رواية ظل أسود للكاتبة أنـاهيـد -2
ابو سند ابتسم : ابد اللي تشوفه خير البر عاجله
ابو سياف : خلاص اجل ان شاءالله الملكه بعد اسبوعين
ابو سند : ان شاءالله ، اقول ما ودك نطلع هالخميس الديار مربعه ماشاءالله تبارك الله
ابو سياف : اي والله اشوفها بـ الجوال ماشاءالله ربيع وامطار وخير
ابو سند : نكلم الربع ابو سهم وابو نوره ونطلع
ابو سياف : ابد معك ، وناظر لـ سيف ، الصلاه قربت
سيف : ايه يبه
ابو سياف حط الفنجال ووقف وقف معاه اخوه وولده : يالله ياخوي نستأذن عاد اخليك بروح اشوف ابو موسى عازمني
ابو سند بأبتسامة تشرح الخاطر : بحفظ الله يابوي
—
الرياض ..
ساعات كثيره عدت عليهم وهم صادين عن بعض بالوجيه فقط امَا القلوب قريبه جداً من بعضها ، كلهم كان قاسي عليهم الصد اقوى عذاب انك تنجبر تصد عن الشخص اللي تحبه تعب وهو يعطيها ظهره ما يبيها تشوفه وهو بهالحالة يخاف يفقد أعصابه ويرجع يضربها ما يبي يوجعها وبس ، امَا نوره ما قدرت تصبر أكثر من كذا متى يطلع من الغرفه تأخر عليها بالحيل من رجع من الدوام وهي ما شافته ، وقفت بتردد وراحت للغرفه شافته صاد للشباك وواقف ويسوي الكبك واضح بيطلع كملت خطواتها بتردد وخوف خايفه انه يرفضها كتمت تناهيدها المتوجعة بصدرها ، قربت منه مابينهم الا مسافة قليلة غمضت عيونها بـ شوق اتعبها ماقدرت عليه بُعده عنها نقطة ضعفها الوحيدة بالحياة هي اصلاً سوت كل اللي سوته عشان بس تضمن وجوده معاها للأبد : اشتقت لك
سهم غمض عيونه ورفع راسه فوق بلع غصه اِعتلجت صدره بدون ما يرد عليها بكلمة واحدة ..
نوره ابتسمت وهي للحين على حالتها ما تبي تفتح عيونها ولا تبي يعدي الوقت تبي تصمد هاللحظة إلى اكبر وقت ممكن : وين بتروح ؟
سهم اللي حاول بشتى الطرق ما يلين قلبه ولا يرضخ بهالسهولة صدق ان قربها منه يشتته بس هي أذنبت بحقه وبحق حبهم بعد لمن فكرت انها مثلها مثل غيرها : انا رايح للعيال متجمعين اليوم
نوره رفعت راسها وفتحت عيونها بحزن واضح جداً ما قدرت تخفيه : بس انا ما شفتك اليوم كله اجلس معاي شوي
سهم حط يدينه على يدينها اللي محاوطته فيها بعدهم عنه بشويش ولف لها تكلم بجفاء معاها : معزوم تأخرت عليهم ابطلع
نوره ناظرت لعيونه لثواني وتكلمت بعبره : متى بترجع طيب
سهم صد عنها : مدري ، وتذكر شي وناظر لها ، ايه ترا بكره مسافرين للشمال ان شاءالله
نوره ناظرت لعيونه بصدمة تحس الهواء انقطع عن رئتها راحت له بصدمة وخوف : لييه ! ليه بنروح للشمال
سهم انتبه لخوفها : وشفيتس بنروح فيه جمعه مسوينها عمامي طالعين للبر وانا اصلاً الاسبوع الجاي اخذت إجازة من الشغل بنوسع صدورنا ونرجع
نوره تنفست الصعداااء وناظرت لعيونه : سهم
سهم رجع يناظرها : هلا
نوره اوجعها قلبها من كلمته : احبك
سهم ناظرها لثواني بنظرات بارده مالها اي معنى وطلع من الشقه بدون ما يرد عليها ..
نوره خذت قزازة مويا كانت تشرب منها رمتها على باب الشقه وتناثرت حوالينها قطع الزجاج على الارض صرخت بـ ااهه وهي تبكي بقهر : يارب تاااخذ روحححي مع هاللييل والله ما عااد اتحممل حرام عليه والله حرام
ناظر للباب لـ دقايق وهو يكبحَ شوقه و حَنينه لها تعب من كتمانهّ لـ مشاعره داخل صدره لكن مجبور على هالصد هو مجروح منها جرححح كبييير يبي له أيامم وسنين عشان يشفى منه ..
-
الهنوف مدت الفنجال لـ ابوها : سم يبه
ابو سند : سم الله عدوتس
فهد خذا الفنجال من الهنوف وناظر لـ ابوه بتسأول : عمي ابو سياف عندنا !
ابو سند بأبتسامة : ايه جاء اليوم قبل المغرب بشوي وجاب معه ولده سيف
سند ناظر لـ ابوه : ليه
ابو سند ابتسم : خطب اختكم اميره لـ سيف ولده وانا عطيته اياها
فهد اللي كان يشبه ابوه ببعض الاطباع : الله يوفقهم
ام سند بصدمه: بس يا ناصر انت ما شاورت البنت حتى كيف توافق عليهم كذا
ابو سند ناظر لها بنظرة حادة : انا ادرى بمصلحتها ذي بنتي ترا ماني براميها على رجال ما ابخصه زين
سند أستغرب من تصرف ابوه : بس على الاقل تدري يعني من حقها !
رمَقه فهد بنظره حادة : سيف رجال أجودي ومحترم انا اقول الله يعينه على اختك ام لسان واللي ما تحترم لا صغير ولا كبير
ام سند انقهرت من كلام فهد عن اميره : عيب هالكلام تراها اختك
المها بقهر : يبه مهما كان لا ترمي بنتك هالرميه لـ مجرد انه ولد اخوك
ابو سند بعصبيه : قل الله حلاتس ما عاد به حيا انا بناتي ما ارميهن لحد انا بناتي يطلعن من بيت ابوهن وكرامتهن محفوظة
ابو سند ناظر لـ ام سند بغضب : روحي قولي لـ اميره عن الخطبه وقوليلها ان ملكتها بعد اسبوعين وابوتس وافق
فيصل بدفاع : على اي اساس يبه تقرر عنها وتزوجها بعد وانت ما اخذت رايها ع الاقل
ابو سند ناظره بعصبيه : والله ما بقى الا انت يالورع تعلمني وش اسوي ووش اللي ما اسويه قم اذلف عن وجهي
فيصل بغضب : ماني بذالف واميره اذا ما تبيه ما راح تاخذه لو على قص رقبتي
فهد بعصبيه : لعنه تلعنك انت واختك احترم ابوي لا افرك وجهك بالارض
فيصل ناظر له بحدة : وانت عادي عندك اختك تروح لرجال يمكن انها ماتبيه
سند : يبه انا داري انك تدور مصلحة اميره بس يبه ليتك شاورتها ع الاقل
ابو سند ناظره بغضب وصد لـ ام سند : انتي علامتس قاعده للحين تبين اسوي لتس زفه عشان تقومين
ام سند قامت : خلاص خلاص بروح الله يستر بس اميره قويه محد يقدر عليها
ابو سند بغضب : اقول روحي بس
الهنوف كانت تناظر الموقف بذهول وخوف خايفه على مشاعر اختها وخايفه عليها لو درت بالخبر ذا وهي دايم تسمع اميره تسب سيف ما تحبه ولا تطيقه ولا تحب حتى طاريه ..
ام سند جلست : مساء الخير
اميره نزلت رجولها من على الطاوله اللي قدامها وناظرتها ببرود : مساء النور
ام سند بهدوء : اميره ابيتس بموضوع
اميره قلبها بدا يرجف وهي عارفه وش الموضوع حاولت تسيطر على خوفها لكن فشلت ..
ام سند بتوتر : يا يمه ولد عمتس سيف جاء اليوم وخطبتس من ابوتس
اميره وقفت بصدمه : انا مو موافقه
ام سند مسكت يدها ونزلت راسها وبعدين رفعته وناظرتها بحزن : بس ابوتس وافق وملكتكم بعد اسبوعين
اميره بعدت يدها عنها وناظرتها بصدمه : خييير ان شاءالله على كيفه يوافق وانا ما دريت
وطلعت بتفتح الباب
ام سند مسكتها : يا يمه اجلسي ابوتس معصب وتو مهاوش اخوانتس لا يهاوشتس وتسمعين كلام بيوجعتس
اميره بقهر : ابعدي عني محد له دخل فيني لا انتي ولا غيرتس ، وفتحت الباب ونزلت تحت شافت ابوها واخوانها وسند وعياله وخواتها ..
اميره نزلت ووقفت قدام ابوها بجراءه وعيونها بعيونه : سيف ما راح اخذه وانا الزواج ذا ماني موافقه عليه
ابو سند وقف والغضب معمي عيونه من عياله واللحين جت اميره اللي ما تحشم احد : سيف بتاخذينه ورجلتس فوق رقبتس ولا تكثرين بالكلام لا والله تشوفين شي ما يعجبتس
سند : اميره ارجعي لغرفتس
اميره بقهر : ماهو على كيفك انت وياه ، وناظرت لـ ابوها ، مالك دخل تقرر عني لا انت ولا احد غيرك
ابو سند ضربها كف سند راح يمسك ابوه بصدمه
ابو سند بغضب : انتي يالورع ترفعين صوتس علي لا والله يا ناصر انك ما عرفت تربي عيالك
اميره بقهر : اسمع اقول زواج والله ما اتزوجه بطيب ولا بالغصب واذا مستحي ترد اخوك انا اللي ارده وعاداتكم وتقاليدكم التراب تروح تمشيها على بناتك ماهو علي انا
فهد معصب : الله ياخذ هالوجه يالسفيه ياللي محد عرف يلمتس
فيصل بقهر بعد فهد اللي كان يبي يضرب اميره : انقلع عنها لا اكسر لك يدك
ابو سند : اعقب انت وياه وانتي فارقي وجهي انقلعي لجحرتس لا اشوف وجهتس
ام سند مسكت فيصل : خلاص يا يمه تعال امش ابوك لا يصير له شي من ورا عنادكم
اميره ناظرت لـ ابوها : تسمعني انت
فهد عطاها كف : انتي ورا ما تحشمين ابوي يالكلبه
سند جاء وبعد فهد : انت قدامنا وهذي علومك من ورانا وش بتسوي اجل
فهد بغضب : اعقب وطس من البيت انت والرمه اخوك الكلبه ذي ما لها كلمه بعد كلمة ابوي
فيصل : لها راي ويمشي غصب عن شاربك
اميره مسكت يد ام سند ب : يمه تكفين مابيه سوي شي
ام سند بقلة حيله : شسوي يابنيتي ابوتس راسه قوي واخوانتس كل واحد جاي بشره
اميره راحت لغرفتها تعبت ولا عاد تتحمل هالاجواء ذي ابد ..
البارت الخامس
بعد مرور ساعتين
فهد لمن شافها توارت عن انظار ابوها دخل غرفتها وقفل الباب بالمفتاح : الظاهر ان ابوي ما عرف يربيتس لكن ما يمنع اني انا اربيتس من جديد
اميره خافت بس ما وضحت له : اذا تبي تستعبد احد روح استعبد خواتك الضعيفات انت مالك كلمه ععلي وسيف غصب عن خشمك ما راح اتزوجه واذا ميت عليه روح اعطيه الهنوف
فهد مسكها مع فكها بقوه ويده الثانيه شاد فيها شعرها كانت دموعها تنزل من الألم : والله ثم والله انتس لتتزوجين سيف غصب عن خشمتس والشنب هذا ماهو على رجال اذا خلال هالشهرين ما خليتس تطسين معاه
اميره ما تقدر تتكلم : ابـعــد عنننني يامريضضض
فهد : اللحين تمشين قدامي وتقولين لـ ابوي انتس موافقه
اميره تبكي : تعقببب وتخسسسى
فهد مسكها مع شعرهااا بقووووه : اخلصييي علييي
امييره تبكي : بععععد بعد يـ ، ما كملت كلامها الا هي مغمى عليها وطايحه بالارض ..
فهد طلع من الغرفه وكان بوجهه فيصل اللي يرمَقه بنظرات كلها حقد وغضب : اختك السفيه روح اللحق على بقاياها طايحه بالغرفه مثل البهيمه
فيصل ركض للغرفه مثل المجنون : امييييره امـ انقطع صوته بعد ما شافها طايحه وجهها احمر واضح ان فيه احد معنفها
فيصل صرخ بصوت عالي : فهههدددددد
ام سند وقفت بخوف : بسم الله وشصاير ، وراحت هي وابو سند والمها و الهنوف
امَا فهد بكل برود راح لغرفته وجلس يكمل باقي اعماله حقت الدوام ..
فيصل ماسك أميره وحاطها بحضنه ويصارخ : هاتوا المفتاح بسرعه
ابو سند بخوف جالس على ركبه : وشفيها وشفيها
ام سند تبكيي وهي جالسه تقرا عليها
فيصل ناظر اهله بحقد وهو مطنشهم كلهم ومتوعد فهد بقلبه بس يبي يتطمن على اميره اولللل.
ام سند جابت المويا وهي تمسح على وجهها دقايق وصحت اميره وهي بعد دايخه : بسم الله عليتس اميره تسمعيني
اميره ناظرتهم وسكرت عيونها
فيصل مسك وجهها : اميره
اميره بصوت متقطع : هـ ـلا
ام سند بخوف : اميره انتي صاحيه
المها : اميره انتي بوعيتس ؟
ابو سند : نوديتس للمستشفى
اميره بتعب : لا مابي ابي انام
فيصل : النوم ماهو اللحين وناظر للمها هذي مين
اميره : ترا مو فاقده الذاكره
ضحك فيصل : لا الحمدلله دام اللسان موجود الامور طيبه
اميره بتعب : مابي اروح للمستشفى
ابو سند : خلاص يلا يا عايشه حطي العشاء انتي والبنات وراحوا كلهم نزلوا تحت
اميره تبكي : فيصل تكفى مابي سيف
فيصل : ما راح تاخذينه وانتي ما تبينه اللحين ارتاحي ولا تفكرين ابد
اميره قامت بصعوبه بمساعدة فيصل اللي سدحها على سريرها وغطاها : شوي واجيتس
اميره جلست تبكي وهي تمسك راسها بـ ألم : الله ياخذك يالكلب
فيصل ضرب الباب بيده بغضب ودخل وبدون اي كلمه ضرب فهد مع وجهه بلكمه قوييييه خلته يطيح بالارض وما برد قلبه جلس يضربه من كل قلبه : اليد اللي تنمد على امييييره اكسسرها تففهم ولا تحسب اميييره ما وراها رجال لا اشتهيت تضربها ضربتها
فهد ابعده عنه وضربه مع صدره بـ لكمه اقوى منه : الله ياخذ هالوجه يالرمه تضرب اخوك عشان وحده ما تحشم حتى شايبها
فيصل بقهر : الحشيمه لـ اهلها يا حمار ماهي لكل من هب ودب واميره محد يضيمها وانا باقي حي
فهد يمسح خشمه بقهر : اقول اسمع انت وياها علمها ان سيف بتاخذه غصب عن خشمك وخشمها
فيصل بغضب : كلام ياصلك ويتعداك سيف ما بتاخذه والله لو توصل للدم ما تاخذه وهي ما تبيييه
ابو سند ضرب الباب : الله لا يخلف على هالوجيه ومن متى انت وياه لكم راي عليها يالتسلاب وانا حيي وانت اسمعني ، ورفع أصبعه لفيصل وهي يأشر عليه ، كلمة ابو سند عطران الشوارب ما كسروها ما راح تجي على تالي عمري يالورع تنزل كلمتي بالارض اختكم بتتزوج سيف غصب عنكم من كبيركم لصغيركم ووالله لو ادري ان اخوي او ولده دارين عن سواياكم الرديه او واصلتهم طرف هرجه اني بري منكم ليوم الدين
فيصل حس الهوا بدا يختفي من صدره من القهررر وطلع وضرب الباب بيده بقوه وراح لغرفته وهو معصب ..
—
نوره راحت تتسبح وطلعت لبست فستان بقماش ثقيل شوي باللون البيبي بلو كان مطرز بشكل كامل ومُلفت وأنيق جداً قصير لنصف الفخذ تقريباً او اطول بشوي مغلق من عند منطقة الصدر والرقبه بطريقه أنيقه وفيه فتحه بالظهر معطيته جمال وأناقه مضاعفه مع اكمام طويله ولبست حذيان باللون الاوف وايت مزينه بكريستيال راقي جداً راحت لتسريحتها وحطت ميك اب سمبل ابرزت فيه جمال عيونها الواسعه وشفايفها الممتلئه بطريقه مُلفته وجذابه امَا بخصوص شعرها فـ صلحت فيه ويفي عريض ورجعته بالكامل على ورا وبعد لبست الطقم اللي جابه لها سهم هدية يوم زواجهم وكان عباره عن أسواره أنيقه من الألماس مرصعه بالزمرد باللون الازرق كذلك معاها خاتم وحلق تعطرت وتبخرت وعطرت المكان وكانت هي من البدايه مرتبه البيت وحاطه الطاولات بشكل أنيق والورد الابيض والورد البيبي بلو حاطته بشكل أنيق مع البالونات والكيكه الزرقا وأكواب العصير الأنيقه كانت ليله مُلفته زرقاء بـ اختصار ..
سهم كان واصل من عشر دقايق لكن جالس بالسياره وبيده هدية مغلفة واللي كانت عباره عن سلسال من الذهب الابيض أنيق جداً وناعم يناسب شخصية نوره بس ما كان يدري كيف يعطيها اياه هو متأكد انها مستحيل تنسى ان اليوم ذكرى زواجهم الثالث
10 أكتوبر ..
الساعه 12 ليلاً ..
نزل من السياره بعد صراع طويل بين عقله وقلبه واللي انتصر بالاخير حبها اللي مرحب فيه بقلبه وعقله معاً ..
دخل الشقه شاف الانوار خافته جداً مافيه الا نور الشموع الموجوده بطريقه أنيقه على الطاولات وبعد نور الشباك الزجاجي الكبير اللي كان مفتوح على المباني والابراج العاليه ما كمل تأمله لمن حس بيدينها الناعمه تحاوطه بدفء : كل عام وانت بخير حبيبي
سهم حاوطها بذراعه : كل عام وانتي حبيبيتي
نوره بحب : اشتقت لك
سهم مبتسم وهو يمسح على شعرها الناعم : تدرين انه مو أكثر مني
نوره تحس الأرض مو شايلتها من السعادة : تعال بوريك وش جبت لك
سهم ابتسم : لا أول انا
نوره بتفكير : طيب وش جبت لي ترا كل مره نفتح هديتك قبل هديتي
سهم : شسوي مقدر اصبر ابي اشوفه عليتس
وأخذها للغرفه قدام المرايه بعد شعرها الطويل وحطه على كتفها اليسار ولبسها السلسال وهو مبتسم : أحلى من العقد لبّاسه
نوره حطت يدها على السلسال وابتسمت : يا بعد روحي انت والله
سهم ربت على أكتافها بحب : تستاهلين عيوني
نوره : تعال شوف هديتي
سهم راح معاها
نوره : وش تتوقع
سهم : قهوه
نوره انقهرت : سهم خير
سهم بنذاله : عيونه شعرفني مره اهديتيني كذا
نوره تذكرت اول ذكرى زواج لهم لمن اهدته قهوه وضحكت : لا جبت لك شي حلو عطني يدك بس
سهم مد يده نوره طلعت ساعه بقيمة 7 آلاف ريال
سهم أبتسم : يا بعد عيني والله
نوره ابتسمت ولبسته خاتم بعد باللون الازرق بقيمة 1500 ريال
سهم : الله الله وشذا الدلع ليه كلفتي على روحتس ياعمري
نوره : ولا كلفت ولا شي انت تستاهل روحي
سهم : الله يحفظ روحتس مافيه شي ثالث
نوره : وشذا الطمع
سهم : شعرفني قلت يمكن فيه تعويض
نوره : تعويض عن ايش
سهم : القهوه
نوره : يليل ذا القهوه انساها تكفى
سهم : تمام بشوف الموضوع
نوره تذكرت اول ذكرى زواج لهم لمن اهدته قهوه وضحكت : لا جبت لك شي حلو عطني يدك بس
سهم مد يده نوره طلعت ساعه بقيمة 7 آلاف ريال
سهم أبتسم : يا بعد عيني والله
نوره ابتسمت ولبسته خاتم بعد باللون الازرق بقيمة 1500 ريال
سهم : الله الله وشذا الدلع ليه كلفتي على روحتس ياعمري
نوره ابتسمت : ولا كلفت ولا شي انت تستاهل روحي
سهم : الله يحفظ روحتس مافيه شي ثالث
نوره : وشذا الطمع
سهم : شعرفني قلت يمكن فيه تعويض
نوره : تعويض عن ايش
سهم : القهوه
نوره : يليل ذا القهوه انساها تكفى
سهم : تمام بشوف الموضوع
نوره راحت جلست على الكرسي وقدامها الكيكه والعصير وحلويات وقهوه جلست تطقطق على جوالها تنتظر سهم نصف ساعه جاء سهم بعد ما تسبح وغير ملابسه لبس بنطلون كارجو باللون الابيض مع هودي بنفس اللون طالع شكله مره أنيق
نوره لمن شافت سهم ابتسمت مدت يدها : بسم الله عليك وشذا الجمال ؟
سهم مسك يدها وجلس : والله انتي الجمال كله تعالي نقطع الكيكه
نوره : احط لك
سهم : ارتاحي انا بحط لنا
نوره مدت الصحون له : امسك
سهم يناظر عيونها بأستغراب : شدعوه صحن واحد يكفينا
نوره : طيب ملعقه
سهم بعناد : وحده تكفينا
نوره : كان علمتني ما اجيب كوبين
سهم : للأسف ما لحقت
نوره مدت له عصير : بالعافيه حياتي
سهم : تعالي
نوره قربت : ايش
سهم : اشربي
نوره شربت شوي
سهم شرب الباقي : والله لذيذ
نوره : اي ادري تحبه عشان كذا طلبته
سهم باس يدها بأبتسامه : محد يفهمني كثرتس
نوره : افا عليك بس
سهم : تذكرين يوم زواجنا
نوره تضحك : لا تذكرني صابني خفقان من الخوف مدري شوضعي
سهم ضحك : واللحين
نوره : ندمت على التوتر والقلق
وجلسوا جلسه مليانه أعترافات ومشاعر وشوق وذكريات حلوه ..
نوره بعد السوالف والمواقف الحلوه سألته بتردد : انت زعلان مني
سهم حط يده على فمها قبل تكمل : لا تكملين مابي اتذكر اللي صار
نوره بحزن : سامحتني
سهم بصدق : اييه ولا بقلبي عليتس شي
نوره بألم : والله ما تدري وش كثر تعبت اليوم
سهم حط يده على يدها بحب : بسم الله عليتس من التعب اهم شي ان حبيبتي تكون بخير والباقي هين
نوره حطت راسها بحضنه : الله لا يحرمني منك
سهم يمسح على شعرها : ولا منك يارب يلا قومي ننام ورانا سفره من الفجر ..
—
الساعه 4 الفجر
كانت المها والهنوف نايمات عند أميره ، أميره ما زالت صاحيه من التعب اللي تحس فيه لكن هالتعب ما يساوي شي قدام تعبها النفسي وهي تشوف احلامها تموت وتحترق قدامها بيد أبوها أبوها سد بوجهها كل الأبواب حطها قدام الأمر الواقع بشكل مُفزع وصادم كسرها بدون ما يسمح لها ولا لعايلتها انهم يجمعون بقاياها حرمها من حُب حياتها محمد ولد عمها صدق انها طول هالسنوات تشيل حبه بقلبها بالخفى عن كل الناس وصحيح ان الحُب من طرف واحد مُهلك وبشع لكن كان يكفيها انها تظفر فيه بالاخير يكفيها انها تُقيم حياه كامله على حبها حبها راح يكفيهم ..
أميره راحت لـ ام سند شافتها تدعي لها وهي معطيه ظهرها للباب سندت راسها على باب غرفة ابوها وخالتها وهي تمسح دموعها راحت قدام ام سند وهي تبكي بحضنها : يمه تكفين كلمي ابوي اني ما ابيه يمكن ربي يلين قلبه ويهديه مع ذا الفجر
ام سند تمسح على شعرها : اميره بسم الله عليتس وش مصحيتس !
أميره بضيق : ما نمت
ام سند بحزن على حال اميره : روحي نامي وصحي خواتس اذا ما صلوا وانا بكلم ابوتس
أميره بأرهاق : لا ما راح انام ييممه ابعرف وش يرررد علييتس
ام سند تدري ان ابو سند مستحيل يغير كلامه ابداً مهما كان عشان كذا تبيها تنام وترتاح : يا يمه روحي نامي وبكره خيير يلا انا بعد ما نمت ابكلم ابوتس وانام
اميره قامت بضيق : طيب
وراحت صحت خواتها يصلون ونامت بصعوبه ):
—
مع الطريق ..
سهم ناظر لـ نوره بتساؤل : وشتبين أغنيه
نوره ابتسمت : لا مابي اغنيه
سهم بأستغراب : اجل
نوره بوله : ابي اسمع سواليفك بس
سهم : سواليفي اللحين
نوره : ايه سواليف الصبح ترا مافيه احلى منها
سهم ما كمل كلامه لمن شاف جواله يتصل : لحظه
ام سهم : صباح الخير
سهم : صباح النور يالله تحيي الصوت وراعيته
ام سهم : الله يبقيك وشلونك
سهم : ابشرتس بخير انتي وشخبارتس
ام سهم : بخير الحمدلله انت ماسك خط
سهم : ايه
ام سهم : الله يحفظكم
نوره خذت الجوال من سهم : شخبارتس خاله
ام سهم ابتسمت : هلا والله يا يمه وشلونتس
نوره : بخير الحمدلله انتي كيف حالتس
ام سهم : ابشرتس اني بخير
جود خذت الجوال من امها : نوير
نوره مبتسمه : يهلا والله
جود : اول شي شخبارتس
نوره : تمام انتي شخبارتس
جود : بخير بخير
سهم : ذي جود
نوره هزت راسها بـ الايجاب
سهم : الله يعينتس عليها
جود : اقول الخلا انت لا تكلمني ما اكلم عيال الرياض
سهم : وشفيهم عيال الرياض يا بنت الشمال
جود : لا جيت علمتك عطني حرمتك
نوره : سمي
جود : انتي عارفه كل شي احبه صح
نوره : صح
جود : تدرين ان الليله بنطلع للبر ونخيم هناك
نوره : ادري
جود : تدرين ان الهديه مستحبه بالاسلام
نوره : ادري
جود : لا تقصرين مع اختس المسلمه ادخلي السرور على قلبها ماعليتس من ذا رجلتس سهم مدري قوس تراه خبيث
نوره ناظرت سهم وضحكت
سهم : هين انتي وياها
نوره : انا مالي دخل
جود : انا قايله من زمان المتزوجات مالهم امان
ام سهم : عطيني الجوال خربتي الرصيد
جود : ماعليتس ولد الرياض جايتس وبيشحن لتس وبتحشين بحريم عمامي
جود : نوره لا تنسين اللي وصيتس
نوره : ماعليتس يلا مع السلامه لا تحقد علي خالتي
جود : لا ماهي بحاقده عليتس انتي حبيبتها
نوره : الله يطول بعمرها
جود : امين توصلون بالسلامه
بعد دقايق ..
سهم مبتسم : وشفيتس تناظريني كذا
نوره بحب مسكت يده : اشتقت لك
سهم باس يدها : والله اني مشتاق لتس
نوره : كيف بقضي هالايام من دونك
سهم : لا تحديني ارجعتس للرياض ونسحب عليهم
نوره : لا لا تكفى مشتاقه لـ ابوي و لـ اختي ، سهم
سهم : عيونه
نوره : لا رحنا هناك لا تقطعني ابي اشوفك طمني عليك
سهم : من عيوني انتي تامرين امر لو تبين اسنتر ورا خيمتكم من الصبح لليل مافيه مشكله
نوره بغيره واضحه : عشان اكسر لك عظامك
سهم يبيها تغار اكثر : وشفيتس تراهم بنات عمي
نوره : بالله بنات عمك اجل حتى انا بجي ورا خيمتكم
سهم بعصبيه : لا تخليني احذفتس مع الشباك اللي بجمبتس اعقلي
نوره رجعت على ورا بقهر : وانت اعقل
سهم : خلاص بعقل بس روقي
نوره لفت وجهها للشباك مجرد فكرة ان سهم يكون مع انسانه ثانيه غيرها تدمرها وتذبحها لكن هي مجبوره للأسف تتقبل هالفكره هي عقيم وهو اكيد بيوم حزين وبتاريخ أليم راح يتزوج عليها ما تحملت الافكار اللي تجيها لين شافت نفسها تبكي بصوت مسموع ..
سهم وقف السياره على جمب وحضنها : نور حبيبتي وشفيتس بسم الله عليتس
نوره ساكته
سهم : حبيبتي اسف انتي عارفه اني مستحيل اشوف احد غيرتس
نوره بحزن : انت اكيد بتتزوج علي
سهم حضنها بحب وخوف : تدرين اني من تأخر حملتس وانا ما اهتميت مو لأني ما ابي اشوف عيالنا بس لأنتس تكفيني عن أهل الارض كل ابوهم انتي مو بس زوجتي وبنت عمي انتي حبيبتي وصديقتي وبنتي وروحي
نوره مسحت دموعها بيدينها ورجعت لمكانها : اسفه مدري شفيني صايره حساسه
سهم ابتسم ومسح دموعها : ماعليه ياروح سهم اهم شي هالوجه الحلو ما يبكي والله
نوره حضنته مره ثانيه عن شوقها وهي ودها ما تتركه لكن كتمت مشاعرها : يلا نمشي
سهم : يالله
سهم خذا قهوته وشغل اغنية (وشلون ما اغليك ) وكان متعمد يشغلها بهالوقت يبي ابو نايف يوصل لو شوي من مشاعره لهذي الانسانه اللي بجمبه يبيها تسمعه وتصدق انه شاريها لو ثمن هالحب بيزعل الدنيا واهلها ..
البارت السادس
الساعه ٩ صباحاً ..
الاجواء مُمطره وتفتح النفس والغيوم مغطيه السماء بشكل جميل جداً ..
واقف ابو سياف داخل الحوش بالشاص وعنده سيف وسعود جالسين يحطون بيت الشعر بالحوض
سيف جلس على العتبه حقت الباب بتعب وناظر لـ ابوه : يبه والحريم
ابو سياف : انا كلمت عمك ابو سند يجيب خيمه للحريم
سعود بتعب : والماء
ابو سياف عصب : الماء والعزبه على ابو سهم بس هاتوا الحطب بعد ما ندري عن الديره اللي بنجيها ذي اول مره ندخلها يمكن ما بها حطب واربطوا الحطب بحزمه ولا تنسون عمدان البيت واغراضه كامله حطوا الحطب على طرف وانتي يا ريم روحي شوفي امتس وش ناقص من اغراض اكتبيها وعطيها سيف يجيبها
ريم راحت لـ امها : طيب
جُمان جالسه مع امها بالمطبخ تجهز الاغراض عشان يحطونها بسيارة سيف ..
ريم : يمه ابوي يقول وش ناقص
ام سياف : لا مافيه شي ناقص كل شي جهزته من امس بالليل وعلمت به سعود وجابه معه
ريم : كويس والله فيني نوم
جُمان : لا يسمعتس ابوي يعلقتس مع ذا العمدان
ريم : يليل
—
في بيت أبو سهم
محمد مدخل السياره ويطنب بالحوش
ابو سهم طلع معصب : انت متى تعقل فضحتنا
محمد مبتسم : يبه امانه علمني من جاب فكرة هالطلعه ابحب خشمه
ابو سهم : عمك ابو سند الله يطول بعمره ويخليه لنا
محمد : الله يطول بعمره
ابو سهم ناظر لـ محمد : سو لك شغله بدل ذا الوقفه الباطله
محمد : يبه كل شي طلبته حطيته وسويته ما عاد باقي شي لكن انت تدور علي الزله
ابو سهم : لا بالله ما عاد به حيا
محمد حب راس ابوه : جعلني قبلك يا يبه امزح معاك
ابو سهم : اخوك متى يجي
محمد : والله مدري يمكن العصر او قبله بشوي
ابو سهم : لازم قبل العصر لان بنمشي مباشره بعد صلاة العصر
محمد : ابشر ولا يهمك
امجاد جالسه على الباب : محمد
محمد : قومي وشذا الجلسه كنتس شحاته
امجاد بنوم : مالك دخل فيني فيك كوميديا طلعها على اختك
محمد : وش نفسية الحوامل ذي
امجاد ناظرته بطرف عين : ابي اروح للبقاله
جود تمشي وبيدها شبس وعصير : وانا بعد بروح معاكم
محمد : يلا تجهزوا خمس دقايق ما لقيتكم قدامي مافيه روحه بروح اغير ملابسي واجي
امجاد : زيين
ام سهم تناظر لجود : وشذا الاكل اللي ما يجبر العظم انتي ليه ما تاكلين معانا تونا مفطرين
جود : يمه والله ما تعجبني الاكلات الشعبيه
ام سهم ناظرتها بطرف عين : بوديتس لولد عمتس سعود يعالجتس يفتح شهيتس
جود بهيمان : لا تكفين مالي خلق اعيش قصة حب
ام سهم : بنت استحي على وجهتس
جود ضحكت بصوت عالي : علمتس بس
ام سهم : اص لا يسمعتس اخوتس
جود وقفت راحت تجيب عبايتها : ولا يهمتس
—
محمد طلع من غرفته وشاف ابوه : ارحب يابو سهم
ابو سهم : على وين
محمد : البنات يبون البقاله
ابو سهم : البقاله ذي ما تخلص
محمد : شرايك اردهن يبه ما ينفع الرجال لازم يصير ثقيل
ابو سهم : اقول مابك ثقل بس روح لخواتك
محمد : الله يسامحك عز الله انك ظلمت ولدك
ابو سهم ضحك : ولد البنات ينتظرونك اترك عنك السوالف
محمد : ابشر ابشر يلا تامر على شي
ابو سهم : لا بس روح
محمد لبس نظارته : الوالد يبي الفكه بعدين وشعندك جالس بروحك
ابو سهم رفع العقال : ما تستحي انت
ام سهم جت
محمد : وشعرفني قلت يمكن تراسل حريم
ابو سهم : اقطع واخص ما ربيتك انا
محمد انكتم من الضحك
ام سهم : ليكون صادق محمد
محمد : ياويلك
ابو سهم يناظر لمحمد بحقد : اقول اذلف بس انتي تصدقين ولدتس المصروع ذا
ام سهم : والله مدري من اصدق تعال تقهوى بس
وجلسوا يتقهوون
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك