رواية ويبقى خالد -9
بيت بو عبدالله في غرفه فاطمه :
كانت فاطمه هاديه زياده عن اللزوم ، قطع هدوءها صوت التلفون ، مسكت الفون و شافت الاسم [ محمد حبي ] دمعت عينها و بعدت التلفون عنها ، ماكانت تقدر ترد عليه ، و فكرت تقطع علاقتها بـ محمد ، وحاولت تطرده من حياتها و تنساه ، لكن الي يحبه القلب مو هين فراقه ،،
في غرفه خالد و اسراء:
خالد سمع صوت اغنيه من اغاني عبدالمجيد و بدا يغني معاه ، كان صوت فون اسراء، خذته و شافت الرقم وكان رقم غريب ،
اسراء: رقم غريب ؟ بشوف منو ، الو ؟
الطرف الثاني : --
اسراء: الو ؟
الطرف الثاني : --
سكرت اسراء التلفون ،
خالد : منو ؟
اسراء : مادري رقم غريب و رديت و محد تكلم
خالد : حبيبتي لاتردين على ارقام غريبه
اسراء: ان شاء الله ،
خالد : شرايج نطلع ؟
اسراء: يلا
خالد : يلا حبيبتي قومي لبسي عيل ، و انا بلبس و نطلع
قامت اسراء و لبست بنطرون واسع شوي مع نفنوف قصير واسع شوي و جاكيت ، طلعت روعه مع الشيله و المكياج ، اخر شي خذت جنطتها و لبست كعب عالي ، وقعدت تنطر خالد ، انصدمت يوم شافت خالد جدامها ، كان لابس دشداشه و جماغ احمر و حاط عطر رجالي عجييب ، شكله كان حييل روعه و رزه ، عجبها شكل خالد وااايد ، مسك خالد اسراء و مشوا مع بعض ،
و بالسياره :
خالد : حبيبتي وين تبين تروحين ؟
اسراء: على كيفك حبيبي ، المكان الي تحبه ،
خالد : اممم ، شرايج نتمشى بالرايه ؟
اسراء : اوكي حبيبي ، المهم اكون معاك
و عقب دقايق وصلوا الرايه ،،
اسراء كانت حيل مستانسه لانها مع خالد ، و خالد بعد كان مستانس لكن خرب وناسته الريال الي كان يلحقهم من زمان ،
اسراء : خالد شوف هالجنطه واايد حلوه
خالد و باله كان مو معاها : اي حلوه
اسراء : تعال حبيبي بدخل اشوفها
دخلت اسراء [ بربري ] و عقب شوي دخل خالد وراها ، كان يشوف الريال الي لاحقهم من اول ما دخلوا الرايه ، كان شكله مألوف مو غريب على خالد ،،
اسراء : خالد شرايك فيها ؟
خالد : حلوه
اسراء : باخذها
خالد : اخذيها حبيبتي ،
ودفع خالد سعر الجنطه و شال الجيس ومشى و باله كان مشغول ،
اسراء : خالد حبيبي
خالد كان سرحان و يفكر و ماسمعها
اسراء: خالد ؟
خالد انتبه لها : هلا حبي ؟
اسراء : شفيك خالد ؟ بالك مو معاي ؟
خالد : لا لا ماكو شي ، خير حبيبتي ؟ شبغيتي ؟
اسراء: تعبت و انا امشي
خالد : اوكي حبيبتي ، تبين تردين البيت ؟
اسراء : خالد شفيك ؟ احنا تونا يايين ليش نرجع البيت ، خلنا نقعد بمكان نريح شوي بعدين نتمشى ،
خالد : اوكي حبيبي
اسراء حست ان خالد مو معاها و سرحان بشي ،
و قعدوا بـ café و كان الريال الي يلحقهم قاعد بالطاوله الي يمهم ،
خالد : حبيبتي شتشربين ؟
اسراء : موكا مع كراميل
خالد : ان شاء الله ،
وطلب خالد و بعد دقايق وصل الطلب ، و كان يشرب و سرحان ، سرحانه لفت نظر اسراء،
اسراء : شفيه الحلو سرحان ؟
خالد : ها ؟! لا لا مو سرحان ولا شي
اسراء : خالد تقص علي بعد ، ترا مبين عليك
خالد : حبيبتي ماكو شي (ابتسم لها و ارتاحت) ،
بدت نظرات الريال تيي على اسراء ، قام يشوفها و يخزها من فوق لي تحت و خالد يشوفه و وده يذبحه ، و عقب دقيقتين ،
خالد : اسورة حبيبي قومي نطلع
اسراء : ليش خالد ؟
خالد : بس مليت ، شرايج نروح البحر ؟
اسراء : اوكي حبيبي ،
و قاموا و راحوا البحر يتمشون ، شاف خالد البحر و ارتاح ، لف ويهه ورا لقى نفس الريال الي يلحقه !
خالد طلع زقاره من مخباته و بدا يدخن ، استغربت اسراء يوم شافته يدخن ،، !
اسراء : حبيبي ليش تدخن ؟!
خالد : صدري يعورني شوي
اسراء: حبيبي شفيك ؟ سلامتك !
خالد : الله يسلمج
اسراء : صدرك يعورك و تدخن ! حبيبي مو زين عليك ، اذا تحبني قطها الحين جدامي
تنهد خالد : احبج ، والله احبج ، بس خليني ادخن و ارتاح
اسراء: خالد لا ، قطها ، لاتخليني ازعل
خالد تنهد حيل : ليش تزعلين ، انا ما سويت شي يزعلج
اسراء: خالد بلييز قطها
خالد : ان شاء الله ، ( و قطها و ارتاحت اسراء )
اسراء: خالد امش البيت ، انت تعبان
خالد : اسف حبيبتي خربت عليج وناستج
اسراء: حبيبي راحتك اهم
خالد : يا بعد عمري والله ، و قرب يمها و طبع على خدها بوسه ، استحت اسراء و صار ويهها احمر ،
اسراء بحيا : خالد شسويت
خالد : شسويت ؟ ماسويت شي
اسراء: توه توه الحين شسوي ؟
خالد : عطيتج بوسه ، فيها شي ؟
اسراء : خالد مو جدام الناس عاد
خالد : وانا شعلي من الناس ؟ اذا بتسمعين كلام الناس ماراح تخلصيين
و رجعوا خالد و اسراء البيت ، و اول ما وصلوا غرفتهم ،
اسراء : حبيبي الحين تنام و ترتاح اوكي ؟
خالد : شفيني ؟ مافيني شي
اسراء : امبلا ، انت تعبان
خالد : حبيبتي لاتخافين ، مجرد صداع خفيف
اسراء : اسم الله عليك ، ان شاء الله فيني ولا فيك
خالد : يا بعد عمري والله ، احبج
اسراء بحيا : و انا بعد احبك
و حط راسه على المخده و قعدت يمه اسراء و مسحت على شعره ، و حط عينه بعينها ، استحت اسراء و نزلت عينها و باسته على خده و غطته عدل و راحت ،
خالد : حبيبتي وين رايحه ؟ لاتخليني بروحي
اسراء : كاني معاك
خالد : تعالي قعدي يمي
اسراء : ان شاء الله حبيبي ، و قعدت يمه و خذا ايدها و مسكها و بدا يتحسسها و يلعب فيها و يشوف اضافرها ، و قرب ايدها و باسها ، حست اسراء بشعور حلو و غريب بنفس الوقت ،،
ورن فون اسراء ،
اسراء : دقيقه حبيبي اشوف منو ، خذت الفون لقته رقم غريب و نفس الرقم الي مساع ،
اسراء : خالد ، نفس الرقم الي مساع
خالد : عطيني ، و عطته الفون و سكت ينطر احد يتكلم
الطرف الثاني و بصوت رجولي : الوو
خالد انصدم : نعم ؟
الطرف الثاني : ---
طوط طوط طوط ، تسكر الفون
اسراء : منو ؟
خالد عصب شوي : واحد قليل ادب ، حبيبتي لاتردين على ارقام غريبه اوكي ؟
اسراء خافت : ان شاء الله
و بعد اسبوع ،،
اسراء كانت لاهيه ، كانت تزهب لها بدله حق باجر الدوام و خالد يشوفها ،
اسراء: شنو احلى الوردي ولا الازرق ؟
خالد : الوردي
ابتسمت له اسراء، و طلعت لها بدله ورديه حلوه و زهبت اغراضها ، و بعدها داخت
اسراء : خالد دخت بنام
خالد : نامي حبيبتي ، وراج قعده من الصبح باجر
اسراء : اي والله ، يلا حبيبي تصبح على خير
خالد : و انتي من اهله
و نامت اسراء و خالد ظل بروحه ، لف ويهه يمين لقى ملاك نايم يمه ، مد ايده و لعب بشعرها ، كان شعرها لي نص ظهرها ناعم لونه بني غامج على اسود كثيف ، لعب فيه مثل الياهل الصغير و بعدين ابتسم و من غير ما يحس نام اهو مستانس ،،
في جامعه الكويت كليه التربيه :
فاطمه كانت توها واصله الكليه ، سفطت سيارتها و نزلت ، و حست بشي يمسكها ، لفت ويهها و انصدمت !
فاطمه : محمد !!
محمد : اي محمد !
فاطمه ( خايفه و متوترة ) : خير ؟ ليش ياي لي هني ؟
محمد : ليش ماتردين علي ؟
فاطمه : محمد انسى الي بينا ، خلاص
محمد : انسى ! فاطمه شصاير ؟ قوليلي علميني ! صارلج اكثر من شهر ماتردين علي ، قوليلي شسالفه ؟!
فاطمه : لو سمحت ، خلاص ، الي بينا انتهى ، و انساني و امسح رقمي
محمد : ينيتي انتي ينيتي !
فاطمه : اي ينيت ، يلا لا تعطلني ، وراي محاضره ، مع السلامه !
محمد عصب و تصنم بمكانه و انصدم من تصرفها ،، !!
في كليه الهندسه :
كانت اسراء تتمشى تنطر محاضرتها و صدفه شافت دلال جدامها و استانست حييل
اسراء لمحت دلال من بعيد و بلهفه كبييره : دلووول حياتي ،
دلال بادلتها نفس الشعور : اسووور!!، شلونج حبيبتي ؟
اسراء : الحمدلله بخير ، و انتي شلونج ؟
دلال : الحمدلله ، مابغينا نشوفج ؟
اسراء: شسوي ، انا الحين متزوجه و خالد يبيني 24 ساعه معاه
دلال : الله يخليكم حق بعض
اسراء: دلوول عن اذنج ، بروح الحين تأخرت عندي محاضره
دلال تنهدت : يعني شلون ما نقعد معااج
اسراء: ان شاء الله بتقعدين معاي و بتملين بعد ، وابتسمت
في بيت بو عبدالله في شقه خالد تحديدا
خالد الي ماكان عندي دوام ولا شي كان نايم في البيت و حاس بالوحده ، مفتقد وجود حبيبته اسراء، انتبه يوم سمع صوت التلفون و كان نغمه مسج خذا فونه بسرعه و فتح المسج
المسج ( شلونك حبيبي ؟ شخبارك ؟ ماولهت علي ؟ )
استغرب خالد يوم قرا المسج ، خالد : منو هذي ؟ اسراء ؟ ما اتوقع اسراء، و اذا بتكون اسراء ليش ما دزت من فونها ؟ انشغل بال خالد بالتفكير شوي وبعد دقايق نسى السالفه ،، و عقب 10 دقايق مسج ثاني و من نفس الرقم ، المسج ( ادري انك ما ولهت علي ، لاهي مع زوجتك شلون بـ توله علي ؟ ) ، قرا خالد لمسج و انصدم ! منو ممكن تكون هذي ؟ و من وين لها رقمه ! تأكد انها مو اسراء من الكلام المكتوب ، و حاول يتذكر منو بس ماعرف منو ، و حس انه مشتاق لـ اسراء و اتصل عليها ،،
بكليه الهندسه ،
اثناء المحاضره رن موبايل اسراء ، افتشلت اسراء و شافت الاسم و حطته سايلنت ، و عقب نص ساعه طلعت بعد ما خلصت محاضرتها و اتصلت على خالد ،
اسراء: هلا خالد
خالد : هلا حبيبتي ، شلونج ؟
اسراء : الحمدلله ، سوري حبيبي مارديت عليك مساع ، كان عندي محاضره و ماقدرت ارد عليك ،
خالد : لا حبيبتي عادي ، المهم اسمع صوتج ، حياتي اشتقت لج متى تيين البيت ؟
اسراء استحت : اشتاقتلك العافيه ، كلها 3 ساعات و انا عندك
خالد : اوووللله 3 ساعات ! حرام عليج وايد
اسراء : شسوي حبيبي ، يلا ماعليه ،
خالد : اوكي حبيبتي ، ترا لما تيين على طول بنطلع بنتغدى بره اوكي حبيبتي ؟
اسراء: ان شاء الله حبيبي ، يلا خالد لاتعطلني بروح الحين عندي شغل
خالد بزعل : وانا ؟ تخليني بروحي ؟
اسراء : حبيبي انتا ، شسوي والله عندي شغل ، يلا حبيبي مع السلامه
خالد : الله يسلمج قلبي اموااا ( بوسه )
سمعت اسراء صوت البوسه و استحت و سكرت الفون
وعقب 3 ساعات ،،
طلعت اسراء من الكليه و حست ان في احد وراها ،
اسراء : هالسياره ذبحتني من اول ما طلعت و اهيا تلحقني ، سشالفته هذا ؟ شيبي ؟ و ظلت السياره ورا اسراء لين وصلت البيت ،
طل خالد من الدريشه و شاف اسراء وصلت ، و ابتسم و استانس ، لكن ما ظلت ابسامته فتره طويله ، انصدم يوم شاف السياره الي لاحقتها، و انصدم اكثر يوم شاف ريال طلع من السياره و لحق اسراء لي الباب
الريال : اسراء !
اسراء انصدمت و لفت ويهها : نعم !!
الريال : فديتج والله وين رايحه ؟ شدعوه عاد عطيني وي ، لاحقج و مضيع وقتي من الكليه لي بيتكم و انتي ولا مهتمه ؟
اسراء بخوف : لو سمحت روح بعيد احسن لك ،
الريال : الخوف واضح عليج ، لكن ماني رايح ، بوقف هني لما ايي ريلج هذا الي اسمه خالد و يشوفني واقف معاج ، ( و ضحك ضحكه استهزااء )
انصدمت اسراء يوم سمعت هالكلام و خلته و مشت بتدخل داخل و فجأه لقت ايده تربت على جتفها !!
اسراء انصدمت من الحركه الي سواها و لفت ويهها و شافته بنظره غريبه و خلته و دخلت داخل و اهيا خايفه !
دخلت اسراء الغرفه و ملامح الخوف و التوتر باينه عليها ، شافها خالد و سوا روحه مايدري عن شي ،
خالد : اخيرا ييتي حبيبتي ؟
اسراء بخوف : اي
خالد : شفيج ؟ شكلج مخترعه ؟ شسالفه ؟
حاولت اسراء تكون طبيعيه : لا لا خالد ماكو شي !
خالد : اوكي حبيبتي ، يلا نطلع ؟
اسراء : خالد ، شرايك نخليها وقت ثاني ؟
خالد : ليش حبيبتي ؟
اسراء : لا بس ...
خالد : لا بس ولا شي ، يلا قومي نطلع
اسراء بـ يأس : ان شاء الله
نزلت اسراء مع خالد و كانت خايفه من الي واقف تحت ، و يوم انزلت مالقت سيارته و ارتاحت شوي ، اما خالد الي قلبه كان يحترق بالبطيء و ووده يعرف منو الي كان لاحقها ، كان السكوت سيد الموقف بالسياره ، لين صدر من موبايل اسراء اغنيه لـ عبدالمجيد و خذت موبايلها بسرعه و شافت الرقم ، لقته رقم غريب !
اسراء : خالد ، هذا رقم غريب ، ونفس الرقم الي امس !
خالد بعصبيه : ترا مصخها ! منو هذا !!
اسراء بخوف : مماادري خالد ! هاك رد عليه
خالد خذا الموبايل منها بقوه : الوو ؟
الطرف الثاني : --
خالد عصب حييل : الو !!
الطرف الثاني : --
طوط طوط طوط ..
خالد : جبان ، نذل !
اسراء : خالد حبيبي لاتعصب ، هد اعصابك
خالد تنهد حيل : استغفر الله يا ربي
اسراء حبت تقول حق خالد عن سالفه الريال الي لحقها بس كانت خايفه ، و شافت خالد و حاله العصبيه الي فيه و سكتت و مافكرت تقوله ،،
بيت شهد :
اتصلت شهد على احمد علشان تعرف شنو اخر اخبار الخطه الي بينهم ،
احمد بضحكه خبيثه : ههههههه شهود لاتخافين ، كل شي ماشي على حسب الخطه
شهد ارتاحت : الحمدلله ، كمل !
و في المطعم :
خالد كان يشوف اسراء و ينطرها تتكلم و تقوله عن الي صارلها ، واسراء تشوف خالد و حاسه ان خالد شاف كل شي بعيونه بس ساتر السالفه ، و ظل السكوت سيد الموقف مده طويله،
خالد : اسراء ماتقوليلي شفيج ؟ من اول ما ييتي البيت و انتي معتفسه ، شفيج حبيبتي ؟ صايرلج شي ؟
اسراء غمضت عينها حيل لمده ثواني و بدت تفكر ، خالد اجذب عليك لو قلت لك ماكو شي ، بس صدقني ابي اقولك بس ما اقدر !
خالد : اسراء؟ وين رحتي ؟
اسراء صحت من تفكيرها : هلا خالد ؟
خالد : لااا انتي كلش مو معاي ، شفيج ؟ شسالفه ؟
و فجاه وقف ريال يم خالد و قاله : انا اقولك شسالفه !
انصدمت اسراء يوم شافته ، اسراء بقلبها : اهوه !! اهوه نفسه الي لحقني !! شيايبه لي هني ! شيبي فيني !
خالد انصدم يوم شافه واستغرب من الوضع ؟
الريال وبكل هدوء و برود : السالفه و مافيها ياخالد اني انا لحقت هذي الي جدامك الي اسمها اسراء لي البيت ، وطبعا هذا كان برغبتها ،،
اسراء منصدمه و ماتدري شتقول ! و انفتحت عيونها للآخر !! : جذاااب !
sweet memy
البارت الثامن :
خالد انصدم من الكلام الي سمعه ، و رد عليه بصوت عالي وبعصبيه : انت ماتستحي على ويهك ! بنات الناس لعبه عندك ! لو بتقول عنها من اليوم لي باجر حجي انا ماراح اصدقك ! ويكون بعلمك ، انا شفت كل الي صار بينك و بينها و مستحيل اصدق كلمه وحده منك !
اسراء انصدمت و استغربت من الي صار جدامها و نزلت دمعه منها ، و كان الخوف مسيطر عليها و كانت نبضات قلبها سرييييعه حييل و قالت لـ خالد : خالد ، ودني البيت بسرعه
خالد حس فيها و ماحب يعصي اوامرها : ان شاء الله حبيبتي ،
و بالسياره :
خالد بهدوء و من غير عصبيه : المفروض تقوليلي من الاول علشان اعرف اتصرف
اسراء كانت حيل خايفه و الدموع تنزل من عينها : خالد ، خفت اقولك مادري ليش
خالد : اسورة حبيبتي لاتبجين ! دموعج غاليه ترا ،
اسراء : --
خالد : يلا عاد حبيبتي ، ماصار شي ، و مره ثانيه اذا صار فيج شي تقوليلي مو تخافين ، لاني ماراح اسوي فيج شي ، و انا واثق فيج ( و ابتسم لها )
اسراء شافت خالد و شافت ابتسامته و ارتاحت نفسيتها شوي وهدت و قالت بقلبها : الحمدلله لك يارب ،،
بيت شهد ،
بعد ماصارت السالفه رجع احمد البيت ومتضايق و معصب شوي ، شافته شهد و استغربت من حاله ، وماتردد ابدا في سؤاله :
شهد : احمد شفيك ؟ شصايرلك ؟
احمد : ماكو شي !
شهد : احمد قولي شصاير! شسويت مع خالد ومرته ؟
احمد قالها كل السالفه ..
شهد : معقوله !
احمد : هذا الي صار معاي ، خطتج هذي فاشله ، دوري غيرها و بعدين قوليلي انفذها ، خليني الحين اروح ارتاح و اشم لي شي و ارتاح لاني تعبت من كثر الدواره بالشوارع ..
وراح احمد غرفته و طلع جيس صغير مخدرات و حط شوي على ايده و غمض عيونه وبدا يشم يشم لما ارتاح و نسى السالفه ،،
بيت بو عبدالله :
دخلوا خالد واسراء البيت و كانت اسراء مرتاحه شوي من رده فعل خالد ، دشوا و كانوا مستانسين ،
ام عبدالله : هلا والله بـ المعاريس
خالد بـ ابتسامه: هلا فيج يمه
ام عبدالله : شلون الحلوه ؟
اسراء: الحمدلله خالتي بخير ،
خالد قعد بالصاله و فجأه حس بصداع قوي شوي ، و حط ايده على راسه ، انتبهت اسراء لـ خالد و حست فيه ، و ام عبدالله بعد ،
اسراء: خالد شفيك ؟
خالد سكت شوي و بعدين رد عليها : لا حياتي لاتخافين ماكو شي ، بروح شوي انام ، تعالي معاي ..
وقامت اسراء وراحت مع خالد الغرفه ، غيرت ملابسها و لبست شي خفيف و قعدت يم خالد بالفراش ،
اسراء: خالد حبيبي شفيك ؟
خالد تنهد : صداع خفيف ، لاتخافين
اسراء: تبي اييبلك بندول ؟
خالد : لالا عادي ، اقدر اتحمل
و حط خالد راسه ع المخده و غمض عيونه ، قربت اسراء من خالد و حطت ايدها على راسه و مسحت على شعره مده لما نام و اهو يبتسم ،،
بيت بو محمد :
اسماء : نواف احس اني تعبانه ، قوم ييب نور من الروضه
نواف يشوف ساعته : يلايلا ، الحين بروح ،
طلع نواف و شغل سيارته وراح الروضه علشان اييب نور ، ولما وصل الروضه لقى نور بره تنطر بالحر و يوم شافت ابوها ابتسمت و ركضت حيييل لي السياره ، و فجأه !! صوت سياره يايه بسرعه وماشافت الطفله البريئه الي تركض و دعمتها ،،
نواف بصوت عالي حييل و الخوف باين عليه : نوووووووووور !!
نزل نواف من السياره بسرعه و وقف بنص الشارع يشوف بنته ، لقى بنته بنص الشارع طايحه و الدم مالي وييها و ايدها مجروحه و ملابسها متشققه و انصدم من المنظر الي جدامه !
نواف : نوور حبيبتي ردي علي ! نوور ، نوووور
وبحركه سريعه شال نور و طار فيها ع المستشفى ،
بيت بو محمد :
اسماء الي كانت تعبانه و تحاتي نواف و نور الي ليلحن ما وصلوا ، رفعت سماعه التلفون و ماترددت ابد ، ( رنه ، رنتين ، 3 ، 4 .. المشترك لا يرد ! )
اسماء بخوف : اخاف صار فيهم شي ! الله يستر ،،
في المستشفى ،،
قعد نواف على اعصابه ينطر الدكتور يبشره بخبر يسعده ، و بعد فتره طويله شوي طلع الدكتور
تحرك نواف و بسرعه سأل الدكتور عن حالتها ،
نواف : ها دكتور بشر !
الدكتور تنهد : والله مادري شقولك ،
نواف بخوف : دكتور لاتخرعني ولا تخوفني اكثر ، قولي شفيها شصاير لها
الدكتور : اعاقه جسديه ، و اغلب الاعاقه صارت صوب ريلها ، و في ارتجاج بالمخ
نواف بصدمه : يعني شنو ! فهمني اكثر
الدكتور : يعني راح تواجه مشكله بالمشي ، و بطء استيعاب ، و ان شاء الله تتحسن حالتها مع الوقت
نواف انصدم من كلام الدكتور و لام نفسه ،
انا السبب ! انا السبب !! ، نزلت منه دمعه حاره مسحها بسرعه
بيت بو محمد :
اسماء و القلق و التوتر باين عليها : ماعاد فيني صبر ! اكيد صار فيهم شي ، قلبي يقولي ان فيهم شي ،،
محمد : يمه وين نور ؟ ليلحين مايت من الروضه ؟
اسماء : اي يمه ليلحين ما يت ، مادري شفيه ابوك تأخر
محمد : ادق عليه ؟ اقوله ليش تأخرت ؟
اسماء تنهدت حييل و حست بـ اليأس : دق يمه دق يمكن يرد عليك
رفع محمد سماعه التلفون و اتصل على ابوه ( رنه ، رنتين .... )
المستشفى :
نواف : بس يعني لي متى ماراح ارد عليها ، الحين اكيد تحاتينا ، مثل ما انا خايف عليها اكيد اهيا خايفه على بنتها ، ( تنهد حيل و خذا نفس عميق و رد عليها )
نواف و بضيق حييل و باين عليه الضيق و الحزن من نبره صوته : الو
محمد : يبه ؟ وينك يبه ليش ليلحين ماييت ؟ و وين نور ؟
نواف : حمودي عطني امك شوي
محمد : يمه ابوي يبيج
اسماء فرحت شوي لكن بعد دقايق ،،
اسماء منصدمه و مو مصدقه الي سمعته : شنو ! نواف انت شقاعد تقول !
نواف بـ ضعف حيله : هذا الي صار
اسماء : نواف انا الحين يايه ، يلا مع السلامه !
وبسرعه لبست عباتها و راحت المستشفى ،،
و عقب دقايق وصلت المستشفى ، و مشت بسرعه لين وصلت عند نواف ،
اسماء و الدمعه بطرف عينها و بصوت يكاد ينسمع : نواف وين نور ، ابي اشوف بنتي ،
نواف بضيق و ندم : بتشوفينها ،،
اسماء و الدموع نزلت من عينها ، وبصوت ممزوج بالدموع : حسبي الله و نعم الوكيل ، حسبي الله و نعم الوكيل
بيت بو عبدالعزيز :
بو عبدالعزيز : لا حول ولا قوه الا بالله ،
ام عبدالعزيز : شصاير بعد ؟
بو عبدالعزيز : نور ، دعمتها سياره و ودوها المستشفى
ام عبدالعزيز بصدمه : شنو ! شلون !
بوعبدالعزيز : دعمتها سياره يم الروضه و بسرعه ودوها المستشفى ،
ام عبدالعزيز : الله يكون في عونج يا بنيتي ، يلا قوم خنروح لها المستشفى ، ما اقدر اقعد هني ما اشوفها ،
بو عبدالعزيز : قعدي قعدي ، شوديج الحين بهالحر ، نطري العصر
ام عبدالعزيز : لا لا ما اقدر لا زم اروح الحين اتطمن عليها
بوعبدالعزيز : كيفج روحي مع السايق الحين و انا العصر ان شاء الله اروح
ام عبدالعزيز : يلا عيل اروح البس عباتي و انزل
بيت بو عبدالله :
عقب ما نام خالد حست اسراء بالملل ، و اتصلت دلال ،
( رنه ، رنتين ، 3 ، 4 ... )
اسراء: وي شفيها دلال ماترد ؟ بشوف امي من زمان ماكلمتها
و رن تلفون البيت في بيت بو عبدالعزيز
بو عبدالعزيز : الو
اسراء بفرح : هلا يبه شلونك ؟
بو عبدالعزيز : هلا يبه ، انا الحمدلله بخير ، انتي شلونج
اسراء: تمام بخير ،
بوعبدالعزيز : الحمدلله
اسراء: يبه وين امي ؟
بوعبدالعزيز : امج الله يسلمج راحت تلبس بتروح المستشفى
اسراء خافت : مستشفى !! ليش شصاير ؟ شفيها امي ؟!!
بوعبدالعزيز : لا مافيها شي ، نور داعمتها سياره و بتروح لها امج الحين
اسراء انصدمت : نور ! شفيها نور شصاير لها !!
بوعبدالعزيز :اسراء حبيبتي لاتخافين ، حادث بسيط ان شاء الله و ماكو الا العافيه
اسراء و الدمعه بطرف عينها : انا الحين بروح لها
بوعبدالعزيز : قعدي وين تروحين الحين ، قعدي ولاتحاتين و العصر روحي
اسراء بتوتر : يبه الله يهداك شقاعد تقول ، انا لازم اروح الحين اشوفها
تنهدت بو عبدالعزيز : كيفج
اسراء: يلا يبه مع السلامه
اسراء : ما اقدر ما اروح اشوفها ، لازم الحين اروح ، بس .. خالد ، خالد نايم شلون اقوله ؟ مسكين توه نايم ، و اكيد ماراح يخليني اطلع هالحزة بروحي ، ياربي شلون الحين .. لفت راسها و شافت خالد لقته نايم و مرتاح ، ماحبت تصحيه من نومه و تزعجه و خلته نايم ، وانطرت لي عقب ساعتين ،
تحرك خالد شوي و حست اسراء بحركته و لفت راسها ،
اسراء: شبعت نوم حبيبي
خالد بنعاس و ماله خلق : يعني ، الحمدلله
اسراء ابتسمت له ابتسامه صغيره ونزل راسها و اخفت الابتسامه ، ترددت شوي و لكن تشجعت و قالت ،
اسراء: خالد
خالد : هلا
اسراء : خالد ابي اروح المستشفى حق بنت اختي
خالد : شفيها ؟
اسراء : داعمتها سياره وبروح اشوفها
خالد : لا حول ولا قوه الا بالله ، ان شاء الله بعدين اوديج
اسراء: حبيبي ابي اروح الحين
خالد : لا مو الحين ، مالي خلق بعد شوي
تنهدت اسراء: ان شاء الله
المستشفى :
وفي غرفه نور ، كانت نور نايمه ع السرير و شكلها يعور القلب ، الشاش و اللفاف على مناطق مختلفه من جسمها ، و الجروح منتشره على ايدها و ويهها ، و اللون الاصفر على الازرق كان لون بشرتها ،،
ام عبدالعزيز : الحمدلله على السلامه
اسماء بضيق : الله يسلمج يمه
ام عبدالعزيز : ان شاء الله تقوم بالسلامه
اسماء تنهدت بقوه : ان شاء الله
ام عبدالعزيز : قلتي حق جوري و اسيل ؟
اسماء : لا يمه ماقلت لهم
ام عبدالعزيز : انا بقولهم ،
و اتصلت ام عبدالعزيز على اسيل و قالت لها اما اسراء فكانت تدري بالسالفه ،،
بيت فهد :
تنهدت اسيل حيل يوم سمعت الخبر ، أسيل : الله يكون بعونج يا اسماء و الله يقومج بالسلامه يا نور ، سمعت صوت جنان تبجي و لقت فهد جدامها و شايل جنان
اسيل : واااي حلاتها و اهيا تبجي
فهد : مسكيها ماختني انام ، خليها عندج
(خذت اسيل جنان من عند فهد ) اسيل : فهد انا بطلع الحين
فهد استغرب : وين ؟
اسيل : بعد عمري نور داعمتها سياره و اهيا الحين بالمستشفى
فهد : اووه ! لا حول ولا قوه الا بالله ، اوكي روحي
اسيل : انزين بخلي جنان عندك مابيها تدوخني هناك حرام البنت تبي راحه
فهد : خلاص اوكي خليها هني
اسيل : يلا بروح اغير ملابسي
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك