رواية شقائق النعمان -66

رواية شقائق النعمان -66

عنده وهو ما يدري عن احد من شدة حرارته ما يرفع راسه الشربه والعلاج بالعافيه ياخذها دق بابها بعد صلاة العصر قامت فتحته وكان عمها يبي يشوفه حبت راسه بخجل وبعدت عن الباب وهي ترد عليه الحمدلله بخير ..احسن الحين شوي

دخل ابو خالد وشاف انه نايم وحرارته اخف من الليل ناظرها قبل ما يخرج : تعالي يابوك تقهوي معنا هو نايم الحين ..خرجت معه وكانت ام خالد جالسه فالصاله وعندها القهوه وهي قبل شوي خارجه من عندها ..اخذت الدله من عمتها وهي صبت لهم القهوه واخذت فنجالها وجلست بعد عمتها وام خالد تكلم رجالها

ام خالد: كلم(ن) البنات الحين بيجن يشوفن اخوهن معني قايلت(ن) لهن لا يجن الحين يزعجونه بعيالهن الله يهديهم

ابو خالد: خليهن يجن يسلن منى شوي بسوليفهن وتحصل احد تسولف معه بدل الشيبان الي معها ولدك مهو بضاره شي بيقوم مثل الحصان

منى : بحيا وصوت منخفض: لا يبه البركه فيك انت وامي وين شيبان الله يحفظكم

ابو خالد : وهو يضحك : راحت علينا يبوك والي بسنك الحين معد يبون سوليفنا

منى : وهي تقوم تصب فنجانه : اذا سوليفكم يبه ما تعجبنا ضيعنا علومنا و اصولنا اجل

ام خالد: خلك انتي عروس وتبين تقهوينا

منى: وهي تصب لها وبخجل وضحكه بصوتها وبدت تفك شوي عن نفسها: اذا عروس مالها يدين يعني ..ونسيت عمرها وهي تقول بمرح ...ترى انقهر من الي تجي وترتز وتبي الكل يخدمها لانها عروس ..وخجلت بعد كلامها وهي تسمع ضحكة عمها وهو يقول ...والنعم والله فبنت ناصر

ام خالد: وهي تجلسها جنبها وماسكه يدها :تربيت ام محمد الحشيمه ماعليها بزود (هي تنادي ام احمد بام محمد حتى بعد معرفتها انها مهي امه )

جلس خالد ثلاث ايام وهو تعبان لكن اليوم الثالث كان يقدر يقوم ويصلي وجوه اخوانه بالمجلس وهم يعلقون عليه الي فشلهم معرس وتعبان وهو داخل عليهم لابس بطانيه باكمام ..بعد ما خرجوا اخوانه دخل وحصل امه وهي جالسه عند التلفزيون وتسمع محاضره بقناة البدايه جلس عندها وهو ينسدح ويحط راسه على رجولها

ام خالد: وش فيك يمه عسى ما نت بتعبان وتتحسس راسه

خالد:بصوت مبحوح :لا الحمدلله احسن الحين وهو يناظر الصاله وين منى

ام خالد: دخلت المطبخ تقول بتسوي عصير الله يهديها ولا كني قايلت(ن) لها ما بيها تسوي شي يافشلتي فهلها ندخلها المطبخ وهي بعدها ما كملت اسبوع

خالد: ضحك بصوت متعب ومبحوح من اثر الالتهاب وهو يبوس يد امه :يمه متفشله على سوات عصير ..(وهو يغمض عيونه بتعب بلاك ماتدرين يمه انها ماتدخل المطبخ وماتعرف شي )

في المطبخ

منى: وهي بصوت ضاحك والسماعه باذنها والجوال مثبته فبنطلونها :مي بذبحك وشوهك قبل عرسك لو ما طلع زين

مي : وهي تضحك : يابنت سوي مثل ماقلت بيطلع يهبل خلصيني بس نص ساعه بسوات عصير عيدي علي الي حطتيه قبل تشغلين الخلاط

منى: ثلج ونعناع ..وهي تاخذ اليمون من يد الشغاله الي عصرته ..و اهو جالسه اصفي عليه اليمون

مي: لاتحطين سكر كثير فيه ولا حلي لرجالك بعسل

منى: بقرف : لا ماني حاطه عسل مسويه لنا كلنا بشيله له هو يحطه ولا يحط سكر ..وتقفله وتشغل الخلاط ..الا تعالي انا كيف اعطيه شي بارد وحلقه ملتهب حق الله ذبحتني امه

مي : ضحكت بصوت عالي من خبال اختها : مهي بذابحتك لا يشربه على طول بيكون دافي شوي

منى: بتناحه :اهاااا خلاص مشكورين ياعسل نردها لك باااي .. وتطلب من الشغاله كاسات العصير وصبت فيها العصير وبتسوي فيها فن جات بتقطع اليمون تزين فيه الكاسه مع ورق نعناع صغير ما عرفت توزن الحجم الصغير رفعت نظرها لشغاله ..تعالي قطعي اليمون حلقه صغير ..لمن شافتها مافهمت قطعيه كذا دائره بس متساوي.. خلصت وشالت الكاسات دخلت عليهم وهو عند امه

خالد: يناظرها وهو مبتسم على شكلها وهي لابسه فستان بكم طويل واسع وفوق الركبه رمادي مع جينز اسود ضيق وشعرها المصبوغ هايليت بخصل ثلجي نازل على كتوفها والقصه مثبته على الجنب بورده صغيره رمادي واسود

منى: حطت العصير على الطاوله :ماحليته يمه كم احطلك سكر

ام خالد: خليه كل واحد يحط لعمره يمه الي يبيه جلسي بس

منى: عادي يمه وش فيها ..خالد احليه لك بعسل ولا سكر

خالد: تعدل بجلسته : لا تحطين عسل ماحبه

ام خالد: لا حليه له بعسل

خالد: يمه الحين من الي بيشربه انا ولا انتِ ماحب العسل

ام خالد: ايه الشي الزين ماتبيه خله يعالج لك حلقك

منى: تناظرهم وتضحك بصوت منخفض على خناق امه له لانها هي بعد ما تحبه وامها تجبرها تاخذه اذا تعبت

خالد :ايه ضحكي لكن بتشربينه مثلي بالعسل اذا بشربه

منى: لا ماحبه وانا ماني تعبانه الي اخذه ..وبدلع ..وانا اسمع كلام امي يوم اكون تعبانه واخذه ..

خالد : وهو يضحك : ايه واضح تسمعين الكلام وانتِ يجبرونك عليه

منى: تجلس قريب منه وبيدها كاسته وكاستها : المهم اخذه ماقول لا ..وتعطيه كاسته اشربه اجل مر بدون سكر اذا ماتبي عسل

خالد: اخذه منها وضحكه بكلامه المبحوح: يا مقواكن يالنسوان

ام خالد: وهي تضحك : يامقوانا الي نبي مصلحتك ماتبي تحليه بعسل اشربه مر ..وتشيل عنه السكر

خالد: جلس يضحك هو منى على حركة امه

منى: شربت من عصيرها وهي واثقه انه زين ذاقته قبل تجيبه وحلت كاستها ميلت تكلمه بهمس : الحين ليه لابس بطنيتي

خالد: يبتسم ويناظرها ويهمس: مدري من الي امس تقول البسها تدفيك لا تبرد

منى: بتحدي : امس مهو اليوم انت طيب خلاص كلمت مي يشترون وحده لك بس ترى اسود مهي ازرق عشان ما تتلخبط

خالد: يحرك راسه ومثل الصغار: مابي على كيفك انتِ ازرق وانا لا خلاص خليها الاسود لك انا هذى عاجبتني

منى:ارتفع صوتها وهي تقول : ياااسلام ..وخجلت من امه الي ناظرتهم وسكتت

خالد: ضحك وهو يناظر امه : يمه ترى بكره برجع الفندق الحمدلله مافيني غير العافيه

ام خالد: وهي تبتسم على بالها منى فرحانه انهم بيكنون لوحدهم : سوي الي تبيه يمه بس انتبه لعمرك

منى: من قهرها يوم صدت امه تشوف التلفزيون قرصته من قهرها منه وهي تهمس بقهر وخجل وبدون ماتحس بالي تقوله :يالدب فشلتني فيها الحين تقول ماتبي تجلس عندنا ولا مستخفه تبي تكون معه لوحدها

خالد :ضحك ضحك لين دمعت عيونه وقام يكح وهي ولع وجها وصار الوان من ضحكه

ثاني يوم وهم خارجين من عند اهله بعد الغداء

منى:وهي تترجاه وبزعل وماسكه عمرها عن تبكي :تكفى خالد حدي مشتاقه ابي اشوف امي والبنات

خالد:وصوته بعده فيه بحه بس خفيفه : الحين الي يسمعك يقول قايل لا قلت لك في الليل اوديك احد يروح قبل العصر لناس

منى: بزعل وهي تربع يدينها حولينها :هذول اهلي باي وقت ادخل عليهم ..

خالد: وهو يناظر جهتها وبحنيه بصوته :الحين بتسوين زعله من لا شي

منى: تلف عليه وهي الدمعه بعينها ونبرة صوتها فيها حزن:ثلاث ايام ماشوفت اهلي

خالد:يوم لمح دمعتها :خلاص كلميهم اذا مهم بنايمين وديتك

منى: امي ماتنام هالوقت

خالد:سكت عنها مايبيها تدخل وهي تبكي وصلها بيتهم وقبل تنزل : ترى محنا مطولين نصلي العصر ونمشي

منى: شهقت بصوت وتناظر ساعة السياره:ثلث ساعه بس

خالد:بضحكه: اقول نزلي بس لا تفر دموعك علي الحين وتدخلين ويضنوني ضاربك

منى:نزلت ولا ردت عليه وهي صدق من يوم شافت بيتهم وهي مخنوقه وماسكه بكاها دخل معها وفتحت له المجلس ودخلت الصاله وفعلا حصلت امها وراحت تركض لها وهي تلمها

ام احمد: تسلم عليها منهو جايبك وش فيك تبكين

منى: وهي مطوقتها ودمعتها على خدها : خالد امي مشتاقه لك بموت من شوقي

محمد:نازل ولابس ثوبه ينتظر ياذن ويخرج : ياهلا والله أي ريح جابت العروس علينا ..ويوصلها ويسلم عليها ..اخبارك ..وين خالد

منى:تمسح دموعها : الحمدلله بخير ..فالمجلس

محمد: مسح دمعتها الي نزلت وبقلق وهو فتقدها كثير فالبيت :مزعلك شي

منى: ارتمت عليه وتشهق :اشتقتلكم

محمد: يسلم على راسها :دلوعه ترى حتا حنا ولهنا عليك ..وبضحكه ..بس صدق ارتاحت اذونا من ازعاجك

منى: بعدت عنه وهي ادفه :دب منتفخ

محمد: هههههه خليني اشوف الي ارعبه العرس وسخن معه ..وراح عنها

ام احمد: تجلس وتجلسها معها :اخبارك يمه عساك بخير ورجالك كيف سوى الحين

منى: وهي تفصخ شيلتها وبعباتها : طيب ..وتميل على ذراع امها ونزلت دمعتها..يازين بيتنا وريحته ..وبصوت معاتب ..ليه ماجيتيني اشوفك وانا كل يوم اقلك تعالي

ام احمد: تلف يدها على ظهرها وتمسح عليه :ياقلبي تراني انتفض كل يوم ابي شوفتك بس اصبر عمري انتي الحين فبيتك وعند اهلك الثانين وانتي تكلميني كل شوي ..قومي روحي شوفي جدتك اكيد صحت الحين

جلست مع اهلها وقبل المغرب قبل تمشي

منى: حماده قله بس ينتظر شوي

مي : وش تبين انا اجيبه لك

منى: ابي اشيل لابتوبي معي

مي: منى وين تشيلينه ورجالك تعبان واي وقت الي بتفتحينه خلاص خليه هنا عن تعرف خالتي هي من البدايه مارضيت تاخذينه

منى: يوم يكون نايم بدل مجلس طفشانه اشغله وتروح وتاخذه وخرجت وهو في السياره

ّّّ

ملاك كانت منسدحه وراسها فحجر الجده وهي تمسح على شعرها وتسولف عليها ودخل محمد وجلس وهو يسمع سوليف جدته

الجده : يازينه اول كل الجيران تعرف بعضها وقلوبهم على بعض مهو الحين الجار ما يعرف جاره

ام احمد: حتى الاهل معد يعرفون بعضهم مثل قبل مشغلتهم الدنيا عن بعض

الجده: الله يكفينا شرها وش حلاتنا يوم كنا نسير (نزور)على الي حولنا كل وحده معها خضرتها تقطفها وتنجزها لغداها لاحد كان يعرف السكر ولا الضغط ولا الامراض الي منتشره وش كان زينا وحنا نفطر التمر والخبيز والسمن والعسل و الشمس تدخل علينا بحوشتنا مهو الحين هالتكيف كسر عظامنا وبيوت مسكره علينا مندري ليل من نهار اذا ما خرجنا وسمعنا الاذان

ملاك: وهي شوي وتنام مع مسحتها لشعرها ذكرتها بجدتها لفت راسها تشوف الجده : يمه انتِ كنت تعرفين جدتي قبل

الجده: منعرفهم زين بس جدتك ابوها حرمته الثانيه نعرفها من فخذتنا وتمسك خدها وتناظر عيونها سبحان الله لا جدتك ولا امك اخذت عيون امها ضيعت وش اسمها كان صعيب

ملاك : جلست وهي قلبها ينتفض بين ضلوعها :يمه انتي قد شفتي جدتي ام امي

الجده : وهي تحاول تذكر : ايه كنت وقتها صغيره يوم كنا نجتمع حنا والبنيات ونروح نبي نشوفها كانت غريبه علينا وقتها ماكملت الست سنين يوم جابها جدك معه وهو يشتغل بتوصيل البضايع الكل محد كان يبيها لانها غريبه و ماكملت السنه الا وهي جايبه جدتك وتموت الكل حزن عليها الصغيرو الكبير يافيها طيبه حتى وهي متفهم لهجتنا ماعمرها قصرت عن احد وجدتك ربتها عمتك وزوجتها ولدها وحيدها

ملاك: نزلت دموعها وهي تناظر محمد وتحب راس جدتها و يدها : متدرين يمه وش كثر ريحتيني الله يريحك بجنات نعيمه

مي: دخلت وفيدها زبديه صغيره وهي حاطه قناع على وجها : خالتي ماتبين احطلك انتِ و ملاك

الجده : انتى وش مسويه بعمرك

محمد: يبتسم على شكلها وعيونه عند ملاك الي قامت وجات عنده وهي تسند راسها على كتفه وتقبل ذراعه

مي : يمه وش رايك احطلك منه يخلي وجهك وش زينه يبرق

الجده : قومي عني وش ابيبه تبين وجهك وش زينه توضي واحسني الوضؤ يمك هو نورك مهو الخبيص الي تحطينه

ام احمد:وهي تضحك بداخلها على هدت الجده على مي الي خجلتها : خالتي الله يهديك هذا ينعم لها بشرتها هي بعدها صغيره وتحتاج تعتني فيها ..وعشان تشيل الخجل من مي وبضحكه قالتها ..تراني بحطه اذا بتحطين معي ..وبجيبلك حنتك احني شعرك بها

ّّّ

قبل اذان العشاء

منى: بعد ما صلت وغيرت ولبست برموده مع بدي ماسك فالرقبه وبدون اكمام واسع ورفعت شعرها بكلبس وخصل خفيفه ع الوجه وقفت عند باب الغرفه شافته وهو جالس وعلى رجوله الاب بتوب وبضحكه رجعت الغرفه وخرجت جهازها وشالته معها وخرجت الصاله وبدون ماتكلمه جلست على كنبه منفرده وشغلته وهي عارفه ان عينه عليها

خالد: من لحظة خروجها وهو يشوف وش تسوي لا وبعد تفتحه ياسلام : وش تسوين

منى : وش شايف انت شغال النت عندك

خالد:مصدقه عمرها هي بدل ماتسولف معي تبي نت : لا مهو شغال وش تبين فيه

منى:وبكل عفيويه : تقوم وتجيب الكونكت من شنطتها وتخرج وتشبكه : ياليتني اخذت جهازي معي عند اهلك كان تسليت فالليل و الكل نايم بدل ما انا طفشانه

خالد: يحط جهازه على الطاوله ويناظرها وهو متكي على ذراعه: الحين انتِ من صدقك بدل تسولفين على راسي بتدخلين نت وطنشيني

منى: وهي ماخذتها عادي : ايه وش فيها اسولف وانا افرفر فيه فيها شي منت جالس على جهازك بعد ...ترفع نظرها له وهي تقرصه بعينها ..فيه نت تضحك علي يعني

خالد: ليه تخذين كل شي تحدي

منى: بستنكار:ما تحديتك ...! متى تحديتك ؟؟

خالد: طنشها ورجع لجهازه

منى: خالد

خالد:بدون مايناظرها :ممم

منى: خالد اكلمك تراني

خالد: وبدون ما يناظرها ادري انك تكلميني وش تبين

منى: سكرت جهازها وقفت وسحبت جهازه من على رجوله ولصغره بسرعه كان بين يدينها : يوم اكلمك لا ترد علي كذا وما تناظرني انا ماطنشتك يوم كلمتني

خالد: يسحبه من يدها وبجديه : عيب عليك تسحبينه كذا وكل شي بتخذينه تحدي ولا مثل ما اسوي تسوين كذا بنتعب بحياتنا بدل ما تشغلين جهازك كان جيتي جلستي عندي والشي نشوفه مع بعض

منى: خنقتها العبره من كلامه ونزلت راسها وهو يكلمها وهمست : انا ماني كذا

خالد: يجلسها عنده :ادري انك كل شي عندك بعفويه وعادي ابي نبدأ حياتنا مهو بتحدي نتفاهم على أي شي حتى لو تافه احيان الاشياء التافه الي نتهاون فيها تجرحنا من بعض يعني انتِ الحين يوم شفتيني فاتح الجهاز وماعجبك لو طلبتي مني اقفله ونسولف كان قفلته

منى:وهي صدق الدمعه بعينها محبوسه وتبرق : مازعلت انك فاتحه فرحت قلت اتصفح انا بعد عمري ما جلست يومين بدون ادخل نت

خالد: يمسح على شعرها و يحط جهازه على رجولها خذى تصفحي مثل ماتبين بس لا تقفلين الصفحه الي فاتحها احمل فلم بشوفه

منى:زعلها الي فكر فيها كذا بزعل : ما ابي شي خلاص وكتفت يدينها

خالد: لف يده على كتفها وقربها منه وهو يكلمها عند اذنها : الحين انا اكلمك لمصلحتنا وتزعلين اكيد تفكيري وتفكيرك مهو واحد ويوم انتي قلتي الي اتفكيرن فيه وانا الي افكر فيه وضحت الصوره صح ولا انا غلطان يعني لو ماقلنا الشي الي بداخلنا شلون بنفهم بعض واحنا كل واحد من بيت له افكاره وطريقته الي عاش عليها مع اهله انتي تشوفينه عادي لانه اهلك فاهمين عليك

منى: حست بدفئ يده الي على كتفها وهي منزله نظرها ورعشه هزت جسمها على خفيف همست: اسفه ماكان قصدي

خالد: وهو يرفع وجها : ممكن طلب صغير ما ابي اسمع الاسف منك كثير على أي شي يصير خلي الكلمه يوم يكون شي يستاهل تتأسفين عليه عشان يكون لها قيمتها ونشعر فيها لا تصير ما سخه ولا لاها معني مجرد كلمه نقولها تفنني بعتذارك مثل ما تبين بغير هـ الكلمه و يلف يدينه حولها ويحضنها و يبوس خدها ويبعدها عنه هذا اعتذاري دورك ابي اعتذار منك

منى: الخجل ذبحها وهي تدرو لها حل ضحكت بداخلها وبلعت ضحتها لا تظهر وهي مبتسمه : غمض عيونك طيب ..غمض وقامت من عنده

خالد: على وقفتها مسكها مع يدها وهو مغمض على وين اعتذري ..

منى: بعتذر بس انتظر ..

وفك يدها وبعدت عنه ..

منى : وبصوت ضاحك ..الشرده نص المرجله قوم صلي بلا مسخره ..

خالد: وهو مفتح عيونه صدق خبله وبتهبله بحركاتها ورسلته بوسه فالهوء وهي شارده يوم تحرك بيمسكها

دخلت غرفتها وهو خلفها يوم شافته قريب منها وما يمديها تدخل الحمام وتسكره لفت ونقزت فوق السرير وهي واقفه بطولها وتصرخ ..

منى : اعتذرت خلاص ياويلك تقرب

ويوم قرب وهو يضحك ..

منى : بعد لا شوتك وتحرك رجولها تبعده عنها ..

ماقدر يمسك عمره من الضحك وهي تنط على السرير وتشوت تبي تبعده حاول يمسك رجلها ماقدر وهو يضحك سحب المفرش وطاحت على السرير..ومن عفرتتتها لفت يوم بيمسكها ونطت بسرعه وخرجت الصاله جلس مكانه مره يضحك مره يكح من صدره

منى: وهي تاخذ نفس وقلبها ينبض بسرعه وتضحك يوم شافته ما لحقها وسمعت كحته زادت قربت وهي تبي تشوفه من بعيد مع الباب الا هو فوجها ارعبها صدق وصرخت صرخه قويه من قلبها

خالد: سكر فمها وهو يضحك : بس يالخبله فضحتينا الامن لو سمعك بيجي يضن فيك شي ..ويبعد عنها ويجلس تعبه صدره ورجع كح اكثر من مره خلف بعض

منى : اعطته موية الصحه الي على الطاوله وهي تجلس : ارعبتني بغيت توقف قلبي لو وقف ماني مخليه اهلي يسامحونك

خالد: ضحك وهو يرش عليها شي بسيط من المويه ويوقف ويميل عليها وهو منحني :هذا اذا حصلوني وقتها يحاسبوني بيكون عقلي راح معك وجسد بدون عقل وش يفيد..ويوقف يوم شاف وجها شلون تغير ..بنزل اصلي واشتري لنا أي شي تبين شي محدد اجيبه معي

منى: نطت واقفه فيها خرجه وماتخرج معه : بروح معك ..

خالد: وين تروحين معي بصلي فالمسجد هنا فالفندق خلاص خليك ماني بمطول ويقرب منها يبوس خدها تبين شي

منى: ايسكريم

خالد: رفع نظره لها ويقرصها بعيونه : شوف النذاله تبين تكلينه قدامي وانا تعبان

منى : خلاص ماابي غير ..وتعد على اصابعها ..ليز ودريتوز و جلكسي بالمكسرات والويفر والساده ووو

خالد: هههههههه فيه بعد يا بابا ماتبين حلاو ام العود

منى: وهي تبعد عنه : مانقول لا جيب معك

خالد: صدق ما ينعرف لك الحين انا قلت بخرج من الفندق بجيب شي من هنا .. باس يدها وخذ المفتاح وخرج

منى: صلت العشاء وكلمت اريج يوم شافت مسج منها وهي تكلمها كانت جالسه فالصاله و على رجولها الاب توب خالد فتحت المفضله بالنت وهي تتصفح المنتديات الي يدخلها بدت عيونها تلف وتتنقل من واحد لثاني وهي مهي مصدقه الي تشوفه قفلت من اريج لانها معد هي قادره تركز على الكلام معها صغرت الصفحه ورجعت تشوف الجهاز وتبحث فيه مهي مصدقه ليه طيب ليه .. رفعت نظرها لصوت الباب

خالد:دخل مبتسم والاكياس بيده :السلام على الحلوين الي يتعبون بابا يجيب لهم حلاوه ويسحب حلاوه مصاص بقلب احمر ويمدها لها..وش فيك؟

منى: ظلت تناظره وهي مكانها وعينها عليه ولا رمشت وصرخت وهي تنط عنده:ليه ماقلتلي ليه تخبي علي ليه وتخنقه وهي تصرخ لا وتضحك علي يوم احكيك عنها هااااه

خالد: ضحك بصوت وهو يبعد يدينها عن حلقه :وش الي شفته هااه

منى: قربت من وجهه وهي تهمس :نجم سهيل

خالد: ناظرها وضحك بصوت عالي وهو يتقدم لجهازه : يالمصيبه محد قدر يعرف وشلون عرفتي

منى : نطت قبله وسحبت الجهاز وتوقف على الكنب وهي تصرخ : منت ماخذه بكمل ..وصارت تنط وهي تصرخ وهي مستانسه من صدق ... وااااو خالد كاتب واااو ماني مصدقه

خالد: وبجديه بصوته وهو مبتسم ويمسكها ويكتفها تجلس ويسحب الجهاز من يدها : بس فضحتيني ..مهي لي

منى: كذاب وربي لك شوف عيونك شلون تضحك...وضحكت ..بخبر امي الي تهزئني عندها

خالد: سكر فمها وبجديه وملامح جاده : منى سمعيني زين ياويلك احد يعرف

منى: ابعدت يده وبجديه بصوتها: وش فيها اذا عرفوا عيب

خالد:فيها كلام كثير ما حب اجيب لنفسي الكلام والنظره المستهزئه منهم انتي عشانك بنت تنظرين لها شي حلو لكن الشباب بيشفونه نقص فيني الي اكتب

منى:باست خده بقوه وبمرح : ماني مصدقه ..وبجديه وهي تلتفت له ...بذبحك لو خليته يكلمها يوم العرس حرام عليك تراني كرهتها الحماره جالسه تلعب على ولد عمها واخو طليقها كله عشان تحرق قلوبهم ..وتلف يدها على ذراعه احكيلي بسرعه معد فيني انطر كل الي تبي تكتبه

خالد: ضحك وبعثر لها شعرها :ههههه صدق انك خبله انتي وش اسمك الحين هناك ليكون رئيسه الحزب في المضاربه الي مسويتها

منى:حطت يدينها على فمها وهي تبعد عنه وصدق الغيره اكلت لها دماغها كله وبجديه بصوتها :خالد من اليوم انت تكتب وانا انزل وارد على البنات ماعندي رجال يرد عليهم حلوه ذي اخليك ترد عليهم وانا اتفرج عليك

خالد: ههههههه ياغياره ..ومعد فيه يقاوم عمره عنها باسها بحب عميق

(حكاية خالد مع الكتابه : اول ماتعرف على قراءة القصص وهو في المرحله المتوسطه في السنه الثالثه حين كان يشاهد اخته الجامعيه ومعها كتاب يصاحبها باستمرار ولا تنتهي منه وكل ما سئلها عنه قالت له كتاب يوم حب يعرف وش الكتاب الي ما تنتهي منه دخل غرفتها وهي في الجامعه بحث عنه بكل مكان وحصله وجد مجموعه اخرى منه اخذ وحد من القصص(روايات عبير) التي كانت تغلفها بتجليد سميك وتنقله من روايه الى اخري حين تريد قرائتها حتى لا تلفت انتباه احد ان بيدها روايه وبسبب الصور التي عليها كان بمكان والدتها ان تهزئها واخذ واحده وحين انهاها اعادها واخذ اخري واستمر يقرأ معها دون علمها عشق القصص واصبح يبحث هو بنفسه عن القصص وحين يسأل من معه هل احد يقرأ دون ان يخبرهم كانت تنطلق منهم تعليقات ساخره واقلها انهم مهم بنات و اصبح يعشق القصص ويقتني لكتاب بارزين ولا يهمه حين يكون في البيت وبيده روايه لكاتب كبير لانه اخذ طريقة اخته بتغليف الكتاب وحين سافر بدأ بالكتابه في روايات قصيره وطويله ولكن كل من معه لم يلاحظ ذلك )

ّّّ

قبل الزواج بيوم منى طلبت من خالد تروح بيت اهلها وتجلس معهم طول اليوم وتنام عندهم وافق لها وهو نشغل مع محمد يساعده هو وسعد لان سعد مسوي عشاء الرجال قبل يوم عرسه بليله في خيام في مخيم كبير اعده ليوم العرس وكان عشاء قمه في الروعه مابين القاء قصائد شعريه لأحد الشعراء من قبيلتهم الي حضر العرس وطرب ورمي بارود ستانس كل من حضر للعرس وسعوا صدورهم بعيد عن ضوضأ المدينه وقصور الافراح ورسمياتها

اليوم الثاني ويوم العرس كان خفيف بالنسبه للمعرس وابو محمد لانه مافيه تعب ومعازيم غير اهليتهم

عند الحريم

مريم :ابتسمت بحياء لمنى الي جالسه تتغزل فيها

منى: ياربي فديتك مي تهبلين انتي وخدودك يابنت وجهك صاير معد فيه لون من كثر هـ الحمار و انتي ما خرجتي للعالم

مي: بنعومه وخجل :منى تكفين بس حدي متوتره مدري شلون تحملتي يومها

منى: بضحك:هههههه لا مسمح لك تقارنين بينا يختي كل ما اذكر شكلي وشكلك الحين احس اني مخبوله مخرجينها من مستشفي

ملاك : تضحك : وانتِ الصادقه مهو أي مستشفى من شهار (مستشفى للامراض النفسيه)

منى: بحده وضحك: مالمجنون غيرك انتِ ولدك يالدب

مي: بتوتر: ملاك كلمتي خالتي ومحمد

منى: يابختك بتسافرين على طول مهو مثلي بجلس لين اخلص اوراق التقديم للبعثه

مي: وهي تفرك بيدها والتوتر وضح بصوتها : بالعكس تمنيت اجلس هنا على الأقل اسبوع وبعدين اسافر بس سعد مصر حتى عرس الرجال قدمه عشان يومها ما يكون عنده شي يشغله

ملاك : منى شوفي الطريق لعمي ومحمد هم عند الباب ..وتكلم مي ..مي قلبي لا تتوترين باين الرجفه بيدك ..

مي:ملاك تاكدي من لبسي جاهز الي بروح فيه

ملاك تقوم وتفتح الدولاب : ايه شوفيه وشنطتك في السياره من اول بس ماما تقول بلاشي تشيلي الذهب بتاخذه معها بس خذى كسسواراتك الي رتبناها

ام احمد: دخلت وهي تسحب رجولها بثقل مهي قادره تقاوم انها ما تبكي هذى مي انيستها فالبيت هذى صوره منها تشوف نفسها فيها بحياها و رزانتها ..قتربت منها ويوم حضنتها ماقدرت ما تبكي وهي تشد من احتضانها باستها وهي تحصنها مع جريان الدم بعروقها باستها وهمست والدمعه على خدها وتمسح دمعة مي : الله يوفقك ياقلبي ويسعدك ..وتحط يدها على قلب مي وهي تهمس تدعي بصوت.. يارب مع كل نبضه من نبضها ازدها ايمانً وسعاده

مي :وتحاول تتماسك ماتبكي وتعدم وجها وتبوس يد خالتها وراسها وهمست بنبره باكيه :ادعيلي خالتي وتقرب من اذنها وتهمس حاسه قلبي بيوقف من خفقاته

ام احمد : تحضنها وتهمس فاذنها : لا تخافين ومثل ما قلت لك لا تخلين خجلك يدمر حياتك معه ولا تنسين انه رضى ربك منى رضى رجالك بدون ما تخلفين الله وحكمي عقلك مثل ما عودتيني قبل كل شي تسوينه وباستها على دخلت ابو محمد

ابو محمد: وقف مكانه وهو يذكر الله عليها قرب منها وهي تحب يده لف يدينه حولها ودمعت عينه ماقدر ينطق حرف واحد لها ما قدر هذى ريحة الغاليه شبيهت امها الي كل ما شافها كانه يشوفها قدامه مسح دمعته بغترته قبل يبعد عنها ويحب راسها وجتر الصوت بصعوبه ليظهره مهتز : الله يبارك لك يابوك ويوفقك ليجلس على الكرسي ويغطي وجهه بغترته ويبكي لم يحتمل فراقها لا يحتمل ان تغيب عنه مي غاليه زود عن خوانها الي عمره ما بي فرق بينهم بمعاملته

مي يوم شافت دموع ابوها بكيت من قلبها بصوت وهي ماسكه محمد

ام احمد : تدري ان ابو محمد يعز مي من معزته لامها ولشبها الغيره بقلبها منها عمره ما اظهرتها شي طبيعي تغار حتى لو وهي ميته هي بشر ولو نزعت الغيره من قلوب النساء لكان اولى ان تنزع من قلب ام المؤمنين رضوان ربي عليها السيده عائشه حين كانت تغار من خديجه رضي الله عنها وهي ميته

اقتربت منه وهي تربت على كتفه وتبتلع دموعها :ابو محمد اذكر ربك صيحت البنت وبتعدم زينتها ..يمه مي خلاص لا تخربين مكياجك وتظهرين لناس وعيونك محمره وتاخذ منديل وتبعدها عن محمد الي يربت على ظهرها و تشوف مكياجها وحمدت ربها انه كله ضد الماء ولا الدموع الي معبيه خدها كان غسلته ...عطوني مويه لها ..وجلستها وهي ترقيها وتنفث عليها يوم شافت ارتعاشها

منى وملاك عطوها ظهرهم وهم يبكون بس ما يبونها تشوفهم

ابو محمد : بعد ما تماسك وخرج الى كان كاتمه بدمعته الي نزلت وقف بعد ما مسح دموعه وقرب منها ويمسكها مع يدها : قومي يبه خلينا نتصور ويدخل رجالك طيارتك ما بقي عليها كثير

تصورت معهم وخرجت خالتها والبنات ويدخل سعد الي قبل ما يرفع نظره فيها كان يحصنها من نظرته خاف يعجب فيها ويدخل الشيطان بنظرته واخذ يردد

"توكلت على الحي الذي لا يموت والحمدلله الذي لم يتخذ ولداً ولم يكن له شريك في الملك اللهم احفها من جميع جوانبها و جنب الشيطان عنا و احمنا بحماك لا اله الا انت عليك توكنا وبك نبدأ " رفع نظره وهو يسمي لحسن ما رآى اقترب منها وقبل جبينها وهي متكحله بحيائها ولم ترفع عينيها اقترب من اذنها وهو يهمس بارك الله لي ولكِ وجمع بيننا بخير ياقلبي

مي : من دخوله عليها لا تعلم ماذا حدث لها استكانت رجفتها وخوفها استكان كل عضو بها وبعد سماعها لعذب كلامه سري بحسدها كسريان الماء ليطفي ضماء العطشان وقفت بينه هو وابيها ولتقطت لها صوره معهم ومحمد يقف بجانب سعد

ابو محمد:يقبل جبينها قبل خروجه ويخرج هو محمد

مي رفعت نظرها يوم كان يقولها بضحكه وهو يهمس شكلي صفر على اليمين واليسار بجانبك بتسمت وهمست :بسم الله عليك الحال من بعضه

سعد:بضحكه وهو يمسك يدها ويهمس : وش جاب الفرجال للمرسام بدونها هو ولا شي

مي ضحكت بصوت منخفض وهي تتذكر منى واسمائها له وهمست :وانت كل تشبيهاتك رياضيات ماغلطت منى يوم تلعب باسمك بجوالي

سعد : بضحك : هي وينها ماتبارك لي ياني حاقد عليها لو كان عرسها بعدنا كان رميت عليها طرطيعه من طرطيعها الي تبهذلنا فيها زمان لكن الحين وش يفكني من رجالها

بعد ما انهت تصويرها

وقفت في الصاله وسعد يدخل غرفة اهله مع اخته يبدل ثوبه وهي تنزل وتبدأ زفتها

نزلت وكانت جدتها واقفه عند الباب سلمت عليها وحبت يدها وراسها وهي تدعيلها ودموعها فعيونها وتمسحها بشيلتها تقدمت بجانب الباب واول ما بدت تسمع الصوت اخذت نفس عميق و هي تناظر خالتها الي تشجعها بعيونها سمت وبدت اول خطوتها للخروج طلت وقفت بخجل كلمعه الؤلؤ وبريقه بين احشاء صدفته بشموخ لا يظهياها احد بطلتها وقفت بثبات لثواني خطت خطواتها بتالق وبريق ملفت لكل من يناظرها ورسمت ابتسامتها الصافيه العذبه طلت بفستانها الابيض بقماش الدنتيل من اعلى ويتسع بتدخيلات من قماش الستان من اسفل وتسريحه رومانيه مموجه بطول شعرها وتغطيها طرحه دنتيل فاخر مثبته على الراس وتجمع اسفل الشعر و وتنساب باكمام وتسير خلفها لتعطيها فخامه رفعت راسها ليزيد من بريق نحرها عقدها الالماس خطت وهي تسمع اعذب الالحان الرومانيه الهادئه وامامها طفلتان من بنات اخوت سعد ينثران الورد وهما ترتديان فساتين تفته بقصه رومانيه عبرت مسارها وبيدها مسكتها من احب الورد لقلبها ورد الجوري بنعومة ملمسها المخملي العذب

وزينت القاعه بمفارش سوداء وعليها قطع من الستان الاحمر وورود حمراء والكوشه كانت كقطعة الؤلؤ وبها برق الورد الاحمر اكملت مسارها لتقف حين وصولها وتعزف المطربه

وملاك ومنى حولها

لتخطوا ام احمد مجبره بطلب من بناتها على اغنية ست الحبايب ياحبيبه بفستانها الذهبي وهي تبتلع دموعها عن الهطول وهي ترى اجمل زهراتها الثلاث يقفن بانتظارها ومن بالصاله دمعت عينه لمرآها وهي تسير ورجفت شفتيها تعلن عن عدم قدرتها على السيطره لمشاعرها وصلت لهن ليقبلن راسها و البسنها طقم من الالماس

لتعلوا اصوات الصديقات بتشجيع وصفير

ام شذى وهي تهمس لبناتها وتمسح دموعها : الله يوفق بناتها ويستر عليهم ما شفت بحشمتهن وش زينهن وهن مستترات وتقرص شذى بيدها شوفي وانتي تعانديني يوم اقلك خلي فستانك بكمام وترفضين يوم عرسك شوفي وش زينهن فساتينهن ساتره ولا وحده دخلت على رجالها وهي متعريه

شذى: وهي تدعك مكان قبضة امها وهي تضحك: يمه حرام عليك فستاني ماكان عاري مره

لم تطل بجلستها بعد ان بارك لها الجميع عادت الى الغرفه لتبدل فستانها بعد ان اغتسلت وازالت كل المساحيق من جسمها و تصفف شعرها لها مصففة الشعر بستشوار ولف اطرافه المدرجه ..ارتدت فستانها بكم قصير الذي يصل الى نصف الفخذ مع بنطلون جينز فاتح ورتدت بوتها

ملاك : بسرعه مي محمد يقول عجلي

مي : خلاص ما بقي شي بس عبباتي يوووه انتظري ما صليت وتري وتنزل بوتها كلميه بس شوي اصلي

ملاك:اوكي صلي وبجيب جدتي تسلمين عليها قبل تخرجين ..خرجت عنها وكلمت محمد وراحت جابت الجده معها وكانت لا بسه عباتها ومتحجبه ودعت الكل و انتظرت عند السياره تبي تودع ابوها سلمت عليه وراحت مع سعد وصلهم السواق للمطار

الجده : وهي جالسه في الغرفه وتمسح دموعها

ام احمد: تربت على كتفها وهي تحاول تصبر عمرها : خالتي محمد بيوصل ملاك البيت روحي معها الحين انا بعدني ماجمعت اغراضنا

الجده: برجع لبيتي مع بناتي

ام احمد وهي تحب راسها والعبره خانقتها : خليك معي اسبوع تصبريني على غيبتهم عني

الجده : وهي تضغط على يدها بحنان ممتنه لها لتحفيها وحنانها لعيال بنتها كنهم قطعه منها : ابشري ماردك وانتي بمكانت الغاليه

ّّّ

بيت ابو محمد

محمد : بعد ما دخل جدته غرفتها وهي مستنده عليه خرج وطلع يركض لغرفته وهو عند الباب وبضحكه بصوته : ياويلك مني لو بدلتي فستانك قبل اجي سامعه

ملاك: وهي تلف حولين نفسها بفستانها اليلكي وشعرها بتسريحه متداخله بطول شعرها بشكل ضفيره من الخلف مزينه بشرائط صغيره : شوفني قدامك شو تبي كمان ما مليت عينك منه

محمد: ويحملها بين يدينه وبزعل : لا تلفين خطر عليك وعمري ما راح امل من النظر لك يا قلبي ..وابي اجلس اسولف معك وانتي بزينتك ولا الزينه بس لهم وانا لا

ملاك : باسته بنعومه اذا تبي كل مره بتزين لك مثل العروس بس اطلب انت واذا متزينت لنظر عيني بتزين لمين متهمني أي عين تشوفني غير عيونك يا حبي

محمد: باس خدها ونزلها بروح اجيب ابوي وخالتي جهزي لنا جلسه معتبره زين سوى فينا سعد الي ماخلا عشاء الرجال بنفس اليوم

ّّّ

منى : بعد ما رفعت كل اغراضهم مع امها كلمها خالد تخرج : امي خالد برا باقي شي ولا اروح خلاص

ام احمد: لا ياقلبي الله يستر عليك اخرجي لرجالك ونتبهي لعمرك

منى: لبست عباتها وباستها وخرجت ..واول ماطلعت فالسياره بعد ما سلمت ..وتخرج ورده حمراء اخذتها من مسكت مي وتعطيها له ..

خالد: وبضحكه : وحشتيني ما ابي ورده اكيد سرقتها من داخل ابي اسمع كلمه حلوه مهو ورد حرام عليك تاركتني لوحدي يومين ما شفتك

منى: بشاعريه : ترد ورده مني قطفتها يديني من بين كل خواتها عشان ترتوي بيدين حبيبي وتخجل اوراقها من مسكته لها ويزيد فوحها لتخترق انفاسه

خالد : ناظرها ثواني وهي مغطيه وجها ما يشوف منه شي ويمسك يدها ويبوسها : اقبل يدين قطفت وعطت من فوح جسدها عطر يروي الورد ويسكت انفاسه ..وبضحكه بنبرته ..صدق المثل من عاشر الناس اربعين يوم صار مثلهم انتي ماكملتي اسبوع واشوف فيه بوادر تحسن بالرمنسيه ويمكن تكمل بمشروع كاتبه مستقبلاَ

منى: بضحكه : وهي صدق مشتاقه له ولهانه عليه وبهمس :انا مستحيل حياتي

وصلوا غرفتهم واول ما نزلت عباتها وخالد جالس

خالد: منى بسرعه ابي اشوف وش لبستي ما يكفي تشوفك عيون الناس قبل اكحل عيني بشوفتك

منى:وهي تشد من عباتها وبضحك : لا مابي تشوفه بعدين تعصب علي اعرف ما بيعجبك

خالد: وقف وقرب منها وهو صدق شاك انها تسوي أي شي يتوقعه مع جنانها وبجديه بنبرته : منى اشوف وش لابسه ولو ماعجبني احلمي بعد اليوم انك تخرجين من البيت وانا ما شفت وش لابسه

منى: بجديه بنبرتها : عيوني مهو بنا الي ينقالي هالكلام انا ربيبت ناصر وانوار واسأل امك اذا متدري عن امي وتفصخ عباتها بزعل وهي لابسه فستان حرير ناعم غبار الورد ماسك بشكل سمكه مع جكت جبيرلحمي و ورود صغيره بنفس لون الفستان ونفس الورود منها بشعرها

خالد: صدق انحرج منها وافتنه شكلها الطفولي بس هي الي خلته يقول الي يقوله : قرب منها وهو يحب راسها ما قصدت انتي الي قلتيه شككني بصراحه من كثر مقالبك تخلين الواحد يشك فيك

منى: بزعل وهي تبعد عنه : ولو يعني منت عارف تربيتي المفروض ولا واحد فالاميه يدخل الشك لقلبك

خالد: يلف يدينه على وسطها وهو يهمس عند اذنها : عمري انتِ يهون عليك تزعلين علي وانا ميت شوق لك ويلفها يشوف وجها والدموع بعينها تكفين ياعمر خالد كله انتي الا دموعك

منى: بجديه بنبرتها وهي تهمس : كل شي عندي اتقبله الااحد يشك بتربية اهلي لي ما ارضى على امي وابوي كلمه اذا صدق تعزني لا تغلط عليهم

خالد:قبل جبينها بعمق وهو حاس بجرحه لها انتقل ليعتصر قلبه : اقدر اقول اسف لاني غلطت قلطه كبيره بحقك وحق اهلك ياقلبي واوعدك معد اعيدها ابد واذا غلطت عليهم بيوم ازعلي علي ..وبضحكه بس عاد ليطول زعلك ما اتحمل ويقرص خدها خلاص عاد فكيها من تكشيره ..ويمسح على شفاتها يهبل لونها الوردي ..

ّّّ

وصلت رحلتهم بالسلامه الي راح تكون بجوله في كذا مدينه مع قروب سياحي لمدة (15) يوم

كانت البدايه في النمسا

في الفندق

مي كانت متعبه جسدينا وتضغط روحها المخنوقه لبعدها عن اهلها لتزيد من تعب جسدها ازالت عبائتها وعلقتها في حين سعد يدخل الشنط من العامل لداخل الغرفه وقفت وهي منكسه راسها حياء من تواجدها معه

سعد: ابتسم وهو يقترب منها ويبعد شعرها عن وجها :مي ناظريني

مي: رفعت نظرها بخجل

سعد:بهدوء وحنيه :اذا صدق لي معزه عندك لا تخلين خجلك الي دوم يبعدك عني حاجز بينا انا اعشقك مهو لجمالك ولا لجسمك صحيح كلها فتنه من ربي لكن اعشق فيك اسلوبك وذكائك عمري ما كلمتك بموضوع الى احصل له عندك اجابه و رآى سديد ومقنع ويهمس عند اذنها بنبره حنونه لا بعد حد..ولا تفكرين انه بيوم بجبرك على شي وانتي منتى مستعده له حنا بشر الله ميزنا بالعقل محنا بهايم .. توضي وخلينا نصلي و خذيلك شور دافي ونامي

يتبع ,,,,

👇👇👇

تعديل المقال