رواية انا الضحية وانا الجلاد -17
أبتاه..أنقذ إبنتك...
أبتاه كم أنا تائهه...في محيط المصاعب العائلية..
أبتي العزيز...
هاهي الأقنعة تتساقط...والأصوات الناعقة بدأت تنعق...
أبتاه...
رحل جدي..
ورحل معه الأمان...
رحل ورماني لرحمة فيصل...
أبي ...
ربما يضن البعض منهم اني مجنونة..
تكالبت عليها المصائب حتى أفقدتها عقلها عند آخر مصيبة تحل بها...
آخر مصيبة..(كم اتمنى ذلك وأرجوه من الله)
أبي العزيز...
ها أنذا أشكو إليك جبروت فيصل وغرورة...
جنون العظمة الذي يسيطر عليه حتى أنساه معنى القرابة... والأخوة...
ربما بل مؤكد أن الجميع يرى فيه
الرجل المثالي لمسكينة تائهة ومطلقة ضعيفة مثلي...
ولكنني أراه بلا قناع...
أراه الرجل الأناني الذي أنساه رفضي الزواج منه كل أواصر القرابة..والإخاء..
نعم ياوالدي... فلقد جن جنونه حتى دمر زواجي.. ولم يكتف بهذا فقط...
بل أصر على إذلالي رغم حياة جدي...
إستغل خوفي على مشاعر جدي.. وخوفي من فقده ليرغمني على الموافقة عليه..
داهيه يعرف كيف يسير كل شي لصالحة... وليلمع صورته أمام الآخرين...
نعم...
فهو في نظرهم الرجل الذي تخلى عن كرامته ليتزوج بمن رفضته...
لأجل ضعفها, وهو الذي أصر على علاجها, وهو الذي يدافع عنها...
ولكن أمامي يظهر وجهه بلا قناع ليستمتع بألمي...
وليسيطر على كل شيء..
كم أتمنى لو لم اعرف حقيقته...
نعم كم تمنيت ذلك...
فلربما أحسست بشيء من الأمان..
أبتاه...عيناه تنطقان بشئ لا أفهمه مطلقاً..
لاأفهمه..
أحيانا يبتسم ويتحدث بوداد...
وأحياناً يزمجر ويهدد ويتوعد...
أحيانا أحدث نفسي بفضحه أمام الجميع...ولتظهر حقيقته...
ثم ما ألبث ان أتراجع خوفاً على مشاعر أخواتي...
فلا أريد ان يحسسن بفقد الأمان كما أحس...
أبتاه...
هاأنذا أناضل لأحفظ منزلك عامراً, يريدون أن أهجر المنزل لأسكن معهم,
قمة الألم والضياع شعرت به حين سمعت ذلك, رفضت بشدة,
وأصررت ولكن وجدت نفسي بالنهاية مجبرة على الموافقة على أهون الأمرين,
وافقت يا أبي...وافقت أن يهدم الجدار الفاصل بين بيتهم وبيتنا,
حتى يطمئنوا علينا بزعمهم, وليتجنبوا في حقيقة الأمر السخرية الإجتماعية,
بسماحهم لمطلقة صغيرة بالسكن مستقلة بمنزل بلا رجال!!
ربما يكون في هذا الأمر جانب من العقلانية, ولكن في حقيقة الأمر,
يريدون السيطرة علي تماماً,
ولكن هيهات فلست عذبة الطفلة,
و مصير الأيام أن تكشف لهم من أكون...
أبتاه عذراً ولكن...
الآن أبحث عن شيء يدينه...أجزلت للمحاسب الوعود لأنال منه إدانه
أجلعها له تأشيرة خروج نهائي من حياتي..
ولكن حتى الان لم يجد سوى أوراق
ومستندات تدين سعد...
نعم وجدت أن سعد يستغل أموال الشركة لمنفعته الخاصة,
ويستغل بعض من أملاك نجلاء بدون وجه حق...
وهذه الأوراق ربما تنفع في إبعاد سعد بعيداً عن حياتي...
أبتاه...
أعلم أن هذا سيغضبك ولكن أنت من علمتني أنه من الخطأ..
مهاجمة قط في الزاوية لأن ليس لديه ما يخسره.. فأنا الآن قط في الزاوية...
وانا الآن مستعده لعمل أي شي لحماية أخواتي وأخي منهم...
ولحفظ أملاك ناصر لحين عودتك....
فلا تتأخر بالمجيء...فلقد أثقلت الأحمال...وناء بها ظهري...
أنتظرك.....
وبكل شوق...
"في الحديقة"
نورة ونجلاء ونجود وليلى ونواعم يتحلقن على العشب, والخادمات يخرجن الأغراض...
نورة: الحين ليه تروحون للقصيم...شلون بنعيد بدونكم؟
نجلاء: فكة منكم....بنروح هناك وناسة... نلاحق الدجاج...ونلعب بالطين...
ليلى: مو تقولين نقلو عن المزرعة؟!!
نجلاء: إيه هم نقلوا بس يجتمعون بالمزرعة..
نواعم: وأنتي عسى بتسوين فيها كاو بوي!! بتلاحقين دجاج!!
نجلاء: لا بصير تشيكن قيرل...هههههههه
نجود: أهم شي تستانسون...بس بنفقدكم...
ليلى: ياحبي لك..........
_ في هذه الأثناء يدخل تركي على دراجة نارية قادماً من بيت جدته وخلفه
أحمد_إبن أبي عبدالعزيز_ يحمل ملفين, وينادي منبها للبنات بأن يختمرن,
تقافزن البنات وأخذن عباءة نواعم وتخمرن بها جميعاً, فوقف بالقرب منهن وقال_:
هلا بنات... وين المسيو عذبة؟
نجود: مسيو؟!!!هي رجل؟!!
تركي: أعرف بس فتفت بيقول كذا...
_يقفز أحمد ويقول:
وينه ذي؟!!
نجلاء: مب أصغر بزرانك!! وهذا وهي مرت عمك!!
قل أين السيدة عذبة ..هل لي بمقابلتها..
أحمد: أقول تقلعي... تقل مسلسل مدبلج...وينه؟
ليلى: بغرفتها...رح وطق عليها باب الغرفة مو تدخل كذا زي بعض الناس...
تركي: إيه حبيبي... يمكن تصير تلبس ولا شي ماشيات...
عاد عذيب وتلبس... بيقطعك فيصل...
أحمد: .....................
تركي: أها...شكل الفكرة عجبتك أبو الشباب....
لالالا...كل شي ولا هالعلم...تبي تشوف مصاليخ إفتح الـ tv...
بس بنات عمك لا...حرااااااااااااااااام...
نجود: إخس يالمطوع... والـtv حلال!!
نورة: أقول أحمد رح ماعليك... وإن جالك شي إنده ليا أخلصك...
هو أنا أختك ببلاش....
_ذهب أحمد وصرخت ليلى_:
تروووووووووووووك...خذني دورة...
نجود: هو!!!!
تركي: إركبي... بس ترى مالي دخل إن طلعت عذيب...
نواعم: لا .. لاتدخل بمشاكل...
تركي: وانتي مصدقة!!! أستغفر الله...إلا هالعلم...
ليلى: وأنتم مصدقين؟
نجلاء: أغبياء...بس تركي جد ودي أجرب هالدبابة ذي....
تركي: دبابة !!!دبابة تتوطاك ...سلامو...فيصل ينتظرني...ياي
_خرج أحمد يركض ويصرخ بهلع_:
عذبة ...عذبة...ماتت!!!
ماتت..ماتت عذبة...!!!
"الجزء الثالث عشر"
"في غرفة عذبة"
ينفتح الباب ويتدافعن البنات ويلحق بهم تركي وأحمد, ترتمي نجلاء على عذبة وتهزها بعنف قائلة:
عذبة!!عذبة ردي علي.....
_ تفيق عذبة وتفتح عينيها وتنظر لهم بدهشة .._
ليلى: حية!!..أنتي حية؟!!
تركي: حييتي؟
عذبة_تقطب جبينها وتصرخ_:
وأنت شمدخلك غرفتي ... وأنتن ليش ماتغطيتن...
_وتتغطى بلحاف سريرها, تضمها نورة وهي تبكي وتقول_:
ياحبيلك أنتي وهواشتس بس لاتموتين....
تركي: له ...عذبة بكامل قواها العقلية..من هاوشتني إعرفوا إن ما فيها إلا العافية!!
عذبة: نجود...نواعم وش السالفة... وش بالعالم ...وراكم منهبلين؟
يلتفت تركي ويمسك بأحمد الذي يقهقه ويتمايل فيصرخ به_:
كذااااااااااااااب...ليش تكذب علينا؟
أحمد: ماكذبت ...ماتت موته صغرى...النوم موته صغرى
تركي _يشد تركي من إذنه ويخرج به وهو يضربه_أوريك ياحمار...
موته صغرى هاه...بموتك موته كبرى لو بتعيدها...
أوريك...أوريك... هه...يوجع.. أحسن تستاهل....يادب...
نجود: من كثر ما أخذ منا الموت ما توقعته يكذب...
نواعم: الموت يباغت بأي لحظة...
عذاب: يالله العمل الصالح...ههههه...مادريت إني عزيزة عليكم كذا....
نواعم: ولو ...أنتي بعيوننا...
**********
"في القصيم"
وصلن البنات مع جدتهن, أوصلهن بندر مع السائق وعاد بنفس اليوم بالطائرة,
إستقلبن بحفاوة بالغة, وإستقررن ببيت الخال , وتجمعن حفيداته ,
أصرت نجلاء وعذبة على الذهاب لبيت المزرعة,
ولكن العمة رفضت بشدة متعللة بانشغال الجميع بالولائم والإجتماعات في الأيام القادمة
فاضطررن لللصبر حتى ليلة العيد_عيد الأضحى_ فذهبوا جميعا لبيت المزرعة...
دخلن البنات جميعا غرفة صغيرة في فناء البيت , وبدأن بتصفيف الأغراض,
وتعليق الملابس بدالوب قديم, وأخذن أغراض عذبة وأخواتها وبدأن بترتيبها
عذبة: هو!! يابنات...خلو اغراضي ...أنا ارتبهن...
ليلى: الله يجزاهم خير...
نجلاء: وهن شغالات؟!!
هيلة: هــــــــــــــــــــــو!! لا شغالات ولا حاجة...
عادي...ضيوفنا...ووشو ثوبن يعلق...
نجلاء: إممممممم بنات... بننام بذا...
الهنوف: لا...إذا عاندن الحريم بنروح ننام ببيت جدي...بالديرة...
ليلى: طيب ليه تعلقون الملابس بذا؟
حصة: ياشيخة...نبي نطالب بشدة بالنوم بذا...
وش حيت العيال ينامون والعجز...مهوب عدل...
_تدخل العمة , والتي تدير كل أسرة الجد وأبنائهم وأحفادهم_
حصة: يمه....ودنا ننام بذا مع أبوي ومعتس...ومع عمتي عذبة...مانبي نرجع...
العمة: مادري عن اهلهن....بس بنات أختي وأنتي مانب معيتن عليكن...
_البنات بصوت واحد يلهجن بالدعاء ويتقافزن بفرح_
العمة: بس بشرط!!!
شوق: يوووووووووووه...ندري ماتفوته بسلام...
_تضربها العمة بالعصى قائلة_:
وأنتي يا طويلة اللسان...أص...ماتبين الشرط لاتقعدين!!!
وجدان: لالالا...موافقين... بس وشو...
العمة: ترى مب قاعدن بذا شغالات... حتى شغالتكم يا عذبة...
عبدالرحمن يقول ولا شغالة تقعد بذا...كل من جا يطلع ... يقضب شغالته بكراعة ويروح به...
حتى شغالتي وشغالة اختي وشغالة عذيب بيروحن مع أم هشام...
شوق: يووووووووووووووووووووه...وليش جدي يعيي..
حصة: مايحب جمعة الشغالات بمكان العمال... يقول يترززن عندهم ...
البتول: طيب... وش علينا حنا من الشغالات؟
العمة:إيه...جينا لمربط الفرس...مافيه محوقة...والمطبخ تنظفنوه قبل ما نقوم أنا وأختي...
ليلى: خالة..بروح انام بالبيت الجديد إذا المسألة بنشتغل شغالات...!!
العمة: مب تشتغلن شغالات ... بس إذا حستن المطبخ تنظفنوه...
حصة: أوووووووووووووووه ....ميخالف .. بس بشرط....
مب إذا جو هالجحوش وحاسوه قعدتي تهاوشيننا...
مالنا دخل بالشباب
...ولاّ يمه...؟
رقية: إيه..دايم عمي خالد وربعه يحوسون ويشوون , ويمطرسون علينا...
ولا يحلا لهم إلا قبل الفجر بشوي...همن يكومون المواعين بالمطبخ...
وتقعدين أنتي وعمتي ويشاركن أخوكن بالهواش...
العمة: ناه العوبا!!! أخوي مب جدتس!!
نجلاء: عمة اللي يحوس أفقع وجهه بضربة عل الأنف بكعب القدم!!
تنسيه وش أسمتس... ووش أسم قريتكم...ههههه
العمة: أها إعقلي!! مير تعالي سلمي على عيال أخوي يسألون عنتس...
نجلاء: هــــــــــــــــــــــــــــو!!!عيب!!
عذبة_تضحك_: هو يا خالة نجلاء كبرت... والحين تغطى...
خالة...كاميليا ما أبيه تروح مع الشغالات...أحتاجه..
العمة: والله يزعلن الشغالات...ومالي خلق مشاكل..
ليلى: بس كاميليا مو شغالة عادية...
العمة: وش زوده؟!! ولا جايتن من المريخ؟!!
نجلاء: خالة...كاميليا هي بالأساس مربية..
وبعدين صارت مديرة منزل...
والله ما نعرف ندبر شي بلاه...
العمة: اللي ما تعرفن له...حصة تسويه لكن...بنيتي سنعه ...
طالعتن لأمه الله يرحمه.. واللي ماتعرف له كلمنه بالبليه...
عذبة: خلاص بنات...مافي داعي للمشاكل...
خالتي صادقة إذا بغيتن شي...كلمنه...
ليلى: طيب... بس...
نجلاء: خلاص...عذبة متى بنطلع للمزرعة؟
عذبة: الحين...بس أغير نعالي... وأطلع جلالي من الشنطة وأطلع..
******
"في غرفة فيصل"
عبدالمجيد_يدندن_: مجيدوه ...مجيدوه...
عيونك كحليه...
فيصل: يالطيف...أنت من هاكن عليك وقايلن لك صوتك حلو؟!!
تركي: حرام يا عم ...حرام تقتل المواهب الشابة....
عندنا مشروع فنان العرب ثاني..أكمل يا أخى العرب ... ماعليك منه...
عبدالمجيد: هذي الغيرة...
بو صالح سرى ليله...
وهل الدمع من عينه...
تركي كمل ما حفظته زين!!
تركي: لا... ما أحب هالنوعيه من الأغاني...
سلمان: ياهوه...تراكم فقعتوا روسنا...فيصل وين حاط الفصفص؟
فيصل: وش مصبرن..!!شاءت الأقدار إنك ولد أخوي..بلشة...
بالدرج حق الكمدينه...
تركي: لاتقول كذا...حرام...
الله هو اللي يشاء مب الأقدار..
فيصل: إخس...إخس... تركي صرت شيخ من ورانا!!
عبدالمجيد: لا ...أكيد الشيخ متلقي ضربتن على دميجته ...
سلمان: ياخي وينوووووووووووووه...مالقيت شي...
فيصل: إنثبر...خلن أشوف ذا ..بدا يتطوع...
تروك حبيبي.. بالتفصيل الممل قلي...من علمك؟
تركي: ليه ؟ ولا الدين حكر عليكم يعني...؟
لا عمو حبيبي أنا أصلي الفجر على وقته صح مب بالمسجد بس أصلي..
لا تحسبونن كافر ولا ما أهتم للدين!!
عبدالمجيد: له..له..أعوذ بالله..بس حنا نفرح لك.. قل لنا...من قال لك...؟
تركي: أمممممممممممم...حزر فزر..
سلمان: أقول يا تركي قل لهم...ترى بتفقع مرارتي..قلهم خلهم يدلونن الفصفص...
تركي: المطوع ولد الجيران...هههههه...
طلع من بيتهم قبل الإذان بشوي... ولقان أنا والشباب...
وقال لنا تعالو للمسجد..تسننوا وإقروا لمين يذن... العشر فضيله أيامه..
وقال واحد من الربع شاء القدر إني أجي اليوم للنكد, ومير ينصحه...
ويقول له كذا... تدري هالمطوع ما يمل...دايم يجي ويسلم وينادينا...
بس ربعي ماعندك أحد..ههههه ...مزلبين به...
فيصل: تروووك...أنت ماضيعك إلا ربعك...لو تتركهم وتمشي مع ولد جيرانكم ذا
والله تسعد دنيا وآخره...
سلمان: طيب وين الفصفص؟
فيصل: ترى بعطيك طراق يفقدك حاسة اللحس...إذا مالقيته معناه مخلص...
سلمان: ليــــــــــــــــــــه...قبل يومين شاريه...وين راح ..
بتنفقع زايدتك لو أكلته كله...
تركي: وأنت مسوي بالبيت رادار ... لامن شرى شي هجمت عليه...
فيصل ترى ذولا ما ينعطون وجه...اللحين أنت يا بو سنون...
ليش ماشريت لك كيس.. وفكيتنا...
سلمان: أمي ما تحبه... بس تستحي تهاوش فيصل... وبعدين غرفة فيصل المكان الوحيد اللي ما يخضع لسلطة أمي وأبوي بالهلبيت..وين الفصفص ياعم؟
فيصل: لاإله إلا الله محمد رسول الله... اللهم طولك ياروح...
الفصفص أكيد هاجمتن عليه نورة...أنا شفته لحقتن يوم أشريه,
وتتبعت وين أحطه... وقالت لي ميخالف آخذ منه لو بغيت...
وشفته أمس الصبح...آخذتن شي من غرفتي وهاجتن بوه لبيت عمي...
عبدالمجيد: من الآخر...الحب ووكل...أنا ونورة نقماو كله من المغرب
لمين قبل الفجر وحنا نتردد عليه ونفصفص منه.. لمين خلص...
سلمان: أعلم أمي... بس وين؟
عبدالمجيد: بخيمة عمي الله يرحمه...قل لأمك...مب ببيته...
تركي: وانتم تصومون ؟!! هب عليكم أمعاد!!
فيصل: هيه.. لاتنحبهم .. ترى الحسد من قل الإيمان..
تركي:أقول... ورى ماتنزلون...مليت من غرفة فتفت..
فيصل: تفتفت بقبرك قل آمين!!
تركي:آآآآآآآآآآآآآآآآآآمين...
************ "في صباح العيد"
"في القصيم"
الغرفة المخصصة للبنات مكتضة, الهنوف تصفف شعر رقية, شوق تلبس إكسسوارتها,
ونجلاء تلح على ليلى أن تستشور بعض خصلات من شعرها,
عذبة تضع آخر اللمسات لمكياجها, وبقية البنات شغلن بالتزين إستعداداً للذهاب لصلاة العيد
عدا هيلة والتي شغلت بترتيب أخواتها الصغيرات..
ليلى: يوه هيلة ماتلبستي؟
هيلة: لا... واللي عنده خوات يتلبس...دايم لازم أصير آخر الناس...
خوذي الطاقية لأطق راستس بالجدار.._تعنف أختها_
مسؤولية البنت الكبيرة...بلشه!!
عذبة: إي والله صدقتي ... شوفي ليلى... عيني ذي مثل ذي؟
ليلى: إيه بس مو كن هذي أكثر ضل شوي...نجلاء وش رايتس؟
نجلاء: أقول انتي بتحرقين شعري...خلصي علي وبعدين إسألين...آآآآآح..
هيلة: طااااااااااااااااااااااااعون!!! إلبسي نعالتس...لا ..عكس..إيه ذي لذي..
جمانه خوذي شنطتس...عشان تعبينه حلاو... ولا منتب رايحة للمصلى؟
ترى بذبحكن ونصلي عليكن مع صلاة العيد...وجع... لا تحوسين شعرتس..
إلبسي الساعة...وإنتبهي تضيعين شرابتس... ترى مالي شغلة هاليومين إلا أشري شرّاب...
ولامن جينا نلّبس مالقينا شي...
_هيلة مشغولة مع أخواتها والبنات يتابعن الكوميديا
التي تتكرر في كل مرة تلبس فيها هيلة أخواتها الثلاث المتقاربات في العمر_
نجلاء: هيلة...هيلة...
هيلة: هااااااااااااااااااااااااااااااااااااااه...مع السلامة..وه تم بحمد الله...
وش تبين يا كاغيه...
نجلاء: أولا مو إسمي كاغيه... ثانياً أبقولتس أشوني منب أختس...
هيلة: أشوا... ولا كان الحين أنتي قرعاء...
_تدخل حصة بجلابيتها, زاوية شعرها, وترفع طرف جلابيتها بيدها_
حصة: والله كشخوا الربع!! خير إن شاء الله...
ليلى: اليوم عيد...يعني تبيننا نروح نصلي بحوستنا!!
حصة: أقول تكشخن للحم.... أبوي والله إن يملى هالحوش ضحايا...
وانتن لازم تشتركن بالتقطيع, والفرزنة...التوزيع...
عذبة: يوه...ما أعرف...
نجلاء: وااااااااااااااااااااااو... بنذبح الخرفان حنا؟
ليلى: يمه!!
حصة: لا... الرجال وش شغلتهم... بس حنا لازم نساعد الحريم...
اللحم كثير والشغالات والحريم ما يقدرون يخلصونه بدري...
لازم نساعدهن عشان نخلص كلنا بدري... ونقعد جميع..
شوق: يوووه ...عمة...مادام الحريم ساكتين أص...مالنا خلق لحم...
حصة: لا حبيبتي إذا ماهمتس أمتس تشتغل...فأنا منب زيتس...
ممكن عذبة وخواته عشانهن ماتعودن...أما انتي بتشتغلين ...
عذبة: لا....حالنا حالكن...ولا يا ليلى...
ليلى: هه..إيه ...أكيد... اللي بتسونه بنسويه...
نجلاء: خلو الروس علي....
حصة: ماتبين الأمريكان....
نجلاء: أخ من يقدر عليهم لا يحوسهم حوس... حرمون من أمي...
إيه صح أقوم أكلمه...
عذبة: لا..إصبري حد ال
صلاة وبعدين عايديه ...
مايصير المعايدة قبل الصلاة...
حصة: إيه صح بنات...إنتبهن لا تحطن طيب...
ترا المصلى مليان رجال... واللي تطلع متعطرة تعتبر مثل الزانية...
الهنوف: زين ذكرتين... والله هه أناظر العطر بتعطر...
الله يجزاتس خير...
*******
"في الرياض"
يطرق باب بيت أبناء العم, تأتي الخادمة وتفتح الباب, تندفع نواعم ويتبعها سعد وتركي
تركي: ياولد...ياولد...يا بنت..تربيت تربيت..
سعد: ياولد...أبو عزوز ...ياهوه وينكم...؟
_يطل أبو عبدالعزيز من خلف الدرج من بين أغصان أشجار الزينة وينادي_:
بذيا... تعال...مالمك أحد... بس ترى العيال معي...
خل نواعم تروح تخب البنات يخلصن علينا... بنروح نلقى لنا مكانن زين...
تركي: أروح ياعم؟
فيصل: إيه... بس لامن تشوت لا تلومن...ههههه... تركي...أشوف الكوبرا..
إخس من مسويه لك...ههههههههه
تركي: ليه مزبوطة...أنا...
فيصل: تخسى...أخبرك عجزت تزبطه... وهذي سكبة..
عبدالمجيد: لاتصير نواعم...خبري بك أنت وأبوك منتب راعين هالحركات...
تركي: الله ياخذكم جن...ماتخلون شي...ولد الجيران ...وأنا بطلع شفته عند الباب...
عاد ناديته وقلت إسكب لي هالغترة ... خويك عليمي...ههههههه
سعد: وأنت مبسوط إنك عليمي...فشلتنا...
تركي: عادي..عادي يبه... ذولا عماني وعيالهم...
وبعدين تلقاهم كلهم مايعرفون يربطون الكرفته...
ذاك المرة انا قعدت اعلم عزوز يوم جاء يسافر....
سلمان: المطوع ولد جيرانكم ماغيره؟!!
تركي: ومن أعرف من الجيران غيره... ما أعرف إلا سواويقهم....
أبو عبدالعزيز: مايصير يا وليدي.. لازم تعرف الجيران...
سعد: سبحان اللي يطلع الحي من الميت...
تصدقون إن أبو هالولد عمري ما شفته بالمسجد بأي وقت...
وله أخو الله لا يبلانا... والله لامن صار هو وربعه بالحارة...أنادي الحارس يقفل البيبان بالمفاتيح...
سلمان: وراه يا عم ...حراميه!! ماعندهم فلوس...
سعد: ماضيعهم إلا هالفلوس يكحون دراهم...مير الله لا يبلانا أخنث...
تركي: أعوذ بالله يبه...حرام عليك هذا جارك.. ولازم تستر عليهم...
ترا مايصير...كلامك ذا مب سهل... ولو أحد تكلم بي كذا مارضيت..
سعد: لامن صرت زيه...خلهم يتكلمون زي ما يبون...
فيصل: لا يا سعد...كلام تركي صحيح...أعراض الناس مب لعبه...
تركي: مجيد ...يا لهم بنت...تهبل... لاتفوتك...
فيصل: هــــــــــــــــــــــو !!! وين المواعظ اللي تو!!
تركي: طيب وش أسوي هي تطلع كاشفة... وتوقف عند البوابة بدون عباة حتى..
لا وتسألن تقول لي...أنت سواق ذولا...
لعنه تلعنه... أنا سواق...
مجيد: ههههههههههههههههههههههههههههههههههههههه
عنده نظر...
تركي: وشو!!
مجيد: لا أقول... يمكن تحسبك المرافق السوري...ولا التركي الطباخ...كلش جايز..
ام عبد الله_تنزل بالدرج وخلفها البنات وأم عبدالعزيز_:
من اللي يلعن ذا؟
تركي: مب أحد...وشلونتس يمه ترا تأخرنا...
أم عبدالله: اللي يلعن ترقى لعنته للسماء ولامن ما إستحق الملعون اللعنه رجعت للاعن...
مير وين أمك؟ حتى بالعيد ما تنشاف...؟
سعد: عنده مناوبه... بتجي اليوم بالليل...
أم عبدالله: وش عاد.. فرحة العيد بالنهار.. يقطعه من شغله اللي تحرم عياله فرحة العيد معه...
الحين الله لا يقلب روسكم... محتاجين كم ألف تاخذهن من الشغل...
والله ماتسوى جلسته مع عياله...مير قلوبن عليها أقفالها...
أم عبد العزيز: خالتي يالله هذا السيارة بالباب...خلينا نطلع...
نواعم_تهمس في إذن تركي وهي خارجة_: كل يوم بنسمع هالموال...
تركي_بصوت واضح_: كلامها صح...ما...
نواعم:أص... فضحتنا...
_يهمس تركي_: ما قالت شي غلط...
حتى العيد مانشوفها... مب ذي حالة...
*********
"في القصيم"
يدخل أحد الأطفال لغرفة البنات ويصرخ:
إلحقوا بدو يذبحون الذبايح...
_تقافزن البنات عدا شوق وليلى ونرجس, أخذن الشراشف وتغطين بها وأخذن يطللن بالساحة المقابلة للمزرعة اللتي تتم بها عملية الذبح...
ليلى: ودي أشوفهم ...بس أخاف...ليه أنتم ماتحبون؟
شوق: أحسن شي بالعيد الذبح.. بس أنا لامن شفت الدم الكثير دخت...
نرجس: أنا أخاف...الصوت اللي يطلع لامن جت تطلع روحه ...لامن بدا يقول كخخ.. يرعبن كلي...ما أنام بالليل..
_تدخل نجلاء وتبعثر حقيبة عذبة وتخرج كاميرا فيديو وتغادر راكضة ثم تلتفت
وتعود لليلى قائلة_:
ليووووووووووووووووووول... لايفوتس... شي...ولا فيلم تاريخي...
قومي ترا يمكن مانجي نعيد هنا مرتن ثانية....
قومي ...قوووووووووومي_وتشدها بيدها فتتبعها ليلى_
نرجس: يا أختي احب هالبنت... فله...
شوق: بس عذبة تكانة أكثر... ومبين على عذبة إن قلبه طيب أكثر..
هذي الشر من عيونه يطلع...
نرجس: لا تغتابين البنت...
شوق: مو قصدي شر..شر.. لا... الشقاوة... واللعب....ترحل ديرة...
إلا ما لاحظتي شي...
نرجس: لا.. وشو..
شوق: عذبة... مبسوطة...غير يوم نشوفه بالعزاء...
نرجس: يا ملحتس...أكيد عزاء...بتضحك...
شوق: لا مب قصدي... يوم يموت أخوه وأمه...ما صاحت كثير...
بس بتل وجهه فيه الحزن مرسوم...لكن بعد ماشفته بعزاء الشايب..
قلت الله يعين وش بتسوي بعدين.. لكن وجهه أحسن من أول...
نرجس: ................مادري بس كن بوجهه شي مادري وشو...مريضة..
شوق: لا..المسؤولية...تحملت المسؤولية...شي طبيعي..
بس والله إني انبسط لامن شفته تنكت وتضحك...
أحسه مسكينه ما ورا ما شافت...إن شاء الله هذا نصيبه من الهم...
نرجس: شفتي خطيبه؟
شوق: إيه شفته بالعزاء... دخل المطبخ ويصارخ" بسرعة القهاوي تأخرت...
ست شغالات وطباختين ولا تنفعن.."ويلج ...شكله حار ... بس مزيون..
نرجس: يووووووووووه...احلى واحد..تذكرين يوم تدخل سيارتنا يوم كانوا كلهم واقفين يستقبلوننا..
قزيتهم قز... واحد واحد...
شوق: وأنا أشوفتس لزقتي بالدريشة...رحمة إنه مضلله...ولا قالوا ذي ماعمره شافت رجال..
نرجس: يختي .. ودي آخذ منهم... وناااااااسة...
شوق: لا... ماتدرين عنهم... لاتغرتس الأشكال... الله من أبو أحد تحسينه مبسوط
وهو اتعس إنسان...
نرجوسه...وصفي لي إياهم...
نرجس: أبو عبدالعزيز...عادي...ماعليه طويل شوي.. وله عوارض..ومشيب شوي..
سعد... أسمر... حنطي.. له كرش..عيونه مدورة وله شارب... وشكله وديع..
فيصل .. وما ادراك ما فيصل... وش هالطول... وش العرض..جسم شي..
عيونه لوزية...مثل عيووون مين...مثل عيون حصة عمتي...
وهدب.. وعوارض..وبرونزي... بس أحسه غلط يصير مع عذبة...
شوق: ليه؟
نرجس: طويل مرة... وعذبة تميل للقصر إما كانت قصيرة...
شوق: عادي... لا تكونين حاطتن عينتس عليه...
نرجس:لا!!
ربي يعوضه عن هالدب..مشاريوه
شوق: الدب مزيون...تقول نجلاء...مشاري وبندر وفيصل أجمل رجالنا...
وليلى ومنى بنت خالته وخالته فاتن أحلى حريمنا...
إيه ومن شفتي شفتي مجيد..؟..دايم تتكلم به نجلاء..
نرجس: إيه مجيد.. مب طويل مرة... وابيض ويلبس نظارات,
وسمين شوي, وحليو...مب مرة...له سكسوكة
أما بدعتهم..تركي...مادري منين طالع...
شوق: ليه شين قوه..؟
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك