رواية توأمي لكن انا غير ومالي مثيل وراسي عنيده -52
تنهدت لما شافتها تلعب معاه:اوووف سمور
سمر التفتت لسجيه:ادوي
سجيه وهي تطالع حسن وترجع تطالع سمر:يوم انك بتروحين لابو قذيله ليه ما قلتي لي
حسن بملل:حسن اسمي حسن
سجيه:يا شيخ كله واحد
حسن:لا مو كله واحد اسمي حسن
سجيه:تكفى عاد عرفنا ان اسمك حسن
شافهم واقفين مع بعض وكانه ما صدق صفق بيديه وبسخريه:حلو حلو يا سلام على المنظر
التفتوا له وانتشر على وجه حسن البرود والكره بنفس الوقت
سجيه وهي تطالعه وساكته
سلطان:يا سلام واقفين وسوالف لها الدرجه وصلت معاكم
سجيه بعصبيه:انت هيه وش تخبص
سلطان:انتي اللي وش تخبصين واقفه مع واحد مو محرم لك
تو سجيه بترد الا سكتها حسن اللي قال:ومن قال اني مو محرم راح اصير محرم لاني بخطبها
سجيه طالعته وبتفاجا:ها
سلطان بعصبيه وهو يقرب ويواجه حسن:ما راح تصير محرم لها لان انا اللي باخذها
سجيه وهي مو مستوعبه:ها
صارت تطالع الاثنين اللي كل واحد يطالع الثاني بتحدي وكره وهي بينهم ضايعه ومو مستوعبه اللي يصير
&&&&
توامي لكن انا غير ومالي مثيل وراسي عنيده
لهنا اوقف واترك لكم حرية التعليق
حبي وودي لكم
قلب امي وروحها
&
توامي لكن انا غير ومالي مثيل وراسي عنيده
البارت الثلاثون الجزء الاول اتمنى ينال اعجابكم
جالسه عندها وهي تحط يدها على جبينها وبهمس:ياربي راسها حار
رفعت يدها وهي تشوف راسها وعلامات التعب منتشره على وجهها
هبه بخوف وهي تمسح على شعرها:بسم الله عليك
دخل وهو يطالعهم وبخوف:ها احسن الحين
هبه وهي تطالعه:لا وش نسوي يا يامن
يامن وهو يطلع مفتاح سيارته :يله بناخذها للمستشفى
مد مفتاح السياره لهبه:افتحي باب السياره وانا بشيلها وبلحقك
هزت هبه راسها بخوف وخذت المفتاح وتوجهت طالعه من الخيمه لسيارة يامن
فتحت الباب وثواني الا تشوف يامن جاي جهتها وهو شايل سوسن وسدحها في المرتبه الخلفيه وبهمس:يله اركبي خلينا نويها المستشفى بسرعه
هبه :طيب بس اعطي اهلي خبر
هز راسه يامن وهي توجهت لاهلها تقول لهم
في جهه ثانيه
جالسه عند النار وتلعب بالرمل وافكارها سارحه لبعيد وتفكر في المستقبل والماضي يطغي على المستقبل في افكارها
حست باحد تسند على ظهرها لفت وجهها شافت سجيه سانده ظهرها وصاروا الثنتين معطين ظهورهم لبعض
امجاد وهي تلمح وجه سجيه متغير وبهمس:وش فيك
سجيه وهي تنزل عيونها:ولاشي
امجاد وهي تطالع الرمل اللي بين يديها:كذابه
سجيه بعصبيه:انطمي ترى مو رايقه لك
امجاد:مدامك معصبه هجل فيك شي
سجيه تنهدت وسكتت
امجاد سكتت تعطي سجيه فرصتها وبعد ثواني:انخطبت
امجاد وهي تلف وجهها نص استداره:نعم هذي مزحه من مزحاتك
سجيه:لا والله من جدي
امجاد عقدت جواجبها وباستغراب:كيف ومن و...
قاطعتها سجيه:سواق الطياره ولد عمة بانه
امجاد سكتت وهي متفاجاه
سجيه وهي تلف وتطالع امجاد اللي تطالعها:وش فيك صرت طرماء
امجاد:متفاجاه يعني ما توقعت انه بيخطبك و..
قاطعتها سجيه:وابو قذيله بعد
امجاد اللي ما استوعبت:وش فيه
سجيه وهي تنزل عيونها:هو بعد خطبني
امجاد وهي تطالعها ببلاهه:ها من
سجيه بعصبيه:يووه امجاد لا تفهين مو وقت غبائك
امجاد وهي تحاول تسوعب:الحين حسن وسلطان خطبوك انتي
سجيه:ايه
امجاد:اثنينهم
سجيه بملل:ايه
امجاد وهي تحاول تفهم:وش لقوا فيك
سجيه بعصبيه:مالت عليك اصلا كل الزين فيني
امجاد تنهدت بابتسامه:امزح هدي طيب
سجيه هدت وهي تزفر
امجاد:قولي لي وش صار
سجيه:ابد تهوشوا قدامي كل واحد يقول هي لي كاني لعبه بينهم ولا جائزه يبغون يربحونها قمت تركتهم ورحت وهم يتهاوشون
امجاد وهي تطالعها برفعة حاجب:كانك مو راضيه
سجيه :طبعا مو راضيه يعني يتهاوشون كانهم بزران وكل واحد يتكلم علي على كيفه لها الدرجه انا رخيصه
امجاد اللي ما فهمت:وشو رخيصته وش قصدك
سجيه:قصدي لو جادين كان قال كل واحد لامه كان اخطبوني مثل ما ينخطبون باقي البنات ولا انا اقل منهم
امجاد:انتي معترضه لانهم ما جابو امهاتهم
سجيه وهي تهدا وتنزل عيونها:ايه لاني حسيت اني مو كفو اني احس مثل ما يحسون باقي البنات حسيت اني اقل من غيري من البنات
امجاد وهي تمسك يد سجيه:انتي مو اقل من احد وهم اكيد راح يعطون خبر لامهاتهم ولا كيف بيخطبونك
سجيه :اصلا ما افكر باحد منهم
امجاد وهي تطالعها:طيب ليه تبغين امهاتهم هم اللي يخطبونك
سجيه:علشان احس باني بنت استاهل ابسط الاشياء
امجاد سكتت وسجيه سكتت بدورها هي الثانيه
تنهدت امجاد :طيب لنفرض انهم جابوا امهاتهم وخطبوك هم الاثنين رسمي ما فكرتي بيخطبونك من مين
سجيه طالعت امجاد وسكتت
امجاد:ها اشوفك سكتي
سجيه:راح يخطبوني منك
امجاد طلعت عيونها وباستغراب وهي تاشر على نفسها:انا
سجيه:ايه انا ما اعرف احد غيرك انتي وولد عمك
امجاد ابتسمت:طيب وخطبوك منا ما فكرتي في سالفة ولي الامر
سجيه بعصبيه:يووه منك اذا جاء وقت الجد يصير خير
امجاد :طيب راح يظل رايك مثل ما هو راح ترفضون الاثنين
سجيه سكتت وهي تفكر
امجاد وهي تطالعها بنص عين:اشوفك ساكته وتفكرين
سجيه:تصدقين لو اقولك مدري
امجاد:فكري مدام عنك وقت لان من كلامك حسيت ان الاثنين جادين
سجيه هزت راسها بطيب وسكتت
ثواني ورجعت رفعت راسها لامجاد اللي رجعت تلعب بالرمل وبهمس:وانتي وش فيك
امجاد وهي تطالعها:مافيني شي
سجيه وهي تطالعها بنص عين:ايه صح صدقتك مو كاني اعرفك يله قولي مثل ما قلت لك
امجاد وهي تتنهد:انا بعد مثلك
سجيه وهي تحاول تفهم وبشك:مثلي شلون يعني
امجاد:قال انه...سكتت وهي مو عارفه كيف تقول لسجيه
سجيه اللي قربت وبهمس وفضول:وشو
امجاد:انه راح يعوضني لو وافقت
سجيه اللي تاكدت شكوكها بفرحه:ويه يا قلبي يا بعد عمري وروحي وحياتي....صارت تسلم على امجاد وكملت بفرحه:الف الصلاة...
حطت امجاد يدها على فم سجيه وبهمس وهي معصبه:يا خبله فضحتينا ما بعد كملت كلامي وسويتي عرس
سجيه وهي توخر يد امجاد:يا ويل حالي في تكميله بعد
امجاد وهي منحرجه:انا الغبيه اللي اقولك
سجيه وهي تمسك يد امجاد:تكفين كملي يا قلب سجوي انتي
امجاد لفت وجهها وسكتت
سجيه اللي الفضول ذابحها:لا تكفين مو وقتك تسكتين تكفين تكلمي
امجاد وهي تطالع يديها:قال لو وافقت راح يعوضني و كلام من هالقبيل
سجيه :وانتي وش ردك عليه
امجاد:هو عطاني فرصه افكر
سجيه:طيب وانتي وش قرارك
امجاد بحيره:ما ادري
سجي بهدوء:فكري واكثر شي فكري فيه المستقبل حاولي تفكرين باحتمال لو اخذتيه وش راح تحصلين منه فهمتي علي يا امجاد
امجاد طالعتها وهزت راسها بايه وسكتوا الثنتين ورجعت سجيه عطت امجاد ظهرها وكل وحده تسندت على ظهرالثانيه وعيونهم معلقه بالسماء وبالمستقبل كيف راح يكون
في وحده من الخيام
جالسه وتمسح على راسه وهو مغمض عيونه
تنهدت وباست راسه وتوها بتسحب يدها الا شد عليها
طالعته وهو فتح عيونه وبهمس:وين
بانه:انت ما نمت
صقر:لا
بانه تنهدت:كنت بخليك ترتاح على بالي انك نايم
صقر:حتى لو نايم ما تروحين
بانه اللي بلعت ريقها وهزت راسها بايه وهي تنقل عيونها في انحاء الخيمه يمكن هالشي يخفف من الاحراج اللي تحس فيه
صقر:ما فيك نوم
بانه:لا لاني..قاطعها صقر اللي سحبها لحظنه:يله نامي واتركي عنك السهر
بانه وهي تحاول توخر: بس بسام...
قاطعها صقر:اشششش خلاص وقت النوم
بانه اللي راسها على صدره سكتت وهي تعض شفايفها
حست بان من تنفسه مبين انه مرتاح عكس تنفسها المضطرب
صقر وهو مغمض:ترى ما اخوف
بانه سكتت وهي منحرجه اكثر وما ردت
صقر بابتسامه:ما اخبرك طرماء
بانه ابتسمت بخفه وحبت تغير مجرى الكلام وبهمس:انت وعدتني تذكر
صقر اللي اختفت ابتسامته وفتح عيونه وطالعها:ايه اذكر
بانه وهي تطالعه:راح تفكر وان شاء الله راح تسويها وراح تصير احسن
صقر بهدوء:ليه مهتمه
بانه بعدم فهم:وشو
صقر:ليه مهتمه اني اسويها واكون بخير
بانه وهي تطالع زر تيشيرته وتلعب باصبعها فيه وبتوتر:يييعني ععلشاان سسمر وووامجاد وو...
قطعها صقر ببوسه خفيفه وهي رفعت عيونها له
صقر بهمس:يعني مو علشانك
بانه علقت عيونها بعيونه والدموع بدت تتجمع بعيونها هزت راسها بايه بدون ما تتكلم
صقر لما شاف عيونها تتجمع فيه الدموع ضمها له وبهمس:اششش خلاص هدي خلاص
بانه وهي تشد يديها حوله وبصوت مخنوق:ما عاد اقدر اتحمل اني اخسر احد
صقر:اششش خلاص
بانه وهي تتمسك فيه:ما ابغى اكون لحالي ما عاد اقدر اتحمل فراق
صقر وهو يمسح على ظهرها:خلاص
رفع وجهها يمسح دموعها وهو يكمل:خلاص انا ما قلت لك ما ابى اشوف دموعك
بانه هزت راسها بايه وهي تمسح دموعها
صقر حط جهته على جهتها وبهمس:يا ويلك لواشوف تبكين اول ما تحسين بانك متضايقه ابغاك تجيني على طول
بانه بهمس:طيب
مسح صقر على خدها المحمر وهو ما يدري من الخجل ولا من البكاء وباسها بخفه
&
جالسه وتسولف مع اسير والضحك واصل لاخر الدنيا ومطنشه الدنيا
سكتت وهي تلمحها تطيح
قامت من مكانها وهي تركض لها وتسندها:بسم الله عليك يا خالتي ام راكان صار لك شي
ام راكان وهي تطالع مدى:لا يا بنتي بس تعثرت
مدى زفرت بخوف:الحمد لله طيب خليني اعاونك
سندتها ومشت معاها علشان توصلها للخيمه
ام راكان وهي تطالعها:عسى لقيتي مثلها
مدى وهي تتجنب انها تطالعها:وش هي
ام راكان:الشوكلاته
مدى وقفت وهي تطالع ام راكان ونزلت عيونها:انا اسفه مما كان قصدي يعني ..
قاطعتها ام راكان بضحك:هههه بس هذا اللي ابغاه
مدى طالعتها بعدم فهم:وشو تقصدين
ام راكان وهي تمشى بروحها:بغيت بس اسمعك تتاسفين
مدى:ليه
ام راكان:علشان اعلمك ان الواحد لا غلط لام يعتذر ما يتهرب مثلك
مدى:قصدك كل النظرات والحركات اللي سويتيها علشان بس اعتذر
ام راكان:ايه
مدى سكتت وهي مو فاهمه كيف ام راكان تفكر
التفتوا على صوت حسن اللي مبين عليه الضيقه:يمه
مدى طالعتهم ومشت من المكان وهي تحاول تفهم ام راكان كيف تفكر
ام راكان:نعم يا وليدي
حسن بدون مقدمات:ابغى اتزوج
ام راكان بمفاجاه:وشو وش قلت
حسن:اللي سمعتيه ابغى اتزوج واباك تخطبينها الحين
ام راكان اللي ما استوعبت:تتزوج والحين اخطبها من هذي وكيف..
قاطعها حسن:سجيه
ام راكان بسرعه:لا
حسن وهو يقرب من امه:ليه لا
ام راكان بكذب:توك تدرس
حسن:وهي بعد تدرس معاي وبنفس الجامعه يعني ما في مشاكل
ام راكان:الزواج مسؤوليه مو لعب
حسن :وانا قد المسؤوليه
ام راكان:انت خبل كيف بتعيشها وكيف بتاكلها ها ما تقول لي
حسن:راح اسوي كل اللي اقدر عليه راح ادرس واشتغل بس يايمه انتي وافقي
ام راكان لفت وجهها وسكتت
حسن:يمه انا ابغاها انا احبها
طالعته ام راكان بتفاجا وما ردت عليه
حسن:سعادتي معاها يا يمه اول مره قلبي يدق لا تكسرينه
ام راكان طالعته وزفرت ومشت تدخل الخيمه وتخلي حسن وراها مقهور من تصرفاتها
&&&&
في مكان قريب
تطالعه وهي مو مصدقه:ها وش قلت يا وليدي تتزوج
سلطان:ايه يمه مو انتي تبغين تزوجيني خلاص انا ابغى اتزوج
ام سلطان بفرحه:اكيد من تبغى اخطب لك من بنات خالتك
سلطان عقد حواجبه:من قال ابغى بنات خالتي انا ابغى وحده ثانيه
ام سلطان اللي اختفت الفرحه من وجهها:وحده ثانيه من هي
سلطان:سجيه
ام سلطان:من قلت
سلطان:سمعتيني يا يمه
ام سلطان وهي تلف وجهها وبجمود:لا
سلطان بقهر:ليه
ام سلطان:ما تناسبك
سلطان:ليه ما تناسبني
ام سلطان:بس انا اشوف انها ما تناسبك
سلطان بعصبيه:يمه لو ما اخذتها ما راح اخذ غيرها
مشى وترك امه وراه وهي متفاجاه وبهمس:وش فيه استخف هالولد
تنهدت وهي تتذكر اللي سمعته قبل دقايق من كلام دار بينه وبين حسن واللي دار بين ام راكان وولدها وبهمس: علشان كذا ما تصلح لك يا وليدي
مشت وتوجهت للخيمه وهي محتاره هل فعلا ولدها يحبها ولا مجرد تحدي مع حسن
&&&
في مكان ثاني على الطريق
جالسه وراء وراس بنت زوجها على رجلها
طالعهم من المرايه:ها ما خفت حرارتها يا هبه
هبه وهي تمسح على شعرها:لا
يامن زاد على السرعه علشان يوصلون بسرعه
هبه استغربت وهي تلمح سوسن تهلوس وتتكلم
قربت اذنها وسمعتها:يمه راح اسوي كل شي يمه ابغاك ترجعين راح اطفشها يمه وينك
هبه حطت يدها على فم سوسن تسكتها علشان ما ينتبه يامن والدموع تجمع في عيونها
رمشت بعيونها ووخرت يدها عن فم سوسن ومسحت على راسها وبينها وبين نفسها:ما الومك انا لو مكانك اسوي اكثر
تنهدت وهي ترجع بذاكرتها لساعه وراء
هبه:اني متاكده
الاء:ايه بس وش فيك متفاجاه
هبه بضيق وبهمس:تدرين ان اللي تكلمتي عنها تصير طليقته
الاء شهقت:طليقته
هبه:ايه طليقته
الاء:وانتي وش عرفك باسمها
هبه:طلبت من مقعد يجيب لي اسمها لاني مو عارفه عنه اي شي قبل الزواج فطلبت على الاقل اعرف اسم اللي كان متزوجها وهو نفس الاسم اللي قلتيه
الاء تنهدت وهي تحط يدها على كتف هبه:ترى هالزياره من زمان يعني قبل لا يتزوجك
هبه بغيره وهي تهز راسها:عارفه
سكتت الاء وهي مو عارفه وش تقول اكثر من اللي قالته لانها حست هالكلام ازعج هبه اللي تحاول تبين طبيعيه
رجعت لواقعها وهي تتنهد وعرفت هي وين المفروض يكون مكانها وراح ترجع له بس بعد ما تعدي ازمة تعب سوسن
بعد ربع ساعه وصلوا للمستشفى وقف وفتح الباب وشال سوسن ونزلت هي معاه ودخلوا المستشفى
&&&
في البر
جالسين وضوت الضحك واصل
معاذ وهو يقلد مازن:لا ابشر فاهم..كمل وهو يضحك:وهو ما يدري وين الله قاطه
مازن بعصبيه :انت وش فيك علي اليوم ما صارت كله ملف غلطنا
مقعد:يوم انك جاهل قل ما اعرف ولا تخربط لنا امور الشركه وحساباتها
مازن وهو معصب:يا نذل انت وهو ما جاء تظهرون ابداعاتكم بالنقد الا الحين
حصين:ههههههه متى لما يروح عمي صافي ههههههههههه
الكل:هههههههههههه
صافي:افا اثاريك مو راعي شغل
مازن اللي خاف عمه صافي يغير رايه:لا ما عليك منهم انا بشتغل يعني بشتغل حتى لو زبال بس اهم شي لا تغير رايك
صافي:ههههههههه محد جاب هالطاري
حصين:والله شكل الولد رايح فيها
الكل:ههههههههههههههههه
مازن وهو يشوف يزن يضحك:وانت تضحك المفروض تفزع
يزن:هههههههه وافوت فرصة الضحك لا انسى
رن جوال معاذ الي طلعه وهو مستغرب على الرقم ورد:الو - وعليكم السلام - ايه نعم معاك..اختفت ابتسامته وطالع ابوه وقام من مكانه بسرعه وطلع وما فات هالشي ابوه اللي عقد حواجبه من انقلاب حال ولده في ثواني
برا الخيمه واقف ويتكلم بخوف:هو بخير - طيب صار عليهم شي - طيب يعطيك العافيه...صك الجوال وهو يمسح على شعره ولا هو عارف كيف يتصرف مع هالخبر
التفت لابوه اللي وصله صوته:معاذ وش فيك وانا ابوك
معاذ بتوتر:لا لا يالغالي مممافي شي
صافي اللي تاكد ان في شي وقلبه نغزه:قلي وش صاير
معاذ:ما..
قاطعه صافي بخوف:لا تقول ما في شي وجهك متغير وش صاير
معاذ بتردد:يبه ...وسكت ومو عارف وش يقول
صافي بخوف:تكلم
معاذ:يبه نادر
صافي اللي رجوله ماعاد تشيله كله ولا عياله:وش فيه اخوك صار له شي
معاذ:يبه نادر بالمستشفى هو ويوسف وراكان
صافي بخوف وبصراخ:بالمستشفى ليه وش صار وليه معاه يوسف وراكان تكلم
طلعوا الشباب والحريم من الخيمه على صوت صافي المرتفع
لمياء وهي تقرب:صافي وش فيك
صافي ما رد عليها وينتظر معاذ يتكلم
معاذ وهو ينزل عيونه:نادر ويوسف وراكان بالمستشفى ومتصاوبين
ا مراكان وهي تضرب صدرها:يا ويلي على وليدي
لمياء ورجولها مو شايلتها وبخوف:نادر ولدي لا تقول مات
معاذ وهو يحظن امه:بعيد للشر
صافي وهو يشوف اخته ام يوسف تجيهم وهي تبكي:ولدي وش صار فيه تكلم يا معاذ
معاذ اللي تورط:ما ادري
صافي بصراخ للكل:يله مشينا بسرعه
الكل صار يركضون ويلمون الاغراض بسرعه والكل خايف
الجده وهي تقرب من صافي ولمياء:اذكروا الله ان شاء الله ما به الا العافيه
صافي هز راسه وقلبه بيوقف من الخوف:ان شاء الله
دانه اللي دورت بانه وصارت تدق عليها وهي خايفه ثواني الا وصلها صوت بانه اللي صحت من نومها وعرفت بالسالفه وصحت صقر وقاموا
ربع ساعه والكل على الطريق وصوت الشهقات هي اللي تقطع السكون غير ذكر الله ودعاء الله ان كلهم يكونون بخير
&
في المستشفى
جالسه على الكرسي وهي تراقبه وهو يروح ويرجع في الممر والخوف مبين عليه على بنته
هبه:يامن خلاص اجلس وترتني معاك
يامن:لو هي بنتك كان عرفتي ليه ما اقدر اقعد
هبه سكتت وهو حس على نفسه وجلس جنبها وهمس:ما اقصد بس طول الدكتور داخل معاها
هبه وهي تحط يدها على كتفه:ان شاء الله ما فيها الا العافيه
طالعها يامن وحط يده على يدها وسحبها وخلاها بحظنه وهو ماسكها وضاغط عليها ويهز رجوله بتوتر
ما تدري ليه حست بسعاده خفيفه غمرت قلبها وبينها وبين نفسها:وش فيك يا هبه انتي اكيد ما راح تصدقين اللي قلتيه له
طالعته وهي تكمل افكارها:اكيد ما راح تصدقين انك تحبينه بس ليه هالاحاسيس يمكن توتر او خجل لانك ما تعودتي ولا وش هي بالضبط وش يسمونه لما تغفين على صدره وانتي تحسين بالامان وش يسمونه لما تتركز نظراته عليك وتتشتتين وش يسمونه لما يقرب دقات قلبك تعلى ولا عاد تحسين باي شي حولك كل هذا وش يسمونه يا هبه وش يسمونه لما يغيب تحسين وكان غاب جزء منك وش يسمونه معقوله في احد يحب احد في فتره بسيطه مثل اللي قضيتها معاه معقوله
صحت من افكارها لما طلع الدكتور ومعاه الممرضه
يامن بخوف:ها دكتور طمني
الدكتور:مافي اي خوف الحراره راح تنخفض باذن الله احنا عطيناها مخفض للحراره وراح تقعد معانا للصباح وبعدها تقدر تطلع بس عندي سؤال
يامن:تفضل
الدكتور:من عقم لها القرصه اللي في رجلها
هبه:عفوا بس ليه السؤال
الدكتور:لانه قام بعمل ممتاز لانه لو ما عقم القرصه كان ممكن تكون الاضرار اكثر من مجرد حراره
يامن هز راسه والدكتور استاذن بعد ما سمح انه يدخلون عليها
وكل اللي لاحظته هبه انه لحد الحين حتى بعد ما ارتاح يده ظلت ماسكه يدها
&&&&
وصلوا المستشفى والكل نزل ويديهم على قلوبهم
صعدوا للطابق اللي هم فيه
اول ما صعدوا وطبعا كان منظرهم ملفت لانهم كثار شافوه من بعيد
ام راكان وهي تسرع له هي وحسن:راكان
رفع راسه وطالعهم:يمه حسن
حسن وهو يضمه:صار لك شي يا اخوي
ام راكان وهي تبوس يده اللي مضمده:جعله فيني ولا فيك
راكان وهو يسلم على حسن: لا ما صار لي شي الحمد لله
باس راس امه وهو يكمل:بس الله عليك يالغاليه
صافي بخوف:وين يوسف ووين نادر وش صار
راكان :كان عندنا مداهمه على رجل عصابة مخدرات ...كمل وهو يجلس:ورحنا للمكان وكان فخ وتصوبت ويوسف معاي
ام يوسف وهي تطيح على الكرسي:يمه وليدي وش صار عليه وينه
راكان وهو منزل عيونه:في غرفته والدكتور قال.. سكت ولا عرف كيف يكمل
صالح بخوف:وش قال
راكان:انه في غيبوبه لانه تصوب برصاصتين
ام يوسف بصراخ:يمه ولدي اهئ اهئ اااه يا ولدي
صافي بخوف:وين نادر
راكان طالعه وما رد عليه
معاذ وهو يمسك يد راكان:نادر وينه وليه كان معاكم
راكان:كان موجود لان هو المصدر اللي ناخذ منه المعلومات كان يساعدنا
دانه وهي ماسكه نفسها وخايفه من الخبر اللي ممكن تسمعه قالت بهمس:وينه
بانه وهي تمسك يدها وتضغط عليها:دانه
دانه وعيونها على راكان:وينه نادر
راكان:الدكتور يقول ان الرصاصه في مكان حساس كانت قريبه من القلب و.
قاطعته دانه:وينه
راكان وهو يطالع الباب اللي قدامهم:في العنايه المركزه
الكل طالع الغرفه ولمياء تمسك بصافي والدموع على وجهها:ولدي بيروح مني
صافي سكت وهو مو عارف وش يقول غير كلمه وحده:قدر الله وما شاء فعل الحمد لله على كل حال
اما عند دانه ضمتها بانه اللي خافت على اختها لانها ما نزلت ولا دمعه
الاء وهي تبكي وبهمس لابوها:انا بروح اعرف وش حالتهم
صافي:روحي يا بنتي
جلس الكل على الكراسي وصوت البكى منتشر والبعض ظل واقف
الكل كان يمر ويعوره قلبه على منظر العايله ويروح في سبيله
كان منظرم محزن اثنين من احسن الشباب ممكن يفقدون حياتهم وممكن يظلون على حالهم بدون حركه طول العمر
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك