رواية خليجيات في الامارات -54
نور : اي هم .. ماجد طلقها خلاااص
عبدالعزيز مستغرب : ولييش جذي حرااام توهم متزوجين من قريب
نور : بس هي مو زينه البنيه
عبدالعزيز : آهاا دام جذي أوووكي
نور : والله افتكو منها ما بغت
عبدالعزيز يطالع نور وهي ترمس .. قال : انتي تمثلين ولا ترمسين ...؟؟
نور عقدت حياتها : ويا وجهك اقووول لك قصص ما تستاهل
عبدالعزيز يضحك : قالو لج بـــزر تقولي لي قصص
نور : هه زعلااانه بروح لفجووور احسن لي وبعدين أنت لييش تنكت على كلامنا ..!!
عبدالعزيز ضحك وهو يشوفها تطلع : تعالي تعالي محد مخربج غير هذي فجووور .. بطلت أسمي بنتي فجر والسبب فجووور
/
.
/
معضد طالع بدور وقال : اش فيج ما كليتي..؟؟
قامت من ع السفره : ما فيني شي بس مب مشتهيه
معضد مستغرب : أوووكي تعالي ابااج
بدور : ان شالله بس أغسل برجع
معضد هو الثاني قام من ع السفره عسب يروووح لـ حجرته
بدور راااحت للمغاسل بدت تغسل يدها وهي تطالع تغسل حست جبدها لااااعت بس قالت يمكن من كثر ما كليت التفت بدوور للمحارم وسحبت لها كميه وهي ترتجف من التعب وبدت تغسل ويهها
بعد ما خلصت طلعت من المغاسل وراحت للخدامه تقول لها شيلي الغدا وصعدت فوووق
راحت لـ حجرة معضد .. شافت الباب مبطل دقته ودخلت
معضد رفع راسه من ع الكتاب اللي قاعد يقراه وقال : حياج دخلي
بدور دخلت
معضد : بندي الباب
بدور بندت الباب وتقدمت عن السرير : خير ..؟؟
معضد ما شال نظره من ع الكتاب وقال : يلسي
بدور يلست وهي متوتره .. غير انه جبدها لااايعه من بعد الغدا
معضد طالع بدور وقال : حمداني وين ..؟؟
بدور : رقد
معضد ابتسم وقال : حليله قااال يبا يطلع
بدور : هي كلمني أمس وقااال يبي يروووح البحر
معضد : بوديه الويك انك ان شالله
بدور : ان شالله
معضد : اش فيج ..؟؟ لا تاكلين ولا ترمسين حتى ويهج لونه متغير
بدور مستغربه : أنا ...؟؟ من قال ..؟؟
معضد : طالعي ويهج .. حتى أمايه ذاك اليوم تقول بدوور مصفره
بدور حطت ايدها ع خدها وقالت : ما ادررري يمكن عندي ضعف أو سوء تغذيه
معضد ابتسم وقال : اكلي عدل عن تطيحين علينا
بدور هزت راسها وقالت : ان شالله
معضد حط الكتاب بصوووب وقال : ارمسي بلاااج ساكته
بدور رفعت راسها طالعته واستغربت .. بلاااه هذا يتصرف جذي وما ردت عليه .. أكيييد بعد ثواااني بيعصب ويصير ضدي أحسن لي اتم ساكته
معضد ابتسم وقال : زعلااانه مني ...؟؟
بدور هزت راسها وقالت : لأأأ من قااال ...!!
معضد تقدم عنها ومسك يدها : امبلا زعلانه
بدور ارتبكت وسحبت يدها بدت تصيح ..
معضد استغرب : اش فيج ..؟؟
بدور بدت تصيح وهي خايفه قااالت : معضد انت ليييش تظلمني ...؟؟؟
معضد مستغرب : اظلمج ..؟؟
بدور هزت راسها : انت ما تعاملني عدل .. ما اقووول لك عاملني برااايك بس ع الأقل لا تسئ لي بنفس الوقت معضد انت حتى ولو ما تحبني مثل ميررره وأتمنى انك ما تعصب لأني ما اقارن نفسي بميررره .. بس حط
ببالك شي واحد ولا تعتقد اني قاااعده اعااايرك بـ هالشي .. أنا ضحيت بــحيااااتي عشان ولدك حمداااان وعشااانك لو وحده غيري ما كانت رضت تتزوجك .. انت وااايد تظلمني مع اني ما سويت لك شي والذنب مب ذنبي ..!
معضد تقدم منها ..
بدووور مسكت ويهها وهي ترتجف وخاااايفه
معضد مد يده يسحب يدهاا .. بس بدور صرخت وهي تقووول : لا تضربني معضد أنا غلطت أدررري بس أنا غلطت بحق نفسي وبس والله ما غلطت عليك ولا عايرتك بشي ...!!
معضد سحب يدها بدور حست عمرها بتختنق
معضد بدا يطالعها ورفع راسها بقووووه بس بدوور تمت تطالع الأرض وهي تصيح .. معضد قال لها وهو يطالعها : بدوووور طالعيني
بدور ما رضت وتوها بتبعد عمرها عنه
معضد قال وهو ماسكها : بدوووور أدررررري انتي ما سويتي شي ولا غلطتي بحقي بس انتي غلطتي بحق نفسج تدرين شو يعني ...؟؟؟
بدور ابتعدت عنه وردت يلست من التعب قالت وهي تصيح : عاد ليييش تظلمني دامك تعرف ..؟؟
معضد يلس حذالها وقال : بدووور أنا وميره كنا نعتبرج بنتنا مثل أخت حمدان مو بس أخت ..
بدور بدت تصيح أكثررر وقالت : معضد اسكت خلااااص ما اقدر أسمع أكثر عن جذي .. أختي وأختي وأختي .. لي متى بظل أختك فهمني ... ؟؟؟
معضد مسك ويهها وقال : بدوور لا تفهميني غلط ..!! انا كنت ابي اعاقبج واحسسج كبر الشي اللي سويتيه
بدور تصيح : أدرررري اني غلطت بس أنا ما غلطت مثل الباقي ....! معضد أنا قبل الحادث بيوم والله اني
عهدت على نفسي اترك كل شي .. صدقني
معضد : مصدقج بدووور مصدقج
بدور : وليييش تعاملني جذي ...؟؟
معضد توه بيرد ما شاااف الا بدور غمضت عيونها وطاحت على ينب السرير وهي هلكااااانه
معضد خاااف عليها ومسكها بسررررعه يوديها للمستشفى ..!
/
.
اريج : يالله ملوووك خلاااص بتتزوجين ..؟؟
ملاك : لأأأ من قااال .. ميوود يتزوج قبل عقب أنا
اريج مستغربه : ولييش ان شالله
ملاك : جذي قررت
اريج : حرااام ملاااك توه طالع من تجربه فاشله
ملاك : بينجح في اليايه ان شالله
يتبع >>>
اريج : أمييين
ملاك : وبعدين لو قلنا له جذي بالفعل بيتزوج عشاننا بس اذا تزوجت خلاااص ما في فااايده بيتعذر وما يبا
اريج : بس بعد لا تلحين عليييه حرااام
ملاك : لأأأ ما فيها شي وبعدين احسن له عسب مرته اليديده تنسيه ع قولتهم هههه
اريج ابتسمت : لااا والله وبعدين يمكن تتغير نفسيته صدق
ملاك : بالفعل هذااا اللي اباااه
اريج : يلا ان شالله يعيش حياه سعيده الحين
ملاااك : أميييين يارب
اريج : شو قاعده تسوين ..؟؟
ملاك : ماشي قاااعده اتريا أمي فاطمه لأنها بترد اليوم ان شالله
اريج مستانسه : والله
ملاك : هي خلاااص بترد ههههه
اريج : الحمدلله وأخيرررا وراشد بيسكن وياكم
ملاك : له هذا مدري شو ياينه طايح لي ع الشقق مستوي لي زلمه
اريج تضحك : لا والله يعني أنا شو ...؟؟
ملاك ابتسمت : لأأأ هو عادي عندي بس رشووود يرتاح في الشقق أكثر من البيوت
اريج : هي والله حتى أنا هههه
ملاك : يعلج تاخذين واااحد يعيشج في بيت حووووويه كبيرررررررر
اريج ضحكت : نغير جو وشو فيها ...!
ملاك : اروووج اقووول لج شي وما تزعلين
اريج : قولي
ملاك : اروووج يعني انتي عايشه بروحج مع امج .. واخوي ماايد ما شالله عليه مقتدر ويقدر يتزوجج ويعيش امج معاج وانتي ما فيج عيب صج مبدئيا اش رايج ..؟؟
اريج مستغربه : بشووو ..؟؟
ملاك : لييش أنا تكلمت بنغالي
اريج : لأأ بس ملاك قلت لج أنا بشتغل
ملاك : بس حياتج الخاصه أهم عن الشغل اريج
اريج مستغربه : ما ادرري بسأل أمي
ملاك : اريج انتي اللي بتعرسين مب أمج
اريج مستغربه : حتى ولو
ملاك : ارووج لو على انه مايد كان متزوج ومطلق عادي ما ازعل
اريج : لأأأ مب على جذي .. بس لاازم الواحد يفكر
ملاك : هو حاليا مستحيل يعرس يمكن بعد شهر شهرين .. يمداج تفكرين أكييد .. حطي ببالج ان لا يمكن مايد يتزوج بـ هالفتره بس أحااول بأقرب وقت أخليه يفكر ..
اريج : يصير خير
ملاك : وبعدين اروووج والله مافي أحسن منج ربيعتي واعرفج .. وتنفعين لأخوي
اريج : ملاك بعدين برد عليج يصير خيررر
ملاك : فكري عدددل اروووج
/
.
/
شوق تقول لرهام : انزين بس أنا مابي البس فستان ابيض ابيض
رهام مستغربه : وشو بتلبسين ..؟؟
شوق : الأبيض مررره والسكري ملو منه .. ابي واحد جذي ابيض مصفر على ذهبي
رهام : حرااام شووق والله الأبيض أحلى
نور مستغربه : هذي ذوووقها حتى غير عن النااس
شوق : اي والله الذهبي أحلى
رهام : شووق فكري عدل
نور : خليها على راحتها بكره لا عجرت تذكري بتقووول ياليتني لبست ابيض
رهام : هههههههههه
نور : اي والله صدقيني
شوق : هذا عرسي مب عرسكم اسكتو فاهمين يالعوانس
رهام لوت بوزها : مااالت اصلا أنا مابي اتزوج الحين وراااي سنه كاامله
نور ابتسمت وقااالت : وانا وعزوز مب مقررين نتزوج الحين قلنا بس بيتنا يجهز بنتزوج ان شالله
رهام : وبعدين مو مشفوحين ع العرس مثلج
شوق وهي مقهوووره : والله بخبر نواااف عليكم
رهام : من زين نوااف الحين والله بس اقول له شي يسمع كلامي
نور : احلمي من بعد اليوم يسمع كلامك أم دووويس تعرف تلعب بالعقوول ههههه
شوق ابتسمت : ما يخصكم بنوافي .. يلا يلا نشتري احسن لنا
نور : يلا اخلصو والله ابي ارجع البيت وانااام
رهام مستغربه : مو هذي فجوور يايه معصبه
نور : خير ان شالله اش فيها ذي بعد
رهام تبتسم : بلاااج ..؟؟
فجر وقفت وهي شوي وتصيح : ما يخلينا ندخل السينما
الهنوف واقفه يمب فجر وقالت : اصلا ما شي وقت
فجر : لييش بلا .. في وقت ...!
الهنوف : الفلم ساعتين علاما يخلص هم يكونون مخلصين قبل
فجر : ما يخصني بطااالعه
ضاري ياااي : تبين تطالعينه سيري بروووحج طالعيه ورجعي البيت مشي أوووكي
فجر طالعته وقالت : اسكت انت محد كلمك فاااهم
رهااام : اسكتي يالدبــــه
ضاري ضحك وقال : خليها عادي ياااهل نحن ما نهتم لكلام اليهاال
فجر : اسكت انت يااااهل
ضاري : والله أنا ما اصيح عشان فلم يهاااال يعرضونه بالسينما
الهنوف تضحك : اي والله تبي تشوووف رسوووم هع
نور وفيها الضحكه : خلاااص فجوور اتركيهم وتعالي نشووف الفساتين والملابس
فجر طالعت الهنوف وضاري وقالت : فارقو يلااا
ضاري ابتسم للهنوف وقال : تعالي هنوف بنروح نشرب كوفي
فجر طالعته وقالت : من حلااات الكوفي اللي تشربه الحين ان شالله بطنك يعورك
ضاري ضحك وقال : اسكتي أحسن لج يالبزر .. يلا الهنوف
فجر مقهووره وقالت لنور : والله هو اللي بيرفع لي ضغطي
نور وهي تضحك : هدي هدي يلا اشتري لك شي لعرس أخوكِ
فجر نمشي جنب نور : هذا مدري من بتتزوجه ..!!
نور ابتسمت : محد غيرك
فجر لوت بوزها : واااااااااع لا والله ..!
نور : ترا يقولون ما بعد العداوه الا المحبه ..
/
.
/
معضد طالع بدوور وهي تفتح عيووونها تقدم منها وابتسم لها
بدور بتعب : وين أنا ..؟
معضد : تعبتي ويبتج
بدور مستغربه : شو فيني ..؟
معضد ابتسم وقااال : بقووول لج بعدين ..!
بدور طالعته وقااالت : راااسي يعورني
معضد : توج نشيتي لااازم
بدور طالعت معضد وقااالت : حمدان وينه
معضد : ارتاحي الحين
بدور : وينه انزين ..؟
معضد : في البيت
بدور : حرااام بروووحه
معضد ابتسم وقااال : قلت لج لا تحاتين يلا ارتاحي
بدور تطالع صوب الباب شافت الدكتور يدخل
الدكتور مبتسم : ازيك يا بدوور ..؟؟
بدور : أحس عمري دااايخه دكتور
الدكتور : هو انتي بتفكري كتيييير .. يا بنتي مش كويس ليكي التفكير
بدور طالعت الدكتور وقااالت : شو فيني دكتووور ..؟؟
الدكتور : هوه انته من متى على الحاله دي
بدور : من فتررره احس بدوووخه بس اليوم جبدي لااعت وبس
الدكتور ابتسم : أصل هوه انتي حامل وفي الأسابيع الاولى كماااان
بدور مستغربه : شووه ..؟؟
الدكتور : مبروك يا بنتي ما تخفيش ..!! ح تصيري أم
بدور سكتت وما قالت شي
الدكتور : مــ وصيكيش على نفسك وانته كمان يا معضد لااازم بدوور تاكل كويس وتنام كويس وما تعصبش
معضد ابتسم : ان شالله دكتور
الدكتور ابتسم وقال وهويطلع : ح أجي بعد ساعه ان شاء الله ومعايه التقرير الطبي مع ورئة الخروج
معضد : شكرا دكتور
بدور طالعت معضد وسكتت
معضد تقدم عنها وابتسم : مبروووك
بدور : الله يبارك في حياتك
معضد حط يده على بطنها : لو ولد بنسميه نهيان ولو بنيه
بدور سبقته وهي تصيح : بنسميها ميرررره
معضد ابتسم لها وهو ماسك ويهها : الله لا يحرمني منج ولا من عيااالي
بدور ابتسمت له وهي تصيح من الفرحه : آآآمين يااارب
معضد : عاد مب تهلكين عمرج وتتعبين عمرج سمعتي
بدور : معضد أنا ...............
معضد حط يده على حلجها وقال : سكتي مابا اسمع ولا كلمه ... انتي مرتي وام عيالي
بدور ابتسمت له وهي تقوول : أمااانه تقول للدكتور الحين يرجعني بشوووف حمدااان
معضد : توج اليوم الصبح شايفتنه
بدور : ولو ..!
معضد ابتسم وقال : خلااص بروح بكلمه
/
.
/
بعد مرور خمسة سنوات
المكان : خور دبي
الأحد 12/12 / 2010 - 5 pm
بدور ويمبها الخدامه شايله ميررره وهي تمشي .. : حمدان امش بسرررعه
حمدان وراها ومعصب : ماما ما اقدر امشي بسرررعه
بدور : أنا حامل وامشي بسرررعه انت يااهل وجذا عاد الله يستر
حمدان ركض ووصل لأمه : ماما قلت لج مابا أمشي بسررررعه
بدور : ولييش ان شالله
حمدان : اتعب
بدور : يالله ...!!
حمدان ابتسم وهو يطالع الماي : ماما ييبي ولد
بدور تضحك : بيد رب العالمين حبيبي
حمدان : ميررره طفرت بي كله تشق دفاتري وكتبي
بدور تضحك : تستاهل ..
حمدان مستغرب : لييش ..؟
بدور : تراك يوم كنت صغير تشق اوراااقي مال الجامعه
حمدان ابتسم : بس انتي لا تخلين ميررروه
بدور : ان شالله حبيبي
حمدان : هذا بابا يا
معضد : مرحبآ
بدور : مرحبتين ..
معضد : تيين نتمشى ...؟
بدور : أوووكي
معضد : حمدان انت والخدامه سيرو ايلسو ع الزرع
حمدان طالع ابووه وقال : بمشي معاكم
معضد ابتسم وقااال : ايلس حبيبي وعقب بنمشيك
حمدان هز راسه : بس بيلس عشان احرس أختي ميررروه
ميررره تزاعج : ماما ماااااااااي
معضد ابتسم وقال : سكتي ماااااااااي
ميررره تضحك وتفتح حلجها وضروسها تبين : بابااااااااا
معضد : يلا أم حمدان ترا عيالج بيخبلون بي
بدور تضحك وتقول : الله يهديكم ..
/
.
/
نور : لأ مابي
شوق : وكلها وكلها غصب عنها هـ الحطبه من عرست ما تمتن
نور تضحك : أصلااا انتي غيرااانه مع الحمل صاير شكلك غلط هههههههه
شوق : اي بس احملي بضحك عليج
نور ابتسمت : عزوووز مو صح يوم أنا حملت كنت ضعيفووونه
عبدالعزيز ابتسم بسخريه وقاال : اي وايد ما شالله
شوق : لا والله اللي يسمع عاد وبعدين انتي يوم حملتي كنتي بألمانيا وقعدتي سنه كامله هناااك كيف نعرف شكلج
نواف وهو يقرا الكتاب : اسكتي شووووي
عبدالعزيز يضحك : مل منج
شوق تطالعه وتبوز : يلا باااي برجع البيت
نواف يقعدها ويقول : شوق امزززززح
شوق يلست وابتسمت : ادررري ههههه
الهنوف وهي تصور الزرع وكل شي
ضاري مقهور : هي انتي اش فيج ...؟؟
الهنوف : اصووور اش فيني يعني
ضاااري : ولييش تصورين هالكثر
الهنوف : عشان دراستي أكيييييد
ضاري : اعووذ بالله حتى بالطلعات تفكر بالدراسه
أم عبدالعزيز تطالع عبدالله وتقول : هذا الولد أخر سنه له بيذبحني
نواف : لييش خالتي ..؟؟
أم عبدالعزيز : كله هااايت ما يقعد بالبيت
نواف ابتسم : باجر بيكبر ويتعدل ان شالله
أم عبدالعزيز : آميين يارب
فارس ولد نور وعبدالعزيز ياااي ..
ضاري : يا حيييه قلب عمــــــــه يااا
فارس مبتسم وهو يمشي ع العشب شوي شوي
ضاري تقدم عنه وشاله رفع فوووق ما حس الا بفلااااش
التفت يطالع شو السالفه
الهنوف تضحك : واااااااااااااااو حددددددها عجيبه الصوره .. بدزها ع الايميل لفجووور
ضاري طالعها بتكبر وقااال : اصلااا وين تحصلون مثل صورتي .. المفروض ع الصووره أخد الف درهم
الهنوف : يالواثق انته
ضاري ابتسم وهو شايل فارس : ولد الأجانب انته .. يا حليووو
شوق : وولدي أنا ما تحبونه ..؟؟؟
أم عبدالعزيز تضحك : ما تشوفينه مع عبووود .. هالبدوووي
شوق : احسن له .. اش يبي يصير مثل فااارس ولد عبدالعزيز ههههه
/
.
/
ملاك : ياربي منك عزااااموووه
راشد : بلاااج على ولدي
ملاك : ما تطالعه كييف يضرب بنت أخوووي
راشد يضحك : برااايه انزين انتي اش لج
مايد : هي هي انتو اضربو بنتنا باااجر ما بنعطيكم اياااها
راشد : ما نباها نحن هذي أم عقوووص
اريج : لا تتكلمون على بنتي حرااام
ضي تمشي ببـــطـــــــــــئ وهي تضحك وتطالع ابوووها
مايد : قلب باباتها ضيوووه فديتج
ملاك : ضي حياااتي تعاالي لعموووه
عزام ركض وياه يلس بحضن أمه
ملاك : بسم الله الرحمن الرحيم ما صااارت غيررره هذي بعد
عزام : ماما
ملاك : شو حبيبي ..؟؟
عزام : ديوووه لا تحبيها تشرب مرضعه
ملاك تضحك : فديتك ماشالله عليك .. هي ضي بعدها صغيرووونه حبيبي لااازم ما نضربها ونحبها
مايد : رشوود تعال نتمشى
عزام طالع ابووه وقال : رشووود بيي وياااك
أمي فاطمه : استح ع ويهك يا ولد
خالو أمينه تضحك : حرااام توه صغير لا تنازعونه
ملاك : ماشي تتمشون .. أنا واريج بنتلاقى مع ربيعاتنا اليوم
راشد : هذي أختك من يوم استوت تتحكم بحياة الناس
مايد : الله يعينك الصراحه
/
.
/
مروان وهو شايل بنته أسوار ويلعبها
روان : بليل نروح لبيت أبووي أوووكي
مروان : ان شالله بس ذكريني
روان : وباجر نروح لبيت أمك
مروان : مو نروح نعيش عندهم بعد احسن
روان تضحك : حراام عليك
مروان : مليت من كثر ما اروح لهم
روان : تكسب اجررر مروااان
مروان ابتسم : ما علينا .. شيلي اسووارووه شوي
روان : لأأأ حرااام عليك ثقيله ما اقدر وأنا روحي بالشهر الثالث لاازم ما اشيل اشياء ثقيله
مروان : حرااام عليج اسوااار وين ثقيييله
روان : بالنسبه لك خفيفه .. أما أنا لأأأ
مروان ابتسم : اقوول الساعه بتصير سبع ما بتروحين لربيعاتج
روان تطالع الساعه : اي والله نسيتهم تصدق
مروان : صح شوق عايشه في الكويت هي الوحيده اللي انتقلت صح ..؟؟
روان : لأأأ نواف نقل شغله لهني لأن ابو نواف شريك مع ابو شوووق وبراك ما رضى ايي الامارات فقال نواف بيي
مروان : آهااا
روان : يلا عاد بروح صوب البنات
مروان : اتصلي بهن شوفي وينهن
روان : أوووكي دير بالك على اسوار
/
.
/
في طرف آخر من الحديقه بعد مرور دقائق
ملاك تطالع شوق : يالدبه اشتقنا لج
شوق ابتسمت : خلاااص ارتاحو بتم عندكم
روان تحط يدها على بطن بدور : اشك انج بتربين اليوم
بدور وهي هلكانه : هي والله حاسه أنا
نور : مو من شي .. من حمدااان
اريج تضحك : من يوم يومه يطفر بها المسكينه
ملاك : ما قلت لكم .............؟؟
روان مستغربه : قولي لنا نبي نعرف
ملاك : ريلي بيطرشونه حصل منحه
نور فتحت عيونها : لا تقوووولين
شوق : ما صدقنا على الله نتيمع ...!!
ملاك تضحك : أمزززح هههههه
بدور : وين عيالكم ..؟؟
شوق : عند عبووود أخوووي
نور تضحك : اي ترا ولدها بدوووي ههههه
شوق : اهون عن ولدج الأجنبي اللي باااجر مدري شو بيلبس لنا
نور : لا والله عشااانك حبيبي
اريج : بس بس .. انتو من أيااام الجامعه بعدكم تتضاربون
نور : اي والله .. وشوووقووه مستويه غجريه زياده
شوق بطلت عيونها : أنااا
روان : بس حشااا قلنا نتيمع ما قلنا نتضارب
شوق ابتسمت : اي صح سمعت انكم كل يمعه تتيمعون ببيت وحده صج ..؟؟
اريج : اي نتيمع بس انتي اللي كنتي ناقصه
شوق : ولا يهمكم من اليوم ورايح ان شالله بكون معاكم
ملاك ابتسمت وقالت : تصدقون بنااات والله تولهت لأيااام زمان
نور : وأنا بعد
اريج : اعتقدتو بيوووم نتم ربع جذي ولا نفترق
شوق : ان شالله ما نفترق
روان : آمييين ونتم صديقآت للأبد
تمت
أسمى علاقة بالكون ..
زميل يجلس بجوارك في أول يوم دراسي لك ..
بعد ذلك يتحول إلى صديق يعاونك
وبعدها إلى رفيق روووح
هنآ تجتمع أسمى معآني الصدآقه ..
وها قد اجتمعن من بعد ظروف قاسية ..!
من بعد قهر دنيآ
ليعم اللون الوردي حياة تلك النساء
نعم , اجتمعن ولكن هنالك طرف آخر سيفارقهن ..
حان الوقت لكي نفارقهن ونودعهن ..
إلى اللقاء
أأنكر دمع عيني إن تداعى ..؟ وأصطنع ابتساماتي اصطناعا
نعم إني حــــزينٌ يا حـــبيبي .. فأيــام اللـقاء مـــضت سراعا
وها هي ساعة التـوديع حلّت .. وربّان النوى نشر الشــراعا ..
.....
الــــورد لـ روح كل من خط على صفحتي
12 / 12 / 2010
يتيمة زايد
تجميع ورد الجوري
اللهم لك الحمد حتى ترضى وإذا رضيت وبعد الرضى ,,, اضف تعليقك