رواية يا لبيه يا الدنيا العجيبة -26
ام ريان:ايه نعم بنت بنتها
ام طارق: اماني تعالي يمه انتي من ريحة الغاليه
طالعت اماني بأمها
اعطتها نظره بمعنى روحي
راحت وضمتها ام طارق على صدرها
بالمجلس
ابو طارق: والله ماتنام عيني لحين ياخذون راسه
ابو فيصل: عبدالله مو وقته هالكلام ترحم عليها انا واخوك
عبدالعزيز خال ريم: والله لو اشوفه قدامي ثورت فيه من غير رحمه اخذ هالضعيفه
ابو طارق: الله لايوفقه دنيا وآخره
طارق: يبه لاتنفعل هو في غيبوبه
الله العالم يقوم منها والا لا
ابو طارق: والله ابيه يقوم واشوف بعيني يوم يقصون راسه اللي مايخاف الله
عبدالعزيز: كله من الابليس محمد الله يحرمك الجنه مثل ماحرمتها شبابها
عبدالرحمن: هيييه انت
ابو تركي:دحيم خل هالاشكال تقول اللي تقوله
عبدالعزيز: ياساس البلا ليتك مكانها
ابو فيصل: اقصروا الشر مابعد اندفنت وانتم تخانقون بعض
عبدالعزيز: لاحول ولاقوة الا بالله انا لله وانا اليه راجعون
دق الباب راحت الخدامه تفتح
كان شرطي تطوع بتوصيل خبر مهم للعائله بحكم معرفته لتركي
دخل مجلس الرجال
سلم ع الموجودين
ناصر: اول شي عظم الله اجركم وغفر لميتتكم
الجميع آمين
تركي: عسى ماشر ياناصر
ناصر: وكلني الضابط بحكم معرفتي فيكم اني اوصل لكم هالمحتويات
ابو طارق: من ريم؟
ناصر: ايه بعد التفتيش لقينا مفكره صغيره في شنطة الضحيه وفي جيب الشنطه ورقه بيهمكم اللي فيها
طارق: هاتها وينها..
الضابط: كاتبه فيه امانه اول واحد تطيح بيده هالورقه يقراها قدام العايله كامله..
وانا اول من طلعها من الشنطه كانت بجيب سري داخلي
طارق: طيب هاتها
ناصر: هذي دليل بس بقراها لكم وباخذها معي هذي اوامر الضابط
تركي: تفضل ياناصر
ناصر: كلكم موجودين
ابو طارق: كلنا موجودين
وفرت دمعه من طرف عينه
ناصر: خواتها وامها والكل لازم يتواجد
ابو فيصل: قم ياطارق ونادهم وخلهم يوقفون برا والصوت بيوصلهم
ثواني وكان الحريم برا
والرجال كانوا على اهبة الاستعداد
فتح ناصر الورقه وبدأ يقرا
.
.
.
لا أعلم مابي !!
لا أعلم ماهويه هذا الحزن الذي تسرب البارحه لي..
وأبقاني على قيد الالم والاستيقاظ حتى الآن !!
أهو الخذلان ؟؟ خذلان من !! ومن من ؟؟
أم هي الحياه والاحساس ؟؟
أم هم الذين أحببتهم ولم يشعرو بي !!
أم أولئك الذين أحبوني ولم أشعر بهم !!
أم هي نفسي خذلتني حين منحت من لايستحق مالا يستحق !!
لا اعلم ..... !!
حزينه أنا فووووق عاده الحزن
حزينه لدرجه الاحساس بطعم الحزن في فمي
حزينه لدرجه أستنشاق الحزن في كف يدي
عذرا احبتي .. من أنا ؟
لا تندهشون لغباء سوالي الاحمق !!
أو حماقه سؤالي الغبي
أخبروني من أنا ؟
فربما عرفتموني أكثر مني !!
ربما كنت اكثر وضوحا مني أمامي
بي حنين
بي أنين
بي سنين
وآآآآه من السنين
فـ بي من السنين مالا أقوى على حمل تفاصيلها
تراودني أساله كثيره لعلي أجد أجابتها لديكم !!
كيف اتخلص من عاده الكتابه عنها ؟؟
كيف سـ اصل الى قناعه أنه لم يتبقى فوق الكره الارضيه
مكان يقوى على جمعنا واحتمال وجودنا معنا !!
علموني كيف أطير الى الفرح
وأجنحتي مهشمه تحت عجلات رحيلها !!
علموني كيف أتوقف عن الحلم بها
دون أن تتوقف بي الحياه
علموني كيف أخترع حبوووب النسيان كيف ؟؟
كيف أرها تحدث سواي ولا أشتعل بالغيره ؟؟
أخبروووني كيف اموووت بهدوء
كيف اموووت بهدوء
كيف اموت بهدوء !!
هل بينكم من يخبرني ؟؟
وسكت
سمع ازيز لكل واحد فيهم
قلب الورقه: وهنا كاتبه
بسم الله الرحمن الرحيم
مدري اذا كنت بقول لكم هالكلام بنفسي
او تقرونه..
بالحالتين يهمني تعرفون ليش انا سويت كذا
يبه انا ادري اني غلطانه وادري الطريق اللي مشيته غلط.. ووالله اني مادنست راسك
وبعد ماعرفت ان هالشي غلط قررت اتوب
وماذلني للرجعه لهالطريق الا عمي محمد
مابيك تنسجن على كبر
منذر كذب علي وقال انه بيخطبني منك
بس انا بحسن نيه قلت له اجل الموضوع لحين خروجك من المأزق وعرض علي مساعادته انه بيعطيني المبلغ
ماتتصور وش قد كانت فرحتي.. وقال لي بيخلي امه والا اخته تقابلني في اي مكان عشان يعطيني
انا صدقته لانه ماقال انه بيعطيني شخصيا والا كان شكيت بالموضوع
جوري اسفه ياقلبي اني حطيتك في موقف حرج يوم اطلع من المستشفى
بس الكلب خدعني وارسل لي وحده الله اعلم من تكون على بالي اخته عطتني نص الفلوس في المستشفى
وتحججت ان المبلغ ناقص وقالت لي اروح معها السياره اجيبه بس اكتشفت ان منذر مخطط لها الشي
بالذات يوم قال لي جوع الكلب يتبعك
عمي محمد الله يسامحك انت اللي خليتني اصير كلبه وتبعته بغبائي
يمكن الحسنه الوحيده في منذر انه فك قيدي عشان اصلي لعل الله يفرج علي اللي انا فيه
ولقيتها فرصه بعد ماشفت كومة اوراق واقلام اكتب فيها اعذاري لو حصل لي شي
بس ان شاءالله مايحصل انا قويه وان شاءالله اواجهكم بنفسي وماكتبت هالورقه الا تحسبا لأي طارئ
يارب فك كربتي وقابلني بامي
واذا ماقابلتها قولوا لها وش سويت عشانها
الهنوف من داخل وبأعلى صوت: اقابلك بالجنه اذا اراد الله.. حسبي الله ونعم الوكيل حسبي الله على اللي كان السبب
بكاء مرير وصدور مثخنه بالجراح صادره من الجميع وخصوصا من ابو طارق
ام طارق: ياعويني ياريم رحمة الله عليك رحمه واسعه الله لايحلل ولايبيح من ظلمك
ابو طارق: تفكر فيني بعز ضيقتها كله عشان الفلوس.. انا من بكرا ببيع اي شي قدامي
ابو تركي تأثر بس مايبي يبين مايبيهم يحسون انه معترف بغلطه: مابي منك شي
ابو طارق: علي الطلاق روح هالطاهره ماتروح هدر وفلوسك بترجع لك لو بعت هدومي اللي علي
تركي: مايحتاج عمي
ابو طارق: يحتاج ونص هذي الفلوس اللي خلتنا بهالوضع
تركي:خلاص دفعت المبلغ من حر مالي والله العظيم ماخذيت ريال من ابوي
ابو طارق: ايش
تركي: ايه نعم دفعته من زمان عشان كذا الرجال معاد جاك.. ماكان لي نيه اقول بس لازم تعرفون
طارق: ضحك عليها الكلب
ناصر: بس بنتكم ماتت شريفه وبكر
ابو طارق كان منتظر الاجابه على هالسؤال اللي كان خايف يقوله مكان يبي ينصدم انها دنست شرف العايله
هلل وكبر هلل وكبر اكثر من مره
وسجد شكر لله: خلاص انا كذا مرتاح
ناصر: باقي ملاحظه كتبتها ع الهامش
انصت الجميع
كمل ناصر: تقول امانه لاتعاملون اختي اماني مثل ماعاملتوني
ولوما رغد ماعرفت ان عندي اخت
ابو طارق: بنت الهنوف بعيوننا
الهنوف من داخل: اماني بنتك ياعبدالله اماني توأم ريم
وقف على حيله: ايش
عبدالعزيز: اماني بنتك الهنوف غطت عليكم انها جابت توم كانت عارفه انك عقب ماتطلقها بتاخذونهم
الهنوف: يعز علي اني فرطت بوحده من بناتي
بس وش اسوي كل ذا سويته هروب منكم ومن طغيانكم..يااااليتني فرطت بعيوني ولاخذيتوا وحده فيهم..
اسوأ الايام مرت
اسرار محد يدري فيها لمدة 19 سنه
كانوا عاجزين عن استيعاب هالواقع المرير
ناصر: هو ماعنده الا اخت وحده وكبيره ومشهود لها بالصلاح الظاهر كان يستدرج البنات بعائله وهميه ووعود كذابه بخطبه او زواج
انهوا الحديث وطلع ناصر وكلن راح بيته عشان اصحاب البيت يرتاحون
............
تركي: خالد لو سمحت ابي جوري
خال: الحين اناديها
ودخل
مرت دقايق وجت
باين عليها الحزن
خشمها احمر وعيونها كذلك
بصوت منخفض: ناديتني؟؟
تركي: عظم الله اجرك
جوري: اجرنا واجرك
وبدون شعور ارتمت في حضنه
تشبثت بثوبه
من قوة اندفاعها في حضنه رجع على ورى خطوه
كانت شاده ثوبه من ورى وتبكي
تركي: جوري مايصير كذا
اهدي .. ادعي لها بالرحمه
ومازالت تبكي
ضمها وصار يمسح على راسها
قعدها ع الكنبه
وشهقات البكى مستمره
دنقت طاح شعرها على وجهها
رفع دقنها وبحركه رجع شعرها على ورى
مسح دموعها
وقرب وعطى كل عين قبله: ما ابي هالعيون تبكي .. ريم وراحت لو بترجعها الدموع والله بنبكي عليها سنه
انتي مؤمنه بقضاء الله والله يخلفكم خير
جوري: كل شي هنا يذكرني فيها
وصارت تأشر بيدينها ع المكان
شافها ترتجف
شال يدينها وغطى بها وجهه واستنشقها
من ثم باس اليمين وبعدها اليسار: انا من بكرا بدور لنا بيت و
جوري: لاتكمل ترا تعبت من هالسالفه اضرب الحديد وهو حامي
طلقني الحين ماراح اتأثر كثير لان موت ريم اخذ كل ذرة حزن بداخلي
تركي: انا ماقلت لك نرجع البيت عند ابوي
انا قلت بدور بيت لي ولك بس
جوري: مافرقت
تركي: الا فرقت ماراح يكون الا راسي وراسك محد بيضايقك ولاتسمعين كلام
جوري: والله ياتركي الطريق مسدود
مسك وجهها بيدينه: طالعي فيني
تحاشت نظراته
تركي بحده: طالعي فيني اقول
طالعت مو خوف بس مشتاقه لهالعيون اللي تضيع من تشوفها
ركز عيونه بعيونها: اسمعيني زين طلاق مانيب مطلق انسي هالكلمه نجوم السماء اقرب لك..
اذا على ابوي بنهج من عنده وماراح انفذ اللي يبيه والله ما آخذ غيرك
جوري: وش اسبابك
تلعثم وفك وجهها ودنق
هالمره هي مسكت دقنه ورفعته تحسست مكان السكسوكه المهمله بس معطيه شكل جذاب: تركي تحبني؟؟!!
رفع حاجب: وش هالسؤال
جوري: جاوبني
وخر وجهه وشبك ايدينه واتكى عليها تحت دقنه وصار يطالع قدامه: انتي وش شايفه
جوري: كنت تكرهني ومن بعد ماجينا هنا تغيرت
تركي: نقطه في صالحي
جوري: نقطه سلبيه لانك ماتتغير معي الا اذا كنا قدام احد
والحقيقه المره انت ماتغيرت الا عقب مامرضت احساسك بالذنب هو اللي خلاك تلين شوي معي
زفر زفره طويله وبطيئه: انتي حره بافكارك انا ماعندي اجابه
جوري: تكفى تركي حتى لو انك تكرهني قول لي
تركي: عشان تكون لك حجه للطلاق
جوري: على قد ما ابي الطلاق بس اني اتراجع عنه مو عشانك عشان اهلي بضغط على نفسي لو جرعتني الضيم كل يوم كاس
تركي: شيلي من بالك تشوفينه من اليوم ورايح
جوري: تصدق تركي الحين عرفت انك جبان
تركي: لااااه
جوري: والله لانك رافض تطلع اللي جواتك
تركي: افرضي انه سلبي وبيحطم كل شي فيك
بابتسامه ساخره: ماعاد بقى فيني مكان يتحطم كلي متحطمه ومع ذلك اقدر اكون اقوى منك وافصح عن اللي داخلي
تركي: مثل
جوري: احبك اكثر من نفسي
باستنكار:هااااه
جوري:ايه احبك ياتركي.. غبي هالقلب ماحبك الا انت
تركي يبي يشد شعره مو مستوعب هالتصريح منها:تحبيني انا؟!
جوري: واعشقك
تركي:لااااااا الظاهر تبين تجننيني
جوري: والله انا المجنونه اللي طلعت لك هالحكي بس ابي اثبت لك اني اقوى منك في جميع حالاتي
مسك ايدها: جوري انتي
سحبت ايدها: بدينا عشان اهلنا وماعندي مانع نكمل عشانهم
ع الاقل نعيش مع بعض باحترام والا حبي لك بحاول امحيه لان الحب من طرف واحد محكوم عليه بالاعدام...
انهت جملتها بخروجها من الغرفه
مع خروجها اصتدمت بأماني
جوري: ريم ماتشوفين
وسكتت
اردفت: معليش اماني والله اشوف ريم فيك
اماني: مثل ماهي اختك انا اختك ومافي قوه بالارض بتبعدني عنكم عقب اليوم
جوري: مستحيل والله مايفرقنا غير الموت
...............
تو ابوها طالع من عندها
وتأثرت عقب مادرت
بس زين انه طلقها قبل ينجن
انجن!!
ايه انجن ابوها جاب لها اوراق طلاقها من ابوه بعد تبليغه ان منذر فاق من الغيبوبه وتجنن رسمي
تأثير الحبوب واودع احد المصحات النفسيه خارج السعوديه بطلب من ابوه اللي ماهمه شي غير سمعته
صحيح كانت تبي الحريه بس ماكانت تبي يصير له كذا طلعت ورا ابوها بتروح لامها
بتسألها كم عدة المطلقه
استوقفتها عدة جمل
واخوياه كلن لقى جزاه
فواز حكموا عليه حكم تخفيفي لانه ساعد الشرطه
سعد مات بعد كم اسبوع متأثر بجراحه
ومشعل باقي له كم شهر ويطلع تشوه تشوه كلي اللي يشوفه مايقول هو..
صار يكتب مذكرات دعويه يبي الناس يشوفون نهايته ويتعضون..
والبنت اللي كان يستعين فيها لاستدراج البنات
تم القبض عليها واعترفت بكل شي طبقت مثل علي وعلى اعدائي
اخبار موجزه سمعتها من ابوها اللي كان يحكي لامها
" ياربي الحمدلله ان محد يدري اني كلمت البنت اللي في المنتدى حقه
الحمدلله''
الظاهر بيبقى سر مدى الحياه
ومحد بيكتشف انها هي اللي كلمت ريم
وبنت المنتدى ماهي الا خدعه منه..
هي مكالمتين لاغير وريوف اللي كملت الباقي..
كل ذا واكيد بيندفن ....
...........
يدور غرفته مايبي يشوف احد
رمى نفسه ع السرير وحط يده على عيونه: ياااااااااااااااه كل ذا ماحسيت فيه منك ياجوري..
كنت اعمى والسبب رشا اللي ماكنت اشوف بالدنيا غيرها..
ااااااااه يارشا ضيعتيني وانا ضيعت جوري
تركي كان حاس انها كبرت في عينه لانها بدت اهلها على مصلحتها ومن زود طيبتها ماكانت تبي تطيح من عين احد..
لهالدرجه التفاني وصل فيها لها المواصيل .. كان وده يبكي بس مافي مجال للبكا هو لازم يصلح اللي خربه بيدينه
دق جواله رفعه بدون مايشوف الرقم: الو
مشاري: السلام عليكم
تركي: هلا والله مشاري وعليكم السلام
مشاري: عظم الله اجرك
تركي: اجرنا واجرك
مشاري: والله مادريت الا امس بالخبر واسف ع القطاعه انت تدري الدنيا تنسي الواحد نفسه
تركي: لاتبرر خيرك سابق وانت راعي وقفات
مشاري: مابيننا هالكلام.. والله ودي لو اني بالسعوديه واوقف جنبك
تركي: ماتقصر فديت راسك
مشاري: صدق رشا طلع زوجها منذر ال....؟؟
تركي: ايه نعم
مشاري: اتعب اقول هالدنيا عجيبه
تركي: تصدق من كثر ماني مصدوم ماعطيت نفسي وقت افكر في هالشي
مشاري: ولاتفكر ابد.. احصر افكارك في جوري وبس
تركي: بس والله اوجع قلبي اللي صار لها شف نصيبها شلون
مشاري: حكمة الله.. وبعدين محد ياخذ غير نصيبه.. اقول تركي
تركي:هلا
مشاري: لايكون حنيت
تركي: لاوييين.. بس تدري عشره وزي كذا والعشره ماتهون الا على ولد الحرام والله يستر عليها
مشاري: وش هاللي اسمعه .. يعني رشا خلاص بح ماعاد تطري لك
تركي: شف يامشاري قلبي فيه صمامين
الاول يشتغل عشان امي
والثاني عشان جوري
مشاري:...........
تركي:هههههههههههههههه
مشاري:..........
تركي:شفيك سكت
مشاري: مدري
تركي:ياحبيلك احسن شي انك ماعلقت
مشاري: ما اقول الا عسى الله لايغير عليك..
تركي:آآآمين.. ومشكور على اتصالك انشهد انك عز الخوي
مشاري: اسوي المستحيل عشانك اذا ماوقفت معك الحين متى اوقف.. انتبه على نفسك وبيننا اتصال
تركي: على خير.. وقفل
هو خويي وهو لي فالوغى
"راس مال"
وهو دليلة خويآ
"في طريقه غوى"
ان ذكرته وبي هم
"تجلى وزال"
وان فزعلي جلى همآ
"طواني طوى"
..........
البارت ((19))
.
.
.
.
.
يوم السبت موعد نتايج الثانويه
راحت ندى بمعية نادر اللي وصلها
ربع ساعه وطلعت
ركبت السياره
نادر: ها بشري
بكت ندى
نادر: لاتقولين راسبه
رمت له ورقتين
فتح اول وحده: دبه ناجحه ونسبتك 88% وتصيحين
زاد بكاها واشرت له ع الورقه الثانيه
فتحها كانت نتيجة ريم ناجحه بنسبة 98%
نادر: افرحي لها مو تبكين رفعت راس ابوها وهي ميته الله يجعل مثواها الجنه
ندى: آمين
..............
بعد مرور شهر على وفاة ريم
الاوضاع استتبت
ريم محفوره داخلهم بس لازم الحياه تمشي
رجعت الهنوف للشرقيه مافيه شي يقعدها
وبعد استعطاف جوري انها تخلي اماني عندهم رضت مهما كان هم اخوانها وابوها له عليها حق
ام فيصل: هيا والله اللي اعرفه العزاء ثلاثه ايام حرام وانا اختتس تطولين خلي البنت ترتاح في قبره
ام طارق: وش اسوي كل شي قدامي اسود ما اقول الا الله يرحمها
ام فيصل: بعد يومين بنسوي تمايم التوم حرام ياعويني سافلين بهم والتهينا فيهم
ام طارق: ايه وانتي الصادقه سوي اللي تشوفينه
ام فيصل: بس ها تحضرين نبي كلنا نجتمع نغير جو شوي والله اللي شفناه مو هين
ام طارق: صدقتي ياوخيتي .. متى التمايم
ام فيصل: الخميس ان شاءالله نبي الكل فاضي
ام طارق:على بركة الله
.............
ساره: وين الاحلى هذا والا هذا
دانه: الاسود روعه
ساره: وانتي وش بتلبسين
دانه: والله مدري بشوف
نوف: على قد فرحتي الا اني احس الفرحه ناقصه
جلست ساره وحطت الفساتين بحضنها: يااااربي انتي لازم تنكدين ع الواحد
دانه: والله صادقه تدرين امس مانمت كنت افكر في حفلة عيد ميلادها اتذكر انبساطها وفرحتها
ساره:سبحان الله ماكنا ندري اننا بهالحفله بنودعها للأبد
واللي حاز في خاطري معاملتي لها ماكنت طايقتها يارب تسامحني
نوف: بس والله اللي سوته ماينتسى خاطرت بنفسها عشان تأمن المبلغ لابوها
كله من عمي محمد ودي اعرف من وش منه مصنوع قلبه
دانه: ياليت ع الاقل جوري تكلمت وقالت ان تركي دفع المبلغ عن ابوهم ماكان صار اللي صار
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك