رواية بصدري وجع كنت احسبه نام يا صدري -67
الرياض
بيت مساعد * لمار
الجناح الخاص فيهم
لمار تعدل الروج : لا شوي ويجون ..
يعدل شماغه : طيب الروج كل شوي تمحسين وترجعين تحطين ..
تناظر شكلها ولفت له : محد عفس الدنيا قبل شوي ..
ضحك : لاتحطين هالروج همن آتخدر ..
انحرجت منه وجلست تلبس السلسال .. دنق وأخذها منها وهو يركبه عليها ..
رفعه وشاف كل حرف (ن) من حروف آسمه على سلسالها والخاتم بكفها آسمه والحلق عليه آسمه حتى الاساورة ..
تنهد مره ومرتين وثلاث وميت عليها : كلهم يشوفون آسمي في نحرك وكفك وكلك..
تناظره : مهوب محفور بس هنا ..
ابتسم : مهوب بس انتي بالحب أبادلك أكثر ..
وهي ترش لها العطر ومبتسمه : مو كثري ..
أخذها وصار ظهرها لاصق بـ صدره : م سمعت ؟
ضحكت بـ احراج : مسساعد ..
: مين اللي يحب الثاني أكثر ؟
: أنا ..
شد أكثر : م سمعت للحين ترى آخرب الروج والتسريحة ..
ضحكت ونزلت راسها تبعد عنه ..
وهو يضحك : لمار ها مين أكثر يحب الثاني ؟
ميته ضحك ..
: ها ؟
: خلاص كلنا نحب بعضنا كثر بعضنا ..
اختلفنا مين يحب الثاني أكثر
وإتفقنا إنِّك أكثر وأنا أكثر
من عدد رملِ الصَّحاري
و من المَطر أكثر وأكثر
كيف نخفي حُبنا والشَّوق فاضح
مندق ويضحك : فديت التحشيش في تركيب الجملة .. فسريها شلون كلنا نحب بعضنا كثر بعضنا ..
ضحكت وهي ضايعه من تصرفاته ..
: ها .. قولي مساعد يحبني أكثر ..
عشان تعتق نفسها منه : يب يب
ضحك وتركها : شاطره كنتي راح تجيبين العيد لـ نفسك ..
عدلت البلوزه الشيفون وهي بعدها تضحك ولونها قالب من تصرفاته ..
ثنى شماغه ورش العطر : وين نازلة آنتظريني ..
: راح آنزل أحط البخور لـ عمتي ..
أخذت العود الازرق ونزلت نزل وراها ..
دخلت للمطبخ وشكيت على القهوة وكل شي وطلعت ومعها المبخر ..
جات لـ عمتها : عمتي البخور ..
عطت ولدها بنته وعينه على زوجته وهي تبخر آمه وعقبها رفعت المبخر ورشت لها العطر ..
: مساعد تبي آبخر لك ؟
جلس بنته : ريتان ي بابا آجلسي ..
مسكتها آمه وبخرته له ..
ضحكت :ماشاء الله عليك مو طويل ابداً ..
ضحكت عمتها : بسم الله عليه مهوب في أخوانه طوله ..
شال بنته وجلس جنب آمه : يممه آقطع خدودها ..
ضحك : خلها ي مساعد خدود بنتك م تسلم منك ..
يبوس بنته ويلاعبها ويضحك معها ..
لمار : مساعد الجرس يدق ..
قام ..
لمار : آترك البنت هنا ..
وهو شايلها : لا خليها توجب الضيوف مع أبوها ..
ضحكت وقامت مع عمتها أكيد حمواتها أو لافي ..
كانت منى وعيالها .. دخل مساعد زوج أخته للمجلس وراح للمطبخ ..
: ياااه مساعد جايبها هنا ..
ضحك : شوفي شلون تناظر ..
: آييه هههههههههههه ..
شالت بنتها منه : خذ حبيبي أول العصير وعقبها خذ القهوه ..
: لا قهوة ..
وهي مبتسمه : خذ القهوه ..
ابتسم وشال القهوة ..
طلعت من المطبخ عقب م تركت الشغاله تلحقها بـ العصير وكب كيك وهي شايله بنتها ..
.
.
.
شقة عبدالعزيز * فجر
: يارب .. عبدالعزيز وصلني لـ بيت أخوي وعقبها اطلع لـ ربعك ..
: طيب راح اتأخر عليهم ..
: ي الله ..
: المشكلة ربعي ي فجر من مبطي عنهم .. وترى فطورهم بكرة عندنا ..
: عادي الله يحيهم .. بس قوم وصلني عشان م تبطي أكثر عليهم ..
تحرك من الصوفا وهو يضحك لما شافها قامت من مكانها زهقت منه ..
دخل للغرفه وهو يضحك ويمسكها : م ينمزح معاك ..
تنهدت : مزحك يرفع الضغط ..
يلبس الطاقيه : آجل م عادني بمازح معك ..
: عزوز ..
: هلا
: ليكون زعلت بس ..!
: لا ..
راحت ووقفت قبالها : لا جد جد زعلت ..
يضحك وبصدق : لا والله .. أحد يزعل من كتكوت قلبه ..
ابتسمت له : لباك عزوز ..
: ولبى فجورتي ..
لبس الشماغ وعطته العقال : وين راح تطلع مع ربعك ؟
: بنروح لـ مطعم شعبي .. العيال ناوين يتسحرون هناك ..
بـ غيره : ممم عسى م فيه عوائل ؟
ابتسم وشم ريحة الغيره وقال يهدي بالها : لا كله عزابية .. حتى هناك راح ينشبون لنا العوائل ..
ضحكت : ترى أنت صاحب عائله ..
ضحك : عارف لكن مجرب المعاناه ..
لبست عبايتها : لما نرجع للبيت نسولف ونشوف هالمعاناه ..
ضحك لها وهو يغمز : نشوف ي ححلوه ..
: ي شينك بس أنت وأفكارك ..
.
مكه
ريان*الجوهره
دخل لـ غرفتهم الخاصة في الفندق ..
ابتسمت بصدمه : حلقت شعرك ..!
يفرك راسه ومبتسم : كيف الشكل بس ؟
قامت : رهيببب شكلك ..
: لاتمزحين معي ..
ظل يناظر شكله في المرايه : ماش شكلي ..
وهي تجلس على الكمدينه : لا والله يزنن شكلك .. متغيير شكلك ريان..
ابتسم وحط يدينه على فخوذها : يمكن عشانك أول مره تشوفيني محلق كل الشعر من تزوجنا ..
: آيييه .. بس طالع شكلك حححلو .. أحس بان وجهك الحين ..
ضحك : كلمة أمي من زمان لامن حلقت راح يبان وجهك ..
ضحكت وظلت تناظره : نعيماً
: ههههههههههههههههه بدري ..
: ههههههههههههههه تو آتذكر شكلك وأنت محلق صدمني بس صدمه حلوه .. طالع أحلى من قبل بكثير ..
مقرب لها ..
: ريااان هذا وأنت توك جاي من التروايح ..
ضحك بقوة : يعني اللي جاي من التروايح لا يقرب زوجته ..
ضحكت وغطت وجهها : لاآآ .. بس مفروض يكون جوك روحاني ..
ضحك : آيييه هين ..
: ريان وجعه توجع العدو آركد ترى تحرجني بـ حركاتك المفاجأة ..
مسك خدودها : آم خدود ..ي أني أفدى هالغمازتين الغايرة أفداها ..
: بطل ي ريان ..
وهو يشيلها ويوقفون قبال القزاز ويناظرون الحرم ..
واقف وراها وضامها ويتابعون الجموع الغفيرة منهم بشر تطوف في حول الكعبه ومنهم من يصلي واللي يشرب من ما زمزم .. جموع كثيرة م لمحوهم وعينهم رجعت تتركز على الكعبه والناس المزدحمه حولها ..
: كثير المتعمرين ..
: لان عمرة في رمضان تعدل حجه ..
: بس م تجزأ عنها ..
: أكيد لازم الواحد يحج ..
-
هل وردت أحاديث تدل على أن العمرة في رمضان تعدل حجة، أم أن فضلها كسائر الشهور؟
نعم، ورد في صحيح مسلم عن النبي صلى الله عليه وسلم أنه قال: “عمرة في رمضان تعدل حجة“.
فالعمرة في رمضان تعدل حجة، كما جاء به الحديث، ولكن ليس معنى ذلك أنها تجزئ عن الحجة، بحيث لو اعتمر الإنسان في رمضان، وهو لم يؤد فريضة الحج سقطت عنه الفريضة، لأنه لا يلزم من معادلة الشيء للشيء أن يكون مجزئاً عنه.
فهذه سورة {قُلْ هُوَ اللَّهُ أَحَدٌ}، تعدل ثلث القرآن، ولكنها لا تجزئ عنه فلو أن أحداً في صلاته كرر سورة الإخلاص ثلاث مرات لم يكفه ذلك عن قراءة الفاتحة، وهذا قول الإنسان: “لا إله إلا الله وحده لا شريك له، له الملك وله الحمد وهو على كل شيء قدير“، عشر مرات. يكون كمن أعتق أربع أنفس من ولد إسماعيل، ومع ذلك لو قالها الإنسان وعليه عتق رقبة، لم تجزئ عنها.
وبه تعرف أنه لا يلزم من معادلة الشيء للشيء أن يكون مجزئاً عنه.
مجموع فتاوى و رسائل الشيخ محمد صالح العثيمين المجلد العشرون - كتاب الصيام.
-
: الله يحيينا كل عام ونقضي من رمضان في هالاماكن الطاهره ..
ويدينها على يدينه المحاوط فيها خصرها : آمييين ..
.
.
.
بيت مصعب * سلطانه
تمسح دموعها : مصعب أمي شوف كم لها يوم من وصلت للرياض وكل مره أكلمها تعتذر ..
: تعرفين مشغولة مع خالاتك .. وبأذن الله راح تمرنا ..
: مصعب الله يخليك لاتبرر لها ..
: لاتبكين كذا م خبرت هالدمعه تنزل بـ آستمرار ..!
بضحكه خالطتها دموع وتنهيده : م لحقت عذاب الثمان سنين ..!
ابتسم يبيها تضحك ويروق مودها : م تذكرين آزعاج آخر الليل ..
م فهمت عليه ..
: تلفون البيت كم كان يدق بكل وقت ..؟
رفعت حاجب وكفها على شفايفها : تمزح أنت كنت تدق ..!
ضحك : كنت بس أبي اتطمن عليك آشوف أنتي بخير أو لا .. خاصة لما دخلتي الجامعة و كنتي تشتغلين وتدرسين بنفس الوقت ..
تناظره بصدمة ..
: كنت احبك والله الشاهد م كنت قاصد آتسبب لك بـ أذى بس كنتي تعنين لي شي خاصة إنك أخت سعود ..
تمسح آثار دموعها : كانت تصرفاتي غبيه عايشه مثل العيال في ستايلي واسلوبي وكلي ..
: المهم الحين أنتي شلون .. سلطانه العيب يكمن في الاستمرار على الخطأ بس أنتي عرفتي الخطأ لما لقيتي من يوجهك للطريق السليم ..فديتك ي سلطانة مصعب شخصيتك وقوتها وأسلوبك في التعامل من كل شي يواجهك يأكد لي يإن الانتظار عشان أخذك كان كله صواب ..
تناظره وعيونها مغرقه دموع ..
كفها دموعها المتساقطه : ي أم الشي الدميل نسيتني أخوك اللي جالس تحت ..
: أخوي تحت ..!
قامت ومسكها : ي حبيبتي أنتي الحين بداخلك شي دممميل انتبهي ..
ابتسمت وعيونها كلها دموع : أنت ليه تقول شي دميل ..
ضحك : أحب هالكلمة منك وصارت لزمه لي ..
ضحكت له وباسته : جعل عيني م تذوق حرقتك ..
تركته ودخلت تغسل وظل يناظرها إلين طلعت أخذ كلينكس ومسح وجهها ..
: نزلنا ..
: آيييه ..
نزلوا وشافت أخوها وهو على آيباد مصعب .. شاف أخته قام لها وضمها : حبيبة أخوها ..
وهي تجلس جنبه : سوري حبيبي تأخرت عليك ..
ابتسم : لا عادي .. على بالي النسيب من شافك نساني ..
ضحك مصعب : م علي لوم ..
ضحك سعود : لا علي الحرام م عليك لوم لامن نسيت الخلق لامن شفت سلطانه..
: عساني لها فدوة آم الشي الدميل ..
ضحك سعود لما شافها قامت للمطبخ ..
: توحفه أنتم وهالشي الدميل ..
: ههههههههههههههههههههههههه عساه يطلع للدنيا سالم ..
: لاتخاف المهم انتبه على تغذيتها .. تراها مدمنه للكوفي ..
: تعبت معها بس من دخل رمضان م صارت تأخذ ..
جات معها القهوه وعطت أخوها ومصعب ورجعت جنب أخوها أخذها جنبه وهو يعطيها من القهوة والحلا وأخوتهم وحبهم لبعضهم واضح جداً .. م أبعدهم عن بعض زواج سلطانه واستقلالها بحياتها وحتى الحين حملها بالعكس علاقتهم كل م زاد في عمرهم يوم زادت ..
.
.
.
بيت أهل فهد
جناحهم
عارفة اللي فيها بس مو قادرة تقول لـ فهد ترى كذا منحرجه بشكل آختارت الهروب للنوم إلين تشوف الوقت المناسب وتفتح معه الموضوع ..
: لابنام إلين 2 الفجر ..
: كأنك تعبانه ؟
: لا قلبي .. بس نعسانه ..
كانت مبتسمه وهي تفرك عيونها وتناظره : بنام ..
: ويطاوعك قلبك في فهد تتركينه كل هالوقت وحده ..
جلست لـ عيونه ..
ابتسم وحط راسه على فخذها : بثر ؟
ضحكت : بثر في حلالك ..
ضحك أكثر : يشوش راسي كذا ..!
: ههههههههههههه الشكوى لله ..
ضحك وهي تدلك له راسه : تدري ..
يناظرها ..
: م توقعت بيوم أتزوجك ..
: ليه ؟
: مم مدري ..
: تبين الجد .. ولا أنا ..
وهي مبتسمه وتعمل تدليك بحركة دئراية خفيفه: شلون عرفت عني ؟
وهو مبتسم ويتذكر : أسيل لها الفضل بعد الله في زواجنا .. قالت لي عنك وبصراحة حبيت شخصيتك وتحملك صليت آستخاره والحمدلله ارتحت ..
: مم فهد اسألك سؤال وتجاوبني بكل صراحة ..
جلس من نبرتها واضح بإن السؤال مأزمها : لبيه ..
أخذت انفاسها : بصراحة و م راح آزعل ندمت لو للحظه على زواجك مني ..
اختفت ابتسامته من لحظات لـ عتب عليها بسبب هالسؤال ..
بـ لهجه خالية من أي تعبير : ندمت ..!
لكن الندم تدرين على عمر ضاع وأنتي مو فيه ..
الجوري أنا مرتاح معك بالحيل وأحبك بشكل م تتصورينه برغم إنه م مر لنا شهر وشوي مع بعضنا ..
حمر وجهها : ممم طيب لاتزعل ..
رفع وجهها : فيه شي ثاني صح ؟
ظلت تناظر المفرش وهي تقول له وتأكل ظفرها : من كم يوم وآحس بنفسي شي غريب مم-سكت وتنهدت وهو يناظرها وبطبعه الهادي والزرين م يحب يقطع حكي أحد إلين يقول كل شي بخاطره- مم أخذت جهاز تحليل منزلي للحمل وطلعت حامل..
م آستوعب : ها ؟
ناظرته ودمعت : عارفه بدري مارآ الحمل وتونا متزوجين ..
أخذها لـ صدره : أي بدري ..!
وأنا اللي آنتظر هالشي من مبطي ..
كل م آناظر خواتي شايلين عيالهم أو أي شخص ثاني آسج فيه غصب عني..
: يعني عادي ..
ضحك وهو يقومها معه : لاتستحين كل شي جاء بـ شرع الله وسنة رسوله –اللهم صلي وسلم عليه –
ابتسمت وتوها تحس بـ الفرحة من فرحته الغير طبيبعه ..
: فهود عمتي في بيت لمار ..
ضحك أكثر وضرب على راسه بـ خفه: نسيت بس أكيد راح تفرح كثير لما تسمع بهالخبر ..
رجع ضمها لـ صدره بحب كبير عوضها الله في هالانسان كل معاناه مرت فيها وجاتها من كل حدب صوب ..
معاه م كأنها عاشت الحزن لو للحظه بحياتها ..
.
.
.
-
آنتهت
"بصدري وجع كنت آحسبه نام ياصدري"
راح آعلق على من عاش معي من يوم الأحد بتاريخ 10-10-2010 و إلى يوم الجمعة 29-7 – 2011
أولا راح آعلق آختياري لـ بعض القضايا في روايتي ..حب المحارم الحب المحرم للاسف هالشي بدأ بالانتشار والاسباب كثيرة ولـعلي ناقشت في الرواية أهم هالاشياء وهي صحبة السوء التي جملت كادي في عين خالها المراهق سلمان عرفنا كيف آبعد عن طريقها وشافها بـ المنظور المألوف بإنه آبنته أخته لاغير ..
وكذلك آستخدام المال كـ سلطه في جلب كل شي ..ولنا في عساف مثال آستخدم ماله في تفرقه زوجين بـ غير وجهه حق وجاءه البلاء في أخته بطلاقها وفي صحته بخسارتها وعيشته على المهدئات وفي ماله بـ احتراق مخازنه ..
المال نُسئل عنه يوم القيامه فيما آنفقناه .
ياترى وش الجواب ..!
لذلك فـ نتقي الله عز وجل فيما أعطانا ونخافه فيه ونشكره عليه ..وتنذكر شي مهم جداً بإن هالمال في لحظه قد يزول .
وكذلك كادي حزنها على محمد كأنه آجزمت بـ عدم رجوعه ورجع ولله الحمد هالشي يتركنا نضع آمام أعيننا شي مهم جداً بإننا م نفكر في الشي قبل حدوثه ونحزن أنفسنا على شي قد لا يحدث ولنا في كادي مثال .
أفضل شي نعيش اليوم بيومه بكل تفاصيله ونترك غداً والتفكير فيه ..لان هالشي راح يضيع علينا لحظات لن تعود ..
و كذلك سطام شفنا شلون تصرفاتهم وطيشه ضحى بـ حبه لـ بنت خاله عشان سيارة بنتلي ..!
أخذ الجوري و عشقها لـ جمالها فقط في بادئ الامر ولكن تطورت الامور إلى إن وصلت إلى م رأينا والان شفنا فقد الجوري وكذلك فقد البنتلي بـ حادث إليم نجى منه والان عنده مشاكل في العقم وكذلك آمجاد وهي اللي جرحت الجوري بـ عدم حملها .
ثامر صديق سطام كان له الاثر الاكبر في حياة صديقه في تغييرها للأفضل , من مثل ثامر هم الاصدقاء الحقيقيون الذين متى م تمت الحاجه لهم وجدناهم, وأصدق م تعرف به أصدقائك عند رؤيتك وأنت لست على م يرام يسألك : في وجهك شي أحد مضايقك ؟
ومع الالحاحه وكثرة نصحه له تأكد بإنه أخيك الذي لم يحمله رحم والدتك .
طارق ورتيل وفراقهم وجزم الاغلبيه بعدم رجوعهم يتركنا هالشي نفكر بإن الشي أذا كان لنا نصيب فيه راح نأخذه سواء زواج أو دراسه أو أي شي آخر مهما حدث لنا من صعوبات ومشاكل أذا لنا نصيب راح يرجع لنا ..
الجوري يمكن البعض لاحظ بإنها قويت شخصيتها لما آشتغلت بعد تخلي الجميع عنها يتركنا هالشي تنأكد بإن م راح ينفعنا الا شهادتنا لـ ذلك نجتهد وتنحدى صعوبات الدراسة وظروفها لان دراستنا هي طريقتنا لـ مستقبل جمميل يجعلنا نفخر بأنفسنا.
الجوهره ك حال بعض البنات م تحت تهتم بنفسها وهالشي ترك ريان يعايرها بهالشي وبمساعده صديقاتها تغيرت حلو نغير أشكالنا بين فترة وفترة ولكن نبعد عن معصية الله عز وجل .
قد أكون لم آهتم بـ عقاب بعض الاباء والامهات في روايتي لان قد يكن بداخلي شيئاً من الواقعيه بإن العقاب لن يأتي مني للجميع فمن فـ هناك من نالها في الدنيا وهناك وعد وعيد آخر في كل من خان آمانة اؤتمن عليها فـ الابناء هبه من الله عز وجل للكثير فلا بد من الخوف من الله –عز وجل – قبل كل شي في هذه الامانه والاهتمام بها وتنشئتها بطريقة تجعله يوم العرض فرحاً مسرواً .
فـ كم شخص حُرم من نعمه الابناء ..
والعبرة لمن آعتبر وخاف الله فيما جميع م لديه .
-
فهد * الجوري
فهد كان ولازال الاب لـ أخوانه وخواته الله عطاه بـ فضله أولا وأخيراً ثم بـ رضى آمه عنه زوجة مثل م نقول " تنحط على الجرح يبرى" .. الجوري صبرت كثير عانت تعذبت من أهلها من سطام تذمرت في البداية طرقت كل الابواب و آشتكت للجميع تصرفات سطام وآهانته لها لكن الكل لم يكف أذى وتعذيب سطام لها .. لجأت إلى رب رحيم عطوف كريم ينزل كل ليلة إلى سماء الدنيا حين يبقى ثلث الليل الآخر فيقول من يدعوني فأستجيب له من يسألني فأعطيه من يستغفرني فأغفر له
"ثبت في الصحيحين من حديث أبي هريرة -رضي الله عنه-"
لجأت له وكانت على ثقه بإن الله عز وجل لن يردها خالية اليدين صبرت لـ وتحملت التعب والمرض والذل والاهانه وسكتت م شكت لانها على ثقه بإن في السماء زرق جميل سيأتي لها ..والحمدلله تحقق لها كل م تريد والان هي تعيش حياة جمميلة جداً مع فهد بـ آنتظار طفل يملأ عليهم حياتهم.
-
الجوهره * ريان
شخصيتها قوية وصلبه تعشق التحدي وكان واضح عليها من خلال تحملها لـ ريان وتصرفاته وطيشه ,بس بذكائها فضلت بإنها تحل المشكلة وحدها وتتحمل تغيير ريان مهما طالت الفترة لانها على ثقه بالله عز وجل أولا ثم بـ شخصيتها إنها قادرة على تغيير شخصية ريان للأفضل غيرت من نفسها أولا بتغيير نيولوكها بناء على كلامه وآنتقاده لها وبعد عدة شهور كانت طويلة عليها تغير ريان بعد جهد جهيد ولانها صبرت عليه وعلى تصرفاته كان المقابل لها بإنها أغلى من ما عينه والان هم يعيشون حياة جميلة ورائعه.
-
محمد * كادي
عشاق لـ بعضهم من صغرهم كبروا وتزوجوا وكانت حياتهم جميلة بس نغصها عليهم سفر محمد لـ جازان وفقد كادي لـ محمد تركها تعاني من حالة نفسية سيئه بسبب بعده وحملها لانه يعشقها رضى بإنهم يعيشون مع جدانهم لـ برها فيهم , وسبحان الله لـ برها في جدانها وطيب قلبها وتصرفاتها مع صديقاتها الجميلة صرف الله عنها شر تصرفات خالها وشر ولد عمها لذلك فـ علينا إن نحسن نياتنا فـ عليها نرزق.
والان كادي ومحمد حياتهم رائعه ومن أروع م يكن بوجودهم مع بعضهم وبوجود آبنهم عبدالله .
-
لمار * مساعد
شخصيتها هادئه جداً تعرضت لـ مشاكل كثيرة ببداية حياتها مع مساعد ,لجأت لـ أخوانها وكانوا خير العزوه لها وقفوا بـ وجه مساعد إلين رضخ لكل مطالبها رجعت له بعد بناءه لـ بيت خاص فيهم لاحظت بإن لافي لازال يتدخل في حياتهم وضحت لـ مساعد ووضع لـ أخوه حد والان حياتهم مع ريتان من أجمل م يكن .
-
مصعب * سلطانه
حبها لـ فترة طويلة جداً لان حبه صادق صبر إلين أخذها,صبر كثير على قسوتها وطبعها المشابه لـ للرجال ..!
تحمل بعدها وصدها وسكت إلين صارت نهاية الصبر خيره , بالنسبة لـ سلطانه كانت ضحية أم وأب آنفصلوا وهي في سن مبكرة وتركوها للضياع اكثر بتصرفهم السيئ جداً بكذبتهم بـ وفاة سعود دمرها هالشي جعلها تتشبه فيه تحزن على فراقه بشكل لايعقل لانها فقدت الاحتواء من الجميع فـ مالت عن الطريق وفي سن المراهقه وكلنا نعرف خطورة هالسن.
تغيرت بـ فضل الله ثم خالتها السبب في موافقتها على الزواج ثم بفضل صديقاتها في تغيير أفكارها وتصرفاتها والان محد ينافسها في الاناقة وتنتظر مع مصعب طفلهم الأول .
-
رتيل * طارق
شخصيتن كان لـ ظروفهم دور كبير في جمعهم للمرة الأولى , تعلقت أرواحهم ببعضهم وتفرقوا بـ فعل قسوة وظلم أهل .. برغم البعد الا إنهم لم يتسلل إلى أنفسهم اليأس برغم تعب وفقد رتيل للبصر أصر طارق ورجعها له لانه يعشق رتيل كلها مو شي معين , واجتمعوا من ثاني وحياتهم الان في كندا يكملون دراستهم العليا ولهم قصة عشق مجنونة.
عبدالعزيز * فجر
بداية كان يبيها آنتقام ولكن بـ تصرف فهد وحكمته تغير تفكير عبدالعزيز وتأكد بإن الزواج مودة ورحمه مو آنتقام ..!
والان حياته جممميلة مع فجر لولا غيرتها عليه التي تضيف لحياتهم رونق خاصة .
مشاري*ديم
شخصيات راقيه جداً حياتهم تسير بهدوء وجمال وكانت راح تخدش ببعض الخدوش من طالبات مشاري في الجامعة ولكن بذكاء تعامل مع الموضوع وآنهاه تماماً وحياتهم جميله جداً مع آبنتهم دانه .
رهف * سامي ..
آفترقوا للابد بـ فعل ظالم من والده ..لكن فراقهم لـ بعضهم م تركهم ينظرون للحياة بأنها انتهت تماماً بالعكس كل شخص بدأ حياته من جديد سامي يدرس في آمريكاً ورهف تشتغل وتحضر ماستر ..
-
رواية بصدري وجع كانت عبارة عن :
أصَحابْ .. وجمَعهُم
هَمْ " "
كل وٍاحِد وله قصَه
فرٍحْ - أحزٍانْ - أو غصَه !
-
قبل النهاية ..
شكراً لكل من دعمني وساعدني وتحمل ظروفي غيابي .. شكراً لـ لكل من تابع وحيدة وأهلي كثيرين , شكراً لـ المنتدي , شكراً لـ لاتجرح المجروح , شكراً لـ صديقاتي الجمميلات وخاصة آسوم وعناد متابعات لي دائما , شكراً لـ بنات خوالي الجميلات آلوش وسوس على دعمهم لي دائما وسؤالهم , شكراً لـ وعد كانت معي دائما .. شكراً لكل من نقل الرواية لـ خارج المنتدي,شكراً لكل شي طيلة السنوات الثلاث في روياتي جميعاً .
دعواتكم .
وكل عام وأنتم بخير بـ مناسبة رمضان ..
3,40 الفجر
عَنْ أَبي هُرَيْرَةَ رَضِيَ اللهُ عَنْهُ أَنَّ رَسُولَ اللهِ صَلَّى اللهُ عَلَيْهِ وَسَلَّمَ قَالَ : « مَنْ جَلَسَ مَجْلِساً كَثُرَ فِيهِ لَغَطُهُ ، فَقَالَ قَبْلَ أَنْ يَقُومَ مِنْ مَجْلِسِهِ ذَلِكَ : سُبْحَانَكَ اللَّهُمَّ وَبِحَمْدِكَ ، أَشْهَدُ أَنْ لا إِلهَ إِلَّا أَنْتَ أَسْتَغْفِرُكَ وَأَتْوبُ إِلَيْكَ ، إِلَّا غُفِرَ لَهُ مَا كَانَ في مَجْلِسِهِ ذَلِكَ »
وحيدة واهلي كثيرين "هلاليه غير..!"
" أتمنى تُنقل الرواية كما هي خاصة النهاية إلين كفارة المجلس وراح اكون شاكرة كثير"
تجميعي اسطورة !
اللهم لك الحمد حتى ترضى وإذا رضيت وبعد الرضى ,,, اضف تعليقك