رواية انقلبت الموازين -3
حمد:شفت جمان طالعه من عندج وعيونها حمر..شو بلاها
ريم:اها قول من الاول انك شفت جمان...ما حد يعفس حالك غيرها..ويا ليتها تحس
حمد:انا وين وانتي وين..اقولج بلاها
ريم:ميعاد بالمستشفى
حمد:بسم الله عليها ..شو ياها
ريم:سالفة طويله عريضه
حمد:شو سالفته بعد..قولي مب وراي شي
ريم:حتى لو وراك شي ..انا متاكده راح تلغي كل مواعيدك اذا السالفه تخص جمان
حمد:سيري لاه... بروح اسال جمان بنفسها
ريم:تسويها والله حمودي ..ما منك امان
حمد:حمودي بعينج اصغر عيالج انا
ريم:افا ولا تزعل ..يا الشيخ
طبعا ريم ضلت تخبر حمد عن سالفة ميعاد..واتفقوا يروحوا يزورونها بالعصريه
اما بالمستشفى..بعد ما مرت 3 ساعات وميعاد بعدها ما نشت..ناصر طلب من عند ساره ترد البيت وطبعا بعد الحاح من ناصر وافقت ترد..وقبل ما تطلع من الغرفه شافت ناصر يبوس ميعاد على يبهتها ..ابتسمت وبخاطرها ربي ما يحرمنا منك يا ناصر
ساره:ناصر
ناصر:لف صوبها ..واشرلها براسه شو
ساره:احبك...وربي ما يحرمنا منك
ناصر:وربي ما يحرمني منكم بعد..ساره خلي بالج على يمان انا بيلس عند ميعاد
ساره:يا ذا العلم توصيني على ولدي...انت بس دير بالك على ميعاد
قريب المغرب ...
قوم هم ريم راحوا يزورون ميعاد...وعند بوابة المستشفى تلاقوا مع جمان وجوري..وطبعا حمد ما نزل عيونه من عليها ...كان يبى يطمن عليها
دخلوا كلهم الغرفة وحصلوا ناصر عندها
ريم قالت لحمد:عنبو دارك..كليتها بعيونك..يابوك احشم اخوها
حمد:ريم طالعيها اشلون متضايقه ..وعيونها حمر..سيري يلسي حذاها
ريم:اقول روميو الله يعينك على ما بلاك
وبعد فترة قامت ام سالم ..
ام سالم:يله عيل احنا بنترخص
جوري:جمان سيري مع قوم هم ريم..انا بيلس مع ميعاد
وطبعا بعد نقاش طويل عريض وافقت جمان وساروا كلهم بالبيت ..وريم طول الدرب تحاول تهدي جمان
اما بالمستشفى...
جوري:ناصر
ناصر بعد ما سمع نبرة صوتها الي يتخلله الحنان ..الاخ فج حلجه ويلس يطالع عليها..ويقول بخاطره...شكلج تبين تجليطين اليوم
جوري:اخيج..سد حلجك يا السخيف
ناصر:اقول جوري ..شو رايج تسري البيت
جوري:قصوري اسري البيت..اصلا انا ببات عندها اليوم
ناصر:شو ..سيري امي توكلي..انا الي بيلس عندها
جوري:وليه يا الاخو ليكون على راسك ريشه
ناصر:انا من زمان على راسي ريشه مب من اللحينه
جوري:وايد واثق
ناصر:طبعا
جوري:سير تغدا ...سير
ضحك ناصر وشل غداه وسار ياكل..وحليله ما كان ماكل من الصبح كله يحاتي ميعاد
على الساعه 8 ناصر طلب من عند جوري ترد البيت ..وطبعا الاخت بعد طلوع الروح وافقت تروح
اما ناصر ضل طول الليل يحاتي اهله الي بالبيت حريم بروحهم بالبيت ...واتصل بسالم وطلب من عنده يجيك عليهم ...وقال بخاطره..الله يسامحك يا زياد محسوب علينا زيادة عدد
وفجأه قامت ميعاد..واول ما شافت ناصر
ميعاد:راحت يا ناصر..راحت من غير ما تسمع لي ..اباها يا ناصر ..ابا اشوفها ولو مره وحده..بس استسمح منها واخبرها اني كنت ابى احميها من ولد ريل امها ...راحت يا ناصر
ناصر اول ما شافها تصارخ ..راح لحد عندها وحضنها وقام يهديها ..مسك يدها
ناصر:ميعاد..شوفي علي وضغط على زر الممرضه يناديها من غير ما تحس ميعاد
ناصر:قولي وراي..لا حول ولا قوة الا بالله..خذي نفس طويل
ميعاد:لا حول ولا قوة الا بالله
ناصر:يارب اجرني بمصيبتي واخلف لي خير منها
ميعاد:يا رب اجرني بمصيبتي واخلف لي خير منها
ناصر:يا رب ..وخذي نفس عميق
ميعاد:يارب
ناصر ضل يهديها لحد ما رقدت ويت الممرضه تبى تعطيها مهدئ بس ناصر قالها ما يحتاي راح تهدئ بروحها...
وناصر ضل يقرا عليها ..وهو يحاتي اهله الي بالبيت ...يا الله يا زياد ايش كثر محتايين لك
طول الليل ناصر تلفونه ما وقف رن...جوري وجمان وساره يدقوا عليه يطمنوا على ميعاد
وفي اليوم الثاني ..ميعاد نشت من الرقاد وشافت ناصر راقد على الكرسي ..وقالت:الله يريح قلبك يا ناصر ويعطيك على قد نيتك ربي يحفظك ولا يحرمنا منك
ناصر سمع حس حد فوق راسه..واول ما بطل عينه شاف ميعاد..
ناصر:صباح الخير دلوعتنا ...الي وقفت قلبنا عليها
ميعاد:ضحكت ضحكه باهته ..
وقالت:الحمد لله احسن
ميعاد:ناصر بغيت اطلع من المستشفى تعرفني اكره شي عندي بالدنيا المستشفيات تييب الاكتئاب
ناصر:الله اكبر اكتئاب مره وحده..بروح اشوف الدكتور المسؤول عن حالتج
طلع ناصر وراح شاف الدكتور المسؤل عنها..وخبره انها تقدر تطلع ..ناصر يعرف اخته ..ما تحب تبين ضعفها لحد علشان جي ما تبى تيلس بالمستشفى
اما بالنسبه لسالم ...سمع صراخ زوجته ...وراح ركض لها ..
سعاد:سالم لحق علي ..شكلي بربي خلاص
سالم:شو تربي ..بعدج بالسابع
سالم راح ركض يخبر امه علشان تروح معاهم...
اما بالبيت عند قوم هم جوري..ما حد رضى يفطر كلهم نفسيتهم منسده ..سمعوا حد يدق الباب ..وتبطل الباب ودخلوا ميعاد وناصر..طبعا كلهم راحوا يحضنوها..حتى جوري قامت تحضنها وتبوسها..وميعاد كانت تحضنها بقوة لدرجة انهم كلهم استغربوا منها .جوري بنفسها استغربت منها
ناصر:كل هذا لميعاد..تراها الا بعدت عنكم يوم
جمان:لج وحشه يا ميعاد
ناصر:وانا ولد البطه السوده...ما حد سال عني
جوري:ناصر انت هنا...تصدق ما شفناك
جمان:خخخخ
ناصر:شو
الجزء الحادي عشر...
سالم سار يزقر امه علشان تساعد سعاد ...ام سالم اول ما دخلت الغرفة على طول سارت لعندها
ام سالم:بسم الله عليج يا بنيتي ..شو ياج..توج يا امي الا بالشهر السابع...
سعاد:خالتي احس عمري بموت ...بسرعه يا سالم..الله يخليك مب قادره استحمل
سالم على طول خذ سويج السياره وسار صوب المستشفى...كان يسوق بسرعه جنونيه .. وسعاد طول الدرب تصرخ وتنادي امها
ام سالم:يا بنيتي قولي يا رب..بدل ما تقولين يا يمه
سالم كان زاخ يدها ويقرا اية الكرسي عليها
واول ما نزلوا من السيارة سالم سار ييب كرسي لسعاد...وعلى طول ودوها غرفة الولادة اما ام سالم وسالم ضلوا ينتظرون بالممر
ام سالم :يا ولدي شو بلاك هدي
سالم: مب مرتاح ..حاس في شي بيصير ..احساسي ما يخيب
ام سالم:صل على النبي يا ولدي....ان شاء الله تقوم بالسلامه
سالم:امين...يا رب
ام سالم:اتصل على اختك ...خلها تمر على سلطان وتيبه من الروضه
سالم كان واصل حده صارلهم اللحين 4 ساعات داخل الغرفه وهو يجوف اكثر من دكتوره داخله وطالعه
سالم طرش مسج لريم....واول ما حط تلفونه بجيبه انفتح باب الغرفه ..وهو على طول راح لعند الدكتوره
سالم:ها دكتوره بشري ...
الدكتوره:والله ما ادري شو اقولك....الي صار انه الحبل السري كان ملتف على البيبي وفي وقت الولاده انشد اكثر عليه انا اسفه ...البيبي مات
سالم: يا الله ..لا حول ولا قوة الا بالله...لا حول ولا قوة الا بالله ..الحمد لله على كل حال ...اللهم لك ما اعطيت ولك ما اخذت
ام سالم:شو مات ..وانتن شو فايدتكن داخل ..ما رمتن تسون شي
الدكتوره كانت تبى ترد عليها بس سالم قاطعها
سالم:دكتورة ..حرمتي كيفها
الدكتورة:حرمتك يبالها عملية ..نحتاج توقيعك
ام سالم:وشو عمليته بعد..ما كفاكن ذبحتن الطفل
الدكتورة: هذا نصيبها بالدنيا ...بس احنا لازم نسوي العمليه علشان ننقذ الام
سالم سار معاها وهو لا حاس بالدنيا يحس عمره شرا الربوت يتحرك من غير احساس ووقع على ورقة العمليه ..اهم شي عنده اللحين حرمته ما يستوى بها شي
ميعاد كانت يالسه بغرفتها ...دشت عليها سارة
ساره:ميعاد اشحالج اللحينه غناتي
ميعاد:الحمد لله احسن...ويلست تصيح
ساره:ميعاد ما اعرفج ضعيفة ...ولا مب مؤمنه بقضاء الله ترى هذا نصيبها بالدنيا
ميعاد:سارة ..القضيه مب قضية ضعف ...انا كنت طول الفترة الماضيه كنت امني نفسي اني بجوفها وبستسمح منها ..حتى كنت اقنع نفسي كل ليلة قبل ما ارقد ان بنرد شرا قبل..تصدقين لمن اكون يالسه بروحي اقول بخاطري يا ترى شو يالسه تسوي فطوم اللحين...وسكتت
سارة ما تكلمت ..حبت تعطيها مجال انها تعبر عن الي بداخلها ...
وبعد فترة ميعاد قالت: احم ...سارة ما ادري اشلون اطالع ويه سيف
ساره:اشقايل اشلون تطالعينه..شرا ما الاوادم يطالعون بعض
ميعاد:تدرين سوير ...حد قالج قبل انج سخيفه
ساره:هذه ميعاد الي اعرفها...سيري ارتاحي وراج دوام باجر..
ميعاد:ان شاء الله
جوري كانت بغرفتها ...يالسه تفكر وتقول بخاطرها يا الله انا المفروض اسافر بعد يومين ...يا رب ساعدني والهمني القوة علشان اخبرهم...والله ما ادري الي يالسه اسويه صح ولا غلط ...اشلون اروح لواحد انا حتى ما اتذكر ويه ...حتى صوته ما يالي سمعته الا اليوم الي يانا وهو يرتجف وبعدين اغمى عليه...وطول الاسبوعين الي كان بالمستشفى ما رضى يتكلم الا وي ابو سالم...ويلست تضحك وتتذكر شو سوت في اليوم الثاني من وصولها لبيت ام سالم...نشت من الرقاد ونزلت تحت ..وجافت ام سالم تسوي الريوق..راحت يلست حذاها وتساعدها ..وفجاه دخل عليهم زياد...ويلس يسوي حركات بيده
جوري سارت عنده ويلست تصرخ عليه ...
جوري:انت كله معصب ..وبعد تبى تضرب امي عايشة..اذا ييت قريب منها انا بضربك ..اذا تبى تتضارب سير تضارب وي اولاد اليران
طبعا زياد فاج حلجه ويقول بخاطره ..شو ها الخبله الي يايبينها ..سوالها طاف وسار بره
بعدين يلست ام سالم تخبرها عن زياد وانه ما يتكلم صارله 8 سنين وهم ما يعرفون السبب
ومن ذاك اليوم هي وزياد صاروا وي بعض وكانت دوم تقوله عن مضايقات ناصر وميعاد لها ...وكنت اقول بخاطري ليش تضحك لمن اخبرك وتعطيني نظرات شيطانيه...ثريك كنت فرد من العصابه....
ويلست تتذكر كيف كانت تحب مدرستها اليديده ..وكيف كانت شاطره ...لحد ما وصلت الاعداديه جافت وحده كانت معاها بمدرستها الجديمه...وقالت للصف كامل انه امها هنديه ..ردت البيت وهي كانت وايد تصيح...تتذكر اشلون كلهم التفوا صوبها وقاموا يهدونها حتى ميعاد وناصر كانوا يحاولوا يضحكونها ..بس هي حجزت عمرها بالغرفة وما رضت تروح المدرسه ...وبعد 4 ايام جافت ورقة عند باب غرفتها ولمن فجتها حصلت مكتوب فيها...احنا كلنا بندرس وبنكبر ونشتغل وبنكون ناس مهمين بالدولة الا انتي بتكونين جاهله ما تعرفين شي ...وكان مكتوب بنهاية الورقة..
ناصر ..بيكون دكتور
ميعاد ...بتكون دكتورة
زياد..بيكون دكتور
حتى جمان..بتكون دكتورة
يابت قلم وكتبت تحت الجمله الاخيره
جوري...بتكون دكتورة
ولحد اليوم ما تعرف منو الي كاتب الرسالة...
نرجع للمستشفى...
بعد مرور 5 ساعات ..سالم خلاص ما قدر يصبر اكثر
وسار صوب باب غرفة العمليات ...اول ما مد يده يبى يدق الباب ...طلعت الدكتورة
سالم: بشري يا دكتورة ..اشحالها حرمتي
الدكتورة:انا اسفه بس احنا فقدنا المريضه
سالم:ها
الدكتورة:اخوي ...هذا كان اجلها ...ادعولها بالرحمة
سالم:ما قدر يرد عليها ...بس دموعه كانوا ينزلون
وما قدر يوقف على ريوله يلس على الارض ..رفع راسه يطالع داخل الغرفة وجاف دكتورة داخل تصيح وكلهم ملتمين حوالينها ..استغرب بس الي فيه كان كافيه ومب كان قادر يقوم ويسالهم
ام سالم كانت يايه من المصلى لمن شافت سالم يالس على الارض والدكتورة وافقه تكلمه
ام سالم:بسم الله عليك يا ولدي شو ياك...شو استوى يا دكتوره
الدكتورة:يت بترد ...بس سالم قال
سالم:راحت ..كان عندي احساس انها بتروح
ام سالم: حرام عليكن ذبحتوا المره وولدها...الله يعينج يا اختي ..اشقايل اخبرك انه بنيتج راحت
سالم:لا حول والا قوة الا بالله ...ان لله وان اليه راجعون
سالم حاول يتصل بحمد يباه يوصل امه البيت لحد ما يخلص اجراءات استلام الجثة...بس حمد ما كان يرد..وحاول يدق على سعود ونفس الشي ما يرد
سعود وحمد كان عندهم موعد عند اخصائي تغذيه ..
سالم اتصل على ناصر....
ناصر:حيا الله بسلوم ..لك وحشه والله
سالم:ناصر انت مشغول
ناصر اول ما سمع صوت سالم عرف انه فيه شي
ناصر:سالم فيك شي..مستوي شي
سالم: اباك توصل الوالدة للبيت
ناصر:سالم ..شو مستوي ....شو فيه صوتك
سالم :ناصر...سعاد توفت
ناصر:شو...سالم انت باي مستشفى
ناصر كان يالس بالصاله لمن ياه الاتصال...وسارة كانت يالسه تسولف معاه ولمن سمعت ناصر يقول بأي مستشفى خافت...
سارة:ناصر ...شو مستوي
ناصر:لا حول ولا قوة الا بالله...ام سلطان توفت
سارة:منو ام سلطان
ناصر:سعاد..حرمة سالم
سارة :انا لله وان اليه راجعون...
ناصر طلع من البيت ...وسارة تقول بخاطرها ..لا بالله شكلي بتعقد من طاري الموت ...وبصير جمان رقم 2
سارت سارة تخبر ميعاد وجمان علشان يروحوا العزا
اما عند ناصر كان يسوق سيارته ويقول بخاطره ..يا الله يا سالم كنت حاس ..الله يصبرك
ناصر اول ما شاف سالم..دمعت عينه عليه..اول مره يشوف سالم بهذه الحاله وهو منهار ..وعيونه حمر ..حتى مب قادر يسند طوله..راح لعنده وحضنه وحاول يهديه...
وهم كانوا طالعين من المستشفى ..سالم جاف نفس الدكتورة وهي تصيح وحالتها حالة وكلهم يحاولوا يهدونها كان يبى يعرف شو مستوي وليش هي تصيح جي من وهي داخل غرفة الولادة ...بس مب كان قادر يسند طوله
عزا الحريم كان ببيت اخت ام سالم ...وعزا الريايل كان بالمسيد الى جريب من بيت قوم سالم
اليوم كان اليوم الثالث للعزا ..وطول ايام العزا سالم ما كان يرد البيت الا متاخر كل وقته بالمسيد يقرا قران ...سعود وناصر كانوا ما يخلونه بحاله ...كانوا يحاولوا يخففون عنه
ناصر:سالم يا اخوي ..ما يصير الي يالس تسويه كله حابس نفسك بالمسيد..ما اشتقت لولدك كله يتخبر عنك مب زين عليك محرمنه منك ..بسه انحرم من امه بعد تبى تحرمه منك
سالم:كان منزل راسه ..ويقرا ادعيه
ناصر:سالم...سير ريح شوي
سالم ما قدر يرفض لانه ما فيه حيل اصلا من كثر التعب
ناصر سار وخبر سعود ..وقاله انه بيروح يوصل سالم البيت علشان يرتاح شوي
اما بعزا الحريم ....
جوري وساره وميعاد يالسات حيذا بعض...وسمعوا حريم يتكلمون عن جوري ويقولوا:هذه هي بنت الهنديه الي ربتها ام سالم وعطتها ولدها خلصن البنات علشان تعطيه بنت الهندية
وحده من الحريم قالتلهن. ..خافن الله انتن بعزى وبسكن حش
ردت عليها وحدة ثانيه :ثرنا شو قلن...تراها بنت الهنديه ..ولا كلمة الحق تزعل
ميعاد وسارة لفوا يطالعون جوري...جوري طنشتهم اصلا هي متعودة من وهي صغيره يقولون عنها جي ..بس اول مره تسمعهم يتكلمون بسالفة زواجها...وقالت بخاطرها..الله والزوج حد يسمع ..ولا داري عن هوا داري
اما عند ريم وجمان....
جمان:ريم فديتج بسج صياح .. ما راح يفيدها دموعج
ريم: وي منو اقعد اسوف اللحين ..منو راح يسمع لي وينصحني .. صح انها كانت قليلة الكلام..وكله بحالها عمري ما سمعتها تحش عن حد...بس كانت مونستيني بالبيت ...ويلست تصيح بصوت عالي
ريم: امس سلطان يسلس يتخبرني عن امه .. ويقول ..عمو يعني انا ما عندي ام اللحين..لا ويقول يصير ازقرج اللحين امي بدل عمو ..وقام يسال عن ابوه ما عرفت شو ارد عليه انا اصلا ما جفت سالم من 3 ايام
جمان:الله يرحمها ..ادعيلها يا ريم..هي محتاجه لدعواتج اللحين....فديته سلطان شو دراه يعني شو ماتت...ريم لازم تكونين قويه اخوج محتاينكم اللحين
اما عند سالم وناصر...
ناصر حاول يطلع سالم من حالة الهدوء الي هو فيه ....بس سالم كان يرد عليه بتحريك راسه من غير ما ينطق بولا كلمه
ناصر:سالم شو رايك احجز لك تروح العمرة
سالم:متى
ناصر ابتسم على الاقل رد عليه...
ناصر:بروح باجر المطار وبحجز لك....سامحني سالم ما اقدر ارافجك تعرف البيت ما فيه ريال غيري
سالم: ما تقصر يا ناصر ...يكفي وقفتك معاي
وعلى المغرب جوري وسارة وميعاد ردوا البيت ...وجمان ظلت عند ريم وطلبت من عندهم يقولوا لناصر يمر عليها بعد صلاة العشاء
ميعاد راحت لغرفتها ...اما سارة وجوري يلسوا بالصالة يتسولفون
سارة: فديتج جوري لا تتضايقين ولا تاخذين على خاطرج من الكلام الي سمعتيه
جوري: تصدقين تعودت من كثر ما اسمعهم يقولوا بنت الهندية....بس تطوروا اللحينه حصلوا شي يديد يتكلموا عنه ..شلكهم ملوا من سالفة بنت الهندية ..قالوا خلونا نغير الموجه صاروا يقولوا ما تستاهل زياد
سارة: جوري غناتي ...طنشيهم يختي ناس ما عندها سالفه الا تحش بالاوادم...اصلا زياد يبوس يده انه ماخذنج هو اصلا لمن يشوفج بيتخبل...ما شاء الله عليج جميلة...خليه بس يشوف شعرج ابصملج بتضيع علومه
جوري: فديتج سارة اعرفج يالسه ترفعين من معنوياتي...وانا عمري ما شفت وحده رقيقة وطيبه شراج ... الله يسعدج يا ساره ويسهلج امورج ويحفظلج يماني وتشوفينه معرس
سمعوا صوت ناصر يتكلم بموبايله...جوري غمزت لساره
جوري:تصدقين يا سارة....انا لو بمكان ناصر اشكر ربي بكل صلاة انه عطاني حرمه شرا سارة ..جمال واخلاق وطيبه وتنحط على الجرح يبرى
ناصر سمعهم وراح عندهم ..
ناصر: اصلا مافي شرا سارة اثنين وغمزلها
جوري: وانا اشهد..لو درت الدنيا كلها ما راح تحصل شرواها...ولفت صوب ساره وقالت
جوري: خيبه ساروه ..طاعي خدودج غاديات حمر ...ساروه اول مره اعرف انج تستحين
ناصر: جوري رجاءا ابتعدي عن حرمتيه بتخربينها
جوري: عيد...لالالا عيد الي قلته اشوف
ناصر: خيبه ..خيبه..صايره مال ضرابه
جوري طلعت لسانها لناصر وسارت غرفتها...اما ناصر يلس مع سارة يسولفون
سارة: حياتي شو رايك تروحوا انت وسالم للعمره...وحليله يمكن شوي تتعدل نفسيته
ناصر: ما رد عليها ظل يطالع عليها ويضحك
سارة: احيدني ما قلت نكته
ناصر: صدقت جوري لمن قالت انج اطيب وارق حرمه بالدنيا...
سارة نزلت راسها مستحية
ناصر:انا شاء الله باجر بمر المطار بحجز له ..وما يصير اروح معاه واودركن بروحكن ...سارونه حبيبي بروح امر على جمان..تامري على شي
ساره: سلامتك حبيبي
ناصر باس راسها وطلع رايح بيت هم سالم...وطول الدرب يفكر بجوري وسارة وكل ما يت صورة جوري بباله حاول يبدل صورتها بصورة سارة ...بس طبعا الموضوع مب سهل هذا مب حب يوم وليلة ....بس ناصر كان يردد بخاطره انا اقدر احط سارة مكانها لازم اقتنع انها شرا اختي ..سارة ما تستاهل اخونها..بس والله مب بيدي وضرب صدره صوب اليسار بيده
اما عند ميعاد..كانت تقرا قران لمن ياها مسج ...واول ما بطلت المسج شهقت وقالت سيف
سيف كان مطرش مسج وكاتب فيه...
اهلين ميعاد ...عساج احسن اللحين بغيت اوصلج امانه من عند فاطمه ..يهون عليج فراقها....سيف
ناصر لمن وصل بيت هم سالم ..ضل يدق الجرس بس ما حد يرد اتصل بسالم بس ما كان يرد ...اتصل بسعود قاله انه بالشغل
ناصر:انا مستغرب ...ما يالي مره سالت سالم عن سعود الا وقال انه بالشغل..شكله بيشيب من كثر ما يشتغل
قرر يتصل بحمد...حمد قاله انه وصل جمان البيت وهو اللحين يوصل ريم اللحين
ناصر:اشقايل توصل اختي البيت ..وانا متعني وضارب خط على الفاضي
حمد:يا ابني في اختراع اسمه موبايل...ما وصل صوب بيتكم
ناصر: بس قول انت وين ...جان ما ييتك وخليتك تسحب الي قلته
حمد: تسويها ..عندك ملف اسود في الضرابه
ناصر:اقول ..اقلب ويهك
حمد:على اي صفحه
ناصر : ضحكتني وانا مش عاوز اضحك
حمد:اقول ناصر....سير بيتكم
ناصر:شو
الجزء الثاني عشر:
ميعاد تزهبت ونزلت الطابق الارضي وسارت تفطر ...
ميعاد: يا الخونة ليش ما تنتظروني
سارة :الكسالة اخر ناس يشتكون
ميعاد: طاعوا من الي يتكلم
سارة: قامت تحرك جذلتها يمين ويسار ..تحرها
ميعاد :عشتوا ...
جمان :احنا نفتك من ناصر وجوري...تبدوا انتوا
سارة :على طاري جوري ..وينها
ناصر: غريبة اول مرة تتاخر بالرقاد
ميعاد عطته نظرة قوية ..يعني سارة هنا..وطبعا سارة ولا بالدنيا
جمان :ليكون صايرلها شي ..وعلى طول ركض لغرفتها
ناصر:خبله ذي البنت..ما اعرف متى تكبر
يمان: بابا تاخرنا
ميعاد :خيبه طالع دحاح على ابوه
سارة:ميعادوا صلي على النبي ..عيونج تصيب.. بعدين شو قصدج طالع على ابوه
ميعاد : يا ماما انا عيوني باردة ..جان زين لو تصيب ..وقالت بصوت واطئ كنت بصيب شعر جوري ...وبعدين يا حلوه خليها مستورة لاطلع فضايحج ايام الجامعه
سارة:حلفي انتي بس
ناصر:اقول يمان ..سرينا قبل ما تستوي ضرابه وتشديد شعر
جمان كانت نازله من الدرج :قوية صراحة ..هذا تنزيل من مستواكم (تقصد سارة وميعاد)
ميعاد: لو سمحتي لا تتدخلين بسوالف الكبار ..وبعدين وينها امج
جمان :جفتها راقده
سارة :جمان متى راح تبدين جامعه
جمان : الاسبوع الياي
سارة :اقولج اللحين ريم ليش جي مستعيله على العرس..
ميعاد: دومها مستعيله ..حتى على المدرسه كانت مستعيله..لدرجة انها دخلت الصف الاول وي جمان
جمان: تقول انها تقدر توفق ما بين الدراسه والزواج
سارة: يختي صعب جي
ميعاد: تراوالج الناس كلهم محدودين القدرات شراج
سارة: ميعادوه ..كلي تبن ..بعدين يا ماما الوحده احسنلها تعيش حياتها ..وبعدين لاحقه على المسؤليه
جمان: طاعوا منو يتكلم عن المسؤوليه ..الا ما تقر موليه بالبيت
ناصر رجع ياخذ بوكه كان ناسيه ..وجافهم بعدهم يسولفوا
ناصر:بسكم انفرقعوا يله
جمان: عاشوا راعي انفرقعوا..لا ما نروم صراحة
ناصر:احم احم..اخجلتم تواضعنا
جمان:وابوي ..احسنلي اشرد ..شكلكم تبون تمرضوني اليوم
وبعد الافطار ..الكل راح لشغله وجمان قررت تروح هند ريم
اول ما وصلت مكتبي ...جفت على الطاولة بوكيه ورد ...كلمة روعة قليلة
عليها...وينب البوكيه كان في صندوق مغطاي بقماش مخمل ماروني ومزين
باكسسسوارت ذهبية...استغربت ما احيد اليوم عيد ميلادي قلت بخاطري شو
مستوي منو الي ييت بخاطره اليوم..يلست على الكرسي وشميت الباقة يا الله شو
حلو ريحة الورود ..تريح النفس والبال ..حصلت بطاقة على الصندوق فجيتها
وشفت مكتوب فيها...
الحمد لله على السلامة ...ان شاء الله اخر الطيحات ...هذه امانة لج من عند
فاطمة...ديري بالج على روحج تراج غالية علينا.....سيف
لحضة ..لحضة في جمله يبالها وقفه ..شو يعني غاليه علينا رديت اقرا البطاقة
مرة ثانية وثالثة.. معقولة سيف يحبني... يعني على الاقل هو يكن لي مشاعر
هذا اضعف استنتاج اقدر اوصله ..شميت البطاقة وبوستها
ويلست ابطل الصندوق بايدين ترتجف ...حصلت دفتر ومكتوب عليه..الى غاليتي ميعاد
ها خط فطوم ..مستحيل اتوه عن خطها ...يلست افر بالصفحات ابى اعرف شو
داخل الدفتر..شكله يومياتها ...فتحت اول صفحة وقبل ما اقرا اي شي وصلني
مسج طنشت تلفوني وبديت اقرا بس ما مداني اقرا اول جمله الا وحد يدق باب
المكتب ...رفعت راسي واجوف منو الي ياي ..شهقت ..سيف
وهو ولا على بالله يى ويلس بالكرسي الي جدامي وفسخ نظارته الطبيه...لالالا
ارجوك رجع النظارة مكانها ما فيني على عيونك طبعا قلته بخاطري
سيف:عيبج البوكيه
ميعاد :احم ..وايد حلوه
سيف:طبعا ذوقي...
ميعاد:لا رد
سيف:ميعاد بغيتج بسالفه
تراني مليت من هذا المدير هلكنا كل يوم والثاني ميتنج وياليت يقول شي
مفيد ..لا بالله شكلي بغير قسمي جفت سامي (معاي بنفس المكتب ): بسج
تتحلطمين ترى بسيتويبه شي الريال ..ردت عليه شيخه(معانا بنفس المكتب):
جان زين بنفتك منه
سامي : عافانا الله منكم من حريم .انا قايل المفروض ما يوظفن حريم.. قلتله:
طاعوا ها..الله يعين حرمتك ..انت احسن تضل عزابي .
قطع كلامنا صوت مسج من تلفوني ..واول ما بطلت تلفوني جفت مسج من عند جوري ...
صباح محمل بريحة العطور ...الى ارق القلوب...ربي لا يحرمني منكم يوم...
ممكن نجتمع اليوم كلنا على الساعه 5 ...في موضوع اريد ابلغكم اياه..ضروري
صراحة خفت..قلت بخاطري بسم الله شو مستوي ..لا حول ولا قوة الا بالله شكله ها
الشهر ما راح ينتهي على خير..حاولت اتصل بجوري خوفتني صراحة بس تلفونها
مسكر ...اتصلت بميعاد اسميني بوداي وهي بوادي ..انا اكلمها عن المسج وهي
تكلمني عن سيف..متفيجه هاي
اتصلت بجمان وسالتها قالتي انه وصلها نفس المسج وهي اللحين عند ريم ...واول
ما توصل البيت بتتصل وتطمني...
كنت يالس اكلم حمد اتاكد اذا جهز اغراضه لانه بنسافر باجر الصبح رايحين
العمرة ..وحمد يقول ليش مستعيل بجهزهم بنص ساعه...سمعنا تلفوني يرن
..جفته رقم غريب واول ما رديت عليه ...طلع واحد من المستشفى وقال انه
من لجنة الاخطاء الطبية ويباني اروح عندهم ضروري ...وقال انه صارله 3
ايام يتصل فيني بس انا ما ارد ..استاذنت من عند حمد ورحت المستشفى وانا
اقول بخاطري شو يبى فيني
اول ما دخلت مكتب الريال الي اتصل فيني ..جفت نفس الدكتورة الي كانت تصيح
بذاك اليوم ..تصدقون بعدها يالسه تصيح حشى ما يخلصوا دموعها هاي...لحضة
..لحضة اخطاء طبية ..مستحيل الي افكر فيه يطلع صح كل هذا وانا واقف
اطالع الدكتورة ..استحيت على ويهي ويلست وانا بعدني مبهوت ...
طبعا الريال بدء يعرفني بنفسه وقالي انه من لجنة الاخطاء الطبية ...وعرفني
بالدكتورة وقال انها استشارية نساء وولادة وانها هي الي سوت عملية حرمتي
ويلس يفهمني انها قطعت الشريان بالغلط وقت الولادة وهو الى سوى نزيف وسبب
في وفاة المريضه ...
انا كنت بعالم ثاني وهو يتكلم ..يعني سعاد توفت بخطأ طبي
قطع علي سرحاني الدكتورة ما اعتقد انها كانت تتكلم كانت تشاهق وتصيح
اكثر من هي تتكلم ..تصدقون رحمتها هاي اشقايل تعيش وهي حاسه بالذنب
الريال يلس يفهمني انه في قضية راح تترفع على الدكتورة بسبب الخطا الطبي
...يلست افكر شو الفايدة سعاد راحت مب يايه القضية ترجعها اما عن
الدكتورة ..احساسها بالذنب اكبر عقاب لها ...قلتله اني متنازل عن القضيه
والمسامح كريم بس قلتله اني اخر مره ادش مستشفاكم
وانا طالع سمعت حد ينادي باسمي لفيت الا واجوف نفس الدكتورة...ويلست
تستسمح مني وتعتذر وتقول انها مب قادره ترقد من 3 ايام
سالم: يا دكتورة انا مسامحج ومتنازل عن القضيه بس حبيت اخبرج كل ما تبي
تسوين عملية تذكري انج يتمتي طفل
سرت عنها وسمعتها تشاهق ...ما كان قصدي اجرحها ولا اني ازيد عليها
احساسها بالذنب بس لازم تعرف انه الي صار مب كان هين وانه ارواح الناس
امانه ولا تعيد الي صار مع حرمتي مع وحدة ثانية ....
خيبه شو مستوي بشباب هل الايام ما ادري شو مشكلتهم مع السرعه ...يا
حبهم يسوقوا السيارة بسرعه جنونيه ما يفكروا بعواقب السرعه ولا يفكروا
باهلهم ...لا حول ولا قوة الا بالله ..يا دوبي داخل مكتبي ابى اريح ريولي
شوي صارلي 4 ساعات ما يالس ..اول ما دخلت المستشفى الا واجوف الحشرة في
الطوارئ وعلى طول عرفت حادث ..وبالفعل طلع توقعي صح مجموعة من الشباب
كانوا يتسابقوا بالسيارت وشاحت سيارة واحد منهم ...الله بهدبهم بس ما
ادري متى يعقلوا ....جيكت على تلفوني حصلت مس كول من عند سارة
ومسج...فتحت المسج وجفته من عند جوري ..اول ما قريت السطر الاول استغربت
جوري مب متعوده ترسل شرا ذي المسجات بس لمن كملت السطر الثاني ..قلت
بخاطري شو مستوي...اتصلت عليها بس تلفونها مسكر ..اتصلت بسارة اتخبرها عن
المسج بس هي بروحها كانت مستهمه ...اتصلت بالبيت ردت علي البشكارة
سالتها عن جوري قالت توها ركبت غرفتها ...رديت اتصل عليها قلت يمكن
فتحت تلفونها بس حصلته مسكر ...ما مداني اضغط على زر الاتصال كنت ناوي
اتصل بميعاد بس سمعتهم ينادوني ويقولوا حالة طارئه وعلى طول ودرت
التلفون وطلعت من المكتب...
احس بالصداع...يمكن لاني ما رقدت الا ساعتين يلست معضم الليل ارتب اغراض
السفر...يا الله البيت هادي كلهم رايحين لدواماتهم وجمان عند ريم...كنت متردده
افتح تلفوني ولا ما فيني اكلم حد اصلا احس عمري مخنوقه امس طول الليل
افكر الي يالسه اسويه صح ولا ..ما عندي مجال اتردد او حتى اتراجع ...هذه
وصيه ميت ولازم انفذها.. بس مب انا الي ارمي نفسي على ريال.. سمعت صوت
جمان من ورا الباب تسالني اذا راقده ولا ....يصعب علي فراقج يا جمان انا
اصلا ما احاتي احد كثر ما احاتيج ..اخاف يستوا بج شي لمن اخبرج
...فتحتلها الباب عاد ما اخبركم ويها اشلون غادي من الخوف
جوري: هلا جمان بغيتي شي غناتي
جمان:جوري فيج شي ...مستوي شي ..يعورج شي ..اكيد مريضه وتبي تخبرينا انج
راح تموتين...وقامت تصيح صياح يقطع القلب
جوري بخاطرها:جي انا بعدني ما خبرتها اني بسافر..رحت احضنها ..جمان غناتي
شو مريضه مب مريضه واموت وما ادري شو ....فديتج ما فيني شي لا تستهمي
جمان:عيل شو سالفة المسج
جوري:وليش مستعيله ..راح اخبرج على الساعه 5 ...جمان اشلون استعداداتج
للجامعه
جمان:على قدم وساق...
جوري:اباج توعديني انج راح تطلعين الاولى على دفعتج..وما راح تخلين اي شي
ياثر على دراستج ..اباج تكونين قوية ما تنكسرين بسهولة وما تخلين
الضروف تاثر عليج ...خلي العقبات تدفعج للامام ..دايما خلي ايمانج بربج قوي
جمان: اوعدج..بس ليش تقولين جي
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك