رواية ظل أسود للكاتبة أنـاهيـد -6

رواية ظل أسود للكاتبة أنـاهيـد -6

ام سند ناظرت لـ اميره بضيق : لا تشيلين على ابوتس

اميره ابتسمت : ليه هو وشسوا

ام سند : لمن ضربتس قدام اخوانتس لا يكسرتس هالشي

اميره : لو بنكسر قدام احد ما ضعت بالخلا تالي الليل

ولسان حال قلبها لخصه مساعد الرشيدي الله يرحمه :

قولي لهم يا عزوتي ما عابنا موت النخيل

‏اللي يوفيها الأجل و تموت .. لكن واقفة

في نهاية اليوم احنا مجبورين نوقف مجبورين نستر ثقوب روحنا برداءات مُزيفه وليس شرطًا انها مقاس ارواحنا مجبورين نمشي بقوتنا اللي اعتادوها الناس محبورين نوقف رغم حروبنا النفسيه والجسديه القائمه ..

ابو سند والعيال : السلام عليكم

الكل : وعليكم السلام

ابو سند : وشحالكم

ام سند : بخير الحمدلله

الهنوف : بخير يبه

ابو سند بخوف واضح : وشحالتس يا اميره

اميره بثبات : ماعلي طيبه

ابو سند : وشسوت الحراره

اميره : راحت

فيصل مبتسم : لا لا اشوا طبتي اشوفتس واقفه كنتس حصان ماشاءالله

اميره : ازهل

سند : الحمدلله على سلامتس الحمدلله ان ربي ردتس لنا سالمه

اميره بجفى : الله يسلمك

فهد : انا تطمنت واقولكم تصبحون ع خير

ام سند : نوم العافيه

ابو سند : روحوا بس خلكم قريبيين منا بكلم اميره بشي بيني وبينها

ام سند : يلا يلا

وراحوا فيصل والهنوف وام سند بعيد عنهم شوي

ابو سند اللي مقصر صوته ويناظر لـ اميره اللي حاطه عينها بعيون ابوها بثبات تعود عليه : هلا

ابو سند : حقتس علي

اميره ابتسمت : عادي يبه اهم شي انك ارتحت وشفيت غليلك

ابو سند : لا والله ضيعت الراحه من بعد ما ضربتتس ابيتس تعذريني

اميره : معذور يبه

ابو سند : ماهي من قلبتس

اميره بصدق : صدقني يكفي منك بس هالكلمه تنسيني كل التعب اللي شفته واللي للحين احس فيه اعتذارك طيب كل جروحي يبه

اعتذر واللي لك ان عـذرك يمشـى

مايدقـق فالعـذر بيـن الـولايـف

ابو سند مسك يدينها بحب : الله يحفظتس لي الحمدلله يا يبه ان ربي ما اختبر صبري فيتس الحمدلله ان ربي ردتس لي وانتي بخير

اميره مو بخييير والله مو بخييير : الحمدلله

ابو سند : توصين ع شي

اميره : سلامتك

ابو سند : يلا اجل مع السلامه ، وناظر لفيصل ، لا تأخر

فيصل : طيب طيب

ابو سند راح ينام وهو حاله ماهو مثل حاله اول ما جاء اللحين مرتاح ومنبسط ويقدر ينام وهو مو شايل هم ابد ..

ام سند جت هي والهنوف وفيصل اميره علطول مسكت ام سند : اهه مقدر خلاص

فيصل بخوف : شفييتس

اميره : ما عاد اقدر اتحمل تعبت تعبت من الوقوف

فيصل : انتي ليكون تكابرين من اليوم

ام سند : الله يهديتس وشو له تسوين كذا

الهنوف مسحت على ظهر اميره : تعالي ارتاحي

امييره بتعب : اييي تكفون ودوني فراشي ما عاد اتحمل الوقفه اااااهه

فيصل : الهنوف تكفين طمنيني عليها

الهنوف : لا تشيل هم احنا معاها

فيصل متوتر : استودعتها الله انا صاحي ترا بسهر مع العيال وجوالي معي

الهنوف : تمام

ام سند ماسكه اميره وهي شايله همها : تعالي يا يمه عسى ربي يشفيتس ويخفف عليتس

فهد وسند ناموا اما فيصل راحح للعيال وهو قلبه مشغووولل على اميييره يدري انها عنيده عنيده حتى اوجاعها عنيييده ما تطيب بساععع -

—

بـعد دقايق ناموا الحريم الكبار ..

ام سند انسدحت على فراشها وعندها الهنوف وهي تقرا على اميره اللي تتألم : حرارتس مرتفعه شوي

الهنوف بضيق : يمه شنسوي

ام سند جلست تكمد اميره اللي ترتجف : بسم الله عليتس بتخف بتخف ان شاءالله هي اليوم اول يوم عشان كذا متعبتس

الهنوف ماسكه يد اميره التعبانه وحاطتها على المخده : يمه شفتوا يد اميره

ام سند : اييه الدكتور حط عليها مرهم وغير اللفه وقال ما بها شي ما غير رضه خفيفه الحمدلله

الهنوف تمسح على شعر اميره : الحمدلله

اميره ترتجف : بررردد

ام سند : ذا من الحراره الله يكفيتس شرها

امييره : ابي جاكييت

ام سند : لا خليييه تكفيتس ذي البطانيه

امييره ترتجف : ابي جاكيييت بموووتتت من البرد

الهنوف نزلت جاكيتها ولبسته اميره بمساعدة ام سند ..

ام سند قامت : ليتس ما لبستيه بيزود الحراره بروح شوي وجايه ان شاءالله انتبهي لخيتس

الهنوف : ولا يهمتس ، وناظرت لـ اميره : وشيعورتس

اميره : كل شيييي كل شي

الهنوف تغير لـ اميره الكماده : بسم الله عليتس الف بسم الله الله يجعلها فيني ولا فيتس

اميره استغلت غياب ام سند : الهنوف

الهنوف ناظرتها بـ اهتمام : سمي

اميره بندم : اسفه

الهنوف مسكت يد اميره التعبانه وباستها : قسم بالله عادي اهم شي انتي ما يجيتس شي الباقي هين

اميره : يدتس تعورتس ؟

الهنوف ابتسمت : لااااا والله راححح الألم الحمدلله بس مابي افتحها بخليها شويه

اميره بهدوء : الحمدلله

الهنوف : ابيتس تتعافين بسرعه عشان تستانسين مع البنات

اميره : انتي روحي لهم انا شوي وبنام

الهنوف : لا يروحي ما بروح بجلس معتس انتي اولى من الكل وبعدين ابي اتطمن عليتس

اميره جلست : ابروح معاتس لهم

الهنوف بخوف : لا تكفيييين بتتعبين والله برد

اميره بعناد : قلت لتس بروح مافيني نومم

ام سند دخلت : شسويتي

الهنوف : اكمدها

اميره تناظر الهنوف : يمه انا بروح للبنات

ام سند برفض : مافيه روحه اجلسيي انتي تعبانه

امييره بعناد : يييمه بروح تكفييين بموت من الطفش

ام سند بعصبيه : انا داريه انكم تبون تجلطوني

الهنوف مسكت امها : بسم الله علييتس يا يمه خلاص دام بتروح انا بنتبه لها وعددد

ام سند تدري ان اميره عنيدده : روحي روحي لكن ترا بتزيد الحراره

اميره : عادي

ام سند راحت تنام وهي شايله هم اميره هي تدري انها تسوي اللي براسها وما عليها من شي فـ عشان كذا سمحت لها لانها دام بتروح يعني رايحه رايحه وبسس : انتبهي لـ اختس انتبهي لها ماهو تضحكين وتسولفين وتنسينها

الهنوف مسكت اميره وهي تقومها : بعيوني نامي وارتاحي

—

عَند العيال ..

محمد جالس يسوي لهم شاهي والكل جالس حوالين النار يتدفون كان الجو بارد جداً ..

قام سيف يجيب العود ومر من جنبه عمه ابو نوره : صباح الخير يا عيال

العيال مبتسمين : حييييه

ابو نوره : والله ما جاني نوم جيت اوسع صدري عندكم

سهم ضحك : يا عمي ما انت بشايب خلك معانا بس ، الشباب هنا بالقلب ماهو بالعمر

بعد دقايق سيف جاء وجلس يغني لـ ابو نايف ( الذاهبة )..

والكل أثنى على صوته اللي كان جميل جداً ..

ابو نوره : فيه اغنيه لها ذكريات عندي

سيف مبتسم : وش هي

ابو نوره : لا لا تضايقونه ، هالاغنية لها ذكريات عندي

فيصل مبتسم : وش هي ذكرياتها يا عمي

ابو نوره تنهد : لمن خذيت زوجتي ام نوره الله يرحمها كنا نسمعها سوا دايم

سعود : بس يا عم سمعت انك تغربلت لين خذيتها

ابو نوره : اي والله تغربلت ابوي الله يرحمه زوج اخواني كلهم زواجات تقليديه وانا كنت ابيها باقيه ببالي من يوم وانا صغير وعطيتها خاتم قبل تغطى وتكبر ومسكت يدها ولبستها اياه قلت لها ابتوظف واجي اخطيتس من عند ابوتس

سهم مبتسم : الله الله يا عمي والله طلعت عاشق

ابو نوره : اي والله وشفتها تبكي لمن ابوها رفض يعطيني اياها وانا مقهور وقتها كان عندي شريط لذي الاغنيه ورحت حطيت الشريط وشغلت المسجل ورا جدار غرفتها وسمعها ابوها الله لا يعيده وجاتني كم ضربه

محمد يضحك : عزتي لك يا عمي

سعود ضحك : وشصار

ابو نوره ابتسم : ذي علمي بزوجتي قلت لها انا بدرس جامعه وبصير دكتور تنتظريني قالت اي والله بنتظرك بس لا تنساني قلت ماعليتس بس انتظريني وابد خلصت من الجامعه وجبت معي ابوي واخواني ورحنا لبيتهم وخطبتها ووقتها كنت مغرور و شايف حالي والناس وراي ذا الدكتور عبدالله وذا الدكتور عبدالله

العيال ضحككوا

فيصل مبتسم : يازين سوالفك يا عمي والله انها توسع الصدر

ابو نوره : الله يعافيك يا بوي وبس تزوجنا وجبنا هالاميرات وسميت بنيتي نوره على بنت محمد عبده ابي الناس ينادوني ابو نوره ..

سهم يفكر بـ قلبه ( اشهد انك جبت اميره يا عمي ) ..

البنات جالسات بعيييد عن الحريم ومعاهم المها اللي تدق بالعود وهي تغني أغنيه لـ اليسا ..

المها حطت العود : وشرايكم

جود حاطه يدينها على اذانها : موهبه تستحق الدفن عز الله

الهنوف تضحك وهي تعزز لخواتها : صوتس يجيب العافيه ماشاءالله لازم نحصنتس لا خلصتي

ريم : الا والله يجيب العله

جمان : يجيب الضيق

جود بغثيان : خذي مني ماله داعي تحصنينها ما بتقربها العيين والله

المها : عوذه كلكم غيرانين من صوتي

بعد دقايق ..

جود ناظرت لـ اميره : ييوه بعدين بتتغيرين يا اميره بتصيرين ما تتحركين الا بـ امر رجلتس تكفين ارفضيه

ريم : خيير انتي اسكتي يا خراب وبعدين عادي زوجها تسمع كلامه

اميره تناظر ريم : مو يعني اني باخذ اخوتس يعني بصير من ممتلكاتكم

نوره بقهر : الا والله بتصيرين اول ما خذيت سهم كان ما يرفض لي طلب لو اقوله مدري ايش يكتم بقلبه اللحين لا هو اللي يقرر وينفذ

اميره : انتي لانتس هاديه لا تسكتين له خليتس قوييه وعنيده

جود ضربت اميره مع رجلها : وجعهه تحرضينها على اخوي

اميره : اخوتس مستبد

امجاد بدفاع : الخلا بس ماهو مستبد وشزينه متفهم وطيب ويحبها

نوره : ما ودي اقولكم اني بطلعة الروح جيت وجلست معاكم لا وفوق ذا هو سهران ترا هو والعيال

جود ضحكت : يخاف عليتس يا بقره

ريم بهيمان : الله يرزقنا انا لو رحت لـ القطب المتجد الشمالي محد درا عني ما غير امي اربع وعشرين ساعه تقول لي اصفقي راستس بالجدار

جود تضحك : عاد اللحين عندتس هالضلعان مفعولها اقوى من الجدار اصفقي راستس فيهم

ريم قامت وضربت جود : انتي من يومتس حيوانه

جود تضحك : وانا صادقه اصفقي راستس بذا الضلع

المها : بنات تبون اغني لكم

امجاد : متى تقتنعين ان صوتس خايس

-

الساعه 2 بالليل ..

سيف منسدح وبجنبه محمد اللي واضح انه بدا ينام امَـا هو كان كل تفكيره فيها قلبه مشغول عليها طول الوقت كيف ينام وهي كريمه كريمه جداً بكل حلم تطلع له بكل وقت موجوده بباله بجلسته مع ابوه وعمامه حاضره بجلسته مع العيال حاضره بجلسته مع عوده حاضره متى تجمعهم الايام وتصير قدام عيييونه متى تصير بذمته متى يصير زوجها متى تصير ام عياله ام عياله هو من كثر ما هو مكتفي فيها ماقد فكر بأنها تصير ام عياله هو يشوف الكون كله امييره هي تغنيه عن بنات آدم كلهم ما ندم الا انه ما خطبها من اولللل كان يخاف من الرفض يخاف يخاففف ان الانسانه اللي شافها طول عمره شريكة حياته ما تقبل فيه ما شجعه الا محمد اللي اجبره يخطبها قبل لا تروح لـ احد ثاني ناظر لمحمد اللي نايم : اهه يا محمد مدري كيف ارد لك معاريفك علي

محمد : بتردها لا نمت

سيف ضحك : ما نمت

محمد : كنت بنام بس شفتك تهوجس ف قلت انتظرك تخلص

سيف ابتسم : جعلني والله قبلك نم نم ورانا قومه من الصبح

محمد : الله يطول بعمرك ياخوي نم

سيف انسدح وهو يمنع عقله من التفكير قد ما يقدر : نمنا

—

البنات بَعد دخلوا الخيمه وراحوا ينامون ..

ريم تهمس للبنات : ظلام انتبهوا توطون الناس

جود ماسكه جاكيت ريم وهي ما تشوف زين : وين بنتنا

امجاد قرصت جود : اعتقي المره

جوود : اححح انا حالفه ما تنام الا عندي

المها : هذي نوره شوفيها حاطه فراش بجنبها

جود : اهه يا قلبي بس اييي ذي زوجة الاخو السنعه حاطه فراشي ، وانسدحت جود

ريم : ابي مخدددده

ملاذ : تعالي نامي معي

امجاد حاطه العبايه تحت راسها : ذي مخدتي

البنات ضحكوا

جود : الحاجه ام الاختراع اقول ريم ما ودتس اعطيتس فروة حمودي تنامين فيها

ريم : سلامات عطيني بطانيتس وتغطي بفروة اخوتس

جود : بكيفتس انتي الخسرانه هاتس البطانيه

ريم : بشويش يا تبن الحريم نايمات

ام سياف جلست : وشبلاكم

البنات بسرعه نزلوا روسهم وهم ماسكين الضحكه ما غير ريم اللي تهتز من الضحك

جود : بسم الله عليتس يا خاله تبيني انام بحضينتس اجسرتس

ام سياف : انتي صبح وليل واعيه ما تنامين

البنات انكتموا من الضحك

جود قامت وريم ماسكتها : بنت انثبري الناس نايمه

جود راحت لـ ام سياف : خاله نامي يقولون العيال فيه ذيب ورا الخيمه يدور العجز عاد انتي لحمتس ماشاءالله هبر

ام سياف : الله لا يبارك بتس ما يجي من وجهتس خير

جود بضحكه : نامي نامي تدعين بهالليل الله يسامحتس

المها جابت جود عشان تنام غصب : اخمممدي

جود : يليل الاستاذات

المها : اقول نامي

جود اللي نايمه بين نوره وريم جلست تدخل رجولها ببطانية ريم وهي ميته ضحك وملاذ تضحك بس مقصره صوتها

ريم : يا حمار بعدي رجلتس ذي كنها ماسوره

جود : ماسوره اجل ترا ما انسى لمن كنا بالمتوسط وتقولين تبين اعطيتس من خلطاتي هاه

ريم : خلاص يا تبن ما تقدرين تمسكين سر

جود : لا مقدر

المها : يا حميير ناموا

امجاد اللي سحبت عليهم ونامت وهي متعوده على جود

ملاذ : بنات اسكتوا ابنام نعسانه

جود : نامي محد ماسكتس

ملاذ : تدورين المشاكل انتي

جود : لا والله ادور الحضن ابي احد يخمني برداننننه

ريم فتحت ذراعها : يخسى البرد تعالي

جود جت وهي تحضن ريم ودخلت يدها بشعر المها اللي فزت

المها : وقفتي قلبي يا حماره الشرهه على اللي ينام عندتس يا قلق

جود مسكت يدها : قسم بالله بعقل خلاص نامي

ملاذ : اصص يا سسسلق

المها : الغدا علينا يا حمير خلوني انام

ريم : ايه نامي يلا جود بنت

جود : سمي

ريم : اختس نامت

جود : ذي عجوز لا قيلوا امي وابوي الظهر تقيل معاهم

ريم : اما وانتي بروحتس

جود : ايييه رييم تكفين تزوجي محمد ابيتس تنامين عندي

ريم : وجعه لو بتزوج شبي فيتس انام عندتس

جود : اصبري بخاطري شي ، سحبت مخدة ملاذ من تحتها

ملاذ : يا حيييوانه

ام سياف : لا والله انتن ما تخلن احد ينام

جود ميته ضحك وهي حاطه يدها على فمها : قسسم اخر مره

ونامت وهي تضحك هي وريم ..

—

يوم الجمعه الساعه ٦ صباحاً ..

ابو سند جالس بالبيت وعنده ابو سياف وابو سهم وابو نوره : فهد هات المدات افرشها برا البيت

ابو سياف جالس يشرب ماء : براد والله خلهم شوي

ابو سند : ماعليه اللحين تطلع الشمس خلهم يضبطون لنا القعده يلا يا عيال طلعوا المنقل وشبوا النار وسووا القهوه والشاهي

فهد : ابشر

فهد جاب المدات وفرشها قدام البيت وحط سند المنقل بالوسط وراح سهم يجيب الحطب وجلس يشب النار و يسوي قهوه وشاهي .

فيصل متلثم بشماغه وحاط يده على راسه ونايم وبجنبه سيف ومحمد اللي متغطين ببطانيه وحده صحى فيصل على رفسة محمد اللي رفسه مع بطنه بقوه : اهه الله ياخذذذ هالوجه وضربه مع راسه بقوه ورجع ينام لكن ما وقف محمد جلس يرفس مره فيصل ومره سيف امَا سيف فكان نومه ثقيل ما حس برفسات محمد اصلاً

فيصل خذا فراشه وراح بعيد : الله ياخذني يوم نمت بجنبكم يا الحمير ، وسحب فراشه وابعد عنهم لكن للأسف طار النوم من عينه ما قدر ينام وهو يسمع ابوه جالس قدام النار ويهيجن تكلم بغبنه : الله يسامحك يا يبه يعني ذا وقت هجيني

قام وهو اخلاقه قافله للاخر تعدا من عند الرجال وراح يوضي ويصلي بدون كلام

فهد ضحك بداخله كان ذا طبع فيصل لا صحى من النوم ما يتحاكى ابد يصير نفسيه وعصبيييي

فيصل جلس يصلي وبعد ما خلص راح بعيييد جلس فوق ضلع يدخن واتصل على امه يبي يتطمن على اميره بس جوالها مقفل وشوي ورجع للرجال : السلام عليكم

الرجال : علييك السلام

فيصل حب راس ابوه وعمامه واخذ الدله من فهد : عطني عنك

فهد : لا والله

فيصل : يارجال بس هاتها روح استريح

ابو سند يناظر لسند وفهد بمعنى شوفوا الفطور وقاموا كلهم ومعاهم سهم ..

—

اميره نايمه بحضن الهنوف بعد ما غلب الهنوف النوم اميره تعبانه جداً وزاد عليها التعب طلعتها البارحه بالبرد كانت حرارتها مرتفعه كثيير

ام سند صحت من النوم وقامت تصلي الفجر وجلست شوي بمكان صلاتها وهي تقرا اذكار الصباح وراحت لـ اميره اللي شايله همها بقوه حطت يدها على جبهة اميره وشافتها ترتجف قاست حرارتها وطلعت 40 مسحت على وجهها بصدمه : لا اله الا الله امييره

اميره اللي كانت صاحيه اصلاً : هممم

ام سند بخوف : بسم الله عليتس قومي حرارتس مرتفعه وراحت لـ ام سياف شافتها صاحيه ، صبحتي بالخير

ام سياف : يا صباح النور

ام سند : بالله خليتس مع اميره تعبانه بروح لي فوق ضلع اكلم ابوها ولا اخوانها يودونها للمستشفى

ام سياف قامت بفزعه : يالله يالله ، وراحت لـ اميره وهي منصدمه من حرارتها كانت امييره كأنها نار من الحراره

ام سياف جلست تقرا عليها وهي خايفه عليها بالحيل

ام سند اتصلت على ابو سند يودي اميره للمستشفى ..

ام سند راحت تلبس اميره عبايتها :امييره يا اميييره يا يمه انتي صاحيه

اميره كانت تفقد وعيها كل شوييي

الهنوف صحت برعب : وشفيه

ام سند : بسسم الله عليتس مافيه شي نامي وارتاحي اختس تعبانه شوي

الهنوف جلست وحطت يدها على جبهة اميره وانصدمت : يمه حاررررره مررره

ام سند بخوف : اييه حاره والله ، ابوتس جاء هاللحين يبي ياخذها للمستشفى

الهنوف : يمه تكفين بتطمن على اميره بروح معاه

ام سند تدري ان الهنوف تضحي بكل شي عشان اميره حتى على حساب نفسها : ارتااحي يا ييممه ونامي انتي ما نمتي الا توتس اميره ابوتس معاها وبترجع ان شاءالله بس نامي يلا

ام سند راحت برا تنتظر ابو سند اما الهنوف ف مسكت يد اميره الحاره ..

اميره ترتجف : يد يد يدي

الهنوف : شفيتس

اميره بألم : يدي

الهنوف ناظرت لـ يد اميره اللي تعورها شافتها تحت ظهر اميره واللي واضح انها تتألم بس مو قادره تساعد نفسها وسحبت يدها بخفيف ونزلت دموعها كيف انها مو قادره حتى تخفف الالم عن روحها : بسم الله عليتس يا حبيبتي خلاص ان شاءالله اليوم وبتطيبين

اميره : بموت

الهنوف باست راسها : لا يا روحي انتي ما راح يصير لتس شي والحراره الحيوانه انا بتفاهم معاها اذا ما راحت اليوم انا بوريها

اميره رجعت تفقد الوعي مع ارتفاع الحراره والتعب النفسي ما عاد عندها شي يخفف عليها اخر شي تتذكر يد الهنوف اللي على راسها ..

الهنوف قامت وراحت لـ امها وهي ترجف : يمه امييره مدري شفييها ما ترد علي

ام سند راحت لـ اميره وقومتها هي وام سياف والهنوف وطلعوها لـ ابو سند وراحوا للمستشفى الهنوف حضنت امها وهي تبكي : يمه وشصار لها

ام سند تمسح على ظهر الهنوف وعلى شعرها البارد بسبب الجو : هي كذا الحراره لا تخافين اختس بتطيب ان شاءالله وانتي تعالي نامي وارتاحي يلا والبسي وادفي مابي وحده تشفى والثانيه تطيح

الهنوف رجعت لفراشها وهي تفكر بـ امييره وخايفه علييها كثييير : استودعتها الله

ام سند راحت تشوف المها شافتها نايمه وغطتها وطلعت برا ما تبي تزعجهم كل البنات نايمين ما عدا الحريم اللي صاحيات ..

البارت العاشر

اميره منسدحه على المرتبه الاماميه وهي تأن بـ الم لكن ثواني رجع لها وعيها بعد ما فتحت عيونها اخيراً وهي تحس بجسمها مثل النار شافت ابوها جالس على يسارها وهو متوتر ومسرع : يبه

ابو سند ناظر لها ومسك يدها : سمي يا يبه انتي صحيتي

اميره هزت راسها بـ ايجاب وعدلت جلستها : يبه وين امي

ابو سند : ما جبتها انتي وشلونتس وشتحسين فيه اللحين

اميره تعبانه جداً بس قرب ابوها منها يطمنها ويخفف عنها كل اللي تحس فيه : احس اني بخير

ابو سند : والله مدري شكلتس يقول العكس انتي اخذتي علاجتس اللي جابه لتس اخوتس

اميره : اييه

ابو سند : شكله ما منه فايده

امييره : انا طلعت برا يمكن عشان كذا زادت علي

ابو سند : وليييه تطلعين وانتي تدرين انتس تعبانه

اميره : غصب عني يبه ما جاء لي نوم وجلست مع البنات

ابو سند : مهما كان المفروض ما تطلعين اللحين لا رجعتي لهم ان شاءالله لا تطلعين بالبراد يزيد الوجع وجع

اميره : ابشر ماععاد بطلع ، يبه

ابو سند : هلا

اميره تناظر لـ ابوها بأنكسار : يبه مابي سيف

ابو سند حط يده على يدها كانت حاره جداً كأنها لهيب : تدرين انه انتي اكثر وحده من خواتس مابي تغمض عيني وانا ما أمنت حياتها اخاف ياخذونتس خوالتس وتتشتتين اخاف عليتس من بعد عيني مدري وش بيسوون بتس الناس

اميره بخوف: يبه لا تقول كذا بسم الله عليييك الله يجعل يومي قبل يومك

ابو سند : لا والله الا الله يطول بعمرتس بعدتس ما شفتي من الحياه شي اما انا شايب شبعت من الدنيا

اميره : يبه حياه ما انت فيها ما تلزمني

ابو سند ابتسم : ابيتس تتذكرين شي واحد بس اني ما جبرتس على سيف لانه ولد اخوي انا سيف اعرفه وابخصه زين رجال طيب ونظيف والنعم فيه محد بيصونتس مثله

اميره بكت بصوت خفيف وهي ما تبي تتكلم بعد كلام ابوها وقلبي طيب قلبيي اللي قاعددد يحترق شسوي فيييه قلبي اللي قاعد يموت كل ما دريت اني بيني وبينه مسافه بسيطه ولا اقدر اوصله ليه الاقدار ما تجمعنا مع اللي نحبهم ليه اي شي نحبه ما نحصل عليه واذا حصلنا عليه نكون عفناه ليه الحياه قاسيه لدرجه انها تتفن بطرق مبتكره تعذب بها قلوبنا ليه قلبي نصيبه داييم الخساره لييييه ليه .

—

راحوا الشيبان يتمشون هم وسند وسهم وسعود امَا فيصل استانس لمن شافهم ابعدوا وراح ركض بعد ما اخذ الملقاط حق النار ولزقه برجل محمد اللي قام وهو منخرش : الله ياخذذك يا حييوان

فيصل بحقد : تستاهل تستاهل يمكن رجليك تثبت لا كويتها

محمد ركض يكتف فيصل يبي يكويه بالنار لكن فهد جاء وسحب فيصل وجلسوا العيال يتصافقون لين ما طاح فيصل على سيف اللي قام وهو خايف : اذن الفجر

محمد : قم الله يعافيك الساعه تبي تجي ٩

سيف : الرجال وينهم

فهد : راحوا يتمشون

محمد راح يصلي وهو متوعد فيصل بقلبه وفيصل يتحداهه وجالس يشرب شاهي وهو يضحك يبي يستفزه ويقهره ..

وماهي الا دقايق ومحمد غدر بفيصل وربطه وجلس يجلده هو وسيف ..

فيصل يضحك : هذذي علومكم يا زلايب

محمد : تستاهل يالكلب

فيصل : الشجعان لا يموتون الا غدرا

سيف : اجللل الشجعان فك نفسك بس

فيصل : انت هين شغلك بعدين ولا تجي بيتنا ما عندنا بنات للزواج ، فهد جاء مسرع وفك اخوه

سيف : تعقببب

فيصل : هاه

سيف : كلامي مع عمي

فيصل شخصنها : وانا اخوها

سيف ما يبي يجيب العيد : على عيني وراسي

فيصل : ايييه اعقل

سيف بقهر : عض على شحمه

محمد جلد فيصل مع علباته : وشعندك على خووييي

فيصل كتف محمد وربطه بشماغه بالوتد حق البيت والعيال ميتين من الضحك على شكله : سيف يا سيف اخوي ماهو بهنا

سيف جاء يركض وهو يدف فيصل عن محمد وهمم يضحككون : احتزززمم

فيصل جلس بالارض وهو يضحك على شكل محمد المربط بالوتد وفهد يضحك ع محمد

محمد قام وهو ينفص التراب عنه : الله لا يعطيك عافيه

فيصل : اقول دز امها بس انت وولد عمك

فهد : سعود من جده رايح مع الشيبان

محمد يضحك : خله خله تلقاه اللحين هو وعمي ابو نوره يتفلسفون على هالشيبان وهم مصدقين

سند : انا ذال ان الشجر كله يطلع سام والشيبان رايحين ع الفاصي

سيف : ظني انه كله سام

محمد : شدراك

سيف يغمز له بمعنى اسكت : افا علييك ما صرت اخو دكتور على الفاضي

محمد : انا والله لو اوريك نعناع نعناع ما تعرفه الا من ريحته عاد تبي تعرف الشجر السام اجللل

سيف : لا بارك الله بهالراس

—

اميره حست انها بدت تتعافى حست الدم بدا يرجع لعروقها حست انها بدت تقدر انها تمشي على رجولها وتساعد نفسها بنفسها بدون مساعده من احد وكالعاده كانت تفكر بحياتها بعد اسبوعين اللي راح تتغير ما توقعت انه يوم من الايام بيكون زوجها سيف ! عمريي ما فكرت فييه حتى ما حطيته ضمن توقعاتي اهه ياربي وشسوي وشسوي مين معاي من اللي يقدر يوقف بوجه هالزواج ذا مين هي تعبانه جداً عايشه بـ لعنة عشق رجل ما درا عنها انسان حبته من كانوا اطفال كانت دايم تشوف ان ذا ظل الرجل اللي راح تستند عليه بقية أيام حياتها وهي متطمنه لكن هالظل قرر بشكل ماً انه يسند كل شي بالحياه سواها حست بدموعها تنساب على خدها الناعم المرهق من أثر الاحداث المؤلمه اللي صارت لها امس صحت من سرحانها اللي اصبح طبع فيها بعد ما حست بقطرات المطر تلامس الشباك اللي بجنبها وكأنها تصحييها من بحر أفكارها المزعجه بهاللحظه غصب عنها ابتسمت وهي تشوف ابوها المبتسم حطت يدها اليمين على الزجاج البارد ورجعتها لحضنها بعد ما لسعتها برودة الشباك

ابو سند : ماشاءالله ماشاءالله الله يجعلها امطار خير وبركه

اميره بتساؤل : يبه ليه الناس تحب المطر وتفرح فيه ؟

ابو سند ابتسم : الناس تحب اي شي يسقيها.

اميره : مو شرط عادي تحب احد ما اسقاك يوم ولو قطره

ابو سند بأستغراب : وشلون يعني

اميره عدلت جلستها بـ ارتباك وجلست ترقع : اقصد مثلي انا

ابو سند معقد حواجبه : انتي شفيتس

اميره : خالتي وخواتي يحبوني وانا ما قد سويت لهم شي حلو

ابو سند حك لحيته : والله وانا ابوتس انتي زينه بس لو تتركين عنتس المناطح

اميره بقهر : وش المناطح

ابو سند ضحك : ما تسكتين

اميره : وليش اسكت الساكت حقه مهضوم

ابو سند : صادقه بس احياناً لازم نتغاضى نكتم الغيض

اميره ناظرت للمطر بأبتسامه : صادق يبه بس ما اعرف لازم ارددد

ابو سند : الله يهديتس

اميره : ويهديك انت بعد

ابو سند ضربها مع يدها بمزح : تبين تسوقين ؟

اميره ابتسمت : ايه ابي

ابو سند : تعالي سوقي والله ركبي توجعني

اميره : بسم الله عليييك ابشر يلا

ابو سند وقف السياره وهو يمشي بسرعـه وركب وهي ركبت بمكان السايق : بسم الله

ابو سند : توكلنا على الله

اميره جلست تسوق وهي اللي اصلاً متعوده على السواقه تسوق كثير واغلب الاحيان تودي ابوها لـ بعض الاماكن وتاخذ لها كم جلده من اخوانها اللي رافضين تسوق بس ماهموها اهم شي عندها ابوها راضي والباقي اخر همها ..

ومَـا هي الا دقايق وهم مقبلين على الديره لمحت ظل الخيام من بعيد مشت من قدام خيمة الرجال تبي تقهر أخوانها وسيف وتعلمهم انها اي شي تبيه راح تسويه غصب عن الكل اكره ما على قلب أميره انها تضعف او تصير انسانه تمشي على قوانين وقواعد ما تعجبها هي اللي تبي تكتب القوانين وتحط القواعد وهي اللي تقرر من اللي يمشي على ذا القوانين واذا ما اعجبها تبعده عن عالمها العنيد ..

فهد مسك يده وشد عليها بغضب وبدت تبان عروق يده وهو يشوفها تتعدا من قدام البيت بـ لامبالاه تعودوا اهلها عليهااا لمح فيصل اللي ما كان اقل منه غضب وقهر كانوا بركانين خامده تنتظر من الجميع لمسها حتى تنفجر او بالاصح ثلاث براكين خامده سيف كان يدري ان هو مقبل على حرب اشرس من حرب البسوس هو يدري ان الانسانه اللي حبها عنيده جداً وصعبه وقاسيه لها اذن تسمع كل شي الا الامر ولها عين تشوف كل شي الا الحب ولها قلب يحس بكل شي الا الرحمه ولها عقل يفكر بكل شي الا الرضوخ تنهد بغييره ما قدر يخفيها وده يطلعها من السياره ويضربها يضربها لين يتخلص من النار اللي جالسسه تشب بضلوع صدره طلع من البيت وهو مقهور قررر يمشي بروحه وبعيد عنهم لين تخف عنه وطأة هالمشاعر وسطوتها : تبين تقهريني تبين تعلميني اني ما راح تكون لي كلمه عليتس لا اللحين ولا حتى بعدين تبين تبينين لي اني راح اكون عاجز عنتس تبين تربطين يديني تبين تقصين لساني غلطانه يا امييره والله غلطانه يا بنت عممي انتي بعد ما تعرفيني زين لكن ما عليه كل شي بوقته حلو ..

يتبع ,,,,

👇👇👇

تعديل المقال