رواية افهم ترانا لايقين لبعضنا كنك نهائي الكأس وانا هلالي -15
الكنب يتحرك كأن احد يدفه قامت مفزوعه مافي احد غيرها قامت بسرعه بتصعد لغرفتها لاكن تفاجأت بيد قويه تمسك رجلها عثرت وطاحت وهي تشوف من مسكها مافي احد صرخت من رجلها اللي بتنكسر من كثر ماهي مشدوده غمضت عينها ودموعه تنزل ماتدري ايش هذا حاولت تحركها لاكن حاسه انها مشلوله فتحت فمها بخفيف وذكرت الله انفك الشي اللي ماسك يدها بسرعه قدرت تحرك رجلها نزلت راسها تطل تحت الكنب يمكن فيه احد وبعدها قامت وادخلت غرفتها جلست بخوف ومستغربه من هاالبيت الغريب سمعت باب الشارع ينفتح فتحت الشباك وهي تشوف العجوز تدخل قررت تنزل لها تقول لها عن اللي صار ...
تاااااابع<
ياسر: خلي بدر ياخذ سيارتي ويوديكم
ندى : من رجعت من عند سامي وانت مالك خلق خلاص يمكن تنفرج فيها خيره دامهم اجلوها (اتفق ياسر وحمد يخبون الخبر عن الجميع )
ياسروهو يفكر : الله يعين خذي المفتاح اعطيه بدر ولاتطولون انتي عارفه بدر الله يهديه يفحط بااالسياره
ندى تاخذ المفتاح وتنادي بدر باازعااج
ياسر قام ولايدري وين يروح المهم يتهرب من القرار اللي لازم يفكر فيه بااقرب وقت
ريم :بدر ترى ساره بتروح معنا اشوي نتظرها
ياسر سمع طاري ساره قرب عند ندى :وين المفتاح
ندى :هذا
ياسر :اعطنيه انا ابوصلكم
ريم تضحك بداخله على ياسر لبست عبايتها وهي تكلم سااره
ركب ياسر ينتظر البنات يجوون
ريم تركب :واااو ندى تخيلي عهد بتجي بعد
ياسر بلع ريقه حس انه غبي حط نفسه بهاالموقف :ركبت ساره وبعدها عهد
حرك السياره وريم ماتكف من ازعاجها حس انه وده يرميها مع الشباك محتاج هدوء يرتب افكاره وقراره
وصل للمواقف نزلوا الجميع الا ريم
ياسر:ايش تنتظرين انزلي
ريم :وانت ماراح تنزل
ياسر بملل: لا
ريم:تفوت احلى من هاالفرصه
ياسر بعصبيه:ريم انزلي
ريم : مودك اليوم زفت ياالله نازله
فتح الشباك وهو يطالعهم يدخلون وعينه تروح بين عهد وساره ضرب يده على الدركسون بقهر وحرك السياره بسرعه ...
ام يوسف بأصرار :قلت لك ابي اشوف البنت
عفاف :دام بعد يومين الملكه خليها مره وحده يمه سعود راضي فيها يعني ماايفيد روحتنا لهم
سعود:يمه البنت بتعجبك صدقيني وشكل اهلها اجاويد
ام يوسف :خلاص ابكلم اختي الجازي مااعطتيها خبر عن هاالموضوع
قومي ياعفاف قربي التلفون عندي قامت عفاف وقربت االتلفون
ضغطت على ارقام بيت الجازي وبعدها ردت نوف :الو
ام يوسف: مين نوف
نوف:اي خالتي ام يوسف
ام يوسف :اي روحي نادي امك
نوف :امي قريبه مدت السماعه لامها وجلست على الكنب تتصفح المجله
قطع انسجامها وهي تسمع امها تبارك وبعدها انهت المكالمه
نوف بفضول:ماما من تباركين له
الجازي بقهر: راح من ايدي سعود وانتي السبه اخ ياالقهر وين ابلاقي احسن منه لبنتي
نوف وهي تحاول تفهم امها: كيف راح مافهمت
الجازي بأستهزاء :خذته وحده امها داعيه لها مو مثلك وحظك النحس سعود بيتزوج وبعد بكره ملكته !!
نوف وقفت مرتاعه:من راح ياخذ؟؟!!
الجازي وهي ضايقه : هذا اللي هامك من ياخذ وحده المهم انها غيرك يله اجلسي على كبدي انتي واختك قامت وطلعت من الغرفه
نوف تطالع بعيونها بفراغ جلست بهدوء على الكنب وهي تكلم نفسها بيتزوج لا مستحيل اكيد خالتي تبي تحرني وقفت واسرعت تدور وين حطت جوالها فيه دقت على رقم لمياء تتأكد
:صحيح سعود بتزوج
لمياء :هلا نوف باالاول سلمي
نوف بصراخ:ماني فاضيه لك جاوبي علي
لمياء:ليش هاالاسلوب اي بيتزوج مو انتي رفضتيه
نوف:من بياخذ
لمياء:بياخذ وحده اختارها هو هدي ياقلبي مايصير كذا
صكرت السماعه بوجه لمياء وهي تصيح :حقييييير ماعندك احساااس والله مااخليك تتنهنى في اللي اختارها قلبك اكيد مافي غيرها حبيبه القلب والله راح اموتها اذبحها واموتك معهاا ياسعووود
تلفتت منار بخوف وهي تنزل من الدرج ماتبي تقابل الشغاله دخلت على العجوز اللي جالسه تعد فلوسها وتصفطها بحجم صغير
منار تطالع بوجه العجوز شعرها برتقالي منفوش وجهها مثلث ونحيفه مره تذكرت العجوز اللي تطير باافلام الكرتون حست فيه تشابه كبير بينهم
قطع تفكيرها صوت العجوز:ايش عندك
منار منزله راسها بااحراج:خاله خايفه كثير ابجلس تحت معك
العجوز :روحي لغرفتك يابنتي وليش تخافين
منار وهي تتذكر الموقف :شفت اشياء غريبه في البيت تخوف
العجوز تتجاهل منار وتنشغل باالي بيدها
منار تطالعها بصمت حاسه ان ودها ترجع اللي في بطنها من ريحه الغرفه :خاله وين الشغل اللي اشترطتيه علي
العجوز:بعدين لاجاء طلبتك
دخلت الفلوس بصندوق وقفلت عليها كأنها خايفه عليها من منار التفتت عليها:قومي يابنت لغرفتك في ناس بيجون
قامت منار بااحترام تتجه لغرفتها قربت من المطبخ كان ودها تقتل الشغاله على اللي سوته اليوم فيها دخلت وجلست على الكرسي البلاستيك
تنتظر الشغاله بعد خمس دقايق سمعت صوت احد يدخل الغرفه وقفت تشوف مين
حرمه بعبايتها ومعها بنت شكلها باالعشرينات دخلوا بغرفه العجوز وتصكر الباب وراهم استغربت ورجعت تجلس لمكانها وهي تهز رجلها بقلق
يوم الاربعاء ....
لمياء :ها نوفي شرايك بهذا الخاتم
نوف تبين ان هااللي يصير عادي ولايهمها لاكن بداخلها ميته حزن وماراح ينتهى الا اذا نفذت اللي في بالها :ماااره ذوق
لمياء :تعالي بسرعه الحق اشتري لي الشوز قبل لايجي يوسف
نوف تتبع لمياء بزهق ماكان ودها تجي معها لاكن لمياء اصرت عليها
خلصوا الاغراض ورجعوا البيت ونزلت مع لمياء حتى تنفذ اللي في بالها
دخلت الغرفه وهي تنتظر لمياء تدخل الاغراض اللي مع يوسف
فتحت شنطتها وطلعت الالبوم تصفحته على السريع كان كلها صور لها جديده في افضل استديو باالرياض ضحكت بتحدي و
قامت وفتحت غرفه سعود وهي تعرف انه غير موجود قربت من الكنب وحطت الالبوم كأنها نسته في غرفته
اخذت اشرطه افلام وطلعت.. قابلتها لمياء
نوف ترفع الاشرطه :اخذت هاالافلام خلينا ننبسط عليها
هزت لمياء راسها ودخلوا الغرفه
طلعت الفستان وهي تتأمله بأعجاب وتكلم نوف
نوف بالها ماهو معها
لمياء:اكلمك ياحلوه
نوف :ايش قلتي
لمياء: راح انزل اجيب ببسي وجايه
نزلت تحت وجلست شوي مع سعود اللي لسى داخل مع ام يوسف
ام يوسف : متى رجعتي
لمياء :تو ومعي نوف نزلت اجيب ببسي ولاحصلته اكيد سعود مقضي على العلب
سعود : انا الحين طايح على الحليب وعصير الجزر ماني فاضي لهاالخرابيط ابحافظ على بشرتي قبل الزواج
لمياء:ياويلي طيب جيب لنا ببسي وبرجر انا ونوف
سعود: طيب علشان تمدحيني عند زوجتي وتقولين سعود حبيب وكريم ومايرد لي طلب ابقوم اجيب لك
لمياء تقوم وهي تضحك :طيب انتظرك فوق
طلع سعود ورجع بعد عشر دقايق دخل حط الكيس عند الباب ودخل غرفته
اخذ صابونته ودخل يغسل وجه وبعد طلع ينشف باالفوطه وهو جالس على الكنب وباله عند منار طاحت عينه على الالبوم استغرب ماعنده ولاصوره له من هذه البومه اخذه وفتحه وهو يشوف صور نوف ماقدر يوخر عينه من جمالها كانت لابسه فستان فوشي قصير وجلسه على الارض ووراها ديكور ورد وماسكه مجموعه ورود كانه هي احلى ورده بينهم فتح كل الصور وهو يسأل نفسه ايش اللي جابها هنا صكر الالبوم يفكر حاس نفسه غبي وهو يفوت هاالقمر من ايدينه من غير شعور رجع يتصفح الالبوم ويقارن بينها وبين ريم اللي مميزها عيونها الوسيعه وشعرها الاسود بصفه عامه مملوحه وجمالها بعيونها بس اما نوف جميله على بعض مسك الالبوم ووقف حتى يرده لها طلع
وقف عند الباب وهو يسمع صوت ضحكتها بدلع وكلامها ..مايدري ايش فيه ؟؟رجع لغرفته وحط الالبوم وهو يفكر بريم بعدها بدقايق تكلم بداخله صحيح انها تفتن قلبي لاكن ماتاخذه ..قرر يرد لها الاهانه اللي كانت قبل ايام عند الدرج طق الباب على لمياء فتحت الباب مد الالبوم وهو يطول صوته اعطيها البوم صورها وقولي لها مره ثانيه لاتعرض نفسها لاي احد؟؟ لمياء تاخذ الالبوم مستغربه
نوف سمعت الكلام وتغير جوها التفتت لمياء وهو تطالع الالبوم ونوف: ايش يقصد؟
نوف بعصبيه:مايقصد شي البومي ونسيته بغرفته لما جيت اخذ الاشرطه
سمر :اهلين خالد كويس رجعت مبكر تعال اعرفك على صاحبتي
خالد :طيب حبيبتي ابدل ملابسي وانزل
رجعت سمر لدلال حست انها قريبه منها ودخلت معها بسرعه
جلسوا دقايق حتى دخل عليهم خالد
وقفت سمر ببتسامه :دلال هذا خالد
دلال بااحراج من سمر هزت راسها
حس خالد فيها :كيف الحال
دلال وخدودها متورده :الحمدالله
سمر:هذي دلال اللي تعرفت عليها باالحديقه
خالد وهو يجلس :من السعوديه
دلال تهز راسها بهدوء
خالد وهو يطالع الحجاب عليها وحيائها تمنى اخته سمر تصير زيها صحيح انه متفتح لاكن مايرضى على اخته باي شي ويخاف عليها
حس انه كتم على راحه دلال استأذن منهم وطلع وهو مرتاح بوجود دلال في حياه سمر يمكن تأثر عليها
الخميس
المغرب انبسطت عهد بشوفه امهاا جايه للبيت ضمتها بشوق وفرح ماتخيلت ابد هاالجيه دخلتهم داخل وضيفتهم ام نواف
:شخبارك يابنتي طمنيني عليك
عهد وهي بجنب امها :ياالغاليه انا بشوفتك احسن الناس لبى روحك
هديل : حلو المفاجأه
عهد : احلى مفاجأه والله
دخلت ساره اللي كانت لابسه ومستعده تطلع لملكه ريم
:ياااهلا ومرحبا خالتي زارتنا البركه
ام راشد:الله يحييك يابنتي
عهد : طالعه ياساره
ساره : شوي اجلس مع خالتي
ام راشد:لايكون بتطلعون وازعجناكم
عهد : لا بس بنات جيرانا ريم وندى ملكتهم اليوم
ام راشد: ريم اللي جت البيت معك ياساره
ساره:اي ياخاله
ام راشد بطيبه قلب : اجل نقوم معكم ونبارك لامها ريم بنت اجاويد وزارتنا في بيت تستاهل من يقدرها
ساره ببتسامه:والله بتبسط ياخاله لاشافتكم وحياكم الله معنا
هديل قربت بجنب عهد :عهد ابيك في كلام
عهد :خلاص قلبي هيا فوق لغرفتي
قامت عهد وهي ماسكه يد هديل ودخلت الغرفه: هدوول شصار
هديل ببتسامه :عهد ابوي رد لنا
عهد مافهمت : ابوي
هديل : ابوي رجع لنا والله مااكذب
عهد تجلس بجنب هديل على السرير: فهميني بشوي شوي
هديل تشرح الموقف بااسلوب طفولي: لما اخذتك ساره تضاربت انا وعماد غصبني اتزوج ابو عبدالكريم وبعدها ضربته حتى اغمى عليه ماعرفت ايش اسوي هربت لبيت ابوي وطردني ام ايمن الخسيسه وبعدها رجع ابوي وراي واعتذر والحين يزورني كل يوم وطرد عماد
عهد وهي تضم هديل:هدوووول احلفي بالله ابي اصدقك
هديل بفرحه:والله العظيم
عهد : فديته تولهت عليه ياحظك ياهديل تهنيتي به وانا لا
هديل :ماراح تجلسين هنا ولادقيقه ابوي يبي يمتع عينه بشوفتك
عهد نست اللي سواه ابوها معهم بهااللحظه : خلاص ابرجع معكم ياقلبي
ام ياسر تدخل على بناتها بفرحه والبيت يفوح ريحته بخور
قامت ندى تضم امها اللي تمسح دموعها
ام ياسر بخنقه :تمنيت ابوك هنا يشوف بناته عرايس ,وجاسم ولدي اللي ماله حس
ريم اللي خلصت قبل ندى تحاول تونس امها شوي :فديتك يااالغاليه اليوم نبيك تنبسطين معنا ركضت على المسجل وشغلت الطق ومسكت يد امها ببتسامه وهي تحاول تخليها ترقص معها ام ياسر تضحك على ريم حتى واليوم ملكتها ماتخلي طبايعها
دخل ياسر وهو يشوف امه دف ريم ومسك امه وهو يرقص معها بفرح
ريم تصفق بهبال على اخوها وترقص معه
ندى وهي مرتبكه انقهرت من برود ريم ولاكأن اليوم ملكتها مطنشه وبارده رجعت تكمل تلبس اكسسوراتها بعد ماجت من الكوفيرا
سعود لابس الثوب والغتره البيضاء كان شكله يجنن وقف بين خواته اللي لابسين وجاهزين
لمياء :قلبي بيوقف من هالكشخه ياسعود ياحظ زووجتك
سعود:قولي ماشاءالله ترى المراهقين عيونهم حاره
لمياء بضيق:رووح عاد من زينك
عفاف:ههه لاعاد تمدحينه مره ثانيه
ام يوسف :واخيرا ياوليدي ابشوف عيالك قبل لااموت
سعود يحب راس امه:ربي لايحرمنا منك ان شاءالله بتشوفين عيالي وعيال عيالي بعد
ابو يوسف : ياالله ياالمعرس تأخرنا
سعود يمشي وبداخله فرحه تساوي الدنيا كلها اخيرا ريم له بيشوفها بدون حواجز يقدر يضمها ويشم ريحتها
ركب السياره تمنى خالد معه في هااليوم بجد احتاجه
نزلت ام ياسر تستقبل الضيوف
ندى :ياربي احس بخوف غير طبيعي اعطيني برودك شوي
ريم تاكل شكولاته وتشرب قهوه: وسعي صدرك ياحبيبتي تعالي تقهوي معي
ندى بنرفزه :ياربي منك احيان احسك متخلفه
ريم : ليش اقلق وانا اتمنى هااليوم شكلي ابنزل استقبله بنفسي هههه
ندى : ريم شكل اهل زوجك دخلوا
ريم توقف: يله ابروح استقبلهم
ندى :تعالي هيه خبله تستقبلينهم
ريم : ايش اسوي ؟
ندى : ياحبيبتي اذا طلبت منك امي تدخلين تسلمين عليهم
ريم : اها طيب انا شدراني عن نظام الملكه اول مره اتزوج
ندى :ليه تبين تتزوجين كم مره علشان تفهمين
دخل سعود يسلم على ياسر وبعد دقايق دخل وليد
عند الحريم الكل مجتمع يبارك لهم ماعدا ساره واهلها تأخروا شوي
بدا الشيخ يملك وليد على ندى جلسوا عشر دقايق
انتظر ياسر حتى الشيخ يملك سعود ويطلع للبنات
اخذ الكتاب وصعد لندى اللي جالسه بارتباك على الكنب كان شكلها ناعم وهادي ابتسم ياسر حتى يهديها: قمر ياندى بسم الله عليك
ندى بحياء :تسلم ياالغالي ايش هذا
ياسر يمسك يدها بحنان علشان تبصم :يااالله حبيبتي علشان انزل لشيخ مستعجل
طلع لريم اللي جننته حتى تبصم
نزل وسلم لشيخ وطلع قام وليد يستأذنن يطلع استغرب ياسر وفتح عينه بقوه:
ماتبي تشوف عروستك ..؟
وليد ببرود: خلها بعدين انا مشغول
انقهر ياسر بداخله من الرجال اللي طلع بسرعه كأنه يهرب طالع فيه وهو طالع بعدها
دخل يجيب الشاهي قابل ندى اللي نازله تسلم على الضيوف انكسر خاطره كيف يقول لها ان زوجك طلع ولاوده يشوفك وهي مستعده استعداد كامل تطلع له مثل عاداتهم المعروفه
:ندوو حبيبتي وليد راح يجيك بكره يشوفك اعتذر عن اليوم
ندى بصدمه: اعتذر
ياسر :عادي ياقلبي يمكن منحرج الحين اطلعي سلمي على الحريم لاتزعل امي
ندى واقفه مكانها وماتحركت
ياسر : ندى لاتصيرين دلوعه عادي في ناس مايشوفون حريمهم في الملكه يعني ماهو وليد بس
هزت راسها ودخلت تسلم عللى اهل وليد
سلمت على الجميع وجلست والكل عينه عليها دخلت ساره واهلها استغربت ندى من اللي مع ساره كانت هديل بجنبها قاموا الضيوف يسلمون على ساره وهديل وبعدها دخلت عهد وام نواف وام راشد
اتجهت ام ياسر ترحب فيهم وهي من بعيد فجأه وقفت ونظرها على ام رااااااااااااشد حست بدوخه كبيرره قطع حيرتها صوت ام راشد من بين الحريم :ام ياااااااااااااسرررر ...؟؟؟؟
البارت السابع عشر ||
وقفت تطمن على شكلها للمره الاخيره فستان موف فاتح اعطها نعومه وشكلها طالع فاتن لما قصت من شعرها شوي نزلت مع الدرج وهي تسمع صراخ وصياااح طلت برسها من الدرج باستغراب على الصاله وهي تلمح
امها منهاره وتصرخ على الحرمه اللي جالسه على سراميك الصاله وماسكه راسها كأنها مصدومه
ام ياسر:حسبي الله عليك ياظالمه ايش جابك في بيتي جايه تكملين جرايمك
ندى يدها على فمها مصدومه وبصوت متقطع :عمتي هيله ؟!
ام راشد لسانها مشلول وهي تحاول تتكلم
هديل تركض لامها وبخوف حطت يدها عليها :يمه يمه
ام راشد (هيله) تطالع ام ياسر بنظرات انكسار
ام ياسر تقرب منها :اطلعي برا اطلعييي
هديل توقف بعصبيه:خيرر انتي ماتشوفين امي حالها
حست ريم انها مو فاهمه شي سمعت جوالها يدق بغرفتها ركضت ترد
ياسر : ريم اطلعي بسرعه سعود باالمجلس
ريم باارتباك :ياسر مدري ايش صاير تحت في الصاله والله قلقت شكل صايرشي كبير
ياسر مستغرب:طيب انزلي وانا اشوف السالفه
صكرت الجوال وهي تحس باارتباك وفكرها متشتت
ليه؟
تعطي مجال ”لغيري يحتويك
وانا من بد البشر ابيك انت
مابقى الا هالتحفه بيد نوف مدت يدها بسرعه ورمتها على الارض انجرحت يدها بجروح بسيطه طالعت بالدم وهي تبكي بصوت موجوع سعود راح منها لوحده غيرها كان ملكها وجاء من ياخذه باالغصب حست باالغيره شلون تسكت بهااالسهوله يروح من يدها رفضت تروح الملكه ماتبي تحرق قلبها غير ماهو محروق عصرت الدم من اصبعها وكأنها تعصر جروح قلبها وترتاح
في المجلس سعود جالس وهو يعدل شماغه وعينه على الباب ينتظر ريم
وقفت ريم عند الباب خذت نفس ترددت تدخل اللي شافته بالصاله اربكها بالمره عدت لواحد حتى العشره وبعدها تمشي خطوه وترجع بلعت ريقها وقوت نفسها تمنت فيه ياسر يجسرها شوي
:ياربي ايش فيني انا ارتبكت بسم توكلت على الله اخ قلبي يدق شكلي برجع لغرفتي لا لا بيزعل ياسر ابدخل وامري لله
سعود لمح ظل ريم وهي واقفه عند الباب عرف انها مستحيه حط الشبكه على الطاوله وقاام في نيته يمازحها تخبى وراء الباب ماسك ضحكته
دخلت ريم رافعه راسها تطالع في المجلس فاضي وقفت باالوسط :وين راح ؟!
طلع سعود من وراء الباب يمشي بخطوات هاديه ماتنسمع قرب من وراء ريم اللي معطته ظهرها مد يده ومسك خصرها بسرعه وقربها لصدره ويده الثاني رفعها يسد عيونها
ريم ارتاعت وهي تسحب يده من عينها:مين ؟
قرب عند اذنها وبهمس :انا سعود
حست انها بتموت من الحياء نزلت يدها اللي كانت ماسكه يده
سعود بجرأه ضمها بقووه وبااس شعرها وهو يشم ريحتها ونطق بصوت هادي كله مشاعر :احساسك الدافئ لاجاء من نصيبي ماعاد ابي من باقي العالم احساس
ريم قلبها يدق جتها العبره من كثر ماهي مستحيه فك سعود يده من على عينها ولف وجهها له حتى تصادفوا وجه لوجه ريم منزله عيونها على الارض من الحيا حط يده الثنتين بحنان على خدها يرفع وجهها له
ريم حطت عينها عليه وفتحتها بقوه حاولت تركز نظرها مر في بالها لما كانت بالاستراحه تجمدت ملامحها وخرت يده من على خدها بقوه وقرف وصدمه وبداخلها :الاهذا هو لا مستحيل ؟؟؟!!
سعود يطالع بريم اللي نظراتها معلقه عليه وباين عليها الصدمه :ريم؟
ريم تطالعه بصدمه كأنها تتأكد :الاهو هو ارتجف جسمها ونطقت بعصبيه:ايش جابك هناااااا
سعود مستغرب ابتسم ابتسامه صفراء :زوج جاي يشوف زوجته
ريم : زوجته!! حست الدنيا تدور حوليها انا زوجته بلعت عبرتها من الصدمه قرب سعود لها صرخت بوجه :ابعد عني وركضت تطلع من المجلس وكأنها تهرب من مصيرها اللي اختارته
سعود مو مستوعب:ايش صار لها نادها من بعيد ريم رييم لاكن ماسمع رد ( قرب على الكنب يجلس وهو محتار :لايككون ماتدري اني انا اللي خاطبها ؟؟ مسك راسه بصدمه حاول يتماسك شوي
في الصاله
ام ياسر : خلتني اعيش بحسرتي وعيالي تيتموا بسبتها ليه ماقالت لكم عن ضميرها الميت اللي خلاها تقتل اخوها شفتها بعيني ولااحد غيرها فرحت لما شفتها زايره اخوها ابو عيالي قلت يمكن تصالح وياه لاكن جايه تدس له السم في الكاس حتى مات اي مات بين عيوني كله علشان فلوس وصخ دنيا
عهد مصدوومه وهي تطالع ام ياسر : قتلت اخوها نزلت عينها على امها اللي تقول كلام مو مفهوم
لمياء واقفه مع اهلها منحرجين من هاالمشكله العائليه اللي صارت قدامهم
سمعت صوت جوالها يرن باالشنطه فتحت السحاب بسرعه بظنها انه يوسف اللي قالت له يمرهم لاكن استغربت اتصال سعود
:الو
سعود: اطلعوا انا عند الباب
لمياء بارتباك: وعروستك
سعود:خلاص دخلت عليها بسرعه اطلعوا
صكرت الجوال وهي تطالع ام ياسر اللي زادت من عصبيتها وهي تكلم عهد تمنت تسد اذنها ماتحب هاالمواقف ابد
طاحت ام راشد على الارض وسط صراخ بناتهااا
ندى ماتحملت الموقف انزلت دموعها وركضت لعمتها اللي مو حاسه بنفسها ..
ام ياسر جلست على رجلها وهي تتنفس بقوه
طلعو الضيوف ومن ضمنهم الجازي ومها وامهم لاكن بقى اهل سعود حاولت لمياء تساعد ام راشد معهم دخل ياسر عليهم بعد مانادته ندى يسعف ام راشد ...
سعود :اففف ليش تاخروا بعد دقيقه شاف باب الشارع ينفتح وياسر يطلع شايل حرمه مع بدر ارتاع سعود فتح باب السياره وطلع منها
لبست ندى عبايتها وطلعت هي وهديل مع ياسر
سعود قرب من عندهم شاف لمياء جايه من بعيد ركض لها:وش صاير من هذي
لمياء : والله ماادري بس صارت مشكله كبيره وتعبت هاالحرمه علينا
حرك ياسر السياره بسرعه واتجه للمستشفى
ركب سعود هو ولمياء
سعود بخوف :لميا هذي ام ياسر؟
لمياء:لا مااعرفها بس هي شكل بينها وبين ام ياسر خلاف كبير
سعود:وين امي وعفاف
لمياء :بيجون
سكت سعود ولمياء ينتظرون امهم
لمياء :سعود
سعود :همم
لمياء :ماشفنا ريم
سعود بلع ريقه :المرات الجايه
دقايق وطلعت امه وعفاف ....
ام نواف تشرب ام ياسر كاس العصير وتحاول تهديها اشرت على ساره تجي
قربت ساره لامها
ام نواف بهمس :خذي عهد وروحي البيت تهدى
ساره تهزز راسها كان ودها تطمن على ريم لاكن مافي وقت خذت عهد وطلعت
رجع الهدوء للصاله ام نواف بينها وبين نفسها:معقوله ام راشد اخت زوجها يعني عهد بنت عمه عيالها ياربي ايش هاالصدفه تذكرت كلام ام ياسر ان ام راشد حاطه السم بكاس اخوها كان ودها تفهمها السالفه ماقدرت تستوعبها فضلت تسكت ماتبي تزيد عليهم يكفي خربت فرحه بناتها
ريم في عالم ثاني ماتدري ايش اللي صار كل فكرها بهاالشخص اللي طلع بحياتها والحين هي زوجته !!
حست بقهر تمنت انها طلبت رؤيه شرعيه قبل الزواج كانت واثقه من اخوها باالحيل ليش ياياسر لهاالدرجه انا رخيصه ترميني لشخص ماسالت عنه زين ماتدري انه قد خطف اختك قبل وانه لعب عليها لعبه غبيه انه بنت وانه جاي للبيت ينرفزني تحت شباك غرفتي وغير كذا اتصالاته اللي ماتنتهي ويمكن يسوي اشياء انا ماادري عنها نزلت دموعها بخووف كيف استمر مع هاالشخص وهو مسبب لي الرعب كيييف قامت من على السرير بكسل غسلت وجهها من المكياج وبدلت لبسها رفعت شعرها كله وهي تتمنى تقصه كله علشان تمحي اثار بوسته عليه
طلعت ام ياسر لغرفتها بعد ماراحت ام نواف
ريم تطالع من فوق اذا كانوا الضيوف موجودين لاكن كان البيت هادي كأنه عزا استغربت وينهم
فتحت غرفه ندى ماحصلتها فتحت غرفه ياسر وبدر مافي احد ركضت لغرفه امها وفتحت الباب
ام ياسر جالسه على الكنب رفعت عينها على ريم
ريم بخوف:يمه ..؟
ام ياسر اكتفت بنظره
ريم تترك الباب وتدخل :يمه ايش صاير
ام ياسر حست بوجه ريم ان فيها شي :فيك شي يابنتي
ريم انحرجت :هاا ؟ لا مافي شي بس وين الضيوف وين ندى ايش صاير لك قبل شوي
ام ياسر تترك كاس المويه على الطاوله وهي تحاول توقف:اختك ندى راحت مع عمتك
ريم موفاهمه شي:عمتي
ام ياسر :اي عمتك اللي جاي تنكد عليكم فرحتكم ماكفاها الهم اللي عيشتنا فيه
ريم :عمتي هيله جايه اليوم؟ يمه طلبتك فهمني بشوي ماني قادره افهمك
ام ياسر : ابوك ياريم مامات من حادث عمتك هيله هي اللي قتلته !!
حست ان قلبها وقف :قتلته!! طالعت امها بنظرات تايهه
دخلت ام ياسر بفراشها وحطت الغطى على راسها
قربت من امها تلاقى جواب لحيرتها
ام ياسر بعصبيه :اطلعي برا وطفي النوار وصكري الباب
وقفت بروعه من صوت امها وبعدها طلعت من الغرفه ....
في السياره
ام يوسف : قلت لك خلنا نشوف الناس قبل لاتتملك عليهم ونتعرف عليهم ايش نبي من عايله متقاطعين اجل تقول ان عمتهم قاتله رجلها
عفاف حاس في سعود اللي ساكت :يمه الله يهديك انا مالنا دخل في مشاكلهم دام سعود مرتاح للبنت خلاص
ام يوسف : لوك مخليني اختار لك احسن البنات مب ناس مانعرف عنهم شي حتى بنتهم ماشفناها
سعود ماسك اعصابه ويحاول يهدي نفسه بنفسه
لمياء : يمه سعود شاف البنت ومرتاح لا وخلاص تملكوا يعني مايفيد هالكلام هي الحين بحسبه زوجته
ام يوسف : يطلقها
سعود بعصبيه: خلاااص يكفي اللي فيني كلام زايد ماابي اسمعه
ام يوسف :اي خل الجازي تتشمت علي هي حاضره وسامعه كل شي قالت لي قبل يوم خلي سعود ياخذ نوف البنت بدت تقتنع قلت لها لا ولدي لقى له البنت اللي تسعده
لمياء تسد اذنها :خلااااص يرحم والديكم يكفي اللي سمعته اليوم
عهد : ماني مصدقه ياساره اللي صار ابد وربي مااصدق ولاراح اصدقه امي ماتسوي كذا هي تكذب اكيد
ساره : خلاص عهد انسي اللي صار ادخلي ارتاحي وبكره نفهم اللي صار كله
عهد :وين ارتاح ابي اتطمن على امي دقي على ندى رجيتك ساره خايفه باالحيل
ندى وهديل ينتظرون الدكتور
هديل كانت جالسه على الارض تبكي وحالها يرحم نزلت ندى لمستواها وقربت يدها عند كتفها : هدي ياقلبي ان شاءالله تكون بخير
هديل ماردت عليها تبكي بصمت
ندى بتنهيده : لاحول ولاقوه الابالله
قرب ياسر عندهم وقفت ندى له :هاياسر ..؟
ياسر : جلطه في الراس
ندى التفتت على هديل بنظره كلها رحمه
هديل وقفت : جلطه ؟؟
ندى تقرب عندها :اصبري حبيبتي
هديل تدف ندى وتتجه لغرفه امها تحاول تفتح الباب عليها لاكن الممرضه رافضه
:ابي اشوفها روحي عني
ندى تمسك هديل : لاتزيدين عليها هدي من نفسك محتاجه راحه هي
هديل بصراخ :امك السبب في اللي صار لها
ندى انقهرت : امي مالها ذنب ماتوقعت تشوف امك عقب هالسنين
هديل تجلس على الارض تصيح :ابي اشوفهااااااا
ندى تقرب عندها وتضمها لصدرها تهديهااا
ساره بيدها الجوال : ماترد
عهد توقف:ياربي انا حاسه في امي شي (بعدها اتجهت للباب)
ساره :عهد وين رايحه
عهد :لازم اروح لها
ساره : مافي احد بيوديك
عهد:بركب مع ليموزين
ساره :عهود اجلسي راح ترد ندى
نزل سعود اهله في البيت وبعدها حرك سيارته محتار وين يروح يبي يفضفض لاحد لاكن مقرر بداخله يترك كل ربعه اشباه حاتم
اشتاق لخالد كثير من رجعت منار وتبدلت احاولهم لمشاكل واحزان تمنى يسافر له ويجلس معه فتره طويله ينسى كل شي حس بتحطيم كبير بعد ماشاف ريم وصرخت بوجهه كان يظن ان الدنيا اضحكت له منار ردت لاخوها وريم له وخالد قريب لاكن كل هذي الفرحه تحطمت بثواني وكلام امه زود عليه بهاللحظه احتااج لخالد كثييير ماحد فاهمه الاهو
تضيق فيني دنيتي واتعنى ويزيد حزني لاطرى اليوم طاريه
كنت احلم بقربه وكنت اتمنى واليوم عني راح وعجزت القايـه
ياصاحبي اعذر خفوق تعنى من بعدكم ضاق الالم في حنايــاه
قدرك عزيز وبعد بعدك عرفته يارب يعيد الوصل فاللي احبـــــه
احن للماضي وروعه سنينه واذكر حياتي بوصاله وقربـــــــه
والله ماانساه ولايمكن انساه وايامه الحلوه معي او ليــــالـــيه
قفل جواله واتجهه لشقه خالد يرتاح فيها كم يوم ...
وقفت سياره ياسر عند الباب ندى تقنع هديل تنزل معها البيت لاكن رافضه كيف تتقبل امها وكيف تتقبلها ام ياسر
ندى :هديل هذا بيت خالك ماحنا اغراب
هديل :لا ابنزل لاختي عهد
ندى خلتها على راحته وصلتها للبيت وبعدها دخلت لبيتهم
ريم جالسه على الدرج تنتظرها فزت لما شافتهم ووقفت :ندى
وقفت ندى لها ركضت ريم حتى قربت منها : وين كنتي
ندى :مع عمتي باالمستشفى
ريم:ندى طلبتك فهميني كل اللي صار
ندى : خليني ادخل وابدل واكل لي حاجه من الصبح ماذقت شي روحي صلحي لي اي شي
ريم :طيب
رقت ندى فوق فتحت الباب على امها تطمن عليها حصلتها نايمه صكرت الباب بهدوء واتجهت تغير لبسها
فتحت ريم الثلاجه تطلع ميرندا بارده اخذت السندويشه وطلعت فوق قابلها ياسر وبدر حست بغصه بقلبها تذكرت حظها النحس طنشت ياسر اللي كان يناديها مقهوره من داخلها عليه قفلت الغرفه وجلست تنتظر ندى تطلع من الحمام
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك