بداية

رواية ارواح تسكن مشارق الشمس -9

رواية ارواح تسكن مشارق الشمس - غرام

رواية ارواح تسكن مشارق الشمس -9

الجزء الرابع و العشرون

الخميس
جده
الساعة الـ 07:25 مساء

رجع الروتين لحياتها مثل اول و لازم تتعود عليه الشي الوحيد الي اخذته معها لقب مطلقه لقب زادها جرح فوق جروحها لفب بيستمر معها طول الوقت و نظرة مجتمع راح تتبدل و تتعامل على انها انسانه مقترفه اثم!!!
نزلت مع الدرج و هي ملزمة على الفكرة الي براسها و راحت لغرفة جدتها هي ملاذها الوحيد بعد الله دقت الباب ودخلت السلام عليكم
ام محمد وعليكم السلام هلا يمه
هند هلابك جدتي اشوفك جاهزة بتروحين المسجد ؟
ام محمد ايه يمه الا هو اذن ؟.
هند لا فديتك باقي يمكن نص ساعة
ام محمد ايه زين يمه تعالي جمبي هنا اشوف بعيونك حكي
هند والله يا جدتي هو تبين الصراحه طلب ما هو بس حكي
ام محمد خير باذن الله تبشرين به يمه
هند صراحة جدتي ابى اروح للعمره و لا تقولين لي توك مطلقه و عده و كلام ناس و مدري ايش انا محتاجه اعتمر والله متضايقه محد من الناس هذولا يحس بضيقتي
ام محمد يا يمه محد بيقولك ليش طالعه انتي رايحه بيت الله و في شهر فضيل يعني لا يهمك احد
هند اجل كلمي نواف انتي
ام محمد وانتي كلمتيه و رفض ؟
هند وهي منزله راسها لا جدتي ما كلمته انتي كلميه انا استحي اطلبه الحين
ام محمد خلاص يمه ابشري و لا يهمك
هند الله يخليك لي يا الغالية ......


**************


الخبر
الساعة الـ 09:30 مساء


راجعين من صلاة التراويح في سيارة يوسف اليوم اجازة و رمضان لليلة طويل ما هم عارفين وين يقضون وقتهم تافف من زحمة الشارع قدامه اوف كل ذولا البشر وين طالعين ؟
سعود الاسواق اكيد لو رحة جده ابرك
يوسف قلت لك اكلم ناصر يدبر لك حجز وانت رفضت
سعود يا اخي استحيت منه الشهرين الي راحت و هو ما قصر معي كل اسبوع حاجز لي
يوسف عادي والله بس انت متحسس زيادة
سعود اذا كان صاحبك عسل لا تاكله كله
يوسف كان بيرد عليه لكن جواله رن الاهل عسى خير الوو
امل هلا يوسف وين انت ؟
يوسف راجع من المسجد بغيتوا شي ؟
امل ايه امي تباك توصلنا مستشفى السعد
قاطعها يوسف المستشفى ليش وش فيكم ؟
امل نبغى نزور خالتي ام عبدالرحمن بنتها منومه من امس و امي بتروح لها
بلع يوسف ريقه بنتها من ؟
امل سلامات خالتي ما عندها الا بنت وحده ساره وش فيك ؟
يوسف ارتبك و ما عرف وش يقول وش فيها ؟
امل مدري ما فهمت من امي شي تقول ما تاكل و لا تشرب وبس تبكي و اغمى عليها لازم اشوفها بنفسي البنت ذي الفترة الاخيرة مهي طبيعية
يوسف قلبه عورة عليها اكيد هو السبب و خوفه الاكبر انها تكون عرفت انه ولد خالتها يعني بتقولك وش فيها ؟
امل مدري يمكن بس انت بتودينا او لا ؟
يوسف ايه طيب نص ساعة و انا عندكم
امل اوكيه يالله ننتظرك باي
يوسف باي
نزل السماعة و هو يتنهد انا السبب اكيد
سعود في ايش و من الي بالمستشفى ؟
يوسف ساره
سعود اوف اش فيها ؟
يوسف منومه من امس اغمى عليها اكيد ما تاكل و بس تصيح عشان معاد اكلمها
سعود تبي الصراحة احسها صدق حبتك والله
يوسف و هو يكابر على الي بقلبه البنات حساسات من أي شي يصيحون و يسوونها قضية بتنسى مع الايام اكيد ....


*************


جده
الساعة الـ 10:00 مساء


دخلت غرفتها و دخل وراها اكثر شخص حسته متاثر بموضوع طلاقها و كل يوم تحس بعيونه كلام لها يالله تفضل قول الي عندك بس اسرع لان اكل جدتي على النار
فهد طيب بسالك عن ابوي شفتيه بعد ما اتزوجتي قصدي زارك مثلا بعد ما اتزوجتي في البيت ؟
هند لا و لا شفته ليش جاكم هنا ؟
فهد لا بس قلت هو الي جاب سلمان ذا اكيد يعرفه و يزورك عشانه
هند ما زارني ابد و اظن انه ما يعرف سلمان اصلا
فهد و كيف زوجك منه اذا ما يعرفه ؟
هند مدري انت لا تشغل بالك سالفة سلمان انتهت من حياتي و ما ابي اسمعه ينذكر قدامي لا بخير و لا بشر
فهد هند حنا ليش ما نعالج ابوي ؟
هند نعالجه كيف ؟
فهد ما هو القران يفك السحر ليش ما نخلي حد يقراء عليه لين يصير بخير
هند و من الي بيقدر عليه هو الان يكرهنا و ما يطيق يشوفنا و لازم يداوم على القراء كل يوم و اصلا خالتي نورة لو عرفت بتسحرنا كلنا ما هو بس هو
فهد يعني ما فيه احد يساعدنا اعمامي خوالي أي احد ؟
هند الحين محد يساعد احد لا من قريب و لا من بعيد خلها على ربك بس .....


***************


الخبر
الساعة الـ 11:00 مساء


بين قلبه و عقله حاول يسيطر على واحد منهم لكنه ما قدر خطواته قادته خلاص استسلم لصوت الحب الي بقلبه دخل محل الهدايا و طلب بوكيه ورد من الجوري الاحمر و اخذ كرت كتب عليه (( هذا و عدك لي بأنك ما تصيحين و لا تأذين عمرك هذا اولها يا سوير .. يوسف ))
طلع من المحل و اتجه لغرفة ساره بالدور الثاني وين ما وصل امه و اخواته دعى ربه ان محد يشوفه لين يكمل خطته بسلام نادى وحده من الممرضات و اعطاها البوكيه و طلب منها توصلها لغرفة ساره بعد نص ساعه .. ابتسم على الي سواه اكيد بتفرحين يا سوير الحين .. رفع جواله و اتصل في اخته امل انا في السياره خمس دقائق و انتم عندي
امل ابشر .....
**************


السبت


مكة المكرمة
الساعة الـ 07:30 صباحا


في اطهر بقعه على وجه الارض و في اكثر مكان يحس فيه المؤمن بالامن و الطمئنينه رفعت يدها لخالقها و هي تلهج بالدعاء و الاستغفار لربها من وقت دخولها الحرم شافت الكعبه شامخه قدامها حست ان كل الهموم الي بقلبها اتغسلت و رجعة انسانه ثانيه من اول و جديد تطالع الدنيا بامل و فرح التفتت لجدتها الي كانت رافعه يديها تدعي و دموعها ما جفت حبت تتركها لوحدها تناجي ربها في هالمكان و هي صائمه .. قامت تاخذ لها مصحف من الرف تقراء فيه و تستفيد من الوقت الي بتقضيه بالحرم في كل الي يقربها من ربها انتبهت بطريقها لحرمة كبيرة في السن مع شغالتها جالسين بالزاويا و كانهم ينتظرون شخص يطلعهم من وسط الزحمه ابتسمت هند بخاطرها و قررت تساعدهم السلام عليكم تبين مساعده يا خاله
ام سعود وعليكم السلام مشكورة يا بنتي لكني انتظر ولدي الحين بيجي
هند انتبهت لثقل لسانها و هي تتكلم من خلال الي درسته صارت تقدر تميز الحالات الي مرت بجلطات من نبرة الصوت زين تعالي انتظريه هنا في الظل الشمس بدت تطلع
ام سعود اخاف يجي ما يشوفنا ؟
هند لا هنا بيشوفكم زين ان شاء الله
اخذت ياتي ام سعود لظل و تبعتها هند انتي شغاله مع مدام على طول ؟
ياتي ايواه
هند طيب شوفي قولي لولد حقها يشتري من صيدلية مخده صغير تحت مدام يجلس عليها عشان رجولها ما تتعب من كرسي يجلس على طول بعدين في الم
ياتي اوكيه ....


************


الخبر
الساعة الـ 10:00 صباحا


بين كوم الاوراق الي قدامه و فكره المشغول ما هو راضي يستقر قلبه يقوله دق تطمئن عليها و شوف طلعت من المستشفى و الا لا ؟ و عقله الي يرفض انه يرجع يكلمها و يعرف اخبارها و يزيده ندم على الحركة الي سواها بالمستشفى لكن لثاني مرة يستسلم يوسف لقلبه طلع جواله لازم يطمئن عليها مهما صار ضغط على رقمها ثواني و جاه صوتها نائم نعم
يوسف الناس تقول الو هلا مرحبا ما هو نعم
امل نعم اقولها لناس الفاضية الي تدق من صباح الله خير
يوسف أي صباح الساعة عشر الحين ساعتين و بياذن الظهر قومي صلي و ادخلي المطبخ تعلمي لك طبخه بكرة تروحين بيت رجلك تفضحينا ما تعرفين تسوين شي
امل اصبحنا و اصبح الملك لله الحين انت داق وش تبى ترى ما نمت الا بعد الفجر؟
يوسف بسال عنكم و الا حرام اسال على اخواتي ؟
امل وليش ما تدق على منار و الا بس انا فاضي تزعجني ؟
يوسف بضحكة امل اكثر وحده قريبه لقلبه من اخواته و يستانس لما تعصب عليه منار نومها ثقيل بعدين هي تكسر خاطري ما احب اصحيها ما ترجع تنام زيك
امل تكسر خاطرك هااه طيب تقول داق تسال عنا ابشرك احنا كلنا بخير حتى شغالتنا و جيرانا عندك اساله ثانيه ؟
يوسف طيب قرايبنا بخير كمان ؟
امل ايه بخير
يوسف القريبين و البعيدين ؟
امل انت وش تبي توصل له بالضبط عندك حد تبي تسال عنه اسال و فكني
يوسف ما هو عارف كيف يقولها انه داق يسال عن ساره لا بس اتذكر اني وديتكم المستشفى قبل يومين
امل ايه ساره بنت خالتي و طلعت اليوم الصبح
ابتسم يوسف للي سمعه و هي اصلا وش كان عندها ؟
امل فقر دم حاد
يوسف من ايش ما تاكل هي ؟
امل وانت داق تسال عنها يعني ؟
يوسف انحرج لا بس كذا يالله كملي نومك خليني اكمل شغلي احسلي
امل تحت راسكم شي انت و هي بس بترجعولي و بنشوف ......


****************


جده
الساعة الـ 09:30 مساء


من زمان ما ضحكت بذي الطريقة اشتاقة لسوالفها و خفة دمها طول الفترة الاخيرة ما قدرت تكلمها براحه مثل كذا هههههههههههه رؤى بس خلاص ترى حنا برمضان
رؤى وبرمضان محد يضحك يعني يا ستي عيشي يومك
هند لا بس نخفف شوي
رؤى زين تعالي للجد انا تركت العمل
هند اوف ليش يكون نزار تعرض لك بشي ؟
رؤى لا بس مليت سخافته و ربك و الحمد لله ربك عوضني باحسن منه
هند من ترك شي لله عوضه الله خير منه انتي تستاهلين والله
رؤى على فكرة هما محتاجين موظفة تانيه وانا كلمتهم عنك
هند عني ليش ؟
رؤى ايش ما تبي تتوظفي و الا عاجبتك جلسة البيت دي ؟
هند مدري ما فكرت يمكن اهلي يرفضوا
رؤى وليش يرفضوا ؟
هند نسيتي اني مطلقة يعني
رؤى وادا تدفني نفسك حيه لو مطلقة خلاص لازم تنسي و تعيشي و عشان تنسي لازم تطلعي من جو البيت الكئيب دا تشوفي الناس تخالطيهم احمدي ربك انك ما حملتي منه و الا تلاقيك دحين شايله هم الي بطنك كيف بيعيش و من وين ؟ .....


*************


الخبر
الساعة الـ 10:30 مساء
حاط سماعة الجوال باذنه و مبسوط على الاخبار الي يسمعها حالة امه تحسنت كثير و اهم شي ان حالتها النفسية بالف خير يعني سبقتوني بالعمرة رمضان هذا ؟
ام سعود ماشاء عليك يمه انت شباب و فيك شده تروح لو بالعشر الاخيرة لكن انا خلاص كبرت و عجزت
سعود الله يطول لي بعمرك يا الغالية اهم شي انك اعتمرتي و ريحتي نفسك اهم شي ما تعبتي بس ؟
ام سعود لا الحمد لله يمه الله يسرها لكن ياتي تقول وحده قالت لها اشتري مخده مدري وش تقول
سعود مخدة ايش ؟
ام سعود هي كلمتها قدامي لكن انا ما فهمت عليها تقول مخده اجلس عليها عشان رجولي ما توجعني من طول الجلسة
سعود ايه مخده طبيه يعني ؟
ام سعود تقول تلقونها بالصيدلية
سعود ايه يمه عرفتها خلاص انا اكلم فارس يجيبها لك
ام سعود زين يمه انت متى بتجي ما عندك اجازة ؟
سعود الا يمه عندي عشرة ايام اخر رمضان و اول العيد باذن الله انا عندك ......
****************


الجزء الخامس و العشرون

الاثنين


جده
الساعة الـ 08:00 مساء


مجتمعين قدام التلفزيون و كل شخص تفكيره بحياته كيف بتكون ؟ وش يخبي له بكرة من أحزان و الا أفراح أم نواف هند يمه أنتي محتاجه شي من السوق ؟
هند لا يمه ما ابي شي ؟
أم نواف بس العيد قريب يا ابنيتي ولازم تشتري لك شي جديد
هند عندي يمه كثير ملابس ما لبستها و لا شافها احد
نواف طيب روحي معنى يمكن تشوفين شي يعجبك
هند لا والله نواف ما احتاج شي حرام اشتري و أنا عندي الي يكفيني اصلا توهم من شهرين مشتريتهم و لا لبستهم
نواف الي يريحك
هند خذوا أنتم يمه كل الي تبون و منوله خليها تشتري كل الي نفسها فيه حتى لو تبين فلوس ترى فيه عندي
أم نواف معي الي يكفيني يمه خلي فلوسك يمكن تحتاجينها أنتي يوم
هند أنا ما احتاجها الان اصرفيها وربك يرزقنا اصلا انا بقدم على شغل الان مع رؤى
أم نواف بتشتغلين ؟
هند ايه يمه وش فيها ؟
أم نواف بس انتي توك .....وسكتت
هند بألم توي ايش يمه مطلقة قصدك و كلام ناس وين هذولا الناس عنا لما نحتاج لريال وين الناس عني وانا اتزوجت بس عشان احافظ لكم على البيت و ما ننطرد بالشارع وين الناس هذولا بيكلونا و الا بيسكنونا راح يتكلمون وقت بس بالنهاية بيسكتون


الكل انصدم و سكت من الي قالته اتزوجت بس عشان احافظ لكم على البيت!!!!!!


******************


الخبر
الساعة الـ 11:00 مساء


متمدد على الكنبة و يقراء الجريدة اليوم مصدع من الصباح و ماله نفس لطلعه ابد حتى دوامه بالقوة قدر يخلصه .. قرب منه و سحب الجريدة من يده يوسف مصدع و تقراء ارحم عيونك شوي
سعود وهو يمسد بيده على جبينه والله مادري من ايش ذا الصداع ما هو راضي يخف
يوسف اخذت بندول ؟
سعود ثنتين ولا خف
يوسف أجل روح نام
سعود شكل ما فيه حل الا كذا
يوسف يمكن ما نمت زين أمس نام لين السحور و اصحيك
سعود يا خوفي تنام انت كمان و يروح علينا السحور
يوسف و هو ياخذ مفتاحه و شماغه لا اصلا انا بطلع مشوار مع الأهل و ارجع على وحده و نص و اصحيك لا تخاف
سعود زين يالله نشوفك
يوسف ان شاء الله .....


****************


جده
الساعة الـ 12:10 صباحا


حست بالندم بعد ما قالت لهم انها اتزوجت عشانهم لكن اش تسوي فقدت اعصابها و الحمد لله ما قالت اكثر من كذا و الا صدق بتندم على تصرفها .... سمعت باب غرفتها يدق ادخل
نواف صاحيه هنوده ؟
هند ايه بغيت شي ؟
نواف و هو يدخل و يسكر الباب ايه بسولف معك شوي
هند و بالها حست هو وش بيقول تفضل اسمعك
نواف انتي ليش ما قلتي لي انك مغصوبه على الزواج لما جيت اسالك ؟
هند وش ينفع السؤال الان ,؟
نواف انك دفعتي حياتك ثمن لطمع نورة
هند وش عرفك ؟
نواف انتي تدرين من كنتي متزوجه سلمان فيصل الـ......... ولد صاحب اكبر شركة نقل في المدينه و ينبع و الشمال الغربي كله
هند ما تفاجات من كلامه كانت متوقعه اهل سلمان باين عليهم الترف لما زاروها الحين انتهينا انا ما اخذت منه شي و هو يعرف كذا
نواف بس الاكيد ان ابوي اخذ لنورة اضعاف الي نتوقعه
هند قلت لك هو يعرف اني مااخذت شي من الفلوس الي دفعها لابوي
نواف هو قالك شي ؟
هند هم يعرفون كل شي نورة هي الي قالت لهم عني و خطبوني و اندفعت الفلوس من ام سلمان لنورة عرفت كل شي بس اهم حاجه امي و جدتي لا يعرفون بشي
نواف اكيد ما راح اقولهم بس احس اني ما قدرت اكون رجال البيت الي يحميكم يا هند بعد الي صار لك
هند لا تقول كذا عن نفسك انت وش بيدك تسوي الي صار صار و خلاص انا نسيت و ببداء صفحة جديدة
نواف عشان كذا لازم تطلعين من جو البيت هذا و لا تهتمين لكلام الناس اشتغلي و انا بنفسي اوديك تقدمين اوراقك ....


**********


الخبر
الساعة الـ 02:00 فجرا


جالسين الشباب على السفره يتسحرون تعدوا الفترة الاخيرة على وجود علي بينهم اكثر من اول بحكم زواج سيف و انشغاله ببيته صار علي يطلع مع سعود و يوسف طول الوقت الحمد لله
سعود ما اكلت ؟
علي لا والله شبعت اللهم لك الحمد
يوسف تسوي رجيم شكلك اكلك زي ما هو ؟
علي هههههههه أي رجيم و انا تقول هيكل عظمي متحرك بس تعودت ما اكثر سحور شي خفيف و خلاص
سعود هو احسن اصلا صحيا يقولون انك تاكل شي خفيف
علي ايه صح
يوسف ياليت سيف معنى الحين ما عاد ينشاف
علي هههههههه ايه والله تقول محد اعرس الا هو
سعود خلوه يستانس قبل يجوه عيال
يوسف عقبالنا يارب
علي انت و ناصر حاله مستقطعين على العرس و لا تتزوجون بس كلام
يوسف انا عندي كم شغله قبل العرس لازم تخلص و اخوك انت السبب واقف بطريقة
علي لا والله الوالدة وافقت تزوجه قبلي لكن كل ما قالوا له نخطب لك البنت الفلانيه قال لا ذي ما اباها و ذي مدري وش فيها
يوسف ههههههههه خله يتنقى الرجال براحته
علي و هو يوقف بكيفه يالله استاذنكم انا
سعود وين تو الناس
علي من عمرك ورانا دوام بنام لي كم ساعة
سعود انت لو تسمع كلامي و تجيب عفشك و تسكن عندنا يا سلام
علي هههههههه و وين انام بالصالة ؟
سعود غرفنا تشيل سريرين الي تباه منى نام معه
علي تسلم والله بفكر و ارد لكم خبر ....
*******************

الجزء السادس و العشرون

الأربعاء


مرت أيام الشهر الفضيل بأسرع ما يكون و الكل يعيش أيام رمضان الأخيرة برجاء إن صيامهم و قيامهم سجل في صحائف حسناتهم أيام مرت و مابقى على العيد الا يومين فيها أتوظفت هند مع رؤى في مركز تأهيلي قريب من بيتهم و بدت عملها فيه من أسبوع كان العمل مريح لها لأنه يخلوا من وجود الرجال فيها رجع سعود عند أهله إجازة و ترك الشرقية بكل همومها .....


جده
الساعة الـ 05:40 مساء
طعم الجلسة الأسريه غير من أمس يحس بروعة الفطور برمضان مع أمه و أخواته و عيالهم اليوم عازمهم كلهم عنده في البيت أشتاق لسوالف أزواجهم .
سعود بسرعه يأتي وين العصير ؟
يأتي اوكيه مستر أنا يسوي
أم سعود خف عليها يمه وش تلحق عليه
سعود وين بناتك و شغالاتهم ما يساعدونها مخلينك انتي في المطبخ ؟
أم سعود أم فارس و بناتها ما يقصرون يحضرون لنا السفرة بالصالة و أم عزام بنتها الصغيرة تصيح و راحت تنيمها
سعود وشغالتها وين ؟
أم سعود ما جابتها معها
سعود طبعا عوايدها أصلا ما تغير خوف أنا نستفيد منها لو بكأس مويه
أم سعود عاد وش نسوي لها يمه الله يهديها
في ها اللحظة دخلت عليهم سحر و هي أكبر بنات أم فارس عمرها 19 سنه تدرس بالجامعة مرحبا خالي الله جابك شوف جدتي ما هي راضية تسمع الكلام و تجلس بالصالة متعبه نفسها بالمطبخ و كل شي جاهز أصلا
سعود هههههه أنا اقولك وديها لين الصالة وأربطي الكرسي بالطاولة عشان ما تحرك
سحر فكرة يالله جدتي بيأذن الله يهديك و أنتي هنا
أم سعود نقلوا لمكة في التلفزيون
سحر و هي تدف كرسي جدتها إيه والله نقلوا .......


**************


جده
الساعة الـ 06:30 مساء
من بعد ما أفطرت دخلت مع جدتها الغرفة تصلي المغرب شافتها تمدد رجولها على السجادة و تهمزها بيدها قربت منها و جلسة تهمز لها رجولها جدتي رجولك لسى تعورك حتى بعد ما فرشتي الغرفه ؟
أم محمد لا يمه الحمد لله أحسن من أول بس فيه باقي ألم خفيف
هند الله يهديك لو تسمعين كلامي و تخليني أوديك المستشفى
أم محمد أنا ما أحب المستشفيات و لا ريحتها يمه خليني على رحمة ربك هو وجع خفيف و يروح
هند بس يعطونك شي يشيل هالألم مرة وحده و خلاص
أم محمد خليك مني الحين و طمنيئني كيف شغلك عسى مرتاحه فيه ؟
هند أي والله الحمد لله جدتي مرة مرتاحه
أم محمد أحسن من الأول يعني ؟
هند أكيد أحسن بكثير و أحسن شي أنه ما فيه رجال صح راتبه أقل بس الحمد لله
أم محمد الحمد لله الفلوس الي تجي بالحلال و راحة نفس تسعد أهلها مهما كانت قليله ......
*****************


الخبر
الساعة الـ 09:00 مساء


ماسكة الجوال بيد و الكرت باليد الثاني تحط رقمة في الشاشة و ترجع تمسحه تكتب رسائل شوق و غرام و قبل ما تضغط على أرسال تمسحها هي و عدته و لا يمكن تخلف وعدها له و ترجع تدق هذي رغبته ولأزم تحترمها مهما كانت تحمل في قلبها من شوق و حب تحاول تسيطر عليها رجعت الكرت مكانه بالصندوق و قفلت جوالها بالمرة و وقفت قدام الشباك تتأمل الشارع و الناس .. يا ترى كيف عرفت يا يوسف إني بالمستشفى و أرسلت لي الورد معقول تكون فعلا عرفت أنا من أكون و من بنته عشان كذا أبتعدت و الا أنت تراقبني من غير ما أدري بك معقول كلام سعود يكون صح و أنا الي شكيت أنك مثل باقي الشباب خوان معقول أنا فعلا شرفي يؤصل يوسف ؟


(( ساره من يوم أستلمت الورد ما حاولت تتصل على يوسف وتعرف منه كيف عرف بأمر مرضها لإنها بكل بساطة خافت و بداء الشك يذبحها فكرت بكل الي تعرفهم و تتوقعهم قرايبها أصحاب أخوانها أخوان صديقاتها و حتى جيرانهم لكن بدون فائدة الكل جاء ببالها الا يوسف ولد خالتها ))


**************


جده
الساعة الـ 11:30 مساء


طلع الصالة بعد ما كان بغرفة أمه يتطمئن عليها قبل تنام لها كم ساعة قبل السحور و جلس قدام التلفزيون وين ما كان فارس جالس نأمت جدتي ؟
سعود إيه نامت
فارس بس ما تكون تعبت اليوم ؟
سعود لا حمد لله باين عليها إنها بخير أصلا هي تستأنس على جمعتكم تعرفها
فارس الحمد لله أحس انوا حركتها و نفسيتها كمان صارت أفضل من دخلت مركز التأهيل
سعود إيه والله اشوف كذا لكن هي متى موعدها الأحد هذا ما فيه ؟
فارس الأحد بيكون ثاني العيد و هم ما يداوموا أول تلات أيام الثلاثاء فيه
سعود تمام أجل أنا بوديها
فارس براحتك بس ترى مركز نسائي مو تفضحنا و تدخل
سعود و هو يناظرة بنص عين يعني مرة ما يدخلون الرجال لو بس عند الرسيبشن ؟
فارس ههههههههه هو حدك
سعود و أنت وين تبى تدخل كمان ؟
فارس الأسبوع الي فات جدتي هلكتني و هي تمدح الي سوت لها العلاج تقول بنت ناس و ما فيه أخف من يدها
سعود و أنت تبي تشوفها ؟
فارس تقدر تقول
سعود وهو يأخذ الريموت و يطفئ التلفزيون قم خلنا نطلع بس بلا سوالفك الي مالها داعي .......


****************




السبت


جده


الساعة الـ 05:00 فجرا
اليوم أول أيام العيد بعد شهر أنقضى بلمح البصر بعد صوم و صلاة و صدقات و تقرب لله جاء اليوم الي تتوزع فيه الدرجات على العباد ما بين فائز بفضل ربه و خاسر بشر أعماله ,,,,,,


تنهدت و هي تحط يدها على ظهرها أخيرا خلصت كل شغلها في البيت سمعت صوت جدتها طالعه من غرفتها و هي تكبر و تهلل قربت منها هند و بأستها على خدها صباح الخير جدتي و كل سنه و أنتي بخير
أم محمد وأنتي بخير يا يمه صاحية من بدري ؟
هند لا والله جدتي لسى ما نمت
أم محمد الله يهديك يمه ليش مانمتي لك لو ساعة ؟
هند تو خلصت شغلي الحين والله لارجعت من الصلاة أنام
أم محمد و أخوانك صيحوا و الا لسى ؟
هند راحوا المسجد يصلون الفجر و أمي تصحي منال
أم محمد زين يمه عجلوا نبي نروح لصلاة العيد من بدري عشان نحصل لنا مكان
هند أبشري أنتي خلاص أنا جهزت لك كل شي بس باقي تلبسين
أم محمد الله يخليك يا يمه الحين أنا بروح البس
هند زين وأنا بطلع أخذ دش سريع و أبدل و انزل لكم .....


*************


جده
الساعة الـ 08:00 صباحا


طلع من مصلى العيد و شاف له مكالمتين بالجوال أستغرب ما هي من عوايدة يدق عليه كذا من بدري دخل السيارة ينتظر أمه و شغالتها يطلعون (( طبعا أم سعود متعودة تحظر صلاة العيد كل سنه لكنها هالمرة كانت رافضة فكرة إنها تروح مسجد الحي بكرسي متحرك لو لا سعود الي قدر يقنعها تروح عشان خاطرة ))
رجع اتصل عليه و رد من ثاني رنه سعود الوو
سيف السلام عليكم و كل سنه وأنت بألف خير و من العايدين
سعود وعليكم السلام و أنت بألف خير و من الفائزين وش ذا الحماس كله مرة وحده و حده و حده علي
سيف ههههههههه متحدين من يهنيئك بالعيد أول بشر عسى محد سبقني ؟
سعود هههههه وأنا اقول وش عنده سيف يدق و حنا لسى ما خلصنا خطبة العيد
سيف ههههههههه لا والله لا متحدين و لأ شي بس جيت ببالي و قلت اعيد عليك
سعود الله يعيده عليكم بالخير عاد العيد هذا لأزم أجمع صرتوا أثنين
سيف ههههه لا وأنت الصادق ثلاثه
سعود والله
سيف أي والله أبشرك ناصر جاي بالطريق و عاد أنت أول واحد من الشباب يدري
سعود مبروك والله يتربى بعزك يا أبو ناصر
سيف الله يبارك فيك و عقبال عندك أنت و الشباب
سعود اميين يارب ........


يتبع ,,,,,

👇👇👇
تعليقات



    حجم الخط
    +
    16
    -
    تباعد السطور
    +
    2
    -