكرتها و مغطية ظهرها بقماش بنفس لون بشرتها تقريباً وداخل عالقماش شوية كرستال..كان روعة الفستان على جسمها..وكشخت بالساعة الصفرا اللي جاتها هدية ومعها الاسوارة والحلق النعوم اللي جاها هدية بعد..وباليد الثانية خاتم ذهب اصفر كبير والماس وبالوسط حجر الماس اصفر كبير "حق خالتها هند"..واهم شي حاطة مناكير احمر على اظافر اصابعها الانيقة..وبأظافر رجولها بعد مع الصندل اللي اشترته امس ودفع عنه خالها ماركة"Louis Vuitton" جلد اصفر وكله مطبوع عليه "LV" وفيه فيونكة حمرا عند الفتحة الصغيرة اللي من قدام "نفس موديل صندل ريما"وكعبه احمر عالي ونحيف وطالع جنان مع المناكير الاحمر..وكأنها تدري ان في احد جاي يتفحص فيها ويشوفها فكشخت كشخة معتبرة..كان معاها شنطة جلد صغيرة حمرا من"LV" أنيقة جداً..اوه صح ماننسى مكياج هنادي اللي حطته لها ومرة يجنن..الظل خفيف اصفر مدموج مع وردي والماسكارا السودا والكحلة السودا اللي غمقتها هنادي طلعت عيونها تجنن والبلاشر وردي فاقع شوي بس مع بياضها اكيد طالع يجنن والروج لونه بين الفوشي والاحمر"من الالوان الجديدة" وفاقع شوي بس بعد يجنن..اما شعرها مسوينه بـ فير السيراميك "الـiron" ستريت بس بف شويه من ورا وفاتحته زي ماهو..
نوفي ضحكت وهي تقولها "تشبيهين تولاي في مسلسل"لحظة وداع" بقوة نفس قصة الشعر!!"..دخلت الرزان لاول مرة في حياتها للمكان بكل ثقة..
بس عشان توري اللي يراقبونها انها مو سهلة وتعلمهم من الحين من هي الرزان..
اول سلموا على ام سديم واختها وام العريس..ووقفوا سولفوا مع خوات سديم شوي..


عائلة سديــم
عائلة الـ....
فهد (الأب) 60 سنة
عائشة (الأم) 54 سنة
حنان 32 سنة
علي..زوج حنان.. 36 سنة
نورة..بنت حنان.. 13 سنة
عائشة..بنت حنان..12 سنوات
مطلق..ولد حنان..9 سنوات
فهد..ولد حنان..5 سنوات
سليمان 30 سنة
أماني..زوجة سليمان..25 سنة
فهد..ولد سليمان..9 سنوات
قمر..بنت سليمان..7 سنوات
عايش 26 سنة
محمد 23 سنة
>> سديم 19 سنة<<
عبدالمجيد 18 سنة
عبدالله 16 سنة

هنادي..مسكتها وهمست:تعالي نروح نسلم على على حماتج العتيدة
الرزان ابتسمت ابتسامة خطيرة كشفت عن تقويمها "اللي حطته بداية هذا الاسبوع وحطته بلونها المفضل الأحمر>>دموية!<<" وبانت غمازتها اللي بخدها اليسار..
مدت هنادي ذراعها لها فلفت الرزان يدها حولها ومشوا مع بعض ومعاهم ريما اللي حطت الرزان يدها حول خصرها ونفس الشي سوت هي..
اما نوف بقت مع زوجة اخو سديم سليمان..أماني..
ريما:حماتها من الحين؟
هنادي:ماتلاحظين تصرفات الحماة النموذجية!جاي تقزها وتتفحصها عدل،بس كشختج اليوم بتصدمها صدقيني هي تفكر ان مستواكم اقل من عادي بس بتشوف انه اكثر من عادي
ريما:نعم نعم!،من اللي عطاها فكرة اننا عيال فقر!!
هنادي:عيال فقر!،صج هبلة،انتوا مستواكم عادي ومتوسط،عيال فقر!!شكلج تسمعين سوالف امي وصديقاتها!!،وبعدين مادري وش عطاها هالفكرة،صحيح تقربون لنا بس هي ماعمرها احتكت فيكم كثير زي جدتي!!
ريما:جدتج هي موزة صح؟!
هنادي:ايه تعرفونها صح؟؟
الرزان:انا اعرفها دايماً عند جدتي،اموت عليها ماشاء الله دمها خفيف،انتي تشبهينها
هنادي:شكلاً يعني؟ ولا بدمها الخفيف؟!!
الرزان:بالاثنين
ريما..ضحكت:تصدقين تشبهينها شكلاً اكثر
هنادي..ضحكت:دبـة
وصلوا عند الطاولة اللي كانت عليها ام هنادي..ومناهل وسميرة..
هنادي:السلام عليكم
الجالسين:وعليكم السلام
منيرة:وينج حبيبتي تأخرتي؟؟
هنادي:البطيئين الكوافيرات ياماما اخرونا،اعرفج على الرزان صديقتي وبنت خالتها ريما
الرزان..وخرت عن هنادي وراحت تسلم فوقفت لها منيرة!:هـلا والله،شخبارج خالتي؟؟
منيرة..بترفع وغرور واضح طالعتها وتفحصتها من فوق لتحت وشوي مصدومة:هلا فيج يابعد عمري،بخير ونعمة الحمدلله،شخبارج انتي؟
الرزان..بابتسامة:الحمدلله،شخبارها جدتي موزة صار لنا اسبوع ماشفناها اشتقنا لها؟؟
منيرة:أمـي!،أي الحمدلله بخير بس تتجهز للسفر بتروح عمرة
الرزان:ايوا،يـالله تروح وترجع بالسلامة
منيرة:الله يسلمك
وجات بعدين ريما سلمت..هنادي استغربت لما شافت امها تقوم عشان تسلم على الرزان،
من متى امي توقف تسلم على بنات صغار!!هي يالله تقوم تسلم على الكبار!!
،الرزان كانت مستوعبة دبلوماسية ام هنادي وترفعها وغرورها ونظراتها اللي تقيمها..
لكن رفضت تستسلم للبركان اللي يفور داخلها وحافظت على دبلوماسيتها هي بعد وابتسامتاها الواسعة..
انتفضت لما احد حط يده على كتفها..والتفتت..
:بسم الله عليكي!
الرزان:غـادة!!
غادة:لا!الحمدلله تعرفتي عليّ!
الرزان:اشدعوى!،غلاج بالقلب ياعسوله
غادة..ضمتها:وحشتيني يابكاشة،كيفك؟؟
الرزان:ماتشوفيش وحش،هذا وانا كل يوم ادق اذا مادقيتي!،الحمد لله انا بخير
غادة..مسكت وجه الرزان:بس غير لما اشوف وشك الحلو هادا..التفت على البقية..السلام عليكم
الكل:وعليكم السلام
وسلمت عالكل وتعرفت على ام هنادي واختها وخالتها..
هنادي:اصيل متى بتوصل؟!عشان ندخل عند سديم
غادة:تعالي ندخل قبلها،هادي البنت مرة تتأخر،داك اليوم في الراشد انتظرتها ساعة كاملة في اموري بعدين جات!!
الرزان:اوف ساعة!!..طالعت ساعتها..لا مافينا ننتظر الحين الساعة 10 الا عشر!ويمكن سديم تطلع الساعة 11 او 12
هنادي:يـلا طيب نروح نسأل امها متى بيدخلونها ونشوف
راحو سألو امها وشوي وتدخل اصيل..سلمت وخلصت وجات لهم..
غادة:الحمدالله عالسلامة
اصيل..ضحكت:الله يسلمج،شنو تنطروني!!
هنادي:شي اكيد،يـلا نروح لسديم
اصيل:يـلا،اوب اوب اموت انا!،وشهالزين وشهالكشخات يالرزان؟!!
الرزان..كبرت ابتسامتها:من ذوقج
اصيل:لا لا التقويم خقاقي بقوووة
الرزان..ضحكت:ثانكس
اصيل..ضحكت:كشخات يالنعومة والرقة والذوق،اذوب انا،اعترفي اعترفي انخطبتي!!
الرزان..تغيرت ابتسامتها:مااعلم
اصيل..غمزت وضحكت:أيـوا ايوا يعني انخطبتي،بـالله مين المقرود اللي داعيه عليه امه
هنادي:هـاي انتي...

يتبع ,,,,

👇👇👇
تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -