رواية ارواح تسكن مشارق الشمس -8
أمل وهي تفتح باب السيارة السلام عليكم
يوسف و عليكم السلام تاخرتي ؟
أمل لاوالله بس أنت جيت بدري
يوسف و كان بيحرك السيارة ههههههه يا شيخه
أمل لا وقف منار بتروح معي
يوسف وليش ما نزلت معك طيب و الا أنتم بالتقسيط تجون ؟
أمل اصلا هي ماكانت بتروح بس الدبى سوير أنا اوريها قالت بتروح معي و عبد الرحمن بيؤصلها للمشغل و الحين تتصل تقول عبد الرحمن ما هو فيه
يوسف فز قلبه من الأسم ساره بنت خالتي أم عبد الرحمن ؟
أمل ايه
يوسف طيب نمرها اذا لأزم تروح معك ؟
أمل صراحة هي ذوقها حلو و انا اتمنى تروح معي بس بصراحة ما قلت لها نمرك خفت أن الموضوع يضايقك
يوسف لا عادي دقي عليها و خبريها و استعجلي أختك كمان
طلعت أمل جوالها بدق لبنت خالتها لكنها أنتبهت أن الاكسسوار الي بتاخذه معها للفستان ما هو في الشنطة نزلت الجوال فوق الشنطة بسرعه و فتحت الباب ثواني نسيت شي مهم بالبيت و بكلم منار تنزل
ما اعطته فرصه يتكلم سكرت الباب و راحت مسرعه للبيت ... شكلي مطول قدام الباب تقول سواق الله يعين على الحريم و مشاويرهم ما تخلص قطع عليه صوت نغمة الجوال و التفت لجوال أخته لأن النغمه ما كانت نغمة جواله اخذه يطالع الرقم
و انشلت اطرافه و وحس أنه يختنق و اكسجين السيارة معاد يكفيه (( ساره يتصل بك )) ذا الرقم تعودت اصابعه تدقه كل يوم هالرقم مستحيل يغلط فيه معقول ساره تعرف اختي امل ؟؟؟و الا ساره هي نفسها بنت خالتي الي اعرفها ؟ ....
جده
الساعة الـ 05:10 عصرا
طلع من الغرفة يدور على الشغالة تكوي له ملابسه في سره رحمها صارت معاد تقدر تلحق على شغلها و السبب حاجة أمه المستمره لوجودها معها نزل لصالة و شافها تمشي للمطبخ و معها صينية فيها دواء امه سعود يأتي خذي كوي ملابس عشان بيروح
يأتي اوكيه مستر بس ودي هذا دواء ثلاجه
سعود و هو يحط لها الملابس على الكنبه انا عند ماما لما يخلص كوي كلميني
راح عنها سعود يشوف أغلا ناسه اذا محتاجه شي بعد ما كانت مالية البيت بحركتها و صوتها الي يطمئن قلبه صارت حبيسة غرفتها و كرسي متحرك حتى صوتها صار ضعيف و باين فيه الألم دق على الباب دق خفيف و دخل و هو يبتسم لها السلام عليكم كيفك الحين يالغالية ؟
بصوت تعبان و متألم على هالولد بس ام سعود الحمد لله يمه
سعود الحمد لله وين كنا و وين صرنا يا أم سعود وجهك اليوم منور يا جعلني ما انحرم منه
أم سعود و لا منك يا قلبي رايح يمه اليوم ؟
سعود أي والله يمه مالقيت حجز الا اليوم او يوم الأحد و أنا ما اني ناقص غياب عن الدوام لكن بأذن الله الاربعاء اكون عندك و فارس عندك أي شي تبغينه اطلبيه منه و هو ما يقصر
أم سعود بلؤم انا ما مضايقني الا أنت و فارس من طحت تلؤمة فيكم و اشغلتكم عن اشغالكم و دراستكم
سعود و هو يبوس يد امه لا اسمع منك ذا الكلام مرة ثانيه حنا عيالك و اذا ما شالتك الأرض تشيلك عيوننا يالغالية و بعدين أنتي سمعتي كلام الدكتور أمس بنفسك الحمد لله حالتك تحسنت عن أول و بأذن بترجعين تمشين بس يبغيلك شوية وقت
أم سعود الحمد لله على كل حال يمه ربك ما ينسى عباده .........
*****************
جده
الساعة الـ 09:30 مساء
تعبت من المشي في الشقة رايحه جايه بقلق جلسة على اقرب كنبه للباب و تنفست بعمق .. هذا وين راح ؟ من جاه تلفون العصر طلع مستعجل و لا قالي شي ياليت لو نزلني بطريقة عند اهلي ابرك من ذا القلق الي معيشني فيه التفتت للباب و هي تسمع صوت المفتاح و شافته يدخل بوجه غير الي طلع فيه سلمان السلام عليكم
هند وعليكم السلام
سلمان ليش جالسة هنا تنتظري احد ؟
هند انتظرك طلعت مستعجل و تاخرت
سلمان و هو يتخطاها لغرفته أنا بخير بس كانت عندي شغله مهمه
هند احضر لك العشاء ؟
سلمان لا أنا تعبان و فيه نوم
هند بخاطرها و أنا الغبية انتظرة من أول و هو و لا همه بينام وبس استاهل ليش اعبر واحد مثله كانت العبرة خانقتها و خاطرها تنفجر فيه و طلع كل حرتها ..
التفت لها و شافها واقفه بمكانها و منزله راسها للأرض و الدموع متحجرة بعيونها قرب منها و رفع ذقنها بيده و التقت عيونهم هند
هند و كل شي فيها ذاب من لمسته لبيه
سلمان لا تتضايقين مني أنا جالس اسوي كل شي عشانك
هند عشاني ؟
سلمان إيه عشان راحتك
نطقتها بدون وعي هند راحتي معك
تنهد بألم على مصير بنت مثل هند ظلمتها الدنيا و حتى هو شارك بظلمها سحب يده سلمان جمعي اغراضك بكرة بنروح
هند بحيرة وين ؟
كمل طريقة لغرفته و نطقها بدون ما يلتفت لها سلمان بنغير الشقة ما تبين تسكنين جمب أهلك لا تخلين شي وراك لأني بعت الشقة اليوم و بكرة بسلمها لصاحبها ......
*********
الجزء الحادي والعشرون
الجمعة
الخبر
الساعة الـ 01:00 ظهرا
رجعوا مع بعض من صلاة الجمعة حال صديقة من أمس ما هو عاجبه و حاس أن فيه شي مضايقة غير سالفة أن أبوه طرده من البيت لأنه سفر محمد لدراسة يوسف من النوع الي ملامحه تفضحه مهما خبى مشى جهة غرفته بدون أي كلام لكن سعود مصمم انه يعرف شو فيه و لحقه غرفته شافه ينزل شماغه و يتمدد على السرير سعود بتنام ؟
يوسف ايه
سعود ما تبي تتغداء طيب ؟
يوسف مالي نفس تغداء أنت
سعود و هو يجلس على طرف السرير و أنا كمان معاد لي نفس دامك ما تبى
يوسف و هو يسند ظهرة على طرف السرير و ماد رجوله أنا ما ابي الحين بنام شوي و لصحيت باكل أكل أنت و خل الباقي لي
سعود ما هو قبل ما تقولي وش الي مضايقك ؟
يوسف ما فيه شي مضايقني يا ابن الحلال بس تعبان ما نمت زين من أمس
سعود عشان فيه شي جالس تفكر فيه ما أنت قادر تنام تخبي على أخوك يا يوسف
ثنى يوسف رجوله وضمها بيديه على صدره و حط ذقنه على ركبه أنا تعبان يا سعود خلاص خسرت كل شي حتى ثقة اقرب الناس لي خسرتها
سعود وش صار معك ؟
يوسف و هو يضم رجولة لصدرة بقوة اكبر ساره .. ساره طلعت بنت خالتي
سعود انصدم و ما عرف ايش يقول فكمل يوسف كلامه و كانه يتخلص من جبل جاثم على صدره يعني يوسف الي قدامك واحد نذل ما عنده غيرة حتى على أهله خالتي الي فاتحه بيتها لي و تعاملني زي عيالها أنا اخونها من وراها و اكلم بنتها و اتغزل فيها و معتبرها وحده من بنات الليل مهما حملت لها مشاعر لأن الي ترضى تكلم واحد بتكلم عشرة وش تتوقع بيطلع مني اكثر ؟
سعود بس أنت ما كنت تعرف انها بنت خالتك و الا ما كلمتها
يوسف أنا انصدمت أصلا خالتي و زوجها ملتزمين يوم عرفت أن بنتهم تكلم كان نفسي اروح لبيتهم و اسحبها من شعرها و احطها قدام أبوها و أخوانها يذبحونها بس وش اقولهم أنا كنت اكلمها وشفت رقمها بجوال أختي و عرفت انها بنتكم
سعود ما كان ذا كلامك عنها
يوسف بعصبية الحين الوضع تغير اول أنا ما اعرف هي بنت من و الا من هي أصلا لكن الأن هي وحده من أهلي يعني شرفي يا سعود
سعود بتعقل يعني يوم كانت شرف ناس كنت ترضى عليها و الان يوم طلعت شرفك حطيت الغلط كله فيها ترى أنت بعد الغلط راكبك من ساسك لي رأسك يوم رضيت انك تكلم بنات الناس و تلعب بشرفهم جاك اليوم الي يلعب بشرفك ياما نصحتك تترك عنك ذا الطريق بس وش اقول
يوسف عاد لا تزيد علي ما اني ناقص
سعود احمد ربك انك أنت الي كلمتها ما هو غيرك و يمكن ضحك عليها و مسك عليها شي هددها به
يوسف والحل الأن ابي اتاكد هي تكلم شباب ثانين او لا ؟
سعود الأهم الحين هي تعرف انك ولد خالتها و الا لا ؟
يوسف ما أظن لو تدري ما كلمتني أصلا هي من أمس تدق و ترسل عادي
سعود اجل طنشها و لا ترد مدام انها ما تدري انك ولد خالتها ربك كريم حب يستر عليك و عليها لا تفضحها و لا تفضح نفسك و اظن هذي تؤبك عن غيرها ..
*******************
جده
الساعة الـ 05:30 عصرا
بعد ما جمعت كل اغراضها في شنطتين كبار مثل ما طلب منها سلمان تمددت على السرير و حضنت المخده لصدرها كانها تودعها بإمتنان بعد ما شاركتها شهرين من اقسى أيامها ألم و وحده و خوف تنهدت بحرارة من أمس ما نامت و قلبها مقبوض تحس بشي بيصير لها لكنها تجهله وش يكون ؟ او متى بيصير ؟ بتروح مع سلمان و لا تدري على وين ؟ و كيف بيكون وضعها معه ؟
بالجهة الثانية سلمان كان واقف قدام باب غرفة هند و متردد يدق عليها الباب لكنه مضطر يستعجلها خلاص كل شي انتهى و لازم يكمل دورة معها للاخير...
****************
جده
الساعة الـ 05:45 مساء
جالسة على كرسيها المتحرك الي صار يرافقها في كل حركاتها و تتأمل عيال بناتها حولها يلعبون تتمنى لو كانوا عيال سعود بينهم تشوفهم و تسمع ضحكاتهم لكن أمنيتها هذي شكلها مطوله سعود رافض فكرة الزواج خلاص من وقت الي عرف السبب الي جلط أمه و هو مسكر على هالسالفة نهايئا و ما يسمح لاحد يفتحها اهم شي صحة أمه الان تنهدت بتعب و هي تتعوذ من الشيطان الي شككها في ولدها و تربيتها له و سمعت كلام بنتها الي ما تدري وش كانت تقول غير إنها تنقل كلام الناس لها ,
أم فارس فيك شي يمه تعبتي تبين تدخلين على السرير ترتاحين ؟
أم سعود لا يمه مرتاحه هنا و أنا اشوفكم حولي
أم فارس الله لا يحرمنا منك يا الغالية ان شاء الله تبقين أنتي حولنا على طول
أم عزام امين يارب
أم سعود دقي لي على أخوك يمه ابي اكلمه اليوم ما سمعت صوته
أم فارس و هي تمسك الجوال هو دق يمه يسأل عنك و أنتي نائمة ابشري هالحين ارجع ادق لك عليه ......
**************
جده
الساعة الـ 07:00 مساء
وقف بالسيارة قدام بيت أبو نواف بداخله كلام كثير ما هو عارف كيف يبداه او من وين كفاية الشهرين الي عاشتها معاه و هو واحد عاجز عاجز حتى عن واجباته الزوجية حرام يضيع عمرها معه و تدفع غلطة ما هي في رصيدها ضغط على نفسه و طلع من جيبه ظرف و مده لهند هذا الظرف لك و كل الي فيه ملكك بس هو شي واحد ابي اسمعه منك قبل تروحين سامحيني
هند بغصة مخنوقه بعد ما فهمت كل شي يصير قدامها على شو اسامحك ؟
سلمان على اني كنت واحد جبان ما قدرت اوقف بوجه اهلي و انهي موضوع هالزواج من اصلة على اني ظلمتك معي و خذلتك
هند ما عاد تفرق الان كل شي انتهى و ياليت تحتفظ بالظرف و الي فيه لك انا ما احتاجه كفاية الي دفعته لابوي
سلمان بس هذا من فلوسي الخاصة و هو حقك انا متاكد ان ابوك ما اعطاك و لا ربع الي اندفع لك مهر
هند و هي تفتح باب السيارة مهر!!!! قصدك ثمن عشان تشتروني انا مستغنيه عنه و ياليت تحط الشنط عند الباب عشان ياخذونها اخواني .....
الواحد وصل في حيااته لحد اليـــأس
كلمه الامل من قاموس حياته حذفـــــــــــــها
لدرجه صار تعامله بدون احســــــاس
ومشاعر الناس للأسف بعرض الحايط ضربها
واذا انفرد بهمه يضرب اسدس بخماس
وهمومـــــــــــــــــه محــــد يسمعـــــــــها
ويجر بأفكاره ولايلقــــــــى مراس
وفي النهايه سفينه مشاعره حطمـــــــها
ويرجع انسان فاقد كل الحــــواس
ويسقي نبتته الامل لجل يحيــــــــــــــها
ويواسي نفســـــــه ويقول لاباس
هذا مصيري والدنيا هذا حالـــــــــــــها
والدموع تجيه ويحااول يكون حباس
لجل يتحمل مواجهه دنياه وجنونــــــها
وبلحظه ضعف يصرخ ويقول ياناس
ويتجرع لوحده من دنياه سمها ومرها
***************
الجزء الثاني و العشرون
السبت
جده
الساعة الـ 09:00 صباحا
تتقلب في فراشها عطشانه من أمس دخلت غرفتها و لا عاد طلعت منها مالها نفس تقابل أحد و لا تتكلم مع أحد خلاص هي اطلقت و أنتهت حكاية زواجها الي بدت بثمن و أنتهت بقلبها الي تحطم و لقب بيلازمها طول العمر مطلقة و هي لسى بنت الاثنين و العشرين و الاهم من كذا مازالت عذراء !!
تنهدت و هي تطالع الساعة .. لسى بدري أكيد الكل نائم الحين خل اروح اشرب موية و ارجع قبل يصحى احد .. نزلت هند للمطبخ و هي تدعي بخاطرها ما تشوف احد صحيح أمس استقبلوها و محد لامها على الي صار لكن دموع أمها و جدتها كفت قلبها أوجاع حتى الصدمة بعيون نواف و فهد كانت كافية إنها تقرى الخيبة بعيونهم دخلت و شربت كأس مويه بلت فيه ريقها كانت معدتها تعلن أصوات من شدت الجوع لكنها تجاهلتها مالها نفس تأكل شي و لفت بتطلع و ترجع غرفتها لكنها أنصدمت من الشخص الواقف على الباب أخر شي كانت تتمناه إنها تشوفها هي بالذات جدتي بغيتي شي احضر لك فطور ؟
أم محمد لا يمه أنتي وش مصحيك بدري ؟
هند و هو أنا نمت أصلا عطشت و جيت أشرب مويه
أم محمد اكلتي شي ؟
هند لا
أم محمد يا يمه أنتي من أمس ما اكلتي شي خلاص الي صار صار و أنتي مالك ذنب فيه
هند و دموعها بدت تنزل قولي لي يا جده أنا وش سويت ليش مكتوب علي ما ارتاح في الدنيا ذي ليش مكتوب علي ادفع ثمن أغلاط غيري ليش ؟
قربت أم محمد من هند و حضنتها تعوذي من الشيطان يا يمه الله بيعوضك باحسن منه ما يستاهل تنزل دموعك عشان الله كريم يمه الله كريم ....
******************
الخبر
الساعة الـ 11:45 صباحا
طلع من مكتبة اليوم بالذات شغله كان قليل و ما ينسى فضل علي و سيف الي كانوا يرسلون على مكتبة الشغل البسيط بس و يوسف الي كان يأخذ شغله و نص شغل سعود معه طول ما كان مشغول مع أمه و صحتها مستحيل ينسى وقفتهم معه مسك جواله وهو يمشي بتجاه المسجد بيلحق على صلاة الظهر و دق على فارس يسأله عن موعد أمه وش صار فيه بالذات اليوم كان الموعد مهم لأنه مع أخصايئة التأهيل .....
فارس هلا خالي
سعود الناس تقول سلام اول
فارس وي توي مكلمك من كم ساعة و راد السلام خلاص و لا تزعل السلام عليكم و رحمة الله و بركاته
سعود و عليكم السلام و رحمة الله و بركاته حتى لو مكلمك قبل دقيقة لازم ترد السلام
فارس حاضر و لا يهمك كم خال عندي أنا
سعود طمني وش قالت الدكتورة للوالدة ؟.
فارس الحمد الله بشرتني بالخير و في أمل ترجع تمشي بس قالت من اليوم لأزم تبداء معها بالعلاج الطبيعي لان عضلاتها ترقدت شهرين و تحتاج تأهيل عشان ترجع تتحرك
سعود الله يبشرك بالخير طيب و بتسوي عندهم في المستشفى و الا وين ؟
فارس والله هي تقول ممكن تسويه بالمستشفى لكن تعرف المشكلة بالمستشفيات الحكومية العلاج الطبيعي مدته تلات شهور و يتوقف لين تشوفها مرة تانية و تعال شوف لين تحصل موعد يبي لك أقل شي سته شهور و جدتي محتاجة وقت لين ترجع زي أول يمكن اكتر من سنه بدون ما توقف علاج
سعود والحل طيب ؟
فارس تقول أفضل شي تروحوا لمراكز التاهيل بفلوسكم تدفعوا كل شهر محد بيقول لكم خلاص وموعد و حوسة لين تتحسن حالتها و هي بتابعها في المستشفى
سعود طيب و ما تدري مراكز التاهيل هذي كم تأخذ و الا ماسالتها وش أحسن مركز تعرفه ؟
فارس ودي أنساها يا خالي اعطتني كرت لمركز كانت تشتغل فيه تقول يأخدوا مبلغ معقول بين ألف أو ألف و متين و شغلهم ممتاز و آحلى صدفة طلع المركز عشر دقائق من بيتكم يعني ماراح تتعب جدتي بالروحه و الجيه
سعود و متى بتوديها طيب ؟
فارس بكرة بأذن الله و أشوفهم ايش يقولوا لي و ايش نتفق عليه و اقولك
سعود الله يسعدك يا شيخ بس ....
*****************
جده
الساعة الـ 06:00 مساء
جالسة فوق رأسها من ساعة تحاول تفهم منها أي شي يريحها لكنها ساكتة و ما هي راضية تفتح فمها بشي غير هذا قضاء ربي و مصيري!
أم نواف هند يا يمه لا تعبيني معك أنا أمك قولي لي ليش طلقك و أنتي مالك معه الا شهرين ؟
هند مدري طلقني و خلاص
أم نواف كيف وأنتي كنتي كل ما سألتك عنه قلتي ما هو مقصر معي بشي ؟
هند لأنه ما قصر معي بشي
ام نواف لا إله إلا الله يا بنيتي المشاكل تجي بين كل أثنين توهم متزوجين لين يفهمون بعض بس ما يكون الحل الأول هو الطلاق ليكون أنتي الي طلبتيه يطلقك ؟
هند لا يمه و خلاص ارحميني أنا من وين احصلها اروح اقوله تكفى رجعني عشان ترتاحون يعني و الله تعبانه فكوني من سالفة الزواج و سلمان و الطلاق و كل شي أنا كذا ارتحت بتحرموني حتى الراحه يعني
أم نواف أي راحه و أنتي من أمس ما اكلتي و لا طلعتي من غرفتك تقول ميت لك احد ما هو بس مطلقة
هند بألم مطلقة حتى أنتي يمه بتقولينها شكلي بسمعها حتى من اقرب الناس لي ما هو بس من الناس البعيده على العموم مالي نفس أكل أي شي رأسي بينفجر واحس بغثيان أبي انااام وبس
أم نواف هند لا تكونين حامل وأنتي ماتدرين ؟
سكين ثانية غرستها أمها بقلبها و هي ماتدري .. أي حامل يمه بنتك الي قدامك لسى عذراء محد لمسها زي ما طلعت من عندك و أنتي تفكرين أني حامل وش هالسخرية الي اعيشها يا ناس لا يمه ما أني حامل و متاكده كمان .....!!!!!
******************
الخبر
الساعة الـ 08:00 مساء
جالس قدام التلفزيون لكن عيونه على شاشة الجوال هذا الأتصال رقم مليون من يوم الخميس و الرسالة رقم ألف و كلها تسأل عنه و ليش ما يرد عليها و مطنشها قراء الرسالة الأخيرة و رمى الجوال على الكنب بغيض يوسف اوووووف و بعدين معها ؟.
سعود ايش فيها كمان ؟
يوسف تقول لو ما رديت عليها بتذبح نفسها مجنونه ذي والله تسويها
سعود أنت عودتها على الدلع كل يوم تكلمها
يوسف ما كنت ادري إنها بنت خالتي افهمني الحين ما أقدر اكلمها ما أستحمل و أنا اعرف إنها تصير لي والله لو كلمتها نسيتها نفسها
سعود خايف على مشاعرها و تظن و هي تدق كذا ما تحس إنها مجروحه منك ؟
يوسف بتنهيده و لا أرد و اجرحها أكثر
سعود تبي الحل ؟
يوسف لا تقولي غير رقمك
سعود لا هات اكلمها
فز يوسف من مكانه وش تكلمها هي ذي محارمنا لا تغلط
سعود و أنا بغازلها بكلمها قدامك و بفهمها بطريقتي ما عاد تدق
يوسف بس بدون ما تجرحها بالكلام تكفى
سعود و هو يأخذ منه الجوال أبشر
يوسف أنت دق لا تخلي المكالمة على حسابها
أخذ سعود جوال يوسف و اعطاها مشغول و رجع ضغط على رقمها و خلاه على السبيكر ما كان عارف وش بيقولها او حتى شو بيسمع منها . جاه صوتها باكي و متألم يوسف ليش ما ترد حبيبي فيك شي أنت بخير أهلك بخير ؟
سعود أنا مو يوسف
ساره بأندفاع هذا جوال يوسف أنا متأكده وينه هو ليش ما يبي يرد علي ؟
سعود أنا صديقه سعود اظن تعرفيني اسمعيني للأخير و لا تقاطعيني يوسف معاد يبي يكلمك و هذا افضل لك وله ماراح تفهمين كلامي الحين بس يمكن يجي يوم وتفهمينه أنتم الأثنين ما تصلحون تكلمون بعض و الا بيصير شي يوصل أهلك و أهله و ماراح تطيح الا برأسك أنتي يا سارة لان يوسف رجال و ما يعيبه شي لكن أنتي شرف فاهمه ايش يعني شرف يعني دم يمكن يراق عشانك
ساره بضحكة هستيرية انتم كلكم واحد تباني اصدق كلامك و اخاف لا أنتم كلكم كذابين و خونه حتى يوسف خلاني اصدق أنه غير عن الشباب و الحين طلع زيهم أكيد حصل و حده ثانيه تحبه اكثر أنا عارفه هو سوى كذا عشان انا ما خليته يشوفني و لا اطلع معه.. و بصوت باكي .. سعود الله يخليك خلني اكلمه والله ماراح اقوله لا الحين ارسله صورتي يشوفها
سعود الله يهديك والله أنه ما فكر كذا و لا تفكرين ترسلين صورتك و الا يوسف هو الي بيذبحك خلاص هو ماراح يكلمك غصب عنه ما هو برضاه
ساره يعني هو بيتزوج صح والله بس اسمع صوته مرة وحده و معاد ادق الله يخليك
سعود لا يا بنت الناس ما هو متزوج بس خلاص هو بطل معاد بيكلم بنات لا تكسبين ذنبه
ساره و هي تصيح و انا وش ذنبي ليش يخليني أحبه و بعدين يتركني كذا بدون ما يقول ؟
سعود حس انه بداء يحن عليها و هو يسمع صوتها تبكي و تترجاه يعني أنتي ما تكلمين غيره ؟
ساره والله ورب الكعبة أنه اول واحد بحياتي و أخر واحد و عمري ما فكرت اكلم غيره واذا أني اكذب عليك جعلني أموت الحين
يوسف كان يسمع كلامها من اول و قلبه يتقطع عليها غصب عنه ادرك أنه يحبها و لسانه نطق بدون ادراك ما استحمل يسمعها تدعي على نفسها و يسكت لا أسمعك تدعين على نفسك مره ثانيه فاهمه
ساره والله أني اقولك الصدق وربي ما فكرت يوم اخونك يوسف الله يخليك أحس أني بموت بدونك لا تتركني
يوسف ما هو بكيفي اذا أنك تحبيني صدق لا عاد تدقين عليه و اعتبريه طلب من أخوك اتركي عنك ذا الطريق ماراح تستفيدين منه غير الضياع ما هو كل الي بتكلمينهم يوسف بتلقين النذل الي يمسك عليك شي يهددك به و تضيعين نفسك معه ...
******************
الجزء الثالث و العشرون
الثلاثاء
جده
الساعة الـ 04:00 عصرا
اليوم اول أيام شهر رمضان الكريم شهر الرحمة و المغفرة و العتق من النار شهر الخير و الفضل على عباد الله شهر فيه تتقرب النفوس من خالقها و تلجاء له بالليل و النهار تستغفر لذنوبها و تطلبه الرحمه و الجنة .. باقي ساعتين على الفطور و هي لسى ما خلصت شغلها في المطبخ تحس ان بالها مشغول بأفكار و مشوش ما هي قادرة تركز في شي معين انتبهت للحليب الي فار و طفت عنه بسرعه التفتت لمنال و ابتسمت أنتي اش تسوي ؟
منال هذي لجدتي اسويها
هند و هي الي قالت لك تسوين كذا
منال لا بس عشان هي ما عندها اسنان أنا ابى اطلع لها النوى حق التمر عشان تأكل بسرعه
هند هههههههه ذكيه والله أختي
منال أنا كبرت و سرت اعرف أفكر
دخل فهد و سمعهم يتكلمون في الذكاء من الذكية لا تكونين أنتي يا منال ؟
منال الا أنا و اذكى منك كمان
فهد اوف اذكى مني كمان ليش وش اخترعتي ؟
منال و هي تمد صحن التمر الي نازعه منه النوى شوف ايش سويت لجدتي عشان تأكل بسرعه
فهد هههههههههه مره ذكية من ذكاءك ما اظن جدتي بتستوعب المنظر و تقدر تأكل .
*************
الخبر
الساعة الـ 05:28 مساء
مجتمعين على السفرة باقي دقيقتين و يأذن المغرب و يفطرون هذي اول سنه ليوسف يفطر أول يوم من رمضان بدون أهله أحس الفطور بارد
سعود بتعود عاد لين يطيح الي برأسك
يوسف و أنا وش الي برأسي ؟
سعود تروح تستسمح من أبوك و الا بتستنى لين هو يجي يحبك على رأسك و يقولك تكفى سامحني يا ولدي
يوسف أبوي عنيد و رأسه يابس حاولت افهمه أن هذا هو الاحسن لمحمد و مستقبله بس ما هو راضي يفهم الا يقول أنا ضيعته و خربته عليهم
سعود عاد هو تفكيرة كذا لأزم تتنازل بعقليتك له و تستسمح منه
يوسف جيته أمس بالمجلس ضغط على نفسي و قلت اسلم عليه ليلة رمضان و لليلة فضيلة بيسامحني توقع وش قال ؟
سعود وش قال ؟
يوسف روح رجع محمد يدرس هنا زيكم و اسامحك
سعود هههههههههه و ربي أبوك هذا تحفه طيب يفهم انك تباه احسن منكم
يوسف روح فهمه انت اقوله طيب و الفلوس الي ادفعها له و الناس الي مكلمهم له واسطات وش اقولهم طلع لي بقضيه ثانية لو أني متزوج بالفلوس الي ادفعها له ابرك لا و الوالدة وقفت معه لأول مره بحياتهم
سعود هههههههه فتحت على نفسك باب ثاني ..
**************
جده
الساعة الـ 08:00 مساء
شافها تطالع التلفزيون و عيونها تدمع جمعة الناس حول الكعبة و هم ينتظرون صلاة العشاء و التراويح منظر روحاني يطمئن النفس المؤمنة قرب منها و مسح دمعتها بيده فارس افى يا ست الكل ليش الدموع هادي دحين ؟
أم سعود كل سنه اروح اخذ عمره و اصلي التراويح في الحرم الا هالسنه ما اقدر اروح يمه لكن الحمد لله على كل حال
فارس يعني أنتي فيك شده تروحي ما راح تتعبي ؟
أم سعود ايه يمه أنا على كرسيه ما اتحرك احد يدفني ما راح اتعب
فارس و مين الي قلك انك ما راح تروحي تعتمري ؟
أم سعود و هي تطالع رجولها بعجز و من الي بيستحمل وحده عاجزه زيي ؟
فارس و هو يحب يدها اولا أنتي مو وحده عاجزة أنتي راح تقدري تمشي بأذن الله بعدين أنتي كل عمره تستخدمي العربة في السعي دي المره بتستخدميها في الطواف كمان و أنا الي بوديك بنفسي و اخدي ياتي معك تساعدك
أم سعود أنت ما تقصر يمه بس أنت وش تلحق عليه مواعيد الدكتور و الا اشغالك معي ازيد اتعبك كمان بالعمرة توديني
فارس هو أنا رايح عمرة رايح يعني اخدك معي بعدين نروح بأول الشهر قبل الزحمه و كمان وقت الصبح بدري ما في ناس كتير بس أهم حاجه ترتاحي و ما تتعبي نفسك
أم سعود الله لا يحرمني منك يا يمه .....
*****************
الخبر
الساعة الـ 01:30 فجرا
واقف قدام البحر مشتاق لها لصوتها و ضحكتها لسوالفها الي يستمتع فيها حتى لو تعيدها عليه ألف مره يحس بفراغ كبير بعدها ومستحيل تعوضه أي بنت مكانها طلع جواله و فتح صندوق الرسائل هذي اخر رسالة وصلته منها بعد ما كلمها مع سعود ((انا أدري إن هالدنيا طبيعتها لقا وفراق
ظروف الناس فيها كثير احيان تتشابه
ولكن من يصبرني على جور الزمان العاق
جروحي هي وآلامي وتعذيبي من اسبااابه
حبيبي كل ماهمتني الدنيا وصدري ضاق
تذكرتك لقيت الكون اوسع واكثر رحااابه
هذا قدري معك يوسف مكتوب علينا ما نستمر لكن مستحيل انساك و اوعدك وعد من قلب حبك أني مستحيل أحب شخص مثل ما حبيتك و اعتبر نفسك أمرت ما راح ارجع لذا الطريق ابدا ساره )) تنهد على ذكر اسمها.. يا ترى وش اتسوين الحين يا ساره؟ يا ترى تفكرين في و الا نسيتيني ؟ و لو عرفتي أن الي كان يكلمك ولد خالتك وش بتسوين اكيد بطيح من عينك ؟ .. قطع عليه صوت الجوال و ابتسم ورفعه لأذنه هلا
سعود وينك أنت ؟
يوسف قريب بغيت شي ؟
سعود تعال الشقة علي عندي بنتسحر مع بعض
يوسف عشر دقائق و أنا عندكم .......
***************
الجزء الرابع و العشرون
الخميس
جده
الساعة الـ 07:25 مساء
رجع الروتين لحياتها مثل اول و لازم تتعود عليه الشي الوحيد الي اخذته معها لقب مطلقه لقب زادها جرح فوق جروحها لفب بيستمر معها طول الوقت و نظرة مجتمع راح تتبدل و تتعامل على انها انسانه مقترفه اثم!!!
نزلت مع الدرج و هي ملزمة على الفكرة الي براسها و راحت لغرفة جدتها هي ملاذها الوحيد بعد الله دقت الباب ودخلت السلام عليكم
ام محمد وعليكم السلام هلا يمه
هند هلابك جدتي اشوفك جاهزة بتروحين المسجد ؟
ام محمد ايه يمه الا هو اذن ؟.
هند لا فديتك باقي يمكن نص ساعة
ام محمد ايه زين يمه تعالي جمبي هنا اشوف بعيونك حكي
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك