رواية قتلهن الطيش وأحياهن الحب -7
انتهت الدوامات والكل رج بيته طبعا هند مو متعوده على نظام القومه بدري عشان كذا رجعت الببيت ونامت على طول ,,,, ونور بعد رجعت ونامت ,,, اما لوجين هي الوحيده اللي ماقدرت تنام من القلق وليد بيكمل اسبوع ماتصل عليها ولا يرد على اتصالاتها بعد مارجعت من المدرسه وبدلت ملابسها انسدحت على السرير تبي تشوف طريقه توصل فيها لوليد او لربعه لكنها محتاره انطق باب الغرفه
لوجين : منو؟
هدى تفتح الباب وتلقاه مقفل بالمفتاح : انا افتحي
قامت لوجين وفتحت الباب : هلا ماما
هدى : انت وش سالفتك
لوجين تدخل وتجلس على السرير : سالفه وش؟
هدى تدخل الغرفه وتسند ظهرها على التسريحه: مدري عنك ماتتغدين ولا تتعشين وطول الوقت الباب مقفل عليك
لوجين : مافي شي والاكل مااشتهي اكل
هدى: ايه ليش ماتشتهين ؟
لوجين حست انها خلاص بتبكي ونزلت راسها : متضايقه بالحيل ماما
هدى قربت لها وحطت راس لوجين على صدرها: من وش ياقلبي وش اللي مضايقك
لوجين ماتدري وش ترد عليها وهي تصيح : شايله هم ثالث
هدى رفعت راس لوجين وناظرت فيها: لا تتضايقين حبيبتي الله بيوفقك ان شاءالله بس شدي حيلك ولا تهملين وبعدين انا مااشوفك تذاكرين زين مايصير ياحبيبتي لازم تجيبين نسبه عاليه وتتخرجين وانا كل يوم ادعيلك
لوجين حست انها ارتاحت مو من كلام امها ارتاحت لآنها طلعت الدموع اللي حاشرتها لها كم يوم : اوكي ان شاءالله بذاكر اصلا مابقى شي على الامتحانات
هدى : الله يوفقك ان شاءالله انت وفهد,, والحين ماتبين تتغدين
لوجين: لا ابي انام واذا قمت اكل
هدى وهي طالعه : على راحتك
لوجين ماتبي تنام بس عشان تسكت امها ولا هي بتجلس تدق على وليد لين يرد عليها ..
..........................................
خالد وبندر ووليد وعبدالرحمن بعد ماطلعوا من الجامعه راحوا على مطعم البيك يتغدون هناك طبعاً (هالشباب من الفلاحه اخذين كل سنه بالجامعه بسنتين ) دخلوا الشباب للمطعم وكالعاده الزحمه فيه فضيعه وبطلعه الروح لين اخذوا لهم طاوله وطلبوا الطلب ,,, وهم جالسين ينتظرون الطلبيه رن جوال وليد وطلعه من جيبه طالع وضغط سايلنت ورجعه بالجيب
عبدالرحمن: من اهلك؟
وليد: لا مو اهلي بس مالي خلق ارد على احد
عبدالرحمن: ليش ؟ وش فيك؟
وليد: ابد سلامتك
رن الجوال مره ثانيه طلعه من جيبه وسوا نفس الحركه اللين فصل واغلق الجوال وحطه على الطاوله
خالد: وليدووو من اللي تدق عليك
بندر: اكيد لولو النشبه يعني منو
خالد: ههههههههههههه
عبدالرحمن: ليه نشبه لايكون كل يوم تتصل عليك
وليد تأفف ورد خالد: يووووووووووه كل يوم هذي قليله ياشيخ البنت هذي مصرقعه ومدلعه واربع وعشرين على اربع وعشرين تتصل هذا وهم مالهم مده مع بعض
عبدالرحمن: طيب عشان مالهم مده صايره كذا بس خلي يمر عليهم كم شهر بتمل وتبطل تدق
وليد: ماظنتي والله بس خليها تتأدب هالمره قرصه اذن
ينطق الحاجز ودخل القرسون : اكس اكيوزمي
قدم الوجبات وتناولها منه بندر وكلٍ اخذ وجبته وبدو ياكلون وقفلوا على الموضوع
...................................
اذن المغرب توها هند تتحرك من السرير وتسحب الجوال وتناظر الساعه : يووه ماصليت
وقامت على الحمام دايركت ,,, طلعت من الحمام واخذت شرشفها وسجادتها وكبرت بهالحظه انطق بابها وانفتح وشافت ماجد جلس علىالسرير خلصت صلاتها ومازال موجود
ماجد: توك صاحيه؟
هند: ايه
ماجد: ماتشبعين انت من النوم انا اواصل يوم كامل ومانام مثلك
هند: مجود ترى مالي خلق اسولف
ماجد: ليش
هند: من غير ليش يعني توني قايمه من النوم تبيني اقرق على طول
ماجد: بسم الله وش فيك انت
هند تتأفف وهي تفصخ شرشفها رمته على السجاده وطلعت وخلته ,,,, نزلت ودخلت المطبخ فتحت الثلاجه صبت لها كاسه عصير مشكل وفتحت الدولاب واخذت لها بسكوت وطلعت الصاله وشغلت التلفزيون وجلست على الكنبه شوي وتنزل الهنوف ودخلت : السلام
هند بصوت اقرب للهمس : وعليكم السلام
جلست هنوف وتطالع التلفزيون وهند من يوم جلست ماثبتت على قناه معينه
الهنوف: هنوده اثبتيلك على شي
ماردت عليها هند ومستمره بتقليب القنوات انفتح باب البيت ودخلت سعاد : السلام عليكم ورحمه الله
البنات : وعليكم السلام
سعاد: هاا صحيتو من النوم
الهنوف: انا مانمت اصلا
سعاد: ليش حبيبتي
الهنوف : ماجاني نوم صاحيه الظهر ..نسيتي اني غايبه
على نزلت ماجد من فوق سعاد: غريبه انت موجود بالبيت
ماجد: ماغريب الا الشيطان
سعاد تتطالع هند وهند عيونها لتلفزيون: هنو
هند تناظرها: نعم
سعاد: وش فيك
ماجد وهو يجلس: مافيها شي توها صاحيه ومابعد فكت الكشره
هند : احد طلب منك تجاوب عني
ماجد يضحك: وش فيكي اليوم
هند: مافيني شي
سعاد: كيف روحتك للكليه اليوم
هند: حلووه
ماجد مستغرب : وانا اقول ليش نايمه للحين ,, يوم شاب ودوه الكتاب وش عندك بالكليه لا تقولين بتكملين دراستك
هند: هيهيهيهي بايخ ايه بكمل عندك مانع
الهنوف: صدق هنوده؟
هند: ايه فيها شي
سعاد وهي طالعه على الدرج ومبتسمه : ماكلين المقلب زين
ماجد: أي مقلب بعد
والهنوف عيونها بين هند وماجد وامها
سعاد: لا ابد سلامتك وكملت طريقها لفوق
ماجد: طيب وش الطاري انا طول عمري اعرفك محاربه فكره الدراسه
الهنوف: ليش هنوده انا كنت ناويه اصير مثلك بس اخلص ثانوي واجلس بالبيت
ماجد: ونعم القدوه والله
الهنوف: عادي اهم شي اعرف اقرا واكتب خلاص يكفي
هند وبدت النفسيه تروق: هههههههه صدقتوا؟
ماجد: اجل ليش رايحه
هند: نونو قالتلي اجي كان عندهم طبق خيري هناك
ماجد : اهاااا وانا اقول مو معقوله بيتكملين دراستك قلت بنفسي يمكن الدنيا صار فيها شي .. المهم يعني اليوم شفتي نونو
رفعت هند حواجبها: شفت منو؟
ماجد يخفي ابتسامته: نونو
هند: ماسمعت عيد
ماجد: عيد ولا سعيد هههههههههههههههههههه
هند: ماصخ
ماجد : حطيلي شويه ملح هههههههههههههه
هند طالعته وشمقت فيه ودارت راسها لتلفزيون
ماجد: ارحمني ياابو عيون تذبح ,, ويغنيلها سود العيون كبار والشامه حلوه شايل جمال الكون باليني بلوه
الهنوف : ههههههههههههههههههههههههههههههههههههههههه
ماجد طالع في الهنوف: ليش تضحكين انتي
الهنوف وهي تضحك : ولا شي بس كذا
ماجد: ليش خبله
الهنوف وزادت ضحك : لا هبله
ماجد يضحك ماتوقع منها هالرد : حركات صاير دمك خفيف
الهنوف تضحك: ثقله بشويه حليب
ماجد طير عيونه ومات ضحك مو متعود هليها كذا دايم هاديه ومالها صوت : المهم نرجع لمحور حديثنا
الهنوف : محور ولا زاويه
ماجد: خلاص لا تزودينها نرى تمصخ
سكتت الهنوف بعد مااحرجها وقامت
ماجد: مارديتي هند
هند: على وش
ماجد: قابلتي نونو اليوم
هند: ومن متى تمون وتدلعها
ماجد: عادي مافيها شي انت دايم تقولين نونو عشان كذا تعودت ادلعها مثلك
هند: لا ياشيخ
ماجد: ايه انت شوفي نفسك ماتنادينها الا نونو
هند: انا غير وانت غير
ماجد: لا حنا اخوان يعني مثل بعض
هند رمت الريموت على الكنب وقامت : اوووف
ماجد يضحك: وش فيك؟
هند وهي تمشي من قدامه : ولا شي
.......................................
نور قامت من النوم وتوضت وصلت ونزلت للصاله لقت ضي جالسه تطالع التلفزيون : السلام عليكم
ضي : وعليكم السلام
نور: وين ماما
ضي : بغرفتها
جلست نور ومسكت جوالها وجلست تلعب فيه سنكس ,, دخل عبدالرحمن البيت : السلام
البنات : وعليكم السلام
عبدالرحمن دخل وجلست مع خواته: وين امي وابوي
ضي: ماما بغرفتها وبابا موب موجود,, وين تغديت اليوم تراه سأل عنك وجلس يزاعق
عبدالرحمن : ليه يزاعق؟
ضي: عشان مايشوفك يانايم ياطالع ويقول انت اخذ البيت فندق
عبدالرحمن: يوووه وش يبيني اسوي له يعني اجلس مثل الحريم بالبيت
نور: لا لاتجلس مثل الحريم بس لا طلعت من الكليه روح سلم عليه شوف يبي شي بس وريه وجهك
سكت عبدالرحمن لأنه حاس ان كلام نور في مكانه .. حنان نازله من الدرج وداخله الصاله : السلام عليكم
الكل: وعليكم السلام
حنان تناظر نور: صح النوم بدري
نور وعيونها على الجوال ومندمجه باللعب: صح بدنك
جلست حنان : وانت بعد وينك اليوم ابوك يسأل عنك
عبدالرحمن: طلعت انا والشباب تغدينا بعد الكليه
ضي: وش تغديتو
عبدالرحمن: البيك
ضي: الله ودنا نتعشى فيه
عبدالرحمن : الظهر زحمه ماينطب شلون الليل تغدي بالبيت احسن لك
ضي وكشرت : دحوم الله يخليك دايم اقولك وديني المطعم ولا توديني
عبدالرحمن: ياحبيبتي اليوم اربعاء يعني موب زحمه الا موت
ضي وزعلت: ياربي انا طفشت بس جالسه بالبيت من المدرسه للبيت ومن البيت للمدرسه
وتأففت وقامت وهي طالعه الدرج ناداها عبدالرحمن: ضي
ضي بصوت عالي شوي ومن غير ماتوقف او تلف عليه: نعم
عبدالرحمن: البسي بعد العشا وباخذك امشيك
بهالحظه وقفت ضي وابتسمت : صدق
عبدالرحمن: ايه بس مابوديك البيك بس امشيك وخلي البيك وسط الاسبوع عشان الزحمه اوكي
ضي وبتتقطع من الوناسه : اوكي
وكملت طريقها للغرفه
عبدالرحمن يكلم نور وحنان: تروحون معنا
حنان: لا انتو روحو وانا بجلس انتظر ابوك اكيد بيجي ويبي عشا
عبدالرحمن: نجيبله معنا
حنان: لا روحو انتو واستانسو
عبدالرحمن : براحتك ويناظر نور: ماتبغين تروحين معنا
نور مندمجه باللعب وماردت ومسك الخداديه ورماها عليها
نور عصبت : نعم وش تبي
عبدالرحمن : لا تنافخين صدق ماتستاهلين اللي يعبرك
نور: خلاص اسفه وش تبي يااخوي العزيز
عبدالرحمن: تبغين تروحين معنا تجهزي بعد العشا
نور: وين بتودينا على اساس المكان اللي بنروحه اقرر
عبدالرحمن: مانيب قايل تبين تمشين معنا تجهزي ,, وقام بيطلع غرفته
نور: ماما اكدتي على خاله هدى وخاله سعاد العزيمه اللي بكره
حنان: ايه خلاص من بدايه الاسبوع
عبدالرحمن وهو طالع : أي عزيمه
حنان: ابوك عازم جيراننا بكره على العشا خلي بالك حريم ورجال يعني لازم تكون موجود
عبدالرحمن : ان شاءالله
وطلع لغرفته ....
.............................................
من جهه ثانيه في بيت ابو فهد
طبعا لوجين مانامت وبكت لين خلصت دموعها بعد ماقفل وليد جواله كانت جالسه بغرفتها ومشغله اللاب توب وتسمع اغنيه حاسس بخوف لتامر حسني المغني المصري ( حاسس بخوف عمال بيبعد البي عنك معرفش ليه مابقتش حاسس حاجه منك وكتير بكون انسان غريب وانا جوا حضنك ) انطق بابها وانفتح ودخل فهد
: السلام
لوجين وعليكم السلام
فهد : وش يسوي الحلو
لوجين : ولا شي طفشانه وجالسه العب باللاب
فهد: شرايك نطلع
لوجين : مالي خلق
فهد: تقولين طفشانه
لوجين : ايه بس ماابي اطلع من البيت
فهد وجلس جنبها على السرير : وش اللي مطفشك
لوجين : بس كذا مافيني شي
فهد : طيب يلا قومي والله بونسك وبعشيك وبخلي الطفش يروح حتى انا مثلك طفشان
لوجين: طيب اطلع مع ربعك
فهد: ماابي ربعي قبل ساعات كنت معهم بالكليه
سكتت لوجين شوي وقالت : خلاص شوي وارد عليك اذا ايه ولا لا
فهد: اخ من الدلع بس اوكي انا بالصاله مع امي لا قررتي يالدلوعه قوليلي
لوجين ابتسمت : اوكي
قام فهد وطلع من الغرفه وقفل الباب ومسكت لوجين جوالها ودقت على وليد لكن لازال مغلق وفكرت شوي وقالت بنفسها انا مزعله حالي وهو يشوف اتصالاتي ولا يرد وبعدها يقفل جواله لو فيه شي مابيسكت على الاقل يقولي برساله بس الظاهر ماعنده سالفه وانا ذابحه نفسي خلني اطلع ازين
قامت غيرت بجامتها ولبست بنطلون جنز ازرق وتيشيرت ابيض مقلم بدرجات الازرق ورمت جوالها على السرير ماتبي تاخذه عشان لو دق وليد وهي متأكده انه مابيدق ماترد عليه وبتعيش وقتها بعيد عن الجوال اللي من معرفتها بوليد قلب حياتها وسحبت عباتها من الدلاب ونزلت ,, دخلت الصاله وكانت امها وابوها وفهد جالسين يسولفون ويشربون شاهي
لوجين : هااي
ابتسم فهد يوم شافها: هااايااات
هدى: اهلين واخيرا نزلتي
ابوفهد: هلااا دلوعتي لي يومين ماشفتك وبعدين في مسلم يدخل على الناس ويقول هاي
تقرب لوجين وتحب راس ابوها : اسفه بابا
هدى: اخذه عباتك على وين العزم ان شاءالله
فهد: انا باخذها امشيها واعشيها تطلعين معنا يمه
هدى: لا مافيني حيل انتو طلعوا واستانسوا
ابو فهد: وانا مالي رب ماتعزمني
فهد انحرج: لا والله حياك معنا بس اعرفك ماتحب الطلعات والمطاعم
ابو فهد يضحك : طيب وراه وجهك تلون
لوجين تضحك: بابا فشلته
فهد: لا فشلني ولا شي عادي هاا بتطلعون معنا ولا لأ؟
ابوفهد: لا طلعوا انتوا تبون فلوس؟
فهد: لا معاي
لوجين : لا لا وش معاك لا مامعاه بابا
هدى: وش دراك انت
لوجين : ادري
ابوفهد : قولي انت اللي تبين فلوس مو فهد اللي مامعاه
لوجين تضحك : ياجعلي فدا عبودي
هدى : لولو عيب وش عبودي
ابوفهد: خليها يابنت الحلال موب كل يوم اتدلع انا
فهد: وامي وش شغلتها
هدى انحرجت : وش سالفتكم انتو اليوم قاطين الحيا
الكل يضحك على هدى ووجهها اللي صار احمر فهد: يلا لولو مشينا
لوجين : يلا
وقامت تلبس عباتها وفهد وقف يعدل شماغه ومشى قبلها وهي وراه يوم وصلو للباب شهقت لوجين: لحظه لحظه
التفت لها فهد وناظروا فيها امها وابوها وقالت هدى: خير وش فيكي
وتأشر لأبوها بيدها يعني وين الفلوس
ابو فهد : ياويلي منك ماتنسين
لوجين تبتسم : هذي فلوس ماتنسي
عطاها ابوها 300 ريال
لوجين : بس هذي
ابوفهد : كم تبين يالطماعه
هدى: لولو تكفيك هذي تراكي بتتمشين مو تتقضين
لوجين اخذتها وحبت ايدها وجه وقفا : ماشي حالهم شكرا يالغالي
ابوفهد: تعالي تعالي خذي
وعطاها 200 زياده
لوجين : وااااااااااااااااو شكرا وتحب ابوها وتلحق فهد اللي سبقها وركبوا السياره ومشوا
..............
يتبع...
هند بغرفتها جالسه وتتذكر اللي صار مع منيره بالكليه وتقول معقوله تسويلي شي وتضرني لا مااعتقد وش بتسوي يعني مابينها وبيني شي اقول ماعلي منها خلها تولي وتسحب جوالها وتتصل على نور
نور لازالت بالصاله وتلعب والظاهر انها تختم المراحل ورن جوالها : هلا هنوده
هند: مرااااحب ياحلو كيفك
نور: تمام الحمدلله انت كيفك بعد اليوم
هند: ماشي الحال ماني متعوده على قومه الصبح ومن يوم رجعت نمت للمغرب
نور: اهااا ووش تسوين الحين
هند: ابد ولا شي جالسه بالغرفه وقلت ادق عليك
نور: يابعد عوومري والله
هند : اقول نونو
نور: سمي يالبيه قولي عطينا من هالدرر اللي عندك
هند: ههههه شكرا اقول تتوقعي منيره بتضرني بشي
نور: لا لا مااظن بس كذا اسلوب تخويف وبعدين ماعليك منها ولا تفكرين بهالموضوع كثير اوكي حبيبتي
هند: اللله يريح قلبك ريحتيني
ضي نازله من الدرج وتناظر نور: نوووووور يلاااا عبدالرحمن يقول اجهزي
نور: طيب ,, هنوده
هند: هلا
نور: اسمعي انا طالعه الحين اذا رجعت بكلمك
هند شهقت : يالخاينه وين بتطلعين وتخليني
نور تضحك : والله دحوم بيطلع ضي يمشيها وعرض علي وتعرفين طبعا مافي أي مجال للرفض بالنسبه لي
هند: افا يالنذله بدال ماتجلسين مثلي بالبيت وتقولين حرام صديقتي بالبيت وانا اطلع مايسير
نور: اقول ريحينا بالله مافكرت فيكي
هند : طيب يانذله
نور تضحك: ههههههههههههه خلاص ولا تزعلي المره الجايه اخذك تعرفين الدحمي يستحي ولا كان اخذتك معي
هند : اقول يلا يلا بلا كلام فاضي لا يخليك ويروح حس بالك مااعرفه
نور : هههههههههههه طيب يابعد عوومري
هند: ههههههههه يلا سلام
نور: صح صح ذكريني اقولك شي مهم بالحيل
هند: خير وش في بعد مصايب غير منيروه
نور: لا يابعد عوومري شي اهم
هند : اوكي بس نونو تراك غثيتينا بعووومرك اللي موب راضي يخلص ويفكنا منك
نور: ياحماااااااااااااره تبين الفكه مني
هند: لا لا موب قصدي امزح
نور: يابعد عووومري والله
هند ماتت ضحك : اقول انقلعي باي
نور: ههههههههه بايات
قامت نور وطلعت لغرفتها واخذت عباتها ومرت على ضي بالغرفه تدق الباب وتدخل
: هاا ضي خلصتي
ضي ايه
نور: وينه عبدالرحمن
ضي : بالحمام قالي اجهزوا على مااطلع
نور : اها طيب وطلعت وراحت لغرفه امها دقت الباب
حنان: من؟
تفتح وتدخل: انا
حنان : تعالي وش تبغين
نور: ابي فلوس
حنان تفتح شنطتها وتطلع بوكها وتسحب لها 200 : خذي هذي لك
وسحبت 200 ثانيه : وهذي لضي
نور : ثانكس مام
حنان : لحظه تعالي خذي هذي لأخوكي
وسحيت 400
نور: وانا ليه ماتعطيني مثله
حنان : اللي عطيتك تكفيك
نور: تكفين زيديني
حنان : لأ خلاص يكفوك يلا روحوا ولا تتأخرون سمعتي
نور: اوكي يلا مع السلامه
طلعت نور من الغرفه واخذت من فلوس عبدالرحمن 200 وصار معها 400 كامله ونزلت تنتظرهم
طلع عبدالحمن من دوره المياه ولبس بنطلون زيتي وبلوزه اورنج وسوا شعره بالجل وطلع من غرفته لغرفه ضي ودق الباب ودخل: هااا ضيو خلصتي
ضي : ايه
عبدالرحمن : يلا مشينا نور خلصت
ضي : اظنها بالصاله تحت
وقف عبدالرحمن بأول الدرج وناظر شاف نور جالسه : يلا ضي هذي هي تحت
عبدالرحمن وهو نازل: يلا نور
طلعوا وركبو السياره ,, في السياره تفتح نور شنطتها وتطلع البوك حقها وتسحب 200 وتعطيها عبدالرحمن : خذ امي عطتك
عبدالرحمن : انا معي من اللي طلبها
نور: انا
اخذها : يلا زياده الخير خيرين
وعطت الـ 200 الثانيه لضي وراحوا على( لونا بارك )
........................................
وليد بغرفته جالس يتجهز عشان يطلع خلص لبسه اخذ مفتاح السياره والجوال وطلع من الغرفه تقابله امه : بتطلع
وليد : ايه تبين شي قبل اروح
ام وليد : لا يمه سلامتك
وليد : مع السلامه وطلع ... ركب سيارته ودق سلف ومشا شغل الراديو على بانوراما تذكر جواله اللي مقفل من الظهر سحبه من الجيب وشغله مااخذله دقايق الا ورن الجوال توقع انها لوجين بس طلع خالد
وليد: هلااا خلوود
خالد : وينك فيه
وليد : توني طالع وبجي الاستراحه انت وينك
خالد : انا بالاستراحه
وليد وهو يكلم خالد يسمع رنه الرسايل اللي توصله : اوكي انا جاي بالطريق
خالد : اوكي يلا سلم واسلم
وليد : مع السلامه ,,, نزل الجوال من اذنه وشاف رسالتين فتح الاولى لقاها من الجوال والثانيه موجود من لوجين حوالي عشر مرات داقه وقال بنفسه خلاص خلني ادق عليها ... اتصل عليها اول مره محد يرد مع ان توقعاته كانت من اول رنه بيسمع صوتها ودق المره الثانيه بعد ماترد استغرب الشي هذا وقال خلها بكيفها بترجع تتصل من حالها وحط جواله وكمل طريقه للإستراحه
....................................
لوجين وفهد وصلو لونا بارك ودخلوا واخذوا لهم طاوله بالصاله المغلقه وطلبوا لهم عصير وكارسون بالجبن وضلوا سوالف واستهبال من فهد ,,,, لوجين وهي تناظر بالمكان اللي هم فيه وتشوف الرايح والجاي وتعلق طاح نظرها على عبدالرحمن ونور وضي
لوجين : فهد
فهد: هلا
لوجين ناظر هناك عند الباب مو هذا عبدالرحمن سعود
فهد: ايه والله
لوجين وانبسطت : الله وناسه نونو معاه
عبدالرحمن ونور وضي ماشين وهم بعد بياخذون لهم طاوله وبعدين عبدالرحمن بياخذ ضي برا عشان تلعب باللالعاب وهم ماشيين مانتبهوا لفهد ولوجين قامت وقفت لوجين
فهد: وش فيكي
لوجين :بأشر لنونو
وأشرت لها وانتبهت نور وعقدت حواجبها
عبدالرحمن: من هذي
نور شهقت : هذي لوجين هنا تعال بروح لها
ومشت وعبدالرحمن وراها وصلوا لطاوله وفهد قام لعبدالرحمن : هلا والله
عبدالرحمن : وش هالصدف
فهد : شايف كيف البركه في البنات
عبدالحمن هههه أي بركه ياشيخ
عبدالرحمن وفهد اخذوا طاوله جنب خواتهم وجلسوا ونور ولوجين وضي جلسوا على طاوله لحالهم
نور: خساااره ناقص هنوده
لوجين : أي والله
عبدالرحمن جذبته لوجين بشكل كبير رغم انها متغطيه وعيونه صارت تروح وتجي على طاوله البنات قام وقف
فهد: على وين
عبدالحمن : بشوف ضي متى تبي تطلع تلعب لأن الطلعه هذي كلها عشانها وراح للبنات من بعيد ونادى ضي
ضي قامت له : نعم
عبدالرحمن : ماتبين نطلع برا للأعاب
ضي : دقيقه بشوف نور ولوجين
راحت لهم : نور لوجين تلعبون معنا ولا نروح لحالنا
نور : لا كلنا نبي نلعب
لوجين : لا ياشيخه وانا وين اروح بينكم
نور: عادي العيال مع بعض والبنات مع بعض واصلا الاعاب كلها كذا
لوجين : اوكي
راحت ضي لعبدالرحمن : البنات يقولون الالعاب لازم البنات لحال والعيال لحال وانا بقوم العب معاهم وانت بتجلس مع اخو لوجين ولا كيف
عبدالرحمن : اوكي انا معه وانتو خلكم مع بعضكم سامعين
ضي: طيب وراحت للبنات
عبدالرحمن رجع لم فهد وجلس معاه وسوالف وضحك والبنات قاموا راحت نور لعبدالرحمن وقالت له حنا برا بنلعب
عبد الرحمن : اوكي وانتبهوا لبعض
نور: اوكي
وطلعوا البنات برا يلعبون ,,,,,,,,,
,,,,,,,,,,,,,,
هند جالسه بالغرفه وفاتحه النت ومافي احد اون لاين دق جوالها ورفعت الجوال وكان رقم غريب عطته سايلنت وردت عيونها للاب توب ورجع يدق الرقم وتعطيه سايلنت بعد خامس اتصال ردت وسكتت
....: الوو
هند: نعم
....: هذا جوال عبدالصبور
هند: لا غلطان
......: ههههههههههه
هند قفلت بوجهه
........................
سعود توه داخل البيت وحنان كانت بالصاله
سعود: السلام عليكم
حنان: وعليكم السلام ورحمه الله وبركاته
سعود دخل الصاله جلس: وين العيال
حنان: عبدالرحمن اخذ خواته وطلع يمشيهم ,, تعشيت ؟!
سعود: لا والله ماتعشيت محضرين شي للعشا ولا لا
حنان : اللحين اقوم احضرلك
سعود: يلا بالله قومي جهزيلي شي تراني على الغدا
حنان : ابشر وقامت
قامت جهزت العشا وقام سعود يبدل ملابسه ونزل وهم على السفره يتعشى رن جواله
ابو بدر يتصل : هلا هلا ابو بدر
ابو بدر: السلام عليكم مساك الله بالخير
سعود: وعليكم السلام والرحمه مساك الله بالنور والسرور شخبارك
ابو بندر: الحمدلله نبشرك بخير ويسرك الحال
سعود : دوم ان شاءالله
ابو بندر: اقول ابو عبدالرحمن الشركه المتعاقدين معها كلموني وقالو بكره في اجتماع بالرياض وضروري تحضره
سعود: لا ياشيخ بكره بكره ضروري
ابو بندر: أي والله بكره بعد المغرب لازم تكون موجود بمكان الاجتماع
سعود: يسير خير ان شاءالله
ابو بندر: يلا تامرنا بشي
سعود : سلامتك
ابو بندر: يلا السلام عليكم
سعود: ياهلا مع السلامه ...
حنان : منو هذا
سعود: مدير العلاقات العامه يقول في اجتماع طارئ بكره بالرياض
حنان : طيب شلون العزيمه اللي بكره
سعود : وش نسوي لا زم نعتذر منهم وانت اجمعي الحريم عادي
حنان : كم بتجلس هناك ؟
سعود : يوم واحد
حنان سكتت شوي وقالت : شرايك تمددها كم يوم واروح معك
سعود: وين تروحين يابنت الحلال
حنان : مايخالف تغير جو لي ولك خلص شغلك بكره والكم يوم الثانيه نتمشى فيهم شوي
سعود: والعيال من بيجلس معهم بالبيت
حنان: ماعليهم خوف البنات ومعهم عبدالرحمن وعبدالعزيز بالبلد
سعود: يسير خير خليني اتصل على الخطوط
يتبع ,,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك