رواية مأساة بلا دموع -30
في غمرة تجهيزاتهم للسفر.. نست مي تقريبا.. وش كانت معاهدة نفسها عليه أو يمكن تناست...!!
كانت هي ومضاوي طالعين للسوق.. ومي بنفس العباية اللي الله أعلم إذا عباية ولا فستان..! واللثام الخفيف هو المغطي جزء من وجهها..!
كانت تتمشى ومضاوي جنبها لافه الطرحه بس بدون غطاء.. وما انتبهت أنه فيه أحد جالس يطالعهم.. وماهو مصدق اللي يشوفه..!
دخلت محل وما أعجبها اللي فيه.. طلعت منه ودخلت ثاني.. وطبعا مع البائع أنواع المياعه والكلام الفاضي...!
كانت تطالع العرض لما حست بواحد جنبها على طول.. وواضح أنه عريض البنية.. التفتت بخوف.. وهي تسمعه يقولها : تغطي مضبووط.. تـرى سـعــود هـنــا....!!
طالعته وماهي مصدقه وشلوون عرفها...؟! معقوله للحين يذكرها لما شافها بزواج اختها....!!
كان سعد قد طلع بعدما رمى هالكلمتين على مي ورااح...!!
مي تلتفتت بالمحل كله.. لكنها ماعرفت من يكون.. هو واحد يقرب لهم.. ومن جهة خالتها بس من يكون...؟!
طلعت بسرعه من المحل وهي تغطي وجهها.. تعرف سعود أخوها لو يعرف أنها طلعت بهالشكل للسوق ليمسحها بالارض.. مايحب حركات الصياعه على البنت... فما بالك أخته...!!
مضاوي وهي تمشي جنبها : بس ماخلصنا..!!
مي وهي تصارخ عليها : ماهو بلازم.. يكفي اللي خذناه...!!
مضاوي بقهر : انتي دايما كذا.. كل شئ على مزاجك.. إن ماعلمت عليك امي..!!
مي كان تفكيرها بالشخص اللي كلمها فما التفتت لأختها ولكلامها اللي تقوله لها..!! كل همها ترجع للبيت.. وتدق لغاده وتسألها من هو..؟ ووشلووون عرفها...!!! وهي ناسيه انها للحين مالها وجه تتصل بغاده أو حتى ترسل لها رساله..!! بعد اللي صار لها مع بسام..!!
"<>"<>"<>"<>"<>"<>"<>"<>"<>"<>"<>"
بعد رجوع يوسف والعنود للرياض.. توجهوا لشقتهم بالاول.. كانت العنود لاول مره تشوفها.. أعجبتها الفخامه اللي فيها.. وديكوراتها اللي مضفية لمسة حلووة عليها...!
يوسف : بأدخل آخذ لي دش وبأنام.. وياليت تصحيني على الساعه 3 عشان يمدينا نطلع نسلم على اهلي..!!
العنود بابتسامه : ان شاء الله...
دخل يوسف ينام.. وظلت العنود بالصاله.. ماتدري ليش تحس انها يمكن بأي لحظه تفارق هالبيت اللي عايشين تحت سقفه هم الاثنين ولوحدهم...!!
ظلت فترة جالسه بالصاله.. تفكر بأهلها.. بأبوها وبأمها االمشتاقه لهم.. بأخوها اللي ما سأل عنها.. بأختها اللي ما انقطعت عنها...!!
كانت تتذكر كيف كانت أول مكالمة لهم.. لما ردت عليها أمها بصوت عذب.. ماقدرت تمسك دموعها.. وصاحت فراقها وبعدها.. وحتى حنانها اللي فقدته...!!
لما سألها يوسف بعد ماقفلت السماعه.. بررت بأنها أول مرة تفارق امها لمدة طويله...!! لكنها شافت بعيونه تساؤلات يوم عن يوم تزيد...!!
تذكرت الدفتر اللي كان معها.. واللي كانت بعد كل رحلة تكتب فيه حرفين.. بعيد عن انظار يوسف...!!
فتحته وبدت تسلي نفسها فيه..!
كانت كاتبة على صفحة..
سألها مستنكرا أحزانها :
أي أمرأة تحت جلدك يا امرأة..؟
رفعت إليه جفنين أثقلهما الوجع والأسى.. وقالت :
ويح عمري أي سؤال هذا به تقذفني؟؟
وأي جحيم هذا الذي فيه ترميني؟
آه سيدي... ما أحراك.. قبل أن تلقي هذا الفكر..
في أتون سؤالك المحرق هذا..
ما أحراك أن تسألني..
أي نوع من الجلد هو جلدي..؟؟
أهو جلد كجلود سائر البشر؟!!
أم هو جلد فولاذي.. محال أن يخترق؟!!
نعم سيدي.. هو جلد فولاذي..
جلد.. كم أدمي..!
كم جرح..!
كم نزف..!
وعاد... عاد في ثوان والتأم..
فيحمي تحته امرأة منسوجة من خيوط الشفق..
امرأة حريرية... حالمة شفافة...
عيناها الفراق..
شفتاها الاوجاع..
خفقات قلبها قرع طبول الاحزان..
وخصلات شعرها..
شعاع الشمس والنور والاحلام..
امرأة تعيش ف عالم برزخي..
كأنها قابعة في صدر السماء..
أو كأنها نجم باسق يهيم في الفضاء..
.
.
فتحت صفحة ثانية.. وهي تقرأ كتاباتها.. وتعقيباتها..
ذروة تعاستنا هي ذروة سعادة عشناها..
لكننا لم نمتلكها..
سعادة تسربت إلينا في غفلة من الزمن..
سعــادة.. سنذكرها – والله – دائما.. دائما.. فتبكينا ونبكيها...!!
لما قرت هالعبارات.. كتبت تحتها مقولة ذكرها الدكتور صلاح الراشد..
" إن الله لا يبتلي ليعـــذب..!!
إنما يبتلي ليهــذب..!!"
.
.
.
.
.
.
.
.
.
بالليل كانوا مجتمعين بالعزيمة اللي مسويتها أم يوسف لولدها بالقاعه..!
الكل كان فرحان ومبسوط بالعنود.. إلا عفاف اللي فرحتها ماكملت حتى بوجود مرت عمها اللي هي خالتها أم زوجها ولا وفاء اخته..! بس علشان ما تشمت احد فيها وخاصه مرت عمها الحسووده حضرت وهي متنرفزه ومالها خلق..!
غاده.. قهرها أسلوب مرت عمها من كثر ما تلمح لها بكلمات.. هي نفسها ماتبغى تفهمها...!!
كانت العنود نجمة الحفلة بجمالها وحلاتها.. ورقتها ونعومتها.. وقبلها بابتسامتها اللي حاولت تخفي خلفها خوفها من ضياع هالجمعه كلها بغمضة عين...!!
الكل حضر.. ماعدا الجده أم خالد.. اللي زاد تعبها وماحبت تجي على قولتها " تكلف على أحد..!! "
بعد الحفلة مباشرة.. طلعت العنود مع يوسف.. وتوجهوا لبيت الجده.. وهناك كانت فرحاانه باستقبالها لهم.. وخاصه وهي تشوف يوسف وجهه منور.. والابتسامه مافارقته..
والعنود برضه كانت السعاده باينه على ملامحها..!
أم خالد : الله يحييك ياأبوي.. والله اني فرحانه اليوم بشوفتكم..
يوسف : ان شاء الله دوووم ياميمتي..!! وش اخبار التعب معك.. ان شاء الله احسن..؟!
ام خالد : الحمد لله على العافية.. والا وانا امك لو بنشكي من يوم لبكره ماسكتنا.. بس الله يعظم الاجر...!!
العنود : طهوور ان شاء الله...!
يوسف بمزح : يالله عااد خلك غزال لا يهوون المعرس...!!
ام خالد : الله يمكر بك.. مابرحت على طبعك ما غيرك العرس.. ولا انا وش يبي بي المقروود..!!
يوسف ماااات من الضحك على جدته : ههههههههههههههه المقرود مره وحده..؟ هذا وتوه مابعد جا اجل لو جا وش بتقولين له..!!
ام خالد عصبت : الله لا يحييه..!!
يوسف : أفــا...؟!!
العنود : وش عندك على خالتي..؟ خلها في حالها..!!
يوسف يستهبل : نصلح من دونك...!!!
ام خالد : يالله الثبات..ياحبي لبنيتي فازعتن لي وانت تضيق عليها ( والتفتت توجه كلامها للعنود ) ما عليك منه وانا أمك.. تراه يلعب عليك يحب المزح والا ما تطلع منه الكلمه الشينه..!!
يوسف : مدري ذي كلمة مدح والا مسبه...؟!!
العنود : هههههههه.. تستاهل..!
يوسف وقف : يالله يمه نستأذن احنا..!!
ام خالد : هااوو.. ماامداكم تقعدون لو ساعه..!!
يوسف : العنود يمه ماسلمت على اهلها وماهي بزينة في حقي ما اوديها.. باذن الله يومين وجايينك.. وبنجلس عندك بعد..!!
ام خالد : الله يحييكم.. الود ودي تجلسون عندي.. وحرمتك مثل بنتي.. بس شغلك واهلك اولى بك.. وانت ماتقصر جعلي ما أخلى منك..!!
وطلعوا من عندها راجعين لشقتهم.. ومن بكره العنود بتروح لاهلها تسلم عليهم...!!
بعد يومين ..
وعفاف بغرفتها.. وصلها مسج من الرقم الغريب اللي دايما يرسل لها..
وهالمره كان مرسل مسج سخيف.. بعدين وصلها منه ثلاث مسجات ورى بعض..
.
.
كل ما جيت ابتدي فيك انتهيت ....
وكل ما جيت انتهي شفتك بدايه .....!!
ان كتبتك حرف شفتك الف بيت
وان كتبتك بيت صرت لي روايه ...!!
اهني اللي معك في وسط البيت ...
واهني كل العيون اللي تشوفك والمرايا ..
.
.
دايم على بالي ولا يوم ناسيك ..
وانت لزيم الروح واكثر شويه ...
بدرب المعزة اشهد اني مخاويك
واخترت شخصك بين كل البريه
الرب يعلم بالغلا كثر مغليك ...
ودايم مكانك في الشموخ العليه
.
.
*أحبك* ما هي كلمه انا دايم ارددها ...
*أحبك* كلمه لا قلتها اقصد معانيها
صحيح الحروف قليله اذا ودك تعددها
ولكن المعاني ما هقيت انك بتحصيها
وفا واخلاص وظروف تعاندني واعاندها
مشاعر صادقة والود ساكن معانيها
.
.
انقهرت عفاف اكثر واكثر.. هالمسجات مع كثرتها الا ان اللي يرسلها للحين ما مل ولا يأس.. ومستحيل يكون احد مايعرفها..!
طلعت للصالة اللي فوق.. ورفعت السماعه.. هي اللي راح تعرف ليش عزيز مايبغى يكلمها..؟! ليش جواله على طول مقفل..؟! والاهم ليش ما سأل عنها...؟! وشو هالشئ اللي مانعه ومخليه يبتعد عنها هالفترة كلها بدون سؤال ولو من أمه....؟!
دقت ارقام بيت عمها.. وهي متأكده ان اللي بترد هي مرت عمها..
عفاف بربكة : ألووو..
ام عبدالعزيز بفرحه : وعليكم السلام ورحمة الله وبركاته.. حياك الله يابنتي وشلونك..؟!
عفاف خنقتها العبرة وحست بحنين لها : هلا خالتي.. انا الحمد لله.. انتو وش اخباركم...
ام عبدالعزيز : بأتم نعمه ولله الحمد..
عفاف بصوت بالكاد طلع : وعــزيــز....؟!
ام عبدالعزيز بإيمان صادق : الحمد لله يابنتي ماعليه.. بس انتي عارفته اذا عصب ولا ضاق ينعمي..! وانـّا ساكتين عنه..!!
عفاف : ياكل زين.. وينام كويس..؟! هو بخير..؟!
ام عبدالعزيز : ماعليه وانا أمك.. الله يفرج عنكم.. ويردكم لبعض ياربي ياكريم..!
عفاف باشتياق : آمين.. خالتي..؟
ام عبدالعزيز : سمي..
عفاف : خالتي..مم.. ابى اجيكم.. عادي..؟!
ام عبدالعزيز بخوف على ولدها : إذا طلع عبدالعزيز قلت لوفاء تكلمك... ولا وهو فيه.. أخــاف...
عفاف تقاطعها : ماله داعي ياخالتي تبررين.. حتى انا خايفه عليه.. بس ودي اشوفه واريح قلبي..!!
وفاء اللي جت لأمها : من هذا..؟!
أم عبدالعزيز تاشر لها أنها عفاف...!
وفاء بصوت هامس : عزيز بينزل الحين يتغدى..!
أم عبدالعزيز باختصار : سلميني على الوالده والخوات.. فمان الله...
عفاف حست بخنقه : مع السلامه....!!
مع انها ماكذبت خالتها.. الا انها تحس انهم مخبين عليها شئ.. ولا معقولة الانسان اللي كان معها قبل أيام من أحسن مايكون.. فجأة ينقلب 180 درجة وبدون سبب..!!
نزلت تحت.. وكانوا أهلها مجتمعين بعد الغدا.. بما فيهم يوسف.. اللي ترك زوجته عند أهلها يومين..!!
يوسف متعجب : أنتي هنـــا...؟!
عفاف بتعب جلست.. ولا ردت.. لأن أمها هي اللي تولت الرد عنها..
أم يوسف بقهر : وانت ماتدري وش فيه ولد عمك عليها.. حتى أبوك مافهمني شئ..؟!!
يوسف : ولد عمي.. منهو..؟ عبدالعزيز..؟!
ام يوسف : هذا انت تسأل وتجاوب.. أكيد عندك علم عنه..!!
يوسف : الله يحييك يااميمتي من وين بعرف وماصار لي الا كم يوم راجع.. ليش وش فيه..؟!
عفاف بقلق تقاطعه : هو ما يداوم..؟
يوسف : اشوفه بالشركه.. بس صحته ماهي ذيك الاوليه ولا حتى سوالفه.. صاير هااااادي جداا..!!
عفاف بخوف : يمه بأرجع بيت عمي واللي يصير يصير..!!!
ام يوسف بحرص الام على حياة بنتها : اذكري الله وشدي ارضك.. الى ما يهدى رجلك ونعرف وش فيه يكون خير...!!
.
.
.
.
.
.
.
.
كانت العنود ببيت أهلها جالسه مع مها.. تسولف لها عن حياتها الجديده.. لكن بمواضيع سطحية ماتخص حياتها الزوجية بوجه خاص.. كانت تحكي لها وش شافت.. وش المواقف اللي مروا فيها.. ودايما تسألها عن احوال أمها وتعبها.. وعن أبوها وزعله عليها...!!
مها بضيقه : ما كأنك زودتيها حبتين...؟!
العنود : وتلوميني.. لو انتي مكاني كان سويتي الاعظم...!!
مها : انا ما ألومك.. لكن انبهك.. اوجهك للصح.. شفتي وشلون ابوي استقبلك.. شاف ان وضعك عادي ونفس حالك.. جايه تبكين أكيد بيتوقع الاسوأ...!!
العنود بخوف : الأسوأ...؟؟!!
مها : يعني كأسوأ احتمال.. بيتوقع رجوعك له – لا سمح الله – مطلقه....!!
العنود برهبة : يمـــه.. بسم الله علي.. الله لا يقوووووله..!!
مها ابتسمت بخبث : لهالدرجه حبيتيه...؟؟؟!!
العنود استحت : وليش ما أحبه... انتي عارفه من يكون..؟ هذا يوسف أخو عفاف...!! اللي كم وحده تتمناه..!!
مها : وطاح في حظ العنود...!!
العنود : تكفين.. بس من يصدق اني تزوجت..!!
مها : الله يوفقك.. بس نصيحه من اختك المجربة.. لا تخلين التوافه من المشاكل تأثر على حياتك...!!
العنود تنهدت : الله يصبرني لين اقول ليوسف عن كل شئ...!!
مها بدهشه : وانتي ان شاء الله للحين ماقلتي له....؟!!
العنود بتوتر : لا..ابغى تكون عندي القدرة الكافية للمواجهه..!! بدون معرفته لي معرفة تامه ماراح يصدقني لو حلفت له مليون حلف....!!
مها : والله هذي حياتك وانتي أدرى فيها... قومي ننزل نجلس مع أمي شوي.. أخاف يجي العاشق الولهان.. عريس الغفله ويخطفك من بين يدينا...!!
العنود دزتها بدفااشه : لا تسبيين....!! هههههههههههه...
مها اكثر شئ ريحها.. أن اختها رجعت تضحك من جديد.. نفسيتها ارتاحت.. حتى وجهها استعاد حيويته ونشاطه من جديد...!! بس الله يستر من اللي جاي...!!!
.
.
.
.
.
.
.
.
.
ام يوسف بعد سفر أختها.. جاها اتصال من خدامة أمها تبلغها فيه ان امها تعبانه..!!
كانت غاده هي الوحيده اللي كانت قريبه من أمها من بعد زواج يوسف..! لن الكل منشغل بنفسه..
ليلى بعد سفر زوجها ودخولها الشهر السابع.. صارت تتعب أكثر.. وتحس بآلام أشد..
عفاف بعد ما رفضت امها انها ترجع لبيتها ولعزيز.. انطوت على نفسها وصارت ماهي طايقه احد يكلما بأي شئ.. ولو سوالف عادية...!!
سارة خير شر مستحيل تنفذ أي خدمه.. أو تقوم بأي مهمه..!
أمل يكفي انها لاهية مع شهد وتلاعبها وتهاديها...!!
حتى سعد من بعد زواج عزيز وعفاف قلت زياراته لبيت عمه.. ومهند صار هو اللي يطلع معه.. وخاصة بعد ما تحسنت حالة فيصل صاروا دايما حوله مع ربعهم.. يعيدن العهد القديم.. والذكريات الماضية....!!
أم يوسف بتعب : قومي جيبي عبايتي..! بسرررررعه...!!
غاده بخوف : ليش وين بتروحين بهالليل...؟!!
ام يوسف : أمي تعبانه بأروح أشوفها..!
غاده : الحين..؟ يمه الساعه 10 الليل.. من بيوديك هالحزه..؟!
ام يوسف : والله ضاع راسي.. امي من ماتت جارتها ام سالم وهي ماهناك زوود.. حالها متردي.. وصحتها اردى...!
غاده واهتمت : مهند وينه.. ولا يوسف..؟
ام يوسف : اتصلي على مهند..!
غاده ودقت عليه.. بس جواله مغلق..!!
غاده : مقفل جواله.. ادق ليوسف...؟؟!!
ام يوسف : لا يوسف.. لا تتصلين عليه.. وش بيجيبه الحين ويترك حرمته لحالها...!!
غاده : من بعدهم.. بأول الشارع.. لو يجي مشي وصل...!!
ام يوسف بيأس وحطت يدها على راسها : انا ادري..؟ سوي اللي تبين...!!
غاده : بأدق له وأمري لله...!!
.
.
.
.
.
.
.
.
.
وهم بالطريق لبيت جدته... كان ملاحظ عليها انها سرحانه... وطول الوقت وهو يسولف وهي مو معه ابدا..!!
يوسف وهو يطالعها : عنوودي... وش هالهدوووء..؟؟!!
العنود التفتت له : تبي رياح عاصفه...!!
يوسف ابتسم : أبي نسيم عليل...!!
العنود : وشو عليله بعد..؟ شايفني ممرضه..!!
يوسف : لا طبيبة قلوووووب وانتي الصادقه...!!
العنود بابتسامه واسعه : ارتـــح... القلب وصاحبته تحت أمرك...!!
يوسف بفررحه : والله القلب وراعيته.. فوق راسي...!!
رن جواله بهاللحظه.. وشافه البيت..
يوسف يرد : هلا..؟
غاده : السلام عليكم....!!
يوسف : وعليكم السلام..
غاده : وينك فيه...
يوسف بداخله " يايحب الحريم لهالسؤال " رد : قريب.. وش تبين...؟!
غاده : امي تبيك توديها لأمي ساره..!!
يوسف : بس انا الحين عندها... تبيني اضرب مشوار راجع لها.. تبشر..؟؟!!
غاده تكلم أمها.. بعدين رجعت له : لا تقولك وين مهند.. ولا جت مع السواق...!!
يوسف : لا السواق بهالليل..؟ لا يابنت الحلال.. من أصبح أفلح.. الصبح بأمر آخذها...!!
غاده بتفهم : طيب.. طمنا عليها...!!
يوسف : إن شاء الله...!!
.
.
.
.
.
.
.
.
.
بالصباح رجع يوسف وخذ أمه لبيت جدته.. لما شاف حالة جدته مزداده سوء انقهر من اهمالهم لها..
يوسف معصب : يعني خالتي ماحلى لها السفر الا وامي ساره تعبانه...؟!! هذا بدال ما تجلس جنبها وتواسيها.. تسافر ولا تسأل عنها..!
ام يوسف بلا حيلة : وانا وش باقول.. هذي امي وهذي اختي.. وانا ماني بتاركة بيتي فاضي.. شف حال خواتك كل وحدة اردى من الثانية..!
يوسف : وخالي وينه عنها..؟!
ام يوسف : والله علمي علمك.. من عقب عزيمتك ذيك الليله ماعاد شفته..!!
يوسف بتفكير : يصير خير..!!
لما وصلوا كانت العنود مع الجدة داخل غرفتها.. والعنود من كثر ما حبت الجدة حست كأنها أمها البعيدة عنها..! جلست جنبها وداوتها.. وشافت حاجاتها مثل أي وحده من بناتها..!!
ام يوسف داخله : سلامات يمه.. وش فيك الله يخليك لنا...؟!
ام خالد بصوت متعب : الحمد لله يابنتي على العافية.. مافيني شئ الله يهدي هالميري ليه تقولكم..؟!
ام يوسف : من كثر قعدتنا معك بعد ما تقولنا..؟ الا هذا حق وواجب لازم نشوفك ونتطمن عليك..؟!
يوسف : العنود تعالي أبغاك شوي..
ام خالد : الله يوفق هالبنت ويرضى عليها والله انها من البارح معي وما قصرت جعلي ما أخلى منها...!!
ابتسمت العنود ليوسف اللي طالعها برضى وطلعت معه...!!
.
.
.
" قلت لك اللي يريحك أنا معك فيه "
يوسف وهو يتأملها : بس أنا ابي رأيك أنتي..؟ تشوفين جلوسنا معها تصرف صح..؟!
العنود : لو ما انت قلت لي.. كنت أنا طلبت منك هالشئ.. أنا حبيت جدتك مثل أمي.. واعجبني تعلقك فيها وتعلقها فيك.. ولولا اني خفت منك.. كان.....
يوسف يقاطعها : خفتي مني...؟؟؟؟
العنود ابتسمت : اقصد.. خفت من ردت فعلك..!
يوسف : يعني موافقة..؟
العنود : أيه..
يوسف : اعتمد..؟ مو بعدين تقولين ما وديتني لاهلي.. ولاّ اشتقت لهم..!
العنود بشك : ليش كم بنقعد هنا..؟!
يوسف : ما دامك معي.. بنظل العـمـر كله..!!
.
.
.
.
.
.
.
.
قفل السماعه وهو ماهو مصدق اللي سمعه...!
مهند جنب أبوه : وش عنده عمي متصل..؟!
ابو يوسف بلا شعور : يعزمنا لعرس بنته الاسبوع الجاي..!!!!!!!
مهند : عرس بنته...؟؟؟!!!!!!
ابو يوسف : والله اني متفاجئ منه.. وش هالشغل عنده.. يعزمني بالتلفون والعرس عقب ايام...!!!
مهند : منهو عليه..؟ ومتى ملكوا..؟!
ابو يوسف : يقول واحد بعيد ماهو من الرياض...!!
مهند : بعد من برى الرياض...!! ايه.. الله يوفقهم..
ابو يوسف : الله يعين على هالدنيا.. ناس تعرس وناس تمرض..
مهند يكمل : وناس تمووت..!!
ابو يوسف بتذكر : جدتك وش صار عليها..؟!
مهند : امي عندها بأروح بعد شوي اجيبها واسلم عليها مره وحده...!
ابو يوسف: اجل خذني معك.. من زمان ماسلمت على العجوز.. بتزعل علينا المره ونروح في خبرها....!!
مهند : هههههههههههههههه..
سعد داخل : ضحكوووونا معكم..
ابو يوسف : سالفه طارت في الهواء.. وشلوون اخوك..؟!
سعد يجلس : ماعليه..
مهند : سمعت آخر خبر..!!
سعد : هااه من مات..؟!!
ابو يوسف : الله يدفع الشر..
سعد : هههههههه.. ياحبي لك ياعمي الموت ما لنا عنه..
مهند : اترك عنك بس الموت وطاريه.. واسمع السوالف اللي يحبها قلبك..!
سعد تحمّس : يالله جعلي ما ابكيك...!!
ابو يوسف : الظاهر الولد حالم بيومه..!
مهند : بيصير عندنا عرس بالعايله...!
سعد : مالت عليك.. وإذا جا عرس.. هو أول عرس.. كل بعرس الا انا وأنت..!!
ابو يوسف : افااااا..
مهند : هههههههه.. المهم ياعزووبي.. بنت عمك عبدالله بتعرس.. وافرح يامعاااااذووووه...!
سعد : اقطــع... بتعرس بنت ام معاذ..!!!
ابو يوسف استغرب تعليقاتهم.. حتى الشباب عارفينها...!!
سعد : بس تراها قديمه.. لأن اختي بعد أنا بتعرس.. قريبـــــا..
مهند يحاول مايبين أي شئ : حلووة قريبا.. اعلان شريط جديد..!!
ابو يوسف : وافقتوا على محمد..؟!
سعد : أبشرك..!
ابو يوسف : على البركة ان شاء الله.. الله يوفق الجميع...!
.
.
.
.
.
.
.
.
.
بعد يومين.. رجعت أم يوسف لبيتها.. وظلت العنود مع ام خالد.. اما يوسف فكان يداوم بالشركه المساء ويرجع على الساعة عشر الليل..!
كانت الساعه ثمان.. والعنود جالسه مع الجده بعد ما أعطتها علاجها..
جلست معها وهي تسمع كلامها عنهم من أول.. وسوالفهم اللي ما تنمل أبد..!
العنود : فرق بين جيلنا وجيلكم..! انتو من صغركم تربيتوا على المسؤلية أما جيلنا فمعتمد على ان كل شئ يجيه لتحت رجوله بدون ادنى مجهود..!!
ام خالد : إييييه.. بس يالله لك الحمد كل شئ الحين متوفر.. ولا جوع ولا فقر مثلنا.. الواحد يقعد له يومين ولا ثلاثة اللقمه ما يشوفها..!!!
العنود : بس على الاقل ياخاله الاولين لو هم فقراء الا ان قلوبهم غنية.. ما فيها حقد ولا حسد هالايام...!! ولا فيها قطيعة رحم ولا جفاء.. الكل كان قلبه على جاره.. ونيته صافية على اقاربه.. يحب لهم الخير.. وينبسط لسعادتهم..!!
ام خالد : ايه يابنتي.. والله اللي يشوفك يقول عايشه معنا ذاك الزمن..!!
العنود بقلبها " الا عشته بقلب أبوي.. وروح أمي..!! " وطلعت منها تنهيده..!!
ام خالد شافتها سرحانه : وش فيك يابنتي.. يوجعك شئ..؟!
العنود ابتسمت لها : لا ياخالتي ما فيني الا العافية..! بس مهمومه شوي...!!
ام خالد : يابنتي الهم لين قسم بين اثنين هان...!!
العنود تنهدت : وش أقول ياخالتي..!! همي اكبر من أني أطيقه.. مليت وأنا أخبي بقلبي.. محد اهتم لي الا اختي.. وحتى هي ماقدرت تسوي لي شئ..!!
ام خالد : وانا أمك بهالدنيا مابه شئ الا بأجره.. وانتي توك صغيرة على الهم..!!
العنود : أنا صغيرة.. بس غيري ما رحم صغري..!! ليتهم اعتبروني طفلة.. ولا جازوني بشئ ما سويته..!
وبدون ادراك من العنود.. وبراحة لأول مره تحسها من شهور.. فضفضت باللي بقلبها لأم خالد.. وهي تحس انها راح تسندها وتوقف بصفها لما تقول ليوسف نفس الكلام..!!
ام خالد سمعت من العنود كلام لأول مرة تسمعه.. وبقلب الأم حست بموقف الحنان تجاه العنود اللي اعتبرتها وحده من بناتها..!!
ام خالد بكل الحب : عليك بالدعاء.. سهام الليل.. محد يعرفه الا اللي جربه..! ويوسف ولدي واعرفه.. ما راح يردني ان قلت له أنا... خليه علي وأنا أفهمه...!!
العنود وحست بخوف : بس أخاف.....
ام خالد تقاطعها : وش تخافين منه..؟ هذا ولدي.. أنا مربيته.. أعرف وش يزعله ووش يرضيه..!!
العنود : بس أكون معك.. أبغى أعرف وش بيقول..!!
ام خالد : إن شاء الله يابنتي.. كم الساعه الحين..؟!
العنود تطالع ساعتها اللي أهداها لها يوسف : الساعه تسع وربع..! ( وبخوف قالت ) : بتقولين له ألحين...؟!
ام خالد : بيجي هو الحين...؟!
العنود : بالعاده يجي عشر..
ام خالد : خير ان شاء الله.. ان جا ألحين والا قلت له الصبح...!!
العنود : زين.. بأطلع ياخالتي أشوف العشاء ليوسف.. وارجع لك..!!
أم خالد : براحتك يا بنتي.. الله يوفقك ويسعدك ويرضى عليك...!!
طلعت العنود للمطبخ.. وهناك كان يوسف واقف ومعه كأس ماء يشرب.. انهبلت.. انجنت.. كل علامات الصدمه بانت على وجهها.. فكرت للحظه.. لو كان واقف عند غرفة جدته وسمع كل الكلام اللي دار بينهم..!
انتبهت عليه وهو واقف قبالها : ما فيه الحمد لله على السلامه..!
لما سمعته انتبهت على وجهه.. كان فيه كدمه فوق عينه.. خفيفة لكن واضحه..! زادت دقات قلبها..
العنود وهي تطالعه بتوتر : وش فيه وجهك..؟ وش هالكدمه اللي فيه؟؟
يوسف ابتسم : حادث بسيط...!!
العنود بخوف : حــادث..؟! تعورت..؟ شئ يوجعك..؟!
يوسف ومسكها من كتوفها : عنودي اهدي.. حادث بسيط وعدى الحمد لله..! بس سيارتي...ممم راحت فيها...!!
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك