رواية حافظ عهود الحب يومك تبيه -18
العنود منقهره : وجع لعدوتس خرشتيني (خوفتيني ) احسب صار مصيبه
قلبي طاح في بطني من الروعه
عهود : آ ههههه ياربي شىء بطني ههههه
ااااااه حسافه لوكنت مصورته وربي تفطسين ضحك ههه
(تقلد العنود) ولايهزون شعر مني وين هالكلام
العنود مسكت علبة المنديل وحذفته على عهود : لعنبو بليسها احسبه جرس الانذار من قو الصياح
ههههههههههههههههه
مها وهي تضحك : على ثقلك يوم خفتي مافيه اسرع منك نطيتي في حضن ساره اشوى ماتكسرت رجولها
العنودوهيمسح على ساره اللي تأن من رجولها : لا ماعليها خفيفه انا ما اكسر بس رضوض شىء على خفيف ههههههههههههههههه
طلبو العشاء وتعشو ومخلا العشاء من بعض التعليقات والضحك
هنوف ونوف اعجبهم اللبس كثييييير
ــــــــــــــــــ
في مدرسة هنوف ونوف
: هنوووووف وين نوف ؟
هنوف : بالفصل
:طيب عندها احد؟
هنوف : لا ماعندها احد روحي عندها بروح اشتري لي ولها فسحه وارجع لكم
:اوكي
:هااااي نوف
نوف : اهلين
:نوف شفيك متغيره علينا مو مثل اول ؟
نوف : هديل انا ماتغيرت
هديل: كيف ماتغيرتي انتي اغلب جلستك مع هنوف مو معنا بالقروب فقدناك
نوف :هديل عمتي رافضت اني اجلس مع غير هنوف
هديل : وانتي مالك شخصيه الكل يتحكم فيك ؟
نوف : لي شخصيه بس عمتي اكيد تبغى مصلحتي
هديل بخبث : نوووو ياحلووووه تبغى مصلحة بنتها تخليك تكونين معها مثل البودي قادر او ظلها اممممممم يمكن مستغله انك يتيمه ماعندك احد يهتم فيك انتي مهتمه اكثر شىء في بنتها ..(نوف اللي سمعت الكلام وحسته صحيح عمتها اهم شىء عندها بنتها ) وهديل اللي شافت معالم التأثر على وجه نوف كملت : نوف انا اسفه بس حراااام هذا شىء لازم اوضحه لك محد يحبك ويهتم فيك شوفي شكل الهنوف بس تتكلم امي وابوي لو كانت تحبك كان ساوتك بالهنوف خاصه وانتو دايمآ مع بعض
نوف سكتت وطلعت من الفصل تمشي بالاسياب وتتذكر كلام هديل اللي لامسها ..(آه ياليت امي وابو عايشين كان ماصار هذا حالي )
الايالرب ساعدني ترى درب التعاسـه طال
تعبت وتعبت اقدامـي دروب الهم تمشيـها
عرفت الحزن من صغـري عـرفت أني فقيـر الحال
غريب وكــل هالدنيــا علي ضاقت اراضيها
فقدت امـي فقدت ابــوي ولالــي عزوتن ورجـال
قهـر ابكي قهر اشكـي حياتـي صرت مأبيهـا
يتيــم وقسمتــي اعيــش بليــا عم وبليـاخـال
يتيــم وقصتــي قصـه من أولهــا لتـاليهـا
شربت اليأس واصبحت فحياتي فاقد الآمــال
وعنــدي المـوت ارحـم لي من الدنيـا وبلاويهـا
تعبــت اصبــر تعبت اسهـر وحظـي بين ربعــي مال
اعانــي من ردى حظي وروحــي من يسليهـا
احس المجتمــع يرفض وجـودي واطلــب الترحــال
ونظــرات البشـر تقتــل طمــوحي وأنكــوي فيهـا
احس اني بلاقيمــه شكيــت الذل والاهمــال
وحيــد ودنيتـي قفـره علــي تظلــم لياليهـا ..
انا والله محتـاجاً لكــم ياطيبيـن الفال
ابــي حباً يعوظنــي عـن أيامــي ومأسيهــا ..
تعالــوا بددو خــوفي وخلــوا عطفكــم شلال
ابروي ظـامي جروحاً بشوفتــكـم وداويهــا ..
تعالــوا ومسـحوا دمعـاً على خـدود اليتامــى سال
تعالـوا وسألـوا كل اليتامــى عــن امانيهــا ...
في عصر اليوم الثاني
بعد ماطلعوا البنات من المدرسه وجهزو الاغراض
ركبو السيارات ساره وعهود ومها وهنوف ونوف مع خالد
وتركي يسوق بابوه وامه
ماجد معه العنود
وهذا كان بالاتفاق بين خالد وماجد والبنات
حاول العنود انها تجبر وحده من البنات تركب معهم لكن رفضو
السواقين والخدم بالسيارات الباقيه
طلعو من الرياض متجهين لمزرعته على طريق الخرج
كان يحاول يفتح اي مجال للكلام معها
ماجد : العنود
العنود.........
ماجد : انا اكلمك لاتسفهيني
العنود : اذا كان نفس الموضوع رجاء لاتصدع براسي كل شىء انتهى
ماجد :تدرين ان الممرضه جايبه الهديه لاختي عهود
العنود : ايه اكيد تجيبها لاختك عهود تعطيك اياها فيها حوله ! !!!
ماجد طنشها وكمل :عهود دخلت قريب الممرضه بعد ماكانو رافضين دخوله بسبب كثرة المرضى وتعالج وكانت الهديه كنوع من الشكر لعهود على اللي سوته معها
العنود : ايه وطبعآ جابته لك مطيحه الميانه معك اكثر منها مع عهود
ماجد يضغط على اعصابه لا يفلتها : عهود كان عندها مرضى والبنت انتهت مناوبتها فعطتني الهديه اوصلها لهاا
العنود : اهاا
ماجد : يعني صدقتيني ؟
العنود : وش يهمك فيه اذا قراري ماراح اغيره ؟!
ماجد: ليه ماراح تغيرينه ؟
العنود : لاني اكتفيت من اللي جاني
ماجد : انا ابيك
العنود : وانا ما لك عندي مكان
ماجد : كلنا نخطي
العنود : لكن مانكرر نفس الغلط
ماجد : وان قلت عشان اللي ببطنك يعيش بين امه وابوه
العنود : راح يعيش معي وماراح يحس انه اقل من غيره وانه فاقد ابوه
ماجد :تبعدين عني
العنود : هذا قرارك قبل تعرف الحقيقه
ماجد :قرار في لحظة غضب
العنود : تحمل
وصلو للمزرعه نزلو كانت الانظار متجهه لهم خالد والبنات
مها : وجه ماجد مايبشر
هنوف : خالي متضايق
خالد : هذا اللي بيحصله من امي
هنوف : امي صيته !
خالد : ايه فيه احد غيرها
هنوف : وش دخلها ؟
عهود : هي اللي حاطه السحر
هنوف ...شهقت يعني مو عمتي جواهر ؟
عهود : عمتك جواهر معها مشتركه
قرب ماجد بخطواته الثقيله
ساره : بشر ؟
ماجد بضيق : رافضه ومصره على رايها
جلسو على الحصير اللي فرشوه
ابو ماجد وتركي يشوفون المزرعه و الدجاج والارانب اللي فيها
نوف اللي دخلت لغرفتها من اول مانزلوو
عهود : الا ياهنوف انتي متهاوشه مع نوف ؟؟
ساره : والله لو صدق لكوفنك هناا
هنوف مطيره عيونها : انتو وحده تسئل والثاني تحكم! مدري عنها من امس وهي اخلاقها شينه تنافخ علي مدري وش سالفتها
مها : ماحكت لك شنهو اللي مضايقها ؟؟
هنوف : ماتحكي علي تناافخ علي انقلعي وطسي ولاتحكين علي من امس وهذا اللي اسمعه منها مدري وش فيها علي
عهود: تذكري وش مسويه لها
هنوف : ياخاله قسم بالله ماسويت لها شىء رحت للمقصف اشتري فسحه لي ولها
رجعت مالقيتها بالفصل ورحت ادور عليها رن الجرس ودخلت الفصل ماجت الا بعد ما راحت 10 دقايق من الحصه الرابعه واخلاقها شينه وماعاد حكت علي..
مها :غريبه
ماجد تمدد وحط راسه على رجل مهاوغطاء وجهه بذراعه
الكل كان يناظره بعيون حزينه ومتعاطفه معه
في جهه ثانيه من الاستراحه
ام ماجد وبنظرات خبث وغل دفين متعكزه على عصاها وموقفه في طرف الصاله تناظر في العنود : ياقووو وجهك رازه خشتك معنا وانتي ساحره ولدنا ؟ انتي تظنين انهم جايبينك عشان يرضونك؟ والا يراعونك والا مهتمين فيك لاااااااا جايبينك حتى يمشون امورهم لين تولدين ويعلمون ابوهم بالسالفه وياخذون ولدك هاللي مدري وش يبون فيه يكفي انك انتي امه واهلك خواله هذا بيفــ
العنود وهي تصك على اسنانها : بيشرفونه وااضحه يشرفووووووووووونه ابرك من جدته اللي تسحر ولدها وتسوي افلام هنديه عشان تهدم حيات ولدها و تحسب عيالها مايدرون عن الحقيقه
ام ماجد اعتلت على وجهها معالم الصدمه : انتي وش تقولين ؟
العنود تطالعها من فوق لتحت :اللي سمعتيه ..(رفعت يدها تقهرها )باي وراحت لجناحها
ام ماجد اصابها الذهول يعني عيالي عرفو بالحقيقه وساكتين ماعلموني ؟ يعني ماجد
عرف اني ورا السالفه ؟ لا وش يعرفهم اذا السالفه مايعرفها الا انا وجواهر من بيقول ؟ محد ؟ لايكوووووووون ....!!؟؟محد يعرف غيرها
بس هي بقره ماتدري وين ربي حاشرها ؟لا .....لازم اتاكد لاتكون هذي تلعب علي واصلن انا ماسويت شىء بجحد ها واقول كذابه ..
ــــــــــــــــ
اخيرآ دقيتي يالواصل ؟
العنود : ههههههههههههههههه وش اسوي يمه تعرفين نقضي لمها هاليومين
ام خالد : الله يوفقها يارب
العنود : امين يارب
ام خالد : العنود وش سويتي في موضوع البنات
العنود ببلاهه : اي بنات ؟
ام خالد : نجود وساره ونجلا
العنود :اها ..من علمتس ؟؟
ام خالد : اللي علمتس
العنود : ايه ريم .. والله يمه تورطت ان كلمت ابوهن ذبحهن..والا وش اقوله بناتك يكلمن !! بذبح عمي بها الكلمه .. وان دقيت على امهن قالت غيرانه منهن والا لفت السالفه علينا عاد انتي ابخص بحماتس لااااااازم تلف السالفه لف وبقواية عين وان علمت العيال بيقولون وش دراتس وبورط ريم (زفرت بضيق ) آآآآخ يمه ليتني عندهن كان اصطرهن على حركاتهن الله تدبل التسبد على اخر الزمن يجن هالبنات يدقدون على الشباب ويغازلن !! ياعزتي لابوانهن نزلو روسهم بالارض جعلهن الدقم ..مافكرن فينا مافكرو بسمعتهن وسيرتهن اللي صارت على كل لسان مثل العلكه ؟ بس تبين الحق يمه الملام مو على البنات
ام خالد مستغربه: اجل منهو عليه اذا البنت ماحفظت نفسها عن دروب الشينه وعفت نفسها عن هالدروب
العنود : يمه امهاتهن من قبل مايبقى احد في بيته الا وسبنه وخلنه يمشي غلط لودربه سليم ..كل الناس عندهم هذا يغازل وهذي فاسقه وهذا محشش وهذي لاقين في غرفتها شاب وداخله عليهم الهيئه ..وهذي فيها ..وذيك فيها ..يمه ظلمن وقذف عرض المحصنات يمه من دق باب الناس دقو بابه ..وربي يمهل ولايهمل اللهم لاشماته الله يهديهن يارب ويهدي بنات المسلمين
ام خالد : امين يااااااااااارب
العنود : امين ..يمه انتي روحي لهن واطلبي البنات والامهات وقولي ابي بناتكم يجون بسئلهن عن سالفه قداااااااامكن وبلغيهم ولاتعلمين من اللي علمك
ام خالد : بس ..
العنود: يمه انتي محد يقدر يقول فيتس شىء ابوي وعماني وعارفينينتس زين ونسوانهن على حركاتهن الشينه مايقدرن يعارضن كلامتس وانتي عارفت ان مصلحت بناتهن تهمتس ..
ام خالد : ابروح والله يعيني عليهن هن وامهاتهن ..يالله مع السلامه
العنود : مع السلامه
<سكرت من امها عدلت برقعها وقررت تنزل حتى تضيع الوقت عليها .....طلعت من غرفتها
سمعت صوت في غرفة هنوف ونوف طقت الباب محد رد
فتحته لقت نوف نايمه قربت منها : نوف
نوف :...
العنود :من شوي كنت اسمع صوتك مسرع رقدتي ..لفت العنود بتطلع وقفها صوت نوف
نوف وبصوت مكتوم وهي لازالت معطيه ظهراها للعنود : انتي مره قلتي لي انا وهنوف الايمو هذولا عندهم حاله نفسيه ويعبرون بطريقه متخلفه غلط وشرحتي لي .. طيب اذا كانت عمتك تستغلك حتى تكونين مرافقه لبنتها هذا ما يعتبر انانيه ؟ مثل الحاله النفسيه ؟
العنود (اللي فهمت انها تقصد ساره):بشوف عمتي اذا كانت صحيح مثل ماتقولين او لا ... فيه عمات يحبون بنات اخوانهن مثل بناتهم مثل عماتك ..عهود تموت فيك لكن قدامك ماتحب تبين كذا لك تخاف انك تضعفين مع كثر الدلال وتصيرين مالك شخصيه وتتكلم معك على انك كبيره تبغاك تكونين مستقله بشخصيتك وواثقه من نفسك..عمتك مها :حنونه عليك ويمكن بالغلا عندها محد يوصل مثل غلاك بس ماتعبر لك لان طبيعتها خجوله ..ساره تحبك مثل هنوف لك انتي لكن انتي ماتعطينها مجال تعاملك مثل بنتها ..
نوف بصرخه : لاااااا هي تحب بنتها اكثر هي قالت لي لاتمشين مع شلتك لانهم ايمو وفيهم حاله نفسيه والبنت العاقل ماتسوي هالحركات وغيره من الكلام اللي صدقتها فيه لكن الحقيقه غير هي تبغاني حتى اكون مع بنتها مثل ظلها مثل الحرس الشخصي لها عشانــي ..
العنود : عشانك وشوو؟
نوف غطت نفسها باللحاف :عشاني يتيمه تستغلني عشان ماعندي احد
العنود اللي انعصر قلبها من هالكلام قامت وجلست جنبها :يتيمه تعتقدين عمتك ساره تفكر هالتفكير
نوف رفعت اللحاف ودمعها ينزل : هم يقولون كذا
العنود : من اللي يقوله ؟
نوف : هديل صديقتي
العنود : صديقتك !! تعتقدين صديقتك لو كانت تحبك بتحرضك على عمتك ؟
صديقتك لو كانت تحبك كان ما تبعت الايمو وشوهن نفسها وشكلها حتى تتبع ناس متخلفه ..رفعت العنود يدها وصارت تمسح دموع نوف ..نوف اللي يحبك يعلمك على الشىء الصح اللي يكون في صالحك مو الخطأ وعمتك ساره تحبك وتتمنى تكون قريبه منك بس انتي ماتعطين احد مجال يقرب منك حاطه حواجز
نوف ببرائه : وش اسوي طيب
العنود مسكت يدها : اول شىء عاملي معهم مثل اي بنت مع اهلها ..انتي حاطه نفسك غريبه بينهم ..تعالي معي وبقولك
ـــــــــــ
الساعه 1 بالليل
في احد الاستراحات في الرياض اغاني صاخبه اضاءه خافته اكواب من مشروب الهوى ..جمعتهم متعة الحرام ..لبس فاحش رقص على انغام الموسيقى ..صدح صوت ياهوووووووووووووووووووه وش رايكم نرقص سلوووووو؟
البنات والفرحه العاارمه واااااااااااو ..تصفيق حااااااااااار لاعجابهم بالفكره
الشباب والضحكات الرنانه طربآ لقرب النواعم
شغلت الاغنيه الهادئه بالحانها
اخذ اغلب الشباب النواعم فمنهم من احتواها بين ذراعيه ومنهم من تمنعت بالقرب الشديد ولم تمانع باوضع الكف بالكف واليد على الظهر المهم ان تكون دون عناق<<فرقت !!
من بين هؤلا شابه لبست فستان ذهبي قصيريكاد يصل الى ركبتيها عاري الاكتاف
بيخيوط فيه بعض الكرستال المنثور بشكل متقن لفتت الانتباه بحضورها اسدلت شعرها البني اللذي انساب على اكتافيها وارتد حذاء ذهبي بخيوط وذو ارتفاع عالي ابرز قامتها
وليد : انا طلبت ارقص سلو حتى اكون بقربك يالغاليه
جواهر بغنجها :هههههههه موافقه ماراح اردك عشان الحفله لك
استمرت الحفله على هذا الحال بين مجون ولهو ياشباااااااااااااب جبت لكم فلم شىء
تبون سهره ولا في الاحلام ؟؟
البنات لاااااااااا مانبي فلم
:بس هذا فلم ولاقد شفتوه الى الان مانزل بالسوق هاااا شباب <<الشباب عارفين المقصد
يالله كل واحد بمكانه اغلب الشباب كل واحد جنب رفيقته
شغل الفلم وبدت تعلو وجوه البنات حمرة الخجل مايحمله الفلم من امور تخدش الحياء
كانت هناك تعليقات من الشباب على بعض اللقطات اللتي نترفع عن وصفها وذكرها ظهرت لقطاتت متتاليه شدت انباههم الكل يراقب المشاهد بشغف <فاتحين عيونهم وافوامهم(مفهين)
........ فجئه يوووووووه هذا وقته من اللي فصله
واحد لابس ثوب وشماغ : اناااااااااااااااااااااااااا فصلته في احد عنده اعتراض ؟؟
وليد وهو معصب : ايـــــــــــــه انا ومن انت حتى تسوي كذا
:بتعرف من انااا والحين ولا واحد يتحرك من هنااا لان الاستراحه محاصره
وليد : انت ياهووووووه ماتعرف من انا ؟؟
: ماتهمني من تكون
وليد : معك وليد بن فهد ال ....
: ياضابط انت واياه تعالو شيلو هالخمه اللي هنا ولا تخلوون واحد منهم يفلت منهم
وليد : هييييييييييي احترم نفسك انا ماينقالي خمه
: انكتم قبل ما افرشك هنا انت اللي مفروض تحترم نفسك واسمع تراها موصله هنا ( وياشر لخشمه ) مقوميني من نومي عشان اجي واشوفك في هالمرقص وفوق ذا تنافخ استح على وجهك انت واياه الواحد رجال بشنبات وقاعد لي مع بنات !!
وبصرااخ ياااااااااااااااالله قدامي
في المكتب :
يالله جيبو اول شىء البنات ولبسوهن عبي
افتح محضر
وش اساميكن ؟
تكفى استر علينا الله يرحم والديك ويستر عرضك ..ابوي بيذبحني لو عرف ...تكفى خطيبي بيطلقني <<توسلات من مختلف البنات
التزم الصمت ...بعد فتره خلصتن ؟ يالله قولن اساميكن الموال الاول ماراح ينفعكم
ايمان عبدالخالق ال .. 22سنه
سلوى ناصر ال...28سنه
فاطمه محمد ال ...21سنه
جواهر عبدالله ال ..24سنه انصدم (جواهر اخت سلطان)؟؟
فاتن فواز ال ....19سنه
....
اتصل على اولياء امورهن وبلغهم بالحضور ..
سمع صوت خارج غرفته
يا عسكررري
العسكري : سم طال عمك؟
: وش هالازعااج ؟
العسكري : واحد يبغى يقابلك ويقول انه شخصيه مهمه
: ماقال وش اسمه ؟
العسكري : يقول انه والد وليد اللي تم القبض عليه في الاستراحه مع الشباب والبنات
: ايه عرفت خله يدخل
العسكر : امرك طال عمرك
<<دقايق ودخل رجل في منتصف الخمسينات ذو قامه عاليه
السلام عليكم
: وعليكم السلام
ابو وليد : ممكن اعرف ليه ولدي مسجون؟؟
: ولدك مسجون لانه في مسوي استراحته مكان لدعاره
ابو ليد : اصصصصصصص انت مهبول قصر حسك لحد يسمعك ولدي مايسوي هالحركات واااااسمع (رفع يده بوجه الضابط )علمآ ياصلك ويتعداك ولدي يطلع الحين والا وديتك ورا الشمس
الضابط : اعلى مافي خيلك اركبه فاااااهم وولد ك بيبات بالسجن ولا تحدني احذفك معه انا محترم سنك بسسس
ابو وليد : انت يا..... الا وش اسمك ؟؟
الضابط : اسمي خالد نايف ال ........ وورني شطارتك
ابو وليد : انت ابوك نايف ال ....؟؟
خالد: ايه ابوي فيه شىء ثاني
ابو وليد : ماتسويها ياولد نايف كانك على ابوك
خالد: انا طالع عليه وابوي كان يفرق بين وظيفته وعلاقاته خارج العمل
ابو وليد : بس هذا ولدي وما ابي يكون سجله فيه شىء
خالد : والله يا ابو وليد تحطون الحبل على الغارب للعيال والبنات ولا غلطو تجون تنافخون وتهاوشون وتضيعووووووون مفاتيح افوامكم وماترضون انهم يعاقبون ليه يومك ماتتابعه ؟؟ليه ماتعرف مع من يمشي ووين يروح ؟ والا بس مشاريع وصفقات والواسطات والمناصب تطلعكم من المصايب ؟
ابو وليد : والله اسمح لي ياولدنايف انا غلطت عليك لكن لاتلومني من القهر على حال ولدي
خالد : مسموح يا ابو وليد لكن طلعه من هنا مقدر لين تتم الاجرائات والتحقيق مع الكل
ـــــــــــــ
سعدني تواجدكم ومتابعتكم لروايه واعتذر لظروفي الشخصيه واتمنى ان ينال البارت على اعجابكم
البارت السادس والعشرون
امسح بمنديل الصبر دمعة اليأس
واسخر من احداث الزمن بابتسامه
صباح اليوم الثاني بالمزرعه
عائله ابو ماجد الكل جالسين حولين السفره على الفطور
تركي :يبه لو نشتري حصان وفرس ونحطهم هنا بالمزرعه موحلوو
عبدالله هنوف ونوف اللي اعجبتهم الفكره : اييييه الله حلووووه
ام ماجد : الا ياشين الفكره من بيقعد يهتم فيهن ماعندنا عماال كفايه يهتمون بالخيل
الا اذا بتجيبون نااايف ال .. (وتناظر في العنود)يشتغل عندكم وتعطونه المقسوووووم
العنود تمثل البرود وهي في داخلها بركان:نايف تاج راستس ومهوب بحاجت دراهمتس خليها تنفعتس في الفشخره الكذابه ...<قطع عليها صوت الجوال
خذته وراحت ترد عليه
ابو ماجد :احسسسسسسسسن خله فيك ماينفع معك الا كذا .. انتي وش سالفتك متى بتخلين حركات الخبال ذي ؟ لعنبو بليسك النسوان يكبر ويهجدن وانتي تكبرين ويزود شرك ؟
ام ماجد تسفه ابو ماجد و تطالع في ما بغيض :ياحضي بولدي الرجااااااااااال يعرف يشكم مرته ويدافع عن امه !!!
ماجد :انتي اللي تغلطين عليها وش ادافع عنك فيه تهينين ابوها قدامها وتبين ادافع عنك !!!!
ابو ماجد : لعنبو بليسك من مره الحين تغلطين عليها وتبين من يدافع عنتس انتي لسانك يلوط اذانك مايحتاج محامي لك انتي مره مافيك رجاء ولاينفع فيك التوعد ..
ساره : يبه الله يهديك لاتعصب عشان صحتك
ابو ماجد : هذي بتذبحني كم مره قلت لها لاتعرض العنود ومافيها فايده والله لو جدار
ماجد قام ولحق العنود يشوفها ..سمع نوف وهنوف : وين العنود ؟
نوف : ماجت
ماجد (وين راحت ذي )سمع صوتها قرب من الباب
اما ام ماااجد (تغلي بداخلها راح يراضيها ويدور رضاها وانا القا التهزئ من ابوه ما اهتم ولا دافع عني وهي يدافع عنها ويلحقهاااا اخخخخخخخخ يالقهر انا اللي ربيت ولغيري صفيت !!
العنود : تكفى لاااا شوف اي صرفه حرام عليك عشان خاطر عبدالله واهله
..
العنود : انت اذا تقدر لاتهاون عرف هذا شىء يمس موب سهل
...
العنود :اناعارفه بس حتى ولو فيه ناس بيطولهم الاذى وانا ما ابيه يطولهم
..
ماجد (يفكر من اللي بيطولهم الاذى وش الشىء اللي يمس !!ومن تترجى ؟ وش السالفه ؟ انا لازم اعرف)
العنود : لا موبجده هنا
...
العنود : والله هنا كلهم يظنون انه بجده بس انا شفته مع حرمه بالسوق اظنها زوجته وانا مدري
..
العنود : لااااحرام لاتعم ياخالد لاتعم
خالد :....
العنود : انا كنت بالسوق ورحت لصرافه صدمة بحرمه وانا مو منتبهه زوج الحرمه صوته ماكان غريب علي رفعت راسي طلع سلطان ومن كلامه معها (استحت العنود تقوله انه يقولها حبيبتي قدام اخوها ) يدل على انه زوجها
خالد :....
العنود : اهلي ماقلت لهم وش اقول رجل بنتكم معرس عليها ويكذب عليكم بالرياض !! ومرته توقع لو قلته لها بترضى بخيانته لها !!بتطلب الطلاق صحيح ساره مايسوى اظفرها بس ما ابي عيالها يتشردون والا ياخذهم منها مهما يكون هذي ام ..
ماجد (اللي يسمع السالفه ومذهول سلطان متزوج ! وموبجده .!يكذب علينا !..فتح الباب ودخل عليها جلس على السرير والعنود اللي فتحت عيونها خايفه يكون سمع الكلام اللي دار بينها وبين اخوها ..
خالد: ...
العنود : هلا خالد انا الحين مشغوله اكلمك بعدين
خالد : ..
العنود : مع السلامه
ماجد : اللي تكلمينه اخوك خالد
العنود وهي تعدل برقعها :هاااه .. ايه
ماجد :ليه لبستي برقعك ؟
العنود :بطلع للحديقه الجو حلووو
ماجد : يالله بنطلع سوى فيه موضوع مهم ابغاك فيه
نزلو وهي تفكر يارب عساه ماسمع كلامي ...يووووه الحين بسبب هوشه بينهم
انا مقروووووده اوووووووووف والا وش ملقفني اعلم خالد باللي شفت بطقاق اللي يطق سليطين واخته
جلسو في الحديقه
ماجد :وش كان خالد يبي فيك ؟
العنود :موضوع بيبني وبينه
ماجد :العنود انا سمعت الكلام (العنود طالعت فيه )كمل ماكنت اتجسس بس صوتك ارتفع وتقولين عبدالله واهله
العنود : يومك سمعت ليش اعيد لك نفس الكلام ؟!
ماجد : مو وقته يالعنود تكفين ريحيني انتي تتكلمين من وسع
العنود :................
ماجد : العنود وش سالفتك الحين انتظرك تحكين السالفه وسافهتني شكلك مرتاحه بالشىء اللي ينرفزني
العنود : تظن اني كذا !!!
ماجد :شوفي من متى وانا اسئلك عن السالفه والى الان مارديتي علي !!
العنود : اها ...(تنهدت وبتردد ) بقولك السالفه بس رجااء لاتدري امك بالسالفه بالذاااات
ماجد : شمعنى امي ؟؟
العنود : لان امك بتشطح بخيالها بعيييد وتألف سالفه علي وانا مو ناقصه تأليف سوالف جديده
ماجد : طيب بس خلصيني قولي السالفه
العنود(خييير وش سالفته ذا اشتغل عند ابوه حتى ينفخ علي ) :..............<<علمته بالسالفه
ماجد محط راسه بين كفيه : يعني هي الحين بالسجن !؟
العنود : ايه ..بس لحد يعرف عشان عيال ساره ونوف.
ماجد مستغرب:بعد كل اللي سوته فيك تسترين عليها
العنود : وضعها الحين مافيه نصر لي عليها لكن يهز هنوف ونوف وعبدالله لانهم واعين الحين للي يصير حوليهم ويمكن يأثر على نفسيتهم بين زملائهم في المدرسه وهذا انا ما ابيه
ماجد : خالد وش سوى ؟
العنود : طلبت منه ان القضيه ما يستلمها احد غيره حتى ما تنفضح وتنشهر
ماجد : وسلطان انااتفاهم معه
العنود : لاتستعجل بقرارتك كالعاااااده تأكد
...............
............................
...............
بعد صمت
ماجد رفع نظره لها: وانتي ماغيرتي قرارك ؟
العنود وقفت : الموضوع شكله بيروح لسالفه ثانيه خلصنا منها
ماجد مسك يدها يبيها تجلس بالغصب
ـــــــــــــــــ
في عصر
في بيت ام محمد
ام خالد : وين بناتكم ؟
ام نواف : وراتس من اليوم تبينهن ؟
ام خالد : لاجن عرفتن
<<على دخلت البنات
سلااااااام ...هاااااااي ..مساء الخير
ام نواف : جعلكن تنقطعن ورا سلامكن هاللون ماتسلمن مثل خلق الله
ساره: يووووه ياخاله انتي ليش كذا معقده
نجلا بفرحه : دريتو بنت جيران طفله اللي اعرست من 5شهور تطلقت ؟
ام نواف : صدز وش السبب؟
نجلا : يقولون ان ولد جيرانهم اللي هي عاشقته رجع من امريكا
ام نواف : ايه انا داااريه هالبنت دايم توايق عن البيبان (تطل )
ام محمد : ايه عساها بس ماحملت والا بتخرب السالفه
هههههههههههههههههههه
ام خالد: خلصتن من تطنزكن
ام نواف (يالعنبات ذا الخشه جت الفلفسه مدري وش تحس به ذا العجوز الرشما):ايه يام خالد وش تبين بالبنات
ام خالد : وين جوالاتكن ؟؟
نجود : انا بالبيت
نجلا: وانا بعد
ساره تبلع ريقها : فوو ق
ام خالد : ايه ..التفتت جهة ام نواف وام محمد الجوالات تسحب من بناتكم
نجود : خييييييييير !!
ام خالد بعصبيه من قلة ادبها: اكلي تبن فاهمه لتس وجه بعد
نجود : خييير ليه تسكتيني وش شايفتني ؟؟
ام خالد :اقسم بالله ان ماسكتي لا الطتس بها البياله ياشينة العلوووم بعد من زين علومتس تلوسنين اللي مثلتس وتسوي سواياتس المفروض ماتطلع من حجرتها !!
ام نواف بخوف: ليه يام خالد ؟
ام خالد : يأم نواف البنات معطاتهن الحريه اللي المفروض ماتعطى الا لصاحيات والا بناتكن المفروض مايعطن
ام محمد : ليه يأم خالد وش فيتس قمتي تخورين بالحتسي ؟
ام خالد: انا ما اخور بنتس هي واللي معها اسئليهن وش الارقام اللي بجوالاتهن ؟؟
ام محمد : ارقاااااااام !!؟؟
ام خالد : ايه بناتكم لهم علاقات مع شباب واتصالات بينهم
ام نواف :وشوووو انتي من صدزتس تحتسين ومن قالتس ؟؟
ساره : يمه ذي تبي تشوهنا
ام خالد : اقطعي واخسي بعد مع شينتس قواية عينتس
ام محمدببلاهه : يام خالد انتي تحتسين وانتي صادزه ؟
ام خالد : هذي مافيها لعب هذي سمعه وعار ..واللي قالي كان ناوي يعلم عيالي
يقول بقولهم حتى يذبحونهن
ام نواف وهي تغلي : منهووو؟
ام خالد : ماراح اعلمكم لاني ما ابي كلام بينكم وتصير هوشه وتكبر السالفه اكثر <<ام خالد عارفه ان ام نواف عوباء وممكن تلاسن مع الرجال عادي
ام نواف اللي تحس ان الصدمه كبيره ماتحملت قامت على بنتها وكفختها بعد ما تأكد منها عن حقيقة الموضوع وكسرت الشريحه بضروسها
اما ام محمد : قامت وصفقت بنتها كف وسحبت الجهاز منها واعطته اخوها ورمت الشريحه <<واتفقوا ما يعلمون الرجال
يتبع ,,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك