رواية ايامنا الحلوة -5
خالي فهوووودي عندي خبر عجيييب ماراح تصدق
فهد:وش عندس يالدلوعه
هند وبكل حماس : طلع لنا اخت جديده
فهد وعلامات التعجب بانت بوجهه : وش تقولين يا خبله
هند : اقولك طلع لنا اخت
فهد : ومنين طلعت لكم هالاخت نمتي ولقيتيها تحت المخده مثلا
مساعد وهو جالس هذي الله يسلمك اختي من امي وابوي كانت عند خالي بادي
فهد : اها !!!!
مزنه قاعده وبالعه غيضها وساكته تغلي من القهر كل تفكيرها وشلون يعلمها ابو مساعد مع عياله المفروض اني اول وحده تدري بذي السالفه
طيب انا اوريك كذا تحطني قدام الامر الواقع
كل واحد تقبل الخبر بطريقته بس فرحت هند بوجود اخت لها غطت على الكل
* ************
ام محمد جلست جنب زوجها
وش فيك اليوم منت خالي وراك علم
ابو محمد :وش اقو لتس والله بادي قالي سالفه ماتنصدق واشغلني فيها
ام محمد : خير ان شا الله
ابو محمد جيبي لي ما ء والبنادول صدعت راسي هالسالفه
ام محمد هالحين وضحى لاحقتني بالما والبنادول جنبك بالدرج الصغير
ابو محمد : شوفي يا ام محمد هالكلام لا يطلع لا حد ناظر فيها وهو يقول : تصدقين ان طفله ماهي بنت بادي
ام محمد شهقت وحطت يدها على صدرها : ايش!!!! شلون ماهي بنته اجل بنت من ؟؟؟
ابو محمد : بنت اخته وهو اللي مربيها
ام محمد والبنت تدري والا لا ؟؟
ابو محمد : طبعا لا حتى انه مسجلها با اسمه
البارح راح لأبوها وعلمه عنها
ام محمد : ليه هي كانت عنده وابوها ما يدري ؟؟؟
ابو محمد : ايه ووقام علمها السالفه كلها
تمو يتكلمون ومدروا باللي سمعهم وعرف سر بادي وطفله
الجزء السابع
انفرط الاسبوع وبادي كل يوم يروح يحس الوقت
يخنقه ما قدر يصارح طفله بالحقيقه
راح للمستشفى وهو يكلم نفسه : خلاص بقولها
واللي يصير يصير الله يربط على قلب بنيتي
وان شاء الله ما تزعل مني يارب انت اعلم بحالي
يارب واعلم ليش سويت كذا ياررررب
لمن وصل لباب غرفة زوجته وفتح الباب لقى
الغرفه خاليه مافيها الا السرير
طلع وناظر برقم الغرفه نفس الرقم
رجف قلبه وحسه بيوقف طلع رايح للدكتور 00000 معقوله !!!!!!!!
فتح الباب لقى الدكتور جالس واول ماشاف بادي تقدم له
بادي : وين زوجتي وبنتي يادكتور
الدكتور: اهلا ياحج بادي اهدا اهدا ومسك
يد بادي وجلسه على الكرسي
بادي : رحت للغرفه لقيتها فاضيه وينهن
الدكتور : الحجه تعيش انت ياحج
توفاها الله بعد صلاة الفجر
بادي على انه عارف انها كانت
بأيامها الاخيره الا انه صدم ودمعت عيونه
جت بباله بنته حبيبته يا ربي الحين وينها فيه
بعد وفاة ترفه : البنت اللي كانت مرافقه معها وينها
الدكتور : معرفش بس اسأل في الاستقبال
قام بادي مثل المجنون وصل الاستقبال وسئلهم عرف
انها منومه اخذ رقم الغرفه وطيران عندها
***************
تحدد يوم القصاص وفشلت كل محاوله لجعل اولاد
ابو عبد العزيز يقبلون الديه ويعفون عن صالح
بعداسبوع القصاص بعد اسبوع بتيتمون
عيالي صدق بعد اسبوع بتترمل ساره
تفكير صالح زاده هم على همه يااارب يااااارب
كان كله هم ودموعه متحجره بعيونه
تحرقه رافضه النزول مخنوق من الضيقه
من الهم قام راح توضا وصلى وطلب
ربه يفرج له كان يدعي وهو موقن
بالأجابه من رب العالمين
كانت دعواته تتكرر بصدق ودموعه تسيل
تلسع خدوده بس ما استحى من ربه ياااارب
يااارب لا إلة الاانت
الله العظيم الحليم . لاإلة الا الله رب العرش العظيم
. لا إله الا الله رب السموات ورب الارض
ورب العرش الكريم
. لاإلة الا انت سبحانك إني كنت من الظالمين
لا إِلَه إِلاَّ اللَّه العظِيمُ الحلِيمُ ،
لا إِله إِلاَّ اللَّه رَبُّ العَرْشِ العظِيمِ
، لا إِلَهَ إِلاَّ اللَّه رَبُّ السمَواتِ
، وربُّ الأَرْض ، ورَبُّ العرشِ الكريمِ .
اللهم رحمتك أرجو
فلا تكلني إلى نفسي طرفة عين ِ
وأصلح لي شأني كله لاإله إلا أنت الله ،
الله ربي لاأشرك به شيئاً .
**************
بادي دخل على طفله الغرفه لقاها متكومه
على نفسها متلفلفه بعباتها
ومتنكده من الصياح حط يده على راسها
: يمه طفله قومي يمه
طفله فتحت عيونها وتملت عيونها دموع
: يبه امي ماتت يباااااااه
لمها بادي لحظنه :قولي اللهم اجرني
في مصيبتي واخلفني خير منها
طفله وهي مستمرها ببكاها : يباااااااااااه ماتت
وانا جنبها ما حسيت فيها ماتت وانا نااااايمه
بادي يابنتي :الحمد لله المفروض
انتس تحمدين الله انها ارتاحت امتس كل عمرها
تعاني الحمد لله راحت للي ارحم مني ومنتس
طفله وهي تمسح خشمها بطرف منديلها :
الله يرحمتس يمه ويغفر لتس
ودخلت بموجه من البكاء المرررر
جلس حاضن بنته ويهديها لمن جت
ممرضه فكت المغذي اللي في يدها
وقالت له تقدر تاخذها خلاص
**********
ام ماجد من سمعت خبر وجود طفله
وهي زعلانه على ابو مساعد وكاتمه
بقلبها تبي بس احد ينكشها حتى تنفجر فيه
وابو مساعد ولا درى عنها دايما
مهمش وجودها تحس وجودها بحياته
مجرد ام لعياله عارفه من بداية
زواجهم من 16 سنه انها غير وزوجته طفله
غير عمره ماجرحها بكلمه بس
احساسها بهذا الشي موجود تعرف ذي الحقيقه
ومتأكده منها ماعمره شاورها ولا اخذ
رايها بشي يخصه او يخص مساعد
مساعد اللي تحبه وتغليه كنه ولدها
والااخوها الصغير بس لازم يعرف
حاسه اني بموت من القهر لازم
000 ماهو بخسران شي لا
علمني انا قبل عيالي
كانت جالسه بالصاله ودلتها قدامها
وفنجالها بيدها فاضي من فتره وهي
ماسكته وتسوي فيه خطوط ودواير على الزوليه دخل عليها فهد
وجلس عندها : مسى الخير يام ماجد
ام ماجد : هلا فهد مسى النور
فهد: عطيني بالله فنجال قهوه من امس ماتقهويت
مدت له الفنجال وهي ساكته
فهد ملاحظ سكوتها من كم يوم عارف ان بخاطر اخته شي هو الوحيد اللي يلاحظ مزاجها لا تعكر
فهد: بيعينا بالسوق ياام ماجد
ام ماجد : اشتريك ياخوي اشتريك
فهد : علامتس يا مزنه ليش خاطرتس متعكر
ام ماجد وهي بخاطرها ليت ابو مساعد يحس فيني
مثل ماتحس فيني ياخوي : ابد يافهد تعبانه شوي
فهد: تبيني اقولتس وش مكدرتس ؟
مزنه رفعت عيونها له : دايما يافهد كاشفني
كنك مرايتي الله لا يخليني منك ضيقه وبتروح
ان شاء الله ماعليك مني
فهد وهو يمسك يدها بحنان
: شوفي انتي تكدرتي من بعد
ابو مساعد ما علمكم ان له بنت من مرته الاولى صح
لا تزعلين يا اختي انا حسب
ما عرفت من مساعد انه ما كان يدري عنها
مزنه: لاياخوي والله
اني ما زعلت عشان
كذا بالعكس والله اني فرحت لهند الحمد لله صار لها اخت
فهد تبسم وهو
يذكر هند وخبالها واستعدادتها لأختها
: شوفي انا عارفتس وعارف طيبة
قلبتس بس انتي زعلتي وابي اعرف سبب زعلتس
مزنه: وهي تتنهد وتغيرمن وضع
جلستها : اسمعني يافهد تدري ان ابو مساعد
يوم علم عياله علمني معهم تدري اني بلعت
غصتي يوم يسفهني ولا فكر انه يقولي!!! علم
مساعد قبلي ومالومه اخته من امه وابوه بس
انا لها الدرجه ما استاهل انه يقولي ويعطيني
خبر كذا يرمي الخبر علي ويبيني اتقبله بكل فرح !!
ليش دايما انا عنده اخر شي 00 اخر شي ليش ؟؟
فهد: يابنت الحلال امسكيه وعلميه باللي
بخاطرتس لا تسكتين وتحبسين بقلبتس والا ترى انا بعلمه
مزنه : لا تعلمه تكفى خلا ص
انا بطريقتي اقوله
فهد : اوعديني يا مزنه ا نتس
تقولين له كل اللي قلتيه لي
لازم يدري بضيقتس اذا سكتي
وعلى قولتس بلعتي غصتس هو
وش يدريه لوميه عاتبيه بس
طلعي اللي بخاطرتس لا يسير
لتس شي وتطيحين
علينا والا والله اني لا اعلمه انا
مزنه تمسح دموعها :اوعدك يافهد و الله لا يخليني منك
مد لها فنجاله : ولا منتس يا ريحة امي انتي
0000 صبي لي وقربي التمر
********
ثالث يوم العزاء
السلام عليكم يا بنات
ردن البنات وعليكم السلاااااام
اشواق : هلا بنوف تعالي شوي ونسينا شوي
نوف :ليش وش شايفتني مهرج
وهي واقفه فوق روسهن
وضحى لا يا ربي من قال اجلسي بس
اشواق: بكره بتروحين للمدرسه
نوف لا طبعا
اشواق" اجل حتى انا بغيب معتس
وضحى وهي تخصر : وليش ان شا الله بتغيبن "
نوف واشواق " يناظرن بعض ويضحكن الحين
عندنا حالة وفاة جارتنا ماتت الله يرحمها
نوف هي تشهق " يمه وانا ماره مجلس
الحررريم شفت ابلا نوره ناظرتني نظره
حسستني اني بالفصل
اشواق : هههههههههه يختي ذي الابله شديده
مرره ما عمري شفتها مبتسمه
وضحى : طفله تذكرين ابلا نوره صح
طفله : اكيد يا حبي لها
وضحى طيب امشي ننزل اكيد جايه تعزيتس
ونزلت طفله ووضحى وسلمت على ابلا نوره
وقعت جنبها
بعدها بشوي بدى المجلس يفضى من الناس
ارتفع صوت ابو محمد ينادي بالصاله
يا ام محمد : شوفي ترى جاتس ضيوف
ام محمد وهي تفز : حيا هم الله
وراحت تستقبلهم والبنات معها
الا دخلت عليهم حرمتين
وام محمد ترحب وتهلي وهي ما تعرف من
دخل عليها
السلام عليكم ورحمتة الله
ام محمد : وعليك السلااام ورحمة
الله وبركاته
ياهلا ياهلا يالله تحي الضيوف
ام ماجد : هلا فيتس
والمهلي ما يولي
انا يا امحمد 000 صح انتي ام محمد
ام محمد : اي انا ام محمد
: انا ام ماجد زوجة ابو مساعد زوج اخت بادي
جاركم وهذي بنتي
الجزء الثامن
في مجلس الحريم في بيت ام محمد
ام ماجد : وينها طفله
وهي تناظر بالبنات اللي واقفات
تقدمت اطولهن وكان الحزن مرسوم على وجهها
:انا طفله يا خاله ومدت يدها تصافحها
ام ماجد : عظم الله اجرتس يابنتي واحسن الله عزاتس
طفله : اجرنا واجرتس ياخاله
تقدمت هند وحضنت طفله : عظم الله اجرتس
طفله بعدت نفسها وهي متعجبه من هند : اجرنا واجرتس
ام محمد: هذلي بناتي وضحى واشواق
سلمن على ام ماجد وجلسن ام محمد جنب ام ماجد
وطفله جنب ام محمد وهند جنب امها
ووضحى تصب القهوه
هند كانت متحمسه على الاخر قربت من امها
: يمه شوفيها ياقلبي عليها نسخه من مساعد
بس على ا حلى
قرصتها امها : اوووش ابوتس يقول لا تجيبون سيره
هند وهي تهمس : يوووووووه ليش بلله!!
احسن وقت هالحين مره وحده خليها ترجع معنا
ام ماجد ناظرت بنتها نظرة : خلاص اسكتي
جت وضحى وجلست جنب طفله
طفله : تصدقبن يا وضحى توني ادري ان عندي عمه
وضحى بقلبها يا عمري انتي ماهي عمتس امتس امتس
: صدق !! وليش ما تعرفين ان عندتس عمه
طفله : مدري والله بس ابي اسأل ابوي
وبشوف ليش ما كد قالي
وضحى : يمكن عشانها متوفيه من زمان
طفله : يمكن ...
ام ماجد : يله اسمحو لنا جينا نعزي ونشوف طفله
وجعلها اخر الاحزان
وسلمت على طفله وطلعت هي وهند
********
في بيت ابو محمد مجلس الرجال
بادي شاف ابو مساعد داخل للمجلس هو وولده مساعد
بردت عظامه وعجز يقوم
اقبل عليه ابو مساعد وحب راسه
: عظم الله اجرك يا خوي واحسن الله عزاك
بادي الله يجزاك بالخير اجرنا واجرك
مساعد حب راس خاله وعزااه
وجلسو في المجلس الخالي الا منهم
بادي بعد وفاة ترفه اتصل على ابو مساعد وبلغه عن اللي صار وانه ما قدر يقول لطفله شي
بادي كان جالس على اعصابه وخايف من جيت
ابو مساعد خايف يطالبه يشوف طفله
ابو محمد حاس بالجو المتوتر بوجود
ابو مساعد وبادي
قال : اذكرو الله يا اخوان
لا اله الا الله الجميع تمتم بها
بادي : مال على ابو مساعد
: ياخوك ادري اني تأخرت عليك بس انت لازم تعذرني
واالله ما قدرت والله ودمعت عيونه
ماهي بسهله علي
ابو مساعد : الله المستعان هي شلونها الحين بعد وفاة امها
بادي : صابره
وناظر بابو محمد : الله يجزاه ابو محمد حلف علي تقعد
مع بناته عشان تسلى
ابو مساعد : ابو محمد ونعم والله فيه رجالن اجودي
الله يجزاه بالخير
بادي : تراه يدري عن طفله وانها بنتك
ابو مساعد : زييييين زين
بعدها بدقايق
مساعد قام وسلم على خاله : اسمحلنا ياخال بنمشي
بادي : الله يسهل دربكم
مساعد : ياخال بشرني عن اختي عساها بخير
بادي : طيبه الحمد لله ومسك يد مساعد وشد عليها
: سامحني يابوك حرمتك من اختك
مساعد وهو يحب راس خاله : لا تقول كذا يا خال
يمكن انا لو انحطيت بمكانك سويت نفس الشي وهذا
اللي الله كاتبه علينا
بادي : الله لا يحطك بمكاني ياولدي
مساعد : يله نشوفك على خير
وسلم على ابو محمد وطلع
ابو مساعد : يله نسلم عليكم
*********************
صالح باقي له يومين وبعدها يتنفذ الحكم
كان بس يصلي ويدعي ان الله يغفر ذنبه
ويرحم ابو عبد العزيز
ويربط على قلب ساره ويلهمها الصبر
وهو في عز همه تصور يوم القصاص وسالت دموعه
يافــــلاح .. الـــهم خيم بقلبي يا فلاح
كيف تبغاني اسولف وانت خابرني عليل
ويش قولك في عليل في حياته ماستراح
تنتثر دمعة عيونه لاظلم الليل الطويل
حالته لا ماتباعد حال الجريح الطريح
بالخطاء راحت حياته والخطاء ماله مثيل
كان ويـّــا صاحبه اثنين في ارضٍ براح
يطردون الصيد دايم من صبح لين المقيل
اجمعتهم صحبه الدنيا على جد ومزاح
مايهابون الليالي والحمول اللي تميل
ماقتل عامد ولكن ثور بليس السلاح
بالخطاء ثار السلاح ووين يلقا له دليل
وانعقد سجنه وربعه تنتظر فك الصراح
والأكيد إنه سجين ومارضوا ربع القتيل
هـــلّ دمعه يوم صلى ركعتين في الصباح
في نهار الجمعه اللي مر ثقيلٍ في ثقيل
هلل وكبـر ونفسه تذكر اللي راح وراح
كان في ربعه عزيز وذله الوقت الذليل
لا بسمه ولا نوف ولا نايف ولا فلاح
كلهم كانوا على باله ودمعه هميل
حان تنفيذ القصاص وغطوا الراس بوشاح
وجاك سيافه يشيل السيف ابو حدٍ صقيل
وارتخى راسه وزاد الموقف الحامي صياح
بين نوح وبين دمع وبين صيحات وعويل
وارتفع صوت الحشود وزاد نايف وصاح
يايبه تكفى دخيلك تستمع قول الدخيل
يابيه وشلون نصبر وكيف نهجع بارتياح
وانت من دنيا عيالك تاخذك بر الرحيل
يا نايف هاك علمي واحفظه قبل المراح
انتبه لخوانك وبالك عليهم لاتعيــــــــل
الله الله في الصلاة والصيام والصلاح
والله الله في امكم والله لكم بعدي كفيل
وغمض عيونه ونفسه تطلب الله السماح
رافع سبابته مظلـــــوم والله الوكيــــــــل
وسل سياف الصفا سيفه وطقه ثم طاح
راس المراجـــل وانتثر دمــه يسيـــــل
غسلوه وكفنوه ثم فاح طيب السدر فـــاح
خلني ساكت ودور غير هالقصه بديل
((منقوله مع بعض التعديل ))
************************
هند وهي حاضنه ابوها : يبه متى تجي طفله عندنا
ابو مساعد : بتجي ان شاء الله بس وفاة امها اجلت الموضوع
هند: الحين انا وش يصبرني يبه ليتك شفتها تهبل
والله عرفت انها اختي او ل ماشفتها
ابو مساعد: أيالنصابه وشلون عرفتيها
هند : نسخه من مسيعيد
بس هي احلى نحيفه وطويله وحلللوه
: منهو مسيعيد يالنمله
هند : من قال مسيعيد انا قلت الشيخ مساعد
مساعد: ايه كذا تسنعي يالنمله
هند : تدري مساعد قصدي الشيخ مساعد ان اختي حبيبتي
تشبهك مررره
مساعد بلهفه : والله
ام ماجد : اي ماشاء الله عليها كلها انت يا مساعد
مساعد : يا رب تعجل بلقانا والله اني من شوقي
ودي اطير لها
هندك تكفى ودي اطير معك
مساعد : استريحي انا اول وبعدين افكر
هند: مسيعيد والله لو ما تاخذني معك ازاعلك
مساعد: مسيعيد هاااه !!!!
الحمد لله الله رزقني باخت ثانيه والا من اول ماعندنا الا انتي يالنمله
هند: احووووووووووول لا عاد تناديني نمله
وهم في جلستهم دخل عليهم فهد
السلاااااام عليكم وجلس جنب اخته وحط راسه على رجولها
وش عندها هنوده صوتها يلعلع
هند : شف مساعد مسك علي كلمتك يالنمله انت اللي بديت بها يله خلصني منها
فهد : وانا صادق انت نمله يالله تبانين من نحفتس
هند : لا خلاص بتجي اللي انحف مني
فهد : منهي اللي انحف منتس
مساعد حاول يغير الموضوع : فهد اليوم شفت خويك سليمان وسألني عنك
فهد عرف ان مساعد غير الموضوع
: اي سليمان يا حليله وينه من زمان ماشفته
هند: حذفت المناديل على مساعد من حرتها وهجت
فهد فك ضحك على بنت اخته
مساعد وهو يضحك : يمه مزنه بنتس ذي مرجوجه الله يخلف عليتس
مزنه وهي مبتسمه : الله يصلحها بس
ابو مساعد : انت صدق تبي تروح لخالك واختك
مساعد :اي والله ودي اشوف احوالهم وش صار علمها والا للحين
ابو مساعد : يبه لا تصير عجل خالك لا علمها بيتصل
مساعد : معليش انا بروح يمكن انا اللي اقول لها
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك