رواية انقلبت الموازين -4
جمان:عيل شو سالفة المسج
جوري:وليش مستعيله ..راح اخبرج على الساعه 5 ...جمان اشلون استعداداتج
للجامعه
جمان:على قدم وساق...
جوري:اباج توعديني انج راح تطلعين الاولى على دفعتج..وما راح تخلين اي شي
ياثر على دراستج ..اباج تكونين قوية ما تنكسرين بسهولة وما تخلين
الضروف تاثر عليج ...خلي العقبات تدفعج للامام ..دايما خلي ايمانج بربج قوي
جمان: اوعدج..بس ليش تقولين جي
جوري:ليش صايره حساسه..اختي وحبيبتي اريد اطمن عليها فيها شي
جوري:جمان..احيانا الضروف تفرض علينا نسوي اشياء احنا مب مقتنعين فيها
واحيانا نسويها علشان الحياة تمضي واحيانا نسويها لانه يكون دين برقبتنا
ونبي نسدده...واحيانا نسويها لانه قدرنا ونصيبنا بالدنيا ..وفي النهايه
عسى ان تكرهوا شي وهو خير لكم...
جمان: جوري شو تهذين انتي ..ما فهمت عليج شو الي تبينه اللحين
جوري: ابى اقولج اني وايد احبج واعزج وربي يشهد علي
جمان: جوري انتي مسخنه..انتي مريضه صح يالسه تودعيني
جوري:جمان فديتج والله مب مريضه ... تبين غصب تمرضيني
جمان:بسم الله عليج من المرض
جوري: سيري صلي غناتي
جمان:طرده محترمه هاي
جوري:شطورة فهمتيها وهي طايره
جمان حضنتني وطلعت...يلست اصيح اخاف جمان يستوابها شي من بعد ما اخبرها
يلست اجوف الورقة الي عطاني اياها ابوي محمد ..سامحني يا ابوي بس ما اقدر
اركض وراه ..صدقني بخليه هو الي يركض وراي
تجمعنا كلنا على الغدا ...واستغربنا انه جوري مب موجوده مب من عوايدها
سمعت سارة تكلم جمان وتسالها عن جوري .سمعتهم يتكلمون عن مسج شو السالفه
شو مستوي وانا اخر من يعلم..
ميعاد :شو مستوي..عن اي مسج تتكلمون
سارة :سلامات يا الاخت ..انتي وين عايشه امي
ميعاد:عن السخافه ..شو في
جمان:يعني انتي ما وصلج مسج من عند جوري
ميعاد:ما جيكت على تلفوني
سارة:رفعت حواجبها ...الي ماخذ عقلج
ميعاد: سيري لاه
ميعاد:ناصر ...اي مسج
ناصر:جوري مطرشه مسج تبانا كلنا على الساعه 5
ميعاد:جوري مب طبيعيه اليوم
بعدين الكل سار يريح.....
على الساعه 5 كنت نازله من الدرج ناصر وسارة كانوا وراي ...نزلنا
الصالة جفنا جمان وجوري يالسات ينتظرونا صدقوني في شي غير طبيعي
...يلسنا ننتظر جوري تتكلم
سارة :خير جوري في شي ..خوفتينا
جوري :خير ان شاء الله ..ممكن تيلسوا
انا كنت يالسه حذا جوري...سالم وساره كانوا مجابليني ..وجمان يالسه الصوب
الثاني من جوري
جوري :احم ...طبعا كلكم تعرفوا اني المفروض راح ابدا الماستر الاسبوع
الياي
ناصر :المفروض
جوري : المفروض ...بس في ضروف حتمت علي اني ما اكمله هنا
سارة:كيف يعني هنا
جمان :شو ها الالغاز
جوري :يعني راح اكمله بلندن
جمان صرخت: يعني راح تسافرين...اشقايل تسافرين وتخليني بروحي ..حرام عليج
تروحين وتخليني ..اصلا انتي وعدتيني انج ما تخليني مب كافي امي وابوي راحوا
ميعاد :جمان اهدي خلي البنية تتكلم
سارة :ومتى السفر
جوري : الليلة
جوري من اهني قالت الليلة ..وجمان من اهني شهقت...
خلوني اوصفلكم الوضع الي يالس يصير ...سارة مبققه عيونها على جمان الي
تصارخ وتحاول تبعدها عن جوري...
جمان يالسه تصارخ وتقول انتي انانية ما تفكرين الا بنفسج شكلها تخبلت ذي
البنت..وما معطيه مجال لجوري انها تفهمها لدرجة انها كانت تهزها
اما انا كنت متوقعه انه جوري بتسافر لاني سمعت ابوي يوصيها قبل ما يتوفى
..بس ما توقعت الليلة...
نروح للعاشق الصامت اكيد تستغربون اشلون اعرف بسالفة ناصر وحبه لجوري
...اكتشفت كل شي باليوم الي توفى فيه ابوي تصرفات ناصر كانت مب طبيعيه
كان اول ما يدخل البيت يسال عن جوري ..وكان يتصل فيني اكثر من مرة
يتاكد اذا اكلت ولا...وطبعا تاكدت بعد سالفة الشعر الطويل والخبله سارة
مب بالدنيا طيبتها مخرب عليها ..تصدقون انها طيبه لدرجة انه حتى الياهل
الصغير يقدر يقص عليها يبالها شي يصحيها من الي هي فيه....ناصر كان منزل
راسه ..ومكور يده يعني كان شرا الاسد الثائر الي يبى ينقض على فريسته
وبالفعل انقض على فريسته ...ناصر صفع جمان اصلا لو هو ما صافعنها جان
انا صفعتها مصختها صراحة اشلون تتجرأ وتقول انتي راميه نفسج على الريال
جمان ركضت لغرفتها ...ناصر طلب مننا كلنا نيلس قبل ما يقول اي شي
الشغالة زقرت سارة ...على قولتها مدام يمان يصيح
ناصر : وزياد يعرف
جوري : لا
اهني انا الي تكلمت :شو...عيل عند منو تيلسين
جوري : بكون بشقق الطلبه
ناصر :شكلج مضبطه امورج...وتبينا بس نوصلج المطار
جوري : ليش تقول جي...
ناصر:شو تبينا نقول ...شوفي تسافرين تروحين عند ريلج انتي حره ...بس انج
تسافرين وتسكنين بروحج وريلج مب داري هذا الشي مستحيل يصير
جوري :اسمحلي يا ناصر ..ما اعتقد ترضاها لي اني اتصل بزياد واقوله انا
يايه عندك تعال واستقبلني بالمطار ...انا مب رخيصه لهذه الدرجه ..صح
يتيمه بس ما ارمي نفسي على ريال ما سال عني طول عمري
ميعاد :شو ها الكلام يا جوري...القضية مب قضية رخيصه
ولا مب رخيصه القضيه انج ما تعرفين حد اهناك اشقايل تتصرفين بروحج
جوري: ميعاد انا مب اول وحده تسافر بروحها تراني رايحه ادرس ومؤقتا راح
اسكن بشقق الجامعه ...ولمن استقر بدورلي شقه منفصله ...
ناصر : جوري هذه اخر مره اسمعج تقولين ها الكلام ...مب انا خواتي الي يحسوا
نفسهم رخيصات ولا عاقات نفسهم على حد..اذا تبين انا الي اتصل بزياد وغصب
عن عيونه يستقبلج ويحطج فوق راسه
جوري: نزلت راسها وما ردت عليه
ناصر:عندج رقم خالي
جوري : عندي رقمه وحتى عندي رقم زياد ..ابوي عطاني اياهم ارجوك ناصر ما
ابى لا زياد ولا خالي يعرفوا ...انت ما تثق فيني ما تثق اني اقدر
اعتمد على نفسي واقدر اتصرف
ناصر: اكيد واثق فيج ..بس اباج توعدينا اذا احتجتي لاي شي ولا ما قدرتي
تستحملي الوضع تردي
جوري :اوعدك
ناصر...سكت وما قال شي وبعد فترة
ناصر :اغراضج جاهزه ..ناقصج شي
جوري : مشكور ..مب ناقصني شي
طلع ناصر ...وضلينا انا وجوري ودخلت علينا سارة
سارة :جوري لا تاخذي بخاطرج من كلام جمان ..صدقيني ما كان قصدها
جوري : ادري ما كانت تقصد ..وما توقعت ردت فعلها يكون جي
ميعاد :تدريبها وايد متعلقه بج ...ان شاء الله اللحين تهدئ
جوري :ميعاد سيري شوفيها اخاف تسوي شي بعمرها
شليت عمري وسرت صوب جمان...تصدقون اني مب متضايقه بس اكيد مب فرحانه
...صح اني اغار منها بس ما اكرهها ...ليش ما يخلوها تسافر وتشوف حياتها
بسها صايرلها متزوجه على ورق من 8 سنوات وعمرها ما شكت انا واثقه انها
تقدر تدبر عمرها ومستحيل ترمي نفسها على زياد... حتى لمن انطق اسمه احسه
شي غريب ويديد علي
بطلت باب غرفة جمان ...شو ها هذه اكيد تخبلت وبضمير حي بعد...
ميعاد :جمان شو يالسه تسوين..تخبلتي
سمعنا صوت ميعاد تصارخ على جمان ..ركضنا انا وسارة نجوف شو مستوي واول ما
دخلنا الغرفة جفنا جمان يالسه ترمي ملابسها
سارة :بسم الله عليج جمان...شو يالسه تسوين
جمان : بسافر مع جوري...بكمل دراستي بالندن
ميعاد :شو ...
طلبت من ميعاد وسارة يطلعون برة الغرفة...يلست على الكرسي اراقب جمان
وهي ترمي ملابسها بالجنطه
جوري: جمان شو يالسه تسوين
جمان : لا رد
يا الله هاي اشقايل افهمها...
جوري :جمان انا مسافره بعد 5 ساعات ....جفتها هدت ورمت اللبسه الي كانت
بيدها رحت وسحبتها من يدها ويلستها حذاي ...جمان غناتي اباج تحطين ببالج
اني مسافره بطلب من ابوي محمد مب برغبه مني وانتي اكثر وحده تعرفين شو كان
ابوي محمد بالنسبه لي لو كان طالب عيوني كنت بعطيهم اياه فما على بالج
ودمعته كانت بعينه لمن طلب من عندي اسافر...جمان انا بييكم بالاجازات
وانتي تقدري تزوريني كل ما حنيتي ... غناتي لا تخليني اسافر وانا احاتيج والله
لو كان بيدي لهونت اسافر بس ما اجوف دمعتج
جمان :توعديني تزورينا بالاجازات...وتتصلي كل يوم
جوري :اوعدج بزوركم بالاجازات ...اما اتصل كل يوم قوية هذه صراحة
جمان : ما استاهل يعني
جوري :اذا جمونتي ما تستاهل عيل منو الي تستاهل
ويلست احضنها ...ربي يحفظج يا جمان ويحنن قلبج على حمد
يالس اسوق السيارة من نص ساعه ومب عارف وين اسير...
ليش احس الدنيا ضلام وان الشوارع مضلمه..ليش احس عمري تايه بالضلام..ليش
احس داخلي ضلام ...ليش احس الدنيا ضلام وان الشوارع مضلمه ...ليش احس
الكون ضايق علي ..ليش.. يا الله ما ادري اشلون يودت اعصابي وما تهورت كنت
شوي واقول لجوري لا تسافرين لا تبتعدين ...
سمعت تلفوني يرن ... تمنيته يكون سالم لانه اكثر شخص محتاينه اللحين ما حد
راح يفهمني غيره وما حد راح ينصحني غيره ...شفته رقم دولي استغربت
ناصر :الو ...السلام عليكم
:وعليكم السلام ...اشحالك ناصر
ناصر : الحمد لله...منو معاي
:مسود الويه ...اشقايل ما تخبرني انه جوري يايه لندن
ناصر :شو...
الجزء الثالث عشر:
ناصر :خالي فيصل
الخال فيصل : مسود الويه ..اشقايل ما تخبرني انه جوري يايه لندن
ناصر: خالي منو قالك انها بتي
الخال فيصل:ابوك الله يرحمه ...على اخر زيارة يى لعندي وخبرني ..ووصان عليها
ناصر: خالي انا بروحي اليوم عرفت ...توها مخبرتنا انها بتسافر الليلة
الخال فيصل:شو الليلة
ناصر: شو ما عندك خبر
الخال فيصل:عندي خبر انها بتي لندن بس ما كنت اعرف الليلة
ناصر:خالي ...هي طلبت من عندي ما اخبرك ولا اخبر زياد
الخال فيصل:اشقايل ما تخبرنا ...شو الدنيا سايبه
ناصر:خالي خلها على راحتها ...هي بتسكن بسكن الطلبه وعندها رقمك بتتصل
فيك لمن تحتايك .. وانا راح اتصل بزياد واجوفه
الخال فيصل: شو على هواها هي..اسمع انا الي راح استقبلها بالمطار عطني رقم
الرحله ولا شو ابى برقم الرحله بروح اجيكه اون لاين واجوف متى توصل ..اما
على زياد هب ياي اخبره ...بس تاكد من رقمي عندها
ناصر: الي تجوفه ..حايه اماره خالي
فيصل :ما تقصر دير بالك على حالك وعلى خواتك
ناصر : على خير ان شاء الله
الله يرحمك يا ابوي ...حتى وانت متوفي مرتب لها حياتها ...يا ليتك خليتها شرا
غيرها من البنات تختار حياتها بروحها..يالله الواحد ما يعرف الخيره وين يمكن
لمن تبتعد اقدر انساها ..سبحان الله وعسى ان تكرهوا شئ وهو خير لكم
تخبلت من كثر ما يسالني عمران نفس السؤال ..يعني عرسنا تاجل خلاص ..في
النهايه قلتله اسال امي الي هي تشور عليه انا موافقه ..تصدقون في شي مب
طبيعي في بيتنا اول شي اجتماعات حمد وسعود السريه والطويله ما تبشر
بالخير ..وسالم من ياي من بره وهو سرحان مب بالدنيا موليه ...زين بعد
حصلت شي يشغلني خلني ابدا اطفر بحمد وسعود مع اني ما اداني سعود احسه
دوبه معصب ومتعقد وعايش في عالم غير عن عالمنا بس احسن فاكنه من ويه سرت
غرفة حمد ولمن بطلت الباب سكتوا
ريم :ليش سكتوا ..كملوا عادي ولا كاني موجوده
حمد :ومنو الي قال انج موجوده اصلا
ريم :عن الغلط...خذوا راحتكم في الكلام
حمد :طاعوا هاي ..يا ماما كلام الكبار ما يدخل فيه الصغار
ريم : اقول حمد جنك الى ضعفان
حمد :طبعا ..احنا مش قاعدين نلعب
ريم :لينشق حلجك من الفرحه بس
حمد :بتخبرك شو بغيتي انتي رازه ويهج
ريم :احم ...ما احب يكون في اسرار في البيت وانا ما اعرفها
حمد :ايوا قولي جي ...اشتغلت اللقافه
سعود :حمد انا بروح ..عندي شغل بخلصهم واحصلك
ريم : خيبه ..نسيت انه موجود
حمد :ريم لا تبدين
ريم :ما علينا ...اقول وين سايرين انت وسعود
حمد : ريم سكري الباب وراج
ريم :قويه تطردني من غرفتك...مصيري بعرف
ما حد فاهمني . ..كلهم على بالهم اني ناوي انزل وزني علشان جمان ...ما
انكر انه جمان تعتبر سبب من ها الاسباب ..بس السبب الاساسي ما حد يعرفه
الا سعود كنت من فتره شاك انه عندي اعراض السكري ولمن سويت الفحص طلع
شكي بمحله ..ما خبرت حد الا سعود مافيني على الحشره وعلى موال الوزن
وبالفعل اخترت الشخص المناسب ...سعود عنده قدره غريبه على ضبط اعصابه
..اخذ الموضوع بهداوه سرينا انا وهو المستشفى وسوينا الفحوصات وطلع
عندي سكري بس هب كان مرتفع بس كان لازم يرقدوني عندهم علشان يكملوا
باقي الفحوصات ويراقبون السكري ...وسعود قال لسالم اني برقد بشقته
وطبعا الدكتور لازم علي انزل وزني ضروري واسوي رياضه ...في البدايه
سعود على باله اني ابى اخف علشان جمان فسجلنا بالجم انا وهو بس بعدين لمن
عرف بسالفة السكري سوالي موعد مع اخصائي تغذيه علشان امشي على نظام
غذاني معين ...والحمد لله لحد اخر مره جيكت على السكري كان اوكي والدكتور
طلب من عندي اوقف الحبوب ومع الرياضه والنظام الغذائي بدا وزني ينزل
شوي...ولي ساعدني اكثر شي هو اصراري اني ابين لجمان هب انا الي
ينرفض...انتظري بس يا جمان لخليج تركضين وراي وتتمني نظره وحده مني
واعطيج درس ما تنسينه طول حياتج حتى لو تتطلب اني ادوس على قلبي...
انه المظهر عمره ما كان المقياس الصح علشان نحكم على الناس
صارلنا نص ساعه واحنا مرتزين بالصاله ننتظر الاخ ناصر يوصل...واخيرا
تشرف يبالنا نزفه اللحين.. والله حاله
ميعاد :جان تاخرت زياده
ناصر: سوري تاخرت عليكم ما انتبهت للوقت
جوري: حصل خير .
ركبنا السيارة ...سارة يلست جدام . .انا وجمان وجوري يلسنا ورا ...جمان
طول الدرب وهي ميوده يد جوري وحاطه راسها على كتفها وتصيح خيبه ما
يخلصون دموعها هاي..سندت راسي على السيت ويلست افكر بطلب سيف تصدقون
يبى يخطبني رسمي ما تصدقون وقع الكلمه اشلون كانت علي فجيت حلجي وقلتله
ها اسميني فضيحه اكيد الريال يقول بخاطره هاي ما صدقت على الله
وانخطبت...يلس يخبرني انه كان معجب فيني من ايام ما كنت اسير عند فطوم ..
وطلب من عندي رقم ناصر علشان يكلمه
وجت لحضه الوداع ...يا الله احس بالكتمه والضيقه سلمت على ميعاد الي حضنتني
وطلبت مني اطمنها لمن اوصل ...سلمت على سارونه فديت روحها يا ناس والله
انها تنحط على الجرح يبرى يلست توصيني على نفسي وعلى دراستي ...اما جمان
طبعا فتحتها مناحه حتى الناس يلسوا يطالعوا علينا فضحتنا وما رضت
تسكت لحد ما ناصر قام يهديها ...اما ناصر طلب مني اتصل عليه اول ما
اوصل واطمنه وطلب مني افكر بسالفة زياد بجديه وقالي انه خالي هو الي
بيستقبلني بالمطار جي انا موصيتنه ما يخبرهم بس هو قالي انه خالي اصلا كان
يعرف بروحتي للندن وانه ابوي محمد قايله بيني وبينكم احسن ما فيني على
التكاسي ...خليتهم وراي ورحت لصالة المغادرون انتظر لمن يعلنوا عن
اقلاع الطيارة حطيت ببالي ركوبي للطيارة راح تعتبر نقطة تحول بحياتي ..نقطة
تحدي لذاتي نقطة اثبت فيها لزياد الي ما سال عني ولا مرة اني قويه واني
هب جوري الاوليه الضعيفه الي تتاثر بكلام الناس ...تصدقون اقل تخمين كنت
حاطته ببالي انه زياد اهو الي بييني ما يا ابدا ببالي اني انا الي اروح
لعنده بس حلو شعور التحدي حلو لمن تحط ببالك شي ويكون عندك اصرار غريب
انك توصل لهذا الشي ...يتبدد عندك اي شعور بالخوف ويبقى فقط شعور
المغامره شعور رد الاعتبار ..اصعب شعور للواحد لمن يحس نفسه انه انفرض
على حد ..انه مجرد وسيله يتمسك بها الطرف الثاني علشان يوصل للي يباه
...انك تكون في هامش الشخص الي المفروض تكون انت اساس تفكيره ..ان وجودك
كان ظرف زمني وانتهى.....صح اني ما اعرف زياد ولا اعرف تفكيره ..بس الي
متاكده منه اني فرضت عليه واني كنت بمثابة طوق النجاة الي تمسك بها علشان
يهرب من الواقع الاليم الي كان عايشه...تصدقون انا اعذره بس بنفس الوقت
اعاتبه..اعذره لاني لو كنت بضروفه وابى اشرد من مجهول مسبب لي رعب اسوي
المستحيل علشان ابتعد ..فما على بالك اذا هذا المجهول رد لي صوتي فمن
الطبيعي اني ازيل اي عائق يوقف جدام هروبي من هذا المجهول وانا كنت
العائق وعلشان يزيل هذا العائق لازم يوافق عليه ... بس اعاتبه لانه اكيد
قدر يتخلص من هذا المجهول اصلا المده الي عاشها هناك كانت كفيله انها تنسيه
المجهول ...معقوله ما ييت بباله...معقوله ما فكر فيني طول ال 8 سنوات
...معقوله ما فكر انه في وحده اسمها مرتبط باسمه ...معقوله ما فكر انه
تارك وراه وحده متزوجه 8 سنوات على ورق ...
واخيرا رقد سلطان ...من ساعه احاول ارقده وهو يبى قصة وضل يسالني عن امه
..هب انت بس الي فاقدنها يا سلطان حتى انا صح انها كانت انطوائيه ونادرا
ما كانت تتكلم او حتى يصير حوار من بينا بس وجودها وابتسامتها كانوا
يكفوا.. الله يرحمج يا سعاد...تذكرت ريم اسميني الله يعين عمران عليها وعلى
حشرتها صدعتني لحد ما خبرتها بسالفة الدكتورة والخطا الطبي احتشرت وقالت من
باجر تسير وترفع عليها قضيه شو على بالها ارواح الناس لعبه اصلا يبالها
تسنيع وانت اشقايل ترخص بحياة حرمتك جي ويلست تهدد اذا ما رفعت عليها
قضيه باخذ امي وبنسري المحكمه ..وبعد تعرف تهدد.. بالله عليكم لو رفعت
قضيه وتعاقبت الدكتورة بترجع سعاد ...اما بالنسبه للدكتورة صدقوني
يكفيها الي هي فيه ويكفيها الكلام الي راح ينقال عنها ونظره الدكاتره
والناس لها ...يبالي اتصل بناصر واودعه بالمره ...اتصلت فيه بس مايرد
..وعلى الاتصال الثاني رد علي بس صوته مب كان طبيعي سكرت من عنده على
اساس نتلاقى عند البحر..وبعد نص ساعه وصلت وجفته يالس يطالع الناس
الي رايحه والي راده
سالم:متى تودر هاي العاده
ناصر:ليش شكتلك
سالم:ضريف صراحة
ناصر:كيف الاستعداد للسفره
سالم:الحمد لله كل شي تمام ...ناصر مستوي شي
ناصر:جوري بتسافر الليلة ..سايره لندن
سالم :شو..متى استوا ذا الشي
ناصر:هي خبرتنا اليوم
سالم :احسنلها ...خلها تجوف حياتها..وانت تجوف حياتك
ناصر:حياتي مستقرة والحمد لله ..
سالم :لا تكون بعدك تفكر فيها
ناصر: من اللحضه الي خبرتنا انها بتسافر لندن...في نفس اللحضه قررت
اعاملها كاخت فقط...انا هب نذل افكر في حرمة اخوي...كنت غلطان لمن عطيت
قلبي وعقلي المجال انهم يتعدوا على املاك غيري ...وربي يشهد اني طول الفترة
الماضيه ما تعديت حدودي معاها ...هي لزياد كان المفروض اني دايما اذكر
نفسي بها الشي واحطه ببالي ...من ها اللحضه قلبي راح يكون ملك لسارة
..وسارة تستاهلهم ..بس يحتاي اقومها من الي هي فيه
سالم :والي يقولك عنده الطريقه الي يقومها من الي هي فيه
ناصر :غرد ...
سيف : شو طير ...المهم اسمع
سمعت حس حد يزقرني فتحت عيوني وجفتها المضيفه تطلب مني اربط الحزام لانه
وصلنا..اخيرا ما بغينا صراحة.. شكلي بستقر هنا ما فيني على السيره والييه
بعد ما اخذت اغراضي يلست ادور على خالي فيصل انا متعوده اناديه خالي من
وانا صغيره المهم حصلت حد يناديني لفيت وجفته خالي ما شاء الله عليه خالي
بعده شباب ما تغير عن اخر مره يى وزارنا..ركبنا السياره وطول الدرب وهو
يعاتبني لاني ما بغيت اخبره وقال انه بيدورلي على شقه مع انه كان مصر اني
اسكن معاهم بس انا رفضت وبشده مستحيل اروح لزياد بنفسي... اول ما
نزلت من السياره لفحني اللهوا البارد وانكمشت على نفسي تصدقون شويه
واصيح ابى ارد بلادنا اشتقت لاهلي خلاص ما ابى اكمل الماستر هنا المكان موحش
بكمل ببلادنا..بس تذكرت ابوي محمد ويت صورته ببالي وهو يوصيني قويت قلبي
ودخلت وخالي اصر انه يي معاي بس انا قلتله ما يحتاي بتصرف بروحي ..ويا
ليتني ما طلبت منه يروح سويت نفسي هيرو على الفاضي ما عرفت وين اروح
خيبه وايد شقق و بنايات هنا جفت وحده وسالتها عن رقم غرفتي وصفتلي
المكان زين بعد مب بعيد
ميوده دفتر فطوم ويالسه اقراه ...يا الله طول الفتره الماضيه كنت اظن انه
فطوم ماخذه على خاطرها مني بس بعد ما قريت دفترها اكتشفت العكس
...النذل ولد ريل امها الي ما يخاف ربه قالها انه هو الي خبر ابوه انك
تتحرشي فيني وقالها هذا يزاتج عيل تبين تقلبين السالفه علي وانطرد من
البيت ...وحليلها فطوم وايد انظلمت وهاست بدنياها.. وصلني مسج اكيد من
عند سيف يتخبر عن تجهيزاتي للملجه ...فتحت المسج وكان مكتوب فيه
...غناتي باقي اسبوع وتكونين حلالي شو رايج نخليه عرس بالمره ..ضحكت عليه
من بعد ما تقدم لي رسمي وهو يحن على راسي نملج ونعرس بنفس الليله بس انا
ابى ملجه ابى اتعرف عليه اكثر ...تصدقون ما توقعت سيف يطلع جي طيب وعلى
نياته حتى ناصر وايد يمدحه
توني راده من بيت ابوي ..ويمان فديته رقد في السياره من التعب ..يلست
اطالع عليه وتجمعوا الدموع بعيوني تذكرت الفتره الي مرض فيها ورقدوه
بالمستشفى ..صابه فيروس الاسهال والترجيع اتذكر لمن رحت اجيك عليه بالليل
جفته مب طبيعي وباين انه فيه جفاف اتصلت بناصر 5 مرات بس ما كان يرد
كان عنده مناوبه بنفس الليله ...شليناه المستشفى انا وميعاد وانا طول
الدرب اصيح وادعي ربي انه يحفظه اول ما دخلنا الطوارئ وجافوه نادوا
على دكتور الاطفال المناوب وعطوه مغذي على طول ولمن خلص المغذي يمان حشر
الدنيا بالصياح وضل يصرخ ما يبى ابرة المغذي الدكتور ما كان شايلنها
مجرد انه سكر عليها علشان يعطونه مغذي ثاني لمن يحولونه للجناح بس يمان
ضل يصيح يباهم يشيلون عنه الابره فالدكتور اضطر انه يشيلها ..وبعد نص
ساعه من الفحص يت الممرضه تركب المغذي بس العروق(الوريد) مب كانت واضحه
ويلست تحاول مره ثانيه بعدين قالت بروح انادي الدكتور ويى وجرب وما
نفع ونادي دكتور غيره كل هذا وانا اصيح واشاهق ويمان يصرخ ويقول ماما
يعور وانا كنت احس قلبي يتقطع عليه كنت شويه وابوس يدهم واقولهم بسكم..
بس هم ضلوا يدوروا على عرق في ايدينه وريوله بس ما حصلوا صرخت عليهم
وميعاد كانت تهديني وفي النهايه قرروا يدخلون انبوب من فمه علشان يعطونه
سوائل وبعدين يشيلوه ويكون العروق بانوا شويه ..اول ما دخلوا الانبوب
صرخت عيلهم ميعاد طلعتني بره الغرفه وانا اسمع صياح يمان كنت يالسه على
الارض واللممرضه تهديني وبعد ربع ساعه ظهروا الدكاتره وقالوا بعد ساعتين
بنشيله.لحد اللحين صورته مب راضيه تروح من بالي والانبوب بفمه ..ويمان ضل
طول الساعتين يصيح يباهم يشيلوا الانبوب من فمه وبعد ما شالوا الانبوب
ركبوا المغذي .. في نفس الوقت اتصل ناصر ما قدرت اكلمه ميعاد ردت عليه
وخبرته بالسالفه وبعد 10 دقايق بالضبط يانا واول ما جاف يمان راح لعنده
وقام يحضنه ويبوسه وفجاه طلع وسمعنا صراخ وحشره بره الغرفه رحنا نجوف شو
مستوي الا ونجوف ناصر ماسك اوراق ويصرخ على الممرضه والدكاتره ويقولهم من
سمحلكم تضلوا تحاولون تدخلون المغذي اكثر من 10مرات خافوا ربكم المفروض
تنادوا واحد من التخدير واهو الي يدخل المغذي هم الي عندهم خبره في هذه
الاشياء ...ما قدرت استحمل الوضع ودرتهم وسرت صوب يمان يلست احضنه واقرا
عليه ومن بعد ذاك اليوم تغيرت نظرتي للحياة ...كل ما فكرت انه ولدي
كان بيروح من يدي اقول الدنيا ما تستاهل الواحد يركض وراها ...و ما
طلعت مكان الى ويمان معاي اصلا نادرا ما كنت اطلع خلاص كفايه السنوات
الماضيه كنت بعيده عنه
اسوم جدامج 10 دقايق جان ما نزلتي بروح...يا ربي من اسماء ما ادري متى
تودر هذه العاده لازم نتاخر يوميا عن محاضرتنا بسبتها...دخلت سيارتي
وصبحت على امي عايشه وابوي محمد وبوستهم ..حاطه صورتهم على مخده لونها
بنك..ومعلقه صورتهم بالمرايه الاماميه ...بنفس اللحضه وصلت اسماء
اسماء: يا بنتي عيب هذه الحركات تسوينها بالشارع
جوري:ما سويت شي ...صبحت على امي وابوي
اسوم : جوري دوسي بنتاخر على المحاضره
جوري طالعت عليها بنص عين مب جنه هي الي ماخرتنا ..وصلنا لمحاضرتنا بسلام
الحمد لله انه الدكتور ما كان واصل يلسنا انا واسماء حذا بعض
كالعاده...سرحت افكر بوضعي وبخالي فيصل الي مب قصر معاي بشي من ييت للندن
حتى الشقه يابها لي بعد اسبوع من وصولي ..ودوبه يتصل علي ويباني ازورهم
واتعرف على عايلته وانا ارد عليه واقوله جريب ان شاء الله ..اتذكر اول
ما بديت دراستي ضليت اسبوعين ما اعرف حد من المحاضره للشقه ومن الشقه
للمحاضره لحد ما تعرفت على اسماء هي ساكنه بنفس بنايتي ومعاي بنفس
المحاضرات يعني نفس تخصصي لمن تعرفون سالفتها ترحمونها ..تصدقون انا لحد اللحين
ما جفت زياد مع انه معاي بنفس اليامعه بس هو بقسم البزنس ..اسماء تحن
على راسي كل يوم وتقولي روحي جوفيه مستحيل اسويها واروح عنده بخليها
للايام وهي كفيله انها تيمعنا
ما حد بينزل مستواي الدراسي غير ريم تعرس هي واضيع انا ...لازم كل يوم
بالعصر اطلع معاها تتشرالها اغراض عرسها مب باقي على عرسها الا اسبوع
حد يسمع يقول عرسي رديت عليها واتفقت معاها تمر علي بعد نص
ساعه...طالعت على صورة جوري الي حاطتنها خلفيه للاب توبي اليوم كملت شهر
من سافرت واحسه سنه احس بالوحده من غيرها افتقد لنصايحها لسوالفها
معاي صح انها تتصل كل يومين واكلمها بالمسن كل يوم ..بس هم افتقدها
تصدقون حياتي طول ها الشهر كانت بين جامعه وريم ..يتني رنه من عند ريم
يعني اترياج تحت...ركبت معها ولمن مرينا صوب بيتهم جفتها تسوي باي طالعت
صوب ما هي تسوي باي جفت شخصين يسلموا على بعض بس ملامحهم مب كانت واضحه لي
لاني كنت لابسه نظارتي الشمسيه ...
جمان :منو هذول ..اول مره اجوفهم عندكم
ريم :شو... اشقايل اول مره تجوفينهم
الجزء الرابع عشر:
ريم : اشقايل ما عرفتيهم...واحد منهم يوسف والثاني الخقاق سعود
جمان: خيبه ما عرفته يوسف متغير عن اخر مره جوفته...بس تصدقين اول مره
اجوف سعود ولا جنه يران
ريم: خلي عنج هل الخقاق اذا احنا ساكنين معاه ما نجوفه ..بس احسن مريحنا من
ويه
جمان :ثريج ضالمه الريال ...كنت اتوقعه لا يرى بالعين المجرده
ريم :لا تبدين ترى بفرج بره السياره
جمان:عافانا الله متوحشه...تصدقين سمر معذوره يوم جافت سعود وتخبلت
ريم: جي وانتي لابسه نظاره شمسيه ...بعدين هو عادي مافيه شي مميز غير عيونه
الرماديه
جمان: بعد عيونه رماديه
ريم : بتسكرين سالفته ولا افرج
فديتها ميعاد ...طالعه تخبل بفستانها الذهبي بس هي وايد مرتبكه ..ما اجوف
شي يخوف جي بعدها تعرفه وتحبه ...عيل لو ما كانت تعرفه شو كانت بتسوي
فينا ...تصدقون رحمتها سارونه ورحمت يدها الي زاختنها ميعاد ..ضاغطه على
يدها من ساعه ومب راضيه تودرها جنها وصيفتها...فاتكم تجوفون ويها لمن
قالوا المعرس بيدش ...انا وريم انبطنا ضحك عليها وانا اقول لريم دورج ياي
الاسبوع الياي لا تضحكين ...ودخل سيف طالع رزه صراحة وهم مره لايقين على
بعض ...وحليله سيف كنت ضالمته بس طلع وايد طيب واهم شي انه يحب ميعاد
...اتذكر ذاك اليوم الي مرضت فيه ميعاد وكانت تشتكي من بطنها ولمن
ودينها المستشفى قالوا عندها الزايده اتصلت بناصر علشان يحصلنا
بالمستشفى ولمن يى كان سيف معاه شكلهم كانوا متواعدين واتذكر نظره الخوف
الي بعيونه ..لكن ميعاد كانت تحفه ذاك اليوم فضحتنا يلست تصيح عند غرفة
العمليات تراوالنا انها خايفه من العمليه بس طلعت الاخت تصيح لانه جسمها
بيتشوه ..على قولتها ريلي بيشرد لمن يجوف بطني ...اعتقد ذاك اليوم سيف
خلص كل باقات الورود الي بالمحلات لدرجة انه ما كان في مكان بالغرفه تحطين
فيه ريولج
اخيج منها ربيعة اسوم تيب الجلطه للواحد ...ما ادري اشقايل اسوم
مستحملتنها ما تنبلع خير شر ...تصدقون صايرلها نص ساعه تتمدح بدكتورها
من كثر ماتمدحه حسيته هيرو زمانه دست على ريول اسوم يعني صرفيها ربيعتيج
قبل ما انتحر...واسوم يلست تلمحلها انها مشغوله وتبي تدرس بس الاخت ولا
بالدنيا يالسه تكمل مدح بالدكتور ...حشى لوح ما تحس تصدقون شويه واروح
اقول للدكتور ارحمها وتعال واخطبها ...
اسوم :بالله عليج مريوم انتي متاكده هذا بني ادم ولا ملاك
مريم:تراج ما جفتيه ولا تعاملتي معاه...ما ادري متى يحس فيني
جوري:خيبه ...مضيعه الحيا هذه البنت(طبعا قلته بخاطري)
اسوم :مريم فجيني ما حيدني جفت دكتور بمواصفاته بقسمنا ...شكلج تجوفين فارس
احلامج بالاوادم
مريم:يا الخبله وحد قالج انه بقسمنا
اسوم:ليش هو باي قسم
مريم :بالبزنس يا ماما ...نسيتي اني اخذ ماده ايليكتف بقسم البزنس
اول ما قالت قسم البزنس بلعت ريجي ...وكنت يايه اسالها شو اسمه بس اسوم
سبقتني
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك