رواية مجموعة مشاعر -13
سعيد : لبيتي في مِنى , إسمعيني سلامه , أنا لا في حياتي رمست بنيه , و ولا وديه في حياتي كانت لي علاقه ويا وحده خارج إيطار الدراسه و لا الشغل , إنتي تعرفيني و تعرفين إسلوبي , و تعرفين إنه عندي خوات بدل الوحده عندي 5 , أنا هب ياي أقولج إنا شو و إنتي شو بالنسبه لي , بس الموضوع كله كان هب براضاي و لا شوري , و أنا في حياتي ما تمنيت وحده غيرج و لا بفكر بوحده غيرج . . سلامه إنتي حياتي بكل تفاصيلها , كل المبادىء اللي كنت متمسك إبها عشانج نسيتها .! , ما أدري ساحرتني و لا شوه بالضبط , أنا في حياتي ما خنتج لو بالبنظره , و في كل الأحوال أنا ما ألومج ع اللي قلتيه و لا ألوم وحده من اليالسات ع اللي قالنه , بس إنتي طول الوقت كنتي فاهمه و عاقله و تسمعين عدل قبل لا تتخذين أي قرار , شو اللي غير المواضيع..؟؟ , ليش كنتي رافضه تسمعيني للمره الأخيره , و إذا كنا بنتفارق نتفارق بطريقه راقيه تناسب العلاقه اللي من بينا.؟ , أنا أعرف أخلاقج و أعرف إنج لا يمكن تسوين شي هب أوكيه , و مثل ما زليت أنا و حبيتج إنتي مثلي زليتي , لكن والله ما رضيت بالشين عليج , عشان جيه سويت اللي سويته , ما بقولج خسرت عشانج أشيا وايد , بس أقولج خلي الأيام تبين لج معدني , و إني لا يمكن أكون لعبت بمشاعرج و لا تسليت بج . .
و سكر ع طول و سلامه حطت راسها ع المخده و تمت تصيح . .
في مكان ثاني . .
وديمة : بلاك متردد ..؟؟
غيث : بسم الله من ويهج , شو تسوين ورايه ..؟؟
وديمة : أطالعك كيف متردد , أضغط ع زر الإرسال و فكنا , خلني أحس برجولتك لو يوم . .
و سارت . .
غيث نش , و ظهر خاري ..
في ها الحزه كانت بدور نازله من فوق و شافت عمير يرمس في الفون . .
بدور : شو تسوي ..؟؟
عمير : بسم الله , شو تسوين واعيه ..؟؟
بدور : ها , إعترف منو ترمس ها الحزه ..؟؟
عمير رفع حياته : خير ..؟؟ , ما سمعت بنت عمي , ممكن تعيدين ..؟؟
بدور : قلت لك منو ترمس الحين آخر الليل ..؟؟
عمير : ما يخصج ..
بدور : اوكيه , ما يخصني , ما يخصني . . و يت بتسير . .
عمير : لا , لا تعالي , أرمس جولي , إندوج رمسيها جان تبين ..
بدور تاخذ الفون و تسير شوي بعيد .. و تمت ترمس كانت جولي منطلقه و تكلمها و هي بس ترد , أوه رلي , يو آر شور , نايس . . عقب سكرت . .
عمير : شو قالت لج..؟؟
بدور : و لاشي , شوية أسرار . .
عمير : مثل شووه ..؟؟
بدور : سوالف حريم ..
عمير : بدوور , تدريبي فضولي..
بدور توها بترمس إلا سمعت فجت الباب جان تشرد . .
كان راشد داخل من برع . .
راشد : أنا أشم ريحة أختي . .
عمير : لا أبداً , أنا بسير أرقد . .
راشد ضحك .. ما حب أبداً يقول شي . .
مهره كانت في المطبخ تسوي قرين تي . .
رن فونها , خافت منو متصل ها الحزه . .
أول ما شافت الرقم أتيبست . .
موزه تشوف الرقم . . : ردي , ردي شوفي شو يبا . .
مهره : لا , ما برد , شو أرد عليه شوفي الساعه كم . .
موزه : يلا لااه , لا تستوين شرا سلامي , إظهري خاري و رمسيه , دخيلكم بلا غباء , بترياج فوق . .
ردت مهره و هي متردده . .
مهره : هلا مديري . .
غيث : شحالج مهره ..؟؟
مهره : بخير أستاذ , آمرني ..؟؟
غيث : أول شي أنا آسف لأني أتصلت بها الوقت و ثانياً ممكن آخذ من وقتج شويه ..؟؟
مهره : تفضل شو في خاطرك..؟؟
غيث أتنفس بعمق : شوفي مهره , أنا ريال طول بعرض , ما بلف و لا بدور أبداً , و بعيد عن سوالف المراهقين اللي مالها معنى , إنتي تعرفين إنه الصغاريه أتعلقوا فيج و يحبونج , و تعرفين كل شي عني , أنا في حياتي كلها ما قد شغلت بالي وحده و لا حطيت في ها القلب وحده , يا غير إنتي ما أعرف كيف صرتي هناك , و ما ألوم الصغاريه دامهم حبوج , و الأهم من هذا كله إنهم يحتاجونج و اللي يحتاجج أكثر منهم أبوهم . .
مهره جنه حد صب عليها ماي بارد , ما رامت تتنطق , أول مره تحس إنها ما تروم تتنطق . .
غيث يكمل : أنا أدري اللي قلته وايد , بس مثل ما قلت لج , أنا أفكر جدياً بالزواج , و حبيت قبل لآ تقدم لج آخذ رايج , مهره إنتي مواقفه تكونين في قلبي و أم ثانيه لعيالي ..؟؟
مهره أنعقد لسانها , إستحت . .
غيث ضحك : أول مره تستحين ..؟؟
مهره بغت تصيح من الحيا ..
غيث : أوكيه , الصمت علامة الرضا , أفهم إنج موافقه . .
مهره صاخه ..
غيث : ألوو يا مصر .!
مهره : أقول , إستاذ , ترى أنا مول ما أتعودت أرمس ع الفون تلايا الليل .! , جان تبى ردي يوم بتقرب جدا عمي بتعرفه. .
غيث : شو يعني .!
مهره : إستعيل قبل لا أغير رايي , يلا تصبح ع خير سلم ع الصغاريه . .
غيث : و أبوهم ..؟؟
مهره كحت ..: وياهم . .
و سكرت ع طوول و تم قلبها يدق بقوه . .
دخلت داخل , شافت حارب يالس و هي مبتسمه ..
حارب : خير ..؟؟
مهره : في ويهك الخير . .
حارب : تعالي , أمي قالت لي عن العروس , قالت أخت سيف الي إسمها فاطمه . .
مهره : إنزين , و إنته شو رايك ..؟؟
حارب : فاطمه هي نفسها هاذيج اللي دوم تشغل عبد الحليم و فيروز أول صح ..؟؟
مهره : هيه . .
حارب : كانت تلبس نظارات و دومها تدرس و دووم تلبس وردي و تقولون عنها زلمه , و كل شي تقول ما تبى .. و تحب تتحنى ؟؟..
مهره : خييبه , أشهد إنه عليك ذاكره تفلق الصخر.! , كيف تحيد كل ها الأشيا ..؟؟
حارب يبتسم : لنها كانت تعيبني , كانت كوول , و غير عن إختها أم لسانين اللي ما أدري شقايل أحسها , هيه حشيم و رزينه من يومها .. هي بعدها جيه ..؟؟
مهره تبتسم : الليالي اللي غيرت غيرها ما غيرتها . .
حارب : أنا من زمان كنت أفكر إبها , و اليوم يوم كنت ياييب الحراره حق أمي عرفتها من بدكن , كانت يالسه بين شموس و حصوه . .
مهره : حرووب , يخرب بيتك , ها و نحن نقول إنته العاقل اللي مالك في سوالف البنات , ثره ياما تحت السواهي دواهي . .
حارب يضحك و يقوم عنها : بعد , ذكريات الطفوله ما تنتسي . .
نشت مهره وراه و دخلت الحجره و هي عندها مليون شي ترمس فيه ويا فطامي الحين . .
كانت هند و بدور داخل حجرتهن و شمسه و موزه في حجرتهن و يزوي يالسه ويا سلامي اللي لين الحين تصيح منصور . .
بدور : اليوم رمست جولي . .
هند : جولي ربيعة ريرو ..؟؟
بدور : هيه , أتخيلي تمت تقولي عنه . .
رن فون هند ..: الطيب عند ذكره . .
بدور : لو طرينا مليون .!
هند ترمس شويه : هااا ( باغمت) , إنته مينوون..؟؟ , و ما ظني ترضى , صدقني ما بتطيع , لا تحرج عمرك . .أووه إصبر بسألها . . و تصد جدا بدور . .
هند : عمير يقول يبى البين كود مالج . . ( هند كانت واثقه إنه بدور بتقول لاء ) .!
بدور : أممممم (زخت فونها) و تمت تجلب فيه . .
إندق الباب و نشت تفج الباب , كانت مهره , دخلت مهره . .
هند : شووه , هيه و لا لاء . .
نشت بدور و حطت الفون جدام هند كانت الصفحه اللي مكتوب فيه البين . .
هند مصدومه , ما أتوقعت بدور بترضى . .: أقوولك ثواني و برد أرمسك , باي و سكرت عنه . .
هند : متأكده..؟؟ , بتعطين عمير البين كود مالج ..؟؟
بدور: إم هيه , بعطيه . .
هند تصد جدا مهره : طاعي , الهبله بتعطي عمير البين كود مالها ..؟؟
مهره : بلاها .؟ , خلها تعطيه
هند : أتخبلتي , شو أخوج و لا عمج و لا شوه تعطينه , منقود , حرام ما يصير . .
بدور : هندووه , ها المره أنا متأكده , طرشي له البين كود و فكينا . .
هند : لا تحلمين , أنا مستحيل أضيعج , لا تستوين نفس سلامي , كل وحده بتسويلي قصة حب ويا واحد و خلاف نقول الناس رمسوا علينا . .
بدور : سلامي يوم حبت منصور كلنا وفقنا ضدها بس شفتي كيف عقب شهرين من التردد قبلت و حبته , بعدين منصور وين و سلامي وين , منصور راعي دبي و لا إيينا من درب , لكن أخوج يكون ولد عمي , و يوم برمسه , أنا واثقه ليش هو قال يبى البين كود مالي , هندوه يلا طرشيه . .
هند تمت متردده , و ما رضخت لحنة بدور و رامت تصر ع رايها . .
مهره : ألووه , هلا , أقوولك حاط السماعه , هيه . . أنزين سجل ( و عطته الكود) . .
هند نشت متحرطمه و تبعتها مهره . .
هند : مهروه , شو اللي سويتيه ..؟ , خبله إنتي ..؟؟
مهره : لو كان يبى و هي تبى , لا أنا و لا إنتي نروم , عقب عمير شكله ها المره صادق و سيريس في موضوع بدور . .
هند : بس هب بالطريقه هاذي .!
مهره : هب كل الناس بيعرسون بطريقتج , خليها , هي بنت و عاشت تجربة الإرتباط يعني فاهمه اللي تباه أكثر مني و منج , و أنا متأكده مليون بالميه عمير ما بيرضى بالشين ع بنت عمه , خليها ترمس عمير أحسن لا تبلينا بواحد ما ندري من وين سلامي , دخيلج هندوه فكري بأسلوب اليوم و لا تفكرين بأسلوب سنة يدي .!
في ها اللحظه , إندق الباب ع اليازيه و سلامه . .
سلامه ع أغلقت الفون و خشته بين الخشبه مال الشبريه اللي ع طرف و نزلت الشرشف عليه عشان لو صار ما صار تقول إنه مفضي و ما تدري وينه , عن حد يشوف مسجات سعيد أو أي شي . .
فجت اليازيه الباب . .
دخل غانم ..
غانم : ها راقدين ..؟؟
اليازيه : هيه أبويه . .
ياي غانم بيشغل الليت . .
اليازيه : لا أبويه ما يحتاي , عيونا بتعورنا . .
غانم : سلامه راقده..؟؟
اليازيه : لا , سلامي إنتي واعيه ..
سلامي أونها : هااا شو تبين زورو ..؟؟
اليازيه : أبويه يباج . .
غانم : شويه اليزي , بغيت سلامه شويه . .
اليازيه : حاضر و ظهرت و سكرت الباب . .
كان ليت النوم هو بس اللي يشتغل . .
غانم : شحالج أمايه ..
سلامه : بخير أبويه . .
غانم تم يرمسها في سالفه مصيريه مثل ما يقولون . .
سلامه إنصدمت من اللي يقوله أبوها.! و في خاطرها إمية شي , كانت تبى تنوح في حضن أبوها و تقوله كل شي , بس ما رامت . .
غانم يحب راس بنته : يلا تصبحين على خير و نش . .
في ها اللحظه كانت شمسه ترمس راشد و موزه ظهرت برع . .
فيصل كان ياي جداها . .
فيصل : مواز . .
موزه : هلا . .
فيصل : غايوه بنت خالي شو قالت ..؟؟
موزه : قالت ما أباه , هذا ما يباني أشتغل .! , و بدوي متعصب و ما أعرف شوه كالعاده يعني
فيصل فج عيونه : شووه ..؟؟
موزه تضحك و تضربه ع جتفه : لا يوقف قلبك , ما قالت شي , بس قالت إنزين و يوم بنرد العين بيرمسون الرياييل و بيحددون الملجه ..
فيصل : ويا ويهج , هب كفو أقوولج شو صار اليوم . .
موزه : لا , فيصل و تعال حبيبي خبرني . .
فيصل رايح ..
موزه : الله يسامحك و أنا اللي دهنت سيرها عشان توافق . .
فيصل يرد و يصاصرها ..: حمد ولد يرانا القبليين في البطين أتصل بي اليوم . .
موزه : هااا . .
فيصل ..: قلبج لا يوقف بس ..
موزه أونها : و شو يبى . .
فيصل : ماشي , يسلم و سألني عنج و خذ رقم أميه , يقول بيخطبج . .
موزه ترمس عمرها : كبرنا و ها بعده يقول كل شي في الويه .! و أمي شو قالت ..؟؟
فيصل : ما أدري , سمعتها جريب المغرب ترمس أبويه و تقوله هو عنده إجازه قصيره و بيرد يكمل لنه هو يكمل ماستر و مستعيليين فبيوون الرياييل يوم الجمعه العصر , يعني باجر الصبح بنرد العين , و قالت بعد إنه إنتي عقب بتعرفين , و بعد إنه هو أتلعوز لين ما ياب رقم حد فينا. .
موزه أحمرن خدوها : على خير . .
فيصل يزخ خدها : مشكله البنات يوم يسون بلشر طبيعي . .
موزه : بس لاااه , إلا تعال . .
فيصل : ها ..؟؟
مواز : فيصل حبيبي , شقيقي الغالي . .
و عند سلامه من ظهر أبوها سارت أتمسحت و صلت ركعتين , و اليازيه تمت تهذرب ع b.b.mويا زوج المستقبل , بس من كود إخته اللي هي بنت خالها , ساعات يسوونها يوم يكون هو في البلاد "يدرس خاري" , و طبعاً أمه و أمها يدرون , و ما رمست سلامه اللي خذتها رقده. .
.
. . ( . . مجموعة مشاعر . . ) . .! *
(. . تابع للجزء الثاني عشر . .)
محد من البنات غمضت عينه قبل الساعه 7 الصبح .! , كل وحده في شي , إلا سلامه اللي رقدت من الخاطر . .
في حدود الـ 7:30 دقن أم راشد و أم حارب البيبان ع البنات اللي كانن واعيات و خبرنهن إنهم بيردون اليوم قبل الضحى العود العين و لا بوظبي . .
أتسبحن ع السريع و قبضن أقشارهن , و أتلاقن في الصاله عشان ينزلن ويا بعض تحت . .
كل وحده خبرت الثانيه شو صار البارحه و في شو كانت مشغوله طول الليل . .
هند : قولي و الله , غيث جيه قال ..؟؟
مهره : أتخيلوا . .
شمسه : إنزين , خلوني أعطيكم علومي عيل . .
موزه : هيه , كل العلوم عندها , البارحه ما بغت تسكر عن راشد . .
شمسه : بس بس , أمي و عموه قالوا لي إنه الملجه أول ما يرد بوسنيده , يعني عقب أسبوعين و يوم .!
ضحكن عليها ..
اليازيه : أوونه , أنا حامد (ولد خالها) , قالي بنملج و جيه , لنه ما يروم يصبر زود . .
بدور : عيل خلني أفجر قنابلي . .
هند : شوو ..؟؟
بدور : صح ما تدرون , عمير خذ البين كود مالي , و البارحه طول الليل لين الحينه و أنا أرمسه , أتخيلوا شو قالي آخر شي ..؟؟
موزه : شووفي , أنا أتريا دوري فقولي شو قالج و فكينا . .
بدور : قالي لو تقدمت لج بتوافقين .؟ , أونه أبويه رمساه عقب لنه في واحد خطبني و إذا هو بيرخصني و لا لاء , بس بما إنه هو ما يجب الإجبار خذ البين مالي عشان يسألني . .
مهره : اووب , اووب , و شو قلتي ..؟؟
بدور : توه خبرني , ما رديت عليه , يوم بنركب السياره برد عليه . .
موزه : أنزيين , بقوولكم ليش اليوم بنرد ..
هند : أوونه , توني كنت بسأل عموه . .
موزه : بيوون يخطبوني اليووم ..
البنات كلهن :منووه ..؟؟
موزه : حمد , ولد قوم الـ... , يرانا الأوليين يوم كنا في بوظبي . .
هند : بسم الله , من وين ظهر ها الحينه ..؟؟
موزه : و الله علمي علمج , و لا البارحه كنت أرمس أخته عوشه صديقة الطفوله , قردنت فصول و خليته يتصل به و ياخذ رقمها من عنده , و حليه الصبي فزع , منو اللي متصل به الساعه هنتين و نص .! , الله لا يروايج شقايل أتهندق ع فيصل يوم قاله أبى رقم أختك , اهتد عليه , خلاف فيصل قاله إني أبى الرقم , و عطانا الرقم و هو يضحك .!
سلامه : يوم مواز عندها قنابل , أنا عندي القصف .!
هند : شووه .؟ , بعد إنتي بتعرسين..؟؟ , البارحه كنتن عوانس .!
مهره تفرها بالمخده : عدال , إنتي و حبيب قلبج سواف , ياخي خلج فيه و في علومه أحسن . .
سلامه : البارحه أبويه ياني فليل , و قالي إني إنخطبت , و الله بغيت الأرض تنفج و تبلعني , عقب يوم المعرس صكت بي الأرض .!
مهره : شوو ..؟؟
سلامه : سعيد خطبني ..
البنات :هااااااااا..
موزه : كيف و ليش و متى ..!
سلامه : ماشي , يوم الخميس , أبوه يانا العين مكتب أبويه , و قاله إنه سعيد يباني و أنا في خاطره من أيام الجامعه و ما طاع ببنت عمه و هو مصر و ما أعرف شوه , و ما رام يضغط عليه زود و يبون يفتحون صفحه يديده عشانا . .
شمسه : و عمي شو قال..؟؟
سلامه : قال بيسألني و خصه سعيد خبره إنه من خاطره يباني و أبويه يتريا الرد عشان إيونا العين و جيه لنه سعيد وايد مستعيل و خصه إنه يكمل حق الدكتوراه . .
موزه تصفق : الحينه ظهرت العيله فيهم كلهم , حق الكظه . .
اليازيه تدزها : إحمدي ربج , هب أنا اللي بتريا لين الصيف . .
هند : و أخيراً , بنسكر صفحة العزابية , بنعرس , وناسه .!
مهره تضحك : أقوولكم , أحتي شكلها طولت وايد رمست ويا سيف من جيه أتخبلت . .
موزه : غايوه وافقت ع فصوول , الفال حق حروب . .
مهره : لا فديتج البارحه (خبرتهم بالسالفه) ..
بدور ك عزت الله فطووم ما بترقد أسبوع جدام . .
مهره : و حياتج من الفرح تمت تصيح , زغت لا يوقف قلبها ..
موزه : عيل الفال حق مطر , أحيده إميشن ع عويش أخت حمد. .
البنات تمت يضحكن و حولن تحت . .
كانوا معشر الشباب خاري يحررون السايير , و بو غانم رد قبلهم فما شافوه . .
و لا وحده سألت ليش بنرد و جيه لنهن عرفن و شربن الكرك بهدوء لنهن مواصلات من البارحه . .
دخل حارب اللي إبتسم في ويهم . .
حارب : يلا . .
هند : يلا , خلاص حولوا الشنط من فوق . .
نشن يودعن بعض . .
و يسلمن ع بعض . .
بدور : وين عمير ..؟؟
هند في سيارته , ما حول ليش ..؟؟
بدور تراويها آخر شي قاله لها في محادثة اليوم الصبح . .
هند ضحكت : إنزين جاوبي . .
بدور : عقب , هب الحين . .
هند : لا أبويه , هب يوم هو يسوق , ما فينا ينفدنا ريلي يباني , لا تخفينه ع الدرب أحذوج دودي . .
بدور : إنزين , إنزين بخبره قبل لا تتطلعون . .
و وايهن بعض الموايه الأخير قبل لا يسرحن جدا بيوتهن . .
مهره : هب جنه البارحه كل وحده فينا تصيح الريل ..؟؟
موزه تضحك : سبحان الله , وين كنا و وين صرنا . .
هند : وييه , شلوا الدنيا من الهرنات , يلا بنات في حفظ الله . .
شمسه و هند ركبن ويا عمير بس ها المره بدون بدور , فيصل ركَّب موزه و بدور و سلامه وياه , أما سلامه سارت ويا أمها مع راشد , أم حارب و مهره ركبن ويا حارب , كلهم راحوا إلا عمير اللي كان يتريا سوما لين ما تييب دلال أمه . .
في مكان ثاني . .
عليا : حشى يا غيث ما بغيت , و أخيراً بتعرس ..؟؟
وديمة : عمي , متى بيصير الموضوع رسمي..؟؟
أبو فاضل ..( أبو غيث) : رمسنا اليوم الصبح عمها , ظهر ربيعي أيام المطوع سالم , و بشرنا بالخير و غيث رمس أخوها العود و قال أقربوا . .
وديمة تضحك لعمها , و غيث أبتسم بإرتياح , و أخيراً بتكون مهره قريبه منه و من عياله . .
بدور يوم ركبت السياره و فجت محادثتها ويا عمير . . و تمت تقرى ..
كان سائلنها سؤال . .( بدور , لو قلت لج إني أبغيج بتوافقين ..؟؟) ..
بدور ردت عليه . .( ليش , عندك شك إني بردك..؟؟ , قررت أعوضك عن كل الفلعات , بس لا تبطي تراني في يوم و ليله أغير رايي . .)
عمير كان توه بيظهر من المزرعه , فج المحادثه و تم يقرى و ضحك . . طرش لها ( خلاص تم , بقول حق أمي عن لا تغيرين رايج) . .
ضحكت بدور يوم وصلها كلامه و في نفس اللحظه كان هو يبتسم لأنه بيعرس . .
كلن قبض خطه و رد لبيته . .
في ها اللحظه , كل وحده تمنت لو يكون في دريشه و توايج ع المستقبل اللي بيي , لكن ما يرومن .! كل وحده سرحت و راحت لعالم ثاني .! , و حسن إنهن صدق كبرن . . شمسه و مهره و هند دمعت عيونهن و هن يتذكرن أبوهن , موزه , اليازيه , بدور و سلامه , تمنن لو إنه أخوهن هنيه بعد يشاركهن اللي فيه . .اللي دمعت و اللي ضحكت , لكن في النهايه كلهن أنصفتهن الدنيا و خذن الإنسان اللي يبغنه و بطريقه غير عن الثانيه , يمكن غلطن شويه , و لا تنازلن عشان الحب , لكن في النهاية هاذي مشاعر إن يت ما يقدر الإنسان يسيطر عليها , عموماً اللي كتبته لا يعبر عن واقعي , و فيها أشيا وايد نسجتها من خيالي , بس حبيت أشاركم الخيال من زاوية منعكسه ع الواقع , لنه حلو نرفه عن عمارنا بشي حلو , و ياما نهاية المر عسل .! , و الظلام يتبعه فجر , كلنا مهمومين و يمكن محرومين , يا غير القناعه إنه باجر بيكون أحلى بحد ذاته سلاح , و الله يتمم ع الكل بخير , و الفال لكل اللي ما عرست و اللي ما عرس .! . .
النهاية . .
محبتي , برستيج بدويه .!
11:32صباحاً , 7 – رمضان1430 هـ
17th - Augst-2010
.
تجميع زهور حسين
اللهم لك الحمد حتى ترضى وإذا رضيت وبعد الرضى ,,, اضف تعليقك