رواية ايامنا الحلوة -4
التمن حول الصينيه ومدت وضحى يدها وصبت لخواتها حليب
مدت اشواق يدها للخبز وذاقت منه شوي وتفلته من فمها
ووهي تركض للحمام
منيره : بسم الله وش فيس يعلس العافيه
اشواق : شيهانه عساتس البلى كم انتي حاطه
علبة ملح مالح ماااااااااااااااالح وش ذا
شيهانه :بس حطيت 3 ملاعق
اشواق :حرام عليس جوعانه وبرداته
شيهانه : والله مالي دخل سويته زي ما علمتني امي
اشواق : والله بكره تغسلين مواعين الغدا
طارت عيون شيهانه وقفت وبدت عيونه تدمع :
ياسلام والله انتن وعدتني ورحت سويتلكن مالي دخل اذا ما اعجبكن
اشواق : بالله وانتي تسوين هالخبز ما ذقتيه
شيهانه : الا
وضحى : طيب وش رايس ينوكل والا لا
شيهانه : بصراحه لا
وضحى : خلاص تساعدين انت ومنيره على مواعين الغدا
راحت شيهانه وهي تحلطم وتصيح عند امها
وضحى : يله خلصن حليبكن وشيلن حوستكن
ونامن بكره مدرسه
**********************
ابو مساعد وصل لبيته وانتظر نزول بادي من السياره
امسك به من يده دليل الحفاوه والفرحه
به كان يقوده الى مجلس الرجال
واذا بشابين واقفين بانتظار الضيف
اقبل الشاب الاول واحتضن بادي بكل حراره
هلا والله بخالي بادي هلا بريحة امي
كان مساعد محتضن خاله بادي ويقبل راسه
ويده وخده وبالمقابل بادي بادله الاحتضان
والقبل كان ينظر لوجه مساعد ويقبل خده بادي:
وشلونك يا مساعد
ماشاء الله تبارك الله والله كبرت وصرت رجال وانا ابوك
مساعد : الحمد لله
ياخالي بخير انت بشرني عنك وينك ياخال وينك من زمان عنك
ابو مساعد: ياولدي خل المعاتب اهم شي شفناه وهو الحين بينا
اقبل فهد ولف له ابو مساعد
وهاذا نسيبي اخو ام ماجد وخال عيالي سلمو على بعض بحفاوه
ابو مساعد: ولدي يا مساعد روح داخل وقلهم يجهزون فراش لبادي ويعجلون بالعشى
مساعد : ابشر يابوي هالحين
بادي : لا ياولدي ماني بمرح هنيا انا جاي
ابي ابوك بسالفه وماشي زوجتي بالمستشفى
وتاركها والله اعلم بحالها
ابو مساعد: لا اله الا الله يابن الحلال
مانا بمخليك تسري بها الليل ومرتك
ما عليها خلاف لا اصبحت تيسر الله يسر لك
بادي : معليش خيرها بغيرها ان شاء الله اجيكم بس اول
ابيك بسالفه واذا يسمحون لنا الشباب نكون لحالنا
مساعد وفهد قامو وخلوهم براحتهم صار
انتباه ابو مساعد وتركيزه بالكامل عند
بادي بادي بدى يعرق ويحس ان بحلقه
شي يسده عن الكلام تنحنح ومسك
يد ابو مساعد وشد عليها
: ابو مساعد تكفى ابيك تسامحني يا اخوك
ابو مساعد انتفضت يده وفتح عيونه :
مسامح يا خوك بس على ايش اسامحك
بادي: انا سرقتك وانت ساعدتني بسرقتي لك
ابو مساعد : انت وش تقول يابادي وش اللي سرقته
وانا ساعدتك فيه وشهو
بادي وهو يحط عينه بعين ابو مساعد : بنتك
ام نايف
دخلت غرفتها
واتجهت لصندوق حديد مرسوم عليه منظر ربيعي
وله قفل طلعت مفتاحها من طرف مسفعها مربوط
بطرفه وفكت الصندوق وطلعت صوره قديمه مهترئة
الاطراف باللون الابيض والاسود وجلست تبوس فيها
وتصيح : يالله تجمعني فيه يالله اني طالبتك ان تفرج
همه يالله وصارت تمسح دموعها بمسفعها
: يمه منههو ذا اللي بالصورة اللي معس ؟؟؟
ام نايف وهي تمد يدها لبنتها بسمه هذا يا حبيبتي ابوتس
بسمه : اول مره اشوفه يمه في صور ثانيه له
ام نايف: ايه وحده شوفيها في خزانة الملابس صورته مع نوف
بسمه:وانا يمه مالي صور مع ابوي عشان اوريها بنت ابلا بدريه
ام نايف : لا ياقلبي ابوتس مات قبل لا تنولدين بس
وش معنى بنت ابلا بدريه
بسمه: عشان دايم تقهرني ان عندها ابو وانا لا
ام نايف بغصه : الا يا قلبي ردي عليها قولي ابوي
احسن من ابوتس الدب
بسمه:هههههههههه صح ابوها دب مررررررررررره
زي كذا وهي تفتح ايدنها كلها تنفخ خدودها
**********
ابومساعد : بنتي !!!!!!!!!!! بنتي انا وشلون ؟؟؟؟؟
انت ما قلت لي انها ماتت يوم جيت وسألتك
بادي: لا يا ابو مساعد بنتك عايشه
وانا يوم تجيني خفت تاخذها مني
ابو مساعد وهو يحس احساس غرررريب
ما يدري وشهو يصدقه والا يكذبه يخنقه
والا يضمه يذبحه والا يطمنه ماهو مصدق
ابداا : بادي انت تقوله صادق بنتي للحين
عايشه تكفى قول انك صادق وان ذا الكلام حقيقه
بادي : والله اني صادق بنتك سميتها على اسم امها طفله
تبسم ابو مساعد ووترحم على طفله
باديي مستمر بالاعتراف لأبو مساعد بس تراي مسجلها باسمي
ابو مساعد يحاول يكبت غضبه بس ما قدر ارتفع صوته
: ليش يابادي ليش توك تعلمني بوجودها
وليش تسجلها على اسمك ليش
بادي وهو يبادله النظرات ويواجهه بالماضي:
تذكر يابو مساعد كم مره جيتك بعد وفاة طفله
وقلت لك بنتك لازم تروح وتاخذها كنت تهج من
قدامي ما تبي سيرتها بالله كم مره
نزل نظره ابو مساعد بالارض وهو عارف
ان كلام بادي صحيح وانه السبب الاول في اللي سواه
بادي : يا خوي وش تبيني اسوي واحد
ومايبي ضناه وانا محروم من الضنا ماتبيني
استقبل الهديه اللي جتني من الله
تخيل نفسك مكاني وشوف ايش ممكن تسوي
ابو مساعدوهو يمسح وجهه ودموعه :
ياالله ماني مصدق طول الفتره اللي
فاتت ونا دايم اقول لنفسي ليش
اختفى بادي مافكرت انك ماخذ بنتي
لأني كنت متأكد انها ماتت لمن سارت
تجيني الحلوم اللي قلتلك عنها واختك
تأنبني وتسألني عنها
بادي : انا ابي السموحه منك وابيك تعطيني
مهله اشرح لها السالفه واعلمها بالحقيقه
ابو مساعد بلهفه : وليش ما تقولها
اول ما توصل وبعده اجيك واشوفها
وتتعرف على ابوها الصدقي
بادي : ابو مساعد اعتقد ان هالسنين اللي
فاتت وانت ماتدري عنها تقدر تكملهم كم يوم
لين اضبط اموري وامور امها ترفه
ابو مساعد : خلاص تم اجيك بعد يومين
بادي لا لا للا يومين خليها اسبوع وتعال
ابو مساعد خلاص اسبوع اسبوع
***************
صباح بارد جدا تتخلله رياح بارده والصقيع يملء المكان
أصبحنا وأصبح المُلك لله والحمد لله
لا إِله إِلا الله وحده لا شريك له، له الملك وله الحمد
وهو على كل شيءٍ قديرٌ،
ربِّ أسألك خير ما في هذا
اليوم وخير ما بعده وأعوذ بك من شرِّ ما في
هذا اليوم وشر ما بعده، ربِّ أعوذ بك من الكسل
وسوء الكِبرَ، رب أعوذ بك من عذابٍ في النار وعذابٍ في القبر
كان بادي يردد هالدعاء وهو راكب سيارته متجه لبنته وزوجته
كان يحس انه خفيف انزاح الثقل اللي على
قلبه نام وهو باله مرتاح سنين وهو حاس
بالذنب بس ارتاح يومنه علم ابو مساعد
عن طفله ودعى الله ان طفله تفهم موقفه وتقدر اسبابه
*******
ابو مساعد من فرحته ما قدر ينام بس كان يتقلب
وده يعلم كل الناس بوجود بنته قرر ان اول واحد
يستحق انه يدري بالخبر ولده مساعد وفعلا كان
جالس بحوش بيته يفطر مه ام ماجد والشمس
معطيه دفاها بكل حنيه وصوت العصافير حولهم يشرح الخاطر
اقبل مساعد وسلم على راس ابو ه وصبح على ام ماجد
ابو مساعد : ياولدي ترى خالك يسلم عليك مشى الفجر
مساعد: ليه مستعجل ماقعدت معه ليه ما مسكته يابوي نغديه
ابو مساعد : لاحقين خير يابوي انت
لا خلصت فطورك الحقني على المزرعه بقولك سالفه
مساعد وهو يشيل كاسة الشاهي اخلص هالكاسه ولاحقك
لف مساعد على ام ماجد : كيف اصبحتي يمه
ام ماجد بخير جعلك بخير
مساعد : وين فهد ماصحي
ام ماجد : الا بس راح لدلوعته هنوده يبي
يستعجلها عشان يوديها للمدرسه
هند وفهد وماجد بصوت واحد صباح الخير
مساعد : صباح النور وحط كاسته وراح يلحق ابوه
فهد: خير وش بك قمت والا لا حضرت الملائكه
مساعد : وينهم الملائكه اللي حضروا ما اشوف
ملاك الا امي مزنه والباقي الله اعلم فيهم وهو
يرفع حواجبه ومبتسم
فهد وهو يتمسخر بمساعد: اقول رح احسن
لك قال مافي ملائكه الا امي مزنه
هند بكل دلع : ماجد يله تأخرنا
ماجد انا خالص من زمان انتي اللي مدري
شتحوسين فيه من الفجر جت هند
وخبطته على كتفه وهو شد عبايتها
هند : خالي فهد شف البايخ ذا وش سوى حاس لي عباتي
فهد: يله يالدلوعه انتي فعلا اللي اخرتينا يله نسلم عليتس وهو ياخذ مفتاح سيارته
ام ماجد : الله يحفظكم
****************************
الساعه عشرة الصباح ابو محمد
وام محمد طالعين من عيادة النسا والولاده
ام محمد : الدكتوره خوفتني تقول اني كبيره على الحمل
ابو محمد : يابنت الحلال كل شوي
وهم طالعين لنا بسمعه جديده
ياما حريم قدتس واكبر منتس
ماجاهن شي يوم حملن خلتس منها
توكلي على الله وامشي نمر ام طفله
راحو للقسم الي فيه ام طفله دخلت
ام محمد ولقت طفله جالسه عند راس امها تقرى قرآن
طفله شافت المرة اللي دخلت عليهاماتدري
من يمكن يدخل عليها بس فكرت يمكن
وحده غلطانه بالغرفه بس رفعت ام محمد
غطاها وتهب طفله تركظ لها وهي تصيح
وحضنتها مر عليها البارح يوم عصيب ومحد
عندها ماصدقت على الله انها تشوف وجه
تعرفه وماهو اي وجه ام محمد الحنونه
ام محمد : بسم الله عليتس لا تبكين يا حبيبتي
طفله تصيح وتصيح وام محمد حاضنتها
وتسمي عليها لا ياامي مايسير كذا
امتس ان شاء الله بخير واعرفي انه
تكفير ذنوب وانها ان شاء الله مؤمنه
لأنى الله يبتلي المؤمنين ويمتحن صبرهم
طفله وهي تمسح دموعها وخشمها :
ادري يا خالتي بس من يومين وهي
ماترد علي اول تهذي بس الحين
ساكته يقولون غيبوبه وابوي راح امس
الصبح ولا عاد رجع مدري وينه قلقانه عليه
ام محمد : لا تقلقين ولا شي اسأل ابو محمد
كان شافه وطمنتس عليه
راحت ام محمد لقت ابو محمد واقف برى
الغرفه ومعه كيس فيه مويه وعصيرات
ومده لأم محمد اخذت الكيس
وسألته عن بادي ابو محمد : طمنيها بادي رايح
مشوار ووصاني عليها ان بغت شي تعلمس وانا حاضر
ام محمد : لا هي بس قلقانه عليه
ابو محمد : طمنيها ان شاء الله ما يطول عليها
ام محمد : شف انا بقعد عندها وانت لا جى وقت الزياره
جب وضحى وتعال مسكينه البنيه ماتنخلى لحالها عقلها
بيزيغ من ا لخوف على امها وابوها
ابو محمد : خلاص تم على اني ما اقوى على بعدك ياجمييييييييل
******************************
مساعد وابوه في المزرعه
ابو مساعد : والله اني صادق واسمها طفله بعد
مساعد وهو ماسك يد ابوه ويشد عليها
والله عندي اخت شقيقه لي اختي
انا من ريحة امي انا تكفى يابوي
لايكون تمزح معي تراني من كثر مقالبك
انت وفهد صرت اشك بكلامكم
ابو مساعد:والله ثم والله خالك رباها بعد وفاة امك
تذكر ذيك الايام انا كنت ماني مع الناس منكثر حزني
كنت رافضها وخالك ياما حاول فيني اشوفها بس
انا كنت اهج عنه قام هو اخذها وطلع من الديره
واستقر هناك وربى اختك
مساعد : طيب ليه ما جابها معه وخلانا نشوفها
ابو مساعد : لانها متدري عن
ذا الكلام كله ماتعرف عنا اي شي
مساعد : ومتى يبي يعلمها
ابو مساعد : وعدني بعد اسبوع يكون قايلها
مساعد من فرحته وده يطير لها وده يشوفها في هاللحظه
*************************
ابو عبد الله :اسمعني يا صالح انا بروح
اكلمهم اخر مررره وان شاء الله تلين قلوبهم
صالح : خلاص يا خوك عشر سنين وان متأمل
بولدهم الصغير يكبر بس راح الامل
ابو عبد الله : يأست لازم نحاول ونحاول
لا تعتقتد اني بيصيبني اليأس زيك
صالح : تكفى ابو عبد الله وصاتك نايف
وخواته وام نايف دخيلك لاتضام بعدي
والله ما انسى رجاها لي اخر مره كنا مع
بعض تقولي لا تروح خلك معنا انا قلبي
مقبوض وانا اضحك عليها ومستخف با احساسها
وكان اخر علم لي بها هاك اليوم الله لايعيده على
مسلم
*************
الجزء السادس
رجعت الذاكره بصالح عشر سنين
لاخر مره كان في بيته وسط عياله
صالح :يا ساره وش فيتس كأنها اول مره اطلع للقنص
ساره : اعذرني والله ان قلبي مقبوض يا بن الحلال
صالح: من وش مقبوض تعوذي من الشيطان يابنت وعطيني البندق اللي انت داستها
ساره : تكفى يا صالح واللي يرحم والدينك اقعد هالمره بس عشاني
صالح : ما اقدر والله ياام نايف الحين ان اللي طالبهم وعشاني طالعين للقنص اهون لا واللي يخليتس لي
جت ساره وحطت راسها على صدر صالح وحاوطت خصره : صالح تكفى تعذر منهم تكفى وهي تصيح
صالح : احوووول اقولتس ما اقدر ويالله عطيني البندق ابي امشي
وخرت عنه وهي تمسح دموعها وراحت تجيب بندقه مدتها له وهي صاده عنه سحبها بيدها وضمها : اهون عليتس اروح ماشفت عويناتس
اهوه ساره يا قلبي ناظريني يالله ابي اخذ جرعه قبل ما امشي
رفع راسها بيده ناظر عيونها وحب راسها ومشى وهو عند باب البيت : ناظرها لأخر مره استودعكم الله الذي لا تضيع ودائعه
تجمع هو واصدقائه بعد صلاة الفجر وركبو سياراتهم كان كل ثلاثه بسياره كان صالح مع ابو خالد وابو عبد العزيز وطول ماهم ماشين كل واحد يجيب سالفه او قصيده وبكذا ينسون طول الطريق وصلوا للمكان المقصود ونزلو عفشهم وعزبتهم
ريحو ا شوي وبعدها بدو رحلة القنص وما اذن العصر الا وهم مجتمعين على الغدا وكلن يستعرض سلاحه وصيده
ابو عبد العزيز : ان اشهد ما بعد بندقك يا ابو نايف بندق
ابو نايف : اذكر الله وقل ماشاء الله
ابو عبد العزيز : لحول وش انا قايل ما انا بحاسد بندقك
ابو نايف : طيب اذكر الله
ابو عبد العزيز : الحين تقول اني حسود طيب ماانا بقايل ماشاء الله اعرف نفسي عيني بارده
او نايف : والله لو صار لبندقي شي يا ويلك
ابو عبد العزيز قام وهو زعلان وهو يتحلطم
جى ابو خالد يابو نايف خله عنك ذا الله يكفينا شره
ابو نايف : ماهي بضارته قولة ماشاء الله بس عنطزه وقل عقل
فعلا في ناس ماتذكر الله لا اعجبها الشيء واذا ذكرتهم ردو وبكل قواة عين انا ما احسد ترى عيوني بارده ومن هالكلام
في الليل ابو نايف جالس على فراشه و ينظف سلاحه وجى بيفككه الا هو معلق صمام الامان مدقر حاول ماقدرر ضغط الزناد بعد معلق مايتحرك فز من فراشه وراح لأبو عبد العزيز والرجال مجتمعين على النار
ابو نايف : شفتو ها اللي يقول عينه بارده بندقي معلقه ولا ني بقادر افككها ولا اني قادر اضغط زنادها
ابو عبد العزيز : لا اله الا الله تصدق ماعاد انا بمادحن لك شي تنشب بالحلق اشوف هاتها
مسكها ابو عبد العزيز وحاول فيها حاول معلقه الزناد معلق
قام ودقها بالأرض بشكل طولي دقتين وناولها صالح اشوف خذ جربها هالحين لا نبتلش
اخذها صالح وضغط الزناد مره ثنتين بعد مستمر الزناد وهو معلق
ابو خالد : ابو عبد العزيز يا اخي اذكر الله يمكنها تصلح
ابوعبد العزيز : احوووووول هه ماشاء الله تبارك الله بعد
طااااااااااااااااااااااااااااااااااااااااااااااااخ
********
بادي وصل للمستشفى وعلى طول راح لغرفة ام طفله وهناك لقى ام محمد طلعت طفله لابوها
وهي ملهوفه
طفله وهي تصيح : يبه وينك وينك امس كله ماشفتك ليش طولت علي
بادي كان ساكت بس حاضن طفله وهي تصيح بحضنه ناظرته طفله وهي تمسح عيونها بقفا يدها
: يبه ترى ام محمد عندي جتني الصبح وقعدت معي
بادي : ايه الله يجزاها بالخير والله مالحق جزاهم الناس الاجواد
طفله : يبه وين رحت شغلت بالي عليك
بادي : قريب خلصت شغله ضروريه ورجعت
اشلون امتس هالحين مريت الدكتور مالقيته
طفله : يبه امي مرره تعبانه من ذيك الليله وهي غايبه
بادي وهو يدعي من كل قلبه : الله يلطف فيها الله يلطف فيها
انابروح ارتاح وارجع سيارة ابو محمد تبين شي يا امي
طفله وهي تشوف ابوها تعبان ومرهق : لا سلامتك اهم شي ارتاح الله لا يخليني منك وهي تسلم على يده
*********************
استمرت الذكرى بصالح لذاك اليوم
صالح طارت عيونه وهو يشوف ابو عبد العزيز طايح بالارض وغرقان بدمه
التمو الرجال على ابوعبد العزيز
ابو خالد : وهو يحط يده تحت كتوف ابو عبد العزيز ويناظر بصالح وش سويت وش سويت ذبحت الرجال ذبحته صالح بخو ف
والله ماسويت شي البندق ثارت فيه والله :
: شيلوه خل نلحق نوديه للمستشفى فيه قريه قريبه بسرعه
نط صالح وهووللحين ماهو مستوعب اي شي فتح باب سيارته ودخلوه بسرعه وانطلق بسرعه جنونيه وهو كل شوي يلتفت
بشر يابو خالد وشلونه هالحين
ابوخالد : وهو يحط شماغه على الجرح يبي الدم يوقف بس ما يوقف كان الدم غزير
: والله ياخوك مدري دمه تصفى
شوي بدى ابو عبد العزيز يكح دم ووينازع ويتحشرج وصالح يقول لابوخالد شهده شهد ه ياخوك
ابو خالد: قل اشهد ان لا اله الا الله وان محمد رسول قل
لا اله الا الله وان محمد رسول الله
نطقها بصعوبه وهو بين كل كلمه والثانيه يكح لمن فاضت روحه وصالح يشوف ماحس بدموعه وهي تسيل
مات مات وانا اللي ذبحته
ابوخالد يبكي بصمت وهو حاط ايده على عيون ابو عبدالعزيز
صمت رهيب في السياره لمن وصلو المركز الصحي
وتم تبليغ الشرطه بالحادث
سجن بعدها صالح بتهمة القتل الخطأ وانتظار تنفيذ الحكم حتى بلوغ القصر يا يطالبون بالقصاص او العفو والان تمت عشر سنوات واولاد ابو عبد العزيز رافضين الديه والعفو ويطالبون بالقصاص
**********************
راحت وضحى مع ابوها لزيارة طفله وامها و فرحت فيها طفله وهم طالعين اصرت ام محمد ان طفله ترجع معهم
ام محمد : اسمعيني يا حبيبتي امتس الحين ماتحس با احد روحي ارتاحي وتروشي وغيري وشوفي ابوتس يحتاج شي ومن بكره ارجعي عند امتس
طفله : ما اقدر يا خالتي قلبي مايقوى اخاف توعى وتنادي ما تلقاني
وضحى : هي الليله بس ارجعي معنا شوفي شكلتس وشلون صار
طفله بكل تردد طيب بروح عشان اشوف ابوي اعشيه يمديه ميت من الجوع
ام محمد : والله ما تعشين انت وا بوتس الا عندنا فاهمه ويله الحين بنمشي يله
طفله راحت عند امها و حبت راسها وكلمتها كنها تسمعها : يمه انا بروح مع خالتي ام محمد وبكره الصبح ان شاء الله راجعه لتس ؟
********************
باد ي شاف ابو محمد بالمسجد وعلمه ان بنته عندهم في البيت
ابو محمد : وش سويت بموضوع بنتك
بادي : رحت لأبوها وعلمته
ابو محمد : اشوى الحمد لله وعساه ما تعصب عليك وهاوش
بادي : لا زي ما انا غلطت هو بعد غلطان بس فرح فيها مره ويبيني اعلمها هالاسبوع وانا والله مدري شلون اقولها اخاف تزعل علي وتكرهني
ابومحمد : الله يعينك ويقويك بس خلنا من هالسالفه وتعال معي للبيت تعشى وخذ بنتك معك
*** *********
اشواق : طفله امي تقولتس انزلي تعشي ابوتس بعد شوي بياخذتس
طفله : مالي نفس والله كل بالي عند امي
منيره : تعالي امي مسويه عشى ومتعبه نفسها عشانتس وتقولين مالي نفس
طفله : يا حبي لها خالتي ما في مثلها الله يسعدها
نزلو للعشى وكل وحده تجيب لها سالفه لمن راحت طفله مع ابوها
****************
ابو مساعد جمع عياله وعلمهم ان لهم اخت واسمها طفله
هند بفرحه وصراخ : الله يبه انت متأكد ان عندي اخت
ابو مساعد : ايه متأكد
هند وهي تنط تحب ابوها على راسه وتكلم امها : مزنه ابوي اشطر منتس جاب لي اخت وانت بس شاطره تجيبين من هالعيال
خبطتها امها بعلبة المناديل : بنت عن قلة الادب
كملت ننطنطتها وفرحتها
الا على دخلت خالها فهد
خالي فهوووودي عندي خبر عجيييب ماراح تصدق
فهد:وش عندس يالدلوعه
هند وبكل حماس : طلع لنا اخت جديده
فهد وعلامات التعجب بانت بوجهه : وش تقولين يا خبله
هند : اقولك طلع لنا اخت
فهد : ومنين طلعت لكم هالاخت نمتي ولقيتيها تحت المخده مثلا
مساعد وهو جالس هذي الله يسلمك اختي من امي وابوي كانت عند خالي بادي
فهد : اها !!!!
مزنه قاعده وبالعه غيضها وساكته تغلي من القهر كل تفكيرها وشلون يعلمها ابو مساعد مع عياله المفروض اني اول وحده تدري بذي السالفه
طيب انا اوريك كذا تحطني قدام الامر الواقع
كل واحد تقبل الخبر بطريقته بس فرحت هند بوجود اخت لها غطت على الكل
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك