رواية قتلهن الطيش وأحياهن الحب -31 البارت الاخير

رواية قتلهن الطيش وأحياهن الحب -31

مشت لوجين وراه وهي تبكي .. اللين وصلوا للفندق فتح لها الباب ودخلت وهو بعدها وصقع الباب بقوه ويدخل يرمي نفسه علىالكنب : استغفر الله العظيم

اما لوجين ماقالت شي دخلت الغرفه وقفلت الباب .. ورمت الاكياس على السرير وجلست تبكي .. شوي عبدالرحمن يدق باب الغرفه ويفتحه لوجين كانت جالسه على طرف السرير بحيث تكون معطيه ظهرها للي عند الباب .. دخل وشافها تبكي .. قرب لها ومسكها من كتوفها : حبيبتي

لوجين ماردت عليه ..

عبدالرحمن : لوجين حبيبتي .. انا اسف .. اسف حبيبتي بس من خوفي عليك والله بغيت انجن يوم مالقيتك

لوجين دارت عليه وهي تبكي : بس انا مارحت بعيد .. انت طولت وانا دخلت المحل اللي جنبي يوم طلعت مالقيتك .. اتصلت عليك جوالك مقفل .. وصرت ادور عليك ..

عبدالرحمن يدخل يده بجيب البنطلون اللي كان لابسه ويطلع علبه صغيره فيها البروش .. : تفضلي .. انا اسف انا قمت اشتري احلى هديه لأحلى زوجه بالدنيا

لوجين تفاجئت ماعرفت وش تقول ولا وش تسوي .. مااخذت منه الهديه وراحت من قدامه ..

عبدالرحمن استغرب .. لاردت ولا اخذتها .. الظاهر زعلها جامد

لوجين راحت فتحت الاكياس اللي معها وطلعت علبه صغيره.. رجعت لعبدالرحمن : وانا بعد قمت اشتريت لك هديه

عبدالرحمن ابتسم .. ياااقلبي والله .. طيب خذي هديتي شوفيها وانا اخذ هديتك اشوفها

ابتسمت لوجين وفتحت العلبه وشافت البروش وعجبها حيل .. ونقزت بحلق عبدالرحمن وباسته من خده شكرا ياقلبي مره حلو .. اما عبدالرحمن فتح العلبه وشاف خاتم فضي رجالي بوسطه حجر كريم كحلي .. قرب لها وضمها تسلميلي ..

لوجين تبعد عنه : دقيقه خلك هنا

عبدالرحمن : طيب

لوجين راحت لدولاب طلعت ورقه بيضا كبيره .. ورجعت وقفت قدامه : غمض عيونك

عبدالرحمن ضحك : وش ذا صك ؟!

لوجين : غمض وبتشوفها ...

عبدالرحمن : طيب ويغمض..

مسكتها لوجين من اطرافها ورفعتها قدامه : يالله افتح ..

عبدالرحمن فتح عيونه واندهش ..

لوجين تناظره من ورى الورقه : شرايك

عبدالرحمن مبسوط من الللي شايفه : حلوه حلوه حلوه .. ماشالله عليك ..بس متى رسمتيني

لوجين : كل ليله وانت نايم

,,,,,,,,,,,,,,,,,,,,,,,,,,,,,,,,,,

بعدها بكم يوم .. في ارض السعوديه وبالتحديد المدينه المنوره .. الساعه وحده بالليل .. هند بغرفتها ..مثل كل يوم طفشانه من الجلسه لحالها حتى وان طلعت من البيت .. الطلعه مابيكون لها طعم بدون نور ولوجين ... فكرت انها تدخل الشات .. وبالفعل فتحت النت ودخلت التشات وصارت تسولف مع الناس الموجوده هناك .. عجبها الوضع .. صارت تدخل كل يوم بالليل والنهار لأن الوقت يجري وهي ميب حاسه .. ضلت على هالموال اربع ايام .. وفي كل مره تدخل كانت تتواعد مع شاب اسمه سامي تحدد معه وقت معين عشان يدخلون سوا ..

بعدها هند أضافته على الماسن .. وصاروا يتحادثون كل يوم خلال الاسبوعين اللي مضت ..

هند كانت شابكه من وقت .. ودخل سامي

هند / سامي وبنك تأخرت علي

سامي / هلا هند .. شلونك

هند / بخير.. بس وينك تأخرت

سامي / ليش وحشتك ؟!

هند ارتبكت / مو قصدي كذا .. بس فقدتك .. ماتعودت انك تتأخر بدخولك

سامي / هنوده .. تدرين

هند / ايش ؟

سامي / انت الصراحه انسانه نادر وجودك ..

هند/ تسلم

سامي / تعرفين خلال الوقت القصير اللي عرفتك فيه دخلتي قلبي .. وحبيتك

هند ماتدري ليه اضطربت يوم جاب طاري الحب .. / وانت بعد انسان طيب ومحترم وقليل من الشباب اللي مثلك

سامي / هذا من ذوقك .. هند لو اطلب منك طلب بتنفذينه لي؟!

هند : ابشر من عيوني .. بس على حسب الطلب اذا اقدر عليه اعتبره وصلك

سامي / تسلملي عيونك .. هند اتمنى انك توافقين .. انا نفسي الصراحه نتعرف على بعضنا اكثر .. ويصير بينا جوال بدل النت .. شرايك ؟

هند قرت كلامه مره ومرتين وثلاث : والله ماادري وش اقولك ..

سامي / انا ماابي اضغط عليك اذا ماتبين .. بس اذا انا لي معزه بقلبك وافقي .. وبعدين انا حسيت من الفتره اللي راحت انك حزينه .. ودي اعرف وش فيك .. وانسيك همك .. لأنك انسانه ماتستاهلين تعيشين بالهم والحزن

هند ماردت عليه بس تقرا

سامي/ هند انت معي ؟!

هند / ايه معك

سامي / وش رايك باللي قلته لك ..؟!

هند / عطني وقت افكر ..

سامي / خذي كل وقتك .. وانا انتظرك بفارغ الصبر

هند لفت الموضوع براسها وفكرت فيه كثير .. وقررت تبدى علاقه جديده مع سامي اللي حست انه شخص مميز بالنسبه لها .. هند بالاسبوعين اللي صارت تتحادث فيها مع سامي تعلقت فيه .. يمكن لأنه هو الشخص الوحيد اللي لاقيته بوحدتها .. بهالحظه تتصل عليها نور من تركيا .. ردت هند : الوو

نور: الو هنو كيفكم

هند : اهلييين قلبي .. كيفك

نور: بخير الحمدلله .. انت كيفك طيبه وحشتيني موت يادوووبا .. مشتاقه لك بالحيل

هند : وانا بعد والله بموت من غيركم .. متى بترجعون ؟!

نور: ان شالله على نهايه الاسبوع ..

هند : نور بستشيرك بشي ..

نور: وشو قلبي .. بس اسرعي

هند تقولها سالفه سامي باختصال شديد : شرايك نونو

نور بنبره حاده : لأ .. لأ ياهنو .. انتبهي

هند بآسى : لييييش؟!

نور: شلون ليش .. هند لا الله يخليك .. وعشان لا تضعفين احذفيه من عندك .. عشان ماتضعفين هنوده ..

هند : طيب .. بفكر

نور: هند انتبهي حبيبتي .. اوكي ان رح اكلمك ان شالله مره ثانيه

هند : طيب .. سلميلي على ماجد

نور: الله يسلمك ..

هند تقفل منها .. وترجع تفكر بالموضوع من جديد .. بس الشيطان شاطر .. قالت بنفسها .. بجربه ماني خسرانه .. انا كذا كذا ماعندي شي غير الطفش ..

,,,,,,,,,,,,,,,,,,,,,,,,,,,,,

في تركيا..

ماجد ونور على اليخت في وسط البحر .. جالسين في مقدمه اليخت على كرسي واحد .. نور لما بغت تجيب لها كرسي ماجد مارضى وقالها تجلس على رجوله ..

ماجد : المنظر خيال صح ؟!

نور : ايه .. رووعه

ماجد: نوري..

نور : هلا

ماجد: تبين نجلس اكثر ..

نور: امممم .. لا خلاص خلنا نرجع بموعدنا

ماجد: ليش ماتبين تستانسين اكثر هنا

نور تناظره وتبتسم : انا بأي مكان معك بكون مستانسه

ماجد: والله

نور : والله

ماجد تدرين عاد

نور: ايش

ماجد : تدرين ان حبك كل يوم يزيد .. وصرتي اهم شي بحياتي

نور حمر وجهها ...

ماجد يضمها بيدينه : تدرين بعد ..

نور: ايش؟

ماجد : ليت جونا مثل تركيا بارد عشان ابقى اضمك على طول وادفيك ...

وصار يغني .. ضمني على صدرك ..وابعدني عن الناس .. شوف الغزل والحب .. والنشوى والاحساس ..

نور تسمعه وهي ساكته واول مره تعرف ان صوته بالغنى حلو ,, ونور بعد صوتها حلو .. كملت معاه الاغنيه .. ضمني على صدرك بردان دفيني ..وانتا على كيفك موتني واحيني ..ضمني على صدرك .. ضمني ضعف صبري ..واتنفس انفاسك ..واحرقها في صدري .. واللهي ياعمري .. لسكر بدون الكاس ..

خلصت رحلتهم باليخت ..وراجعين للبيت ...

ماجد : تبين ناخذ شي قبل نوصل

نور: لا تسلم

ماجد: تراك ماتعشيتي زين لاحظتك

نور : لا والله تعشيت ..

ماجد : بس انا بجيب بوب كورن ( فشار) .. يالله تعالي معاي ويسحبها من يدها

نور تضحك: طييييييب جايه

خذوا الفشار .. وراحوا الفندق .. قبل يدخلون .. سحب ماجد الشال اللي على نور وربطه على عينها ..

نور تضحك : وش تسويي ؟!

ماجد : اصصصص .. الحين تشوفين ..

فتح الباب ودخلوا وهو ماسك ايدها يمشيها... وقفها بالسيب وفك الشال عن عيونها .. وانبهرت نور باللي تشوفه ... اضاءه خااافته ونور الشموع يضوي و على امتداد السيب ورد احمر وكأنه مد اللين غرفه النوم .. في الغرفه وعلى الارض مرسوم قلب كبير بالورد الاحمر والشموع حواليه وفي كل ركن بالغرفه في ورد .. وسط القلب في جلستين حمرا عشان يجلسون عليها .. وصلها ماجد لوسط القلب وقال : خليك لا تجلسين .. دقايق واجيك

نور وكل نظرات الحب في عيونها .. مسكت ايده : وين بتروح

ماجد يبوس ايدها : قريب .. وطلع من الغرفه .. راح المطبخ ..

نور واقفه ومبسوووووطه بالحيل والدنيا مو سايعتها من الفرحه .. شوي دخل عليها ماجد بيده الفشار اللي جابه ومفضيه بزبديه كبيره قزاز .. وكاستين عصير شايلهم باليد الثانيه بتبسي .. نور تناظره وحست الدنيا تدووور .. فجئه عيونها صارت تزغلل .. وقالت : مااااااجد .. وطاحت على الارض مغمى عليها ,,, ماجد رمى اللي بيده : نووور

راح لها ركض ويرفعها بيده .. ويصحيها : نور نور .. نور حبيبتي

نورمافي منها أي رد ..

ماجد ماوقف ولا دقيقه وشالها بسرعه وعلى المستشفى ...

ماجد عند باب الغرفه وقلقان عليها .. ياربي وش صار فيها قبل ساعه مافيها شي ..

والمسكين ماجلس يروح ويرجع بسيب المستشفى ..

طلع الطبيب من الغرفه اللي هي فيها .. وطبعا بلغه انجليزيه ..

ماجد : وش حالتها يادكتور

الطبيب : مافيها شي خطير .. وسبب الاغماء اللي هي فيه ضعف جسمها .. تغذيتها ضعيفه .. وعشان كذا اثر عليها الجو البارد

ماجد : ايه صح .. هي ماتاكل زين...

الطبيب:بكتب لها فيتامينات ورح تقوم متعافيه .. واهتم فيها وفي غذائها..

ماجد : حاضر.. اقدر اشوفها ..

الطبيب : اكيد .. تفضل

ودخل ماجد عليها .. وهي منسدحه على السرير وصحت من الدوخه ووجهها اصفر بالحيل .. قرب لها ماجد وباس راسها : سلامتك ياقلبي

نور تناظره وتدمع عينها : الله يسلمك ..

ماجد : خوفتيني عليك ..

نور: انا اسفه .. خربت مفاجئتك

ماجد : لا ياقلبي لا تقولين كذا .. سلامتك اهم عندي من كل شي ..

نور: انا مره مقهوره .. بس غصب عني والله

ماجد : بسويلك احلى منها لا تزعلين ..

نور: انا زعلانه لأني خربت مفاجئتك .. يعني عشانك موب عشان نفسي

ماجد : فاهم قصدك ياقلبي .. شفتي وانا اقول لك كلي زين تقولين لي اكلت وشبعت وماادري وشو .. من يوم تطلعين من هنا اللي بأكلك بنفسي سامعه

نور: طيب

ماجد : تدرين ..

نور: ايش ؟!

ماجد يضحك : قلت اكيد انك حامل

نور راحت فيها من الخجل ... وابتسمت .. متى بطلع

ماجد : بسأل الدكتور ..واشوف

,,,,,,,,,,,,,,,,,,,,,,,,,

هند العصر بغرفتها واليوم قررت ترد على سامي خبر موافقتها على انها تبدى علاقتها معاه .. وتوها تسحب اللاب .. تدخل امها .. السلام عليكم

هند : وعليكم السلام ..

سعاد : وش عندك ؟!

هند : ولا شي بدخل النت .. وش بغيتي ؟

سعاد : خلي النت عنك وقومي تجهزي والبسي .. الناس اللي كلمونا قبل كم شهر .. اتصلوا وبيجون اليوم

هند ناسيه : أي ناس ؟!

سعاد : اللي بيشوفونك ..

هند كشرت : يالله ياماما .. رجعنا لنفس السالفه

سعاد : هند .. ماابي اتكلم كثير .. خلي اللي بيدك وجهزي نفسك الناس بيكونون عندنا بعد المغرب

هند : مااابي .. خليهم يجون انا موب نازله لهم

سعاد بصوت عالي شوي : هند مابكثر كلام .. وطلعت وقفلت الباب ..

هند تأففت .. وناظرت ساعتها .. باقي على المغرب .. مابقوم الحين بلبس بعد المغرب خلهم يجلسون اللين يطفشون .. وتفتح اللاب وتدخل النت .. وللأسف مالقت سامي متصل .. انتظرته كثير بس مادخل ولا تدري ليه .. قفلت النت وقامت تبي تتجهز .. دخلت تتروش .. طلعت من الحمام وتتحرك ببطئ و استشورت شعرها .. بهالحظه تدخل سعاد : ماخلصتي الناس تحت

هند تتكلم بدون نفس : مابعد خلصت ..

سعاد وتناظر الغرفه : وش بتلبسين ؟

هند : ماادري مابعد جهزت شي

سعاد تكتم غضبها : هند اخلصي الناس تستناك تحت

هند : طيب .. خلاص بلبس وانزل

سعاد : والبسي شي زين وكشخه

هند بصوت واطي : لا بلبس بجامه

سعاد : وش قلتي ؟!

هند : ولا شي ..

طلعت سعاد .. وقامت هند فتحت الدولاب وطبعا ساعه قدامه تشوف وش تلبس .. اللين اختارت تنور قصيره لونها بيج وموديلها طبقات طبقات من فوق لحد الركب وبدي بني مدخلته جوا التنوره وفوقها جاليه بيج يقفل من الجنب بازرار كبير .. ولبست في رجولها صندل بني واطي وخلخال ذهبي .. ومكياج طبعا خفيف بدرجات البرنزي .. وفكت شعرها وتعطرت ونزلت

,,,,,,,,,,,,,,,,,,,,,,,,,,

في فرنسا .. الوقت الصبح .. ويفطرون..لوجين وعبدالرحمن ..

لوجين : دحوم

عبدالرحمن واقف قدام المرايا : هلا

لوجين : خلنا نتصل على نور وماجد ..

عبدالرحمن : طيب اتصلي .. ( طبعا ماجد ونور بس طلعوا شريحه وحده تركيه اما شريحه ماجد السعوديه مشغلها )

لوجين : اتصلت على نور .. بس لقته مقفل ... دحومي مقفل

عبدالرحمن : طيب شوفي رقم ماجد .. مسميه ماجد

دورت لوجين ولقت الرقم ..

ماجد كان جنب نور ويأكلها .. ورن الجوال طلعه ماعرف الرقم ..

ماجد : الوو

لوجين : الووو .. ماجد

ماجد : ايه ..منو معي

لوجين : اجد انا لوجين .. كيفك وكيف نور ..

ماجد : هلا والله لوجين : شخباركم ..

نور سمعت اسم لوجين وطارت

لوجين : بخير .. نور جنبك

ماجد : ايه .. خذيها .. ويعطي نور الجوال ...نور: الووو .. وحششششششششششششششتيني ياحيوانه

لوجين : وانت اكثثثثر .. شخبارك ..

نور: الحمدلله .. انت كيفك وكيف دحوم .. وينه عندك؟!

لوجين : ايه عندي .. اسمعي متى راجعين للسعوديه ؟!

نور: يوم الخميس .. وانتو

لوجين : حتى احنا ,, يالله نونو خذي دحوم يبي يسلم عليك ..

عبدالرحمن : السلام عليكم

نور وسمعت صوته ودمعت وهي مشتاقه لهم حيل: هلا والله وعليكم السلام .. كيفك

عبدالرحمن : بخير انتو اخباركم .. عساكم استانستوا ..

نور: الحمدلله .. خذ ماجد معك .. وياخذه ماجد : هلا ابو سعود

عبدالرحمن يضحك : هلابك والله .. شخباركم

ماجد : بخير الله يسلمك .. انتو وش اخباركم عساكم مبسوطين

عبدالرحمن : والله الحمدلله .. مبسوطين ماودنا نرجع

ماجد يضحك : الحمدلله .. يالله عاد لا نطول عليك

عبدالرحمن : اوكي .. ان شالله توصولون بالسلامه

ماجد : الله يسلمك .. مع السلامه ..

ويقفل ويمسك الملعقه بيكمل ويأكل نور .. نور مبتسمه .. وحشوني

ماجد : ايه والله له وحشه اخوك الدب .. ويرفع ايده باللقمه

ونور انفتحت نفسها للأكل .. بعد ماكلمت لوجين .. ويأكلها ...

,,,,,,,,,,,,,,,,,,,,,,

هند نازله من الدرج ومتوجهه للصالون اللي فيه الضيوف .. دخلت وسلمت : السلام عليكم .. وتناظر الحريم .. وانصدمت .. شهقت ... وركزت نظرها .. مو معقول اللي تشوفه .. من عندهم اليوم .. ندى اخت حسن ,... مستحيييييييييل

الكل يناظرها ندى وامها وسعاد ,,,

سعاد : بسم الله ,, وش فيك .. وتقوم لها

هند تحاول تتوازن .. وتركض لبرا الصالون .. وتوقف عند الباب وتصيح .. لا مو صحيح اكيد اتخيل .. وصارت تضحك .. ومن الفرحه تبكي .. سعاد لحقتها . هند وش فيك يابنتي

هند تناظر امها وفي وجهها ضحكه وبكوه : لا ولا شي .. شكلي خرب

سعاد : لا زين بس الكحل ساح .. وش اللي يخليك تصيحين

هند تبي تدبر الموضوع : البنت هذي صديقتي اسمها ندى ..

سعاد : طيب ووش فيها

هند : لا بس تفاجئت

سعاد " طيب طيب يالله تعالي ..

ويدخلو الصالون وتسلم هند على ام حسن وندى ..

هند تضحك : انت من وين تطلعين ؟!

ندى : من كل مكان

ام حسن : انتو تعرفون بعض ؟!

ندى : ايه يمه .. صديقتي هند

ام حسن تناظر هند : ماشالله عليها .. شخبارك يمه

هند منحرجه : الحمدلله بخير ..

بعد وقت .. ندى تقرب لهند : حسن يسلم عليك .. ويقول مشتاق لك موت

هند ماتدري وش تقول انصدمت انها عارفه كل شي .. انحرجت ولا ردت بس عيونها اللي دمعت

ندى : هند لا تستحين .. عادي انا اعرف كل شي ..

هند تناظرها : هو كيفه .. طيب ؟!

ندى " طيب الحمدلله ..

هند تبي تبكي : شلون سوا كذا ؟!

ندى : وش سوا ..

هند : يخطبني ؟!

ندى : عادي زي أي واحد يروح يخطب انسانه يموت عليها ..

هند : وبنت خالتك ؟!

ندى : أي بنت خاله .. انا ماعندي بنات خالات

هند خلاص مي متمالكه نفسها ودها تصرخ بأعلى صوتها من وناستها ..

هند : طيب شلون عرفنا وعرف بيتنا وانا مو مصرحه له بشي كثير

ندى : اخوي ذكي .. اخذ رقمك وسأل واحد من اصحابه بالاتصالات وجاب له بيانات الرقم .. وانتو ماشالله اسمكم معروف هنا .. وماتعبنا عشان نوصل لكم ..

هند تبتسم مو مصدقه تحس انها جالسه تحلم ..

ام حسن تقوم : يالله عاد حنا نستأذن ..

سعاد : بدري .. الحين اجازه ومحد عنده ارتباطات

ام حسن : ان شالله الجايات اكثر .. وتقوم ندى ويطلعون ..

هند جلست بالصالون مبتسمه .. دخلت سعاد .. : شفتي شلون وعسى ان تكرهوا شيئا وهو خيرا لكم .. من اليوم تعاندين فيني وبالاخير طلعتي تعرفين بنتها

هند تضحك : والله هالدنيا غريبه

سعاد : وش رايك .. بتوافقين

هند بدون تردد : ايه

سعاد : بدون تعرفين راي ابوك

هند ضحكت على حالها : الا اكيد .. وقامت لغرفتها ..

سعاد تضحك : سبحان اللي يغير ولا يتغير ..

هند دخلت غرفتها واتصلت على حسن على طول ..

حسن رد : هلا والله .. هلا باللي لها الخافق يهلي

هند دمعت : حسن ليش سويت فيني كذا ؟!

حسن يضحك : وش سويت ؟!

هند : تخليني اتعذب شهور وبعدها تخطبني

حسن : بغيت اشوف حبيبتي وش كثر تحبني .. ووش كثر تزعل لو تركتها ..

هند : وعرفت الحين

حسن : ايه ..

هند : تدري انك مجنون..

حسن ليش ؟!

هند : وش قلت لأمك .. من وين تعرفني ..

حسن : انا وندى خططنا انكم اهل خويي ..

هند : اهااا .. ماشفتني اول ماشفت ندى صرخت وطلعت برا .. ابدا ماكنت متوقعه ان الخطاب انتو

حسن : هنودتي..

هند : ياعيونها ..

حسن : مشتااااااااااااااااااااااااااق لك موووت

هند : وانا اكثر ...

يعد اسبوعين من هالوقت .. العرسان ردوا السعوديه واليوم النظره الشرعيه لهند ..

هند بالغرفه معها نور ولوجين .. وخايفه ومرتبكه اول مره بتشوف حسن وهي اللي ماتعرف شكله ابدا .. اللي تعرفه صوته وبس .. ماجد يطق باب الغرفه : هند يالله تعالي

هند شابكه ايدينها ببعض : طيب ..وتقوم وتقوم معها نور ولوجين لبست عباتها عشان ماجد وطلعوا معها من الغرفه .. كانت لابسه بنطلون ابيض طويل وبلوزه شيفون بس مو شفافه بألوان الربيع الفاتحه وفاكه شعرها وكياج خفيف وجزمه بيضا كعب بوز..

وهم نازلين من الدرج .. توقف هند بنصه .. لا لا خلاص مابروح بطلت

لوجين تضحك عليها ..

نور: هند مو لعبه الشغله يالله بسرعه الرجال تحت

هند : والله خايفه ..

نور : ماعليك .. ماجد معك وابوك جوا ..

ماجد : يالله تعالي ياهند ..

هند مشت معه .. ودخلوا على حسن ..

حسن كان جالس على الكنبه اللي بصدر المجلس وينتظر هند بفارغ الصبر .. اول مادخلت وسلمت : السلام عليكم وعيونها بالارض ومو شايفه أي شخص من الموجودين .. جلست جنب ماجد وعينها على الارض ..

حسن مو مصدق اللي يشوفه .. هذي هند .. مستحيل .. هذي اللي يحبها من قلبه .. هذي كان في اول معرفته فيها بيضيعها .. صار ناظرها ..

حسن : هند كيف حالك

هند حست الدنيا ضحكت لها .. اول مره يكون قدامها صوت وصوره .. للحين مارفعت عينها ولا عرفت شكله .. ناظرته بهدوء : الحمدلله .. وشافته وياليتها ماشافته ماتت فيه اكثر ... طويل ونحيف بس اكتافه عريضه .. قمحي .. والسكسوكه مخليته امير .. حواجبه المرسومه عاطيه نظرته حده .. قامت هند بعد اقل من نص ساعه وطلعت ..

نور ولوجين ينتظرونها مع سعاد بالصاله ...

سعاد : هااه شفتيه

هند تجلس : ايه

نور ولوجين : كيف شكلوا ؟!

هند تسوي نفسها ساحت : يخقق ...

,,,,,,,,,,,,,,,,,,,,,,,

بعد خمس شهور .. اليوم زواج هند وحسن .. نور داخله على هند بالغرفه الي بالقاعه .. وكانت ندى عندها ..

نور لا بسه فستان حمل لونه عودي عريان وبدون اكمام ونااااعم بالحيل .. ومسويه تسريحه ومكياج .. : هنو استعديتي

هند جالسه بفستانها الابيض : ايه خلاص ..

تدخل لوجين بفستان اسود طويل شكله بالحيل راااقي ومكياج وتسريحه : عروستنا خلصت ..

هند : ايه ..

هند : ندو .. حسونه كلمك ..

ندى : ايه .. يقول الحين جاي ..

لوجين يرن جوالها .. هلا فهد .. طيب طيب الحين اقول لها

تقفل لوجين من فهد ..

لوجين تكلم ندى : ندوووش الخطيب يبي يشوفك برا

ندى انحرجت : اللحين

لوجين : ايه يالله تعالي معاي ,, يقول يبي يشوف شكلك اليوم

ندى تقوم : طيب .. وتطلع لفهد .. طبعا فهد سافر لبريطانيا بس رجع بهالفتره واللي كانت اجازه بالنسبه لدراسته

...

في اول الممر في القاعه واقفه هند وجنبها حسن .. واشتغلت الموسيقى .. وكانت اشكالهم مع بعض خطيييييييييييره .. حسن رفع يد هند وعكس مكان الدبل ..وبهاللحظه ارتفع صوت التصفيق ونتثر فوقهم الورد .. بعد الموسيقى .. مشوا على الممر اللي كله ورد .. وكانت الاغنيه ( قررت اموت بحبك .. وامشي معاك في دربك .. انت ياساكن قلبي .. اسمحلي اعيش بقلبك .. قربك ترى يحييني .. وصوتك انا يهديني .. وبعدك ترى يبكيني .. لا تغيب عني وربك .. بنسى معاك همومي.. واسهر واخلي نومي.. واعيش وقتي ويومي .. كله وانا بجنبك .. مثلك انا ماالاقي .. يصعب عليك فراقي .. صادق انا بأشواقي .. لو تكذب اعشق كذبك ..)

وصلوا للكوشه حسن جلس شوي رقص مع هند وتصوروا وبعدها طلع وتركها .. جوها نور ولوجين ويسلمون عليها ويصيحون : مبرووووووووووووك واللف مبرووووووووووووووك ..

نور تضمها : حبيبتي .. مبروك

هند تبكي : الله يبارك فيكم .. الكل جى وسلم عليها وبارك لها ..وامها تصيح من الفرحه والهنوف وضي بعد نفس الشي ..

لوجين راحت لطقاقه لو سمحتي نبي اغنيه من اغلى ناسي ..

وصاروا يرقصون كلهم .. ونور ببطنها الصغيره اللين انتهت الليله .. وراحت مع حسن على الفندق ...

هند جالسه على السرير ..

حسن يناظر هند : تعالي هنا مابين ايديني واحضني قلبي .. تعالي لمي شتات ايامي ياحبي .. تعالي ماني مصدق اللي تشوفه عيوني .. تعالي وارقدي فيني وبغطيك بجفوني ..

قامت له هند .. وضمها .. : مبروك لنا

هند تحط راسها على كتفه : الله يبارك فيك

,,,,,,,,,,,,,,,,,,,,,

بعد سنه ...

*فهد تزوج ندى اخت حسن وهم ببريطانيا ..

*سعود مسافر للخارج مع عبدالعزيز ولده عشان العلاج .. ومرته وبنته عند اهلها ..

* ضي والهنوف .. مثل ماهم يدرسون ..

* لوجين طبعا لازالت في نفس البيت اللي هو بيت ابو عبدالعزيز وضي معهم

* نور استقلت في بيت لحالها

البنات في بيت نور ..

هند جالسه بالصاله : يانور تعالي شوفي بنتك رفعت ضغطي ..

لوجين حامل بالشهر الثامن وقرفانه نفسها: تحمليها .. مو هي بنت اخوك

هند : مافيني .. الظاهر اني اتوحم عليها

نور تدخل لهم وهي تضحك ... وتاخذ بنتها لمار .. وتبوسها : خليك عندي احسن .. ذولي مايحبونك .. لمار تناظرها وتضحك

هند : عاد من زينك انت وبنتك

نور: اقول ريحينا موب عشانك تتوحمين تسوين لنا فيها

لوجين تضحك .. : انتو ماتبطلون حركاتكم

هند ونور يضحكون :: اللين نموت وحنا على طبعنا ....

مخرج

سنبقى كما كنا ...

يجمعنا الفرح والحزن ..

لن نتخلى عن أي شيء.. مهما كانت الظروف ..

سنكون اقوى من كل العوارض التي تقف امامنا وسنتخطاها سوياً..

وسنبقى معاً مهما طال الزمان ..

تمت بحمد الله ....

الى هنا .. تنتهي القصه التي جمعت بين طياتها اجمل اللحظات ..

اتمنى من العلي القدير .. ان تنال اعجاب كل قارئ وقارئه ..

انتظروا روايتي الجديده ان شالله .. في اقرب الفرص ..

مع خالص تحياتي ...

أمجااااااا الأجواااااد اااااااد

تجميع زهور حسين

منتديات غرام

تعديل المقال