رواية مجموعة مشاعر -7
صدقيني هو غير عن الصوره اللي تشوفينها في الدوام أستخيري و فكري عدل , هذا موضوع مصيري و لا تجبرين نفسج ع شي ما تبينه و كل شي قسمه و نصيب .
هند تبتسم لها : لا تحاتين , بفكر عدل و بعطيج رايي النهائي جريب ..
و ظهروا ربع و ردت هند داخل و لقت شمسه و مهره يلمون الحفله اللي مسوينها و يرتبون المكان ..
يلسن يرتبن و ينظفن و يسولفن و خلاف كل وحده سارت حجرتها صلت الفجر و أنخمدت ..
.
. . ( . . مجموعة مشاعر . . ) . .! *
(. . الجزء السابع . .)
في حدود الساعه هنتين نشت شمسه و نزلت و هي مكتأبه لنه اليوم " الجمعه " يعني باجر لازم ترد الشارجه عشان الدراسه بتبدا , نزلت شمسه و هي مسطله ع الآخر , سمعت صوت في الصاله و ضحك و سوالف , نزلت شوي شوي عشان توايج ..
بس ما تدري إنها كانت تبين ..
عمير : شمسووه يا أم الكشه تراج تبينين ..
شمسه بغمت بغمه من أفادها و ربعت جداه ..:عمييير حبيبي مس يووو ألووووت . و فلم هندي طبعاً .!
أم حارب : هيّدي لا تجتلينه ..
شمسه : أميييه هب مصدقه , أقوولك عميير أقرصني ..
عمير يضحك : بلاج , أول مره تشوفيني .!
شمسه : هيه و حياتك , غادي حليو يا الحمار .!
عمير أونه زعل : أفا , أنا حمار .!
شمسه تيلس في ثبانه : حمار , و حمار و حمار خوفتنا عليك يا الحمار .!
شويه إلا دخلت هند , هي الثانيه مسطله ..: بلاكم تباغمون , روعتونا.!
فجت عيونها عدل , يت مهره وراها ..: شو صاير ..!
تمن هن دقيقه منصدمات , يعني أنشلت حركتهن , و فجأه مهره بغمت ..: ريرو , وحشتنا ..
و دموع و صياح . .
أم حارب تبى تفتك من الصدعه : أييه , بس حشرتنا , قذيتنا , خلاص فهمنا أشتقتن له .!
مهره : متى ييت..؟؟
عمير : اليوم الصبح ..
شمسه : قرت عيوني بشوفتك و الله ..
أم حارب تنش ..: أنا بييب دلة القهوة ..
و هي ظاهره رن تيلفون عمير ..
عمير: أييه , شمووس خوزي برد ..
شمسه : من ثجلي .! , رد , رد لا تحاتي ما بتصوخ .!
عمير : ألوه , هلا الغالي .. لا , لا أرمس شموس يالسه في ثباني ما خلتني في حالي .! , طاع و أنا أتشكالك ويا ويهك , لا محد سأل عنك لا تخاف و لا بيسألون , هيه الله يحفظك , طمني حبيبي , في داعة الرحمن ..
هند : منوو , راشد..؟؟
عمير يسكر الخط : هيه , يتنشد يقول محد سأل عني ..
مهروه : شموس , ياللي ما تستحين , كيف ما تسألين عنه.؟
شمسه أتفاجأت بالسؤال .!
مهره : ليش هو نزلك و راح .؟
عمير : لا , بطى عندنا أقولج ما طاع يحدر لين ما حلفت له مليون يمين إنكم رقود , و توه من شويه يوم سمعنا قرقرعة نش و راح ,أو بالأحرى يوم سمع شموس تغني من فوق , أونه ما يبى يخرب الجو العائلي . .
شموس حطت إيدها ع ويها من الفشله .
هند : أفا , راح من دون لا يشوف شموس . .
مهره : جنه إلا ما يبى يشوفها . .
عمير : أفف منه ما رحمني , شمسه و شمسه ياخي لو أختي بس بديت أمل منها من كثر ما يرمس عنها .!
هند : أووه لا تذكرني , نفس الحاله , داخل يسأل عنها و ظاهر يسأل عنها ..
مهره : له له , منوو قدج شمووس ..
شمسه قبل لا تنطق ..
أم حارب : و منو اللي داخل يسأل عن بنتي و ظاهر يسأل عنها ..؟؟
عمير : راشد , قذانا بها , تقول ما أنخلقت بنت على وجه الأرض غيرها .!
أم حارب : ويدي عمير , جَيه ترمس عن ختك .! , تستاهل بنتي , إلا تعالوا عذيجه رمست عن شمسه و أنا قلت لها لين ما يردون و هي تخلص خير .
شمسه منصدمه :هاااا.!
مهره : هويتي في الجنه .! , بلاج شموس ما تفهمين .! , يقولج حاجزينج حق راشد ..
هند تضحك : تحتاجين توضيح زود .؟
شمسه أفتشلت ما عرفت شو تسوي ..
مهره : هندوه , أنقولها ..؟؟
هند : هيه , هيه حرام خلنا نقول الصدق ..
أم حارب : شو عندكن..؟؟
مهره : لا , أمي سوالف بنات ..
عمير يضحك : شموس , تدرين إنهن قصن عليج و عقنج في مقلب و كل اللي قالوه جذب في جذب و اللي نقلنه صدق نقصن منه و لا زادن عليه ..
مهره : إنزين تراك شريكنا ..
عمير يرفع إيده : انا ما يخصني ..
شمسه أشتعلت ..: شووه , يعني انا أستويت مقصه ..
مهره تنش تبى تشرد : وييه أمييه أنا بسير حجرتيه طشوونه ..
و تربع و تربع هند و شمسه وراهن , متحلفه لهن ..
دخلت كل وحده حجرتها و قفلت الباب ..
لمحت مهره تليفونها و أتذكرت إنه من البارحه ما شافته , شافت مجموعة رسايل و مجموعة مكالمات و قبل لا تفج أي شي رن الفون .
مهره : ألوه , مرحبا مي ..
مي : هلا مهره شحالج..؟؟
مهره : بخير يسرج الحال و إنتي .؟
مي : زينه , إلا كنت بقولج في إحتمال يردونج لمكانج , إنتي شو رايج.؟
مهره : ليش يردوني ؟.
مي : ما أدري , بس سألج يعني لو ردوج بتردين.؟
مهره : ممممم ما أدري , تدرين ملل في البيت ماشي ورانا , ليش ما أرد .؟ عادي كنت أفكر أشتغل أنا أصلاً .
مي : آها زين الله يحفظج مع السلامه .
مهره مستغربه : مع السلامه ..
مهره ترمس عمرها : بلاها مي .؟ , ترمسني و جنه حد ع راسها .! , أكيد الموضوع فيه إن ..
و تمت تشوف فونها و أندمجت في مسجات ربيعاتها اللي يهنونها في عيد ميلادها و ما كملتهن من كثرهن فسارت بتتسبح و بترد تكمل .
في صوب ثاني هند كانت مرتاحه , و صلت الظهر و صلت إستخاره للمره الثانيه , تمت تفكر في سيف .
هند ترمس عمرها : ليش أرده , هو إنسان أوكيه لو إنه عوف و ساعات ما يتشاهد لكن أحسه زين و طيب و اللي مر به هب شين , ما أدري على خير . .
فزت ع دقة الباب . .
و راحت تفج ..
حصه : تراااا
هند : بسم الله الرحمن الرحيم .. شو تسوين هنيه ..؟ , ما وراج بيت ريل و عيال .! , البارحه لين نص الليل ويانا .!
حصه تفج فصم عباتها : بسم الله الرحمن من ويهج , اللهم يا كافي , ها بدال ما تقولين لي أقربي , حياج .! , فقدت ويه عدوينج , ريلي عند أهله , ماخذه إجازه منه , و عيالي عند عماتهم متولهين عليهم , فقلت دامني فاضيه و تم لي أسبوع و أرد لندن خلني أسير و أرد الأيام الخوالي ويا صديقة الطفوله ..
هند تضحك : والله سوري , دشي بس كنت أفكر و جيه ..
حصه تدخل : تعاااالي , خلني أخبرج ع سالفة العشا ..
هند تتناول شيلة البيت : لا ,لا ها السالفه يبالها مزاج و كيف .! , قومي خلنا نسوي شي نشربه تراني ع لحم بطني من أول ما نشيت . .
حصه تضحك بمكر : يلا . .
سارن المطبخ اللي برع ..
هند : أشوف سياره غير سيارتج ..!
حصه : هيه ترى سواف يوم درى إن عمير هنيه أتصلبه و أتفقوا يتشاوفون . .
هند تدخل المطبخ : زين , زين . .
هند تفج الثلاجه و تشوف شي يتاكل .. و حصه تسوي الكوفي . .
خلصن و ردن الحجره , قفلت هند الباب و يلست ..
هند : يلا .
حصه : تدرين يا طويلة العمر , البارحه ردينا متحيرين . .
هند تقاطعها : حصووه , مَشي مَشي قولي المهم..
حصه : أنزين , يوم ردينا و جيه و بدلت ظهرت جان أشوفه في الصاله ميلس و يشتغل ع هـ اللاب جان أساله تبى تتعشا قالي لاء , جان أنزل و أييب الأشيا و أيلس حذاله و أحط الأشيا حذال أوراقه و أشغل التيلفزيون , أتحرطم علي لني حشره و بخيس أوراقه و جيه لكنه سكت عقب , و أنا آكل و أتمدح في أكلج يمي و لذيذ و جيه شويه إلا و مغط إيده وياي و شل الخاشوقه الثانيه و شل الصحن عني , اتخيلي شو قالي السخيف..؟
هند بشغف : شو قال ..؟؟
حصه : قالي بسج غاديه درام و تتدربحين جنج كوره .! , باجر ريلج بيعرس عليج و بتجتلين عمرج و لا بينفع فيج رجيم .! هند ضحكت : قوولي والله .!
لحظة تفكير و تأمل ..
هند تطالع حصوه من فوق لين تحت : هيه و الله وايد متنتي حصوه ..
حصه : والله , و الله ..! و أتوالفوا هند و سيف أرحمونا عااد..!!
هند تضحك ..
حصه : تمينا جيه لين أذن الفجر و عقب تم يمدح الأكل و جيه , و خبرته إنج مسوتنه .. قالي زاده حلو , و لا شكلها قاريه فيه .! , و لم أغراضه و راح . .
هند : بس .!
حصه : لا وحياتج منو يقول أخليه في حاله , أتريته و يوم ظهر الصبح أستلمته , و تميت أسأله مليون سؤال عنج و ما أعرف شو , أتحسبته بيصفعني و لا بيرقعني براشدي يحيس فجي , لكن و حياتج يضحك و يسولف تقول ردينا عشر سنين ورى قبل لا يتوفى حمود أخويه , و عقب ما طفرته و لوعت بجبده أعترف لي و حلفني مليون حلفه ما أقول حق حد ..
هند : أيييييييه , حصووه لا تقهريني ..
حصه : لا , لا , قلت له بخبرج و جيه و ضحك و قالي ما ترومين لنج حالفه , و جان تبيني بروحي بخبرها ..
هند : شووو ..؟؟ , يلا عااد . .
حصه: بتصل به بس و الله ما تزعلين ولا تنجرحين و لا شي ..؟؟ , أسمعي بأذنج عن لا تقولين أبالغ و لا أزيد . .
هند هدت شويه أو بالأحرى خافت : و الله , بس يلا لا تطيرين حمامة أفادي ..
حصه تتصل و تحط ع السبيكر ..
سيف : هااا , شو تبين يا الدرام ..؟؟
حصه : سيفووه ..
سيف : تاج راسج سيف لو سمحتي ..
حصه : أنزين , وين إنته ..؟؟
سيف : ف الدرب سايرين العين بنتلاقى ويا راشد. .
حصه : و العثره العين .! , شو تسوون ..؟؟ , هيه صح بتتلاقون ويا راشد .!
سيف : أنقفضي قولي شعندج قبل لا إيي عمير ..
حصه : الموهيم , ترى الحين بخبر عليك عقب لا تقولي قلتي ما قلتي ..
سيف : شو بتقولين ..؟؟
حصه : إنك و إنك و إنك و عقب بصوم يومين و لا ثلاث أيام ..
سيف : إني أحب هند و أترياها ترد و أبى أملج عليها قبل لا أسافر , و إني ما أبى أخسرها , بتقولين كل ها الأشيا , خلاص أنا قلتها عنج . .
هند أتبخرت , دوروها الحين !
حصه تبى تضحك بس ما قدرت . .
سيف : حصوه , يا المكاره , أدريبج حاطه ع السبيكر فقلت تسمع مني أحسن منج يا أم الخراريف ..
حصه : أنا أم الخراريف .! , بس أوكيه , قولي كيف عرفت .؟
سيف يضحك : من نصخها و من قلبها اللي يرقع جنه طبول خوال في زار . .
حصه ضحكت : و منو معلمنك ها الرمسه اللي مالها معنى .!
سيف أبتسم : أسئليها , هي تعرف منوه معلمني . .
حصه : سواف , ضحكتك حلوة , أضحك زود . .
سيف يضحك : يلا , يلا , مع السلامه و دواج عند ريلج بعدين بس إتريي شويه . .
و سكر عنها ..
حصه : ها هندووه , أشووفج إلا أتبخرتي من الحيا ..!
هند تخش ويها في المخده و تصيح من الفشله >> منكر بنات .!
حصه : عادي نشي أمبونه سواف جيه ما يخيل من حد . .
شويه إلا الباب يندق نشت حصه تفج الباب ..
شافت شمسه ..
شمسه : بلاها هندوه ..؟؟
حصه : أختج ذايبه ..
شمسه : بلاها ..؟؟
حصه تلم شعرها و تعدل شيلتها و تشل شنطتها : أنا خلصت مهمتي , يلا مع السلامه ..
و سارت ..
شمسه ما تدري شو السالفه و سكرت الباب و طلعت .!
مهره كانت في حجرتها و ردت مي تتصل ..
مهره : ألو هلا مي ..
مي : اهلين مهاري , سووري ما رمت أبطي , أستاذ غيث كان ع راسي يوم أرمس و ما رمت أطول ..
مهره مستغربه : ليش شو صار ..؟؟
مي : اليوم داوم و يوم عرف إنهم أقالوج و جيه شل الدنيا و حطها و غسلهم واحد واحد و طلع خاش له كم واحد بين الموظفين و يطلعون الأولي و التالي , و ياني و قالي أتصل بج و سألج بتوافقين تردين الدوام و لا لاء ..
مهره : هيه , جيه السالفه ثرها . .
مي : أقولج , مهتم فيج بزياده , تم يسألني عنج أمية سؤال . .
مهره : زين , زين . .
مي : هيه و شي أكثر بس الحين الشغل لين فوق راسي برد أرمسج خلاف أوكيه ..؟؟
مهره : الله وياج ..
و سكرت ..
كلمت المسجات و هي في حالة ذهول , ليش غيث يسوي كل ها .! , و اللي تشوفه في تيلفونها زادها ذهول . .
نزلت هند تحت عند أمها , و خبرتها إنها موافقه ع سيف و طبعاً الكل عرف و الموضوع بيصير رسمي الحين . .
شمسه تشهق : هندووه بتعرس .!
هند : هيه ليش هب عاينج.!
مهره : ليش الحسد .؟ تراج بتعرسين وراها , قولوا إلا أنا المسكينه ..
أم حارب : و إنتي أم راسين , شو عن راشد .؟
شمسه أتغير شكلها و أتلون ويها بأمية لون ..
مهره : امييه موافقه بس تتبزا ..
هند : أيوا , تتبزى لاقيه واحد يحبها و يموت عليها قالت خلها تثجل دمها عليه شويه .!
شمسه : هيدووا , كلن قبضني بشراع و ميداف , مبدئياً ما أدري , ما أبى يجلبون الموضوع رسمي لين ما أخلص السمستر ها , يعني أمه و عمي و العايله كلها تدري , لا لا ..
أم حارب : و ليش ..؟؟
شمسه : أبى ذهني يكون صافي . .
أم حارب : يعني شو نرد .؟
شمسه : إني ما أدري و يوم جسيتي نبضي قلتي بعدين خير , عاد أمي دبريها , لين ما أستقر نفسياً عقب خير ..
و نشت .!
هند : بلاها ..؟ حرام عليها الريال كم بيصبر ..؟؟
مهره : ما دواها غير راشد يعرس و تتأدب ..
أم حارب : خلوها ع هواها بعدها ياهل ..!
مهره : عيل أنا بعدني ياهل .! , ما بينا غير سنتين .!
هند : لا , لا , رضيعه نحن اليهال .!
مهره : أميه , هاي حرمه عمرها 23 يعني تقدر تتخذ قرارتها , و توزن الصح و الغلط يعني أنا أم الخمس و عشرين ياهل بعد و عمير بو الست و عشرين ياهل , كلنا يهال , محد ريال غير حارب بو التسع و العشرين ولا حارب مراهق بعده.!
أم حارب تبى تشوف هند دام فجوا السالفه : و إنتي أمي هند , شو الشور في سيف ..؟؟ , يعني بعد تبين تستقرين نفسياً و لا أخبرهم ترى الصبي مستعيل و ماكل أفاد أمه . .
هند ضحكة في خاطرها : الله يجدم اللي فيه الخير , شوفوا و أنا ما عندي خلاف. .
أم حارب : يعني , أبى أسمعها , هيه و لا لاء..؟؟
هند بحيا : هيه , هيه أميه ..
و نشت >> وحليلها خيلت .!
مهره : طاعوا , أستحت , وايه عليج يا مهره عنستي .!
أم حارب : كل تأخيره و فيها خيره . .
هند في حجرة شمسه ..
هند : ليش جيه , هب حرام عليج ..؟؟ , الريال شارنج , و الله إنه يحبج ..
شمسه تنش و تفج الباب : شوفي هند , لا حد يرمسني في ها الموضوع , دخيلج بترمسين عن راشد أقبضي الباب .!
هند غيضت ع أسلوبها و شكلها شمسه راكبه راسها و ما تبى ترمس حد . .
شافت مهره ..
مهره : شو فيج ..؟؟
هند : اختج , و الله هب ويه حد يحبها .!
مهره تضحك : أمي ترمس أم سيف , يقولون الملجه أول ما يرد حارب . .
هند : مهروه , خلاص ممكن .. ( أونها مخيله ) .!
مهره تسحبها من إيدها : بلاج , وين سرتي خليني أكمل لج , يقولون بعد إنه مستعيل . .
هند خلاص مستحيه : أنزين , أنزين , فجي إيدي فهمت . .!
مهره تفج إيدها : تدرين , البارحه لقيت غيث مطرش لي مسج , يقولي كل عام و إنتي بخير ..
هند :هاااااا .! , أقين أقين ..؟؟ , شو تقولين ..؟؟
مهره : و لا خلا مي تتصل بي تتنشدني إذا برد الشغل و لا لاء و إنه يسأل عني وايد . .
هند تقرصها : ليش ها الحركات .؟ , عنده شي خله يقوله طوالي , هب بأسلوب اللف والدوران .!
مهره : و المكشله أمايه يوم تسألني عنه ما أدري بشو أرد .!
هند : ما عليه , ما عليه خير إن شاء الله خير . .
أم حارب : أمي مهره , وين تيلفونج .؟ أتصلوا بعمج برمسه . .
مهره : لحظه بييبه . .
مهره سارت تيبه بسرعه و يت . .
مهره : شو السالفه .؟
أم حارب : أتصلت ب حارب , يقول ييته تأجلت , ما يدري متى بيي , و يوم قلت له عن هند قال خل يملجوبها عادي .
مهره : بس أمي ما يصير , أخوها العود محد . .! , بيقولون ها الناس ما عندهم مذهب و لا يعرفون السنع . .!
هند : أمي صح رمست مهره بيقولون بيعقون بنتهم عق . .
أم حارب مطنشه : مرحبا الساع بو راشد , هلابك زود . . و سارت بعيد عنهن . .
هند : سيف ساحرنها و لا شو .!
مهره تقرصها : منو قدج , ميت عليج و ميت ع طاريج , الله الله يا سواف غديت عاشق يا ولد يرانا الأولي !!. .
هند تستحي من ها السوالف . .: أنا بسير حجرتيه طشونه , شوفي شو السالفه . .
دخلت هند حجرتها و شغلت اللاب , من زمان ما شغلته , و هدت الأغاني ع طولها و تمت تفكر بكل شي , رمست بدور بنت عمها ع المسن و هي و تتذكر كل شي , و يوم قال " طبول خوال في زار " , معناته يا إنه سمعها أو لميا خبرته , أتذكرت لميا و قالت خل تتصل بها . .
تمت تهذرب وياها و لميا كانت تدري و كانت مستانسه لهم و بطت ترمس ويا هند . .
في حجرة شمسه . .
وديمة : خلاص عيل , بشوفج باجر , و بنتفاهم . .
شمسه بحزن : خير , خير . .
وديمة : بلاج شماسي ..؟؟
شمسه : أقولج , أختي تدق الباب , يلا ربي يحفظج باي . .
و سكرت . .
فجت الباب حق مهره . .
مهره : باجر قوم عمي بيون و خالي علي بيي . .
شمسه : ليش .؟
مهره : عشان ييت عمير بتتأخر و سيف مستعيل و الرياييل باجر بيون يرمسون . .
شمسه تسكر الباب : خير , خير . .
مهره أستغربت , ما تدري إنه شمسه حطت راسها و رقدت و الناس توها المغرب .!
راحت مهره عند هند اللي توها مسكره الفون . .
هند أستغربت بس عقب أستانست و ما تدري ليش . .
أتصلت بحصه . . و خلاف حولت المطبخ تشوف شو بتعابل ويا مهره . .
ع الساعه وحده و نص كانن مهره و هند يشوفن التيلفزيون . .
دخل عمير و يلس حذالهم و توه الفلم مخلص . .
مهره : ردينا حق هياتت الشباب لين آخر الليل . .
عمير يشوف الساعه : وين تو الناس . .
هند : هيه , أكيد تو الناس , لا إنته اللي تسوق و لا إنته اللي ضارب خط , و لا اللي تكرف طول الأسبوع. .
عمير : هيه , ثرها جيه السالفه , إنتي ما خذتيه لين الحين و كبر راسج . !
مهره : لا تلومها , من الحب . .
هند : مهروه , شو ها الرمسه . !
عمير : بس صدقيني , ما تحبه كثر ما هو يحبها . .
هند : و إنته شدراك .؟
عمير : و الله يلسنالهم يلسه أنا و ذياب ربيع سيف و بعد ربيع راشد علي و طحنا فيهم . .
هند : حرام . .
مهره : وحليلهم و الله . .
عمير : ها اللي ما يبى يعرس و لا بيحب و لا ما أدري شووه . ! , الحينه ميت و مستخف . .
مهره : شفت عاد , الفال لكم أخواني , بسكم لازم تشبعون من ها العزوبيه . .
عمير : أووه , خليني أشتغل أول شي , الحمد لله إني سويت الحادث عقب آخر إمتحان فاينل , صح , إلا تعالوا , بسألج . .
مهره : شوو .؟
عمير : شي واحد يمكن يشتغل وياج . . بس أسمه أووه لحظه راح عن بالي. .
مهره : أنزين أوصفه لي . .
عمير : جيه طويل و مملوح خشمه طويل و عيونه وساع حاط تقويم ذهبي و زقرت و كاشخ و شويه معضل , لوكه سبورت نفسنا أنا و رشود , يقول يشتغل مدير بنك بس اللي يشوفه ما يقول جيه . .
مهره حست ها الوصف هب غريب عليها . .
هند : أنزين بلاه ..؟؟
عمير : كان إيي ويا ربيعه عند ربيعهم و وديه دخل عندي غلط و خلاف قام إيين دوم و بينا إتصالات و يسولف ويايه . .
مهره : آها . .
عمير : يقولي عنده ولد و بنيه , وحليله مطلق , و الله إنها خبله وحده تطيع ع مزيون نفسه و تودره لكن ما أقول إلا مالت ع بنات ها الزمن . .
هند متعاطفه : وحليله , ليش طلق .؟
عمير: و الله مطيت الرمسه مط منه و لا رمس بس اللي عرفته إنه وحده تشتغل وياه يقول زينه و حشيم و راعية فزعه يوم شردت البيبي ستر مال عياله و أمه مسافره هي فزعت عليهم و شلتهم عندها . .
مهره : أسمه غيث .؟
عمير : هييييه , عليج نور غيث غيث . . بو حمد هيه . .
هند : هااا . .
عمير : بلاج .؟
هند : تدري إنه هو مدير مهروره اللي . . . ( قصت عليه السالفه كلها ) . .
عمير : أوونه , يعني البنت اللي يمدحها أختي و العيوز اللي يرمس عنها أمي .! , الله كيف الدنيا صغيره . .
مهره تبى تغير الموضوع : إلا خبرني , متى بيون قوم عمي باجر . ؟
عمير : ع حسب عمي , لنه راشد مشغول و بيسافر عقب كم يوم . .
هند : وحليله راشد . .
عمير : خبرتني أمايه عن أختج الخديه , و الله إن كان يتريا و من أتصلت به أمه تخبره ويم وديه وحده حسيته أتضايج . .
مهره : و أمايه حالفه علينا محد يرمسها و لا يقولها شي . .
عمير : هيه حلفت علي بعد . .
هند : قوم عمي بيون بروحهم .؟
عمير : لا كلهن بين بنات عمي و حرمته بعد . .
هند : الحمد لله , ردت المياه لمجاريها يعني . .
عمير : هيه من رد عمي كل شي بأسامينا كل شي رد شرا قبل و أحسن . .
مهره تتثاوب : بسير أرقد يا عرب . .
عمير : و أنا وياج , يالس أهيت ما يقول توني راد من السفر . .
هند تبند الليت و الكهربه مال التيلفزيون : و أنا وراكم . .
عمير : تصبحون ع خير . .
هند و مهره : و إنته من أهله . .
راحت مهره قبل . .
عمير : هندووه تعالي بسألج ..
هند : هلا . .
عمير : منو من بنات عمي بيعرسن ؟
هند : ممم , محد , يزوي محيره حق واحد بعد يصير لهم , و الباجيات محد بيعرس . .
عمير : و بدور .؟
هند ضحكت : بعدك تحيدها , بدور كانت مالجه ع واحد يصير لنا من بعيد , بس عقب فجوا الملجه و تمت عاد بليا عرس و محد ياها يوم يعرفون إنها أتطلقت في الملجه . .
عمير : آها , الله يوفقهم . .
سؤال عمير كان وايد عادي , و ما كان أكثر من مجرد فضول , بس هند أتعلمت من مهره تفسر كل شي ع هواها و فهمت سؤاله شي ثاني . .
هند : وحليها دودي , ما تستاهل . .
عمير : إنتي ترمسينها .؟
هند : هيه أكيد دوم ويا بعض أصلاً , ما كنا نرمس بعض ع الفون كان بي بي إم . .
عمير : زين يعني العلاقه وطيدة . .
هند : هييه وياي و ويا مهروه , بس وياي أكثر شويه . .
عمير يفج باب حجرته : تصبحين ع خير .
هند : و إنته من أهله . .
.
. . ( . . مجموعة مشاعر . . ) . .! *
(. . الجزء الثامن . .)
الساعه 5 العصر في بيت المرحوم صقر . .
كل شي زاهب و الكل على أهبة الإستعداد , و ما تم شي إلا عيال عمهم غانم بيونهم و بعدهم أهل سيف . .
أم حارب : شمسه وين , ما ريتها من الصبح .؟
مهره : راقده , ما طاعت تنش . .
سمعوا الهرن , يعني وصلوا و وراهم اهل سيف و أخو أم حارب بعد وصل . .
دخلوا الرياييل طوالي الميلس و الحريم اللي هن بنات عمهن و حرمته دخلن الصاله يتوايهون و سالفه . .
سارن البنات ركبن فوق . .
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك