رواية شغب في مدارس الرس -6
بالليل الساعه 12 ونص.....
ما احد منهم نام...كانوا جالسين حول بعض ....
سامي وزوجته ....واسرار تلعب مع فايزة ...وندى واحمد وفيصل يسولفون....
ندى- الله يعيننا ...نسبه ...ويصعبون المنهج...واختبارات تضغط علينا ...
احمد- الحين الدراسه دمآآآر ...ماتمشي الا بالواسطه ....حتى اللي بيذاكر بيمل اخر شيء
ندى- مهاوي ...تذاكر قبل الاختبار بالمدرسه ....وماشاء الله عليها تحل...
احمد- يمكن حفظها سريع
فيصل- ماشاء الله عليها....انا سامع معلومه ....ان اللي مايحفظ اشياء كثيره ...يحفظ بسرعه...
ندى تفكر- صح....يمكن...لانها ماتسمع اغاني...ولا تحفظ منهن شيء....وحنا لو نسمع الاغنيه حفظناها...
احمد- ما تسمع اغاني ماشاء الله عليها...
فيصل- انا قايل لها تصير صديقتها ولا تتركها....هالبنت ماشاء الله عليها...
احمد- طيب ...يعني عاقله
ندى- اوووف لا اله الا الله....تخيل كلنا نغش ...نجيب الاسئله ..ومانذاكر....هي تقول لا ابي انجح بحلال مو بحرام....
احمد مستغرب ...فيه بنت معقوله كذا ....بهالوقت اكثر البنات دمار...
ندى- لا واقولك اذا شافت البنت على خطاء كلمتها الله يهديهن....حتى يوم سالتها وش رايك باللي نسويه اللي هو الغش.....قالت انتي تعرفين مصلحة نفسك....بس بقولك بكره لا كبرتي راتبك ماراح يصير حلال.....يعني تنصح ولا تدخل.....البنت اخلاق....
احمد بقلبه- والله هالبنت شيء .....الله يثبتها يارب...
احمد- هي اللي جتكم ذاك اليوم.....
ندى- ايه....
احمد- حلو اتمنى تصيرين مثلها...من كلامك عنها ...ماشاء الله عليها....هذي بتزوجها
ضحكت ندى وقالت- تبطي ياشيخ...عاد مايتزوجها الا انت ...
فيصل- ليييش وش فيه....؟؟
ندى- ما ادري عنه....
دق جواله.....
احمد طلعه وهو يطالع بالرقم وابتسم.....وقام وقال- دقايق....
طلع عنهم
ندى- هه ...بهالوقت من يكلم......
فيصل ضحك وقال- لا تظلمينه...
ندى- ايه واضح....
فايزة- اقول ندو.....قررت بكره اتضارب مع التبن نوره
ندى- لا لا انتي بس قولي غيدا هي بتشرشحها شرشحه...
فايزة- كولي تبن
فيصل- وش سالفه غيداء
سامي يقطاعهم- فيصل.....موعدك متى؟؟
فيصل- انا ماراح اروح.....خلاص .....نصرف فلوس ولا نطلع بنتيجه
زوجة سامي- لا الله يهديك يافيصل....خل املك بالله كبير....
فيصل- لا مستحيل.......اكثر من عشر مرات ولا فاد.........هاذي ثاني عمليه ولا نجحت...بعدين انا لو ما اشوف اهم شيء اني مرتاح
ندى- بس يافيصل..
فيصل بضيق- خلاص ..انا قلت كلامي ....روحه ماراح اروح معكم.....مليت ....
سامي- صعبه ....تبي تبقى طول العمر كذا ....انت ما تبي تزوج....
فيصل تضايق ونزل راسه وقال- وش قصدك......يعني مافيه وحده تبي ترضى فيني...
ندى وسامي- لااا.....
ندى- كثير اللي يتمننك.....ومن الخبله اللي ترفضك....ان شاء الله تزوج....
سامي- لا لا ماقصدي كذا ابدا.....اقصد عشان الوظيفه...وتفتح بيت .....وتجيب عيال...وشلون تصرف عليهم.....تبي طول عمرك عاطل؟؟
فيصل- خلاص خلاص سكروا الموضوع
سامي- بتروح....
فيصل مارد...
ندى تضايقت ....
بغرفته ....
احمد- ليش لهدرجه مستحيه.....تراك مو قدامي تستحين....
بصوت وحده خايفه وربكه- لا بس....ما تعودت ....
احمد- حنا مابيننا شيء صح......يعني لا حب ولا شيء...بنصير صداقه بس....يعني مانحب بعض ولا شيء...لا تستحين ...اعتبريني مثل صديقتك نوني ...
خلود – ان شاء الله....تبي شيء؟؟
احمد- وين....ما بعد سولفنا...
خلود- لا بس بنام عندي مدرسه.....
احمد- خلاص بتركك ترتاحين......اقري وردك.....
كان يقول كذا عشان يكبر بعينها ....والا احمد ...مافي بقلبه دين...عيشته دمار....
خلود-جزاك الله ...خــ..خير.....
احمد- مع السلامه.....
سكرت ....وقف واخذ نفس وقال- زيييين صغيره وتنفع .....
........................
كان قلبها ينبض بقوه .....
اتسطحت وقالت- صح صديق وبس......مشاء الله عليه...ينبهني اقرا وردي......ايه كذا الصداقه
ابتسمت وسكرت عيونها ...
...................................
الصبح..
حاتم ومها يمشون مع بعض ...مها ساكته وتفكر....وحاتم يفكر....
طلعت ندى وفايزة ....
حاتم- هاذي اللي طالعتني...
ابتسمت وقالت- ايه هذي حبيبتك.....
حاتم تقدم......
مها- هلا والله....صباح الخير...
ندى وفايز- صباح النور ..
مها- هاه فيافي ....شفتي حبيب القلب...
فايزة- يوووه صدقتي هالخبله ...
مها- ايه واضح....
ندى ضحكت وقالت- كفختني.....
.........................................
الفسحه .....كانت تركض ...
تركض شافت فايزة من بعيد...وصرخت وقالت- فاااايززززززززه....
التفتت فايزة ...
الماس- تعالي بسرعه.....
راحت تركض معها كانت الماس ماسكه يد فايزة وتركض...
فايزة- الماس وش السالفه...طيب بشويش....
وقفن بالساحه ....
لو غيداءاللي هي ناصر....تهاوش مع نوره ..
نوره- اقول ان قلت للمديره وش سويتي ...رمت الملف بوجهك....عشان حبيبتك...
غيداء- ايه عشانها.... يالبى قلبها....انت وش عليك...يبيلك قطع لساان...
نوره- مو انتي اللي تقطعين لساني ...
نوره كانت خايفه ...غيداء اطول منها واعرض منها ....غصب عنها نزلت دموعها وصاحت
فايزة تطالع مصدووومه...
الماس- من قدك ناصر يحبك....
فايزة عصبت....
وهي تطالع ...التفتت غيدا....لها.....وابتسمت .....اتجهت لها ...وقالت اوامر ثانيه ياقلبي....
فايزة – مشكوره...
صدت وراحت ......
الماس- فايزة.....
غيداء تطالع مو مصدقه....جرحتها.....مع ان ذا النوع ما احد يقدر يجرحه....
...........
ندى- بتنزلين....
مها- ايه.....
كانت تقراء كتابها ...وقالت- خوذي....حطيه على الطاوله .....
نزلت وقالت- بختبر وارجع ...
ندى- انتظرك......
كانت واقفه عند الدرج ...جت ايمان وقالت- غريبه لحالتس...وين مهاوي....
ندى- نزلت تختبر اختبار امس.....
ايمان- ترى اسئلة الجغرافيا مع رغد......
ندى تفكر...وقالت- لا ....ما ابي اخذهن...بجرب هالمره...
ايمان تطالع مو مصدقه.....
ايمان- افاااا ليش؟؟؟
ندى- نجرب ...اذا نفعت ...ما ابي اغش...
رغد من وراهن- عشنا وشفنا....ايوووه سوت مها اللي براسها....هالبنت خرااابه منااافقه...اتوقع انها قدامنا ديييين ومن ورانا بلاوي...
ندى- عاد حدك...هالبنت اللي مو عاجبتك....صارت صديقتي.....واحسن منك.....
رغد بضحكه عالي- احسن مني.......لا حياتي ...لا تفكرون كذا ....انا مافيه احد احسن مني
ندى- على فكره ...انتي ماخذه بنفسك مقلب ...على شو ..ما ادري....
رغد عصبت وقالت- قلبتك مها...ماكان تعاملك كذا ...
ندى – هذا تعاملي....بس مها وضحت الصح من الغلط....وانا ماقلت شيء لكن انتي فتحتي الموضوع وبديتي تسبين مها....
رغد- هيييه انتي مالكن اسبوع....وانا معك لي سنه كامله....
ندى- انا ماقلت شيء...لكن انتي ليش تغلطين على مها...ماتبينه بالشله بقولها ..البنات مايبنك...
رغد- ياليت والله .....
ندى- خلاص...بلاش النفاق ....اللي يتبسم بوجهك...ويطعنك بظهرك ...
رغد- لاتحسبين اني اذا ضحكت لها احبها ....اصلا بعض الناس احتقرهم بابتسامه
ندى عصبت وقالت- تحتقرينها.....قولي لي من الاول انك ماتبينها....انا وش يضمن لي انك ماتكلمين فيني بظهري
ايمان- محشومة ياندى
ندى- ومها مو محشومه....وش غيرك يا ايمان...كنتي العاقله بالشله اللي مايعجبك اللي نسويه الحين صار صح..
ايمان- هذا الواقع .....اذا صديقاتي كذا فانا اكيد بصير كذا
ندى- براحتكن ...بقول لمها انكن ماتبنها....
ايمان- جت استاذه خديجه ....يللا بلا هالمشاكل عاد.......
راحن لفصلهن
.......................................
حاتم.........
خالد- اليوم بشتري سياره....
حاتم- ع البركه ...
فهد- اقتنع ابوك
خالد- الله يبارك فيك...ايه اقتنع.....عاد يالله انتم اشتروا...عشان نروح لعنيزة ونهجول....
حاتم- لا انا ما احب عنيزه..وتبيني اهجول فيها...
خالد- تعزز لي...
فهد- وانا يالخاين....
حاتم- من عيوني ..اعزز لك....
خالد- وفهد ورى....عزز لنا ...حاتم ضحك وقال- يالله ....نبي نشوف ....وش قلت تبي سيارتك...؟؟
خالد- كورد....
فهد- ابيض؟؟
خالد- لا ....سكري....
فهد- طول عمرك ذوق ...
خالد- تسلم لي........
حاتم- كم بقى ونطلع .....
فهد- والله ان وراه شيء....
خالد ضحك وقال- ليش تشك؟؟؟
حاتم- شفت ...بس يشك فيني....
خالد- الا جد وش عندك تبي تطلع ...
حاتم ابتسم وقال- ولا شيء
درررررررن وخلصت الحصه ......
........................
كانت تلبس عبايتها ......
من وراها- مهاااا...
التفتت وقالت- سمي؟؟
ندى- اشوى توقعتك طلعتي...
مها- امري.....
ندى- تجين عندنا اليوم...
مها- ما اعتقد....
ندى- لزووم اشوفك...
مها- تعالي انتي لنا......
ندى- لا صعبه فيصل ما اقدر اتركه .....
مها من جاء طاري فيصل وقلبها طبول وقالت بربكه- خلاص اجي....
ندى- الحمد لله.....متى...
مها- المغرب...
ندى- اوك المغرب المغرب......
مها- ماتبين تطلعين معي؟؟
ندى- مشينا...لازم تجي فايزة معنا....
مها- ايه نمرها...اقول....وش رايك نتأخر....ادري ان حاتم وده يكشخ قدامها...
ندى بتعجب- انتي علمتيه عنها؟؟
مها- لا بس هو شايفها يوم تقزه ...ومستانس...
ندى-هههههههههههه.....ياحليلهم.....خلاص....نتأخر... وش عليه...احرق قلب فوفو....
مها- والله انك نذله
ندى- احلفي ...وانتي وش تصيرين
.................................
حاتم متوقع يصيرن قدامه ....ويتمشى مو مستعجل على شيء.....
حاتم انقهر ...يدري انه من تحت راسها...
حاتم يطالع الساعه وحده ....معقوووله للحين ..
حاتم- من تحت راسك يامها....ادري...سمع اصواتهن وراه.....
.........................
مها-هههههههههههههههه ينتظرك يافايزة ....
فايزة- كولن تبن انا ما احبه ....
ندى- ايه صدقنا صدقنا...
مها- ترى عندنا عادي حبي على راحتك.....
فايزة بضيق- كرهتوني فيه ....
مها- ايه واضح ....
ندى- كلانا مظهر للناس بغض.......وكلن عند صاحبه مكين...تبلغنا العيون بما اردنا...وفي القلبين ثما هوى دفين....
مها-هههههههههههه قويه ......شوفي وقف...يقالي من الحنان ينتظرني...نصااااب....
اتجهت له بسرعه وقالت- وش تسوي ...
حاتم- انتظرك......
مها- ايه علومك زيييينه ....
حاتم ابتسم وقال- امشي امشي.........
دخلوا البيت ...طرررخ <<الباب
حاتم- اسألك بالله وش تقول عني؟؟؟
مها- ماقالت شيء.....
حاتم- اكييييييد
مها- من زينك....
حاتم- آآآآ ماقالت عني شيء؟؟؟
مها- ابدا....
حاتم تحطم وقال- طيب.....
تركها وراح ...
مها كاتمه ضحكتها ....وتقول بنفسها- يامسكين ....يحسبها تحبه ....
................................
فايزة بدلت ملابسها وجلست على السرير وسهت باللي صار اليوم بالمدرسه .....
وبقلبها- غيداء....معقوله اقدر اغيرها .......
ندى دخلت وقالت- فيافي.....آآآآآآ من تفكرين فيه....بحتووم؟؟؟؟
فايزة تذكرته وقالت- تكفين لا تذكريني فيه كل شوي....
ندى- اهااا...يللا الغداء....يا حتوومه
فايزة اخذت نفس وقالت- والله ما احبه .....
طاحت على ورى واتسطحت ...
.........................
على الغداء ....
مها- يوماه ....
امها- سمي؟؟
مها- اليوم بروح المغرب لندى....تقول انها تبيني...
امها- وهي ليش ماتجي...
مها- عطيتها كلمه
امها- لا لا ...مو لازم
حاتم- خليها تروح عادي.....
مرام- لا وشوله تروح....
مها تاطلعها بنظره ...
فارس- يوماه انا اوصلها...
مها- خلاص فارس يوصلني...
امها- كيفك.....
مها- قولي لابوي...اخاف يزعل لو يسأل عني ما يلقاني ...
امها- ان شاء الله...
حاتم- لاوصيك عاد...
مها ضحكت
امها- انتم ما ادري وش وراكم
حاتم- وشووو؟؟؟....انا اقولها لا اوصيك خليك عاقله ....مو هبله مثل دايم
مها- ايه ايه مو هبله مثــ...مثل ايـــــش.....
حاتم- الحمد لله
قام ....
فارس-ههههه هبله هبله
مها- هييييييين هين ....
........................................
المغرب ......
ندى بصوت عالي من ورى الباب افنحي البااااااب ...بسرعه .....
فايزة- لا ....
ندى- يانذله بلبس....بسرعه ...
فايزة- لاا...
احمد جاء وقال لندى- كسرتي الباب .....وش تبين فيها ؟؟
ندى- ابي البس...
احمد- انتظريها....
اتجه لغرفته ..وقالت بصوت عالي وهي تطق- يالله البنت بتجي.....
فايزة- لاااا
احمد التفت لها وقال- من اللي بتجي؟؟
ندى- مها......بتجي الحيـن......
احمد باهتمام – اها....طيب...فااايزة ...افتحي لها الباب...
فايزة-لا
احمد- اخلصي افتحي لها....
فايزة فتحت بعد ما خافت من احمد....
ندى- شوكرن احمد....
دخلت وهي تهزء فايزة ...
احمد نزل لصاله...كان جالس فيها فيصل لحاله.....يسوي لراسه مساج...
احمد جلس قدامه وقال- فيصل......
فيصل- سم!!
احمد- قالي سامي عن....
فيصل- تكفى يااحمد لاعاد تجيب طاري السفره ....
احمد- بس انت محتاج تراجع...
فيصل- ما ابي....الله يشفيني بدون ما اسافر...
احمد- بس....
درررررررررن<<الجرس
احمد- دقيقه.....
قام ...
فيصل- لالا هذي صديقة ندى...
احمد- وش دراك؟؟؟
طلع للحوش ...
فيصل استغرب....
..................................
مها واقفه مرتبكه ...خايفه .....من بيفتح لها......
فتح الباب ....
وطالع وقال- هلا...حياك...ندى داخل......
راح قدامها.....دخلت وطالعت فيه ...واحد طويل...نحيف..
طلعت فايزة وقالت- اهليييين ..تعالي..
سلمت عليها وقالت – سوري ما فتحنا لك...
مها- لا عادي....
دخلن .....
مها قلبها ينبض بقوة...معقوله بتشوفه مره ثانيه......
دخلت المجلس وجلست ...
فايزة- ندو تلبس....بروح اجيب لنا عصير....وش تبين
مها- أي شيء....
فايزة وش أي شيء...تبين قلم أي شيء....
مها ابتسمت بخوف وقالت- لا يعني على ذوقك...
فايزة – تيب.....
وقفت تنزل عبايتها......
وترتب شعرها...
كانت بالمجلس مرايه على جنب ....قربت منها وهي تسرح شعرها .....
.........................................
دخل من باب الصاله وكان يشوف المرايه...يعني يشوفها ...
وقف لحظاات وهو يطالع ......
شافها التفتت مفزوعه.....
رجع وهو مبتسم....
............................
جلست وقلبها ينبض بقوة ....
مها- جالس يطالع هو وجهه.......
دخلت فايزة ومعها العصير....وقالت- قومي لغرفتنا...وشوله تجلسين هنا...
مها- ما يحتاج...
فايزة- يابنت الناس.......
سحبتها...
مها- فيافي الله يخليك لا تحرجين ندى.....
دخلن صاله رئيسيه ....واللي فيها فيصل....
مها- دامها تلبـــــ.....
سحبت يدها بقوة ورجعت للمجلس....
فايزة دخلت عليها وقالت- هذا فيصل....ما يشوف....
مها بخوووف وربكه- لا لا...حــ....حتى ولو....
فايزة- مايشوووف...
مها- لا حرام عليك....
فايزة- ياشينك...تغطي وتعالي....
.....................................
فيصل بقلبه-الصووت!!!...... هي نفسها اللي عند البقاله....اوووه...والظاهر هي اللي عند الباب كانت...
قام وهو يمشي بشويش عشان يدخلن.....ودخل المطبخ....
فيصل- يمه....
امه التفتت له ...وقالت- اجلس هنا....
سحبت له كرسي.....
فيصل- وين الشغاله ماتجي تساعدك....
امه- لا هذا العشى ....ما ابيها تسويه...
فيصل- اها.....
.......................
فايزة- والله مافيه احد......
مها- طيب باخذ عبايتي....
فايزة- والله فيصل راح...
مها – وين رااح؟؟
فايزة- وش عليك منه...المهم فتح الطريق لك.....
مها- بس باخذ عبايتي....
اخذت عبايتها....وبس ماسكتها.....
وقفن قدام باب الغرفه...
فايزة- افتحي ...مها معي......
ندى- هااااه...دقيقه ...برتب....
مها ابتسمت ...وقالت- لا ترتبين ...اتوقع مثل حوستي واشد......
ندى- ولو .....لازم نصير قدامك سنعات ......
فتحت الباب لهن وقالت- عشان تخطبين اختي لأخوك.....
فايزة اخذت نفس بملل....
ندى- شفتي ..الحب....
مها ابتسمت اكثر وقالت- ااخبار ندو..
ندى- تمام التمام...تفضلي....
دخلت .......
فايزة- الظاهر احمد ينادي....بروح اشوفه ...
راحت .....
جلست مها وقالت- وش الكشخه.....
ندى- عاد اسمعي انت وجهك...ثاني مره لا تجينا كاشخه...تعالي بقميص وبجامه....
مها- لا عاد دورك انتي وفايزة تجن.....
ندى- ان شاء الله .....بتجي اختك مرام للعشاء؟؟
مها- اكييييد.....
ندى- اتمنى اشوفها.......
..............................
فايزة- هاااااه....
احمد- من اللي عندكم؟؟؟
فايزة- صديقة ندى
احمد- طيب جيبي لي ....
دق جواله...
احمد طلعه وطالع وقال- بلاش انا طالع .....
طلع للحوش ورد وهو يقول- هلا والله...
خلود- اهلين......
احمد- اخبارك ياعسل....
خلود- تمام...انت اخبارك...
احمد- عال العال...اخبار نوني....
خلود- تمام....بس ليش تسأل عنها...
احمد- نوع من الاهتمام...يعني صدبقة صديقتي ....لازم اهتم فيها....
طلع لشارع وركب سيارته ...وجلس....
خلود- اها....
اخذت نفس وقالت بضيق- احمد....
احمد- عيونه...ليش تقولينها كذا.....صاير شيء....
خلود- أنا اللي اسويه غلط؟؟
احمد- لا...أنتي ما حبيتيني عشان تسوين غلط....الغلط انك تحبين....
خلود- يعني لو اختك تسوي مثلي ....عادي ؟؟؟
احمد بقلبه- هاه ....ياحليلك....خواتي مربيات ...مو مثلك التربيه ماتنفع معهن ...
قال- اكيييد...اذا اتخذن صداقه بس....اما الحب لا....
خلود- اشوى ارتحت .....
احمد- وهذا اللي مضيق خلقك ياقلبي.....
سكتت ماردت عليه
قال على انه ما انتبه- اوه اسف....يا صديقه ....
ضحكت .....
قال- صديقه ...كأني بنقالي.....
ضحكت بقوة ...
قال بهمس لها- تجنن ضحكتك....
سكتت وكان قلبها ينبض بقوة ....
قال- هذا عادي....ابداء رأي لا غير....
خلود بهمس-اها....
سكتوا ثواني.....
خلود بربكه- تامر شيء...لازم اسكر...
احمد- لازم؟؟
خلود- ايه....
احمد- طيب....يللا ...باي صديقه ...
خلود- باي....
سكرت .....
احمد اخذ نفس وقال- وتسألني عن خواتي...هه......وهن مثل تربيتك...
>>ياشين الواثق اللي يشوف غيره ولا شيء...
..................................
مها تفكر ...وندى تتكلم.....
ندى- انا وان طلعتي عن البنات....انا معك...
مها التفتت لها وقالت- لا تتركينهن عشاني...المدرسه مليانه بنات
ندى- لا لا....اصلا انا ابي معك.....صراحه تعجبيني.....عشان كذا ابي اصير معك...
مها- بس انتي تتركينهن ولك مده معهن...وانا لي سبوعين معك....يعني ما عرفتيني....
ندى- يكفي اخلاقك.....تدرين يوم قلت لفيصل عنك وعن شخصيتك....قال خليك معها....لا تاخذين صديقه غيرها....يعني لو انتي ولد....كان صرتي صديقه ....
مها- يعني البنات ما يبني لاني ملتزمه!!!
ندى- ايه...
مها- انا ملتزمه!!
ندى- ايه...
مها بتعجب- والله ما اشوف الاتزام عندي...انا صحيح ما اسمع اغاني....لانها تغطي على القلب.....ولا اغش....لان ابوي معودني من صغري.....بس هذا يسمى الالتزام.....الله يثبتنا يارب...بس غريب تفكير البنات....لا نصحت عن شيء قالوا ملتزمه....
ندى- احسن ياخبله خلي سمعتك طيبه...بعدين اذا اللي ما يسمع اغاني مو ملتزم ...وشو الملتزم....
مها- الملتزم اللي يصوم كل اثنين وخميس...ما يترك النوافل....ينهى عن المنكر....وانا اشوف منكرات انكرهن بقلبي ولا اقدر انكرهن لا بلساني ولا بيدي .....
ندى- اها......
مها- تركتي الاغاني!!
ندى- تقريبا.....صرت اقلل...
مها- تكفين تركيهن....
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك