رواية انا الضحية وانا الجلاد -45

رواية انا الضحية وانا الجلاد -45

أفنان: وهي ترمي بجسدها على السرير_: ذكرتين بهارون الرشيد يومنه يقول ماترى لا ماتسمع..هي كذا؟

عذبة: أقول ترا عقدتن هالعبارة عجزت أحفظة..

إلا على طاري الحفظ درستس دكتورة حفيظة؟

أفنان: وعععععععععععععع....

عذبة: يقولون البنات إنه بتدرس السمستر الجاي...

أفنان: أقول إذا سلك الشيطان طريق فإسلكي طريقا آخر...

لا تقربتس.. إحذفي المادة ..خذيها عن أحد غيره بطلي دراسه بس مع هالعلة لاتاخذين..

عذبة: إيه الله يحيينا حياتن طيبة..

أفنان: إسمعي شوري لاتخربينه على آخر سمستر!!

عذبة: إيه لامن جت الدراسة أدبر عمري...

*************

"الشرقية"

"بيت الخال راشد"

أم إبراهيم: وليدي.. وين رااااح؟

يارب إستر وأنت الله لا يسلطك ليه تقول له الحين؟

الخال راشد: موب بزر بندر رجل..

بيرجع الحين تلقينه عند أحد من ربعه..

يمكنه ناسين جواله بالسيارة...

لا توسوسين..

أم إبراهي: لاااااه وليدي مايسويه .. من قلت لوه إنقلب وجهه وطلع..

لو بيروح عند أحد من ربعه كان غير ملابسه..

_دخل إبراهيم وألقى التحية_

أم إبراهيم: إبراهيم يمه.. رح دور أخوك .. طمنا عليه يمه..

الخال: يا أم إبراهيم لا تكبرين الموضوع...

إبراهيم: وش بوه بندر...؟

_أقبلت عبير تحمل جوال بندر_

عبير: يبه..بندر ناسي جواله بثوبة..

لقيت ضاري خويه داق عليه خمس مرات..

وعوض الــ... ما أدري منهو ذا..

ورقمك إحدعش مكالمة..

ورقم....

إبراهيم_بغضب_: وش بوه بندر؟

الخال: مابوه إلا العافيه إن شاء الله..

بس قلت لوه إن أبو عبدالعزيز كلم وقال ماكتب الله نصيب وقام وأنا أتكلم وطلع ولا رجع..

بس يمكن مواعدن ضاري بمكان وراح له..

إبراهيم: قايلن له ... بس هو ما يحقر نفسه..

عبير: إلا وش ناقصه أخوي... أصلاً يتشرفون إنه خطب منهم..

أم إبراهيم: لاتهاوشون .. رح جب لي أخوك .. لو تسحبه بثيابه...

عبير: يمه... إبراهيم يسحب بندر!!

ههه... قاضيتن من ظهر ولدتس ولاهوب قادرن يحركه سانتي واحد..

أم إبراهيم: إنطمي يا القملة....

رح دور أخوك أنت..

أبو إبراهيم: أم إبراهيم ... هدي أعصابتس...

أم إبراهيم: لا والله ... كلش عاد ولا بندر..

ياعيني على وليدي..

تقلقل وش تناظرن لوه..رح دور أخوك!!

إبراهيم: أبشري يمه..

******

"في غرفة نجلاء"

تسحب نجلاء حقيبتها الكبيرة بخفة وتركنها بجانب الباب , تقف أمام المرآه وتنظر لشعرها المنكوش, تمشطه وتشده فوق رأسها ثم ترخيه , أخذت مبرد صغير وقفزت فوق السرير, تأملت أظافرها وهي تتمتم قائلة" إيه يا ليلى.. ما فقدتس إلا ظفوري..وعععع .." يرن الهاتف تمد قدمها وتحمل السماعة بأصابع قدميها وتلصقها بإذنها وهي تصاغي رأسها قائلة" نجلاء خلف الــ ... تتحدث..."

"ياشين الدلاخة..."

نجلاء: هيلوة ... لحظة بس أتعدل...

_أخذت السماعة بيدها وتمددت على السرير, ووضعت وسادة تحت بطنها_

هيلة: نجلاء وراتس تزحرين؟

نجلاء: أتعدل.. وش عندتس..قولي أبوتس وافق تجين مع العمة بالمزرعة..قولي عاد...

هيلة: والله يا أنتي رايقة.. أنا منب لمتس أنتي والمزرعة..

نجلاء: عشتوا وش عندتس؟

هيلة: أنا....إنخطبت..

نجلاء: كلوولولولولولولولويش..من تعيس الحظ اللي وقع بمصيدتس؟

هيلة: تخيلي يا نجلاء أبوي باعن بيع...

نجلاء: وشو؟

هيلة: إيه.. أبوي يوم جوه يخطبون قال لهم البنت لكم..باعن بأرض وسيارة وكم ريال... والله إخواني حول يموتون من القهر, والأدهى والأمر إنه قال لهم يوم جو يخطبون أكيد أنتم غلطانين تبون أروى..تخيلتي!!

نجلاء: هـــــــــــــــــــــــــــو!!!

ليه موب أنتي أكبر من أروى؟

نجلاء: لا..بنظرة إنه حسافة علي... أو يمكن خاف من مرته...موب الناس ذولا بنظرالسيدة زوجته حسافة علي..الرجال غني ولد عايلة مشهورة وفخر له إنه تناسبهم هي ..تصدقين إنه قالته قدام إخواني بدون ماتستحي..

نجلاء: وش قالت؟

هيلة: قالت "هيلة طرطشة وبتفشلك بهم ..والله إن يرجعونه لك من أول يوم, زوج أروى إياو أنسب من هالشينة اللي ماتعرف الذوق والكشخة"

نجلاء: الحيوانه.. أقول فكين عليه.. خلي أدبغة والله ما أخلي به عظم على عظم ولا عرق يسقي عرق...تقهههر.. طيب هم وش قالوا؟

هيلة: قالوا لا..حنا نبي هيلة..

نجلاء: إخس يالمهمة!

تذكرين لامن قلت لتس أنتي حلوة وماعليتس قاصر وماعليتس من كلام نرجس الهبلة ماصدقتين!!

هيلة: بس أنا ما أبيه..ما أبيه... حتى إخواني منقهرين من أبوي..

يقولون سود وجيهنا وهويساومهم..ولا تقل أنا بقرة مو بنت!!

نجلاء: طيب أخوتس الدكتور اللي تسمينه الصنم وراه ما تحرك؟

أخبره هو اللي يوقف أبوتس عند حده دايم!!

هيلة: حمودي والله ياعمري جاء لمي وقال لي كل شي..وقال لي إن الرجال ماعجبه ..يقول عنه بنيه والسلام.. وإن أبوه كل ما شدينا على الولد قام يلمح لأبوي باللي بيعطيه همن أبوي يسكتنا.. والولد ساكت وباين إنه متضايق من أسلوب أبوه وأبوي..بس بنيه موب قادر يعترض على أبوه...

نجلاء: وه الله يعينتس..خكري وبالدبره!!

ومحمد وش بيسوي؟

هيلة: قال لي إني لو ما أبيه..بياخذن للمحكمة وأشتكي أبوي ولا عاد يزوجن..

نجلاء: بعدي والله هذا السند..!!

زين روحي للمحكمة ولا تخلين أبوتس يبيعتس بسيارة وقرشين!!

هيلة: منتب صاحية..وش بيقولون عن الناس!!

نجلاء:وش عليتس من الناس!!

حقتس كافلة لتس الشرع... والناس تنطق!!

هيلة: الشرع شي... وكلام الناس وتقبلهم شي ثاني... والله إن يشيلونن حلمة ويحطونن قراد ...

نجلاء: والله بلشة.... طيب هم منيل يعرفونكم؟

هيلة: منكم...

نجلاء: منا!!

هيلة: إيه... تروك البنية...

نجلاء: تركي ماغيرة ..ولد سعد!!

هيلة: إيه بشحمه ولحمه...

نجلاء: وأنتي ضايق صدرتس عشان تركي!!

أصلاً تروك يخبن عليتس يالدردشة..من يحصل غسال رجلينه... تركي أرجل الرجال..

هيلة: نجلاء لاتسخفين دمتس... تركي بنيه وصايع.. كلن يعرف عنه هالشي..

أستغفر الله ما حد سلم منوه...

نجلاء: وين خبرتس عتيق!!

تركي تارك خرابيطه ذي من زماااااان... من زمان تارك البنات والسفر...

السنه اللي راحت راح مع نواعم وعمانه..وهالسنه يقول بيسافر مع محمد رجل إيمان المطوع ذاك.. تركي ترا متغير,,

وبعدين تركي رجل بمواقفه... والله ما وقف معنا أحد مثله.. يختي تركي تتمناه كل بنت..حنون قلبه نظيف

رجل يعيش بقلب طفل...

رحوم وينشد الظهر بوه..وصدقين أنا ما أقول هالكلام عشان أهون عليتس..

أنا أتكلم من جد... تركي رجل بمعنى كلمة رجل....

وهالكلام من تجربة...

لاتغرتس المظاهر ياهيله... تركي ولو مالبس شماغ..مافي مثله بالمرجله...

هيلة_بسخرية_: لاوالله!!

فكين منوه خذيه أنتي...

نجلاء: ههههه اهلي بدو.. يبون واحد شنبات..هههه إلا مير أبسألتس لابس شماغ يوم يجي؟

هيلة: لا لابس ترنقة..

نجلاء: لا والله!!

والله إني قلت بيسويه بيخطب ببدله بس ماهقيته بتصير!!

هيلة: مهبولة أنتي!!

جاي ومشخص...كاشخ وريحت عطره واصلتن غرفتي..

بس ما أبيه يا مرة ما أبيه....

نجلاء: تبين أكلم عليه وأقول له إنتس ماتبينه؟

هيلة: لاتكفين..تركي مغسول وجهه بمرق لاحياء ولا مروة..

بيعاند وبيتزوج وبعدين يعايرن إن أبوي غاصبن عليه وإني ما أبيه وبيعرس علي...

لالا.. تكفين لاتقولين له..

نجلاء: لا تخافين.. أصلاً كبرنا الحين موب زي منول امون عليه..

وبعدين لو قال لعذبوه أم ضروس وش بيفكن من لسانه...!!

***********

"أمام شاطئ نصف القمر"

يجلس بندر ويتأمل الأمواج الهادئة, ضوء النجوم ينعكس على صفحة الماء, تلمس وجهه المجهد وشد شعره الأجعد,تنهد ورفع رأسه, إنتفض فجأة حين ربتت يد على كتفة..

بندر_يلتفت_: أنت!!

ضاري: لا أنا...

بندر_يشيح_: وش يدريك إني هنا..

ضاري: دريت...

علامك؟

بندر: ردتن يا ضاري.. راح كل شي.. كنت خايف بالبداية ليتي ما صدقتهم..

قالوا لي هي تحبك... بس...

ضاري: أهلك يدورونك...

دق علي إبراهيم يسأل عنك.. كنت بالطريق جاي.. أنا عارف هالوقت عندك دوام..دقيت على عوض وسألته قال إنك ماجيت لهم, قلت أكيد الوقع أقشر...

بندر: إي والله ياخوي أقشر..

ضاري: تستاهل هاللي يصير بك؟

بندر_يبتسم بمرارة_: وأكثر يا ضاري....آآآآخ

ضاري_يهزرأسه_: من يصدق إن بنت تسوي ببندر كذا..ماهقيتها منك يارجل...

بندر_يهوي على الأرض_: سوته .... بس موب هي.... العشق..

ضاري_يضحك ويهز رأسه قائلاً_:

على ذاك الطريق اللي يسمونه غرام أحباب

وطت رجلي على دربه ولاأدري وش نوى فيني

بندر: تهقى وش نوى فيني؟

ضاري: قم يابوي.. قم يالله أنا أبنزل عدة الشوي جوعااان.. بلا عشق بلا خراط..

بندر: رايق..ماهمك إلا بطنك!!

ضاري_وهو يتجه لسيارته_: أقول يا أبو راشد... ترا البنيه تبيك بس إن العجوز هي اللي معيه..

_يلحقة بندر ويمسك بكتفه ويوقفه وهويقول_:

من قالك؟

ضاري:تو كلمت نجلاء..وسألت عن موضوعك وقالت لي..

بندر: يعني نورة موب رافضتن؟

ضاري: لا...

بندر: أشوا..

ضاري: طيب... خل كتفي بروح للسيارة..

بندر: جد والله ضاري

بندر: لا .. أكذب أنا..أكذب هاه!!

منخبل الرجال ..كل هذا من العشق!!

بندر: الله يورين بك يا ضاري..

ضاري: ياعووووووك... بدوي وعاشق وش يصير عاد..

*****

"في سيارة تركي"

تركي: بس يبه مايصير اللي سويته!!

تساوم الرجال مساومة... والله إنحرجت...

سعد: موب أنت تبي البنت!!؟

تركي: إيه بس ماقلت أبشريه...!!

سعد_يضحك_: ههههههه ماشريته أنت... أنت شريت أبوه...

تركي: يبه!!

سعد: أقول تروك توك صغير على فهم هالدنيا...

كل إنسان تقدر تشريه بشي..

اللي تشريه بفلوس.. واللي ينشرا بالمدح..

واللي ينشرا بالعين الحمرا ..

الناس مذاهب واللبيب يعرف كل واحد شلون ينشرا...

تركي: أنت تبيع بنتك كذا!!

سعد_يلتفت على تركي الذي أمسك مقود السيارة بغضب_: أنا لا...بس هو إيه...

تركي: شفت شلون إخوانه ودهم يصفقوننا...

أحس إخوه الطويل شوي ويقوم يطردنا من المجلس...

أكيد بعيي.. ماراح يوافقون إخوانه...

سعد: لا يوافقون!!

بالذات الطويل محمدوه خله بحريقة... يبي له كسرة خشم...

وبعدين إزهل الموضوع كله علي..

ومدام الشايب بيدي ألعب زي ما أبي ماعليك من البزران ذولا..

الشايب كب عليه دراهم وينسى إسمه...

ولو أقوله زوج بنتك أبوي ماعنده مانع...

هههههههههههه

تركي: طيب ... وإن أمنعوه عياله... تدخلوا إخوانه وخوال البنت..

ترا خواله نسبانا... تكفى يبه لا تستفز إخوانه نتورط معهم...

سعد: أنا قبل لا أخطب.. سألت عن الرجال... عرفت إنه لامن ركب راسه محد يقواه..

وعرفت إنه بعد مايحشم أحد ولا يقدر لحد قدر.. يعني العيال وعارفين أبوهم ليش يدخلون الناس وهو بس بيرفض وبيركب راسه..

فكر ياوليدي لا تصير على نياتك.. إحسبه زين...

ولو أنا شاكن لو شك إنه بيقوم لأحد غير دراهمي قدر كان جبت عمانك مير أحسن إن عمانك مايشوفونه كذا...

تركي: لالا... أشوا إنك ماجبتهم والله إن عمي عبدالله يقول لأمي نورة وإن أمي نورة تحلف إني ما آخذ البنت اللي أبوه تسذا..

سعد: ياحمار لا تقلد أمي!!

تركي:ههههههههه طيب هي تتكلم كذا...

************ *********

"القصيم"

جلست هيلة على المركاة القريبة من باب الغرفة, ونظرت للبنات ثم تبسمت قائلة:

بنات... منتب رايحات لمزرعة الـ................. ترا لهم يومين طالعين...

إلتفتت نرجس ونظرت لشوق والهنوف الجالستين بجانبها قائلة:

يمكن إن سافر أبوي... بيودينا الدحمي... تروحن معنا؟

شوق: ما أدري... ما عندي ملابس... يبي لي أروح أشري كم قطعه...

مالي خلق...

وبعدين لو على بنات عمتي عذبة عادي.. المشكلة لامن جو أهل نجود... أستحي منهم...

الهنوف: إيه صح... نجود وينه؟

هيلة: رايحة بالرياض.. أهله بيسافرون بكرا... ومهوب رايحين للمزرعة..

نرجس: لااااه... وين بيروحون؟

هيلة: مادري بس هم أكيد بيروحون لأوربا.. أظن بريطانيا وفرنسا والظاهر بيمرون سويسرا.. كل العطله بيقعدون هناك... بس بيجون على آخر العطلة عندهم مناسبة...

الهنوف: وش يدريتس عنهم!!؟

نرجس: عنده مصادره الخاصة... نجلوه ونوير كلش يقرنه بإذنه..

إلا وشي المناسبة؟

هيلة: إلا أنتي لازم تدرين عن كل شي...

شوق: سمعت إن مجيد خاطب نجلاء.. أكيد زواج نجلاء صح؟

هيلة:لا

الهنوف: وش عليكم منهم... أقول صبوا لي قهوة... أنا بروح للمزرعة بكرا...بروح مع عمي عبدالمحسن ...

أمي بتروح متأخرة.. خالاتي بيجن للقصيم..

نرجس: روحي مع اللي تبين بس هيلة تكفين قولي لي وشي المناسبة؟

أكيد عذبة بتتزوج فيصل...

هيلة: لا

شوق: نرجس... أصلا عذبة خلاص فركشوا خطبته...

بس بيعزموننا لهالمناسبة؟

هيلة: أكيــــــــــــــــــــــــــــــــــــــــــد...

نرجس: أفا!!

ليه عذبة فركشت فيصل؟

يجنن فيصل.. حرام ...خبلة رفست النعمة برجله.. إلا توقعون فيصل من بياخذ بعده؟

هيلة: يمكن ياخذ من خواله...

نرجس: هاه...عندك خبر أنتي!!

أكيد زواج فيصل؟

هيلة: لا

تركي... أخو نواعم.. تعرفينه؟

نرجس_جمدت ملامحها_: ب...بي...بيتز....و....ج!!!!

هيلة: إيه.... بيتملك بعد إسبوعين وبيتزوج على آخر إسبوعين بالعطلة...

شوق: تروك .. شكله صغير!!

هيلة: لا..كبير.. طبيب الحين يشتغل بمستشفى الملك خالد...

نرجس: من قال لتس؟

أنتي كذابة...

هيلة: عمر عينتس لاتصدقين...لامن جتكم البطاقات بتعرفين...

شوق: أكيد بيتزوج وحده طبيبة مثلة!!

نرجس: بس....

إيه الطبيبات بعضهن يلفن روس الرجال... تطيح الرجال به غصب..

ولا ... أمه سألت عن... وهو

هيلة: وهو شافتس صح؟

بس ماعجبتيه ياحرام...

نرجس: عاد أنا منب زي الطبيبات تضحك وتسولف معه وتلف مخه...

أكيد إنه قليلة أدب وما تستحي من الرجال...

هيلة: بس خطيبته موب طبيبه....

شوق: يمكنه شمس بنت عم أمه...أكيد..صح..أشوفه دايم تسولف مع أمه..

وأمه أخذت شمس معه يوم يطلعون من عندنا ذاك اليوم..

وكان تركي هو اللي بيوصل أمه للبيت..

أكيد هي صح؟

هيلة: لااااااا....

موب من خواله...

الهنوف: نورة بنت عمه صح؟

هيلة: موب من أهله.......

كلش..كلش...

نرجس: أنتي كذابة... وبعدين شلون أحد مانعرفه وبيعزمونا..يعني لو بنات عمتي قلنا أووو........... لا تصير نجلاء!!!

هيلة: نو نو نو....

نرجس: أجل من اللي بيعزمنا... أنتي تكذبين...

هيلة: بياخذ وحده تقرب لكن كلكن...

الهنوف: منهي؟

نرجس: إنطقي.. بياخذ من بنات خوالنا!!

بنات خالي عبدالله... ولا خالتي لطيفة..لا أكيد من....من..!!!

وجعن راسي؟

هيلة: الخبر تراو طازج ....

ما يبغى إنه ينتشر..

الهنوف: موب منتشر بس..........

_تدخل حصة وتمسك كتف هيله متعجبه وهي تقول بسرعة_:

الهلي....صدز اللي أمتس قالت لي!!

شلون؟

متى.... ليش ماقلتي لي؟

هيلة_تضحك_: وأنا قضبتس... كل ما أدق عليتس مقفل وأدق على بيتس ماتردين!!

حصة: يانعنبوا بليستس... تركي عاد!!!!

هيلة_تغمز لحصة_: ليه تركي وش ناقصة؟

_وضعت نرجس يدها على فمها وجحظت عينيها_

حصة: لا تروك ماعليه كلام.... موب قصدي إن بوه شي...

بس ماتوقعت يعني أمه شرقاوية ....

وتوقعت ياخذ من خواله...

هيلة: عاد خطبن.... بغان أنا ما بغى شرقاوية....

نرجس: تر...كي... بيا....خذتس....آآآآنتي!!!

هيلة: وملكتي موب الخميس الجاي الخميس اللي بعده...

نرجس: أكيد ... أصلاً... تركي شايفن أنا.. أكيد إنه يحسبن أنتي!!

مايصير... لا تهكون على الرجال...خلوه يشوفتس قبل الملاك..

لا الحين من يشوفتس بالملكه يوريتس بياض رجليه...

فااااهمه!!

حصة: نرجس!!!!

نرجس: لا حرام تهك على الرجال...بالله وقفيهم جنب بعض وش جاب لجاب!!

تركي فلقه قمر أبيض وسيم جنتل وهي بسم الله علينا..

شوفي لبسه وشعره ولا لونه اللي ماأدري وش يبي...

الهنوف: مبروك ياهيلة.... ماعليتس من نرجس.... نرجس غيرانه إنتس أخذتي اللي دايم تقول إنه إنفتن به.... أستغفر الله... والله يانرجسوه إن هيله حلوة وتخبن على الـ..... كلهم...

هيلة_تتأمل ردود الأفعال وهي تتبسم_: عادي... متوقعه كلامة..

نرجس: شوفي أنا أبي مصلحتس.. ينسحب الرجال من قبل الملاك أهون من بعده..

حصة: والله يانرجسوه إنتس قليلة أدب!!

هيلة: نرجس... تركي شايفن قبل لا يخطب.... ويعرفن قبل لا يعرفتس...

نرجس: إخس يالوسخة !!

حصة_تضرب نرجس بقوة_: ما الوسخ إلا خشتس!!

هيلة: أنا ما رحت متلبسه ومتكشخة واو ماواو يوم شفته وأنواع الدلع وقلة الأدب..

أنا كنت أركض وألحلق نجلاء وما أدري منيل طلع لي وصدمته...

وإذا ماصدقتين كلمي الحين نورة وإسأليه كانت حاضرة الموقف كله ترا بيسافرون بكرا العصر...إلحقي عليه عشان تأكدين...

نرجس: .............................. أصلاً من زينه....

شوق: ههههههههههههههه

لا والله باين إنه أحسن شاب عندهم..

دايم يسولفون عنه يقطع التسبد من الضحك..

وحليل.. تذكرين نورة يوم تسولف عن سالفتهن يوم نجلاء تضرب البنت ويوم دخلن يصيحن قاموا مجيد وسلمان يهاوشون عليهن وراما تغطن وهو رحمهن وقام يدافع عنهن...ولا مسك نجلوه ووصله لبيتهم بعد...

ههههههههه والله ياذيك السالفة أموت وأنا أضحك عليه..

حصة: هيلة.... تعالي أبيتس شوي...تعالي معي لغرفتي...

_خرجت هيلة تسبقها حصة, وإلتفتت نرجس للهنوف بغضب قائلة_:

الحين أنتي ليش تقولين عن كذا!!

الهنوف: بس أنتي تحسين وهي ماتحس!!

دايم تطنزين عليه وربي أوثره عليتس...

شوق: لا بصراحة يا نرجس أسلوبتس وقح وباين إنتس نغرتن منه...

لاتحاولين تغطين على الموضوع.

نرجس: وش به أحسن من!!؟

شينه وتاخذ تركي .. أحسنهم .... بس..بس إن شاء الله فيصل يصير لي..

أنا إن ما أخذت منهم مانيب متزوجة...

الهنوف: عنسي أحسن...

شوق: ما أكذب عليتس وأقول لتس إن ما أبي آخذ واحد غني ولد ناس هاي بس إني أروح وأترزز وأسوي سواتس لا...

أنا معززة مكرمة واللي ربي كاتبه لي بيصير...

شوفي هيله يوم ربي رزقه وهي على نياته...

نرجس: وع ... أصلاً باين على تركي صايع... سمعت إنه يلبس سلاسل...

الهنوف: هههههههههههههههههههه

واللي مايطول العنب حامضن عنه يقول...

بس على فكرة ترا عيال العز ذولا يعتبرون المرة زي السيارة يطفونبه ويجدعونه..

ولا ليش ما تزوجت عذبة فيصل ونجلاء عيت تاخذ مجيد ونجود أخذت خالي ليش؟

مابهم إلا ليلى أخذت من أهله...

************

"في بيت سعد"

سارة: مبروك يا تركي مبروك..ياسعد البنيه فيك...

تركي: إحم سمعتي يا نواعم؟

نواعم: إيه....خالتي سارة تجاملك

سعد: لا والله ولدي مامثلة..

نواعم_تنحني على إذن تركي هامسة_:

قال من مداحتها...قال أمها ومشاطتها!!

تركي_يدفعها بقوة فتسقط على الأرض_: من زينتس عاااااااد!!

ينهض سعد ويتلتفت على سارة ويبتسم قائلاً_

السوري أبطلع تبين أمرتس على أختس؟

سارة: الله يطول بعمرك ... ما أبي أتعبك.. أروح مع السواق..

ماله داعي أعنيك المشوار...

سعد: يالله عاد روحي جيبي عباتس أنا أنتظرتس بالسيارة...

جاهزة؟

سارة: لا... بغير ملابسي.. ما أبي أطلع بجلابية... بيجونها حمولتها..

لا ياعمري أخاف أخرك..

_تركي ونواعم يتابعون الموقف, نواعم تهز رأسها بتعجب بينما تركي يبتسم بخبث ونظر لسارة قائلاً_:

بالعربي الرجال يبي هو يوديتس .... إفهميه عاااااااد!!

سارة_بإحراج_: تركي!!

سعد_يمسك بيدها ويجرها لحضنه قائلاً_: يالنجس نشوفك أنت ومرتك!!

إيه أبيه تروح معي أغار عليه من السواق إرتحت!!

نواعم: ماشاء الله يغار على مرته ولا يغار على بنته...!!

سعد: وش تقولين؟

تركي_يقرص يد نواعم ويقول_: تقول ..بتروح لصديقته...

سعد: إيه تروح.. بوه السواق أحد ماسكه!!

يابنتي إذا أنتي تعرفين البنت وواثقتهم روحي...

وإذا تركي فاضي يوديتس...يالله يالسوري عجلي على أنا بالسيارة...

سارة_وهي تركض للأعلى_: طيب الله يخليك لي... شوي بس...

سعد_يهز رأسه مبتسماً_: يالله تروك... اليوم أبشوفك ..

نواعم: وأنا؟

سعد: وأنتي... أبتعشى معكم قبل لاتروحون لأمكم...

_يخرج سعد_

نواعم: تذكر...كان مايودي أمي ولا يجيبه!!

والحين سارة مابقى بعد إلا يودي خواته معه...!!

تركي: تستاهل السوري...

نواعم: يعني أمي ماتستاهل!!

تركي_يحك شعره_: تبين الجد؟

لا... أمي ماتستاهل... أمي ماكان يشوفه أصلاً...

أحسه تحسف على عمره اللي ضيعه مع أمي...

نواعم: أنت ماتحب أمي!!

تركي: أنا أحب أمي لكن أشوف الحق..

نواعم: بتروح معي لأمي؟

تركي: أجل من بيوديتس أنتي ووجهتس..بسلم عليه...

نواعم: الله يخليك لي... وبعدين تجيك هيله وتضفك عني...

تركي_يتأمل وجهها ثم يبتسم_: ترا والله الدلع موب لايق عليتس...

نواعم: ترووووك...عندي إحساس إن هيلة بتشوتك من أول يوم...

تركي: تشوتن وأرجع له...ههههه

نواعم: جد والله!!

هيله ماتطيقك... وبعدين تكره اللي يلبسون بدلات... ومرة قالت لي ..

ليش كل عيال عمتس يلبسون ثياب إلا إخوتس؟

تركي: قولي له وش دخلتس...

_تنزل سارة تركض بالدرج, تمر من أمامهم فيسقط نقابها, تنحني وتلتقطه, تتوقف عند الباب وتلتفت على نواعم وتركي قائلة_:

مع السلامة نواعم مع السلامة تركي... يمكن أنام عند أختي....

يمكن ما أشوفكم إلا بعدين...مع السلامة بفقدكم والله.._

تركي: لا تخافين بودي هالبقرة الضاحكة وأرجع مانيب مطول..

نواعم: مع السلامة والله بفقدك بعد أنا...

تركي: ياحظ أبوي بهالمرة... حليلة ...

نواعم_تضرب كتفه_: تروك أنا البقرة الضاحكة !!

تركي: إيه ... من بيروح معي غيرتس؟

نواعم: زين... بعدين ليش ماتروح معي لم أمي... أمي مشتاقتن لك!!

تركي: مشتاقتن لي..تجي لي ببيت خوالي... ولا أستاجر شاليه ونجتمع بوه..

أما تبين أجي وأجلس عند الفقمة وعيالوه!!

نواعم: تدري أمي ماتقدر تخلي البزران!!

تركي: وأنا ما أتحمل أشوف القرودة عيال حسن... وع الله لا يبلانا هو وعياله حسافة عليهم بيت أبوي!!

هذولا وجه بيت بحي ال(....) وقدام البحر بعد... هذولا من فوقهم سكن عمال!!

نواعم: أوووووو ترووووك ماخبرتك كذا؟

تركي: خلصين تكفين.... بعدين أنا أبطلع ... بروح لمجيد الدلخ..

نواعم: خذني معك...

تركي: لا والله!!!

مابوه أحد هناك.. عذيب وخواته بالمزرعة... وأهلي سافروا من تروحين لوه؟

نواعم: زهق!!

تركي: روحي لصديقاتس..

نواعم: تس..تس... صاير قصيمي بجد!!

تركي: وأنا من النمسا... أنا قصيمي...

نواعم: سبحان الله... ماطلع القصيمي إلا يوم وافقوا لنا على هيول...

بصراحة تركي ... أنت حبيته!!

تركي_يتظاهر بالحياء_: إيوه.....

نواعم: ومتى؟

تركي: إتأبلنا بالنادي ...

نواعم_بغضب_: ترررررررررررررررررروك!!!

تركي: إيه حبيته... وبحبه... وحبيت حياءه وأخلاقة....

نواعم: بس هيله مو ذاك الزود!!

تركي: أحسن منتس...!!

يتبع ,,,,

👇👇👇

تعديل المقال