رواية عودتني كل يوم اسمع انا صوتك -22
احب صوتك و محلا رنت الهاتف ... لي من جداكم حبيبي صدق تسعدني
و محلا حديثك معايه يوم تتعاطف ... كل متى حبك من الخاطر تفرحني
همسات صوتك و نار الشوق بي عاصف ... متى حبيبي بك الأيام تجمعني
اكف دمعي و دمع العين بي ذارف ... اخفي دموعي و دمع العين يفظحني
احبك انت حبيبي و انت بي عارف ... من غيرك انت بهمساته يسامرني
أخذت قلبي و ليتك بالقلب رايف ... انت مريحن و انا عيني تسهرني
احب صوتك و محلا رنت الهاتف ... لي من جداكم حبيبي صدق تسعدني
أحمد:وسلمتوا .....
مبارك : ما فيك حيله يا بو شهاب ..أكيد هذي القصيدة لي ....
أحمد:لا والله ...لغرشوب غيرك ...
مبارك:افاااا ..نحنا ما ندري عنه
أحمد:سر يا طويل العمر ...
سالم:صح لسانك ....
أحمد:صح الله بدنك .....
سلامة ميتة قلبها وروحها عند أحمد....وتقول في خاطرها : ياويل قلبي منك .....والله من أسمع صوتك أتعذب أكثر ...
وسكر مبارك من أحمد..........وتم يالس عند هله ......
أم محمد:مبارك
مبارك:لبيه...
أم محمد:لبيت حاي منهو هذا أحمد ما عرفته ......
مبارك:هذا ولد سيف الخييلي ....
أم محمد:اه ....عرفته ....سلامة هذا أخو ربيعتج سارة ....
سلامة:هيه أماية .........
مبارك وهو مستغرب :قولي والله يا سلامة....
سلامة:والله العظيم ...هذا أحمد أخو سارة ربيعتي ....
مبارك:لا ...ما أقدر أصدق ...
أم محمد:ليش ماتصدق ....
مبارك :ماشيء ....وراح عنهم ....
طلع مبارك من المستشفى وكل تفكيره بهذي الصدفة ......((الحين صدج سارة أخت أحمد .....الحمد لله أني ما خبرت أحمد أني أحب بنت أسمها سارة ...وساكنه ورانا ....وهي ربيعت أختي ..والله أنه راح يذبحها .....لا حول ولا قوة كيف القدر جمعنا مع بعض ....والله أنها صدفة عجيبة وفي نفس الوقت حلوة))
.................................................. .................
الساعة 10 ونص فالليل
العنود يالسة هي واليازية في حجرة اليازية ........
العنود:تصدقين اليازية ....
اليازية:شو ...
العنود:مبارك إنسان عجيب يا حظها اللي راح تأخذه ....
اليازية:إنسان عجيب بس فيه عيب واحد ....
العنود:شو
اليازية وهي تضحك: هههه ما يستقر على وحدة ....
العنود:ما فهمت عليج ....
اليازية:يالبقرة ....مبارك مغازلجي وكل يوم عند وحدة ...
العنود:عادي ما فيها شيء ...خليه يستمتع بشبابه لاحق على عوار الرأس .......
اليازية: خلينا من مبارك .....علومج أنتي ...
العنود:علومي ما تسر .....
اليازية:افاااا ليش ...
العنود:أنتي تدرين كله من أخوج سالم ....
اليازية:عني أفداء عينه ....
العنود:تصدقين اليوم ما أرسلت له ولا مسج ....
اليازية:ليش .....
العنود:كنت أعابل في المطبخ الفوالة ....وبعدين راحنا المستشفى ........والحين أنا عندج .....ما عندي وقت ....
اليازية:أرسلي له الحين ....
العنود:أمممممم ....
اليازية:أمانة طرشي له من زمان ما شفت مسجات الغرام اللي بينكم ........
العنود:خلاص ....برسل له علشان خاطرج يا الغالية ...
سالم كان في ميلس محمد خويه ....يالسين على لعب بالورقة ...وعلى التلفزيون وسوالف وضحك .....
فها للحظة وصل مسج لسالم ..من سمع سالم بالمسج فتح وقراه وبعدين طلع برع .................
وهو توه بيطلع محمد:سالم وين رايح ....
سالم:الا في الدار بتكلم في التلفون وبرجع ....
محمد:خذ راحتك يا بوغنيم ..............
أرسلت له .......
"بهديك أنا عمر ولا كل الاعـــمار
يفني القلم قبله وتفني الصحايف"
رد عليها ...
"سلامي على اللي صان المحبة
سلامي على اللي فرقته صعبه
بعيد ويــــأكل ويشـــــرب معانا
عزيزي وصاحبي قلبي على قلبه"
العنود من قرأت المسج وهي متخبله على سالم :والله حرام اليازية ...تراني أتعلق فيه أكثر .....
اليازية:بعدين خبرينا بشعورج .....بس الحين أرسلي له مسج أكيد الحين يترياج ......
ردت عليه....
"في سواد العين لك مسكن
ياحبيب الروح يالغالي
كيف أنا بنساك لا يمكن
كيف دونك ينشرح بالي
نام يالمضنون واتطمن
الوفاء عندي ولازالي
لين روحي في القبر تدفن
والتعازي تيك عن حالي"
رد عليها ......
"لك حب صبح وفي المساء شيء ثاني
والله يسعد لي صباحك وممـــــــــساك
ماهمني من باعـــــــــني ومن شراني
لاصرت عندي كلها الناس تفـــــــــداك"
ردت عليه ....
"مساك الله بالخير يا شيخ الشباب ....اشحالك عسالك طيب ....والله أني مشتاقة لمسجاتك اللي تنور تلفوني "
رد عليها ....
"مساء النور والسرور ياشيخة المزايين ...أنا بخير وأن شاء الله أنج أنتي بعد بخير ... أنا اليوم تقول شيء ناقصني يوم ما أرسلتي لي مسج ....وأمانة لازم كل يوم طرشين لي مسجات علشان أطمن عليج ...ياشيخة شمسة "
ردت عليه....
"من عيوني يا سالم "
وتموا نص ساعة ومن بينهم المسجات ....وبعدين راح سالم صوب ربعه اللي في الميلس ....
في الصالة .....
سلامة يالسة تكلم سارة في التلفون .....
سلامة:أقول سارة ليش ما يتي صوبنا اليوم ........
سارة:والله أستحي منكم ...
سلامة:يالله عليج يا سارة ...من أسبوعين كنتي عندنا 24 ساعة شو اللي غير رايج .....
سارة:اممممممممممممممممممم!!!!!!!
سلامة مبوزة :أدري بس علشان مصالحج الشخصية .....
سارة:حرام عليج سلامي ...أول كان عند سبب مقنع يخليني أكون عندكم ...الحين شو السبب ...
سلامة:خلاص أنا بكلم أحمد علشان يخليج تين صوبنا ....
سارة وهي تضحك:هههه الحين أنتي الواسطة عندنا .......
سلامة:غصبن عن الجميع .....
سارة:ســــــــــــــــلامـــــــــــــي .....
سلامة:شو فيج لازم يعني تقطعين رمستي خليني أرمس عن أحمد ....
سارة:دخلتي النت اليوم ....
سلامة:من متى وأنا أدخله ....
سارة:موقع الوزارة يقولون باجر الساعة 10 النتايج ......
سلامة:آه آه آه بطني عورني .....
سارة:ههههههههههههه والله أنج بقرة .....
سلامة:أنتي البقرة ما أدري ليش واثقة من نسبتج اللي راح تيبينها ...........
سارة:سويت اللي علي والباقي على المعلمين اللي يصلحون الامتحانات ...
سلامة: سارة أنتي حطيتي رقم الجلوس مالج وأرسلتيه للرقم **** علشان يطرشون النسبة لج أول ما تعتمد النتايج من الوزارة....
سارة:هيه ...
سلامة:من سوالج ....
سارة:أحمد ...
سلامة وهي تصارخ :ياسلام وأنا ليش ما يسويلي ....
سارة:ارتاحي أنا عطيته رقم الجلوس مالج .....
سلامة:ليش هو ما طلب رقم جلوسي ....
سارة وفيها ضحكه :لا ...
سلامة:نذل ...
سارة:ايه لا تسبين أخوي ,,,,,,,,
سلامة:لا والله ........
سارة:والله أنه طلب مني رقم جلوسج وجلوسي وأرسله من تلفونه ........ والنسب أن شاء الله بتوصل على تلفونه .....
سلامة:عني أفداء عينه ...وروحه وقلبه .....
سارة:الحين أنتي تسبينه .....
سلامة:كذابة أنا ما سبيته ......
سارة:أوكيه ...أنا بقوم الصبح بدخل النت علشان أشوف النتايج .......
سلامة:أنتي بتدخلين النت ....خلاص بحاول أن شاء الله أنا بقوم من الصبح و بدخل النت .........
سارة:خلاص سلامة شيء في خاطرج .........
سلامة:ليش بتسكرين شو وراج .........
سارة:ما شيء بس بروح أشوف التلفزيون ...........
سلامة:أوكيية مع السلامة .....
سارة :الله يحفظج وسلمي على نور عيني مبارك .....
سلامة:أن شاء الله وأنت سلمي على شيج المزايين ......
سارة:من عيوني باي ...
سلامة:باي ...
&*((الجزء الخامس عشر))*&*
البنات ((اليازية والريم وسلامة اللي تتريا النتايج على أحر من الجمر و العنود بنت عمهن من بدت الا جازه و نومهن متلخبط .. ساعات اتمين مواصلات ا
للين الصبح و ساعات تنامن اللين المغرب و ساعات الساعة 6 الصبح تنشن)) ..
فالليل الساعة 1ونص .. كانت الريم وسلامة واليازية و العنود سهرانات فالصالة.. و مندمجات على فلم المصري الجراج (الام اللي تبيع عيالها لانها ما عندها فلوس علشان تعيشهم وتصرف عليهم ).....
دخل مبارك عليهن فالصالة .. مبارك و هو خاطف عنهن بيروح حجرته و لا افتر صوبهن : السلام عليكم .....
و ما ردن عليه .. جان يوقف و يشوفهن .. و هن في عالم ثاني .. و كان الفلم في نهايته و شافنه مية مره و مع هذا لازم يصيحن فالنهايه ..
مبارك و هو يصارخ : ريموووووووووووووووووووووووووووووه ..
فزن من صريخه ..
الريم : بسم الله شوفيك ....
مبارك : عنلاتكن .. من ساعة أرمسكن و لا هب عاطياتني ويه ..
الريم : شو تبى ....
مبارك و هو ييلس بعيد عنهن : ماشي ..
الريم : سبااال .. و جان تفتر و اتشوف الفلم .. و اندمج مبارك اوياهن و كل شوي يسألهن ..
مبارك : منو هذا الي عندهم .... اللي ما يتكلم !!!!!!!!!
الريم : اففففففففففففففففف ..هذا خال العيال !!!!!!!!
مبارك:هيه .....
خلص الفلم و مع هذا تمو متيمعين عند التلفزيون و يقلبون من قناه لقناه .. عالساعه 2 وربع الصبح .. كان سالم توه ظاوي البيت راد من ميلس محمد الكعبي ................
و لقاهم فالصالة ......
سالم :السلام عليكم .........
الكل: عليكم السلام .......
سالم:علومك مبارك وين راحت ....
مبارك:الا في الدار ............
سالم وهو يتشوف في خواته وفي العنود :أنتن شو مسهركن حتى الحين ........
مبارك:هذيلا ....وهو يأشر على خواته و العنود ............نايمات النهار كله .....والليل صاحيات تقول بوم ....
سلامة: لا والله .....نحن ما صدقنا حتى المدارس تسكر علشان نسهر الليل كله والنهار نايمين ..................
مبارك:بقر ......
الريم:من بقر .....
مبارك:من غيركن(( وأنتي البقرة الام)) ..........
الريم:ما حد راح يضحك .........
مبارك وفيه ضحكه :وأنا ما أتريا منج ابتسامة يا ست ريم .........و قسم بالله أنك مثل حديقة الحيوانات ........
اليازية:شوووووومنو حديقة حيوانات !!!!!
مبارك:سالم ... شوف .. اذا تبى تعرف البنت ع حقيقتها .. سبها.. بتشوف المستحى و الرقه العدله منهن ...
العنود : عاد انت خبره في ميادين البنات و سوالفهن ..
مبارك : انا .. فديتني و الله .. شوفي انا البنات يربعن ورايه الا انا .. ( و هو يرفع رأسه فوق ) ما تنزل لبنت لو منو ما كانت .. ...
اليازية:يالله نحنا صدقناك ....يا مبارك....
مبارك:ليش ما تصدقين يا بعد قلبي ......
اليازية :خلاص غير الموضوع ....
مبارك:الموضوع مثبت ههههههههههههههههههههههههه ....
اليازية:سخيف ....
سلامة:اقول سالم سمعت عن النسب ....
سالم:هيه ...
سلامة:شو سمعت ...
سالم:باجر أن شاء الله بتعتمد عليهن الوزارة ..............
سلامة وهي تدعي ورافعة ايديهنا تتطلب ربها :يارب يب نسبة كبيرة وأرفع رأس أهلي أنا وسارة ربيعتي ...
مبارك:آمـــــــــــــــــين .....
سلامة:مبارك أخي الحبوب ...سالم أخي الغالي ,,,,,وأخوتي العزيزات ....وبنت عمي الموقرة ....أستقبل الهدايا من يوم اليمعة بأذن الله ....
مبارك:فالج طيب ...
سلامة:فالك ما يخيب يا نور العين ......
سالم :مبارك ....اشوف سيارة أحمد في الحوش ليش ........
مبارك وهو يضرب رأسه :والله أني نسيته .......
سالم:هو وينه الحين .....
مبارك:في الميلس .....نسيته وأنا يالس أطالع التلفزيون ما فيني حيله وتلفوني ما فيه جرج ... تلاقه الحين يتصل ويحصله مغلق أكيد الحين ميت قهر ..
مبارك: المهم عن هالهذربان .. روحن أنتن سولنا سندويجات و عصير ..
اليازية: مافينا .. طالع الساعه كم ..
مبارك: شو ما فيج .. ريال عندي نشي ..
الريم : و منو هذا الي مايستحي الي ظاونك الفير ....
مبارك: جب جب جب هذا احمد.. خويي الروح بالروح لا تسبينه ....
سلامة فز قلبها من طرى اسمه .. ياربي .. مب قادره تسيطر ع دقات قلبها .. احمد ..!!.. يالله فديته .. من متى ما شفته...
العنود: فالك طيب يا مبارك ..
مبارك: يا ويل حالي على الناس الطيبة .. سلامي عليج يالعنود أنتي غـــــــــــــــــــــــيـــــــــــــــر!!!!
و ظهر عنهم مبارك .. و سلامة مرتبشه .. يالله .. احمد ..
راحن البنات كلهن صوب المطبخ و سون السندويجات و العصير .. و العنود شلت صنية العصير و سلامة شلت الصنيه الي فيها حرارة السندويجات و ظهرن فالحوش بالصياني .. و اتصلت سلامة من تلفون اليازية بمبارك ..و طلعلهن مبارك .. و راح صوبهن .. و سلامة تعمدت انها تمشي صوبه .. عشان تقدر اتشوف أحمد من قريب أكثر .. و كان أحمد منسدح ع الكرسي و يتكلم فالتيلفون .. و كان يلعب بأيده اليسار بسماعة التيلفون .. مره يقربها من ثمه و مره يبعدها .. و سلامة تشوفه و بتموت .. فاللحظة .. ظحك .. و هي من شافته و هو يظحك ماتت .. ماتت من شكله .. و في نفس الوقت .. ماتت من شي ثاني .. معقوله يكون يكلم وحده !!!!..
مبارك وهو يشل الصحن : سلمتي يابنت حمد .. ننفعج في عرسج ..
سلامة وهي تغمز لمبارك : و من قال عسى ..
الريم:يا سلام مو بس سلامة سوت ................كلنا سوين ....
مبارك وهو يضحك على الريم: ننفعج في عرسج يا ست ريم أنتي .....واليازية و العنود أن شاء الله
سلامة يوم كان مبارك يكلم الريم كانت ترفع عينها صوب احمد و تنزلها .. يالله معقوله يكون يكلم بنت ..
تمين ترمسن مبارك وسلامة كل دقيقة تتخبر مبارك من شيء علشان تشوف أحمد أكثر .. ...
وتمت سلامة ع كل دقيقه ترفع عينها صوب احمد .. و الي ذبحها انها تشوف و هو يظحك و مستانس .. لالالا ماقدر استحمل هالوضع .. ..
اليازية: عنود خلينا ندخل ..
و افترت اليازية و راحت صوب البيت .. و لحقتها العنود والريم ..أما سلامة فكانت أخر وحدة فيهن دخلت البيت وكل شوي تطالع ورآها .........
ماقدرت سلامة انها تفكر و الا تنام ذيج الليله خوف من النتايج وشوفت أحمد ماخلتها تنام .. خلاص بموووت .. و الله اني احبه .. و هو سبال .. أمكن يغازل فالبنات .. عنلاته السبال ..
و العنود ردت البيت.. وخواتها راحن تنمن أما سلامة راحت و تسبحت و لبست بيجامتها و بندت ليتات حجرتها تبى تنام .. بس ما قدرت .. راحت و شغلة الاف ام ع مسجلها الصغير و حطت ع إمارات أف أم .. و تمت تسمع الأغاني .. و سمعت غنية ميحد حمد( ليش ما تنشد عن احوالي .. دامني انشد عن أحوالك ...و يوم انت يالغلا غالي ..لا تخلي مغرم ٍ هالك ..)
فها للحظه دخل مبارك عليها الحجرة .. و يتحسبها نايمه فتم يتسحب الحبيب و يسير صوب السدة اللي عدال السرير لأنه يدري أن فيها حلاوة .. يبي يأخذ له ...
سلامة : شو تسوي ....
مبارك و هو يفز : هب ..
سلامة : هههههههههههههههههههههههههههههههه ..
مبارك و هو يسير صوبها : شو أنتي ما نمتي ...
سلامة : لا ..
مبارك : سلامي يوعان .. نفسي في حلاوة ...
سلامة : لا والله ... و شافت الساعه اللي عدال سريرها و كانت توها أربع ونص الصبح ..
مبارك و هو يمط الفراش منها : شو تسوين ....
سلامة و هي اتظهر سماعة المسجل من ذنها : ماشي كنت اسمع الاف ام ..
جان يسمع مبارك .. و كانت غنية ميحد طال ليلي ..
مبارك و هو ايوول : هيه .. عاشووو .. عاشووو ....
سلامة : يالله بالعقل ..
مبارك و هو يغني و يأشر بأيده : و الا انا ميت ميت ٍ حيلي .. من مصابي الحب غربالي .. و طال ليلي من تعليلي .. و من تجافي خلي الغالي ..
سلامة : ههههههههههههههههههههههههههههه ..
مبارك و هو يفر المسجل فوق و يغني جان تنمجع السماعه من ذنيه ..
مبارك : الله يغربلها من سماعه ..
سلامة : نش الاذان اللحين بيذن ..
مبارك : انزين دخيييلج ..خبريني عن سارة علومه ليش ما تي صوبنا ....
سلامة:يسرك حالها .....ما تشكي من بأس ...
مبارك:ليش ماتي صوبنا ....
سلامة:تقول أنها تستحي ....
مبارك:ياويل حالي على المستحى ......تصدقين سلامة...
سلامة:شو .
مبارك: توني عرفت أن سارة أخت أحمد
سلامة:حسبتك تدري أنه أخت أحمد خويك .......ليش أنت متوتر أنته ما خبرت أحمد بشيء!!!!!
مبارك:لا والله .....
سلامة:ليش ما تخبره أنك تريد أخته على سنة الله ورسوله ..........
مبارك:بس أنا ما أريد أتزوج الحين ............حتى أخلص الكلية
سلامة:شو يعني ....
مبارك وهو ينسدح في السرير:والله أنا ما أدري بس أنا أخاف أقول لأحمد يفهمني غلط ..............
سلامة:شو يفهك غلط ....قول أنك شفته في بيتنا بالصدفة ...وحبيت أنه تكون زوجتك ...وخاصا هو أنه أخوها ...وهم من عايلة معروفة ونحنا نعرفهم عدل ....ما فيهم عيب.......
مبارك:الله يهديج شو شفتها بالصدفة .............تبينه يذبحها ....
سلامة:عيل شنو راح تقوله .....
مبارك وهو يقوم من مكانه :أن شاء الله ما بيصير الا خير ,,,,,,,,,,,
وراح مبارك عن سلامة علشان يصلي الصبح أما سلامة راحت توضأت وتمت تقرأ قرأن حتى أذن وصلت ونامت .............
بالخميس ع الساعه 11 الضحى .. اتصل محمد بسالم .....
سالم : الله حيبه ..
محمد : السلام عليكم ..
سالم : و عليكم السلام مرحبا الساع ..
محمد : شحالك بو غنيم ....
سالم : بخير يعلك الخير ..و من جداك ....
محمد: طيب طاب حالك ..
سالم : يا مرحبا الساع ..
محمد : بو غنيم ..
سالم : لبيه ..
محمد : لبيت حاي .. يايبلك بشارة ..
سالم : بشارة شو ....
محمد : ختك ..
سالم : بشر .. شوف جنها ما يابت نسبه اوكي .. أمره لا تطريها لي ..
محمد : لا ماشالله عليها بيضت الويه بنت حمد ..
سالم : هاه بشر ..
محمد : 96.8 %
سالم و هو مستغرب : حلف ....
محمد : هههههههههههههههه .. و الله ..
سالم : انزين و سارة .....
محمد : 93.9 الا مب متأكد من نسبة بنت يرانكم ..
سالم : ههههههههههههههههههههههه .. هب هينات هالبنات .. انا ماقلت بيفلحن ..
محمد : لا افا عليك .. بيضن الويه ..
سالم : برأيك عيل .. بروح أبشرهن ..
وسكر سالم عن محمد وراح صوب الصالة وحصل أمه وأبوه .....
سالم:السلام عليكم ...
الكل:وعليكم السلام ....
وراح سالم وسلم على أمه وأبوه وحبهم فوق رؤوسهم وبعدين يلس عدال أمه ....
سالم:علومج امايه متى يتي من مستشفى ....
أم محمد:يت الساعة 9ونص .....
سالم:بويه عندي بشارة ....
بو محمد:شو ...
سالم:طلعن النسب ....
بومحمد:بشر كم يابت سلامة ....
سالم:يابت 96.8%.....
أم محمد:حلف
سالم وهو يضحك:هههههههه والله العظيم ....................وسارة ربيعتها يابت 93.9%
راحت أم محمد وحبت سالم على خده وتمت تدعيله بالخير ..... أما سلامة نايمة و لا تدري عن شي ..
منيرة سمعت الحوار اللي دار في الصالة ...وبعدين ربعت صوب حجرة سلامة ..........
دخلت منيرة عليها ..وفتحت الباب على الأخر ....
منيرة : سلالالالالالالالالالامة .........سلالالالالالالامي ...
و سلامة دهمانه ..ناشه ع صريخ منيرة ختها : شو فيج ....
منيرة: سلامة مبروووك نسبتج 96% وشوي ....
سلامة و هي منصدمه : منو ..!!!!.. ..
و أن ام محمد داخله و هي ترمس فالموبايل و تصيح : فدييييييييييييييييييتها بنت حمد .. بيضت الويه ..
و سلامة بعدها منصدمه من الي تسمعه : شوووو .....
و أم محمد ترمس فالتيلفون .. و العرب مرتبشن .. و سلامة بعدها ما استوعبت الي تسمعه ......
سيف : غريبة .. جن سلامة الغبيه يابت 96 عيل انا الذكي كم بييب ....
وتم سيف يرمس عمره ويقول: لالالا لا .. في تطور فالعايله .. اذا سلامة يايبه 96 عيل أنا ممكن ايب %100 ..
سلامة و هي تفر شعرها عن ويهها : لحظه شو مستوي .......
و ان العنود ياييتنهم و هي تربع ..
العنود : ايييه .. منو قالكم .... حلفو أنكم ما تجذبون .... و العنود وهي تلتفت لسلامة : قسم بالله أنج يا بنت عمي ما فيج حيله طررررررررررر !!!!!!!!!!
اليازية واللي قامت على الصراخ: هاه بشرنا ....كم يابت !!!!
ام محمد : توه سالم مخبرني .. قال سلامة يابت 96.8 و سارة يابت 93.9
فها للحظه استوعبن الوضع .. و تمن يتصايحن .. و أنجلب البيت فوق تحت .. و التليفونات ما وقفت .. و الكل يبارك و يهني
وبعدين تسبحت سلامة نزلت تحت وسلمت على أبوها اللي بارك لها وكل أهل البيت بركولها .....
و سلامة راحت و سوت تلفون لسارة علشان تكلمها وتبارك لها ....
سارة من شافت الرقم على طول ردت عليه :ألف ألف ألف ألف مبروك يا سلامة ..
سلامة وهي بتطير من الفرحة:الله يبارك فيج وأنت مليون ألف ألف ألف مبروك وتستحقين الخير يا سارة ...
سارة وهي تضحك :هههههه الله يبارك في حياتج .... مانج هينة يا سلامة كسرت التيم .....
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك