رواية يا لبيه يا الدنيا العجيبة -27
نوف: على قد فرحتي الا اني احس الفرحه ناقصه
جلست ساره وحطت الفساتين بحضنها: يااااربي انتي لازم تنكدين ع الواحد
دانه: والله صادقه تدرين امس مانمت كنت افكر في حفلة عيد ميلادها اتذكر انبساطها وفرحتها
ساره:سبحان الله ماكنا ندري اننا بهالحفله بنودعها للأبد
واللي حاز في خاطري معاملتي لها ماكنت طايقتها يارب تسامحني
نوف: بس والله اللي سوته ماينتسى خاطرت بنفسها عشان تأمن المبلغ لابوها
كله من عمي محمد ودي اعرف من وش منه مصنوع قلبه
دانه: ياليت ع الاقل جوري تكلمت وقالت ان تركي دفع المبلغ عن ابوهم ماكان صار اللي صار
ساره: ليت ماتعمر بيت.. لازم ندعي لها كل ماذكرناها
نوف:شرايكم نسوي لها براده سبيل والا نبني مسجد وقف على نيتها
ساره: والله هذا اللي كان في بالي ويوم كلمت امي قالت امها سبقتنا
دانه: مافيها شي حنا بعد نبي الاجر لنا ولها
ساره: الله يساعدنا على فعل الخير
استقبلت القبله ورفعت ايدينها فوق
ساره:خير وش عندك
دانه: وخري بدعي
ضحكت على اختها: ادعي
دانه:يارب ياكريم بدل همومنا افراح ومسرات واعط كل واحد مايتمناه
البنات آمين
دانه: يارب اجبر خواطرنا انت مطلع ع الحال اللي نعانيه.. يارب فرحنا بأي شي خطبه
والا سفره والا جوري تحمل او اي شي المهم نفرح شوي
دخلت ام فيصل على اصواتهم: وش عندكم
ساره: ابد نبتهل الى الله
ام فيصل: طيب من بتروح معي السوق نقضي لوازم التمايم
ساره: انا
ام فيصل: اجهزي بسرعه والا حمد بيروح عنك
ساره: جاهزه بس بلبس عباتي
وجت تطلع ام فيصل ورجعت: نسيت اقول لكم جمانه بتنخطب
طالعت دانه في ساره ونوف
وتناقلوا النظرات وفجأه ضحكوا
هههههههههههههههههههههه
ام فيصل: خير عسى ماشر دغدغتكم الكلمه
نوف: هههههههههه تو دانه تدعي
ام فيصل: دعت ان جمانه تنخطب
دانه: لا بس ان ربي يبدل حزننا بافراح
ام فيصل: ربي مهما ابتلى عبده ماينساه وتراه رحيمن علينا ارحم من الام بضناه
صلوا تالي الليل واطلبوا الله بينكم وبينه كل اللي تبون وماخاب من نخا رب العباد
ساره: ونعم بالله
ام فيصل: يالله عجلي وانا امتس انا نازله
..............
رجع تركي هلكان
ابو تركي: وين كنت
تركي: ادور بيت
ابو تركي: وشوله
تركي: مو ماتبينا
ابو تركي: رجع مرتك ياتركي هذا بيتها
متفاجئ: مو طردتها
ابو تركي: زلة لسان قول لها عمك محمد يقول ارجعي
ولو تبي اعتذر لها والله اعتذر لها قدام الكل
تركي: لامحشوم انا بكلمها وبشوف
ابو تركي: دق عليها بكلمها
دق عليها وردت: الو
ابو تركي: السلام عليكم
جوري: عمي
ابو تركي: ايه عمك
جوري: تركي فيه شي؟؟ خالتي فيها شي
ابو تركي: كلهم بخير.. شوفي الحين بيجي تركي ياخذك ما ابي اعذار
جوري: جاي ياخذني
ابو تركي: ايه نعم زهبي حالك
اختفى صوتها كان واضح ان فيه احد جنبها يكلمها
بعد برهه: طيب قول له يجي
ابو تركي: الله يكملك بعقلك هذا اللي تعودناه منك
وقفل
جوري: يبه ليش كذا
ابو طارق: جل من لايخطئ هو حاس بالندم ويكفي قال ارجعي لاتشوهين الصوره اللي ماخذها الكل عنك..
مهما قست الظروف ومهما قسى عليك احد خليك على طبعك وانا ابوك
واذا الله يغفر ويسامح مو صعب علينا حنا عبيده نسامح
جوري: اللي تشوفه
راحت نوف ودانه عند ندى ومنى بيشوفون المواليد يمكن ماشافوهم الا مره وحده ومنى متشرهه عليهم
كانت الجلسه حلوه وممتعه بحضور اماني الفرفوشه
اماني: تركي مره يشبهك يامنى يهبل
دانه: لو اني ماخذه عليك كثير كان زبدت لك يعني وش فيه سلطان والا عشانه يشبه فيصل
اماني: والله انه يجنن وبعدين ازبدي يختي عادي تمونين ..ترا ماتعودت اكون اخلاق احب المناقر واجد
نوف: اجل تصلحون على بعض
اماني: لاعوذه من اختك
ندى: هههههههههه بدت الحرب
دانه: صبر خل افلعها بشي
اماني:لالالا الا الطقاق تكفين انا حيلي وقوتي بلساني
دانه:والله ياريم ان ماوريتك!!
اماني: ريم!!! والله ودي شفتها لو مره
ندى تصرف: تشبهينها مره.. المهم يلا انا بروح اجيب الحلا والقهوه
منى تغير دفة الحديث: دانه شوفي الرضعه حقة عيالي بغرفة نادر ارقي جيبيها
تغير وجهها: ما ادلها
منى: اول غرفه ع اليمين
قامت وعيون نوف تتبعها
نوف: وش موديها هناك
منى: ناسيتهم رحت اسولف عنده مع هالمزايين وه ياحبي لهم ياناس وبوستهم
شافت بعيون نوف شي وتذكرت الموقف اللي صار لدانه معه في بيت ابو جمانه سبت نفسها بس ماكانت قاصده
للمره الثانيه تصرف: وين ساره ماجت معكم
نوف:راحت مع امي السوق .. بتلحق علينا
منى: اهااا حلو وجوري بعد جايه
نوف تكلم اماني: ورا ماجت معك
اماني:بتجي توضب اغراضها.. طلعت وتركي يستناها قلت لها بنتظرك بس ابوي قال اسبقيها
راحت دانه غرفة نادر وقعدت تدور
شافتها جنب الطاوله راحت خذتها
لفت بتطلع الغرفه شافت اللاب ع السرير مفتوح ع المسن
فضولها جرها جر له
قعدت ع السرير
خطرت في بالها فكره
فتحت صفحة مسن ثانيه ودخلت ايميلها اضافته وحذفت الصفحه
ورجعت لايميله قبلت الاضافه
وتنهدت تحس انها مستانسه
وقفت والقت نظره ع الغرفه
دق جوالها صارخت:يمه
طاح جوالها
ضحكت على نفسها وردت: هلا منى
منى: هالقيتيها
دانه: ايه نازله
انبسطوا وضيعوا وقت ضحكوا وكانت الجلسه مزح وذبات بين دانه واماني
واحلوت الجلسه عقب ماجت جوري وساره
...............
يوم الخميس
حفلة التمايم
وبعدها باسبوعين قرروا يكون زواج ساره وعبدالرحمن
.
.
.
ارسلت له رساله
يبقى الغلا ما بيننا والمشاريه
والشرهه اللي بالخواطر تروحي
كلن يعاتب بعض الاحيان غاليه
والحب يبقى فوق كل الجروحي
الحب لوشانت علينا لياليه
نصبر وبسرالغلا مانبوحي
طبع الوفا بيننا مانخليه
يسري بروحك مثل ماهو بروحي
توه طالع من عند الحلاق
جا بيفتح سيارته جاه المسج
شافه تبسم" ياحليلها لسه عايشه"
ارسل لها رساله:
طبع الوفا بيننا مانخليه
يسري بروحك مثل ماهو بروحي
لاتكونين واثقه في هالبيتين
ارسلت له:
ملكت القلب ولا تكثر ظنونك
ولو قلبي يبي غيرك نهرته
يمر البال ناس يشبهونك
كثر ما مر غيرك ما ذكرته
رياح الشوق تستأذن سكونك
بها من الوجد فوق اللي انتظرته
يكفيك العمر فدوه عيونك
وكل الحب بدربك نثرته
ارسل لها: طيب ياشاطره من انتي
ارسلت:قلت لك وحده تحبك
ارسل: وناسه بجي اخطبك دام تحبيني
ارسلت: تتريق على قد كيسك
ارسل: كيسي مليان وبيزيد على مهرك الفايض
ارسلت: ههههههههههههه لآخر عمري احبك
ارسل: جد انتي مين
ارسلت: انا اللي كل شي اسويه لعيونك ياولد محمد
ارسل:بعد تعرفين اسم ابوي
ارسلت: واكثر من كذا
ارسل: طيب فاجئيني بشي ثاني
ارسلت: اعرف ايميلك
استغرب وش عرفها لاتكون هكر والا الاعيب
اكيد تلعب باعصابي
تأخر رده عليها ارسلت: هالدقايق اللي معك عيشتني بسعاده شكرا لانك عطيتني من وقتك اشوفك الليل ع الايميل
حقرها لازم يعرف من هذي سالفة الايميل خلت شكوكه تزيد
دق على خالد :هلا نادر
نادر:بالله شوف لي هالرقم من باسمه
خالد:ياليتني ماقلت لكم اني اشتغل بالاتصالات طلعتوا ريحتي
نادر: وجعه اول طلب وآخر طلب تكفى نفذه
خالد:آسف انا مانفذته لغيرك انفذه لك
نادر:انت خابرني ما أأذي احد
خالد:ايه داري بس ياخي ماينفع لو نفذته لك بكرا بيجيني واحد غيرك ويسوي نفس ماسويت
نادر: اوك تبي شي
فكر: خلاص هات الرقم
نادر: لاخلاص عادي
خالد: ياحمار بسرعه مانيب فاضيلك
نادر:ههههههههههه الحمار اللي جابته خالتي هيا ينادونه خالد
خالد: انعن هالراس قليل خاتمه وانا بساعدك
نادر: هههههههه اكتب اكتب ********05
خالد: خلك معي ثواني
.
.
.
خالد: باسم مجهول حظك بايخ اكيد وحده
نادر:وحده ثنتين مو شغلك
خالد: زين يلا اقلب فيسك
ضحك نادر على خالد مايدري ليش يضحك يمكن انه ارتاح ان شكه مو في محله
رجع البيت
ام تركي:زين الله جابك ابيك تودي هالصحون الاستراحه
نادر: بتسبح وتالي انزل أخذهم
ام تركي:طيب لاتتأخر
نادر: ان شاءالله
رقى غرفته تسبح وتأنق وتوه بينزل شاف
اللاب لازم يشيك
فتح اللاب
مافي احد متصل
شاف ايميل غريب التوبيك البارونه
بعمره ماضاف بنت شلون قدرت تضيف نفسها عندي
فتح نافذه وارسل لها
على بالك خفت يوم تعرفين ايميلي
رحمتك صراحه
...............
سعيده باللي حصل تو مع نادر
حتى لو انه مايدري انها هي كفايه انها طلعت شوي من مشاعرها تجاهه
دق جوالها رقم رشا وش تبي ذي
ردت: هلا
رشا: هلابك كيفك
دانه:الحمدلله وانتي
رشا:بخير
دانه: وش قصتك تختفين ايام وترجعين
رشا: ظروف
دانه :الله يعينك.. تعالي وين اللي قالت بتجيني
رشا:هااا
دانه:هاااا حلوه الاجابه
رشا: تطلقت
دانه:لاحول ولاقوة الا بالله كلمتيني ذيك المره عقب انقطاع وقلتي تزوجت
والحين تنقطعين وترجعين تطلقت وش حكايتك انتي
رشا: خليك مني المهم ماشاءالله اليوم تمايم عيال منى
دانه:من قال لك وانتي منقطعه
رشا ارتبشت: يعني خبر حلو مثل كذا كل الحريم يتناقلونه
دانه:اهااا
ماكملت عدتها و ودها تحضر باي شكل من الاشكال عشان تشوف جوري : بيجون كثير
دانه:ايه العايله وكل من يعز علينا
رشا:وانا مو عزيزه
تضايقت دانه : عادي حياك
رشا:اوك نتقابل الليله
...............
عبدالرحمن:يلا يمه تبون تمشون معي
ام تركي:لا بنتأخر شوي خذ نص الاغراض ذي ونادر بياخذ نص يمكن نجي معه او مع تركي
عبدالرحمن:اها طيب
اخذ الاغراض على ثلاث دفعات ورجع:باقي شي؟
ام تركي:لاخلاص مانبي نكرفك واجد عرسك قريب
عبدالرحمن:ههههههههه عز الله ماقصرتي يعني اللي تو مو كرف
ام تركي: والله هذا قليل من اللي يشوفه نادر الله يخليكم لي يارب
عبدالرحمن يبوس راسها: ولامنك ياست الحبيايب يلا سلام
ابو تركي توه نازل:اصبر يادحيم خذني معك وراحوا
ندى:يمه
ام تركي:هااا
ندى وهي تدور:زين شكلي
ام تركي:حلو يمه .. يلا اصعدي لجوري شوفيها خلصت نبي نمشي مع بعض
ندى :طيب
طلعت لجوري لقتها قاعده
ندى:اووف ماخلصتي
جوري:موب رايحه
ندى: قووومي اخلصي والله كلهم بيزعلون عليك.. قويه ماتحضرين
جوري: ماعندي ولافستان صاحي
ندى:خلي عنك ياكثر فساتينك الجديده تنقي واحد ويلا
جوري:تبين الجد مالي نفس وامانه اذا سألوا عني قولي اي شي صرفيهم
ندى:جوووري والله شينه ماتحضرين
جوري :تكفين ندى اول مره اطلبك
ندى:ان شاءالله... وطلعت
دخل تركي بعد اخته كنه البخت ومرسم وكل ماله يحلو استغرب جوري اللي منسدحه
راح عندها وجلس:شفيك
جوري:ولا شي
مسك جبينها يشوف حرارتها: حاسه بتعب
جوري:مافيني الا العافيه بس بنام
تبسم تركي:ودي اقولك جعله عوافي بس انتي ناسيه اليوم التمايم ورا ماجهزتي للحين
جوري:لا مانيب رايحه
تركي: لا يادبا قومي ماعندك عذر
جوري:ماعندي فستان
تركي:كان قلتيلي ونروح وناخذ اطلق فستان
جوري: وشششو هو غصب اروح
تركي: لا والله مو غصب بس كنوع من المجامله نكمل فرحتهم
جوري: روح جامل بروحك انا مابي
تركي تحامل نفسه : ترضين امي تزعل عليك ترا اول مره تصير جده
جوري:اففف لا ما أرضى وخلاص الجايات اكثر ..روح الحين تلقى نص المعازيم احضروا
تركي وده يخنقها بسبب اسلوبها
بس تحامل مره ثانيه على نفسه وسكت
وقومها:عادي الحين نروح السوق وتاخذين اللي تبين وانا بحتريك ماراح تطير الدنيا
جوري: ياخي وش هالملاغه وش ثقالة الدم ذي ماابي ارووووح افههههههم
عداد القهر والعصبيه وصل اخر مدى عنده
وخر الشماغ ببطئ وفك ازارير ثوبه ودخل يدينه بشعر ودنق
:بكل الوسائل كنت ابي اتقرب منك ..ليش مدري ..
ابي شي حلو في اسلوبك يفسر ليش ابي قربك مالقيت..
وش اللي حدني اتحملك لاخذيت منك لاحق ولاباطل..
جوري:والله عاد هذا انا
تركي رفع صوته هزها هز كان بيفقع طبلة اذانها: اصلا انا حـ ـ ـ ـ ـمـ ـ ـ ـ ـار اللي اعطيك وجه واكلمك.
تسسسمعين
حـ ـ ـ ـ ـمـ ـ ـ ـ ـار..
انكمشت جوري على نفسها حست انها تمادت وحست انه خلاص عصبيته شينه وكيله طفح وبيقتلها
شال شماغه وقام يجر رجوله لين وقف عند الباب..
تركي: كنت بوافق اكون اي شي تبينه لكن اني اكون حمار وطرطور والله تعقبيــــــــن..
ومن بكرا بوديك لأهلك خلااااااااص مليت ابي ارتااااح
وصفق الباب
جوري صارت ضايعه بين جوري الطيبه وجوري القاسيه تسأل نفسها وترد بنفس الوقت
تحس نفسها تحررت بس هل ياترا هذا اللي تبيه..؟
لا هي ماتقدر تستغني عنه هي تحبه وتموت فيه..
اجل ليش سوت معه كذا ليش عاملته كذا..
كانت تبي تاخذ حقها منه..
هو اللي خلاها تستحقر نفسها وتحس نفسها غير مرغوب فيها..
بس هو اعتذر صحيح ما اعتذر بصريح العباره بس اعتذر بطريقته كان يداريها ويتلافى اي حاجه بتأدي لمشكله..
خلاص الظاهر بينتهي كل شي..
ليش ماسمعت كلام سميره ..سميره اللي كانت مثال حي على فن التعامل مع الزوج..
ليش نست نصايحها هي قالت حتى لو كان الامر فيه خيانه مفروض ماتخسره وبالذات اذا كانت تحببببببه..
لاياجوري اصحي قبل لايضيع حبك وانتي تطالعين
.
.
.
.
في الاستراحه
كان ودهم يحطون دي جي بس مراعاة لوفاة ريم
خلوها بدون
كانت رشا موجوده تراقب متى تحضر جوري
من بعيد كانت واقفه دانه مع اماني
اماني:شفيك تحقرينها كذا
دانه: تؤمنين بالله
اماني: آمنت
دانه:شفتي ذي كنت انا وياها مثال يضرب به في الصداقه
اماني: طيب شي حلو
دانه: ايه حلو لكن تغيرت علي 180 درجه غيرت ارقامها وقطعتني
اماني: اووف
دانه:لا وازيدك من الشعر بيت تزوجت ولاعزمتني
اماني:اوما عاد وليش عازمتها
دانه:والله هي اللي عزمت نفسها انا خلاص تغيرت نظرتي لها
اماني: مع اني ما اعرفها بس خذيت منها موقف
دانه:لالالا اللي بيني وبينها ما ابي اي احد يأثر فيه..
عادي يمكن معكم تكون احسن مما تكون معي
اماني: يمكن..
ندى:رشا تعالي تبين تشوفين التوم
رشا:ايه يالله
راحوا وشافوا البنات ملتمين عليهم كل وحده تبوسهم وتحط لهم هديه
سلمت عليهم هي بعد.. وطبعا بدون هديه هالمره حماسها انها تشوف زوجة تركي نساها
رشا:ماشاءالله الله يخليهم لك مايشبهون لبعض مره
ندى:اي واحد فيهم احلا؟
منى:ندى وجعه كلهم حلوين
رشا:كلهم كنهم البدر بس هذا احلا
ندى:قصدك تركي
رشا:تركي!!
>>>-:ايه تركي الصغير على حبيب قلبي تركي فديته!!!!
طالعت صوب الصوت
شوي ويطلع الشرر من عيونها تبي تشوف من هالوقحه بنظرها اللي تقول عن تركي حبيبها
ندى:دبدوبه جيتي
رشا:من هذي؟؟
ندى:هذي جوري زوجة تركي اخوي ماتشوفينها تتفداه علني
كانت لابسه فستان سماوي طويل ماسك من الصدر ومن تحت كل ماله يكون اوسع
كانت مروله شعرها وحاطته على جنب وحاطه ورده سماوي
والميك اب بسيط هي عيونها وساع فركزت على رسمة العين فطلع شكلها توب
سلمت ع الموجودين
ساره:وليش قالوا تعبانه وانك منتب جايه؟
ندى تكلمت قبل جوري تجيب عذر ثاني: ايه انا طلعت وكانت مصدعه
جوري:ابشرك صرت ازين معليش اشغلتكم معي
ندى:الا شكلك اشغلتي حبيب الألب
جوري:ايه بعد قلبي تروكي تعبته معي
رشا انسحبت الحمام تبكي.. "الكذاب عايش بنعيم وانا عشت بجحيم ماكنت اتصور ان وحده بتاخذه مني"
والبنات في هيصتهم ونكتهم والحريم في سوالفهم
منى بهمس:جوري وش فيك
جوري:وش فيني
منى:شايفه تغيرات ترا افهمها وهي طايره
جوري ارتبكت:وشو
منى:تعالي داخل
راحوا غرفه من غرف الاستراحه من سوء الحظ ان رشا في الحمام اللي فيها ..
اول مادخلوا حطت ايدها على فمها تكتم بكاها وكانت الغرفه هدوء يعني اكيد بتسمع اصواتهم واضحه
منى:يلا بسرعه اعترفي
جوري:اعترف بايش
منى:ليش لابسه هالفستان
جوري تطالع نفسها: شككتيني بنفسي ليش مو حلو
منى:لا حلو بس شكلك تغطين شي
جوري: فريتي مخي وش تقصدين
منى:فستانك واسع انتي حامل صح؟!
جوري انهزمت قدام عواطفها وارتمت في حضن منى تبكي كان ودها تشكي لأي احد
منى:بسم الله وش فيك لايكون ماتبين الحمل
جوري:اي حمل يامنى اي حمل ..تركي ماقد لمسني ليومك
منى:ايشششش.. فيه عيب هو
جوري: العيب في تعامله معي
منى: وش سوالك طيب
جوري:عيشني بظلم وضيم كله عشان اللي يحبها
منى:لاااااااه مانتي صاحيه شكلك تمزحين
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك