رواية مع غروب الشمس لا يغرب الحب -7
فيها قزازه فحطوا لها لصقه
دخل عليه الدكتور: السلام عليكم
مهند: وعليكم السلام
الدكتور: كيف دحين تحس نفسك؟
مهند: طيب
الدكتور: أوكي حتجلس عندنا لبكره المغرب
مهند بضيقه: مافي إمكانيه قبل؟
الدكتور: أحسن عشان ترتاح رجلك
سكت مهند وخرج الدكتور الي ماكان عارف إنو مهند نفسو دكتور
...مقاطعة... * بعد يوم من وصول فارس وبعد ماهدي وارتاح خبروه إنوو مرام ماتت طبعا هوا حزن واتأثر خصوصا إنوو كان يسمع عن مرام إنها طيبه غير عن أختها الي أكبر منهاا فاتصل على أبو خالد وخالد وحتى على أبو سامي وعزآآهم *
مسك مهند جواله ودق على فارس
مهند: السلام عليكم
فارس: وعليكم السلام.. وينك أتصل عليك ما ترد؟
مهند: ايوا لأني في المستشفى
فارس حسب عادي دوام يعني: آها
مهند: في المستشفى لأنو سار لي حادث
فارس انفجع: حادث؟ قوي ولا ضعيف وكيف انت دحين في أي مستشفى تحتاج حاجه
قاطعه مهند: اهدا اهدا أنا بخير الحادث بسيط لاتخاف بس أنا كلمتك عشان الدكتور قال لي إني ماأقدر أخرج إلا بكره المغرب
فارس ارتاح: أوه والله فجعتني
مهند: بس أنا ماأبغا اهلي يعرفوا إنو سار لي حادث لأنهم حيقلبو الدنيا على الفاضي فحكلمهم دحين وأقول لهم أنا وفارس حننام مع واحد من أصحابنا تعبان
فارس: يعني تبغاني أنام معاك الليله؟
مهند: طبعا
فارس: خلاص انت ارتاح وانا ادبر الأمور
مهند: طيب استناك بس ابغاك تجيب بطاقة الأحوال حقي من بيتنا
فارس: امم هاذي صعبه
مهند يفكر: شوف أنا ماعندي مانع إنو رودي تعرف بسس رودي وأنا حقول لها تعطيك بطاقة الأحوال
فارس: وإذا أصرت إنها تجي تشوفك؟
مهند: خليها تجي بس بكره دحين ليل
فارس: طيب يلا ساعه ان شالله وأكون عندك.. وخلاص انت ارتاح انا حكلم اهلك واكلم روضه
مهند: طيب يلا على بال ماتجي حاخذ لي غفوه
فارس: أوكي مع السلامه
مهند: مع السلامه
قفل فارس وهوا محتار كيف يبلغ أهله وأهل مهند إنهم حيناموا عند واحد صاحبهم والأصعب روضه مممم وهوا يفكر جا في باله ماجد أحسن واحد يقدر يكلمه وعلى طول اتصل بماجد
ماجد: أهلين
فارس: هلا فيك أبو الشباب .. أخبارك
ماجد: بخير الله يسلمك وإنت كيفك؟
فارس: الحمدالله .. مجود ممكن خدمه بسيطه إذا ماعليك كلفه
ماجد: أفا إنت تامر
فارس: الله يخليك.. أبغاك تقول لأهلك إنو واحد من أصحابنا أنا ومهند تعب فجأه وهوا دحين في المستشفى وضروري اليوم ننام عنده
ماجد: آها أبشر بس سلمات عسى ماشر
فارس: سار له حادث وانقلبت فيه السياره ( ألف قصه جديييده هع هع )
ماجد: يا الله الله يشفيه ولا تشيل هم أبلغ أهلي أهم شئ راحة صاحبكم
فارس (ههه لو تعرف الحقيقه): تسلم ماتقصر أبو لمى
ماجد: الله يسلمك
فارس: نشوفك إن شالله مع السلامه
ماجد: الله معاك
قفل وهوا يقول لنفسه حلو أول مرحله خلصت باقي أنا أبلغ أهلي وأكلم روضه تعطيني بطاقة أحوال مهند
نزل تحت بعد ما لبس وقال لأهله القصه طبعا وافقوا له وخرج ركب السياره
ووقت ما تسخن السياره كان يتصل على روضه
ردت عليه وهيا مي عارفه مين: ألو
فارس: هلا .. كيفك
روضه عرفته واستغربت يتصل عليها في الليل: بخير الحمدالله
فارس: ممم ممكن طلب صغير
روضه: تفضل
فارس: أبغا بطاقة الأحوال حقت مهند
روضه اتفاجئت طلبه: ليش
فارس كان عارف إنها حتسأله عن السبب وقرر يقول لها: أوكي في أحد جمبك؟
روضه بدأ القلق عندها: لا أنا في الغرفه لوحدي
فارس: طيب بقول لك بس لاتخافي
روضه: فارس الله يخليك قول
فارس: مهند سار له حادث بسيييط في المستشفى وقالوا له نحتاج منك بطاقة الأحوال وهوا قال لي خذها من روضه
روضه: أكيد مافيه شئ مهند؟
فارس: على حسب كلامه مافيه شئ أنا دحين رايح أزوره وعلى فكره إحنا قلنا لأهلك إنو واحد من أصحابنا أنا ومهند تعب فجأه ورح ننام عنده اليوم
روضه: طيب بكره متى حيخرج مهند؟
فارس: المغرب
روضه تكلم نفسها دحين ليل وما أقدر أزوره بكره رح أروح له: أوكي بكره لازم أروح أشوفه وقت العصر
فارس سكت وشويه: طيب أمر عليكي العصر عشان تروحي السوق كمان وتشتري له هديه
روضه ارتاحت: أوكي ..شكرا
فارس ابتسم: لاشكر على واجب
روضه: خلاص دحين أنزل لك بطاقة الأحوال وأحطها لك عند الباب
فارس نسي إنه للآن ماحرك السياره: طيب دقيقه وانا عند بيتكم
قفلت روضه وهيا تحس قلبها في يدها من الخوف الي ماتعرف سببه .. راحت لغرفة مهند وفتحت الدرج دورت شويه ولقتها .. أخذتها ونزلت بعد مالبست عبايتها وطرحتها للإحتياط .. فتحت الباب عشان تحط البطاقه على الصندوق بس شافت السياره وهيا توها توقف ونزل فارس منها .. لاشعوريا حطت البطاقه ودخلت بسرعه وهيا تجري وطلعت فوق لغرفتها
فارس أخذ البطاقه وهوا متفاجئ من حركتها بس في نفس الوقت جاه الضحك دخل سيارته واتحرك للمستشفى بعد مامشي الحال وسوى كل المراحل بنجاح حس براحه وهوا يسوق.
كانت روضه فوق في غرفتها و تتمنى تعطي نفسها كف على الحركه الي سوتها ماتدري كيف تفسرها والمصيبه فارس اش بيقول عني خايفه منه ولا ايش يااربي !!!
- دحين وقت العصر الي اتفقوا فارس يمر على روضه يوديها السوق وبعدها على مهند في المستشفى -
نزلت روضه من الغرفه بعد ما لبست عبايتها وفتحت الباب وهيا مرتبكه ..فتحت باب السياره الي ورا وركبت: السلام عليكم
فارس لف عليها: وعليكم السلام.. ليش ورا تعالي اركبي قدام
روضه طلت فيه كأنها تقول لااا صعبه
فارس رجع طل قدام وبنفاذ صبر: أنا مو سواق عندك تركبين ورا
قفلت روضه الباب الي ورا بقوه دليل إنها معصبه وفتحت الباب الي قدام وقلبها يدق بقوه حست إنها قريبه منه
بعد ما ركبت حرك فارس السياره وبدون مايطل فيها: أي سوق تبغي تروحي؟
روضه وهيا خايفه: سوق .... أقرب شئ
سكت وكمل الطريق على السوق ولمن وصلوا: يلا أنزلي
روضه (أكيد بنزل أجل بجلس في السياره)
نزلوا ومشيوا هوا قدام وهيا وراه بس بعيده عنو شويه .. كانت وهيا تمشي وراه تتلفت يمين ويسار تبغا تشوف المحل الي في بالها عشان كدا مانتبهت له لمن وقف فجأه مالقت نفسها إلا صدمت فيه ومن الصدمه رجعت لورا بقوه بس بركه إنها قدرت تمسك نفسها ووقفت كانت وقتها نفسها الأرض تنشق وتبلعها وهوا يطالع فيها بنظرة استفهام عن الي سار لها قبل شويه حست بإحرااج وقالت بهمس: سوري ماانتبهت
فارس ضحك: لا عادي أنا آسف وقفت فجأه
سكتت وكملت مشيها لقت المحل وقفت عنده واشترت باقة ورد حـلوة وفارس قبل ما يمر عليها اشترى لمهند هديته الي كانت مغلفة.. رجعوا للسياره الي كان موقفها بعيد عن السوق شويه
فارس: أستني إنتي هنا وأنا بروح أجيب السياره
روضه: طيب
راح وهيا بقيت مع بعض الناس الي يستنوا.. وهيا واقفه مرت سياره فيها شباب ورافعه صوت المسجل على الأغاني .. وقفوا قبالها وهما يصفروا ويرقصوا.. طبعا هيا ما وقفت تطالع فيهم حركت رجلها ورجعت لورا .. الشئ الي مااتوقعته إنهم نزلوا من السياره ووقفوا عند عامود قريب منها كانوا 3 شباب .. سارت الناس تطالع فيهم وأخيرا جا فارس ودق بوري لها.. ركبت بسرعه وهيا تدعي ربها إنو فارس ما يشوفهم بس للأسف انتبه لهم قبل ما تقفل الباب.. ال3 شباب لمن شافوا فارس ركبوا سيارتهم بس قبل ما يحركوا وقف فارس بعد مانزل من سيارته قبال سيارتهم وهوا يطل في ساعته.. فتح باب الي يسوق وصرخ: والله لو إن ماعندي موعد ضروري دحين كان مسحت في وجهك البلاط يا الي ماتربيت .. وقبل لا يقفل الباب قال بعصبية: يجيك يووم وتشووف إنتو أشكال ماينفع معاكم الكلام،، وصك الباب بقوه ورجع.. هنا روضه كانت خايفه يكمل باقي التهزئء عليها لكن هوا دخل وقفل الباب .. اتنهد ورجع راسه لورا كأنو يبغا يهدي أعصابه قبل لاتفلت عليه .. بعد دقيقه مرت طل فيها وقال كأنو يبغا يقنعها: لو إنك مغطيه وجهك مو أحسن؟؟
روضه استغربت لهجته بس هيا عارفه إنها غلطانه لو إنها مغطيه وجهها كان ماصارالي صار: مو بس أنا الوحيده الي ماأغطي وجهي
فارس طل فيها وهوا شاد يدينه كأنو مايبغا يرفع صوته: مالك دخل بغيرك
روضه خافت لايعصب زياده طلت فيه: فارس خلاص امشي كفايه الناس تطالع فينا
سكت ضغط الزر وحرك السياره على المستشفى
’.’.’.’.’.’.’.’.’.’.’.’.’.’.’.’
الجـــــــ الثامن عشر ــــــــزء
يوم جديـد،، بعد خروج مهند بالسلامة..
وروضه في غرفتها اندق عليها الباب
روضه: ادخل
فتحت الخدامه الباب: رودي مدام آند مستر تحت يبغاكي
روضه (غريبه): طيب دحين انزل
قفلت الكتاب الي كانت تقرؤه ونزلت تحت للصاله ماشافت أحد فراحت لغرفة أمها وأبوها ودقت الباب
أم ماجد: اتفضلي
دخلت روضه وقفلت الباب: ناديتوني؟
أبو ماجد: إيوا تعالي أجلسي نبغا نكلمك في موضوع
روضه حست في الموضوع إنّ جلست على كرسي وطلت فيهم
أم ماجد: إنتي عارفه سنة الحياه الي هيا الزواج وكل وحده لازم تتزوج وانتي خلاص ماشالله في سن الزواج فاليوم اتقدم لك واحد ماينعاب
روضه حست قلبها يدق
كمل أبوها: هوا الولد حيشيلك في عيونه واحنا سألنا عنو وماناقصه شئ اسمو أيمن عمرو 24 ويشتغل في أرامكو وأنا وأمك نتمناكم لبعض لأنه أخلاق وزياده على كدا وسيم بس باقي رأيك.. انتي يارودي رفضتي كثير اتقدموا لك بدون سبب ففكري في هذا كويس
///روضه وقتها حست إنها تحلم ماتعرف ليش كان نفسها تنعزل في غرفتها وتجلس تبكي قالت بصوت مكتوم: أفكر
أم ماجد: خذي وقتك هذي مسألة زواج مو لعبه
طلعت روضه لغرفتها وهيا تحس بفجوه داخل قلبها حطت راسها على المخده وانفجرت نوبة الصياح : آآآه ليش أنا كدا؟ دائما يسير لي عكس الي ابغاه أصلا أنا ليش معلقه مصيري فيه هوا أكيد مو فاكر فيا يعتبرني بنت عم وبس وأنا شفت بعيني صورة البنت الي في درجه الي لو مالبست شئ كان أحسن من لبسها، ليش محتفظ فيها للآن؟ أكيد إنها حبيبته اتعرف عليها من فرنسا آآآآه يا قلبي ماتقدر تتحمل زياده خلاص أنا لأيمن وأيمن ليا وفارس (نزلت دموع حاره على خدها) فارس مو ليا
في اليوم الي بعده صحيت وقالت لأهلها إنها موافقه على أيمن وهيا تضغط على نفسها عشان تبين إنها مبسوطه .. باركوا لها كلهم وهما فرحانييين وقالوا لها إنو يبغا يشوفها بعد عزومة فارس بيومين
’.’.’.’.’.’.’.’.’.’.’.’.’.’.’.’
في بيت أبو فارس
كانت شهد وأمها واقفين في المطبخ ويجهزوا أشياء عزومة فارس بكره بس شهد كانت كل شويه تسرح
أم فارس: شهووده لو أدري كل هذا التسريح بيسير لك كان ماملكت لك على سامي إلا بعد العزومه
شهد انحررجت أمها فهمتها غلط: لااا والله إني ماأفكر في سامي
أم فارس: أجل على ايش كل هذا التسريح
شهد بحزن: كنت أتمنى رودي لفارس دائما أحسهم مناسبين لبعض
أم فارس قاطعتها بعتاب: شهد ما يسير تقولي هذا الكلام هاذي قسمه ونصيب رودي الله يوفقها مع أيمن وفارس بيلقى بنت الحلال الي تسعده إن شالله
شهد بحزن: إن شالله
’.’.’.’.’.’.’.’.’.’.’.’.’.’.’.’
وصل حسن لمطار جده باستقبال أهله وفارس ومهند الساعة 7 الفجر تقريبا..
فارس وحسن ضموا بعض بقووه وبعد السلام والكلام
حسن يكلم فارس بصوت واطي بعد مابعد عنهم مهند شويه: تصدق قبل شويه لمن ضميتك اتذكرت ايش؟
فارس: ايش
حسن وهوا يضحك: اتذكرت روزا واحنا نودعك في المطار أحس كان نفسها تحضنـك الأخت قربت منك وايد
فارس ضرب راس حسن: يازينك ساكت
حسن: آه على قلبك الولهااان عليها
فارس طل فيه: والله إن روزا ولا شئ، قلبي آخذه أحد ثاني
حسن حب يغير الموضوع: خلاص بكره العزومه؟
فارس: إيوا أجلناها كله عشان وجهك
حسن يتدلع: ما أستاهل؟
فارس وقف: أنا برأيي خلي الدلع لأهله أحسن.. يلا امشي اوصلك لبيتك
حسن: ههههههههههههههههههههههههههه لامشكور بعد بكره نتقابل اهلي يستنوني
مهند الي دوبو جا: إن شالله
حسن: مع السلامه
فارس ومهند: مع السلامه
’.’.’.’.’.’.’.’.’.’.’.’.’.’.’.’
اليــــــــوم عزومة فارس الي الكل كان مستعد لها من بدري وفرحان إنو حيلاقي العائله كلهم
بدأو يجوا من بعد المغرب وعلى الساعه 8 كانوا كلهم موجودين
في صالون الرجال..
كانت في أصوات عاليه وليان ولمى وعزوز داخلين خارجين
الكل كان يسلم على أبو ماجد وماجد ومهند ويبارك لهم على خطوبة روضه و يحمدوا لفارس وصوله بالسلامه ..
بعد المباركات جلسوا الشباب قريب من بعض
مهند: ماشالله كبرنا والله
سامي: ههههههههههه من جـد كلنا خاطبين بس باقي فروس الي الكل يتمناه
فارس ابتسم: تسلم
سامي: الله يسلمك
مهند: وين حسون صاحبك؟
فارس لأن مهند كان بعيد شويه ومع الإزعاج ماسمعه: ايش؟
مهند رفع صوته: وين حسن صاحبك؟
فارس: أكيد في الطريق (دق جواله) هذا هوا أنا بطلع برا الحديقه عشان أسمعه
عند الحريم..
كانوا آخر ناس وصلوا بيت أبو خالد وهما واقفين قدام المرايا
أم فارس: أهلين
أم خالد بنفخة ريش: هلا
سلموا أم خالد ورغد على أم فارس وشهد وروضه
رغد بدون نفس: مبروك رودي
روضه حتى هيا بدون نفس: الله يبارك فيكي عقبالك
رغد بصوت عالي شويه: يووو
أم خالد طلت فيها: إشبك
رغد: نسيت شنطتي في السياره// طلت في أمها: حكلم السواق يجيبها عند الباب عشان آخذها منو...
في المطبخ كانوا سمر وروضه واقفين مع شهد يساعدوها
روضه: شهد حطلع آخذ توكه من عندك عشان أقدر اساعدكم الغره نازله على عيوني
شهد: روحي طبعا محلاكي وإنتي تستأذني
ضحكت روضه وطلعت فوق لغرفة شهد
في الحديقه .. كان فارس واقف قريب من الباب
فارس: يلا وينك تأخرت
حسن: خلاص دقائق وأكون في السياره
فارس: أوكي عجل
حسن: طيب إن شالله .. مع السلامه
فارس: مع السلامه
أول ماقفل شاف بنت واقفه قريبه منو جمب الباب
رغد بدلع: إنت فارس؟
فارس استغرب بنت حلوه ودلوعه واقفه قباله كان أول مره يشوفها رفع حاجبه اليمين: إيوا أنا فارس
رغد ابتسمت ولفت عنه .. أخذت الشنطه من السواق
فوق في غرفة شهد وهيا تدور التوكه سمعت أصوات.. راحت لعند الطاقه وشافت رغد وفارس وهما واقفين قبال بعض حست كأنو شئ مر في ذاكرتها ذكرها بموقف في القاعة -- لما كانوا جالسين هيا ومرام جمب بعض وكانت مرام ماسكة شنطة رغد فجأه دق جوال رغد والمتصل = fr – (أكيد تقصد فارس ورغد).. لاشعوريا نزلت بسرعه للحديقه بس اتخبت ورا جدار سارت تشوفهم بس هما لا
رغد وهيا تطالعه من تحت لفوق وعاضه على شفايفها: قالوا لي عنك حلو بس مااتوقعت انك بدا الجمال
كان فارس وقتها مصدووم من البنت الجريئه أو الوقحه الي قدامه بس وهوا واقف لمح ظل روضه وعرفها فقرر إنو يشوف إش حتسوي.. ابتسم لرغد وقرب خطوه لعندها طل فيها بنظره تقتل: وإنتي أحلى
رغد حمرت خدودها وسارت مع الأضواء الي عليها جذابه: تسلم عيونك الحلوه
روضه حست بنااااار داخل صدرها وهيا تشوف فارس واقف قدام رغد ويتكلم معاها برومانسية وجرأة //حست إنو رغد جالسه تسرق شئ من أملاااكها// مااقدرت توقف مكانهاا وبدون تردد راحت لهم وهيا فايره وقفت بينهم رغد قدامها وفارس وراها
روضه تكلم رغد بقهر وعصبية: إيش المسخره الي عايشه فيهاا انتي؟؟ كيف تسمحي لنفسك تكلمي واحد غريب عنك بدي الجرأه
فارس فتح عينه اتفااااجئ من ردة فعلها أبدا مااتوقعها حتسوي كدا حس بإحساس غريــــب وشئ في قلبه اتحرك
رغد ضحكت باستهزاااء: هههآي ضحكتيني وأنا مافيا ضحك// يا حلوة هذا فرووس الي غريب عني ترى غريب عليكي زيي تماما
روضه مااستوعبت كلام رغد كيف فارس غريب عني هوا ولد عمي: فارس ولد عمي موو غريب
رغد بأسلوب استفزاز: الغريـب يعني الي يقدر يتزوجك (وكملت بهمس) يعني أيمن زوجك قبل مايخطبك كاان غريب
روضه حست بخنقة لاشعوريا لفت على فارس واتلاقت عيونهم ببعض حست إنو قلبها وقف وخصوصا إنهم قريبين من بعض ورغد وراهم
فارس رفع راسه عليها وعيونه في عيون روضه مباشرة ، مد يدينه ومسك يدين روضه خلاها جوة يدينه الكبيرة بالنسبة لها: (قال بحزن) لييش؟ ليش ياروضة
روضه وقتها ماكانت تشعر بقلبهاا كأنه طااح والهـواء خلص يدها بين يدين فارس وعيونها تطل في عينه ،،ماتعرف ايش تجاوب ماهي قادره تفهم سؤاله (ليش على ايش يقصد!)
رغد جاها إحساس الغيره وفهمت سؤال فارس ليش: السبب واضح يا حبيبي
فارس طل فيها ومازال ماسك يد روضه : ايش السبب؟
رغد: هيا تحب أيمن وتتماه زوجهاا مو فارس
فارس ترك يد روضه وطل فيها يستنى منهاا جواب تأكد أو تنفي كلام رغد.. بس روضه كانت في موقـف ماتقدر تقول شئ كانت الأحداث سريعه عليها مافهمت منها حاجه
بالنسبة لفارس كان سكوت روضه تأكيد لكلام رغد
فارس بأسف وضيقـه كانت العبره خانقتو: الله يوفقـ (ماقدر يكمل دعوته )
رغد مسكت روضه من يدها ومشتها معاها لداخل الفيلا وكأن روضه فيـ عاالم ثاني
جلس على الكرسي الي كان في الحديقة وحط راسه على الطاوله ،،لف يدينه على راسه: ليش؟ ليييييييييييييش؟ ليش حبي الي ساكن في قلبي من يوم اتولدت يضيع؟!!! حرااام والله حرااام خلاص اتحملت كثير آآآآه كانت بين يديني ليش تركتها أستاهل أنا الي اتخليت عنها والله ياروضه إني أعشقك وأعشق ترابك وأعشق هواكي ليش ماأبغا أبين لها ليش ما قلت لها من قبل مايخطبها أيمن الخسيس بس خلااااص حبي راح راح راااااااااااااااااااااح (طبعا كل هذا الكلام كان يقوله لنفسه وماخرج من قلبه لأحد) .. دق جواله بس وقتها كان ماله نفس يقابل أحد يبغا يكون لوحده نفسه يروح البحر ويغرق نفسه وينسى كل همومه لكن ماحس إلا ويد تمسح على شعره .. رفع راسه وهوا يحاول يمسح دمعته اليتيمه بدون ماحد ينتبه.. لقى حسن واقف وعلامات استغراب على وجهه .. وقف فارس وسلم عليه: هلا والله
حسن: هلا فيك.. إشبك جالس هنا؟
فارس: مافي شئ كنت أكلمك و نعست شويه
حسن كان عارف من نبرة صوت فارس إنو فيه شئ: أوكي تعال يلا ندخل
فارس حس بضيقه تخنقه: تفضل
عند الحريم..
شهد كانت في المطبخ مع سمر
شهد: يؤ كل هذا تدور على توكه
سمر: لها 10 دقايق وهيا مختفيه
شهد: أنا حطلع أشوفها
سمر: أوكي روحي أنا أكمل عنك
طلعت شهد وفتحت الغرفه مالقت فيها أحد فراحت للحمام ودقت الباب: رودي إنتي هنا؟
ماحد رد عليها ففتحت الباب لكن كان مقفل: روودي إنتي هنا؟
شهد بدأت تخاف ليكون مغمى عليها فدقت الباب بقوه شويه: روودي
ردت روضه وهيا تبكي: سيبيني لوحدي
شهد انفجعت: رودي إشبك؟ أنزلي مو كويس تبكي في الحمام
روضه ماردت بغير شهقات بكاها
شهد انفجعت من جد وبنبرة ترجي: رودي لله يخليكي حسيبك لوحدك بس اطلعي اجلسي في غرفتي مو في الحمام
فتحت روضه الباب وكانت عينها حمرا.. شهد خافت عليها مي عارفه إش سار لها .. مسكتها من يدها وقفلت باب الحمام وودتها لعند السرير ونزلت عن مستواها
شهد: رودي حبيبي ليش كل هذا البكا مين ضايقك؟ قولي لي لاتزعلي نفسك مافي شئ في هذي الدنيا يستاهل دموعك
روضه أخذت منديل وجلست تمسح دموعها الي تنزل بغزاره ومي قادره تتكلم من البكا
شهد: طيب أنا حنزل أجيب لك مويه
نزلت شهد ولقت في المطبخ أمها ومعاها سمر ومرام وسهى ارتاحت في أحد معوض عنها .. صبت كاسة المويه وانتبهت لها سهى
سهى بذكاء: فيها شئ رودي؟
شهد اتفاجئت بالسؤال لكن هزت راسها يعني إيوا
((نظامهم إنو الخدامات في العزايم مايسوو شئ في المطبخ إلا إذا خلصت العزومه يغسلوا الأطباق بس))
طلعت فوق شهد وفتحت الباب لقت روضه على نفس وضعيتها بس إنها هديت شويه وماسارت تبكي ابتسمت ومدت لها كاسة المويه: خذي اشربي وسمي بالله
جلست تراقبها وهيا تشرب بعد ماخلصت أخذت منها كاسة المويه وحطتها على الكومدينه: خلاص جاهزه ننزل تحت
روضه اتنهدت: أوكي انتي انزلي وانا بلحقك ابغا اغسل وجهي واعدل المكياج
شهد: هههههه أوكي
عند الرجال...
بعد ماسلم حسن على الكل وبارك لهم وقال لهم الحمدالله على سلامة الوصول جلس مع الشباب قريب من الباب وهوا منتبه لحالة فارس
سامي: احم هذا الحلا سوته سمر
خالد على طول أخذ منه حبه وقال: الللللللللله يجننن أطعم حلا ذقته
الشباب إلا فارس ومهند: ههههههههههههههههههه
مهند لاحظ حالة فارس من أول مارجع من الحديقه وهوا متضااايق حاول يعرف إش فيه بس مالقى تفسير
حسن يكلم فارس بصوت واطي بمرح يبغا يفرحه: فروس تصدق إني ابغا الحمام
فارس بصوت واطي ومتضايق: أول ماتخرج تلاقيه على اليمين
حسن بيأس: مشكور
//
نزلت روضه وهيا تتكلف الابتسامه ولقتهم حاطين العشا جلست بهدوء جمب سمر وشهد
سمر: هلا رودي وينك من أول
روضه تحاول تكون طبيعيه بس مي قادره تنجح: كنت أدور على توكه من شهد و (بصوت مبحوح) بعدين دخلت الحمام
شهد طلت في سمر يعني خلاص لاتسأليها شئ زياده .. كملوا العشا وهما يتكلموا في مواضيع عاديه بس روضه كانت تتغاضى نظرات رغد وتحاول إنها ماتطالع فيها أبدا
رجعت كل عيله لبيتها وأول ماخلصت العزومه طلع فارس فوق لغرفته وبعد ماغير انسدح على السرير ويدينه تحت راسه وفي هذي اللحظه دق جواله والمتصل روزا (أرد ما أرد أرد ماأرد) في النهايه قرر إنو مايرد لأن ماكان له مزاج لأي شئ
الجـــــــ التاسع عشر ــــــــزء ..
ماقبل الأخيــــر ..
اليـــــــوم ملكة رهف من مهند و سهى من رائد
رهف وسهى راحو لنفس الكوفيرا من العصر
أما مهند ورائد كانوا مع فارس في بيت مهند ومعاهم عزوز
روضه وشهد وسمر ورغد وليان راحوا مع أمهاتهم لكوفيرا غير حقت رهف وسهى
وصلوا للكوفيرا والي وصلهم خالد
أم خالد: تكون عندنا لمن نتصل عليك
خالد: إن شالله إلا إذا انشغلت كلموا السواق .. يلا سمورتي حبيبتي أشوفك على خير ولا تنسي لازم أشوفك وانتي متشيكة
سمر انحرجت يكلمها قدام الكل: إن شالله
نزلوا الحريم ودخلوا الكوفيرا وبدأو يتوزعوا إلا روضه ورغد كانوا جالسين يستنوا دورهم
رغد كأنه ماسار شئ بينهم مع فارس: اش حتعملي؟
روضه حاسه بشعوور يخنق كل ماتشوف رغد: بس حخليها تعمل لي تسريحه وانا أعمل المكياج بنفسي
رغد: آها معاكي المكياج حقك دحين؟
روضه: لا حرجع البيت وأعملو .. وإنتي؟
رغد بغرور: أنا حخليهم يعملوا لي المكياج والتسريحه وأرتاح .. تعرفي
روضه: ايش
رغد تبتسم بخبث: فارس في بيتكم يمكن يشووفك
روضه ماعرفت ايش ترد حست قلبهاا مضغووط وعينها مليانه دمووع (ايش تبغا مني الرغد هاذي ليش تعذبني أنا مخطووبه لأيمن)
شويه خلصت سمر ونادت روضه: رودي تعالي اعملي شعرك هنا
روضه: أوكي
الكوافيرا: شعرك اكتير حلو .. كيف بدك إعملوا؟
روضه ماكان لها نفس تتكلم بس تبغا تخلص: ممم شو عندك فكره حلوه
الكوافيرا: إنتي بتناسبك تسريحات كتيره بس في وحده بتجي لابأه (لابقه) عليكي
روضه: يلا اعمليها بسم الله
الساعه 8 كانوا كلهم جاهزين يخرجوا من الكوفيرا والي حيرجعهم السواق
أول شئ وصل بيت أم خالد وبنتها رغد بعدين أم فارس وشهد وليان وأخيرا أم ماجد وروضه الي طلعت لغرفتها عشان تكمل مكياجها
أم ماجد: رودي إذا خلصتي مكيااج البسي فستانك وانزلي
روضه وهيا في الدرج: طيب
طلعت لغرفتها وبعد ماحطت المكياج كان شكلها مره حلو راحت ولبست الفستان كان لونه أبيض وماسك عليها مبين جسمها وطولها مره حلوين
.........................
مهند: رائد كيف قلبك؟
رائد: أوه أحسو في يدي
فارس: ههههههههههههههه أشوف افتح يدك
مهند: طبعا تضحك ماجربت
رائد: مهند أحس ريقي ناشف أبغا مويه
مهند: ماأقدر أقوم .. فروس جيب لنا مويه
فارس: أحلف إنت ووجهك شلل ولا زواج
رائد: فروووس عشاني
فارس: خلاص قدرتو تحزنوني (وقف) كيف تبغوها
مهند: كلو باارد
رائد: أكيد حتى أنا
روضه: خلاص خلصت اللمسات الأخيره (أخذت جوالها) يلا ماما تحت تستناني
نزلت من الدرج كأنهاا ملااك لابسه أبيض متأنقة وشكلها طالع مره حلوو وهيا تنزل وقفت في الدرج وكأنه أطرافها اتجمدت.. أماا فارس رفع راسه لهاا وجلـس يطل فيها موو مصدق الملااك الي قدامه وهيا في أعلى الدرج كأنها تنزف له .. ابتسم لها وبنظره تقتل طالعها من فووق إلى تحت وهيا بالفستان الأبيض الماسك على جسمهاا
فارس بصوت حالم: ملاآآك والله ملاآآك
روضه ولع وجهها من نظراته وطريقة كلاامه,, لفت ظهرها عليه وهوا مازال واقف وطلعت لغرفتها مره ثانيه بأسرع مااتقدر.. وقفت قدام المراياا
وقالت تكلم نفسها: لأ لأا فاارس كفايه إحراجات والله حبكي المكياج حيخرب آآه يافارس حراام عليك تلعب بمشاعري ليش تقول اني ملااك وانت تعرف غيري بنات كثير إنت شاب مليوون تتمناك ايش معنى انا تبغا تعلقني فيك؟ أنا مخطووبه مخطووبه لغيرك والله تعبت
خرجت عبايتها من الدولاب إلا انفتح باب غرفتها
أم ماجد: لسا ماخلصتي؟
روضه: ها إلا خلاص جهزت
أم ماجد: يلا فارس تحت يستنانا
روضه اتفاجئت: فارس حيوصلنا؟؟؟
أم ماجد: إيوا ومعانا العرسان مهند ورائد
سكتت روضه
أم ماجد: يلا البسي عبايتك ولا تنسي غطي وجهك لاتفتني الرجال
روضه: هههه طيب
لبست عبايتها وخرجت مع أمها ونزلوا تحت ركبوا السياره.. كان فارس الي يسوق ومهند جمبه ورائد ورا .. روضه وأمها جلسوا في المقاعد الخلفيه .. روضه ارتاحت عشان ماتكون قريبه من فارس بعد الموقف الي سار قبل شويه
وصلوا للقاعه وأول مادخلوا
شهد: يا هلا
أم ماجد: هلا فيكي فين مامتك جالسه؟
شهد أشرت على طاوله: هناك
روضه: إن شالله حجزتوا لنا طاوله جمب الكوشه
شهد: ههههههههه أكيد
(فسخت روضه العبايه)
شهد: وااااو رودي شكلك جنااان
روضه: تسلمي عيونك الحلوه
شهد: أمشي ندخل مع بعض عشان يعرفوا الناس إني أعرفك
روضه: ههههههههههههههههه عليكي تفكير
ضبطت روضه شعرها ودخلت مع شهد وكانت مللللفته للأنظار.. سلمت على بعض الناس الي تعرفهم وراحت للطاوله الي كانوا جالسين فيها سمر ورغد ومرام وبعض البنات الباقين
سمر: ماشالله رودي حصنتي نفسك؟
روضه مع الأغاني ما سمعت: إيش؟
رغد لأنها كانت جالسه جمب روضه قالت بدون نفس: تقول لك حصنتي نفسك
روضه تتغاضى تطالع في رغد طلت في سمر وهزت راسها بابتسامه يعني إيوا
’.’.’.’.’.’.’.’.’.’.’.’.’.’.’.’
بعد مارجعت كانت تحس نفسها مخنووقه .. راحت لغرفةأمها وأبوها وفتحت الباب بأقوى شئ بدون ماتدق
صررخت وهيا تبكي: مااا أبغاااه والله مااتزوجوو والله انا حلفت ماابغاه اكرهو اكرهواا انتو ماتفهمو مااقدر اتزوج الأيمن هذا آآآآآه ماماااا ماابغا
أبو ماجد فز راح لعندها ومسكها بالقوه جلسها ع الكنبه وجلس جمبها وهوا ماسك يدينها طل في أم ماجد: جيبي لها موويه
أم ماجد كانت تطل في روضه باستغراب ودهشه وخووف ماكانت تتوقع انو روضه غاصبه نفسها عليه حست بشعوور الضيقة لماا شافت روضه بدي الحاله
أبو ماجد رفع صوته: جيبي لهاا مويه
أم ماجد انتبهت:إن إن شالله
أبو ماجد يكلم روضة بهدوء: حبيبتي رودي من متى احنا نغصبك على شئ انتي ماتبغيه؟ حبيبتي مايسير تزعلي نفسك وتعصبي كدا بطاال ترهقي نفسك ماايحتاج كل هذا البكاء عشان تقولي لنا انك ماتبغيه
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك