رواية ارواح تسكن مشارق الشمس -1

تجربتي القصصية الأولى أضعها أمام أعينكم لتقرؤها كما أتمنى بقلوبكم حياة الأمل والاستبشار بالغد مهما كان اليوم حزين ومؤلم في نظرنا فالغد يحمل بين طياته كل جديد فهو يشرق بشمس متجددة عند كل صباح تنير لنا الدنيا دون أن ندفع لها ثمن من الشمس وصمودها استوحيت قصتي هذه لفئة من البشر تملك أرواح تحمل صفات الشمس متجددة بعد الغروب المظلم على وحشية و قسوة الدنيا و بعد كل غيمه تحجبها وكل قطرة مطر امتزجت بدموع تلك الأرواح الطاهرة الصابرة على حكم ربها ..

نبدأ أحداث القصة..

أرواح مشرقة بالأمل .. لا تحجبها سحائب اليأس

الجزء الأول

نبدأ أحداث القصة..

صحت هند مثل كل يوم من بدري كانت الساعة 8:30 صباحا بدلت بجامتها ونزلت تفطر مع أمها و جدتها بكل نشاط ( هند هي بطلت قصتنا عمرها 22 سنه ملامحها جدا جذابة بداية من خشمها الدقيق وعيونها بلون العسلي الواضح لدرجة كل من يشوفها أول مره يتوقعها لابسة عدسات وشعرها ألامع صحيح مكان طويل مره لكنه ناعم و جذاب هند كانت خريجة قسم غريب وتقريبا مستقبلة الوظيفي معدوم لكن رأسها يابس حلفت يمين ما تدخل غيره بعد ما انحرمت من حلم طفولتها بدخول كلية الطب والسبب المجتمع ونظرته لدكتورة السعودية أو بنت القبيلة بالأخص ودخلت قسم ( رعاية كبار السن بعد الجلطات ) )

هند صباح الخير ياحلوات

أم نواف <<<إلي هي أم هند >>> وأم محمد إلي هي جدتها أم أبوها

أم محمد صباح النور يا بنيتي اقربي افطري

هند يمه ما اتصل حد على خط البيت << كان هذا سؤالها كل يوم وهي تنتظر الوظيفة

أم نواف لا يا يمه محد اتصل

هند الله يعين وراها نور بيتنا ساكتة جدتي شي يعورك؟

أم محمد لا يا بنيتي الحمد لله أنا بخير لكن أفكر في حال الدنيا

ام نواف هونيها وتهون يا خالتي

هند<<<<< بخاااطرها وين تهون يا يمه وهي كل يوم تقفل بوجوهنا أكثر

هالمره كملوا فطورهم بدون كلام غير عادتهم وراحوا يجلسون بصالة شالت هند الصحون للمطبخ وغسلتها و رتبتها وسوت قهوة لجدتها وأمها وراحت تجلس معهم لين تجي منال وتلعب معها ( منال أخت هند الصغيرة وأخر العنقود عمرها 7 سنوات وهي بأولى ابتداي متعلقة بهند بدرجه خياليه و كأنها بنتها *)

هند سمي يا جدتي

أم محمد سم الله عدوك يا بنيتي يا الله جعلني ما أموت لين أشوف عيالك

أم نواف الله كريم يا خالتي

هند تفضلي يمه

أم نواف سلمتي يا بنيتي

بحركة سريعة شالت هند القهوة وسط شكوى أم محمد وأم نواف أنهم ما بعد تقهون عدل لكن وش تسوي ثنيناتهن يشكون من الضغط والقهوة خطرة عليهن فقررت تعطيهم جرعه الصبح وجرعه العصر

تكلمت وهي تطلع الدرج ترى من اليوم بخليه بس فنجان واحد بدل اثنين وطلعت غرفتها وهي تفكر لو لا أمها وجدتها معها بالبيت وش كان مصيرها جلست وفتحت الأب توب و دخلت تشيك على المنتديات إلي مشاركة فيها مابين رد و موضوع جديد هنا وهناك مشى الوقت وسمعت أذان الظهر يغمر مدينة جده با الأمان و يحث كل مؤمن انه يتؤضاء و يقف أمام ربه يجدد إيمانه توضأت هند وصلت فرضها في خشوع ودعت ربها ييسر لها وظيفة تشغل فيها نفسها صحيح حالتهم المادية ميسورة لكن هم هند كان وقتها إلي جالس يضيع بدون فائدة خوفها إنها تنجر لطريق الضياع ويدخل عليها الشيطان من ذا الباب استغفرت ربها وتعوذت من الشيطان و نزلت تحت تساعد أمها بالغداء وتنتظر منوله جلست تقصص الخضار وهي تسمع منال تدور عليها وجدتها تحاول فيها تترك هالخبال على قولتها وتنزل شنطتها وتبدل ملابسها بعدين تروح لهند لكن الطفل لما يتعلق بشي صعب يبعد عنه وذا حال منال مع أختها

منال أنتي هنا

هند إيه منوله حبيتي تعالي وفتحت لها يديها تحضنها ارتمت عليها منوله وجلست تحكيها عن أبله سارة وعصبيتها وأبله مها وحنانها وعن صديقاتها إلي تحبهم والي تخاصمت معهم وعن ريم وبدور وسلمى ووو..<<<< وهند تسمع بكل حناااان رغم إنها تعودت وحفظة كل حكاياتها لكنها تستمتع وهي تشوف منوله مبسوطة

راحة منوله بطلب من هند تبدل وتنزل تحت تنتظر فهد عشان يحطون الغداء ( فهد كان اخو هند الثاني بعد نواف وعمره 13 سنه الاخو الصغير بعمره والكبير بعقله والي يعتمد عليه تقريبا أكثر من نواف 19 سنه إلي ترك أهله وراح يدرس بجامعة الملك فهد بمدينة الظهران ويجري وراء مستقبله<<<<<<<أحيان ألؤمه وأحيان أقول ممكن معه حق)

السلام عليكم

دخل فهد وحب رأس أمه وجدته وسط دعواتهم له و بهدوء طلع غرفته يبدل ونزل للغداء على الغداء

فهد يمه الأربعاء الجاي المدرسة مسوين رحله للمكتبة العامة اقدر أروح

أم نواف أكيد يا يمه روح الله يحفظك يأرب

هند لكن الورقة من بوقعها؟

بلعت هند اللقمة بالألم وهي تقول أنا أوقعها لك فهود ولا يهمك

رفعت أم محمد يديها وهي تدعي ربها انه يرد لها محمد بكرها إلي ما شافت إلا الألم والدمع من كبر وزوجته بنت عمه نورة ( زوجته الأولى قبل أم نواف إمراة احتل الحقد والكره قلبها وامتلت روحهااا بغض حتى لأقرب الناس لها وعرف الشيطان طريق الدخول لقلبها وجرها لطريق مظلم نهاية جهنم والعياذ بالله )

فزت هند وهي تشوف دمعة جدتها والي تعتبرها مصدر قوة البيت بكبره مسحتها بطرف شيلتها وهي تقول: افى يانور البيت وش اتفقنا عليه ما قلنا دموعك غالية لا تنزل

أم محمد يا بنيتي فؤادي محروق على ضناي من 8 شهور ماله حس ولا خبر هو ميت ابكيه وإلا حي ارجيه

هند لا يا جدتي حي بأذن الله و بتشوفيه بس ادعي له

رمى فهد الملعقة وقف وكل خليه فيه تعلن غضب رماه الزمن على ظهره : بتشوفيه لما تخطط له نوره مشكلة يجي يبلانا فيها

أم نواف عيب يافهد هذا أبوك ( أم نواف مهما ذاقت من عذاب لكنها صابرة وتتأمل في عيالها يعوضوها وتتذكر كلام أبوها ( الله يرحمه ) من صغرها وحكاياته عن الصابرين وجزاؤهم عند الله واكبر مثل لها أسيا إمراة فرعون إلي صبرت على زوجها الكافر وكان جزاؤها بيت في الجنة )

فهد أي أبو يا يمه إلي ما نشوفه إلا جاي بمشكلة تذكرين أخر مره دخل علينا وش صار وإلا ايش كان يبي.. قالها فهد وهو يترك الغداء ويجري لغرفته.. مابين خوف من الاسم إلي أنذكر ( أبوي ) و رغبة إنها ما تشوفه لان اسمه اربط بالرعب والدموع بالنسبة لمنوله إلي من ولادتها ما حست بشعور العطف والحنان الأبوي و حاولت هند تعوضها لكن من يقدر يحل مكان الأب .

سحبت نفسها و راحت غرفتها تبكي خوف تبكي حاجه فطرية تفقدها طفلة في السابعة من عمرها تحلم مثل ما تسمع من زميلاتها كل يوم أبوي وصلني المدرسة,, أبوي ساعدني وحل معي الواجب,, أبوي وعدني يجيب لي هدية لما انجح,,,,, دفنت رأسها بفراشها وجلسة تبكي الأب إلي تيتمته و هو حي بسبب نفوس مريضة ما رضت بحكم ربها عليها

تحت و في الصالة الوضع ما كان أحسن من فوق عند فهد ومنال أم محمد لسى الدموع ما رحمت ضعفها وكبر سنها وهي تشوف الدنيا كيف تعامل عيال محمد البكر وفرحتها الأولى إلي جلست سنين تتمنى تشوفهم وإلا أم نواف إلي خوفها كل يوم يزيد على منال وهي تشوفها تضيع قدام عينها بعد ما سارت تخاف من كل شي وحتى المدرسة ما قدرت تستمر فيها إلا بعد ما داومت هند معها شهر كامل تقريبا ما بين دعوات ألجده واستغفار الأم صحت هند من شريط ذكرى ذاك اليوم الأليم إلي قد ما حاولت ما تقدر تنساه كان يوم الخميس يوم إجازة صادف نزول نواف إلي ينزل مرة بالشهر لأهلة كانوا مبسوطين على جيته وعلى ألامه الحلوة وسوالف جدتهم عن أيام زمان في الديرة دق الجرس و نطت منال و هي تصرخ أنا بجيب البيتزا أنا لكن الصدمة جمدتها وهي تشوف أبوها و الشر يطير من عيونه يحط كل قوته على الباب و يدف معه منوله إلي طاحت على الأرض خوف وجرح ينزف بيدها من قوة الطيحه مالأن قلب الأب إلي تحول لصخر من طرق شيطانية تركها مكانها ودخل البيت ثاير يصارخ و كأنه يتعامل مع أعداه ماهو مع ألام إلي سهرت على تربيته ولا الزوجة إلي كانت معه على الحلوة والمرة ولا حتى فلذة كبده وقطعة فؤاده.

تكلم بدون وعي للي قاعد يقوله أبو نواف أنا ببيع البيت دبروا حالكم.

ذهول وصدمه وصمت لف المكان ببيع البيت !! معناه ستة أشخاص يتشردون ستة أشخاص وين يروحون ؟ يسكنون الشارع!! معناه عذاب جديد وألم أقوى, معناه قلوب ما تنام الليل تفكر كيف؟ومن وين؟ تجمع فلوس تستأجر شقه أو حتى بيت شعبي قديم ومتهالك الصدمة اكبر من إنهم ينطقون أو يترجون عطف و رحمة من شخص غاب عقله.

استجمعت هند قوة مكسورة مجروحة ترد على أبوها وكيف ترد على الأب إلي كانت فرحته بهند غير هند الفرحة الأولى الأمل إلي استبشر فيه بعد 12 سنه عقم من زوجته الأولى ( نوره ) هند كانت تعتبر أبوها الأمان لأنها أكثر وحده قريبه له وعاشت طفولتها بحضنه : يبه كيف ندبر حالنا ؟ من وين لنا فلوس؟

أبو نواف خلي أمك تدبركم أنا محتاج فلوس

هند وانتم ليش تبون الفلوس؟<<< تعمدت تقول تبون وتقصد فيها نورة قبل أبوها

دارت عيون أبو نواف وهو يفكر وش تبي نورة بالفلوس كل إلي قالته تبي مبلغ كبير أكثر من خمسين ألف ريال لكن وش مخططه له هالمره أبو نواف ما حصل قدامه إلا بيت عياله بحكم انه ما يرفض لها طلب : محتاجينا وبس بكره با اعرضه للبيع ولا جاني فيه مبلغ زين بعته

بيع بيتي إلي في الديرة وخل بيت عيالك يا محمد! كانت أم محمد تتكلم بكل صمود وكأنها تتعامل مع شخص غريب ما هو ولدها إلي حملته وربته سنين قالت كلمتها وجرة خطوتها بكل ثقل لغرفتها فتحت صندوقها الخشبي القديم وأخذت منه أوراق أخر شي تملكه في هالدنيا بعد المزرعة وقطعة الأرض إلي تنازلت لها لنورة اتقاء لشرها البيت إلي دخلته عروس مع أبو محمد ( الله يرحمه ) وفرحت فيه بمحمد وإخوانه البيت إلي عاشت فيه ضحكت عمرها بعيالها و دمعة الفرقى على أبو محمد سندها بالدنيا رمتها له وكأنها تقول ما همني كل ما املك قد ما أشوف عيالك مرتاحين ببيتهم

أم محمد هذي أوراق البيت بيعه و بعد عن هالبيت ذا لأنه حق عيالك.

مثل ما دخل بثورته طلع بثورة اكبر وتهديد اذا البيت ما جاب المبلغ إلي محتاجه باع ذا البيت بدون علمهم ورماهم بالشارع ليش يا دنيا ليش؟ مصدر أمانا بهدنيا تحولينه لوحش؟...

أم نواف بروح أشوف منال يا خوفي هالبنت تسوي بنفسها شي

هند خليك يمه أنا أشوفها

أم محمد خليها يا أم نواف تشوفها هند تعرف لها أكثر منك ( فعلا هند هي الأم لمنال من وقت ما ولدتها أم نواف وصار إلي صار لابو نواف مرت أم نواف بحالة اكتئاب وكأنها ترمي الذنب على طفلة بريئة ما تفهم وش إلي صار ولا إلي بيصير ولا تعرف الحزن إلي ينتظرها الصدمة إلي تعرضت لها أم نواف اكبر منها إنها تصحا وحد يقولها من اليوم صرتي الأم و الأب لأربعه أطفال تحميهم داخل البيت و خارجه وأبوهم حي بدنيا غير دنياكم بدنيا استوطنها الشيطان وطمس على سمع وبصر سكانها , أخذتها هند بحضنها وكأنها بنتها هند إلي ذيك الفترة كان عمرها 15 سنه جبرتها قسوة الدنيا إنها تسير أم تصحا على بكاء طفلة جيعانه بنص الليل تطلب من أمها إنها تطفي رغبة البقاء والتمسك بالدنيا مهما كانت أليمه أو تنام على بسمة أمل ترسم على وجه طفله بريئة وتشوف فيها غد أحلى من اليوم نامت بحضنها , أكلتها , شربتها , بدلت لها , تألمت لوجعها , وضحكت لضحكتها )

دخلت هند على منال وهي تشوفها مثل ما أتعودت عليها في كل مره ينذكر اسم أبوها دافنها نفسها تحت اللحاف ومتمسكة فيه بكل قوتها وكأنها تترجاه يخبيها مثل الغطاء السحري عن العيون

منوله حبيتي طالعي فيه

هالمره منال ما أتحركت خلاص حفظت كل كلام هند عن بكرة وعن الأمل وبكره تكبرين وتسيرين دكتورة تعالجين بابا لأنه مريض فكرت هند تغير طريقتها معها اليوم وتحكيها عن أبوها قبل يطيح فشر أعمال نورة

هند تدرين منوله بابا كان يقول قبل تجين لماما أبي بنت صغنونه ادلعها و أخذها للملاهي لان هند كبرت وأبي اسميها منال لأني أحب هذا الاسم كثير وبدلعها لوله

تحركت منال بهدوء وهي تشوف بصيص أمل أبوي أبوي كان يبيني من قبل مااجي ويحبني وببراة طفوليه : طيب متى بيجي ويقولي لوله ؟

هند قريب إن شاء الله أنتي لا تصيحين لأنك كل ما صحتي تأخر بابا

مسحت عيونها بحركة سريعة : خلاص ما راح أصيح بعد اليوم

وعد

وعد

هند طيب يلا نامي شوي ولما تصحين نسوي ورق عنب وبيتزا وش رأيك؟ لان نواف بيجي في الليل

منال والله بيجي هو و عدني لما يجي هالمره نروح البحر

هند إيه حبيبتي نروح إن شاء الله لعيون منولتنا

طبعت هند بوسه على خد أختها وغطتها وطلعت وسكرت الباب تنهدت بقوة و بخاطرها يأرب متى ؟ يرجع بس ؟

ثقيلة هالدقائق اذا كان الوجع بـ عمر ..إنسان ثقيلة يا ثواني هي بداية... ( تمر أزمان ) بغيضة يالدموع اللي على خدين طفله بعمر الورد/ وكبر الجرح حزينة يا الأماني ..ليه ؟أنا مدري وش اللي ما خذينه بس!! أنا مدري من المسؤل ؟!أنا مدري .. أنا ليه اكتب حروف أللحين ؟!!أحاول...اشرح ..الحزن الدفين بثرثرات ...حروف ...وغصت عين حكاية من حرم طفله.. تحس بضحكة الأطفال..

مرت هند بطريقها على فهد إلي كان نائم و كان القدر رحمه من التفكير في الحياة نزلت لمها وجدتها تحت بالصالة

هند يمه وين جدتي؟

أم نواف دخلت غرفتها تنام شوي وترتاح

هند زين بشوفها

أم نواف خليها يمه أنا غطيتها و قالت صحوني لصلاة العصر خليها ترتاح ولا تزيدين عليها

هند طيب خلاص نامي أنتي كمان شوي ترى منال نامت ولا عليها وفهد كمان نام

أم نواف وأنتي ماراح تنامين ترى نواف بيجي الساعة 11

هند اتصل أخيرا لا يمه مافيني نوم وعندي شغل بالبيت بخلصه

أم نواف على راحتك اجل أنا بروح أريح شوي لين العصر

دخلت هند للمطبخ تخلص شغلها وتشغل وقتها بالاستغفار غسلت الصحون و مسحت أرضية المطبخ و طلعت تغسل الملابس و تركتها تنشف لجل ترجع مره ثانيه تكويها ..

على سجدتها و بعد ما خلصت صلاتها جلست تستغفر وتذكر ربها وتدعي لولدها الله يشفيه ويفكه من شر نوره وأعمالها سمعت دق خفيف على الباب من غيرها هي إلي شايله البيت على رأسها بدون ما تشكي : ادخلي يا هند تعالي يمه

طلت هند من الباب بابتسامه حلوه على وجهها : وشلون عرفتي انه أنا يا جده

أم محمد حفظت دقت الباب يا بنيتي

هند قولي كذا اجل مركزه على صوت دقة الباب وش انطباعك بالله ماهو دق رومانسي وإلا لا <<<<قالتها وهي تضحك تعرف جدتها وش يصير لها لما تسمع هالكلمه

أم محمد افى وأنا إلي أقول بنيتي عاقله عن كلام التلفزيون اثاريها مثلهم

هند ههههههههه ياجده هالكلمه عاادي ماهو بس في التلفزيون يقولونها حتى بالشارع

أم محمد الله يستر علينا ذا الزمن معاد به حيا

هند زين يلله تعالي معي الصالة حطيت لك القهوة هناك

أم محمد إيه الفنجال الواحد ساعديني أقوم يمه

هند هاتي يدك وعاد اليوم إفراج خذي اثنين

أخذت هند يد جدتها و مشتها لصالة مكان ما حطت القهوة والتمر عند أمها وفهد

فهد حيا الله جدتي تعالي هنا اجلسي قريب مني

صب فهد القهوة و مده لجدته وأم نواف قربت لها التمر : سمي ياجده

أم محمد سم الله عدوك يا ولدي

انسحبت هند من جلستهم وراحت المطبخ عند منوله مثل ما وعدتها يسوون ورق عنب و بيتزا

هند منوله الحلوة وش تسوين بدوني

منال شوفي طلعت الحاجات كلها طحين وزيت وحليب وسكر وبيض و طماطم وكمان جبنه وزيتون و ورق العنب

هند برافو ماشاء الله عليك تقريبا حفظتي المقادير كمان طلعي مكرونه راح نسوي مكرونه با لبشاميل

منال حاضر

كملت هند باقي المقادير وبدأت تعجن وتلف وهي مبسوطة على منال و حركاتها وهي تحط بقايا الطحين بوجهها كان ضحكهم واصل لخارج المطبخ و كأنهم اسعد بنتين بالعالم .....

***********

***********

الجزء هذا كان بسيط و أحداثه قليله لكن أوعدكم بالقادم فقط أنتظر أراكم .

( ملحوظة القصة كتبت بالهجة السعوديه العامية الدارجه في كل المناطق تقريبا )

محـــــــــبتي

الجزء الثاني

هناك وبعيد عن جده وعلى شاطئ الخبر تحديدا وقف يتأمل الأمواج وهي تتصارع مع الصخور تشبه لمشاعره كثير يقاتل عشان غيره مابين غربته عن أهله ومشاكل أخواته ولوحده إلي ماليه عليه يومه من أول ما يطلع من العمل لحد ما ينام قطع عليه سرحانة نغمة الجوال إلي خصصها لأغلى ناسه

سعود هلا بصوت وراعيه

أم سعود أيه خذني بالكلام إلي لا يودي و لا يجيب

سعود علامها الغالية زعلانه أنتي بس قولي لي من مزعلك؟

أم سعود سعود من غيره

ضحك سعود من كل قلبه: افى يا أم سعود أنا مزعلك متى؟

أم سعود يا يمه وينك هالأسبوع ما نزلت جده أملي عيني بشوفتك وأنت واعدني تجي ما اشتقت لأمك

سعود الله يهديك بس يالغاليه هذا إلي مزعلك ما حصلت طياره اليوم وأرجع الجمعة و السيارة تعرفين تعب و مشوار علي بعدين توي الجمعة كنت عندكم

أم سعود أيه حطها بالطيارة والسيارة و أنت ما تبي تنزل

سعود لا لا الغالية معصبه هالمره بجد

أم سعود يا يمه أنت لو عندك حرمه وبيت ما كان حنيت عليك تجي كل أسبوع

سعود بباله وبعدين مع هالسالفه ما تنتهي : ألا ما قلتي لي يا يمه وشلون صحتك طمنيني عسى الضغط ما عاد أرتفع ؟

أم سعود أيه غير السالفة زى كل مره صحتي زينه الحمد لله لكن قلبي ماراح يرتاح لين أشوفك يا يمه مرتاح في بيتك وأشوف عيالك

سعود أن شاء الله تشوفينهم يا الغالية بس ها حصلتي لي عروس وإلا لا ؟

أم سعود أي هذا الكلام إلي يبرد الخاطر من بكره أروح لخالتك حصة واخطب لك من بناتها إلي تبيها

سعود الله يهديك يمه مئة مره أقولكم ماراح أتزوج من الأهل أبي وحده من بعيد لا تعرفنا ولا نعرفها أنا واحد أبي راحة البال ماهو أختك قالت وأمي قالت والكلام إلي ما يجيب غير الصداع

أم سعود وهذي من وين أجيبها لك كيف نخطب من ناس لا نعرفهم ولا يعرفونا

سعود خلاص وش رأيك أتزوج وحده من بنات الخبر هنا و أريح راسي وراسك ؟

أم سعود لا يا سعود إلي بتزوجك لازم أشوفها واعرف طبعا قبل نخطبها أنت ولدي الغالي لازم أزوجك إلي تريحك وتسعدك ماهي إلي تزيدها فوق راسك مثل .....استغفر الله بس

سعود يمه هالسالفه سكرتها خلاص و مها راحت بخيرها وشرها تبقى بنت عمي وبس

أم سعود الله يسعدك يا يمه و يكملك بعقلك

سعود ويخليك لي يا الغالية

أم سعود اجل أخليك الحين اسمع صوت أم فارس وعيالها

سعود سلمي عليها يمه

أم سعود يؤصل انتبه لنفسك يا يمه

سعود إن شاء الله

أم سعود فمان الله

سعود يا هلا

( سعود بطلنا الثاني في القصة عمره 28 سنه مهندس خريج جامعة الملك فهد للبترول والمعادن ويشتغل بشركة ارامكو سعود كان طويل وأكتافه عريضة وجسمه رياضي متناسق جدا ملاحمه دقيقه ونظرته طاغية و حادة و كل جزء فيه يحكي رجولته )

مسح على وجهه ونفظ الأفكار إلي برأسه وقرر يتصل بصديقه يوسف إلي ما فارقه من كانوا بالجامعة و يسهر معه الليلة

***************

بجدة

الساعة 10:30 مساّء

الجو حركه وحماس غير العادة بعد نصف ساعة راح يجي نواف البيت ويغير جو الروتين فيه شوي طلعت هند غرفتها بعد ما جهزت كل شي بالمطبخ تبدل ملابسها وتنزل تحت سمعت صوت الجرس معناه نواف وصل خلصت بسرعة ونزلت.

بالصالة المشهد المعتاد نواف بحضن أمه وهي تصيح شوقها له من شهر << الله عليه قلب ألام

هند بداء الفلم الهندي هالمرة قبلي عيدوه هههههه

نواف هنوده الدبة وأنا أقول فاقد أحد

قربت تسلم على أخوها وعزوتها بعد أبوها نواف هند : بدري تو تفقدني وإلا حصلت الحضن الدافئ ونسيتنا

نواف فديتها والله أنا مدري ليش تغارين كل مره كذا

هند هههههههه أغار لا بس أرحمك 48 ساعة وبتروح لكن أنا عندها طول الوقت وإن شاء الله ما أنحرم منها يأرب

أم نواف الله يخليكم كلكم لي يأرب وأشوف عيالكم

هند عندك نواف زوجيه أنا لا عندي مخططات أهم من العرس ألان

أم محمد يا أبنيتي العرس ستر للبنت

هند جدتي تبين عريس شكلك تراه جاهز أمام المسجد كل يوم يرسلك سلام مع فهد خخخخ

أم محمد الله يهديك قومي بس ضيفي أخوك

هند هالمرة منوله هي إلي بتضييفه لا ومسويه له مفاجئاه كمان

كانت منال بحضن نواف وهو يلعب بشعرها نواف : كفو والله أختي الصغنونة كبرت هاه وش مفاجئتك ؟

فهد أقول نواف لا يغرك ترى الدنيا مصالح عند البنات

نواف خلها تدلع وتطلب إلي تبي كم منوله عندي أنا

رفعت رأسها بحرج منال : أنا سويت لك العشاء مع هند عشان أنت وعدتني توديني البحر بكره

نواف أبشري بس البحر من عيوني

هند اجل قومي منوله ساعديني نجهز العشاء ويذوق نواف طبخك قبل ينام

منال طيب يلا .....

*************

أم عزام يمه وبعدين مع ولدك هذا متى بيتزوج ويريحنا

أم سعود يابنيتي هذا هو عندكم كلموه أنا عجزت منه خلاص

أم عزام احلفي عليه ويرضى وإلا اخطبي له وخليه قدام الواقع

أم فارس لا عاد سعود ماهو بزر ينغصب خلوه براحته

أم سعود هو إلا حالف ما يتزوج إلا وحده ما تقرب لنا

أم عزام وهذي كيف نجيبها له يمه ؟

أم سعود يايمه حنا زوجناه بنت عمه و ما الله أصلح بينهم وطلقها خليه يتزوج وحده من بعيد يمكن ربي يصلح له معها

أم عزام وهذي مها بتزوج ألان ولدك ما فكر

أم سعود هذا نصيبها يمه الله يوفقها ويستر عليها

أم فارس أمين يمه مها طيبه بس مشكلتها تسمع كلام أمها الله يهديها

أم عزام إلا حيه من تحت تبن هي وأمها

أم سعود الله يهديك يمه خليها بحالها

أم عزام يمه كان خاطري نزوج سعود قبلها عاد ألان شوفي خشمها وين واصل علينا

أم فارس قولي كذا بتزوجين سعود بس عشان تقهرينها يا أختي حرام عليك خليك اكبر منهم بعقلك

أم عزام لو سمحتي يا أم فارس وفري كلامك لنفسك

أم فارس الله يهديك بس ما كني أختك اكبر منك بسكت لك عشان أمي وبس

أم سعود إلا والله ما احترمتني وأنا جالسة بينكن بكرة لامت بتبرن من بعض شكلكن

أم فارس الله يطول بعمرك يمه لا تقولين كذا

أم عزام أنا بروح بيتي أبو عزام عازم له ضيوف بكرة للغداء وبنام بدري تأمرين بشي يمه

أم سعود إيه الله ييسر لك أمرك يمه روحي وشوفي رجلك

أم عزام ياذا الرجال عاد

أم سعود الله يهديك بس انتبهي لبيتك تراه ماهو صابر على لسانك إلا لجل عيالكم

أم عزام براحته عاد صبر وإلا لا يلا فمان الله

بعد ما تأكدت أنها طلعت وما تسمعهم أم فارس يمه ترى بنتك لو استمرت كذا بترجع لك مطلقه

أم سعود وأنا وش بيدي لها فهمتها بس رأسها يابس زي أبوها الله يرحمه ما تعترف بغلطها

أم فارس لا حول ولا قوة إلا بالله الله يهديها

أم سعود أمين يأرب

أم فارس عاد يلا يمه سهرناك اليوم خليني اتصل بفارس يجيني وأنتي روحي حطي راسك ونامي

أم سعود سلمي على رجلك تراه من أسبوع ما مر سلم

أم فارس إن شاء الله يمه

قامت أم سعود غرفتها وعقلها مع سعود الولد جاء بعد بنتين وكانت له ألام والأب بعد وفاة أبوه إلي كان يعاني من السرطان أخر أربع سنوات من عمره وعمر سعود وقتها كان 11سنه ربته على انه يكون رجال البيت والمسئول عن أخواته وأمه و فعلا ما خيب أملها فيه دعت له من قلبها أنها تفرح فيه وتشوف عياله حطة رأسها ونامت على أمل تشرق الشمس بكره وحلمها بشوف عيال سعود يتحقق

( بيت سعود بعد زواج أخواته أم فارس وهي الكبيرة ملتزمة شوي وقلبها طيب مثل أمها وأم عزام إلي طالعة نسخه لبوها تغلط ولا تعترف بغلطها تجرح ولا تتأسف مغرورة لأبعد الحدود وسفر سعود لشرقية دراسته وألان عمله بقيت أم سعود بالبيت الكبير لوحدها مع الشغالة برغم من محاولات سعود معها إنها تروح عنده الشرقية ويشتري لها بيت هناك إلا إنها ترفض بحجة إنها تعودت على بيتها وجو جدة وأهلها *)

***************

الجزء الثالث

الخميس الساعة 9 مساء

على بحر جده وبجلسة ما تحلا إلا بجمعة الأهل كان نواف اخذ أهله على وعده لمنوله والجو ولا أروع

منال نواف أبي آيس كريم الله يخليك

نواف من عيوني يلا امشي اشتري لك و تلعبين في الملاهي كمان فهد خلك هنا لين ارجع

فهد أكيد جالس

هند ههههههه حشى كان حد بياكلنا لو جلسنا لوحدنا

أم محمد هم سندك يا بنيتي أخوانك و يخافون عليكم الله لا يحرمكم من بعض

أم نواف آمين ياخالتي ويطول لي بعمرك

هند زين يا أخ فهد ممكن أروح اجلس على الصخرة هناك

فهد هذي آلي قدامنا

هند إيه

فهد أفكر خخخخخ

هند هههههههههه ترى أنا الكبيرة

فهد وأنا هنا الرجال

وقفت هند تعدل عبأتها : زين يارجال أنا رايحه لصخرة ذيك البعيدة تبون شي يا حلوات سلام

فهد ههههههه يمه بنتك ذي متقلبة أحيان أحسها أعقل بنت وأحيان ارج بنت

أم نواف خلها يمه شوفها جلسة قدامنا هند فديتها ما ينخاف عليها

جلسة هند على الصخرة تطالع الأمواج وتفكر بحال الدنيا كم مرة جات البحر و رمت همومها عليه

حزني بحر وأمواجه ايامي ,, غربت شمسه على ملوحة دموعي ,, بحر همي بحر حزني بحر ذكرى سنيني ,, بحر أغرقني وكتم أنفاسي ......

*********************

9:30 مساء

بالخبر وبشقة سعود

كان نائم على ظهره وحاط شماغه على وجهه يوسف : سعود ترى جاتني حالة اكتئاب وأنت السبب

سعود وهو يصب الشاي: أنا السبب ليش؟ تبلاني أنت و وجهك

قام يوسف و تعدل بجلسته واخذ فنجال الشاي : شوف من بعد صلاة العشاء وحنا بالشقة مقابلين بعض تبي الصراحة مليت من وجهك ههههههههههههه

سعود ههههههههههههههه وش تبي

حط يوسف وجهه قدام سعود وقام يسوي له حركات بعيونه : نطلع

سعود روح اطلع لوحدك أنا تعبان وشكلي بحط راسي ونام

يوسف تنام وأنت صاحي العصر قوم فكنا خل نطلع نشم هواء نشوف ناس توه سلطان دق علي يقول مجتمعين في الراشد

سعود يا أخي سلطان ذا ما ارتاح له أنا

يوسف إيه هو شوي شايف نفسه ومغازلجي حتى أنا ابعد ما ارتاح له لكن نتؤنس وش علينا

سعود أقولك تعال نروح مطعم نتعشى وبعدين ندق على سيف وعلي تلقاهم مجلسين على البحر أو في مخطط نروح عندهم

يوسف على حسابك

سعود يا حبك لتفقير جيبي يا أخي

يوسف والله أخوك مفلس والراتب ما جاء لسى

سعود الله يعينك مدري تصرف على كم بيت و زوجة وعيال وأهل

يتبع ,,,,,

👇👇👇

تعديل المقال