رواية بلا رقيب -63
كانت عيون مولعه نار .. لا رحت فيهاااا ...
انا جولييت ...
قبل مايظربني قربت منه وحطيت راسي على صدره يعععع وش ريحة الدخان هذي ....
مررت يدي الثانيه على ذقنه ..
سارا :أنا آسفــــــه ...
ماحسيت الا بنفسي طليقه ...
قيس :أنقلعي ومره ثانيه فكري قبل ماتسويين تصرفاتك الهبــــلآ ...
تنقلع روحك من صدرك ان شاءالله ... الحمدلله اني مو جولييت ولاتفشلت قدام المشاهــــديين ...
مالت بس هين اوريك اذا ماخليتك خاتم بأصبااعي ..
طلعت للغرفة المـلابس ... بعـــد دقايق وانا مندمجــــه بالكووي تذكـرت انه مو لازم ينامـ وهو معصب عـلي عشان بكره يمشي مخططي حلـــو ... بروح اجس نبضه بسـوي بسأله وش بيفطر بكــــره ...
دخلت الغرفه كان مغير ملابسه وبينام ... ايه ينااام وأنا اكوي ملابسه مالت بـــــس ...
اللحين وش أقول بسوي نفسي بدلعــــه ... تذكرت جولييت تقول حبيبي يخســــى ماعاد الا قيسوه أقوله حبيبي ...
بس هذا وش ادلعه وحشـي يجنن لايق عليه اللقـــب ...
قلت امممم يقالي افكر من دخلت مع الباب لين جلست على طرف السرير ...
ادري كان قلت له الكلام من عند الباب ورحت بس لا لزوم الدلع وعشان يتنبه اني متغيـره وماصرت طفشانه منه ومأبغى ابقى معه بنفس المكااان ...
سارا:امممم ..
قيس :ايه اممممم ايش ...؟!
بلا دلع بلا بطيخ هذا شكلــــه ناوي يصكني بالمخده اللي جنبه ...
سارا :وش تبغى فطور بكره ..؟!
طالعني بنظرة كأن وده يخنقــني بس ماسك نفســـــه ...
قيس :لاجاء بكره يصير خيـــــر تفضلي برى بنااااامـ ...
قمت بسرعه وانا أقول
سارا :ان شاءالله من عيونــــــي ...
اخر كلمه طلعت تلقائيه من الخرعه بدون تخطيط ...
قضيت ليلي كله تخطيط ونمت بس شــــوي ماصحيت الا على رجعة قيس من صلاة الفجـــر ..
طلعت من الغرفه غــصب .. لأني متعــوده بهالوقت كل يوم اصحي أراجع اللي درستــــه ...
بس اليوم ويني ووين الدراسه النوم كابس علي ...
رميت نفسي على الكنبه ونمــــت ماحسيت بنفسي الا وقيس يصحيني بهزه قــــويه ...
قيس :قووومي ياهبلااا شوفي الساعه كم حسبي الله عليـك ...
صحيت وانا ماني فاهمــــه شي وش ساعته ...
سارا :ايش ..؟!
قيس :الساعه سبع ونص سامعتنــي وين يمديني اوصلك لمدرسته وأروح لدوام ...؟!
سارا :أوووووه لاتصارخ علي دوامك ثمان بعدين انت مدير مين يحاسبك ...
قيس :قومي تحررركي عساااك لجلسه اللي مابعدها قووومه ...
صرخت بقهر وش عنده هذا مع الصبح يدعي عليك
سارا :ان شاءالله أنت لاتدعي علي يالمتخلف ...
صرخ علـــــــــي ..
قيس :ساااااارررراااا
وصد وراه شوي يكلم نفسه ....ورجع لف علي وقال ..
قيس :تبغين تروحين تختبرين اوكـيف ..
قلت وانا اوقف من على الكنبه بكل هدوء
سارا :اكيد أبغى أروح ولا ليش مذاكره ومتعبه نفــــسي... انتظر ثواني بس أغسل وجهي والبس عبايتي ...
قيس :وملابسك مو مغيرتهااا
سارا :لا ليش اغيرها بلبس عبايه انااا ...
قيس :لاياروحي بتروحين كذا اقول غيري ملابسك ولبسي مثل الناس مأحب شغل الفقراء اناااا ...
رحت للغرفه ومارديت عليه مالت عليه هو وخشته وش له دخل باللي ألبسه ..؟ ... ياحبه للتحكـم والتدخل بشئون الأخرين ...
لبس تنوره من تحت وفوق خليت بلوزة البيجاما مالي خلق أغيـــــر ولبست العبايه فوقهــم ...
وانا طالعه قال ارفع عباتـــــي بيشوف وش لابسه طبعاً وريته التنوره خخخ لعبت عليه ...
مو على كيفه يمشي كلامه علي ... خطيره أنا عرفت كيف اكسر كلمته بدون هو مايدري ....
نزلني بالمدرسه والساعه ثمان ونص بدأ امتحاني خبصت لين قلت بس ماصدقت اخلص ...
طلعت كان وقت الأستراحه والبنات بالساحــه .. تذكرت هيصتنا بالمدرسه أنا وخواتي والله كان فلـــه ...
بس هنا البنات غير مأدري مابلعتهــــم هو وأشكالهم الكشخه فيهم زايده ...
والله أني عجيب اللحين الكشخه فيهم زايده ولا أنا وبنااات الفقر اللي مانعرف نكشخ ياحليلكم يابنات مدرستنااا ماتعرفون السنع والكشخه والدلع ... لااا حرام والله بنات مدرستنا سابقاً ماهم شيون بس الظروف والمدرسه اللي هم فيهااا هي سبب .. تأقلمهم مع الظروف اللي حولهم هو سبب أشكالهم الشينه طبعاً باستثنائي وأنا خواتي لأنااا كل الحــــلااا فينااا ..
ماصدقت قيس جاء بسرعه طلــــعت .... كان مستعجل كثير ماصدق نزلني وراح يقول عنده اجتماااع مهــــم ..
شوفتي للبنات بالمدرسه والجروح اللي فتحـــوهااا خلاني أفكر بجديه بخطتـــــي مو معقـوله الغباء اللي فيني
انا لازم أكــون أكثر ثبات على خطتي مو لهزأني أو صارخ علي أنسى ولابكون ماسويت شــــي ...
اللحين اسويلي كوب نسكافيه واروق عليـــــه وأخطط وبعدين افكر وش اسوي له غداء بس لازم طبخه جديده عشان تضبط خطتي ...
رحت غيرت ملابسـي وسويت النسكافيـــه تربعت على الطاوله قدام التلفزيون وقدامي النسكافيه وبيدي وورقه وقلم اسجل فيها خططـــي ... ومشغله فيلم جولييت عشان اشوف وش تسوي وأسويه وبنفس الوقت افكر وش الطبخه الجديده اللي بسويها غداء .. لكن المشكله أني مأعرف طبخات كثــيره وأخاف اخذ شي من التلفزيون أو مجلـه ومايضبط ويضحك علي قيـسوووه...
حسيت بهزه أرضيه اوووو ... قيس لامستحيل وش السالفه ... نمت لااااااااااااا ....
قيس :انتي غبيه او متخلفه او وش سالفتك ...
كنت ضايعه ماني فاهمه شي توني كنت اشوف الفيلم واكتب بالورقه وناظرب بالورقه اللي تحتي على الأرض والنسكافيه مغطيهااا ... ضاع تعبـــــــي ...
ماحسيت الا يظرب اصابعه على جبهـــــتي ...
قيس :ماعندك هنا عقل تفكرين فيـــــــه .. انتي تدرين يوم دخلت هنا وشفتك بهالحاله توقعتك ميته او مذبوحــــــه ...
وكمل يظرب راسي
قيس :وانتي نايمه .. نومت أهل الكهف ان شاءالله... فيه احد ينام تحت الطاوله انتي مجنوووونه رسمـــــي ....
وراح وخلاني ...
ياربي وش اللي سويته كيف نمت ... الله يأخذني انا وغبائي ... صادق انا مجنونه رسمـــــــي ...
كيف انام قسم لو اني بزر بس اجلس قدام التلفزيون نمت طالعت بالفيلم لقيته مخلص ..
قمت طلعته من الفيديو لايشوفه ...
اللحين وش ارقع وش أقول لاسويت غداء ولاحاجــــه ...
بقول مثل ماقالت جولييت انا كنت مفكره نتغدى بــــرى ... هو صح سالفة جولييت غير سالفتي بس يالله ترقيعه تمشي الحال ....
جلست انتظر دقايق مأبغى ادخل عليه وهو معصب يحط حرته فينـــي ...
ايوه صح اخذ له عصير يعني عشااان لو ماقدرت اتكلم اعطيه العصـير ومايقول لي شي ...
رحت للمطبخ وعبيت كوب كبير عصــــير رمان وأخذته له ...
((7))
ضحـى
صرخت على وعد اللي شايله محمــد ابغاها تنزله ..
ضحى :نزليييه وأنقلعي عن وجهي شوفي كتبك ...
وعد :وش فيها كتبي احد منهم مشتكيلك ...كتبك وكتبك اللي يسمعك يقول كائنات حيه مو كتب ...وتفضلي هذا ولدك ...
ونزلت محمد بسريره ...
والله حتى وعد صايره تعصب عشنا وشفنــــــا ... انقهرت لأنها طلعت قبل مأهزئهــا .. طلعت للصاله لقيت الحبايب متجمعين على فيلم ...
رحت وطفيت التلفزيون ...
ضحى :انتم ماتشبعون تلفزيون طول يومكم عليه ...
نوف :بسم الله علينااا .. تونا داخليين من المدرسه كيف طول يومنااا عليه بالله ضحى شغلي التلفزيون بلا شغل الأبلات هذا ..
هند :يعني عشان رجعتك للمدرسه قربت بتبدين تجربين فيناااا ...
ضحى :انتم لما اتكلم تسمعون وتطيعون بــــس مو تردون علي الكـــــلام ...
هند :ضحى بجد شغلي التلفزيون خلينااا نتابع يعني وش تبغينا نسوي غير نجلس على التلفزيون نام مثلاً عشان عندنا طلعه العصر للحديقه ...
نوف :ياقرويه العصر وحديقه اللي يسمعك يقول بالربيع ...
هند :ليش حنا مو بالربيع ؟؟
نوف :لا مأعتقد حر اكيد دخل الصيف ..
هند :طيب انثبري لاتليقفين وأنتي مو متأكده ...
ضحى :لاحبيبتي مابغاك تنامين أبغاك تشوفين لك أي عمل مفيد غير شوفت التلفزيون
هند :طيب جيبيلي كمبيوتر وأقوم عن التلفزيون ...
نوف :يب صادقه نووووف جيبيلنااا كمبيوتر
ملاك :أقول بس ترى صدعتوني وانتي مدام ضحى شغل التلفزيون وروحي انشغلي لك بالشي ثاني غيرنا ترى عندك ولد شوفيه ليكون انقلب على ووجه ووفطس ...
ضحى :واذا ماشغلته ملاك افندي ...
ملاك :شغلتيه ولا ماشغلتيه نوبروبلم الدنيااا مو طايررره وانا بالذات ماوراي شـــي ...
ضحى :زين اعترفتي ...
ملاك :ليه قاضي ومحكمه زين اعترفت ... ياليل الغثــــاء ...
قبل مارد عليها دق جوالي وبسرعه رفعته اشوف من كان عساف .. اخيراً مابغى
طنشت اللي بالصاله ودخلت الغرفه ارد عليــــــه ..
ضحى :هلا وينك انتي من أسبوع ...
عساف :السلامـ عليكم ...
تأففت بصوت عالي
ضحى :وعليكم السلام ...
عساف :أخبـــــارك ..؟!
ضحى :طيبه ...
جيت اتكلم قاطعني
عساف :وحمودي أخبـاره ...؟!
هذا راعي طويله
ضحى :بخير طيب ماعليه ... وينك من اسبوع ..؟!
عساف :زين ... موجود وين بكون يعني بس أنشغلت شــوي ...
وبس غريبه ماسأل ليش اسأل عليـــــه .. هذا والله مو صاحي
ضحى :طيب كنت أبغاك توديني السـوق ..
عساف :طيب امرك بكره العصر ...
انقهرت انقهرت انقهـرت .. ليش بكره .. ليش مو اليــــوم .. وش عنده ذا من أسبوعين ماشافني ماشتاق لي يعني وين اللي يحبني ولاهو بس كلام ...
مابغيت اوضح له اني مره ميته على شوفته مع اني مأتوقع يتفكر كذا لأني وضحت له قدر الأمكان اني بس اسأل عنه عشان يوديني السوق .. بس الحرص زين ...
ضحى :طيب انتظرك بكره العصــــر ...
عساف :لاتأخذين معك أحد مالي خلق ازعاج ...يالله تبغين شـي ثاني ...
مو كأنه مو معطيني وجـه أبد ...
ضحى :لا سلامتــ...
قفل قبل مأكمل كلامي وش فيه الرجــــال هذا استخف ...
((8))
قيس
يحمد ربه ألف مره انه ماتهور وذبحــها على الخرعه اللي سببتها له ....
الله يعيـــنه على هالأنسااانه شي اسمه مسئوليــه ماتعترف فيه ويشك أنها بيوم حست بالمسئوليه تجاه شـي دايم تتصرف بغبـاء ولامبـالااه ... بتجننه .. هذي لو صار بكره عندها عيال وش بيصير فيهم اكيد بيضيعــون من أهمــالهــااا ...
مايشفع لها عنده غير انها تضحكـه أحيـان بعز غضبــــــه ..... وهالشي ماعمر أحد قدر عليه دايم هو لغضـب خلاص مايقدر يتبدل ميزاجه الا هالأنسااانه قدرت تبدله بس عمره ماوضح قدامهــااا أنهااا قدرت على هالشـي ... حتى وهو وده ينفجر ضحك بسبب تصرفاتها يتمالك نفسه ويكمل موال العصبيه والغضـب ...
اليوم لمادخـل وشافهـا بحالتها ذيك بغى ينجـــن توقع كل شـي سيء الا أنها نايمــــه ..
فيه أحد ينام تحت الطـاوله ...
دخلت عليه ومعهااا كــــوب عصـير ... وش عندها الزوجه المطيــــعه ...
مدت الكوب له بدون ماتكلم أخذ الكوب منها ونزله على التسريح وكمل اللي كان يســــويه ...
سارا :بيصلع شعرك لو مشطته أكثر ...
مارد عليـــــهااا .. لأن مثل الكلام البايخ هذا مايلقاااله رد وعشاان ماتفكر انه نسى المصيبه اللي كانت مسويتها قبل شـوي ...
سارا :قيس ماسويت غداء ...
رمى فرشاة الشعر من يده بقهر ...
قيس :داري وريحي نفسك بنااام بدون غداء ...
ولف على السرير ...
قيس :وانتي ...
قطع كلامه لما مسكت مع يده ..
قيس :خيــــر
سارا :لحضه شوي بقولك شـي بس لاتعصب ...انا اصلاً متعمده مأسوي غداء
لوى يدهاااا بقوه ..
قيس :وتعترفين انك تعانديني بعد ..
سارا :لاا مو كذا ...اصلاً انا خططت انا نتغدى برى ...
طالعها بأستهزاء..
قيس :والله
سارا :والله ...
قيس :وبأي مطعــم تبين تتغدين ...؟!
أبتسمت أبتسامـــه كبيـره وطلعت اسنانها الأماميه واللي يتميزون بفجـله خفيفه بينهم..
سارا :يعني موافق وناسه كنت عارفه انك طيب وماراح ترفــــــض ...
ترك يدها وبدزه خفيفه وخرها عنه ...
قيس :لأني طيب اقولك انقلعي عن وجهــــي لأرتكب فيك جريمــــــــه ...
اول ماصرخ نقزت لين الباب ...
سارا:يعني مو رايحين المطــــعم ...
عطاها نظره خلتها تطلع وتقفل الباب وراهـــــا ...
((9))
سارا
وفشل مخططـي وليه مو حاله ماني عارفه ادبر شـي كل شـي اخذه من جولييت أخربــــــه ..
بس والله أوريك قيســـــوه ماتوديني مطعــم ...
مو كفايه مجبرني أكمل دراستي ... تبغاني بس جالسه بالبيت لا أنا مو شغاله عشان بس جالسه بالبيت ..
أنا ابغى اطلع وأتمشـى .. اووووف مأبغى اطلع ولاأتمشى أبغى خواتـــــي ...
وخواتي ماراح اوصل لهم لين يصير قيـسوه مثل الخاتم بأصبعي... شكل الخطه هذي مو ناجحـه ..
اوووف بس لو السحر مو حرام كان سحرته ومشيته علي كيفي ...
مر باقي اليوم علي ممل جداً قيس صحى العصر وقال بيروح يزور أمه وبعدهااا ماشفته نمت وهو مارجـــــع ...
((10))
وعد
صحيت من النوم بكســــل وتوضيت صليت ...
نزلت تحـت وأخذت كوب حليب ورجعت اطلع فوق ... نوف دخلت بعدي الحمام مباشره وللحين ماطلــــعت ..
استغربت مو من عادتهـــا ...
ليكون البنت نزلت عليها النظافه وتسبح اليـوم بنص الأسبوع عاد نوووف احس مستحيـــــل ... لو شوق ولا حتى هند الموسوسـه يمكن أصدق بس نوف تسبح نص الأسبوع كبيره ...
دقيت عليها باب الحمام ...
وعد :نوووف وش تسوين داخل ...
نوف:.......
رجعت ادق على الباب لايكـــون نوفوه سبحت وغرقت بس الحمام مافيه بانيو تغرق فيه .. بس فيه مثل يقول تغرق بشبر مويااا ...والله مأدري عنها هالخبلــه ...
وعد :نوففووووه انته عايشه اومتي ... لاتخافين لو متي اللي يموت غرقاً يصير شهيــــد ... بتصيرين الشهيده نوف وأنا اخت الشهيده نووف .. وبيتنا بيت الشهيده نوف واخوات الشهيده نوووف وبنت عمة الشهيده نووف ...
نوف :عساك انتي تغرقين وانا اصير اخت الشهيده وعد وادخل الجنه على حسابك ....
يمه الجنيه لسى عايشه ...
جيت افتح الباب لقيته مفتـــوح .. دخلت ولقيت المفاجئه بل الطامــــــه ...
وعد :وش تسووووووووين يالمجنونه ...
نوف :اللي شايفته وش رايك بشعري شـي صح ...
وعد :شي اللي يشيل راسك يالغبيه اللحين من بيفكك من ابله عطوف وابله قمـــر انااا ثلاث شهور وانا كل ماصليت ادعي شعرك يطول عشااان تفتكين من حنتهم ويوم طال شعرك قصيتيه ...
نوف :مالت على خشتك كانك فاضيه تتدعين كان دعيتي نصير أغنياء مو تدعيــن شعري يطول هذا دعاء بالله عليك ..
وعد :احلمي بس مره ثانيه ادعيلك بعدين دعائي وأنا حره فيــه و انتم مو معطيني وجه وانتم فقراء اجل لو صرتو اغنياء وش بتسوون فيني اكيد بترموني بملجأ انا ونوره بعد قلبـــــي ...
بس البنت مو معطيتني وجه جالسه تمشط شعره مره يمين مره يسار
نوف :وش رايك كذا حلـــــو ..؟! .. او كذا أحلى ..
وعـد :عمره ماراح يكون حلو يحوم الكبد ... ومسويه فيها عندي شعر مره يمين مره يسار مافرقتك كأنك هندي حاط على شعره فليت يحسبه اسبريه ...
نوف :تدرين بروح لملاك حبيبة قلبي هي اللي تفهم بهالأمور اما انتي حدك ترفعين شعــرك كأنه ذيل فار خخخخخخ ...
النحيسه انا شعري ذيل فار اكرهههاا اصلاً الفار ماله ذيل ...
انسدت نفسـي عن الحليب ونزلت فيه تحـــــت ماصدق شفت ضحـى قلت لها ان نوف قصت شعـرهااا ...
طلعت ضحى معصبه من المطبخ هع الله يرحم نوف كانت طيبه بس من صاحبة ملاك صارت شريره وتستحق القتـــــل ...
((11))
نوف
بديت يومي بهوشه محترمه مع ضحى ماثرت فيني كثير بس حزت بنفســـي ...
الا الحصـه الثانيه كانت كل الأمور معاي تمام ... ببداية الحــــصه الثالثه دخلت علينا أبلة العربي تكرهني ماتصدقون قد ايش تكرهنـــي .. ودايم تقول عني متشـبه ... وكل شي يصير بالفصل تحطه علي .. احس انها تفضل أبليس علــــي .. مع اني وربي ماعمري سويت لها شـي ... واحترمهــا بس من كرهااا لي غصب أكرهها ... وطريقة تصرفها معي كأني مغيره دينــي ..حتى معملة الدين الملتزمه ماعملتني مثلها بالعكس دايم تدعيلي بالهدايه ولاعمرها جرحتنــــــي ...
من دخلت حسيت بالشر بعيــونهااا ... انا اعرف لو بيصير لي شي مو زين قلبي ينقبض ....
وفعلاً دقايق بس من بداية الحصه وانتبهت على شعــــري وقطعت شرحها وبدت تسب فينــي وتلعن وتقول كلام ماينقــــــــااال وبالأخير عطتنــي كف ....
بذيك اللحضه تساوى عنـــــدي كل شــــي ..
أنا هذي تظربنـــــــي ... عطيت كف وثنين وثلاثه وأربعـــــــــه ...
ماحسيت بنفسي الا مسحــوبه عنهــا ومرميه على الأرض كانوا بنااات الفصــــــل اللي فكوهااا مني ومسكوني حتى مأرجع أظربها وهي جلس تسب فينــي وتهزأ ومأدري وش بعـــــــد ..... لأني اغلي من داخلي ودي أقوم وأكمـــل عليهاااا حسيت ان هذي نهايتي بهالمدرسه وأبغى ابرد قلبــــــــــــي ..
بس البنااات كانوا حاجز بيننا بعدين جت المديره ومعلمااات والمراقبااات .. وماقدرت أوصل لهااا بس حلفت أنهااا هذي مو نهاية اللي صار بينااااا ...
وشي طبيعـــي فصلوني مؤقتاً لين يقررون العـقاب الأكبر واللي استحقــــــه ماهتمــيت بالقرار واصلاً حاسه انه خلاص هذا أخر عهـدي بالدراسه .. طلعت لمخبأنا السري مالقيت أحد رحت لشلة الشباب ولقيتهــم يدخـنون .. غصبوا علي ومن القهر اللي فيني جربت أدخن معهــــــمـ ...هي مره وحـده ومأتوقع اشوفهم بعد هاليـــوم ..
((12))
ضحـــى
من قمت الصبااح وأنا افكر بطلعت السوق بمقابلتي لعساف عمري مافكرت كيف بقابله ووش بسوي ووش بيصير من طلع بحياتي مره ثانيه ...
يجي ويغيب وماحس أنه غاب أو اختفى ... بس المره هذي حااسه بالموضوع يوم ورى يوم ...
ماصدقت دق علي وقال أني عند الباب طلعته وطبعاً حرص مأخذ احد معي لأنه على قولته ماله خلق عوار راس ..
ماتكلم كثير رد السلام ووشلونك وأخبار محمد وبـــــس ....
ماقدرت اسكت اكثر لازم أسأله وش فيــــــه ...
ضحى :عسااف فيك شـي ..؟!
ناظرني ورجع ناظر قدام ...
عساف :شي مثل ايش ..؟!
ضحى :يعني متغير .. قبل ماتوقف كلام
عساف :ثرثار يعني
ضحى :لا مأقصد كذا بس بجد وش فيك ..
عساف :ولا شي بس متضايق شوي من الشغل
سكت .. وأنا سكت وش أقول والسالفه فيها الشغل ..
عساف :متى بترجعين البيت ...
ضحى :بعد أسبوع .
عساف :ايه زين بجيب شركه تنظف البيت ...
ومابعدها ماقال شي لين وصلنا المجمع اللي أبي ...
وقدامه قالي أنه مايقدر ينزل معي بس اذا خلصت ادق عليــــــه ...
تنرفزت منه يعني ماراح ينزل معي وماخلاني اخذ معي أحد .. من النرفزه نزلت بدون مأوجه له أي كلمه ...
بعد مادرت السوق وأخذت كل اللي أحتاجه كان معي كومت أكياس لو جايه مع سفر دقيت عليه يأخذهــن ...
وكملت اللي باقيلي بس اللحين مضطره أطلع من السوق وانا ماكملت تسوقـــي دقيت على عساف اللي تنازل لين جاني بعد ساعه من اتصالي ...
اول ماركبت السياره وشفت كيف استقبلني بالتأفف عـــــرفت وش اللي غيـره ... خلاص الأخ مل ... كنت عارفه ان هذا اللي بيصير عمر عساف ماراح يكون قد المسئوليه تعود يكون حـــر ... وولده اللي جاء رجع يحسس أنه مربوط ... الأيام تعيـــــد نفسهــااا ...
ماتكلمت ولا ناقشـــته على تأخيره او علــــى الحال اللي صـاير فيـه واللي عرفت أخيراً سببــه ..
أخيراً عرف حجم المسئوليه اللي حط نفسه فيها واللي ماهو قدهاااا ... كنت عارفه ان هذا اللي يصـــير ..
عمر نظرتي فيه ماأخطأت ...
قريب بيعلـــــن أنسحــابه من حياتي والله العالم بعد كم سنه بيرجــــع ...
وبكون سعيــدهـ لأنه بينسحب بالوقت المناسب قـبل مأحط عليه آمال ويضيعهــااا..
آمال كبيـــــره .. لأني للأسف حطيت عليه آمال صغيره ... بس مو مهــــم خله يروح برجع مثل قبل ...
نزلني بدون كلااام ... دخلت غرفتي والقهر ذابحني طليت على حمودي النايم وسويت له رضعته كانت اسويها وارجها بيدي بقوه يمكن تخليتها مكااانهاا رقبة شخص معيــــن ...
نزلت الرضعه من يدي لمااا دق جوالي وجلست ادور شنطتي بين الأكياااس وين حاطتها أنا ...
وبعد ماوصلتها وطلعت الجوال لقيت على شاشه مكالمه لما يرد عليها من عساف وش عنده مو كأني تو كنت معه وكلمتين على بعض ماقالهم ...
طنشت اذا يبغى شي يرجع يدق وكأنه يسمع كلامي دق الجوال مباشره .. انتظرت بعد ثلاث دقااات فتحت الخط ...
ضحــى :خيــــررر ..
عساف :حبيبتي معصبه ...
لاشكله الأخ رايـــــــق ..
ضحى :وليش اعصب ..؟!
عساف :ضحى اناا عارفه وش اللي سويته وتأثيره عليك بس انتي موعارفه شي أنا مررره تعـبااااان ...ولاتسألين عن اللي متعبني انا محتاجك مره مابغى اضغط عليك بس حاولي تقربين رجعتك ...
بغيت اقهره مثل ماقهرني يعني هو متعود اللي يسويه ...
ضحـى :اقول عساااف بتكلم بشكل واضح تفضل اومااا كلام التلميح هذا ماينفع معـــي ... واذا حسيت نفسك مسوي شي فأنا بريحك تطمن ماحسيت انك مسويلي شي لتعب ضميرك ...
وقفلت ..... اول ماقفلت تندمت اوووووووف ليه سويت كذا انا من زمااان توقفت عن هالحركه والله عيب علــــي ...
عطيت حمــودي رضعته وأخذته للصاله ...
وهناك كانوا البنااات يتخااانقــون ...
ضحى :خير وش فيـــــــه ...
استغربت انفعااال نوف
نوف :قررت مأكمل دراستي هذا اللي فيه ومأبغى احد يناقشني بقراري انا مليت كرهت نفســــــي اووووف خلوني بالبيت اريح لي ...
حسيت أنهاااا مقتنعه بقرارها اللي مأقول صدمنــــــي الا شلني ... ولو ماكنت جالسه قبل ماتلقي قنبلتها طحت من طولي نوف الشاطره الطموحه هذا كلااامها ليش وش اللي صــــار ..... بس من طريقتها بالكلااام حسيت ان لو تكلمت معها من اليوم لبكره ماراح يتغير شوي اصبر عليها شوي لين تهدا وأقدر اكلمهااا بطريقة تجيب نتجيه ومو تزيد الطين بله ...
ضحى :بس هذا اللي عندكم ... توقعت شي اكبر قفلوا المـوضوع وتكلموا بالشي ثاني ...
نوف :لاتحسبني امزح ترى قراري خلاص ماراح اغيره
ضحى :طيب انا وش قلت خلاص انتي قررتي ليش هم يناقشونك .. قولوا سالفه جديده ..
ملاك :ونعم الأخت ...
كالعاااده طنشتهــــا ... وكالعاده بزنقاات مايطلعني منها غير مشـاعل ...
مشاعل :ضحى لقد طلب مني خلف تحديد موعد لزفااف لكني محتاره ...
ضحى :ماشاءالله زواج مره وحده مكأنك طالعه امس بتطلقينه ...
مشاعل :ضحى توقفي عن ذالك لما تحبين أزعاجي بحديثك ... لما لاتتحدثين بطريقه عاااديه ...
ضحى :ليش كلامي وش فيه ..
مشاعل :ساخررر دائماً ردودك لاذعه ..
ضحى :مع اني مالاحظت بس دامك قلتي هذا اكيد صادقه ...
وعد :وش قصدك كلااامها يعني دايم صدق ...
اللحين ليش لاتكلمت مشاااعل وعد لازم تكون على الخط ...
ضحى :اللحين انتي تشكين من شدن لاتكلمتي لازم تنط ماتلاحظين ان هذا رد دين للي تسوينه بمشاعل لاتكلمت ...
وعد :حرام عليك انا ماسويت لها شي وش قلت اللحين ....
لفيت لمشاعل ورديت عليهـــــــا ..
ضحى :طيب وين المشكله ليه الحيره حددي الموعد اللي يناسبك ...
مشاعل :ولكني لأعلم ماهو المناسب ...
نطت وعد قدام مشاعل ...
وعد :احلى شي بسرعه يعني قريب جداً... الخميس الجاي يعنــي الخميس القادم ...
شادن :ماشترينا فساتين ...
وعد :وانتي وش لك مو لازم تروحين ...
شدن :أنتي وش لك ماتحبين مشاعل ليه تروحين ..؟!
ضحى :شدن وش قلنااا لاتكلموا الكبار الصغار يسكتون بتجلسون كذا تقاطعون حديثنا تفضلوا برى تهاوشوا على كيفكم ...
وعد :اصلاً انتم اللي جالسين عندنا حنا نشوف التلفزيون ومافيه مكان ثاني فيه تلفزيون غير هنا بس السوالف تصير بأي مكان ..
هند :صادقه وعد حددوه قريب نبغى نستانس ونوسع صدورنااا ...
وعد :امووووووووه ول مره احبك ياا البارده ..
رجعت مشاعل تسألني ووقتها حسيت انها مو معنا تقول شي وتفكر بالشـي ثاني ...
مشاعل :ماذا لوطلبت منه ان يختار هو الوقت المناسب ...
ضحى :اقول مشاعل انتي متأكده انك تبغين تتزوجين انتي وياااه والله احس كل واحد منكم يرمي الخيار على الثاني لأنه مو مستعد احسن شي انتظروا لين تحسون اثنينكم ان الوقت مناسب ...
مشاعل :هل تنصحيني بذالك ...؟!
ضحى :أكيد .. دامكم للحين مو مستعديين ليش العجله ..بعدين خلفوه توه طالع من السجــن ويمكن هذا يأثر على حياتكم خليه لين يرجع لحياته الطبيعيــه وبعدين انتبهي يتزوج عليك انتي مو ناقصه شرشحه ..
وعـد :اوووما اتحدى مايتزوج عليـــــها انا مره سامعته يقــول لعســـاف ...
قاطعتهااا قبل ماتقول أي شي كانت بتقوله ...
ضحى :وانتي من طلب رايك ... وصفت نقل الحكي هذي مأحبـــــهــااااا ...
وعد :لااا خليني أقولهـــااا اختي لازم انصحهاااا..
ضحى :وعد انطمي قبل مأوريك الوجه الثاني ...
وعد :لااا وجه ثاني ولاثالثه وهذي طمه ماراح اقول ولاحــــــــرف ....
ضحى :شي طيب وياليت تكملين جميلك وتقومين تذاكرين ...
وعد :وشوو لاحبيبي ماحزرتي نوف تترك الدراسه وانااا اذاكر لاعيوني وربي ماراح امسك كتاب اليوم ....
ضحى :احسن ارسبي وشدوون تنجح وذاك الوقت بتعرفيين وش بيصير ...
وعد :ماهمني خليهااا تنجح هي تحب الدراسه انا مأحبهاااا وكل واحد وقدراته ...
ضحى :والله من متى كبر العقل هذا ولا بس يطلع علي ...
((13))
قيس
هذي استخفت وبتجننه معهـــــااا .. وش النظرات والأبتسااامات اللي مصبحته فيهــااا اصايره ولاا ممثلة دعاية معجون أسنااان ... ولاحركات نص الكم اللي طايح فيهــا لابسه بلوزه قصيره مع كل حركه ترتفع .... والكارثه جالسه تمسح الجدار اللي فوق التلفزيون من متى هالسنع مايدري ...
ماتحمل أكثر صدق يشفق عليهااا أحيان بس هي اللي تجيبه لنفسهاااا له ساعه ساكت عن حركاااتها هذي ماعاد يقدر يصبر بعد ...
قيس :ساره ورب الكعبه اذا مانقلعتي عن وجهي لا تصير ليلتك سوداء هالليله ...
سارا :حرام وش سويت انا والله ساكتــــــه ...
قيس :روحي لأي مكااان ونظفيه وتكلمي على كيفك بس مو توقفين فوق راسي وتقلبينه لي وتقولين سااااكته ...
سارا :طيب حاضر ..اووووووف .. لاتعصــــــب ...
ماصدق انها فعلاً طلعت من عنده جلس ربع ساعه بهدوء مندمج بالبرنامج اللي يشوفه ...
تنرفز يوم شافها داخله عليه بس قال يمكن تذكر تهديده وتهجـــــد ... بس المصيبه كانت يوم جت وجلست جبنــه ..
هو ليش جالس على كنبه مزدوجه كان جلس على كرسي لحاله ..
عاد اللحين ماتسكت كأن البرامج يتكلمون فيهاا بلغه ثانيه تطيـــح لها سؤال لكل حرف ينطقــــونه ...
سارا
ماشيه بالخطه بالملي والصانتي ... مع أني خايفه بس يالله على قولت الناس علي وعلى أعدائــي ...
انا حالفه اجننه اليوم ... له يومين مرتاااح اليوم بطلعه من طوره مأكون سارا اذا ماخليته يطق من الشقه من القهـــــر ... جيت جلست جنبه على الكنبه .. بعد مرور دقايق كنت فيها هاااديه عشان مايطردنــي ..
حسيت انه خلاص ناسينــي تمددت على الكنبه وحطيه راسي على رجـــــله .....
اومااا شكله كأن انلسع بفولت كهربا...
ابعدت راسي بسرعه وجلست وبكل براءه سألته
سارا :وش فيه ...؟!
قيس :ليه تلمسيني فجأه روعتينــــــي ..
اووما روعتك انت تتروع وحش ويقول روعتيني
سارا :حرام لاتكذب مالمستك ...
قيس :والراسك اللي حاطته بحظني وش تسمينه ...؟!
سارا:انت دايم تحط راسي بحظني وقفت علي يعني بعدين انا دايخه من اليوم اشتغل والمخده بعيده ورجلك موجوده ...
قيس :خلاص طيب حطي راسك لو تبين بجهنم بس مابغى اسمع صوتك ...
وحطيت راسي وبكل قـوه .. اخخخ بس والله راسي اللي تعور وهو مأتوقع جاه اذى ...
عديت لميه بعدين حطيت خصل من شعري على وجهي وجلست انفخــــه عن وجهي ويرجع وانفخـــــه ..
مرت فتره على هالحال لين لقيت نفسي طايحه على الأرض ...
طالعت بقيس اللي واقف فوقي ويناظرني بعيون الغضب ..
سارا :يامتخلف ليش ترميني .. ظهري انكسر ...
قيس :اذا صرت متخلف بيكون من تحت راسك ... انتي بتجننيني ...
رمى كلامه الأخير علي وتحرك للغرفه..
قمت بسرعه لحقته ...
سارا :تعال وين رايح ماخلصت كلامي اللحين تشوفني مجنونه الله يرحم يوم كنت تركض وراي لماكنت شوشو ...
لف علي يطالعني بعصبيه وانا ثبت مكاااني مسـويه قويه وداخلي اتمنى لو مالحقته وظليت مكاااني على الأرض اتألم من العوار الوهمي يمكن كان بيشفق علي بس اللحين خربت كل شي بغبائي لاحقته بكل قوه وسببت لنفسي مدخل لعلقه ....
قيس :انااا ماني قايل السيره هذي ماعاد أبغى اسمعهـــا .. انتي غبيه تبغيني اذبحك عشان
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك