بداية

رواية وش الله مكلفني بحبن تاليه فراق -18

رواية وش الله مكلفني بحبن تاليه فراق - غرام

رواية وش الله مكلفني بحبن تاليه فراق -18

جالسين بحالة طرب ومغنا عند الشباب الطيران والسوالف ..
وحمدان يلقي الشعر ..
حمدان :
ليتك تعرف أن الهوى سهم ذباح
وقلوب عشاق المحبة رقيقه
وليتك تعرف أني ليا شفت رقمك أرتاح
والقلب يسعد يوم يلقى رفيقه
أنا الحزين وباقي الناس بأفراح
وأنا الأسير وخلق ربي طليقه

نواف : الله الله صح لسانك يابو عبدالله ..
حمدان : صح بدنك ..
حمد : عاد شعرك ياحمدان ما عليه لكن يبيلك بالتعمق زياده ..
حمدان : والله الشعر جت معي كذا بالشعر ..
حمد : اسمع :
وعذابي كان لي نفس صحيحه
خيرت مابين صدك والمنيه
أن نويت البعد ضاقت بي الفسيحه
وأن بغيت القرب خان القرب فيه
كيف بخفي الحب وجروحي صريحه
كيف أحجب الشمس ياخلي بيديه
كيف أداوي علة النفس الجريحه
وين أودي دمعة العين الشقيه
الكل صح لسانك ..
حمدان :
شكواك للي طالبه مابعد خاب
ودعواي لك يالله تطول سنينه
كم واحد من الحب منصاب
الحب قاتل ماأحد يقدر يدينه
يادمع عيني لمن تغرب ومن غاب
ياشيب عيني لمن يفارق ضنينه
قلبي عذلته لكن القلب ماتاب
والحب تلعن ساعته وسنينه

ناصر : لا ما نقدر على ابو عبدالله شاعر ما شالله عليك ..
فهد : لا عاد حمدان اخوي اذا تبيه يقصد تلقاء بالحمام (كرمكم الله ) يطلع الشعر صح ..
حمدان يضحك : ههههههههه والله وش نسوي نكون مرتاحين وصدى الحمام يساعدك وانت تدندن وتركب الابيات ..
الكل : ههههههههههه
ابو متعب : لا انا اللي بنافسك ..
حمدان : ما نعلى على الحاجب ..
ابو مشعل : هذا الشبل من ذاك الاسد..
ابو متعب : ههههه يا محمد .. ماعليك زود ..
فارس : عطنا يبا من شعرك ..
ناصر : والله يشرفني اني اسمع من خالي قصايده ..
ابو متعب : ماني حافظ من شعري شي لكن ابعطيكم من قصايد اسمعها ..
متعب : لا يبا نبي الجديد ..
ابو متعب : واللله عزلت الشعر من زمان ..
ابو مشعل : طيب سمعنا اللي حافظه ..
ابو متعب :
أرسلك المرسول يامعرب الجد
من ساس قوما"يحتمون المظله
يحمل تحياتي بها الود ممتد
من ضامري ماهي سواليف شله
البعد ماعنه الرجاجيل تنحد
لو حال من دونه سماء نجد كله
والحر مهما راح لابد مايرد
للنايف اللي كل حر فطن له
حمد وهو يشوف جواله يرن بمسج ..
يفتح المسج بستغراب من المرسل ."". تعال عند البركه ...!!""

يفكر وش تبي هذي الحين ؟؟
اخذ جواله وادعسه بثوبه وتابع الشعر والضحك .. الا بعد دقيقتين مسج ثاني ..
" ابيك ضروري تعال بليز ياحمد "
يدعس ثوبه مره ثانيه : ويطنشها ..
ابو متعب : وش فيك ياحمد .؟
حمد : ابد مافي شي ..
ثواني الا يرن جواله ومن شاف الرقم قام من غير ما يتكلم واخذ نفسه بعيد وراح يتكلم ..
الا نجوى وراء : اي تكلم واسال عنها بخير او لا ..
حمد بصدمه : انتِ وش تبغين .؟
نجوى : لي نص ساعه اقولك تعال الحين قمت اول ما اتصلت ؟
حمد بضحكه : اكيد بقوم لها ..!!
نجوى : ما علينا صحيح اللي سمعته ..

حمد يعطيها ظهره ويضحك : هههههههه وشهي الاخبار الاني اعرفك كونا ..
نجوى : لا تضحك صحيح انك بتخطب مضاوي ..
يلف لها والصدمه بوجهه : وكيف عرفتي ؟.
نجوى : توك تقولي كونا اكيد بعرف كل شي ..
حمد : وهي عرفت بهذي الخطبه ؟
نجوى : لا انا اول من عرف ..
حمد : ومن علمك ؟
نجوى : مو مهم المهم بسمع صحيح او لا ..
حمد : وش يهمك ؟
نجوى : يهمني وانت تعرف ..
حمد : واذا قلت لك ايوه موافق ؟
نجوى : الانها بتصير اعاصير وبتنطرد باذن الله بالفضيحه ..
حمد يقرب منها وعيونها حاده وبعصبيه : وش قصدك بالفضيحه ..!! شكلك نسيتي نفسك ..
نجوى تلف وجها وبضحكه : هههههههههه وش نسيت نفسي .. يعني انا ارحم من حالتك ..
حمد : من الاخر وش تبين ؟
نجوى .: تزوجني
حمد : ههههههه اتزوج وحده شايفها مع واحد بالسوق ..؟
نجوى : هههههه اجل تبيني اتزوج واحد شفته بالسوق مع زوجته وبنته ..؟
حمد: هههههه يعني وحده بوحده ..
نجوى : عليك نور يعني انا ساكته عنك بسبب واحد انك تتزوجني ..
حمد : زواج مراح اتزوجك وش بتسوين ..
نجوى بعصبيه : بفضحك انت وزوجتك وبنتك ..
حمد : اللي شفتيها ماتت ..
نجوى : مو مهم ماتت او لا الانك بتنفضح وبتنطرد الانك عصيت ابوك واهلك وفضيحتي اقل من فضيحتك ..
حمد: ماشالله اجل انا بالحلال وانتي بالحرام عادي ؟
نجوى : انا تبت علشانك وثانيا اتحدى احد ماسك علي شي وحتى لو قلت بكذبونك الانه الكل لاحظ اني ما اطلع ولاحظوا بعد اني احبك ..!
حمد : وانا ما احبك ياليت تفهمين ..
نجوى : وبتتزوج اللي ما تتسمى ..
حمد : مضاوي اسمها ..
نجوى : ما يهمني اسمها من جت وانا ما حبيتها والحين زادة الكره لي ..
حمد : لو ما احبها لكن بتزوجها بس لسبب واحد هو علشااااانك ..ويمشي ..
نجوى بصوت عالي : والله لفضحك ..
حمد : اعلى مافي خيلك اركبيه وتخسي اللي تهيني وتفضحني ..
نجوى : نشوف من يضحك بالاخر
حمد : نشوف يا نجــــوى ...


(( وش تتوقعون بالاجـــــزاء القــادمه ؟؟؟ )))
تابعونا بالجزء السادس عشر .....

قصتنـــــــــا في اولــــــــهـــا ..
ما تحتــــــــاج غيــــر انكــــــــمـ تشرفوونـــــــا
وتشاركــــــونا فـــي الــــرد والمتابــــعـــه
تاابعووونــــاااا
نتواااصل
انـــــــــجال ..

الجـــــــــــزء الســـــــــادس عشــــــــــر ..

-----------------------------------------
بالمطبخ تسوي الحلا الجوز الهند .. مع مزنه وتعلمها الطريقه مع ندى الي زواجها قرب بعد فترى قصيره ..
ندى : لما اتزوج بسوي الحلا لنواف
مزنه : ههههه اشهدنه اخوي بيروح فيها ..
مضاوي : ومتى عرسك يا ندوش ..
مزنه : بعد شهر ..
ندوش بخجل : قالتها لك استحيت اتكلم ..
مضاوي بضحكه : ياحليلك تعرفين تستحين ..
ندى : وليه ماني انثى ..
مضاوي : الا انثى محدن قال غير هالكلام ..
مزنه : عاد شوفي من الحين اقولك نواف ما يحب الحلا كثير يسوي الاخ رجيم قارس ..
مضاوي : يعجبني الرجال اللي يحافظ على رشاقته ..
ندى : والله يوم قالت عمتي انه مافي عرس الا لما يتزوج حمد طاح قلبي قلت خلاص ماعاد نتزوج ..
مزنه بضحكه : ههههههههه حمد سالفه ثانيه بعد اقناع اقتنع ابوي يزوج نواف قبل حمد ..
مضاوي : وش فيها يعني اذا تزوج الصغير قبل الكبير ...
ندى: لا عاد بالخليج كبيره على بالهم الكبير فيه بلاء ..
مضاوي : هههههه عقولكم بعدها صغيره يعني يمكن حلو اذا الواحد يعرف نفسه انه مو قد المسوؤليه ..
مزنه : لا هو قدها لكن في شي محيرنا كلنا ...
ندى : مو بس انتي ياخته اصللا الكل يقول فيه شي ..
مزنه : اسم الله على اخوي مافيه الا العافيه بس انسان ما يبي الحب ..
مضاوي : ويمكن كان يحب ؟
مزنه تنزل راسها : اي كان بس خلاص السالفه قديمه ..
مضاوي : هههه اقول شوفي كم حطيتي من البودر شكلها العجينه صارت كبير بتنفجر علينا
ندى : الحمدالله ما سويتها كان عايروني الحين فيها ..
الا تدخل عليهم لولوه بعصبيه :
لولوه بصراخ: مصاوي ..
مضاوي تلف متخرعه من الصوت وتنصدم انها اختها لولوه : وش فيك يالولوه ؟
لولوه : يعني بتسوينها ؟
مضاوي بصدمه : وش تتكلمين عنه ؟
لولوه : ابيك بغرفه بروحنا ...
مضاوي تشوف مزنه وندى منصدمات ..: يالله امشي وانا بجي وراك ..
وتمشي مضاوي خلف لولوه وهي تفكر الله يستر من اللي راح يجينا من لولوه .. وتدخل غرفتهم .. ويغفلون الباب ,,,
لولوه تلتفت لمضاوي وبنبره كلها عتب ولوم : يعني بتسوينها وانا اخر وحده ادري بالخبر يابنت امي وابوي ؟
مضاوي تقعد على السرير وتشوف لولوه بحماس بكلامها : وش اللي سويته علميني ؟
لولوه : يعني كنتي ناويه مع عمي تزوجيني فهد ..!
مضاوي : ومن قالك ..
لولوه : مو مهم من قالي المهم الخبر اكيد .او لا ؟
مضاوي تشوف لولوه معصبه : هههههههههه ما كنت ادري انك تتمنينه ..
لولوه بعصبيه: مضاوي انا ما اضحك معك قوليلي الخبر اكيد او لا ..
مضاوي : وش يهمك الخبر يا لولوه ابي اعرف هو يفرحك مثل ماهو بيفرحني .؟
لولوه : اكيد لا ماراح يفرحني ولا يشرفني اني اكون له طعم بيده ..
مضاوي : اي الخبر اكيد وعمي قال بيفتح الموضوع معك بكره بعد ما نرجع من المزرعه ..
لولوه تعطيها ظهرها : قوليله رافضه ..
مضاوي : فكري يالولوه ..؟
لولوه بصراخ : وش افكر بواحد كلمة ما اطيقه ما تكفي ..
مضاوي : فكري يالولوه هذا مستقبلك الانك اذا رفضتي صدقيني بيجبونك بالقوى ..
لولوه : هي لعبه الدنيا اذا ما رفضت زوجوني قصب ؟
مضاوي بعقلانيه : يعني انتي اعرف بحالتك ..
لولوه تتافف : ياربي ياربي يعني لاهم ناوين يصدقوني ولا هم ناوين يقتنعون اني بنت بنت محدن لمسني ..؟
مضاوي : خليهم يقتنعون بزواجك الانك برفضك الاكيد انهم بيشكوون وغير هذا بياخذون عنا فكره اننا بنات سايبات وضايعات ..
لولوه : وليه ما تقولينها لنفسك ؟ او لنوفا او لليلى ؟؟
مضاوي : جب ..احترمي نفسك يا لولوه واعرفي من تكلمين لا انا ولا وحده من خواتك سوت اللي انتي سويته . ولا وحده اطلعت للشقة شبااب او اجلست معهم ولا وحده المست يدها رجال ..
لولوه : وانتي على بالك اني ملموسه واني اضحك وانبسط لا يامضاوي انا مجرد ديكور بس بالشقه ..
مضاوي : اثبتي لي ..
لولوه : كيف اثبت لك ..
مضاوي : بزواجك من فهد ..
لولوه : املك وامل فلسطين واحد ..
مضاوي : اجل خلاص انتي الحين علمتيني انك خايفه وانك (تصر باسنانها ) منتي بنت ..
لولوه : الا بنت
مضاوي : طيب منتي خسرانه تزوجيه واكسري عينه بكلامه ..ومنها تقدرين تتطفشينه وتاخذين حريتك ..
لولوه : والله ودي اكسر راسه واعلمه منهي لولوه بنت عبد الطيف ..
مضاوي بضحكه : هههههه علميه وتزوجيه وعلميهم منهي بنت عبد اللطيف اللي فوق راسهم وتربيته ما تغلط ..
لولوه : بس خايفه ..
مضاوي تحس بانها راح تنجح بقناع اختها : وش خايفه منه ..
لولوه تمسك ثوبها من القرف : انا موطايقه اشوفه كيف اعيش معه ..
مضاوي : هو بس بيشوف اسلوبك كذا بيطلقك ..
لولوه : وياخوفي لا ..
مضاوي : كيفك انتي الخسرانه اولا بتكسرين راسه انك بنت وثانيا بتكسرين راسه وانتي معه بالغرفه هههههههههه من لسانك اللي متبري منك ..
لولوه : هذا الشي اللي كسبته بدنيتي اللساان الطويل ..
مضاوي : وش ارد على عمي الانك قصرتي المسافات كثيره وكنت محتاره وشلون افتح الموضوع معك ..
لوولوه : اممم خليني افكر ..
مضاوي : كيفك الانك اذا طولتي اخاف يجبرونك وبعدها يعااايرك ,,
للولوه : قولي لهم موافق .. وبنشوف يا انا يا فهد بيعيش على هذي الارض ....!!!
وهي تتوعد بفهد بالمستقبل الزاااهر ..
مضاوي وهعي تضحك وحست انه خطتها انجحت بانها تستر اختها حتى لو ما كملت دراستها .. عندها الرجال والستر احسن من الدراسه والاكيد انها ارتاحت انها اظمنت مستقبل اختها ..
وباقي الثنتين ليلى ونوفا .. الله يوفقهم ..
تطلع من الغرفه وفي وجهها تباشير تسعد الموجودين ..
مزنه : يالله تعالي يامضاوي خلص الحلا والكيك وانتي بالغرفه وش تسوين ..
مضاوي وهي تشوف الحضور ... العمه وضحه وام متعب وام مشعل وام حمد .. وتبتسم ..
ثريه : وش سر هالابتساامه ..
مضاوي وهي تشوف ام متعب : الف مبروك يام متعب ..
ام متعب بتعجب ما جاء ببالها انها موافقة لولوه الانه من سابع المستحيلات ...
ام متعب : الله يبارك فيك بس على وشهوووو ؟
مضاوي : عروستكم رضت ..
ام متعب : لا جد مضاوي انتي تضحكين ؟
مضاوي تلتفت تخاف تشوف لولوه موجوده حولينها ..: اي اكيد باذن الله ..
ندى : كبف روضتي اختك ذي ؟
مضاوي : اووص ذي اختي ..
ندى : اسفه بس اعتقد فهد بيتعب حيل معها ..
مضاوي ": صحيح عوبه بس قلبها ابيض ..
ام متعب : على البركه يارب والله يوفقهم بروح ابشر ابو متعب ..
الكل بارك لام متعب قبل لا تقوم ولمضاوي ..


بالجه الثانيه بالمزرعه كانت بس لولوه ونوفا يتمشون ... وعهود وعواشه بروحهم ..يتمشون ..
نوفا : انتي بوعيك يا لولوه ؟
لولوه : اي بوعيي وراح اعلمه منهي لولوه بنت عبد اللطيف ..
نوفا : بتخسرين اشياء كثيره اولها حريتك ..
لولوه : ومن قال انه بيتحكم فيها اي هين والله لوريه واعلمه منهي لولوه ,,,
نوفا : انا خايفه عليك ..


لولوه تشوف نوفا : هع اول مره اشوف الخوف بعيونك ..
تدفها نوفا : انا اصلا اخاف عليك لكن انتي ما تحسبين لي احسااب ولا مقدرتني ..
لولوه : اي واضح ..
نوفا الا تشوف ناصر يطلع من الخيمه الا توقف من غير وهي ..
لولوه : بعرف وش سر هالوقوف اذا شفتي هالشخص الي ما يتسمى ..
نوفا : مدري احس دمه خفيف ..
لولوه : انتي لا تخلين مشاعرك تحكمك ترا كلهم عقارب ويكذبون بحبهم ..
نوفا : انا ما قلت ..
تقاطعها لولوه : ما علينا لكن لا توضحين له خضوعك ..
نوفا : وشتقصدين ؟
لولوه : اصلا واضح بعيونك انك تحبينه ..
نوفا : هو قال بيتزوجني ..
لولوه بعصبيه : متى كلمتيه ..
نوفا بتوتر : ما كلمته لكن مر مره وقالي انه بيتزوجني ..
لولوه : كذاب اصلا هو ويخدعك بمشاعره ...(تهزها مع كتفها ) هيه انتي اصحي مافي حب ولا يخدعونك ال**** بحبهم تراهم عقارب ما تهرول العبث ..
نوفا : وليه بتتزوجين فهد وهو منهم ..
لولوه : الاني باثبت له اني بنت وبكسر راسه على قراره ..لكن انتي بتكسرين راسه ما اظن انتي بتجيبين العيد ..
نوفا : لولوه ليه انتي حقوده يعني بعد ما لقينا الامان هنا تبغين تشتتينا مره ثانيه ..
لولوه : اصلا ما رضيت اجلس هنا الا علشان شي واحد هو ورث ابونا والبيت الي من حقنا ..
نوفا : انتي قلبك ابيض وش اللي غيره ..
لولوه : الدنيا تغير قلوب كثير جت على قلبي انا يانوفا ..
نوفا : قولي انك تحبينه ..
لولوه بعصبيه : وشهو احب منو مالقيتي الا احب فهد واالله ما وافقت الا علشان اقطع راسه واعلمه منهي لولوه ..
نوفا : طيب ليه ما تحبينه بدال الكره ..
لولوه : ما لقيتي الا احبه بعيده ذي بعيده ..
نوفا : مو حلوه بكره تكونين مطلقه منو بيتزوجك ..
لولوه : وانا شكيت لك يا نوفا ..
نوفا بضيقه : طيب انا اسفه الاني دخلت بخصوصياتك ...
وهي تركض بعيد عن اختها وتبكي من تجريح اختها لها .. ومن صدماتها هذي لولوه حبيبتها تغيرت كثير
هذي يدها الثانيه الي ما تقدر تستغني عنها اليوم تغيرت وتحجر قلبها واصبح حديد صعب انه يلين ..
هذي ماهي لولوه القلب الطيب ماهي لولوه الي مدمنه بالمباريات والشقاوه هذي مو لولوه البنت السهل كسب قلبها ..
لولوه تغيرت كثير علي ماهي توامي ..
ماهي القلب الواحد اللي كنا نفكر فيه .. وين ايامك يالولوه الي احس اني انا وانتي واحد .. تغيرتي على الكل واولهم توامك ..
تمشي ببطئ وكلها حيره وخوف ودموع من اختها الا تنصدم بالموقف الي اقبالها ..
توقعت كل شي الا هالموقف اقبال عينها .. مستحيل لا مستحيل اللي تشوفه .. تجمد الدم بخلايا جسمها وعجزت رجلها تمشي خطوه ومن هول الصدمه ..
لا مستحيل ناصر يكذب علي مستحيل يعني انا جد غبيه جد غبيه .. صدقته وهو يكذب علي ..
تتذكر كلام لولوه لما قالت : هم عقارب ما يحبون العبث " يعني كان يلعب معي ويضحك ويقول اني احبك" كانت كذبه " ؟؟
شافت بعينها ناصر عند المدخل القريب من البيت مع نوره بنت عمها عبدالوهاب تضحك معه ومبسوطه ولا ووجها مكشوف ..حست النار بقلبها تغلي من كثر الخدااع اللي صدقته ..
وهي تسال وش هالجراء عند الكل يعني ما يرقبون الا خواتي وهم بناتهم رايحات فيها بالاول نجوى وحمد والحين ناصر ونوره يعني العيب فيهم هم مو فينا ..
شافها ناصر وشكل وجهها في قمة العصبيه ..رسم ابتسامه على وجهه لكل اكتفت انها تلف وجها وتتابع دخولها بالبيت ,, اخر شخص توقعته يكذب عليها ..
خلاص ماعاد له بقلبي مكان للخاين والكذاب ..
استغرب منها ناصر ومن صدها ..
نوره : وش فيك ياناصر ؟
ناصر : وش فيها بنت عمك ؟
نوره : يوو لا يكون تحبك ؟
ناصر : ناوي اخطبها بعد مانرجع من المزرعه ..
نوره : ماشالله الاخبار الجديده شكل بنات عمي محدن بيقعد خالي بالبيت ..الا اله الا الله عشان لا تقول لي عيوني حاره ..
ناصر : اقول انقلعي وشوفيلي نوفا وش فيها ..
نوره : ماشالله وتميز بينهم بعد وانا بعدي اخربط ..
ناصر يقرب منها : الفرق كبير بس يبيله واحد يركز ..
نوره : ماشالله عليك دقيق بكل شي ..
ناصر : ههههههههه اكيد لازم اعرف الفرق ..
نوره : المشكله كسلانه ولا ادري كيف طلعت من الجامعه ..
ناصر : امانه يانوره شوفي نوفا وش فيها ..
نوره : كم تعطيني ..؟
ناصر : اقول اذلفي بسرعه وشوفيها لي وجهها ما يطمن ..
نوره : مرسول الغرام ياعيني بلا مقابل ..
ناصر : بدعي لربي يوفقك ويزوجك الرجال الصالح ..
نوره : ما ابي دعوتك بس ابيك تشغلني بسرعه ..
ناصر : عندك حمد خليه يشغلك واسطه احسن من واسطي ..
نوره : مارجيت الا حمد اروح فيها ..
ناصر : مو كاني عطيتك وجه ..؟
نوره : خلاص هذاني رايحه لها بس شف ممو الحين خليها بليل يمكن معصبه ولا تبي تقابلني تعرف اخاف تسميني سارقة الرجاجيل ..
ناصر : هي ما تدري وش اللي بيننا .
نوره : وش عرفها يالخبل ؟
ناصر بعصبيه: ومنو الخبل ؟
نوره انا الخبله ..
ناصر : يالله روحي لها وقوليلي وش صار ..
نوره : بس ماراح اخبرها بحبك بعلمها بانه يحبني
ناصر : ياويلك اذا مااااا خبرتيها ..
نوره : طيب طيب هذاني رايحه ..
وتطلع نوره تدور نوفا لكن للاسف ما شافتها ..


بالخيمه الرجال بوقت المغرب .. بعد ما خلصو صلاتهم ..
كان متعب عبداللطيف جالس ومبسوط بعد ما لعب كوره مع نواف وفارس وراشد وحمدان صار قريب كثير من اعيال عمه ..فرحان بعد ما تفتحت له الدنيا اوسع ابوابها ..


ناداااه عمه عبدالله ...
ابو متعب : ها يامتعب عساك مبسوط بالمزرعه ..
متعب بتعجب شديد : كثير ياعمي كثير فرحان ياليتنا نجلس بعد اكثر ..
ابو متعب يقرب منه : ماراح نجلس كثير ياولدي بكره باذن الله ابوك بيطلع من المستشفى ولازم نستقبله ..
متعب بفرح اكثر : جد والله ابوي بخرج من المستشفى ..
ابو متعب : اي يابوك بيطلع وبنسوي عسا عشانه ..
متعب بتعجب : لكن انت قلت المستشفى يقول خله المشفى احسن من البيت وانه ماراح يقوم مثل اول ..
ابو متعب : توه متصل علي الدكتور ويقول انه بخير وبكره يقدر يطلع من المستشفى ..
متعب من الفرحه : بروح اخبر مضاوي ..
ابو متعب .يمسكه مع يده : اصبر ياولدي ابيها مفاجاء بكره اول ما يجون البيت يشفون ابوك ..
متعب : وليلى ؟
ابو متعب : قريب بتطلع وانا ابوك ..
متعب بفرحه كبيره من غير شعور وقف وباس عمه مع رااسه ولا يدري وش يقول ولا يشكر كيف لكن وضحة دمعه من عينه من كثر الوناسه ..
ابو متعب : ها تر سر بيني وبينك ليلى بتطلع قريب ..
متعب : متى ؟
ابو متعب : قريب يعني بعد شهر او شهرين والله يولدي مدري متى بالضبط لكن الاخبار الحلوه جت اليوم وان شالله تفرحكم دووم ..
لكن اللي انصدم منه سوال متعب لعمه الي صدم الكل بعد ما اسمعوا السؤال ..
متعب : وبترضى ابوي يعيش عندكم ولا تطردونه ؟
ابو متعب : بيعيش عندنا .وعندكم ..
متعب : يعني ماراح نرجع لبيتنا القديم ..
ابو متعب : لا يامتعب هذي بيتكم وماراح تغيرونه ..
متعب وكانه يبي يتاكد اكثر : يعني حتى لو سكن فيه ابوي مارح تطردونا ..
ابو مشعل يقاطعه : وش نطردكم الله يهديك يامتعب هذا بيت ابوك ورجع له ..
متعب يلف لابو مشعل : لكن هو قال قبل ماراح يعيش فيه حتى لو تصالحتم ..
الكل انصدم بالكلام اللي قاله متعب .. يعني جد لما يصحى ابو متعب بيبعد من جديد ويروح عنه اخوانه ؟
ابو مشعل : لا يولدي انتم عندنا وابوك محتاج لنا الحين قبل بكره ..
متعب : وانا ما ابغا اروح عنكم ..
ابو متعب : ولا نبي فرقاك ياولدي متعب .. انت ولد نا الغالي ..
ابو مشعل : بس لا تعلم خواتك بخروج ابوك خلها مفاجاءه ..
متعب : طيب واذا سالتني مضاوي عن ابوي وش اقول ؟
ابو متعب : قول ما ادري عنه ..
ابو مشعل : لا قول انه بخير يقولون عماني كذا ..
متعب: اها كذا طيب ..
ابو متعب : يالله حمدان يدق العود وش رايك تتعلم منه العود ..
متعب : بروح اقوله يعلمني كيف اطق على العود .
ويروح عن عمانه لحمدان يتعلم على العود ..
ابو متعب : ياخوفي انه يعلم خواته ..
ابو مشعل : وش له تعلمه بخروج ابوه ..
ابو متعب : بخليه يفرح ..
ابو مشعل : وش تفرحه بالخبر على ياس حالته وانت خرجته على مسؤوليتك ..
ابو متعب : ابيه يصحى ببيته يا محمد ..
ابو مشعل : يقولك الدكتور خطره حالته اذا جبته البيت ..
ابو متعب : قلت لك بجيب معه ممرضه تعرف حالته يعني المستشفى نفس البيت ..
ابو مشعل : لا غير ياعبدالله المستشفى اجهزه هنا وش فيه غير الاكسجين وادويته ..
ابو متعب : انا قلت له وخلاص وبكره العصر بجيبه ..
ابو مشعل : الله يعين ياعبدالله لو عرفت مضاوي انه ابوها خارج بمسؤوليتك ..
ابو متعب : ماراح تقول شي بالعكس بتفرح لما تحس بابوها جنبها ..
ابو مشعل : اتمنى تفرح ..
ابو متعب : لا تخاف خلها علي ..
ابو مشعل : مو خوف لك ودي اعرف وش راح يصير ..
ابو متعب : ما بيصير الا الخير ..
ويجلسون سوالف وضحك ..
وعند الشباب طرب ووناسه وشعر ..
------------
في الداخل على الساعه 8 م..
الخدامات بالمطبخ .. يسون العشا ..
والبنات والحريم بالصاله ضحك وووناسه ..
وكانت جالسه نجوى وهيا اختها ونوره ونوفا ومزنه ولولوه وندى ونوره وعواشه وعهود ومضاوي وثريه وهنادي واماني ..
وام حمد وام مشعل وام متعب ..ووضحه .ام ناصر ..
ام ناصر : لا يا ام حمد بالسنه اللي جبت فيها بنتي نجوى ..
ام حمد : لا دي السنه ماكنت مخلفه مزنه .. دي مزنه اكبر من نجوى ..
ام ناصر : بسنه بس ..
ام متعب : والله اني اتذكره مزنه مع والدي حمدان بنفس السنه انا تطلعت من الاربعين انتي ولدتي يا هاله ببنتك مزنه ..
ام حمد : الله ..؟ دي نجوى اصغر من حمدان كمان ؟
ام مشعل : واصغر من ندى بنتي ..
ام ناصر : بنتي نجوى صغير بس جسمها يبين عليها كبيره ..
ام مشعل : ليه ناويه تخطبينها لحمد ..؟
ام حمد : والله ودي لكن الولد مش عاوز يتقوز ..
ام ناصر : الله يوفقك اولدك والله يوفقك بنتي وكل شي كاتبه الله يصير خير ..
ام متعب : اجل زوجي راشد لنجوى ..؟؟
ام ناصر : وليه بنتي بايره ماعندها احد والله نصيبها توه ..
ام حمد : لا مش اصدي كده يام ناصر لكن ولدي راشد يبي هيا اختها ..
ام ناصر بتعجب: هيا ..؟
ام حمد : هو من زمان ئلي انه وده ببنت عمته هيا . وهي ترد على ام متعب ..واعيالك مين بتزوجينهم ..
ام متعب بضحكه : ههههههههه اانا متعب متزوج هنادي وفهد للولوه وفارس عارفين انها مزنه ووملكين عليها لها سنه .. لكن يبي يكون نفسه وبعدها يتزوج ..
وحمدان لعواشه ..
ام مشعل : هو قالك انه يبي بنتي عواشه ؟
ام متعب : من غير ما يقولي انا ابي عواشه لحمدان ..
ام مشعل : الله يكتب الي فيه الخير ..
ام حمد : كملي ياختي ..
ام متعب .: شكلك عاجبتك سالفة الخطبه ..
ام حمد : ياختي تنتي ناويه تكدرينا فرحينا بئه ..
ام متعب : وخلاص وش تبين اعيالي كلهم قلتهم ما بقى الا بنتي عهود والله يرزقها لكن ماني ناويه ازوجها الا لما تخلص الجامعه ..
عهود وهي تسمع السوالف ":: يعني بموت وانا ما خلصت الدراسه ..
ام متعب : هش ووجع تتسمعين السوالف ..
عهود : اصلا الكل منتبه عليكم ومحدن يسوالف ..
ام متعب وهي لاحظه جد انه الكل ملتفت عليهم وعلى سوالفهم ..
ام مشعل : يووو عاد الحين كل وحده بتفكر بفارس احلامها ..
مزنه بخجل : بس مو بفارسي ..
الكل هنا بطها ضحك ..
مضاوي : وي توني ادري انك مملكه على فارس ..
مزنه : من زمان حتى انا نسيتها تصدقين ..
ثريه : علينا يامزنه نسيتي .
مزنه : بس خلاص ..
ام حمد : خلاص بنتنا ماعاد فيهم حيا ..
مزنه : يماااا ما قلت شي ..
ام متعب وهي تضم مزنه : يابعدي والله مرت الغالي ..
مزنه بخجل : بس حمرت خدودي ..
ام متعب : هههههههههههههههههههه خلاص ببعد ..
مضاوي : ماشاءالله الله يوفقهم ..
ام متعب : ويوفقفك انتي يامضاوي ..
مضاوي : لا انا ظاربه عن العرس ..
ام حمد : وليه يابنتي ..؟
مضاوي : ماراح افكر بالعرس ولا ابي طاريه ..
ام متعب : ليه يامضاوي كل بنت تبي تعرس ..
هنادي : ترا العرس عالم ثاني ..

يتبع ,,,,

👇👇👇
تعليقات



    حجم الخط
    +
    16
    -
    تباعد السطور
    +
    2
    -