بداية

رواية بعد كذبك لا ترتجي مني نظره -28

رواية بعد كذبك لا ترتجي مني نظره - غرام

رواية بعد كذبك لا ترتجي مني نظره -28

في جهه ثانيه من القصر .. طلع من غرفة جدته وهو يمسح دموعه .. انصدم بوجود بنت في نفس الممر
سعود من نزل راسه عشان محد يشوف دموعه: هلا اريج توني كنت بناديك عشان تعطينها ابرة السكر
:انا مواريج... انا زوجة ماجد
سعود رفع راسه: هيفاء
هيفاء منصدمه من الشكل سعود : ايه
سعود: كيفك؟؟
هيفاء: بخير اعظم الله اجرك
سعود :اجرنا واجرك
وحل الهدوء في المكان .. بعد ثواني تقدمت هيفاء بتروح لغرفة الجده ..
سعود يبعد عن طريقها: هيفاء
هيفاء بدون ماتلف عليه: نعم
سعود: رهف كيفها؟؟
هيفاء تلف عليه: شين وقواية عين .. اقول كمل طريقك وانت ساكت
سعود: سالتك كيفها ؟؟
هيفاء: بدونك بخير ومبسوطه (وكملت بكذب) تراها انخطبت
سعود فتح عيونه على الاخر من الصدمه: انخطبت
هيفاء: ايه .. اجل بتفكرها بتجلس على اطلالك وماراح تزوج
سعود تنهد :الله يعين ماجد عليك سلمي عليها (وراح عنها ) وهويفكر في بالها" يالله انخطبتي يارهف
الله يوفقك يالغاليه "
دخل المجلس وجلست جنب ابوه وهو ساكت وعيونها تناظر الناس والبال سرحان .. وجاهل عيون
مطلق الي تناظر فيه: يكسر الخاطر
جواد: مين سعود
مطلق: ايه
جواد: الله يكون بعونه
فيصل: في مين تحشون
جواد: مانحش
فيصل: انتم اصلا العن من الحريم في الحش نسيتوا زواج رياض وماجد.. ماسكين لكم زاويه وهاتك حش
في فلان وعلان ماناقصكم غير الفص فص والشاهي
جواد: هذا كل شي موجود تشاركنا
مطلق مبتسم : هات فستق
جواد: يالله بالستر
فيصل: اشفيك حجيه ام كاظم
جواد: يقول يلا على الفسق
مطلق: هههههههههههههه اقول تلايط ماقلت كذا
في جهه ثانيه من المجلس ..
الفيصل: متى بتروح ياماجد الرياض
ماجد: باذن الله الصباح بمسك الخط
الفيصل: روح بطياره
ماجد: لا ابي سيارتي وماراح اروح لحالي معي كم واحد من الشركه
الفيصل: لاتسوق خذ من سواويق الشريكه او من الي عندكم
ماجد: ان شاء الله
بونايف يقوم .. والفيصل يوقفه :وين بتروح
بونايف ويجلس جنب سعود: ابي ولدي سعود بكلمه
سعود ابتسم وسع لعمه مكان: حياك ياعم
اياد يهمس لماجد: مااااالت عليه
ماجد: من؟؟
اياد: سعود
ماجد: فك عنه فك يالله الرجال بيدخل الجنه بسبت حشك فيه
اياد: قاهرني لو عارف انت وش مسوي ماكنت قلت كذا
ماجد: اففف ماجد سكر فمك
حمود يدخل المجلس : ماجد عماتي يبغونك
ماجد: جا الفرج اف بروح لعماتي
اياد :بروح وياك
ماجد: جلس زوجتي هناك
$$$$$$$$$$$$$$$$&& $$$$$$$$&
في صاله الحريم ..
: من عرس ماجد مانشوف رياض على الاقل يمر ويسلم بس هو لا
ام نايف: يمكن مشغول
ام عبدالعزيز: ويمكن وحده فارته علينا
الجده: اقول اسكتي بنتي هيفاء ماتفر احد
ام ماجد: والله الشهاده لله البنت طيبه وحبوبه
ام جهاد: وينه
ام سطام: لايكون يفكر روحه معرس
*
×
*
في جهة البنات..
لمياء: الادبي اسهل
هيفاء: وانا معك اسهل واحلا
نوال: لان مايدخلون فيه الا كسلان كذا احلى ههههههه
اريج: العلمي اهل عقول الادبي اهل كسل هههههههههههههه
هيفاء: ياسلام
والكل سكت لمى شافوا مها ونجلاء وعبير وباقي البنات قاموا
اريج: وين
ليان:ماجد ولد خالي في الصاله
هيفاء قامت وراحت .. وشافت ماجد واقف ويسولف مع عماته .. ووقفت مكانها بتشوف يسال عنها ولا لا
نجلاء بدلع: هلا بولد الخال الي ماينشاف
ماجد منزل راسه : هلافيك.. الا وين زوجتي
ام سطام: شف الولد صار لنا ساعه نعاتبه.. وله عين يسال عنها
ماجد: اكيد بسال زوجتي وينها يايمه
الجده: وانتي شعليك سال عن زوجته ولا لا(تلف على بشاير) قومي فزي نادي هيفاء قوومي
هيفاء جات ووقف جنبه: اووه ماجد هنا
ماجد : هلا وينك توني اسال عنك
هيفاء: اسولف مع بنات عمك بونايف
عبير: يالله ياهيفاء تراك قزوومه ماجد اطول
نجلاء بوقاحه: واحلا
شمايل تظربهابرجلها وتهمس لها: انهبلتي
ماجد يحط يده على كتف هيفاء: يمكن تشوفين هيفاء عاديه بس بعيوني مافي قمر غيرها اصلا مافي قمر
هذي صورتها معكوسه على السماء ..وطول زوجتي حلو احس انها انثى موحلو تكون طولي اصلا
هيووف ماتنعاب كامله والكامل الله ..الله يحفظها لي
هيفاء فرحت حيل همست له: يالبى قلبك
الجده :هههههههههههههههه (تنتبه على نفسها) عيب ياولد لاتتغزل في البنت قدامنا
مها: وشفيك ماجد ماتقول شعر فيها
ماجد : ماعرف ..يلا هيفاء نمشي
ام ماجد: بدري خلك شوي
ماجد: وراي طريق بكره الصباح
ام ماجد: غير رايك ابوك لو داريه كان كلمته موتعل قلبي وقلب زوجتك
ماجد ابتسم : سامحيني يالغاليه يلا هيفاء
$$$$$$$$$$$$$$$$&& $$$$$$$$
جاني مرسالك حبيبي وهز كياني والوجاني وفاض الشوق وبان في عيوني
بس اعتذر منك .. بعد كذبك لاترتجي مني نظره ..سواتك حطم كل مافيني
الساعه 12 بالليل
تدخل رهف في البيت وتلاقي اختها موجوده الكبيره عوجة فمها : سلام(تفصخ عباتها)
كريمه تناظر الساعه:هبله انتي على هاللبس
نوره: هي رايحه خطوبه وش تبينها تلبس
كريمه: نص ظهرها طالع ونص فخذها ..
رهف: تصبحون خير ..
كريمه: تعالي اخر مره اشوفك تلبسين هاللبس
رهف: وانتي وشدخلك مالك خص
كريمه بعصبيه: والله دامك اختي ..ومحسوبه علينا لازم تسمعين الكلام
رهف ترجع راسها بغرور: والله بكيفي بلبس الي ابي ويلا يا اللحجيه باي
كريمه ترمي عليها المخده: مالت عليك ياقليلة الادب
نوره: انتي هيه لاتسوين هواش
كريمه: انتي ماتشوفين لسانها الطويل
رهف تشيل المخده وترميه عليها: حماره (وتروح عنهم)
*
×
*
دخلت الغرفه وهي معصبه رمت عباتها وشنطتها على السرير وهي مقهوره..راحت الى التسريحه
وجلست على الكرسي تفك الباف ولمت شعرها وبدات تمسح الميك اب وهي معصبه .. بسرعه
تغيرت ملامحها من عصبيه الى استغراب لمى سمعت نغمة هيفاء رنت ..
رهف طارت على شنطتها وتطلعت الجوال : الووووووووو يوه مارديت (ترد عليها) الوووو
هيفاء بهمس: هلا
رهف: هلابك هااه وش صار
هيفاء على نفس نبرتها: سامحني
رهف: الحمدلله بس وشفيك تتكلمين كذا
هيفاء: نايم وجالسه ارتب له اغراضه وربي قلبي يعوري ماودي يروح
رهف: ياشيخه اليوم اسهري وناظري فيه او اقولك صوري وهونايم
هيفاء: لا مصورته في جوالي ياكثر صوره
رهف: ياحبيبي ولا تحبين
هيفاء: رهف في احد يسلم عليك
رهف: مين
هيفاء: توقعي
رهف: امممم شهد داقه عليك
هيفاء: لا
رهف: ام ماجد
هيفاء: لا
رهف: مدري عجزت
هيفاء تلف تناظر ماجد النايم: سعود
رهف بصدمه: سعوود يسلم ليه هو مانساني
هيفاء: انا بروح عند جدته شفته
رهف: تكلمي على اساس انه بنت لايشك فيك زوجك
هيفاء: الي قلت لك
رهف: طيب بس قال سلمي عليها
هيفاء: لا قالت اول كيفها قلت لها شين وقواية عين خاينتها وتسالين عنها
رهف: ايوه عدل كلامك
هيفاء: قالت الي الخايسه الي يعين ماجد عليك الحماره
رهف: وبعدين
هيفاء: قلت لها لاتسالين عنها تراها مخطوبه هههههههههههههههههه
رهف: من المخطوبه انا
هيفاء: ايه هههههههههههههههههههههههههههه
رهف: ههههههههههههههههههههههههههههههه
هيفاء: والله تخون وتسال
رهف تاخذ نفس: يمكن حن لي
هيفاء: والله ولا افتكر بس تذكرك لمى شافني.. لاترجعين له
رهف: ومن قالك اني برجع له صحيح انا احبه بس كرامتي ماتسمح لي ارجع له مالت عليه
هيفاء: ايوه خليك كذا
رهف: خلاص روحي نامي وانا بمسح الميك اب وبنام
هيفاء: يلا باي
سكرت رهف منها ورمت الجوال على السرير ..وراحت الى التسريحه تكمل مسح الميك اب
ناظرت في شكلها..: سبحان من خلقني ..ليه محد يخطبني وربي اني حلوه ماني شينه
جد هالحريم ماعندهم نظر مايخطبوني لــعيالهم ..بس فالحين يخزون فيني ويصلون على النبي
رمت منديل من المناديل لمسح المكياج وقامت تغير ملابسها
$$$$$$$$$$$$$$$$&& $$$$$$$$

صباح يوم ثاني يوم الجمعه في الصباح
رفعت هيفاء راسها من صدر ماجد على رنة الساعه تصحيهم لصلاه الفجر.. قامت وتروشت وصلت
وجات لماجد النايم .. وجلست جنبه : ماجد
ماجد ينقلب الى الجهه الثانيه: همممم
هيفاء: ماجد قوم صل
ماجد مهم مسكر عيونه: طيب
هيفاء: متى هالطيب قوم
ماجد: الحين شوي واقوم (ويغطي وجهه باللحاف)
هيفاء: ياعيني الحين شوي وتغطي روحك (ترفع اللحاف ) ماجد قوم
ماجد يجلس: افففففففف مزعجه طيب بقوم( ويقوم)
هيفاء تنبطح مكانه : لاخلصت طف النور انا وقت الساعه على ست ونص باقي ساعتين ريح فيهم
ماجد: جهزتي اغراضي
هيفاء: ايه كل شي اذا تبي شيك
ماجد: زين الحين انتي بتنامين
هيفاء: ايه
ماجد: والصلاه
هيفاء: صليت ..لاخلصت طف النور
ماجد بملل: ان شاء الله عمة هيفاء
هيفاء: ههههههههههههههههههههه
$$$$$$$$$$$$$$$$&& $$$$$$$$
وصل بو نايف وعياله الى البيت بعد ماصلوا صلاة يوم الجمعه في المسجد ..
ام نايف : ان شاء الله الكشخه في زواج اياد
اياد وهو يفصخ شماغه: جعلني فداك يمه بسك من هالموال
بونايف: اتركيه ياحرمه من حنتك مابعرس
اياد: ايوووووووه يايبه اوقف معي
ام نايف: طالبتك عون صرت فرعون خلك محظر خير الزواج ستر
جواد: وانا اشهد
اياد وهو يصرف: ماجاوا خواتي
ام نايف: حتى اذا بيغير السالفه مايعرف ..الحين ماتدري ان الغدا الجمعه عند جدك
اكيد خواتك هناك
محمد: صحت لموي يمه
اياد: شغل احساسك وتعرف صحت ولا لا
جواد: حشى ماصار توأمها كاهن
اياد: اتريق عليه
لمياء تنزل من الدرج..
جواد: هاه نزلت لو طاري المليون مواحسن لك
محمد: والله اختي احسن من المليون
بونايف: كفووو هذا ولدي
جواد: وانا
بونايف: غلطة عمري انت
الكل ماعدا جواد: ههههههههههههههههههههههههههههه ههههههههههههههههههههه
جواديناظر امه: مبسوطه
ام نايف تلبس عباتها: عن الهذره يلا تاخرنا على الناس
بونايف: راح ماجد
اياد: ايه راح من الصباح وصل قريب 11
ام نايف: كلمت امه تقول هي وهيفاء صياح خصوصا هيفاء صياح مابقى شي ماوصته
جواد: اكيد هدايه هذا هم الحريم
ام نايف تكش عليه: مالت توصيه ينتبه لحاله ولايسرع ويقرا دعاء السفر ومدري ايش
محمد: هذا بيسافر ولا بيجاهد على الصياح والتوصيات
اياد:سخافت حريم بس ضايقوا خلق الرجال
لمياء: الله يعين زوجتك بس قوم يبه قوم لاانجلط من ولدك ..البنت خايف عليه يقول سخافة حريم
والله محد السخيف غير عقلك قوم يبه قووم
اياد: موكاني تهزأت من بزر
الكل: هههههههههههههههههههههههههههه ههههههههههههههههههه
$$$$$$$$$$$$$$$$&& $$$$$$$$
في نفس الوقت دقت رهف على شهد ..
شهد بصوت نوم : الووو نعم رهيف
رهف : والله انتي نايمه وانا وهيوف مانخمدنا
شهد: ليه سافر ماجد
رهف: ايه
شهد: وليه انتي مانمتي
رهف بحزن: سعود يسلمي عليّ
شهد: لا يسلم .. قولي الله يسلمه ويسلم الامه العربيه
رهف: شهــــــــــــــد بلا هبال
شهد: رهف انا مانمت الا الصباح .. ومجلستني عشان واحد خوان زي سعود
يسلم عليك .. طيب هو يسلم عليك انا وش ذنبي
رهف: شهد ياحماره افهمي سأل عني كلم هيفاء
شهد: كيف كلمها وعسى احد شافهم
رهف: لالالا محد شاف احد لاتخافين
شهد: طيب روحي نامي ترى النوم زين بلا سعود بلا جعفر بلا عبد القادر
رهف: ههههههههههههه شهــــــــد بلا خبال جد انا اتكلم
شهد ترفع صوتها: ياربي شتبين .. تراني شهد مو فوزيه الدريع ..رهف قفلي والعصر نتفاهم
ولعنه فيني نووووووووووم
رهف: اففففففففف طيب بااي
شهد: انا فيك امووت لا تزعلين
رهف: هنديه موزعلانه
شهد: قفلي لا اتوطاك منتي كفو احد يغازلك قفلي
رهف: طيب باي اف
شهد تسكر التلفون في وجهها وتنام وقبل لاتلف الجهه الثانيه جاها كف من يد صغيره : آآآآآآآآه
لفت لقت بنت خالتها الصغيره نايمه معها في السرير.. قامت وشالتها وابطحتها على فراش سوسن
ورجعت على فراشها ..: ناقصه تكفخ وقت النوم
$$$$$$$$$$$$$$$$&& $$$$&&
في العصر في بيت ابوها.. دخلت غرفتها" في هالوقت يجي ماجد ويتحرش فيني .. وربي فقدته كان مالي
علي جوي مش محسسني بفراغ ابد .. ياربي بموت طفش حتى فوازوه نايم الدب .." ناظرت جوالها
"ادق عليه ولا لا.. طيب لارد وش اقول ..اخاف عنده الرجال" صرخة : يـــــا الله راسي بينفجر تفكير
دقت على على رهف ماترد وشهد نفس الشي .. اخر شي دقت عليه.. ورن مره مرتين نهاية الثالثه رد
: هلا هيفاء
هيفاء فرح: هلا بك اخبارك
ماجد:الحمدلله ..
هيفاء توهقت ماتعرف وش تقول:آآآ ..لقيت فندق ولا اخذتوا شقه" ام السؤال الغبي"
ماجد: لا فندق
هيفاء:اهاااا زين
ماجد: انتي وين ؟؟ بيت جدي ولا في بيتكم
هيفاء: لا في بيت اهلي
ماجد: ماراح تروحين عند بيت جدي
هيفاء: في الليل ان شاء الله
وحل الصمت بينهم اول مره طرفين مع بعضهم لطيفين على التوتر الي حاسين فيه ..
ماجد يقطع الصمت: طيب لاحتجتي شي قولي لاخوك بدر عطيته فلوس لك
هيفاء: لا مابي شي بس سلامتك
ماجد: الله يسلمك تبين شي
هيفاء: لا سلامتك انت توصي شي
ماجد: ايه لاتدقين تزعجيني (ويكتم الضحكه)
هيفاء بقهر: مالت عليك اخر مره اتصل ..اصلا من زينك
ماجد: هههههههههههههههههههههههههههه هههههههههههههههههههههههههه
هيفاء سكتت مقهوره :...................
ماجد : هههههههههههههههههه هيفاء
هيفاء بعصبيه: نعم
ماجد: ههههههههههههههههههههههههههههههههههه
هيفاء ابتسمت " ماجد يضحك ..وينك ياامه تسمعين هالضحك":....................
ماجد: امزح معك .. بس لارحتي بيت جدي جلسي ياجنب امي او جدتي عشان مااحد يضايقك
هيفاء: لا محد يضايقني
ماجد: توصلني الاخبار..بس مشكلتي رجال وعيب احط راسي براس حريم ..مالك الا الصبر
هيفاء: مايهموني اهم شي رضى امي ام ماجد وجدتي
ماجد: وانا ؟؟
هيفاء: اكـــــــــيد انت معاهم
ماجد: طيب يلا قفلي ازعجتيني
هيفاء بدلع: مااجد
ماجد: لو داري الوجه اللطيف بيطلع وقت السفر كان سافرت
هيفاء اسكتت استحت:.............
ماجد: لي معك اتصال بس الحين عندي رجال مولحالي في الفندق
هيفاء: تيب باي (وسكرت منه وهي فرحانه )
" هذا هو لطيف وخفيف دم بعد .. بس لو يترك هالاسلوب هالمستفز يصير عسل .." حطت راسها
على المخده وجلست تناظر في جوالها حاطه صورته خلفيه وباسته ونامت
$$$$$$$$$$$$$$$$&& $$$$$$&&
في قصر بورياض ..
: يــــــــــا سعوووووووود ياسعود
سعود يطلع من الغرفه على صوت هالصراخ: وشفيك
رياض: زوجتــــــــــــــــي حامل كلللللللللوووش
ضحى وجهه احمر: بس عاد فضحتنا
سعود ينزل من الدرج بسرعه: مبرووووووك
رياض يضم سعود: بصير باابااا
سعود يناظر فيه: رياض العقل العقل( يناظر في ضحى) مبروك ضحى وسامحينا غشيناك في واحد مهبول
ضحى غطت وجهها وهي تضحك:ههههههههههههههههههههه
رياض: وين امي وزينه وابوي
سعود: في بيت جدي
رياض: وليه مارحت
سعود: مالي خلق احد روح وخبرالناس
رياض: بكيفك .. (لف على ضحى) حبيبتي تبين نروح ولا ترتاحين
ضحى: لا ودي اروح وافرح عمتي
رياض: حتى انا اقول يلا
$$$$$$$$$$$$$$$$&& $$$$$$$$
في الليل الساعه ثمان هيفاء تدخل قصرالفيصل ..
ارتاحت كثير لمى ماشافت مها وشاتها" الحمدلله القرود مافيه" : السلام عليكم
الكل: عليكم السلام
ام ماجد ببتسامه: تعالي يمه جنبي
هيفاء تجلس جنبها: هلا ضحى كيفك
ام سطام: بخير .. الله يتمم عليها البنت حامل وانتي مافي شي بالطريق
هيفاء: الله كريم.. مبروك ضحى
ضحى: الله يبارك فيك حبيبتي عقبالك
هيفاء ابتسمت لها بس تلاشت البسمه من كلام ام جهاد ...
ام جهاد: اخذتوا شهرين من تزوجتوا
ام نايف: الله يهداك يا ام جهاد توهم معاريس
ام ماجد بكذب: اصلا ماجد مايبغى الا بعد سنه( تضغط على رجل هيفاء) مو صح ياهيفاء هذا كلام ماجد
هيفاء: ايه هو دايم كذا
ام عبد العزيز: دام ماجد يبغى كذا براحته اهم شي راحت ولدنا
هيفاء" ياربي مافتك من البنات جاو لي هالامهات"طنشت هم ولفت على ام نايف: خاله ام نايف
وين البنات اريج ماشفتها
ام نايف: ولدها تعبان اخذته المستشفى ونوال رايحه سوق ولمياء تذاكر
هيفاء:الله يخليهم
دلال تدخل عليهم بصحن الحلا: هيوف هنا (تكمل كلامها بالمصري) حماتك تحبك
هيفاء: ههههههههههههههه وانا بعد احبها
دلال: هين اجل مافي حلا
ام ماجد: بس نروح البيت بنسوي عشر صحون حلا عناد في دلال
ضحى: مافي لي حلا
هيفاء: الكل معزوم الا دلال معاقبه
دلال: ههههههههههههه يمه منها كانها ماجد
هيفاء ابتسمت لذكر اسمه" والله له جوه هالخايس":................
دلال: سمي يا حرم مجود
هيفاء: سم الله عدوك.. جدتي نامت
ام رياض: ايه
ام عبد العزيز: شفتي التميلح يااختي
ام سطام: بتعلميني في حركات النص كم
ام نايف اسمعت كلامهم..وهزت راسها بيأس من حركاتهم..
هيفاء اخذت نفس" الحمدلله فكو عني شوي":.....................
$$$$$$$$$$$$$$$$&& $$$$$$&&
بيت نواف ..
الخاله ام عبد المحسن: وين خلود مااشفتها
ساميه: اهاا تعبانه فوق
الخاله: لا سلامتها بقوم اشوفها
لجين: يلا ياخاله اوصلك
ساميه تخز في لجين: خلك خاله تلاقنها نايمه الحين
ام عبد المحسن توقف: لا حصلتها نايمه بنزل
ام نواف تجي من المطبخ وراها الشغاله تدف عربة الشاهي والقهوه: وين اختي واقف
ام عبدالمحسن: ابي اشوف بنتي خلود
ام نواف بكذب: اسكتي ياختي خلود طاحت لك اليوم طيحه من الدرج وحالتها حاله في غرفتها
ام عبدالمحسن بفزع: يالله ..كيف وشلون ؟؟
ام نواف: وهي رايحه تعرفين نعال هالبيت خفيف ويزلق وزلقت .. يدها رضت رضه قويه لافين يدها
وبقع حمر في جسمها
لجين" وانا اقول خلود على مين طالعه نصابه على ماما" :...........................
ام عبدالمحسن على نياتها صدقت: وديني اشوفها
والكل صعد الى غرفة خلود الي كانت تأن من الالم ..
ام عبد المحسن تدخل الغرفه: خلود يمه شخبارك سلامتك حبيبتي قالت امك انك طحتي من الدرج
خلود ترفع نفسها وتضم خالتها: آآآآه ياخاله الطيحه مارحمتني مره تالمني
ام عبد المحسن تبعد عنها: عاد على جيت ابوك تطيحين
خلود: هذا الي صار ..
ام عبدالمحسن تناظر فيها: خلود
خلود: هلا
ام عبد المحسن: ليه عيونك متزرقه
ام نواف: من طيحه انتي لو شايفتها كيف طايحه زين مانشق راسها لا عيونها
ام عبد المحسن : اي والله سلامتك يمه
خلود: تسلمين ياخاله
ام عبد المحسن: خلونا ننزل وترتاح خلود
$$$$$$$$$$$$$$$$&& $$$$$$$$
صباح يوم الثاني السبت..الساعه ثمان ونص..
لبس ثوبه ومشط شعره وتعطر ناظر روحه في المرايا: يبغالي ثياب جدد وسعوا عليّ
لبس نظارته واخذ جواله ومحفظته وطلع ماشاف في طريقه احد كمله الى اطلع من قصر وصل سيارته
وناظر في السلسال الي فيه صورته وصورة ابراهيم باسه .. وشغل سيارته وراح الى شريكات ..
بعد نص ساعه من زحمه وصل الشريكه .. سال عن مكتب ووصل الى مكتب الشخص الي يبغاه
سعود يطق الباب ولمى سمع تفضل فتح الباب ودخل : السلام عليكم
نواف يرفع عيونه: اووه سعود (يوقف) حياالله من جانا وشفيك واقف اجلس
سعود ببتسامه: اخاف ازعجك
نواف يقوم من كرسي المكتب ويجلس على الكراسي الي قدام المكتب: ياشيخ اجلس بس
سعود يجلس: كيفك؟؟
نواف: الحمدلله .. طيب انت اخبارك غيربه زاير
سعود يحك اذنه: اممم انا ادور شغل عندك فيه ولا لا
نواف: امر شنو تعرف
سعود: شوف ابي وياك انت مابي غيرك.. انا افهم بسوالف الكمبيوتر .. وانت الله لايهينك علمني
نواف يقوم يرفع التلفون ويغط على ارقام بعد ثواني قال: الووو اسمع جب عصير ليمون ولاتدخل علي
احد ..
سعود: لا تعطل شغلك عشاني
نواف: اذا كنت شخص عادي تكلم بس انت انسان عزيز
سعود ابتسم: طيب نرجع لموضوعنا.. انا ابيك انت
نواف: طيب ابوك مايزعل عمك مايزعل تارك حلالك وجاي تشتغل معي
سعود: هذا رياض ماله في شغل اهلي ..ولاتخاف محد بيزعل اصلا هم يشفقون عليّ والكل يبغى راحتي
نواف: براحتك تحب من اليوم نبتدي
سعود: ماعندي اي مشكله
نواف: نشرب العصير ونبدا
سعود: مومشكله.. متى راح يوصل ابوك
نواف : في الليل
$$$$$$$$$$$$$$$$&& $$$$$$$$
في نهاية الدوام
رهف: يالله وش هالخياس
شهد: اصلا على وقت الظهر لازم نتعود
هيفاء تهف على روحها بورقه : على ايش نتعود
شهد: على خياس وحر الظهر ماتلاحظون من 11 الين 2ونص لاشتا لاصيف حر وخياس
رهف: اي والله الجو سعودي سعودي
هيفاء: اقووووول ولا ماتتلايطون اي شي قلتوا سعودي وسعودي طايحه من عيونكم سعوديه
لاتفكير الغبي الا قلتي سعودي لا مدري شنو سعودي .. مالت عليكم حمدوا ربكم انكم سعوديات
شهد: شعندي الاخت الوطنيه
هيفاء: اقول لا يكثر .. والله اي شي قالوا سعودي تاج راسك انتي وياها السعودي
شهد: ياختي نمزح ترى حتى الحلا سعودي (وتاشر عليهم )
رهف: شفتي طلعت البنت( تاشر على شهد) مقهوره جمالها مغشوش صومالي
شهد: حلات جمال الافغاني
هيفاء توقف: ولا تزعلون وحده اندنوسي والثانيه جيبوتي .. ويلا بااي تاخرت على السواق
شهد: حلات من تكلم الجمال الافريقي
هيفاء: واحلى منك يا شينه يلا (وتتغطى وتطلع)
رهف: شفتي كيف متحمسه لطلعه طول ماحنا في المدرسه متخده وطفشانه لا تكلمت ماجد قال وماجد سوا
شهد تجلس جنبها: اليوم وهي تتكلم عنه مبسوطه قبل مكشره ومالها خلقه
رهف: شهد
شهد: الله كريم ويعقل الرجاجيل ويحسون فينا هههههههههههههههه
رهف: ههههههههههههههههههههههههههههههههه
شهد: قومي نستهبل لو على هندي ابي اضحك
رهف: مالي خلق واليوم السبت منو فاضي لك يجي
شهد: افففففف طفش
رهف: باصنا وصل يلا بروح البيت وناسه
$$$$$$$$$$$$$$$$&& $$$$$$$$
في غرفة دكتور الاسنان ..
اياد: علي
علي : امر
اياد " يارب كيف اقوله": شوف انا عندي موضوع من زمان ابي افاتحك فيه ..بس موعارف
علي: انت من زمان تقول بس مرتبك يا اياد حنا اخوان ومابينا حواجر
اياد: لان اول مره يصير وانا ماابيك تزعل عليّ ولا نخسر صداقتنا
علي: طيب يلا قول انا اسمعك


يتبع ,,,,

👇👇👇
تعليقات
    حجم الخط
    +
    16
    -
    تباعد السطور
    +
    2
    -