رواية شمعة امل -1 

رواية شمعة أمل 

الكاتبة : فتاة بلا عنوان ! 

منتديات غرام | أقلام لا تتوقف عن الإبداع 

بسم الله الرحمن الرحيم ... 

امم احمم .. كلنا تعوودنا نشوف مسلسلات .. نسمع قصص .... 

 نقرأ روايات *_^ ..... .. بس من فترة بسيطة قررت اكتب قصة جيه صغيروونة ..

 بس لحظة .. قصتي مو مثل كل القصص خيالية ... قصتي اللي رااح اكتبها .. قصة انا شهدت أحداثها .. بس مو من خلال التلفزيون .. ولا من خلال الروايات ... شهدت احدااثها من خلال الدريشة (النافذة ( اللي بدااري .. قصة اغلب احداثها حقيقية بززمن يخلوو من الرحمة .. بس انا ضفت عليها شوية احداث وغيرت الاسماء .. اخليكم مع القصة .. واتمنى تناال اعجاابكم @_@ ... واييه قبل لاانسى .. نووروني بردودكم ولا تبخلوا علي بالتقيم ..

...... شمعة امل ......

... الجزء الأول ....

ببيت محمد ..

محمد : انتي طاالق .. طاالق ... طالق ..

شمسة تبكي بحرقة : هااذي نهايتها ياامحمد .. تطلقني .. حسبي الله ونعم الوكيل .. اااااه يااربي .. مااقول غير حسبي الله ونعم الوكيل ..

طلع محمد من الدار .. وتوجه لدار بنته الوحيدة امل ( 6 سنواات ( ... ودش الدار شاافها رااقدة بكل هدووء وعفووية .. وييها ويه ملاااك يااهل بريء .. ومآآخذة من ملاامح امها البريئة ...

اخذها بحضنه بقووة .. وبنفس الوقت دشت شمسة وهي تبكي مو مستووعبه اللي صاار ..

شمسة تشهق من البكي وقالت بصرااخ : هدهااا .. هدهاا هد بنتي .. مستحيل تااخذها .. مستحـــــــــــيل ...

امل فااقت بصرااخ امها .. ولقت روحها بحضن ابووها .. وامها قااعدة تبكي وتصرخ وتقول حجي ما قدرت تفهمه لانها بكل بسااطة يااهل .. بس الخوف تسلل لقلبها من اللي اهي قااعدة تشووفه .. وشدت ع ثووب ابوها بقووة لعل وعسى تحس بالامان

شمسة : لاا ياامحمد اترجاااك الا بنيتي .. لا ياامحمد .. الله يخليك .. بنتي لاتااخذها ( وقربت صووبه تبي تاخذ امل ( بس اهو دفها بقوة لين مااطااحت بالارض وصدمت رااسها ..

محمد والشرر يتطااير بعيوونه : لاتقربي صووبها . بنتي وبااخذها وانسيها للأبد ..

شمسة طاايحة بالارض ومو قاادرة تشووف شي قداامها : لاااه .. لاااه .. اااه .. بنتي ... بنتي ... لااه .. تااخذها .... ابوس ايدينك ... بس .. لاتااخذها .... م...محم...د .. محمد ...م ..حم ..د لاا .. (وتمت تناادي وتناادي .. لكن لاحياة لمن تناادي .. لين مااغمى عليها ( .. ومحمد طلع وياه بنته وهدها برووحها بدار بنتها امل ... غرقاانة بدمووعها ودمها .. وغرقاانة بالألم ... الم فرااق الظنا ... )) % وقفة % يااظنااي .... في عيون النااس انااظر واتخيل صورتك ... واتخيل ... ضحكة شفااهك الجميلة والبرااءة بنظرتك .. ### ..

.... ... بعد 11 سنة ...

محمد تزوج بنت عمه فووز من بعد شمسة .. .. والله رزقهم باربع عيال .. (( فيصل 10 .... فااطمة 8 ..... فرااس 6......مريم 3)) ... ....... وامل بنت شمسة ..هه ... امل كاانت مثل الخدامة بالضبط .. فووز كانت تعاملها معاملة البهاايم .. كانت تكرهها ليش انه امل تشبه امها وكل مااطلعتها فووز تذكرت شمسة .. ويزيد الحقد بقلبها .. ..

فوز : انساانة انانية بكل معنى الكلمة .. تتعامل ويا عيالها احسن معااملة .. بس وياا امل ........ الله لا يوريكم !! ..

امل : صار عمرها 17 سنة .. المفرووض تكون اخر سنة بالمدعسة . احممم احم قصدي المدرسة *_^ .. بس فووز مااسمحت لها تكمل درااستها ... كانت تبيها خداامة لها ولعيالها .. .. اما امل كاانت رااضية بقدرها وصاابرة .. لانه مابيدها حيلة ... تلووم منو ؟؟ امها اللي تركتها وناادرا ماتسأل عنها ... ولا ابووها اللي حرمها من طفوولتها وتركها خداامة تحت امر زوجته فوز ..

بالمطبخ ..

امل بخووف وارتبااك : لا يااعمتي .. والله العظيم مو بقصدي .. والله مو بقصدي كسرته ..

فوز : سمعيني يالسبالة .. .. والله .... والله ياامل ....وربي ان كسرتي شي(ن) ثااني ... سااعتها نطري وشوفي الضرب اللي رااح ييج مني انا وابووج .. وسااعتها لاتلوومين الا نفسج ..

امل : انشالله ... انشالله عمتي .. اوعدج ماراح اكسر اي شي ثااني ...

فوز : يلا .. يلا .زهبي السفرة بسرررعة .. خلصيني ... اخواانج ميتين يووع .. يلا تحركي ..

امل : انشالله .. انشالله عمتي ..

............................

بغرفة النوم ..

فوز : يلا حبيبي قوووم ... الغداا زااهب يلا قووم ...

محمد : همممم شفيج ...السااعة كم ؟؟

فوز : 1 ونص .. يلا قووم .

محمد : زين زين .. بس عااد ..

...............

بدار فيصل وفراس ...

فووز رااحت وفصلت جهااز البلايستيشن : يلا تعالوا اكلوا وبعدين تكملوون لعب ...

...........................

بدار فااطمة ومريم ... الالعااب كللها ع الارض .. وكانوا يلعبوون بالدمى ..

فوز دشت داارهم ...

مريم رااحت بحضن امها : مااااااااماااااااااااا ..

فوز : عيوون ماما .. حبيبتي انتي .. يلا كلللنا نرووح ونتغدا الحين .. يلا ماما .. يلا فطووم ..

.............................

ع السفرة ..

الكل كاان قااعد يتغدا .. ( محمد ومرته فوز ... وفيصل وفراس وفطوم ومريم ... ) امل .. امل وينها ؟؟ ....

امل كاانت قااعدة ع ارضية المطبخ تاكل بشرااهة... حدها يووعانة .. اخر وجبة كلتها كاانت وجبة الغدا مالت امس ... والمسيكينة ناامت من غير عشاا ... وقاامت الفير .. تنظف البيت ... والمطبخ .. والحووش ... وترتب الاغرااض .. بينما الكل رااقد ... وغاايص باحلاامه ..

فوز تصاارخ : املل ... امل .... املوووووو املوو والصمخ يعلج المرض انشالله ..

بالمطبخ .. امل كاانت سرحاانة وتوها تنتبه لعمتها ...

امل : انشالله انشالله ... كااني ياية ..

وراحت لها ..

فوز : انتي يال ... يال .. استغر الله بس ..... شنو تسووين بالمطبخ ؟؟ اناديج من سااعتين .. ماتسمعين ؟؟

امل منزلة رااسها : ااا...انا كنت .. مم اتغدى ..

فوز عصصبت : شنووو ؟؟؟ تتغديين ؟؟ ايا بنت الذين .. ( صرخت بوييها ( .. انا ماقلتلج ممنوع تتغدين قبل لا احنا نخلص .. هااا ؟؟ .. انتي ماتحسين ... يعني اذا اخواانج ولا انا ولا ابووج احتجنا شي مثلا .. ؟؟ كم مرة اقولج هالكلام هاا ؟؟

امل رفعت عيونها تناظر ابوها كأنها تعاتبه وتقوله ( انا مو بنتك يايبه ؟؟ مو بنتك نفس فااطمة ومريم .. داافع عني يا يبه .. مو انا بنتك )) بس محمد خبر خير .. مو مهتم للي قااعد يصير لبنته من ورا زوجته فوز ..

فوز راافعة حااجبها : انتي اصلا تشكرين ربج وتحمديه لانه ابووج قلبه كبير وقااعد يصرف عليج للحينه .. المفرووض تشتغلين وتصرفين ع نفسج انتي مو يااهل .. ( وقالت بقرف( : يلا ماابي اشوف ويهج قداامي .. يلا ع المطبخ .. يلا ..

بخطوات سريعة راحت للمطبخ وقعدت بالارض .. تمت تطاالع كل شي حوولها .. حست بغصة وقهر .. وسرعاان مانزلت دمووعها .. دمووع الم ع حالها ... دمووع تحرق خدها بحرارة ..

امل رفعت رااسها تنااشد ربها وتدعي من كل اعمااقها : ياارب ... ياارب .. يارب سااعدني ... .. وينج عني يايمه .. وينج عني .. وينج .. ؟؟ انا بنتج ... بنتج امل ... حشاشة يووفج ... وينج عني يايمه .. وينج ؟؟ .. وقفة # يمه يمه وينج انتي ... انا بعدج حمامة بيت لااحقها العطش بالصييف .. يمه يمه وينج انتي ... انا بعدج بهالدنيا محسووبة مجرد طييف .. كم صيف جانا وكم شتااء ولا امطرت غيمة سمانا ... # .. وتمت ع هالحالة .. تدعي ربها يسااعدها ويرحمها ويخلصها من العذااب اللي اهي عاايشته ويا مرة ابوهاا ..

..................................

بعد شهرين ..

اخر يووم من الاجاازة الصيفية ..

فطووم : ياااي يمه انا وااايد واايد متحمسة للدرااسة ..

فيصل : ايه وانا بعد .... وبصرااحة بااجر بشووف ربعي .. واعاايرهم بأشياائي اليديدة اللي كلها حقت سباايدر ماان ..

فرااس : يمه منوا قوى .. سباايدرماان ولا سوبرماان ..

فوز : هههههه كللهم اقويااء .. بس انتوا لاازم الحين ترقدوون من وقت علشاان لاتتعبون بأول يووم درااسي ..

فيصل وفااطمة وفرااس : انشالله يمه ..

مريم : ماما انا بعد ابي ارووح للمدرسة ..

فوز : لا يااعيوون ماما انتي تووج صغيروونة ......

...................... تعشوا العيال وارقدوا ............................

رااحت فوز لدار العيال كللهم وتاكدت انهم رااقدين .. لحفتهم وغطتهم وبااستهم بهدووء وطلعت ..

قعدت بالصالة بطلت التلفزيوون ... فرفرت بين القنواات .. وحطت قناة الرااي ... تتابع مسلسل اميمة في دار الأيتام

...............................................

بمكاان ثااني ... ..

كاانت سرحاانة بفكرهاا ..

عاادل : ياشمسة ياحبيبتي .. شفيج متغيرة هالاياام ؟؟

شمسة : عاادل ... انا ظلمتها ... ظلمت بنيتي ... ظلمت بنييتي يااعادل ..

عاادل : ظلمتي بنتج !! منو .. عوااطف ولا عذرااء ؟؟ انتي عن شنوو قااعدة تتحجين ؟؟

شمسة : امل يااعاادل .. امل .. امل بنتي ... يااعادل انا ظلمتها ... عواطف وجنان قااعدين يتربوون بعزنا .. بس امل ..لاا امل انا ماادري شلوون يعااملوونها 11 سنة مااشفتها ... . يمكن انت مابتحس فيهاا ..... لانها مو بنتك ... بس هي بنتي مثل ماعذرااء وعوااطف بنااتي .. كل ماادق عليها تقولي انها بخير ... بس انا احس انه فوز تظغط عليها علشاان تقول هالكلاام ....

عاادل : بس انتي ياشمسة حااولتي تااخذينها .. بس المحكمة حكمت انها تظل عند ابووها .. وانتي سويتي اللي عليج واكثر ..

شمسة تبكي بألم : بس بالنهااية هااذي بنتي .. بنتي .. وكونها بنتي هالشي اقوى من القاانون ...

عاادل : خلااص شمووس .... ماباليد حيلة ... الله بيحفضها انشالله .. .وبعدين اهي مو عند وااحد غريب عند ابوها ...

شمسة : ادري بس .... ( وغااصت بين دمووعها تبكي بحسرة على بنتها ( ...

شمسة من بعد ماطلقها محمد ... تقدم لها عاادل .. والله رزقهم بعوواطف 13 سنة .... وجنان 11 سنة ...

شمسة قررت تبدا حيااتها من يديد وتنسى محمد للأبد او بالاحرى تتناسااه ... لانه كاان حبها الاول ... وتزوجوا عن قصة حب .. بس مع الاياام المشااكل بدت تكثر .. وبالاخص ام محمد اللي كانت مو طاايقة شمسة .. فكاانت تختلق اكااذيب بس علشاان محمد يطلق شسمة وتحقق اللي ببالها ... اكثرت المشااكل ومحمد طلق شمسة .. وامه مااصدقت خبر .. دغري خطبته لبنت عمه فوز .. وصاار اللي صاار .. ... شمسة اهتمت بحيااتها اليديدة ويا ريلها عاادل اللي مو مقصر ويااها ... وعاادل وبنااتها عواطف وجنان قدروا يملووا عليها حيااتها وينسووها المشااكل اللي صاارت .... ومع الاياام نست محمد .. ونست بنتها امل وصاارت ماتسأل عنها الا مااندر .. ..

............................................

ببيت محمد ...

بالصاالة ..

فوز كاانت قااعدة ع الصوفاا .. : امللللل ..

بالمطبخ

امل : انشالله .. انشالله ... ( ورااحت بسرعة ( .. : هلا عمتي امري ..

فوز : اول شي قعدي تحت ...

امل : انشالله .. ( قعدت بالارض ... بينما فووز قااعدة بالصووفا مسترخية ( ..

فوز : سمعي اللي بقولج اياه ..

امل : حااضر ..

فوز : طبعا مثل ماانتي عاارفة بااجر اول يوم بالسنة الدرااسية ... وابيج تقوومين مبكر يعني اممم حوالي السااعة 4 ظبط .. وتزهبين جنط العيال واليونيفوورم ( هدووم المدرسة ( .. ولما يوصل البااص تااخذين جنطهم لين ماايركبوون .. عااد ذيك السااعة تعطينهم جنطهم .. وااايه قبل عن انسى .. تسووين لهم سندويشاات ع ذووقهم .. يعني برقر .. الخ ... ولما ترووحين لبااص فيصل علشاان توصلينه .. رووحي حاافية ..

امل استغربت اواامر عمتها اللي خرجت عن المعقوول : بس ... بس عمتي .. انتي تدرين ... انه الارض كلها ترااب وحصى .. ووو ..و ..و

فوز : قلللتللج .. تروحين حاافية يعني ترووحين حافية ..

امل ماتحملت ... قاامت بسرعة ورااحت للمطبخ تبجي ..

امل " شلوون وليش ارووح حاافية يعني اهي شاللي بتستفيده ؟؟ تبي تذلني قدام خلق الله .. وتفشلني .. ماهمني بس الطريق طوويل شلوون وليش ارووح حافية .. ااخ ...اااه ..(وتمت تبكي من قللب ..الا تشهق من البكي .. ( .. # وقفة.... يادنياا وين نلقى الامان .. والهم مامنه مفر .. العيب مااهو بالزماان ... العيب بنفووس البشر ... ..

فوز تمت قااعدة بالصالة .. وكأنه سؤال امل وصلها " هه ابيج ترووحين حاافية علشاان اللي بباص فيصل لايحطوون عينهم علييج .. انا ابيج خداامة لي طوول عمرج .. .. " << ترا مدرسة فيصل طلابها 5-12) .. يعني اكو اللي بعمر امل .. ويعني فووز من شدة حرصها انه امل مايتقدم لها اي ااحد .. وهي تدري انه امل حلوة .. يعني فيها جمااال .. فخاافت احد من الشباب اللي بباص فيصل يحط عينه عليها ومع الاياام يحبها ولما يخلص يخطبها .. )) .. شفتواا هالبشر شلوون قلووبهم قااسية ...

............................................

بعد 5 اشهر ..

امل : يلا فيصل حبيبي .. البااص وصل ...

فيصل : انتي لاتقوولين حبيبي .. انا رياااال فااهمة ..

امل : انشالله .. ماراح اقول حبيبي .. بس يلا بسرعة .... ( واخذت جنطته .. ووصلته للبااص ( ..

..........

بالبااص ..

راكاان : شحلااتها هالملااك .. قسم تهبل ..

طلال : اخخ عليك بس .. تحط عينك ع خدامات ..

رااكان دزه : مينوون انت هااي مب خداامة حبيبي .. اصلا انت طاالع شكلها .. خليجية .. ملامحها ملاامح خليجية .. مستحيل تكون خداامة ..

طلال : ايه ماافرقت ... انت طالع ريوولهابس خخخ .. ياية لهني حاافية خخخخ .. كله مغبر ..خخخ ..

راكان : اقوول جب بس ..

........................................

ببيت محمد ..

العياال بالمدرسة ومحمد بالدواام ... ومااكو غير فوز وبنتها مريم .. وامل بالمطبخ ..

ررن تلفوون البيت ..

ردت فووز .

فوز : الوو ....... الوو

شمسة : السلام عليكم ..

فوز : خير شتبين ؟؟

شمسة : ابي احااجي بنتي ..

فوز : لحضة ..

رااحت فووز للمطبخ ..

فووز : املوو سمعيني عدل .. امج دقت وهي ع الخط ..

امل : صج .. ( وكانت بترووح بس فووز مسكتها من ايدها ( ... سمعي انا مااخلصت كلاامي .... ابيج تقوولين انج بااحسن حاال .... وابووج مو مقصر ويااج ساامعة ...

امل : انشالله عمتي .. ( ورااحت بسرعة مو مصدقة انه امها دااقة .. رفعت السمااعة

امل : الوووو .. الوو يمه ... يمه

طوووووووووووووووووووووووووووووووووووووووووووووووط ...

امل وكأنه مااي باارد انجب عليها .. لفت تطالع عمتها : ليش يااعمتي تعوورين قلبي ... ليش تقصيين علي ؟؟

فووز : اقوول بلا كلاام فااضي .. وروحي كملي شغلج بالمطبخ .. شكل امج هوونت وماتبي تكلمج ... وانا مااقصيت عليج .. امج دقت .. يلا .. يلا ع المطبخ .. كملي شغلج ..

امل رااحت بااحبااط ... ودمووعها تجمدت بعيوونها .. مقهوورة .. .. ومكسوورة .. مالها غير دمووعها والمها وعذاابها ..

رااحت للمطبخ .. تكمل شغلها واهي مكسوورة ...

ومرت الاياام ... واهي ع هالحاالة ...

.......................

ببيت عاادل ..

شمسة : دقيت عليها قبل اياام بس الرصيد خلص وماامدااني احااجيها ..

عاادل : زين دقي عليها الحين ..

شمسة : لا ماابي .. محمد يكوون موجود بهالوقت ....

عاادل : براااحتج ..

..................................

ببيت محمد ..

كاانوا مقررين .. يطلعوون ويا العيال يغيروون جوو .. ويرووحون البارك ..

فوز : امل روحي البسي بترووحين ويانا ... علشاان تديرين بالج على مريم ...

امل : انشالله ..

........................

بالباارك ..

مريم تبجي : ابي ارووح هنااك ماما .. ابي ارووح هنااك .. وكانت تأشر ع الالعااب ..

فوز : زين ياماما .. انتي لاتبجين .. الحين بترووحين .. ياعيوون ماما .. .. امل رووحي ووديها بس ديري بالج عليها .. فااهمة ... ياويلج ان بكيتيها ..

امل : انشالله عمتي ..

واخذت مريم صووب الالعااب .. وفيصل وفااطمة وفرااس راحواا ويا ابووهم صووب لعب الكباار ..

صوب الالعااب ..

راكان : هييييييه طليل شووف منو هنااك

طلال : خير منو ؟؟ والتف يطالعها ............ احسب عندك سالفة ..

راكان سحب طلال من ايده وقال : انا ماراح اضيع هالفرصة ...

طلال : شقصدك ؟؟

راكان : تعال وبتشووف ..

رااحوا للمكان اللي هي وااقفة فيه ..

امل تأشر ع لعبة : تبين هاللعبة مريوومي ..

مريم : ايه ..

ورااحت امل وعطت الهندي التذكرة ... ودشت مريم باللعبة .. وامل تمت وااقفة تنطر مريم تخلص .. وتمت تطاالع حولها .. وانتبهت لشاابين بعمرها تقريبا قااعدين يطالعونها ..

امل " هذوولي مو غرب ..انا مو اول مرة اشووفهم ...... ايييه تذكرت هذولي بباص فيصل ياويلي ليش قااعدين يطالعوون جذي "

وتقرب منها راكان .. : لو سمحتي ..

امل طااح قلبها ببطنها .. وماعطته ويه ..

راكان : لوسمحتي انا مابطول .. بس ابيج تااخذين هاذا ..

امل طالعت اللي بايده ورقة صغيرة مكتووب فيها رقم ... تررددت وخاافت تااخذ الرقم .. تااخذه ولا لااء .... تااخذه ولا لااء ...

........................... شنو توقعااتكم .... راح تااخذ الرقم ولا لااء ؟؟

الجزء الثااني

مدت ايدها بتردد ... وخذت الرقم ...

وراكان وصاحبه طلال رااحوا بعيد عنها ..

امل " انا ليش سوويت جذي .. ليش خذيته .. افف ..ليش .. لا بس اهو يمكن يكوون الطريقة الوحيدة اللي ممكن تطلعني من هالعذااب .. واللي ممكن يوديني عند امي ... امي اللي 11 سنة مااشفتها .. بس اسمع صووتها .. وياليت كل يووم ب8 اشهر مرة ..انا رااح احااجي ورااح اخطط ويااه شلوون اطلع من البيت ... وارووح لامي .. انا خلااص تعبت ..تعبت .. ))

وقفت اللعبة .. ورااحت امل تااخذ مريم ..

.......................................

يتبع ,,,,

👇👇👇

تعديل المقال