رواية ظل أسود للكاتبة أنـاهيـد -5

رواية ظل أسود للكاتبة أنـاهيـد -5

فهد من شافها راح يركض والسياره مفتوحه وفيصل يركض وراه شافوها طايحه على الارض حولها شجره وتراب ناعم وفمها لونه ازرق وكأنها جثه ويدينها صفرا ..

فيصل نزل فروته وحطها عليها ورفعها وركبها بالسياره وجلس بجنبها وهو يرش على وجهها مويا ويخليها تشم عطر ويهزها ويناديها بعد دقايق اميره صحت بس مو بوعيها ..

فيصل مسك يدينها وهي يسمي عليها ويقرا آيات من اللي حافظها ويمسح على شعرها ووجهها المُنهك : فهد واقف بجنبهم بخوف : وشصار عليها

فيصل بتوتر : بدت تصحصح لحظه

اميره بتعب : را رر راسي راسسي

فيصل بضيق : يوجعتس

اميره ما ردت عليهم

فهد : نوديها للمستشفى

فيصل : ايه لازم يلا بس اول مر الخيام نبي نطمنهم عليها ابوي مريض ضغط وسكر

—

وشافوا الرجال جالسين بالبيت وابوهم حاط راسه على مركوعه ( عصاه )

ابو سياف : تصبر يابو سند مصير الحي بالحي متلاقي

سيف جالس يفرك يدينه وهو بينفجر من القهر والعصبيه وده يمسك عمه ويطقه من القهر بس ماسك اعصابه ..

محمد حاط يده على كتف سيف

سند جالس وهو ماهو بـ احسن من حال ابوه كلهم اكلتهم الحسايف

العيال الباقين خايفين ومتوترين والكل ضايق وخايف وماعاد ينتظرون الا خبر واحد ان اميره اختفت للأبد وماعاد لها أثر او انها اصلاً متوفيه يا ان ذيب اكلها او انها طايحه من جبل على راسها وغيره من الاحتمالات الأليمه..

فهد وقف قدام البيت : يبه يبه ابشرك انها حيييه ومعانا جعلني والله قبلكم

ابو سند ما قدر يوقف من الفرحه للحظه حس انه بيفقدها للأبد الضنا غالي غالي : لا اله الا الله لا اله الا الله يارب احمدك واشكرك

سيف نزل شماغه بذهووول ومحمد مسك يده وهو مبتسم : يارب لك الحمد الله ما يضيع وداعته

سيف وده يروححح يحضضضنها يودييها هو للمستشفى يتطمن هو عليييها هو اصدق دمعه اصدق خوف اصدق سند اصدق شعور خايف عليها مثل خوف اهلها عليها واكثثثر اكثثثثر الدمعات اللي هلها ماهي من عيونه طالعه من قلببببببه من داخلللل اعمممماقه من دممم دم قلبه ..

ابو سياف ربت على يد اخوه بأبتسامة : الحمدلله الحمدلله قرت عينك يابو سند

ابو سند : بوجه نبيك وينها يا فيصل

فيصل مبتسم : يبه بنوديها للمستشفى وتراها صاحيه بس تعبانه شوي وراجعين ان شاءالله يلا نشوفك ع خير

الكل قام يتحمد لـ ابو سند بسلامتها ورجوعها له

وبعدها قاموا العيال يطلعون ابو سند وسند من الجو الكئيب بقصص وسوالف ومواقف ..

امَـا سيف كان وده انه هو اللي ياخذها للمستشفى من وجهة نظره محد يحبها كثره محد يخاف عليها كثرهه هو احق شخص انه يتطمن عليها هو يحمل لها كل المشاعر الصادقه اللي تثبت للكل ان حياة سيف مقرونة بحياة أميره بـ اختصار تام ..

—

عند الحريم ..

ام سند تبكي والحريم يصبرونها والمها كانت منهاره وهي تحاول تهيئ نفسها لكلمه وحده بس ( عظم الله اجركم بـ اميره ) : بنتي راحت راحت يا ناس راحت

ام سهم تبكي : لا والله ما راحت انها حييه ياخيتي بيلقونها العييال بيلقونها

ام سياف تبكي : عسى ربي يردها لكم وهي سالمه

ام سند : ااهه يا بنتي قسينا عليها قسينا علييييها كلنا

المها تبكي : ايييي والله اهه ياربي الله يسامحك يا ابوي الله يسامحك يا ابوي

ريم حاضنه المها وهي منهاره وتبكي وامجاد تربت على كتفهم : استودعتها الله الله يحفظها باذن الله بيلقونها العيييال باذن الله

ملاذ جالسه تدعي وتستودعها الله وهي تبكي

جود متعلقه بـ نوره وهي منخرشه وتبكي من بكاهم : ياعمري يا اميييره عسى ربي يردها لنا يارب وهي بخير والله بنتبه لها انا

الهنوف تنزل دموعها بدون احساس : يمه اميره مستحيل تموت ، وجلست ، اميره مستحيل تموت وتخليني مستحيل انا ادري

ملاذ مسكت الهنوف : لا والله يا حبيبتي انها بخير ما ماتت يا روحي اهديي اهددددي

المها ما عاد قدرت تتحمل وجلست تصارخ بألم والجازي تحضنها بخوف : خلاص يا حبيبتي خلاص والله انها بخييير بس اصبروا اصبروا بتجيكم بتجيكم ان شاءالله استودعناها الله

دقايق الا يسمعون سيارة فهد تطنب قدام الخيمه وطلعوا امه وخواته ..

ما كمل كلامه الا امه جايه تركض ووراها بناتها ام سند طلعت ودموعها على وجهها : لقيتوها لقيتوها

فهد مبتسم : ايييه يمه تكفيين بنوديها للمستشفى وتراها بخيير وتكلمنا بس تعبانه شوي

اميره حركت راسها بتعب ما كانت تقدر تتكلم ولا تنطق حرف تحس انها أفاقت من الموت

المها ماسكه اميييره وهي تبكي ما تقدر تتكلم والهنوف تمسح على شعر امييره وهي حاضنه يدها البارررده اللي كأنها قطعة جليد : جعلني كلي فداتس قومي كسسريني من راسي لرجولي بس ارجعي لنا

فيصل خايفه على اميره جداً : تكفون تكفون خلونا نوديها يلا

ام سند جلست تناظر للخيمه ولهم : انا معكم بتطمن على بنتي الهنوف هاتي عباتي يالله

الهنوف برجاء : تكفون بمشي معاكم

ام سند : ارجعي انتي واختس ما حنا مطولين ان شاءالله ، لبست عباتها وطلعت هي وعيالها للمستشفى ..

الكل قام يتحمد للبنات بسلامة اميييره والفرحه بدت تنرسم على وجيههم والراحه رجعت لقلوبهم ..

—

بعد نصف ساعه ..

وصلوا للمستشفى ودخلوها للطوارئ واخوانها حطوها على السرير والممرضه حطت لها مغذي وجهاز قياس نبضات القلب والضغط وكل شي طلع طبيعي لكن حرارتها كانت 40 عطوها خافض حراره ومغذي وسوو لها تحاليل دم والنتيجه بعد نصف ساعه وكانت نايمه ..

ام سند جالسه عند راس اميره تقرا عليها وفيصل جالس يناظر لهم اما فهد فـ كان واقف يكلم ابوه ويطمنه ..

وكل شوي تجي الممرضه وتقيس حرارتها وكانت تنقص بالتدريج ..

بعد دقايق الدكتور جاء : السلام عليكم

الكل : وعليكم السلام

اميره كانت نايمه من جابوها للمستشفى ما صحت للحين ..

الدكتور يناظر لـ ام سند : ممكن تصحينها

ام سند جالسه تمسح على كتف اميره : اميره اصحي

اميره حركت راسها

ام سند : اميره

الدكتور : اميره

اميره فزت : بسم الله انا وين

ام سند ماسكه اميره الخايفه : بسم الله عليتس مافيه شي

الدكتور : انتي بالمستشفى مافيه شي لا تخافين كيفك كويسه ؟

اميره : ايه

فهد : اميره شسوا راستس يوجعتس

اميره بتعب : شوي

الدكتور جلس يسأل اميره عن اسماء اهلها يبي يشوف هي واعيه ولا لا عرفت بس ام سند العيال لخبطت فيهم ..

الدكتور : معناتها لازم تجلس شوي هذا يمكن بسبب ارتفاع الحراره اثرت عليها شوي وبترجع لها ذاكرتها الطبيعيه

ام سند مسكت اميره وهي تبكي : بسم الله عليتس يا يمه هذا فيصل اخوتس ماهو سند

فهد : يمه تكفين لا تصيحين عندها تراها دايخه

الدكتور : ماعليه ذا طبيعي لا تخافون ذا بسبب الاغماء هي من متى مغمى عليها

فهد : من ساعتين

الدكتور بصدمه : وينكم عنها

فيصل : كانت بغرفتها نحسبها نايمه

الدكتور : الحمدلله عدت على خير يلا انا شوي وجاي ان شاءالله

..

جود جالسه هي والهنوف ورا الخيمه بالظلام يناظرون للسماء مغطيتها النجووم بشكل يستدعي التأمل ..

جود بعبره : اول مره اجرب شعور الخوف

الهنوف ناظرت جود ورفعت راسها للسماء : كيف انا اجل

جود مسكت يدها : ما الومتس للحين قلبي ياكلني مو قادره ارتاح ابد

الهنوف مسحت دموعها : احنا اخطينا عليها كثير والله

جود : وشصاير ترا مو فاهمه شييي

الهنوف بعبره قالت لها اللي صار بالبيت ..

جود انصدمت : حرام والله ليه كذا

الهنوف : والله ما كنت ابي احد يدري انه بسببها بس هي ما تخاف من احد وما تكذب لو ايش

جود : اميره مين يقدر عليها بس

الهنوف : مشتاقه لها وربي معاتس جوالتس

جود : اييه تبين تكلمينها ؟

الهنوف : ايه اتصلي على رقم امي

جود : طيب

الهنوف عدلت جلستها ونفضت يدينها عن التراب ..

ثواني ووصل صوت ام سند : هلا جود

الهنوف : يمه انا الهنوف

ام سند : هلا يا يمه وشلونتس اللحين

الهنوف : بخير يمه اميره كيفها صحت

ام سند تناظر لـ اميره : بخير ماعليها هذي هي قدامي شوي وجايين ان شاءالله

الهنوف : الحمدلله يارب يلا اجل ننتظركم لا تطولين

ام سند : قريبين يلا بشوف اخوانتس يطلعون اختس

الهنوف : تمام توصلون بالسلامه

ام سند : الله يسلمتس

الهنوف اعطت جود جوالها : تسلمين

جود بأبتسامة : كيفها اللحين ؟

الهنوف ابتسمت : ابشرتس بخير

جود براحه : الله يبشرتس بالخير ..

—

سيف جالس مع الرجال وقلبه معاها يحس انه مفضوح من كثر ماهو متوتر طلع من البيت وراح يتمشى برا سمع صوت من وراه شاف محمد : حيه

محمد لف الفروه على نفسه : اعوذ بالله يالبرد ادخل لا تمرض والله برد بالعظم

سيف : تصدق ما احس فيه

محمد : والله برد ياخوك اني تجمدت انت وشعندك هنا

سيف طلع الولاعه من مخباته وولع له زقاره : افكر

محمد ناظر لـ سيف : سيف قسم بالله انها طيبه ومافيها شي ما سمعت فهد يوم طمن عمي ناصر

سيف بغبنه : وانا من يطمني

محمد بضيق : سيف تمسك بالصبر تراه كلها ايام ان شاءالله وبتصير حلالك

سيف بعبره : وش يعديها هالايام

محمد : يعديها الله لا شفتها قدامك انزاح عن صدرك كل هالعنا

سيف : ما عاد أثق بالدنيا كل شي لي تعفسه او تجيبه لي ناقص

محمد : الله يزينها ان شاءالله

—

سند تعبان جداً ومنهلك من التعب والاحداث اللي صارت اليوم : انا بعد قهرتها والله

الجازي حزينه على حاله : سند كفايه تلوم نفسك

سند ناظر عيونها وهو يتذكر شكل اميره لمن كانت منزله عيونها وهي تبكي بالسياره : ما شفتيها واضح انها زعلانه بالحيل

الجازي : يروحي هي بس انتم خلاص لا عاد تضايقونها انتبهوا لها ترا بتتحسس كثير وذا طبيعي لانها تحس مالها احد وانتم اللي وثقت فيكم تفرقون بينها وبين الهنوف

سند : احلف لتس بـ ايش اني احيان انسى ان اميره اختي من ابوي والله غلاهن واحددد وكلهن عينين في راس

الجازي ماسكه يديينه : ذا والله من طيب خالتي اللي ربتكم على الرحمه والحب لو وحده ثانيه اللحين مخليه اميره تشوف الهوايل

سند : والله ما قد فرقت بيننا امي تعاملها زي ما تعاملنا بالضبط ويمكن احسن بعد

الجازي : ياروحي يا خالتي والله ما بستغرب ما انسى خوفها امس على اميره بس الف الحمدلله ان ربي طمنا علييها

سند تنهد بتعب : الف الحمدلله

الجازي أمالت براسها على كتف سند وهي تحس بتعب طفيف يزورها هالأيام شافته يناظر لجواله وكأنه مشغول بشي : وش اللي تشوفه

سند زفر بضيق : يعني ايش لازم اعطيتس احصائيات عن كل شي اسويه

الجازي رفعت راسها عن كتفه : انت ما تقول لي شي عشان تعطي احصائيات ، ما كملوا كلامهم لمن شافوا الوليد ماسك تميم مع يده وهو نعسان كان شكله ياخذ القلب منجد ..

الوليد وقف قدام امه و ابوه : ماما تميم نعسان وانا قلت له لا تنام وانت ما اكلت

الجازي ابتسمت : شاطر يا ماما ، ناظرت لـ سند ، يالله اخذ عيالك يتعشون انا رايحه للحريم

سند : يشيييخه اشتغل عندتس انا

الجازي بدلع : تكفى والله تعبانه مالي حيل ، قامت وبحركة سريعه ابعدت عنهم وتكلمت وهي تضحك : خلهم ينامون عندك الليله بالمره والله تعبانه ترا

سند وقف بعصبيه وقبل يمسك يدها شافها ابعدت عنه بالحيل : هييين

الوليد ناظر ابوه بملل : بابا هنا الشبكه مره زفته

سند رفع تميم : وشسوي اجيب لك البرج بالبر يالله اتركوا عنكم الجوالات تعالوا شوي يحطون العشاء ، كان شاد على يد الوليد بغضب ..

الوليد : بابا عورتني

سند انتبه لنفسه : ما انتبهت يابابا حسبي الله عليتس يالجازي

الوليد : لا تدعي على ماما

سند ناظر له بغينه وسكت لمن قربوا من بيت الشعر حق الرجال ..

—

اميره منسدحه على السرير وهي تعبانه للحين بس أحسن من اول بكثير ..

ام سند تحاول بـ اميره تكمل عصيرها : اشربيه ما عاد بقى شي

اميره تحس تبي تستفرغ : يمه تكفين خلاص احسس بستفرغ

فيصل : اميييره ترا ما كليتي شي ولازم تاخذين حبوبتس

ام سند : خلاص لا تكملين اكلتس بس اشربي هالعصير يالله عشان العلاج

اميره شربته بصعوبه : ما احسس بطعمه

فهد اللي منسدح على الكرسي وهو تعبان : طبيعي من الحراره يالله اشربيه خلينا نلحق ع العشاء

الدكتور يطق الباب

فيصل : لحظه دكتور

قام وحط طرحة امير على وجهها وهو عافسها

اميره عصبت : يا حيوان كتمتني عدلها

فيصل : انطمي دقايق ويطلع الدكتور

اميره نزلت الطرحه بعناد : انقلع بس

فيصل رجع الطرحه : خلييها

ام سند : يا ولد ابعععد عن اختك مرضانه

اميره عصبت : يمممه لبسيني النقاب

ام سند لبست اميره النقاب وعدلت شكلها

فهد : ادخل دكتور

الدكتور : السلام عليكم

الكل : وعليكم السلام

الدكتور : كيف حالك اميره

اميره تحس ودها تمسكه وتلعن شكله : بخير

الدكتور : تحاليلك كلها كويسه يا اميره

ام سند : الحمدلله

الدكتور : يلا اللحين بكتب لك خروج لكن انتبهي لـ اكلك وخذي ادويتك بـ وقتها

فهد : ان شاءالله يا دكتور

الدكتور : واحد منكم يجي معاي يصرف لها العلاج

فهد راح مع الدكتور ..

ام سند وقفت وهي تجمع الاغراض وحطتها على الطاوله اما فيصل جلس اميره وحط ورا ظهرها المخده

اميره ما تقدر ترفع يدها زين : عدل نقابي

فيصل جالس يعدل نقابها وهو يضحك : وشذا يمه تعالي شوفي كذا صح

ام سند : الله يعطيك العافيه شعرها كله طالع

فيصل دخل شعر اميره بالعبايه

اميره بتهديد : ليه تضحك يا تبن ياويلك لو لاعب بشكلي

فيصل مبتسم : لا بالعكس خليتس غزاله تعالي وقفي

، اميره وقفت بصعوبه بمساعدة فيصل فيصل تركها وطاحت على السرير ، فيصل يضحك

اميره عصبت : وجع ان شاءالله

فيصل : عشان تعرفين انتس بدوني ولا شي

ام سند جت معصبه وهو تضرب فيصل : بعد عن اختك

فيصل : يمممه تلعبين حديد ماشاءالله عليتس

اميره : تستاهل بس خل ترجع لي صحتي واوريك النذاله

فيصل : لا تخليني ارمي علاجتس بالزباله ( تكرمون )

اميره : تعقب ما تقدر بروح اركب السياره جاتني ضيقه

فيصل : تعالي اوديتس

اميره : انقلع بس ، ومسكت يد امها وهي تحس بتعب تبي تستند على شخص اكثر ثبات وقوه ومسكت يد فيصل ، اسكت

فيصل ضحك : طيب طيب امشي يلا

ام سند ماسكه يد اميره

فيصل : يمه البنقالي ذا يقول انتس تناظررين له من اليوم يشكي منتس

ام سند : اخيييه منتهي انت

فيصل : ترا بعلم ابوي عاد ابوي موصيني عليتس يقولون الرجال لا كبر مدري شيصير بعقله يرجع للمراهقه

اميره تضحك : فيصل يا مريض

ام سند : وينه ولدي بس

فيصل : منهو فهد

ام سند : ايه ذا هو ولدي

فيصل : ذا ماهو بنافعتس ذا يشوفنا اللحين سرير

ام سند : والله كلنا ندور للنوم

فيصل : ايي والله

فتح لهم السياره وجلست امه ورا واميره بجنبها بس سانده راسها على كتف ام سند ..

—

نوره كانت لابسه جاكيت ابيض طويل أنيق جداً مع لبسها وفاتحه شعرها ومتعطره وحاطه روج ومسكرا وعطرها منتشر بكل المكان ..

سهم مشى لين وصل للمكان اللي هي وصفته له وشافها واقفه تناظر له لين قرب منها : مساء الخير

نوره شافته واقف بهيبته المُعتاده متلثم ولابس فروه وراحت له بخطوات سريعه لمن اقترب منها وحضنته بقوووه وهي مشتاقه له : مساء النورر

سهم يمسح على شعرها : شخبارتس

نوره : مو بخيييير

سهم بخوف : وشفيتس

نوره بحزن : شفت اللي صار لـ اميره

سهم : اييه كلنا انفجعنا عليها ولو شفتي شكل عمي قسم يكسر القلب

نوره : كيف ما لقيتوها وانتم كثييير

سهم : بعيييده بعيده مدري كيف راحت هناك والله انها قويه

نوره بغيره : اقول لا تمدح بس

سهم : اسفين

نوره بخوف : سهم تكفى مابي انام بروحي احجز لنا بفندق

سهم بصدمه : كييف ما اقدر

نوره : تكففى ابوي ما عنده مشكله

سهم ضحك : ابوتس لو على كيفه هو نام بفندق

نوره ضربته بمزح : حدك عن ابوي

سهم : والله مقدر يا حبيبتي الشيبان بينقدون علي

نوره : انت وين بتنام

سهم : مع الرجال يعني وين بنام

نوره : وانا

سهم جات بباله فكره : اوصي عليتس احد

نوره بعدت عنه وقالت بعصبيه : تدري الشرهه علي انا بنادي ابوي ابرك لي

سهم مسك يدها : انثبري بس ابوتس ذابحه النوم ينتظر العشاء وبينام مالتس احد غيري انا

نوره : طيب بالسياره

سهم : الله لا يضيق على مسلم شوفي الارض الوسيعه السياره وين بنام فوق الطبلون

نوره : خلاص سهم انا عرفت ان ما همك الا وناستك وانا بطقاق يلا بروح تبي شي

سهم مسك يدها : يابنت الحلال والله مقدر الرجال بينقدون عليي وبعدين الشيبان بيقومون قبلنا وبيشوفونا كل الرجال نايمين حتى سند المتزوج نايم هنا الا انا رايح هناك ما يصير

نوره عرفت انها بتنام بروحها ف قررت تقفل ذا الموضوع : طيب يلا لا جيت بيت ابوي لا تطلبني اجي بيتكم

سهم بعصبيه : بدييينا والله لو اشوف ذا الحركات لا ارجعتس للرياض

نوره بعناد : ما تقدر

سهم بعصبيه : الا اقدددرر تنامين الاحد بس ببيت ابوتس والاثنينن تجين عندنا

نوره انقهرت : سسهم وشذا التسلط

سهم بلعانه : جاتس العلم يلا تبين شي

نوره بعصبيه : مابي شي وماهو على كيفك كل شي يصير بأمرك الخلا بس

سهم ضحك : وشقلتي

نوره تتصنع القوه : اللي سمعته

سهم بخبث : الديره مليانه ذيابه انتبهي لنفستس بس و اتركي عنتس طوالة اللسان لا تصيرين مثل اختس

نوره : بالله وشفيها اختي

نوره بقهر : سهم ترا من اول تذب على اهلي وساكته عنك

سهم : والله ما قلت شي

نوره بعصبيه : من زين اهلك عاد انقلع بس

سهم ضحك : اشوفتس صرتي قويه خلاص يعني ما تحتاجيني ومره ثانيه لا تتصلين علي انا بس اللي اتصل

نوره مشت من عنده : شكراً على المسانده بروح يلا مع السلامه

سهم مشى وراها وهو فيه ضحكه ومسك يدها وحضنها : امزح والله خلاص

نوره تحس فيها صيحه زياده على خوفها يجي هو بدم بارد ويطقطق : اكرهك

سهم ضحك : من متى ماشاءالله

نوره بعصبيه : من اليوم

سهم : طيب اهم شي انا احبتس اسمعي جالسين يقلطون العشاء للرجال وانا طولت ترا الديره مابها شي لا ذيابه ولا غيرها واميره زعلت ومشت ولقيناها ذي ما تخوف يا روحي قوي قلبتس وماعليتس والحريم عندتس والبنات بعد معاتس وترا من اول موصي خواتي عليتس بدون ذا الكلام وجود حالفه ما تنامين الا بحضنها

نوره : بحضن من جود

سهم ضحك : اييه وصدقيني لولا الشيبان ما انتظرتس تطلبيني الطلب اللي طلبتيني اياه وتدرين ما احب اردتس بس مجبور

نوره رضت : اعرف

سهم : دام تعرفين يلا وريني عرض مقفاتس واتصلي وقت ما تبين انتبهي للجوال تسمعين و انتبهي لتس وتعشي

نوره : طيببب يلا مع السلامه

سهم حضنها وانتظرها لين وصلت وراح للرجال ..

عِند البنات اللي جالسين يسولفون وهم يطبخون ويشتغلون ويغسلون ..

المها : انا والله خايفه اطلع من ديرتنا مابي ابعد عن ابوي وامي متعلقه فيهم مرره

جمان : طيب عادي تجينهم كل شوي

المها : ابي اجيهم كل يوم مو كل شوي

امجاد : ذي مطلقه من اول شهر انا ما عندي الا محمد بس اصغر منتس ما ينفع شوفي لتس احد

الجازي : خلاص نزوجها سياف بينقل شغله هنا

المها بخجل : خييير انتم زوجتوني

جود جت هي والهنوف : من اللي تبي تعرس

جُمان تضحك : ندور عريس للمها

جود : لقيتوا

ريم : سياف

المها : ما اعرف عنه الا انه ولد عمي عبدالعزيز

الهنوف حضنت المها : لا مافيه يكفي خذيتوا اميره اتركوا لي المها

الجازي بضحكه : لا اعرستي عليه بتعرفينه وبعدين الزواج سنة الحياه والدور جايتس يا الهنوف

الهنوف : لا والله مابي بجلس مع امي

ريم بخبث تناظر للمها : وشتبين تعرفين ترا والله طيب ومثقف لايق عليتس حييل

المها قرصت ريم وهي منحرجه : خييير انتي اسكتي خلاص

ريم تضحك بصوت عالي : سكتنا

نوره جلست وهي مقهوره ومغبونه من سهم ..

جود تناظر لبنات ام سياف : العشاء ما بغى يستوي

ريم بتعب : والله تعبت

جود تناظر لـ نوره : والله اسفه ما اقدر افيدتس اليوم حضني محجوز

ريم بضحكه : لمين بس

جود خلت ريم تشوف جوالها كانت رساله من سهم مكتوب فيها ( خليتس مع نوره خايفه )

ريم تضحك وتناظر لنوره : ياعمري والله

نوره بأستغراب : وشفيكم تضحكون

جود ورتها الرساله وناظرتها نوره بطرف عين : انقلعي بس انتي واخوتس

جود بضحكه : مردتس لي

ملاذ جت : وشفيكم على اختي

نوره حست بـ امان لمن جت ملاذ : يحسبوني بموت لو ما فزعوا لي

جود مبتسمه : ماشاءالله بنتنا صارت قوييه وماعاد تحتاجنا

ملاذ : بنت شتبين بـ اختي ، وناظرت لنوره ، نوير وشتبي ذي السلقه

نوره : تبيني انام عندها تحسبني خايفه

ملاذ ناظرت جود بطرف عين : يعني تحميتس ذي بنفسها تبي لها اللي يحميها

جود : لا لا حدتس عاد ترا انا متعوده على النوم بروحي لكن لا تخربين على اختس ترا بتنكد عليتس تالي الليل كل شوي مصحيتس

ملاذ : الخلا بس اختي مي بحاجة خدماتس انا عندها بتنام عندي

نوره تدري ان ملاذ اذا نامت ما عاد تنتبه للي حولها : لا ابي جود

ملاذ صرخت : وجععع ان شاءالله طسي لها يالخايينه

جود جت تركض ومسكت نوره وهي تضحك على ملاذ : كفوووو ايي خلييتس كذذذا لحظه بطمن سهم على هالخبله مع جود مافيش خوف

ملاذ : امحق والله بس تدرين سويتي فيني معروف انا عاد كل شي الا النوم مقدر اضحي فيه

جود : شفتي يا نوير مالتس احد غيري

نوره : خلاص يا حمير ذليتوني على ذا الفزعه الخايسه ملاذ شافت سيارة جايه صوبهم : بنات امييره جات

المها و الهنوف مشوا بسرعه وراحوا للسياره ، نزلت اميره بمساعدة فيصل ، ما تبي توصل ما تبي تحط عينها بعين أبوها اكثر شخص ما تبي تلمحه ما تبي تضعف ابد وهي اللي اصلاً ماعاد بها قوه الحراره هدت حيلها ..

الهنوف جت من بعيد تركض وهي تحضن اميره بقووه : يامرحببببا والله الله يحيييها

ام سند مبتسمه وتناظر لـ بناتها

المها جايه تركض : يهلا والله اشوف الدنييا نورت طلعت امور هنا

اميره مبتسمه : بس بس لا يكبر راسي واشوف نفسي عليكم

فيصل يناظر لـ خواته : هذا علاجها تاخذه بعد العشاء ماهو تسولفون تنسونها

ام سند تناظر فيصل اللي تعب مع اميره بالحيل : يا يمه ماعليك لا تشيل هم حنا معاها

فيصل ناظر لـ اميره : العلاج تاخذينه خمس ايام مو تسحبين

امييره : طيببب

فيصل ناظر للهنوف : روحي هاتي لها جاكيت ثقيل يلا

الهنوف راحت وفيصل ماسك اميره وواقف

اميره تحس بتبكي : ييممه تعبانه

ام سند مسكتها : بسم الله عليتس يا يمه هاللحين ادخلتس داخل

اميره بتعععب : ابي اناااام بس مابي شي

فيصل : انا شقلت العشاء تتعشين وتاخذين علاجتس يخفف عنتس الحراره والصداع

ام سند : هي كذا الحراره تهد الحيل

الهنوف جت ومعاها الجاكيت ولبسوها اياه ودخلوها داخل بالخيمه ..

امَا فيصل لمن تطمن عليها راحح للرجال هو وفهد ..

ودخلوها البنات بالخيمه وهي تعبانه ما تقدر تمشي بروحها الهنوف حطت ورا ظهرها مخده وجلست بجنبها

ام سياف : ما تشوفين شر يا يمه الحمدلله على سلامتس

ام سهم : الحمدلله على السلامه عفستي قلوبنا

اميره بتعب واضح : الله يسلمكم

والبنات كلهم جو وتحمدوا لها بالسلامه

جود حضنت امييره بقوووه : الحمدلله على السـلامه يا مرحبا والله ببنيتنا

اميره مبتسمه : الله يسلمتس

جود جلست بجنبها : وشخبارتس

اميره : بخيير الحمدلله

البارت التاسع

بعد ما تعشوا الرجالل وانقضت ليلتهم الحزينه على أتم وجه نام ابو سياف وبجنبه ابو سهم الا هو ما قدر ينام رغم ان الجو مُناسب جداً للنوم طلق ويشرح الخاطر العليل والليل ما يخالطه نور يجفي النوم من العين والارض فاتحه له ذراعها كالعاده والقمر نوره يشيل الوحشه عن الصدر جالس على فراشه بعد ما رتبوه له عياله وقلبه ياكله بندم شديد هو حتى لو يلمح أبتسامتها على طرف شفايفها يعلم يقيناً انه أذاها او على الاقل كسر جزء كان يثق فيه ويحبه هو حتى لو يسمعها تسولف وتضحك وتسوي نفسها ناسيه وان اللي صار حدث يومي عابر تخطته يعرف انها للآن عالقه في شعورها الدائم بالوحده عالقه في عتمة الظلام في برودة الليل القاسيه في الضياع المستمر في الحزن الطويل في المعاناة العنيده ما لها لا ارض تحتويها ولا سماء تغطيها ولا شمس تدفيها ولا قمر ينور لها دروبها هي بنته اللي تسوى عيونه اللي ما سمحت له اطباعه البدوية الصعبة اللي ورثها من ابوه واجداده انه يعبر بشكل مبالغ فيه عن حبه لها هي تحبه ومستعده تفديه بروحها لكن الثقه لا راحت ولا اختل توازنها وش يرجعها الامان كيف نحصل عليه بعد ليالي القلق والمعاناه موقف صغير تافه جداً يهدم سنوات من الحب والثقه والأمان موقف بيعلمك انك لست شخص مُنزه لتحضى بكل هذا الدلال والاهتمام والحب ..

رفع عيونه ابو سند وناظر لـ ولده : فيصل

فيصل راح لـ ابوه : سم يبه

ابو سند بهدوء : كلم امك تجيب لي اميره ابي اشوفها واتطمن عليها قبل انام

فيصل طلع جواله : ابشر لحظه

ام سند جالسه على فراشها تسبح وتستغفر وهذي عادتها قبل تنام ودقايق الا جوالها يتصل قامت وطلعت برا عشان تسمعه زين : هلا يمه

فيصل : يمه ابوي يبي يشوف اميره يبي يتطمن عليها ولا عليتس امر هاتيها بمكان حنا جايينكم

ام سند : زين اجل تعالوا عن الخيمه غرب ذا مكان محد يجيه

فيصل : تمام يلا

ام سند راحت للخيمه ولبست عباتها ونقابها وناظرت لـ اميره اللي منسدحه بفراشها والهنوف عندها: اميره

اميره : سمي

ام سند : ابوتس يبي يشوفتس

اميره : انا بخير

ام سند : ابوتس جاي امشي معاي يلا يبي يشوفتس هو جاي اللحين

امييره ما تبي تشوفه ما تقدر تحط عينها بعينه بعد اللي صار مجروحه منه لـ ابعد حد كيف يضربها بهالوحشيه قدامهم وكأنها ما هي بنته ولا هو ابوها : طيب

الهنوف : بجي معاكم

ام سند : بكيفتس

ومشوا ام سند واميره والهنوف للمكان اللي حددته ام سند اميره تحس بتطيح بس متماسكه : يمه بجلس مقدر اوقف

ام سند جلستها : ارتاحي

اميره وقفت بسرعه لمن شافت ابوها جاء ما تبي تبين له انها موجوعه ..

الهنوف بصدمه : بنت وشفيتس قمتي كذا

اميره بحده : مو بـ لازم اشرح لتس كل شي اسويه

ام سند ناظرت لـ اميره بضيق : لا تشيلين على ابوتس

اميره ابتسمت : ليه هو وشسوا

ام سند : لمن ضربتس قدام اخوانتس لا يكسرتس هالشي

اميره : لو بنكسر قدام احد ما ضعت بالخلا تالي الليل

ولسان حال قلبها لخصه مساعد الرشيدي الله يرحمه :

قولي لهم يا عزوتي ما عابنا موت النخيل

‏اللي يوفيها الأجل و تموت .. لكن واقفة

في نهاية اليوم احنا مجبورين نوقف مجبورين نستر ثقوب روحنا برداءات مُزيفه وليس شرطًا انها مقاس ارواحنا مجبورين نمشي بقوتنا اللي اعتادوها الناس محبورين نوقف رغم حروبنا النفسيه والجسديه القائمه ..

يتبع ,,,,

👇👇👇

تعديل المقال