رواية انا الضحية وانا الجلاد -46
نواعم: ومتى؟
تركي: إتأبلنا بالنادي ...
نواعم_بغضب_: ترررررررررررررررررروك!!!
تركي: إيه حبيته... وبحبه... وحبيت حياءه وأخلاقة....
نواعم: بس هيله مو ذاك الزود!!
تركي: أحسن منتس...!!
نواعم: بدينا !!
تركي: لا تسبين ولا أسب!!
نواعم: خلاص.... بس أبطلع معك...
تركي: لاحووووول.... لا..
نواعم: طلبتك...
تركي: إذا جيت من مجيد...
نواعم: تكفى...
تركي: ووووه
************
"في المزرعة"
تركض نجلاء وتلحق بناصر بين النخيل الباسقة, الأرض زلقة بعد رشها بالماء, وأشعة الشمس تنعكس بين الأعشاب القصيرة...
نجلاء: نصووووووووووووور والله لأوريك جب الكورة بلعب أنا والبنات!!
ناصر: حقت العيال... روحوا جيبوا اللي هناك..
نجلاء: ياكذاب شاريته عذبة!!
ناصر: عذبة أوب لاعبة..
نجلاء: نصور يالعبد جبه..عذبة تحرانا!!
ناصر: أرسلوا السواق يجيب لكم...
_أمسكت نجلاء به بقوة_
نجلاء: هين مسكتك بالجرادة... والله لأوريك_تضرب رأسه وتقرص إذنه_ أوريك..
ناصر: آآآآآآآآآآآآآآه... والله لأقول لأمي...
نجلاء_وهي تأخذ الكرة وتدفعه_: إيه إن قضبت أمك جبه لي أحبه...
رح أنت جب اللي هناك...
ناصر_يخرج لسانه ويقفي ذاهبا وهو يقول_: من زينتس يالعبدة يا أم عكاريش...
أنتي وعيونتس اللي تقل عيون سنجاب...
نجلاء:ههههه نكتته الموسم... من هناك؟
ناصر: كولي تبن أوب قايلن لتس... إنقلعي...
_تخبأت خلف إحدى النخيل , فيما إبتعد ناصر متجهاً للملاعب التي في قسم الرجال ليحضر كرة أخرى, وأقبل ضاري وبندر يتحدثان بصوت عالي_:
ضاري: والله قلت له.... بس عنيد...
بندر: حاول به مرتن ثانية... بلكي يسمع هالمرة....
ضاري: يا بوي خله يولي...
بندر: حرام يضيع وأنت تناظر....
_تطل نجلاء عليهم من خلف النخلة فيفزعان _
ضاري: نعبنوا شيطانس !!
بندر: وجع .........
نجلاء: إيه الصدفة الحلوة دي!!
ضاري: ياللعينة حسبتس جنية من بين هالشجر !!
بندر: نخل يا ضاري فشلتنا....
نجلاء:يؤ.... إنبهرتوا من جمالي!!
ضاري: واللي يرحم والديك جدلي شعرس... تقل طالعة من قبر!!
نجلاء: لا... أنا مجعدة شعري لو سمحت ياعمو العزيز ما أسمح لك تطنز علي...
ضاري: بندر شف وش كنه شعرها؟
بندر: أسلاك تليفون......
ضاري: جبتها أمك وأبوك بالجنة... يانجلوه ليش جايه هنا لحالس؟
خطر عليس المزرعة كلها عمال وشباب ... كل المكان فيه شباب!!
نجلاء: موب لحالي ... معي ناصر...
بندر: وين ناصر؟
نجلاء: راح..
ضاري: والله من زين الخوي....
بندر: لا تخاف عليه.... هذي ينخاف منه...
ضاري: وش هالكلام...؟
نجلاء: بندر يعرفني على حقيقتي....
ضاري: أقول جابتس ربي...قولي لبندر عن سالفة نورة...
نجلاء_تنظر لبندر بخبث_: لا..ما سألن وشوله أقوله..
بندر: بلا ملاغة....
نجلاء: أنا مالغة وش بتسوي؟
بندر: أسطحتس فوق هالنخلة.....
نجلاء: ماتقدر بوه عزوتي بذا....
ضاري: أجل ياخوك تمد يدك على بنت خلف!!
بندر: من زينك أنت وياه... أكلم عذبة وأسأله بلا منته...
نجلاء: أهم شي تتنزل وتسأل...
_تفزع_ يوه البنات ينتظرونن أجيب الكورة...
نسيت يالله بروح..
ضاري: البنات!!
ومن متى البنات يلعبن كورة؟
نجلاء: إيه بعد فريقين أنا وعذبة والهنوف وريم وحصة و...........
بندر: أص...فقعتي روسنا...من شويكن تعدين لنا الفريق كامل...
نجلاء_تصر عينيها_: ولا عشان نوير موب بوه؟
بندر: نجلاااااااااااااااااااااء!!!
ضاري: عادي يدخلوننا بتشكيلة الفريق؟
نجلاء: موب شينه نلبسهن براقع... والله حماااااااااااااااااس...
ضاري: بندر تخاوين؟
بندر: لا...
نجلاء: قلت لك موب بوه نورة ..ولا كان يسبقك...
بندر: وبعدين...؟
ضاري: إسألي عذبة إذا توافق حنا بس إثنين ما نعلم أحد...
نجلاء: لا ياعم والله إن تشوتنا كلنا....
بندر: طيب روحي ... ترا الشباب ورانا...
نجلاء: بروح..بروح ...
وه..
"الجزء السابع والأربعين"
"في المزرعة"
نجلاء: عذبة.... بروح للرياض!!
عذبة_ببرود_: لا
نجلاء: عذبة!!
عذبة: قلت لا...
نجلاء: طيب لازم...لازم أروح مع هيلة...شلون تشري فستان الملكة بدوني!!
عذبة_تضع أحمر شفاة وتنظر لوجهها بالمرآة_: أنتي أمه؟
نجلاء: أنا صديقته...يعني مارحتي تجهزين لأفنان!!!
عذبة: أفنان!!
أفنان شيء وهيلة شي ثاني...
يختي أفنان أختي...
نجلاء_تضع يدها على خصرها بتحدي_: وهيلة أختي ...
عذبة: قلت لا...فكين روحي البنات بالمسبح...روحي إسبحي معهن...
نجلاء: لاتصرفين!!
عذبة: هيلة بتروح مع خالد ونجود.. أنتي وش دخلتس بهم تروحين...!!!
جيبي مشط أسوي لتس جديلة فرنسية...شعرتس منتفش..
نجلاء: أبي أروح للرياض...
عذبة: نجلاء... أنا مانيب فاضية... لا توجعين راسي...
البيوت فاضية مابه أحد...حتى مجيد بيجي شلون تروحين هناك لحالتس...
نجلاء: إمممممممم طيب إذا كلمت مجيد وقلت لوه يصبر لي يومين...
وأروح أنا وأبو ياسين...مع وحده من الشغالات...عادي؟
عذبة_تنظر لنجلاء بغضب_: لاااااااااااااااااااه وشولوه تروحين بوحده من الشغالات..
روحي عندوه بالبيت بوه الطباخ والسواق...خلي أبو ياسين يحطتس عندوه ويرجع...!!
نجلاء: يمه لا تناظرينن كذا.... تخوفين... لا خلاص موب رايحة...
مجرد سؤال...لاتعصبين..
عذبة: نجلوة بلامصالة.... بعد مابقى إلا هي... قسم إذا ما ذلفتي عن وجهي بيجيتس طراق على وجهتس... تراي من زمان ما ضربتس...
نجلاء:.............................. عرفت ليش مشاري طلقتس!!
عذبة_بدهشة_: هاه...ليه؟
نجلاء: طيرتي عيونتس عليه كذا... إنهبل.... عاد هو خلقة ذريق و...
عذبة_تصرخ_: نجلااااااااااااااااااااااااااااااااااااااااااااااا ااااااااء براااااااااااااااااااااااااااااااااا....
_تقفز نجلاء بذعر وتهرب وتغلق الباب خلفها_
***********
"قسم الرجال"
يجلس تركي في أحد غرف النوم , يخرج حذائه الجديد من الحقيبة وينظر له ثم يبتسم, يضعه جانبا ويخرج زجاجة عطر فاخرة يشمها ثم يرش منها قليلاً في الهواء وينتشي, يدخل فيصل ويلحقة عبدالمجيد, يفز تركي واقفا ويسلم على فيصل بحرارة...
فيصل: ترووووووك.... هههههههههه وأخيراً قررت من بتتزوج!!
تركي: إيه مقرر من زمان بس أبسوي مفاجأة للملاقيف أمثالكم...متى جيت الرياض؟
عبدالمجيد: اليوم الفجر... جيت من الصلاة وبي صاع نوم ونص ومامدان أحط راسي وأغط إلا داقن علي تعال خذن...والله ياهو لزقة!!!
ما أدري المطار مابوه ليموزينات, مابوه سواق مابوه أحد غيري...!!
صح...مبروك تركي...
فيصل: إصبر خله يتملك الأول.. أنا خايف يسوي شي ويطردوننا..ماتنضمن تروك!!
تركي: ليه تحسبن خبل مثلك!!
عبدالمجيد: والله كل ملكتك بركة... لقيت حجه أجي... وه الشغل عيا يخلص!!
تركي: زين جيت والله توقعت عذيب تقعدك...
عبدالمجيد: موب على كيفة طق جولي لحالي تقل جني بهالبيوت...
عاد قبل أمس الصبح جت نجود قبل لا أطلع الشغل وسعت صدري شوي...
بس والله فقدتك أنت ووجهك.. أحد يسافر قبل ملكته بإسبوع!!
مستعجل..كن لامن جيت بدري يقدمون لك الملكة...
فيصل: أخ ياتركي... ودي أويز عليكم...
تركي: يالهوي!!
تويز علي أنا والهلي!!!
عيـــــــــــــــــــــــــــــب!!
فيصل: أحسك بتروح فص ملح...
تركي: لا أبجي فص ثوم ...هه..
عبدالمجيد: إسمع صح.... أبوك يقول أكد على حجز الفندق لخوالك...
تركي: أبوي!!
حاجز أنا ومخلص.... إلا صح...نواعم تقول بتجي هنا العصر وبتروح باليل تلبس عند أمي بالفندق..
فيصل تكفى رح جبهم من المطار ووصلهم الفندق وجب معك العلة نواعم...
فيصل: قالوا لك سواق عند أبوك أنا!!
تركي: لا أنا ولا أحد من السواويق يدل هنا....
فيصل: أنا دايخ.... من أمس أرج بالطيارة... خل الدلخ ذا...
يشبر لك الديرة كله شبر بشبر....
تركي: لاااااااااااااااااااا
شلون يجيب نواعم بعدين!!!
عبدالمجيد: لا خطير.... غاب القمر صار هلال!!
أباكله أنا؟
تركي: يعني أنا أباكل نورة يوم انك ذاك اليوم تنزله من السيارة ومعنا ناصر وأحمد أخوك!!
عبدالمجيد_يحك شعره باحراج_: موب قصدي...بس مابي البنت تندلق!!
فيصل: ههههه واحد صفر... إلا وين الدريشة؟
عبدالمجيد: السلمي!!
أكيد هو والعيال بالفلاحة.... أنت منتب نيم؟
فيصل: لا...بروح أجيب نواعم عشان مايعضه العو...
تركي: ياحبي لهالعوارض اللي تقل حزام.... نعنبوا بليسك خففهن شوي ولا سوي مطوع كامل!!
فيصل: إنطم واللي يرحم والديك!!!
باليل بزينهن...
تركي: شف عاد تفشلن بانسباي!!
فيصل: وه بدينا!!!
_يخرج فيصل_
تركي: ياي يا عموا ...لازم أحسن صورتي..ولو!!
عبدالمجيد: تروووووك.... ترا على خشمك حبه باديه تنتفخ...وع...
تركي_بقلق_: جد!!
وينه ... وينه _ويضع إصبعه على أنفه_
_يضرب عبدالمجيد على يده فينفرش أنفه_
تركي:آآآآآآآآآآخ!!
عبدالمجيد: ...تعيش وتاكل غيره!!
_يدير ظهره ويغادر الغرفة_
تركي: كذاااااااااااااااااااااااااااااااااااااااااب...
هين أوريك .....
*********
"في السيارة"
فيصل: ياربيه ذولا متى بيمشون!!
نواعم: أنتم تحرون تروك!!
إيه والله إن يذن الفجر ماطلع....
نجلاء: دق عليه فيصل أنا مت حررررررررررررر....
_يرفع فيصل يده ويرفع درجه التكييف_
فيصل: براد الحين؟
نجلاء: يعني...تقل أحسن...
نواعم: الله عمي متى بنفرح فيك؟
فيصل: شسوي ماعندي بنات إخوان ينفعن....
نواعم: شسوي لك؟
فيصل: دوري بنت حلوة!!
نواعم: ياخي مالك شهر فاك خطوبتك من عذبة...
تبي الحين أدور لك ؟
أنا جاهزة بس لاتقول إن ماعندك بنات أخو ينفعون...
فيصل: يالله ورين شطارتس...
نجلاء: طلع ترووووك ...زغرتوا...ولا تقل عريسه..!!
نواعم: وش مواصفات البنت اللي تبيه؟
فيصل: إصبري خلين أفكر.... أبيه بيضاء زي القرطاس وطويلة زي النخلة وعيونه كبرهن زي الساعات وخشمة سلة سيف وخشته سلك...لا الموضة يقلون الحين البراطم ..خلاص براطمة زي الكفرات و...وما أدري.. إيه أبي شعرة طووويل...طول تنوره..بس موب تلبس تنورة نص الفخذ.. أبي طول تنورته حقت الجامعة..
نواعم: !!!!!!
_يطل تركي على فيصل_
تركي: هاي شباب!!
فيصل: بدري يا شيخ...!!
خيسنا وحنا ننتظر...
تركي: يعني أم كشة ذي وش جابه معكم؟
نجلاء: راكبه سيارتك أنا!!
تركي: لا... بس ماقالوا جب نجلاء!!
فيصل: ههههههه... لاتمشكل معه تراه صديقة المدام...
نجلاء: هذا جزاي يا تروك وأنا قاعدتن أمدحك له..زين زين... أروح أخرب كلشي..
تركي: لالالا...خلاص تعالي بسيارتي وإن بغيتي أنزل أبوي وتركبين..بس لا تخربين علي!!
نجلاء: ماقضيت من نفسي تبي عمي ضاري ينزلن بشوشتي!!
تركي: الله بيصير أكشن....
_يلتفت تركي على والده الذي أخذ يزمر بالسيارة بغضب_
يااااااااي بروووح شكل أبوي أتشت معوه!!
سلام.....وحياتس الله نجلوه..تراي أمزح...
_يذهب تركي ويركب السيارة فيما إلتفتت نواعم على نجلاء قائلة:_
نجلاء ترا تركي يحب يمزح... ولو إن مزحه يغث أحياناً...
نجلاء: أدري... أصلاً يمزح ولا ما يمزح ...أبروح موب عشانوه..بروح عشان هيلة...
فيصل: ترا أمي تقول خل البنات يرقصن عن...
نواعم: يووووه ليته معنا....كان جبته...
فيصل: ماقضيت من عمري....
شيفكن من عبدالله ومرته وعيالوه..
نواعم:بس أمي نورة أمنا كلنا...مو حق كل مكان تصير معهم وحنا مالنا داعي!!
فيصل: لا والله!!
أمي تبع اللي حاشمه ومقدره... لكن أحدن يعيش ببيت لحالوه وماعليه إلا يجي ويسلم غير أحد مخليه الآمره والناهيه ببيته...
وبعدين هي أصلاً متعودتن على عبدالله وعياله ومرته..ماتبي تجي معي..
نجلاء: فيصل....من ذي مزرعته؟
فيصل: إممممممم .... هذي مزرعة أبو عبدالرزاق..
الله يرحمه بس عيالوه باعوه..ما أدري من إشتراه الحين...
شوفي هناك..ذيك المزرعة كان عمي بيشريه مير إنمرض الله يرحمه وبلش بنفسه...
الله يرحمه يحب هالمكان....
*****
"في بيت هيلة"
نزلت هيلة بالدرج ترتدي فستان أسود ضيق من الأعلى ويبدأ بـ الإتساع من فوق الركبيتن ونثرت عليه ورود تباع الشمس صفراء بشكل بديع ومتناسق,وضعت مكياج ناعم أبرز جمالها و أنوثتها ورفعت شعرها من المقدمة بورود صغيرة صفراء وتناثرت خصلات متفاوته الطول على وجهها ورقبتها, بدت ملفته ولكن الإرتباك بدى واضحا عليها, تنتفض وتمسك بيد نجلاء بقوة...
همست: نجلاء... ما أبي أشوفه...خلاص هونت...
نجلاء: هههه لو بتشوفينه بتغيرين رايتس...
هيلة: ما أبيه خلاص ودي أرجع لغرفتي...
نجلاء: أقول إمشي بلا دلع هو دخول الحمام زي خروجه!!
هيلة: إنطمي..نجلاء الحين بس ذولا أهله ولاباقي بعد؟
نجلاء: قال صفوا صفين قال حنا إثنين..ماجاء إلا أمه وخالته وأخته.. ولاالباقي أهلتس..
هيلة: وين أروح الحين؟
نجلاء: إسألي أمتس....
_أمسكت والدتها بيدها وقدمتها لوالدة تركي..
أم تركي: ماشاء الله... هيلة إحلويتي.. وأثاري تركي يعرف يختار!!
وش هالزين وش هالملح... والله إني فرحت فرحة يوم قال لي إنه بيخطبج...
والله ونعم المرة...
_تقرصها والدتها لتتحدث ولكنها لم تستطع, فإكتفت بابتسامه باهته_
نجلاء: حتى أنا ياخالة فرحت إن هيلة بتاخذ تروك... هيلة شوفي هذي هيفاء خالة تروك...
هيفاء: الله يخس بليسج!!
إسمه تركي..لاتعايرينه بيوم ملجته!!
نجلاء: وه..ياحظي عالذوق اللي مالأمه داعي...ترا هيلة بنتنا وتعرف إنه تروك وأبو التواريك بعد!!
هيفاء: مبروك ياهيلة ...
أم تركي: إيه من فرحتي نسيت أقولج مبروك...
نجلاء: عادي قوليه بالنيه..ههههههههه
نواعم: وخري نجلاء شوي خلين أسلم على مرت أخوي..
نجلاء: ياشين البزران الطافين!!
هه خوذيه كله...
نواعم: مبروك ياهيلة..._وتقترب لإذنها هامسة_ وعقبالي....
هيلة_تبتسم_: إن شاء الله الشهر الجاي..
**********
قبل أن يدخل تركي على هيلة ليلبسها الطقم والدبلة إلتفت على فيصل وأشار له مستفهما عن شكله, إبتسم فيصل وأشار بقبضة يده أن كل شيء ممتاز, تنهد تركي ولحق بأخيها , حين دخل وسلم عليها بدت مرتبكة خرج أخيها ودخلت والدته وخالته ونواعم, ووالدتها وزوجه والدها ثم لحقتهم نجلاء وهي ترتدي نقابها, سلمت عليه والدته وضمته وبعد مراسم البكاء من قبل والدته ووالدتها وزوجه والدها, وبعد أن ألبسها الطقم الألماسي والدبلة, خرجوا جميعا وتركوهما....
إلتفت تركي مبتسماً وقال بخبث: وش أخبار الهلي؟
هيلة:...........................
تركي_رفع وجهها بيده وإقترب_: ماتسمعينن...تبينن أقرب أكثر؟
هيلة: لالا.. أسمع..وخر!!
تركي:ههههههههههههههههه والله تصدقين إنتس تغيرتي عن يوم شفتس...
هيلة:.........................
تركي: أقرب أجل؟
هيلة: لااااااااااا
تركي: بس أنا ما أسمع..._يقترب ويلتصق فخذه بفخذها_
هيلة_بدت مرعوبة_: و...وخر...
تركي: وشو؟_يقرب وجهه من وجهها_
ما أسمع...
هيلة: تركي...تركي...وخر...
تكفى..
تركي: ما أسمع......؟
هيلة_بغضب دفعت وجهه عنها بيدها: أنت أصمخ!!!!
تركي_أمسك بيدها وألصقها بوجهه_: لا... بس أنتي تتكلمين ببطنتس...
هيلة_تحاول أن تسحب يدها_: وخر عن ترا أبصرخ....
تركي: هههههههههههههههههههه إذا صرختي بسد إثمتس...
هيلة_بدأت الدموع تجتمع بعينيها_: تكفى تركي وخر عن أنت وش تبي؟
تركي_يبتسم بخبث_: أها وش أبي...
بس حاط عطر جديد..
تشمينه..؟؟!!
أحلى من القديم صح؟
هيلة: إيه...
تركي: طيب تعرفين أنتي عطري القديم أصلاً..؟!!
هيلة_بدت محرجة_:.....................
تركي_يبتعد عنها_: والله إنتس نصابة....مير ليش ماوكلتين... يالله أنا جوعان أبي من هذي الجاتوه...
هيلة_بتبرم_: وأنا ماسكتك كل!!
تركي: آآآآآآآآآكل!!
لا...من اليوم ورايح أنتي بتوكلينن...
هيلة: بعد!!
تركي: إيه وترا أنا مانسيت ذيك الفطاير...تذكرين أنتي..
هيلة: إيه وع...يوم تجي رابص ولابس سروال سباحة...
تركي:هههههههههههههههههههههههههه
زين.... أجل أنا ما غشيتس..شايفتن كلي!!
بس أنا مسيكين ما شفتس إلابقميص وتركضين بعد!!
هيلة_بإحراج_: يوم تقول لي شغالة!!
تركي_يصمت ويبدو على وجهه إحمرار بسيط_:
.....................
بس...
أنتي..
أحلى شغالة شفته بحياتي!!
هيلة: وجع...وتعيده بعد!!
وخر أبطلع...
تركي: لالا..والله أمزح..وبعدين..تعالي..فيه شغالات لبنانيات ومغربيات حلوات!!
هيلة: مافيه شغالات فيه طباخات..تهك علي..
وخر يدك ...
فكه عن..وه..
تركي: بس والله كلهم أسميهم شغالات... وبعدين.. لاتصيرين زعولة..ترا اللي يزعل علي أراضيه بحبه على خده..تبين أراضيتس؟
هيلة_بذعر_:لالالا...منيب زعلانه أبد!!
تركي: بعدي والله الهلي....
هيلة: إسمي هيلة..
تركي: إيه.. سمعت نجلاء ذاك اليوم تقول لتس هيلة جعيلة...
هيلة: ترووووووووووووووووووووووك يا أبو سروال!!
تركي:هههههههههههههههههههههه
أمزح... زعلتي أراضيتس؟
هيلة: لالالا...مازعلت بس متى تطلع؟
تركي: منب طالع..وش عندتس...زعلتي؟
هيلة_وهي تكتم ضحكتها_: لا أنا ما أزعل منك أبد..بس وخر عن....!!
تركي: ياحبي لتس..._وأمسك برأسها وقبلها بين عينيها, فيما إنفجرت هي تبكي وتضحك بآن واحد_
*********
"في المزرعة"
دخل تركي فمر من الخيمة الرئيسية, إلتفت فلم يجد بها سوى إثنين من الشباب...
تركي: هاي شباب...
شاب: هلا والله بالعريس....
تركي: وين الشيبان...غريبة!!
الشاب: ههههه ناظر الساعة ... مابوه أحد الشيبان ناموا والشباب بآخر المزرعة...هناك فيه مسابقة بينهم....
تركي: إخس مسابقة!!
الشاب: بس الظاهر للحين مابدت كان تلحق عليه...
_ينظر تركي للساعة ويمط شفته_
الشاب: وين كنت؟
تركي: رحت لأمي...صح ...وش دخلك؟
الشاب: لا بس الساع ثلاث وكلن جاي من زمان... ومالك ربعن بذا...
تركي: زين الشباب بآخر المزرعة...؟
الشاب: إيه... رح إلحق عليهم...
تركي: وأنتم ورا ماتروحون؟
الشاب: أنا والشيخ_يؤشر لرفيقة الصامت_ نبي ننام بس أخذتنا السواليف...
تركي: هذا يسولف!!
دنيا عجايب... هيه أنت تدري إن بوه وحدة بالرياض إسمه عجايب!!
الشاب_ينظر له بإستغراب_: طيب؟
تركي: لابس .... ولا شي...غريب إسمه....
الشاب: تقرب لك؟
تركي_إحمر وجهه_: لا... إيه...من قرايب أمي....
يتجه تركي نحو الشباب ويمر من الدبابات المركونة على أحد الأرصفة, فيركب أحدها ويشد غترته ويسرع نحو الشباب....
**************
_قسم النساء_
عذبة: بنات مايصير تشغلون الدبابات هنا!!
الحريم نايمات و أخاف نزعجهن!!
الهنوف: وه... بنستانس... اللي مايبي الإزعاج يقعد ببيته... بالنهاربعيد تقولون عمال وقريب بزران ماتدرين منيل يطلعون لتس!!
بنستانس ماداموا البزران منضفين والعمال نيمين!!
نجلاء: لا فض فوووووووووووووووكيييييييييييييييييييييي....
ومن جابووووووووووووووووووووووووووكيييييييييييييييييييي يييي
الهنوف_تضحك_: وإياااااااااااااااااااااكييييييييييييييييييييييييي يييي
شمس: راحو البنات يدورون مكان بعيد...... هه كاهم يدقون!!
آآآآآآلوآآآآآآآآآ.... إيوا.... خلاص تريونا ... شوي ويايين...
لالا...بتيي وبيون كلهم....
نجلاء: منهي اللي بتيي؟
شمس: عبورة إتصلت تقول إنها لقت مكان عند نخل البحري... رمل مرشوش ماي ... تقول بارد وزين...
نجلاء: بحري!!!
ههههههههههههههههههههههههههههه
برحي مو بحري.... والله إنوه كفوتس أنتي وخشتس الهاف مون موب مزرعة بالقصيم!!
عذبة: وخير عاد!!
نجلاء وش عليتس منه!!
شمس: بحري ..برحي... أهم شي تدلونه وين... أنا ما عرف!!
عذبة: بس ..بعيد شوي....
نجلاء: أنا بروح بالدباب... واللي بيركب معي حياو الله!!
عذبة: تزعجون الحريم!!
نواعم: وش عاد... صادقة الهنوف اللي بينام لا يجي!!
يالله نجلاء أنا بروح معك...
عذبة: أجل مادامكن مشغلات دباب ما تفرق لو نشغلهن كلهن...
شمس: عيل بروح أييب لنا واحد.. أنا وياج...
الهنوف_تلحق بها_: إصبري.... أنا بعد... وهند..تعالوا كلكم...ترا ماحد بيركب معي!!
عذبة: لحظة بنات...خوذن شراشفكن... ترا هناك قريب من الشباب ... ويمكن تقابلون أحد... ولا تروحن لحالكن... روحن جميع... ولا تدرن... خلنن أنادي باقي البنات ونروح جميع....
إيمان: المفروض البنات كل وحده تشيل له شي... مايصير أحد يشيل وأحد لا!!
عذبة: أهم شي جيبوا قهوه...راسي بينفجر من الطق وهبال نجلوه ومها وأفنان...
أعوذ بالله...
إيمان... إياد نيم؟
إيمان: إيه نيم... وه راحه... يا حبيل عنونه....صغيرة!!
عذبة: طالع على أبوه...
إيمان: أنتي وخشتس... !!
والله إني ماشفت صغر عيون أبوه...
عذبة:دا الحب وعمايله....
************
_قسم الرجال_
أقبل تركي بالدباب, إلتفت أحدهم فهتف قائلاً:
حيــــــــــــــــــــــــــــوا معرسنا!!
هتف الشباب جميعهم بوقت واحد:
حيووووووووووووووووووووووه
الشاب:
حيوا معرسنا!!
الشباب:
حيووووووووووووووووووووه
وأخذ الشباب يصفقون بصوت واحد....
تركي_يرفع يديه_: إحم إحم... أخجلتم تواضعي شبااااااااااااااااااااااااااااااب
فيصل: تعال تروك... شف الخطير مجيد وش مسوي....
تركي_ينزل من الدباب ويقف عند عبدالمجيد_: أحلاااااااااااااا..
وش ذا البيت؟
عبدالمجيد: أص.... موب بيت هذي قلعة...
تركي: أبو الشباب يحسبه على شواطئ كان!!
فيصل: شف حقت السلمي وخالد... هههههه باين حقت ميكانيكي....صح؟
تركي: لالالا..... وهي أصلاً بانت!!!!؟
.....ركام من الرمل المبلل...وراكبين عليه بعرصي وضب..على بالهم يسوون قلعة!!
سلمان: إصبر يا العريس... بنشوف بالنهايه من بيفوز....
تركي: عسى هذي المسابقة اللي جايين هنا تسوونه؟
فيصل: إيه ... ماعجبتك؟
تركي: حقت بزران...ذكرت مراتع الطفولة ...
فيصل: عاد هذي فكرة أبوك... ولا بعد قال إذا قام يصلي الفجر بيحكم منهو الفايز... أبو إبراهيم وأبوك وأبو سلمان.. الحكام للمسابقة...
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك